Ответ, 87.

Мы приемлем не точию сего святоцерковнаго правилописца и преподобнаго во иеромонасех Матфея словеса, но и прочия всесоборныя правила, и все божественное писание. Приемлем же пчелоподобне, не от единаго какова цвета, ниже от единаго коего любо вертограда, дивный всепредивнаго ведения соизводити желающе: но от различных святаго писания всепрекрасных цветников, от разных святых богословцев всепречудных садов историописания вертоградов, всесладчайшую познания сладость обрысующе объемлем, во едино разумение слагающе, многоиспытательно оная во страсе Божии осмотряем. И аще елико обретаются догматическая, елика законная, елика смотрительная, если таиньственная, если чиновная, если литерная, если аллегорическая, аще во спасение, аще ко спасению нужднопотребная суть: вся сия доброиспытательне обрысующе, един всеяснаго и добраго услаждения всепресладчайший разума всеспасительнаго соглашения сот сотворяем, по всепресладкому Спасову гласу [Иоанна, зач. 17]: "Ипытайте писания, яко вы мните в них имети живот вечный". Сего убо доброиспытательнаго держащеся обычая, ревнующе святодревним учителем, повелевающим разсуждати время, лице, вину и ум глаголющаго: аще же не тако и иначе поступающим, сказуют не что ино получити, разве душевредность богомерских ересей, и горняя долу превратитися.

Якоже от оных вселеньский учитель Афанасий Великий глаголет сице [Иосиф Волоц. глава 15, в Потребнике иноческом]: "Яко подобает хотящему разумети божественная писания, истязовати со многим опаством плоды, и лице, и ум глаголющаго. сего ради глаголет божественный апостол, яко писмо убивает, Дух же живит. понеже много от божественных писаний, аще не по писанию разумеется, то плоды Духа истязовати со многим опаством сокровенная в божественных писаниих, и сего убо Дух живит. не разсуждаяй же сия, но по писмени разумеваяи, и сего убо писмя умерщвляет. и того ради во многия ереси впадают".

Тако и преподобный Никон Черногорский в книзе своей заповедей пишет: "Аще (рече) не разсуждаем время и вину, и различие вещи, но яко по смотрению глаголанная или бывшая, объятно на всяко время приемлем, главою снити имамы, и горняя долу будем". Слово 2.

И от сих убо предложенных, дающих нам всеопасное разсмотрение в священном писании, сходяще на разсуждение глаголанным от преподобнаго Матфея канониста: не яко оному в презорство предлагающе, но яко праведно с прочим святым писанием соглашающе, разум оного речения, еже есть от еретик действуемое крещение, божественным нареченное, и от них (еретик) крещение, приимати сказующее, зде разсмотряюще, и противу вашего непщевания тако доводствуем:

1-е: Преподобный Матфей правилописец, во указанном вами месте, состава а, во главе 2-й, пишет о 2-го чина еретиках, о них же и от тебе вопрошаемся: "Арианы (рече) и македонианы, и саватианы, и наватианы, глаголющих себе чистых, и левыя, и четверонадесятники, иже и средники, и аполинарианы, понеже точно нам божественным совершаются крещением, не мнится быти подобно покрещевати". До зде Матфей.

Но сей правилописец объявляет точию смотрительной случай приятия сих еретиков, якоже о том в 44 ответе, в разделе 7-м довольно объявихом. А якоже он и сам выше о тех же еретиках, сиречь воздержниках, на правило 47 Василия Великаго тако протолкует: "Василий (рече) знамена о воздержницех, еже не достояше, маркионитския бо есть явственно, яже в них ереси прозябления. якоже бо они, сице и сии, брака гнушаются, сатанин быти той отрицающе, одушевленных отрицают снеди, и тварь Божию скверну быти блядут. да не глаголют убо, яко во Отца и Сына и Святаго Духа крещаются, иже злым Творца Бога глаголюще". И прирек: "но да не опасения держащеся, ленивейших сотворим сих, ко еже соборней приступити церкви. да приимемся, рече, обычая, и устроившым о них отцем последуем. якоже онем мнится помазуемым быти святым мvром, сице священи да причащаются". До зде Матфей.

