Ответ, 111.

Зде убо за должное возмнехом быти, еже остановитися при празе сего ответа, и созерцати евангельския проповеди трапезу, и вняти что суть евангелие, и что благовестие. А понеже якоже в начале евангелиста Матфея в предисловии евангелие благовестием нарицается, убо едино есть, еже евангелие и благовестие. Ибо по гречески, евангелие: по словеньски же толкуется быти благовестие.

Но внидем и в сие разсмотрение: все ли во святем евангелии благовествовано суть; и все ли в том, яже божественнейшая словеса писанию суть предана; якоже сам Христос Бог своими пречистыми усты во благовестии Иоаннове глаголет: "Еще (рече) много имам глаголати вам, но не можете носити ныне. егда же приидет Он, Дух истинный, наставит вы на всяку истину". Иоанн, зач. 53.

И паки: о многом и не писанном во евангелии Иоанн Богослов в своем благовестии глаголет: "Суть же и ина многа, яже сотвори Исус, яже аще по единому писана бывают, ни самому мню всему миру вместити пишемых книг". Иоанн, зач. 67.

Зри убо, яко и сам Христос Спаситель не все изрек, но остави глаголати и Духу Святому. Кто же бе глаголяй Духом Святым? яве есть во святей церкви апостоли и святии учители церковнии. Якоже апостолов верховнейший и учитель изыков глаголет: "Положи бо (рече) в церкви первое апостолы, второе пророки, третие учители". 1 коринфом, зач. 153.

Темже аще и обычаем содержимое от апостольских времен, паче же от Христовых, не не суть евангельским благовестием, или преданием нарицатися должно. Например рещи о оном чудосодеянном от самого Спасителя нерукотворенном образе, еже во евангелии не писанном, обаче святыми учители церковными поминаемом, яко от самого Спасителя есть содеянное: о чесом Иоанн Дамаскин в книзе 4-й, в главе 17, и прочии мнози воспоминают. Сице убо и не писанная суть во евангелии, обаче за евангельская предания могут почитатися. Яковая же суть и иная, якоже двоеперстное сложение, трисоставное креста Христова воображение, и символ крещения, в три погружения действуемый: и иная множайшая, яже не суть явственно в благовестии писанная, но неоспоримо, за евангельское предание могут почестися.

Сия же и иная премножайшая, в противность Христова благовестия, ныне россиянами суть отвержена, и не просто отвержена, но с клятвами и с злейшими порицаниями, яже в 21 ответе доволнейше суть показано. Темже великороссийская церковь не точию святых предание, но и евангельское и апостольское отринув отверже, и свое новое положив утверди, якоже во указанном ответе, и 44-м в 10-м разделе удобно увидиши. А еже чтут евангелие: но читаху и чтут, якоже вси древнии еретицы, тако и нынешнии латиняне, люторове и калвини, яко же в 109-м ответе явихом. Но от того пользы им святии учители церковнии не приписуют: но паче прелесть и лицемерство от сего оных быти познавается.

Дата добавления: 2015-07-12