Зри, яко не достояше тех крещения, рече, приимати, зане по маркионову мудрствуют о тварех, аще и во имя Отца и Сына и Святаго Духа крещающеся глаголют. Но на что сниде; яко рече да не опасающихся онех сотворим покрещения к соборней приступати церкве: но последуем обычаю, обычаю рече, а не законному и обдержному повелению. И якоже отцы устроиша (си есть по смотрению), еже мvром помазовати онех, тако и мы последуем. Сице убо преподобный Матфей и в последующем толковании на 7-е правило 2-го вселенскаго собора написа, не яко непременный и обдержный закон извести быти, но смотрительный от отец изложенный обычай назнаменова, о чем и в 44-м правиле, в 7-м разделе показахом.

2-е: Воньмем же и сему преподобнаго Матфея речению, еже божественным крещение еретическое сказующему быти. Аще убо возмним быти по их еретическому мудрствованию преподобнаго отца рекша, то яве противу всего священнаго писания, и всех святых учителей церковных борющася его поставим, якоже предъидущее покажет слово.

Понеже аще Агрипин, епископ Карфагеньский, всех еретик крещение еретическим и не крещением нарицает [Бароний, в лето Господне 217], убо и не есть божественное их крещение.

Аще Тертулиан [Бароний, лето Господне 217], бывый еще православен учитель, всех еретик, верующих не в того Христа, Егоже мы веруем, такожде и крещающих показует: убо и не есть божественное их крещение.

Аще священномученик Киприан со освященным собором [Бароний, лето Господне 221] от еретик творимое крещение еретическим и не истинным, и не могущим вменитися в крещение нарицает, и крестить всех повелевает: убо и не есть божественное их крещение.

Аще на первом вселенском соборе отцы от Павла Самосатскаго в три погружения крещение не приявше и еретическим нарекоша [правило 19]: убо и не есть таковое крещение божественное.

Аще по первом вселенском соборе на Лаодикийском поместном 7-м правилом отцы приявше фотинианское крещение, яко точное нашему: последи же разсмотри толкователь того собора, яко началник тех еретиков многи обнови ереси, и сведе оных в чин крещаемый: убо таковое крещение и не есть божественное.

Аще Великий Василий в 1-м своем правиле воздержников и прочих подобных прия крещение по смотрению, якоже толковник Алексей Аристин объявляет, а в 47-м, по смотрению приятое, повелевает законне отлагати: убо такое крещение божественным и не имать нарищися, якоже и есть: ибо в толковании 1-го правила речеся, яко Дух Святый оное оставляет, темже и божественное не суть.

Аще другий, Великий Афанасий [слово 3, на ариан], от оных показанных от Матфея еретиков, ариан творимое крещение похуляет, и не крещением, но осквернением нарицает: убо и не есть таковое крещение божественное.

Аще и ин, вселеньский учитель Кирил Александрийский [слово 112], от еретик даемое крещение осквернением нарицает: убо и не есть божественное их крещение.

Аще от вселеньских учителей изящнейший и богословию тезоименитый [книга Григория Нанзианскаго, слово 24], о арианьском крещении громогласно взывает, яко от них крещение не в возрождение (си есть не во оживление), но во умерщвение совершается: убо и не есть божественное. Аще бы было божественное, то бы возъоживляло, а не возъумерщвляло.

Аще святейший Иоанн, митрополит Никейский [в Кормчей старопечатн., слово на армен], арменьское крещение, тогда и ныне точно действуемое, скверным и проклятым, неблагоприятным и непотребным нарицает. Темже, о чудный вопросителю, како таковое крещение может божественным нарещися; воистину не может. Якоже он рече: от диавола духовное и святое дело не совершается, убо и не есть духовное и божественное.

Аще святая церковь, в Катихисисе велицем, таковое же крещение, якоже и правоверное, но от еретик творимое, инаким и нечестивым нарицает: убо и не имать божественным нарещися их крещение.

Но что много приводити во свидетельство святых отец безчисленныя гласы. Аще сами боговидцы и богогласнии святии апостоли в 68-м правиле от всех без изъятия еретик крещение не крещением нарекоша. Убо может ли божественным тех крещение нарещися? Воистину не может.

Аще и сам преподобный Матфей Иеросалимский именуяй тако (си есть божественным еретическое крещение): вскую несогласно в x составе, во главе 12, на оное же 68-е апостольское правило пишет: "Аще (рече) от еретик хиротонию приял бе. отметаем бо таковех, яко крещение, сице и хиротонию. не бо освящение се, но скверну веруем исходатайствовати". Убо и от его глагол показуется, яко не есть божественное.

Темже убо, будет ли Матфей правилописец противляется с толиким полком святых отец? Не буди.

А понеже, якоже впреди рехом, таковое в вас непщевание от несоглашения божественных правил и богоносных отец гласов вниде, и не дивно помраченным в разуме, яко во мгле неведени шататися, и сице между святыми несогласие на вред и пагубу душам сеяти. Паче же вам, увязнувшим в сети еретическаго (в тайнах) приобщения, подобне за таковыя гласы по внешнему, а не по внутреннему и духовному разуму полагаемыя прииматися, и в самую оныя разумети в законность святыя церкви.

Но веждь, яко сей глагол от Матфея по литерам, а не по отношению написася. Понеже по естеству глагола разумети, то вси, якоже православнии, тако и неправославнии, Бога единаго на небесех быти (кроме отнюд безбожных) проповедуют, Егоже и Творца всей твари приемлют. Но по отношению, тии точию исповедают истинно, кия Его в трех лицех прославляют, и вкупе во святей кафолической церкви с православными соглашающеся пребывают.

Сице убо и арианьское, и прочих помяновенных еретиков от Матфея правилописца крещение, за ради именования в нем божественных ипостасей, точию по внешнему разуму божественным наречеся. Ради же их противнаго тем, такоже божественному и апостольскому и отеческому преданию, умствования, не суть может божественном нарещися, но еретическим и скверным, якоже и выше рехом. И сей разум, по риторическим правилам, может нарещися метонимическим, полагающим овогда вещь за дело, и дело за вещь.

Зри и приклади сему мнози. Якоже и самое крещение от еретик может нарещися по естеству не еретическим, аще оно будет по пределу святыя церкви, по отношению же к лицам еретичествующим: свойственнейше оно имать нарицатися еретическим, яко от еретик по залогу их развращения действованное, якоже о сем в 59-м ответе и в прочих явихом. Или оное древо, посреди рая бывше, могло ли по естеству нарещися зло? Никакоже, а по произволению падших и злым наречеся. Или и невернии нарицаются в писании Божии раби. Якоже о сем в Беседах апостольских в зач. 79, на листу 11: ко евреом, в нравоучении 56, на листу 3033: Ефрем на листу 119: апреля в 26-м, в житии Стефана Пермскаго: минея старописменная, февраля 26: в житии святаго Порфирия, минея старописменнная: и во учительном евангелии, в неделю 11. Ибо во всех сих местех именуются (невернии) Божиими рабами, но точию по созданию. По отношению же их противнаго мудрствования, и непокорения Божиим законом, не суть раби, но противницы Божии.

Сице убо и Матфей канонист божественным по случаю нарече еретическое крещение, не по разуму их еретическому, но точию по внешнему виду их действа: яко глаголы божественных ипостасей приглашаху, а не иныя кия поганьских богов.

Зри убо многажды и неверных еретиков, нарицаемых благоверными и благочестивыми, якоже о том пишет в Деянии святых апостол, в зачале 39-м, и в прочих историях: якоже Антонина кесаря и Консту зеленаго, иже погани суще, благочестивыми именуются. Или еретичестии царие, Константин, Анастасий, и Феофил иконоборец, благоверными и благочестивыми называются. О чесом зри церковных историографов: Никифора патриарха, Георгия Кедрина, Барония, житие святаго Савы Освященнаго, и в многосложном свитце святых отец, и в прочих безчисленных. Обаче тамо сии неверныя и злочестивыя лица нарицахуся, не по богопротивной их вере и ереси: но ради отношения к их по внешнему состоянию честности, или благонравию любо которому и снизхождению к христианом, или других ради внешних добродетелей. И прочия многия приклады церковныя писати оставляем: елика в нарицаниях зловерных патриархов, епископов и иереов: елика святейшими и римских пап, отступльших благочестия: елика в крестовидных образех. И прочая безчисленная нарицания по внешности предлагати за множество оставляем. И тем святая церквоь по случаю не погрешила в нарицании, по внутреннему же разуму отнюд того к тем нарицания не прилагаше. Убо и преподобный правилописец Матфей согласно со святою церковию, по внешнему разуму, тако арианьское и прочих еретик божественным нарече крещение, по духовному же еретическим и оскверненным непщуя тое быти, якоже x-го состава, во главе 14 показует.

Дата добавления: 2015-07-12