Ответ, 116.

В каковом разуме нынешняя великороссийская церковь в символе веры некоторыя речения и литеры изменила, мы того не изследуем. Да и святая кафолическая церковь не по внешнему их образу и древних и настоящих еретиков судила, но по своему духовному. Да и вси, якоже древнии, тако и новии еретицы, не нагло погрешаху, но некако прикровенне, о чесом в 21-м ответе во второй части изъявихом. Обаче нынешняя великороссийская церковь и нагло спасительнаго имени Господа нашего Исуса Христа отмещется и похуляет, якоже в последующем изъявится. Но оставльше предисловие сего ответа, входим в самое показание о превращении символа, в коликих, и в каковых, и чему подлежащих превращениях символ православныя веры обретается.

Первое: Имя Господа нашего Исуса Христа, нареченное архангелом, пременено. И приложено ко Исусову имени литера (и), и глаголют: "И во единаго Господа Иисуса Христа Сына Божия".

Но сие их приложение по многим разсуждением познавается правому и древлеотеческому разуму несогласно и зело противно, сослагательно же еретиком, разделяющим едину ипостась Сына Божия в две ипостаси: о чесом нижеследующия доводы изъявляем.

1: Сия литера (и) по грамматике союз, а по осмочастному Иоанна экзарха слову различие сказуется. По грамматице же (и) союз чина предлагательнаго, знаменования спрягательнаго. В сочинении же союза. Союзи спряжения и разделения, равныя наклонения во глаголех, и равныя падежи во именех связуют и разделяют. Яко и в символе православия союзом чина предлагательнаго три ипостаси божествнныя разделяются, якоже есть сие: Верую во единаго Бога Отца Вседержителя. Се первая ипостась кроме союза есть. Егда же о второй ипостаси начинает глаголати, абие союзом чина предлагательнаго разделяет, глаголя: И во единаго Господа Исуса Христа Сына Божия. Егда же и о третией ипостаси начинает глаголати, паки темже союзом разделяет, глаголя: И в Духа Святаго Господа истиннаго и животворящаго, иже от Отца исходящаго. И сие явственно показуется, яко Святыя Троицы три ипостаси божественныя союзом чина предлагательнаго разделяются, якоже: Благославим Отца и Сына и Святаго Духа. Такоже и от триех апостолех: Петра, Иякова и Иоанна. Или о трех святителех: Василия Великаго, Григория Богослова, и Иоанна Златоустаго.

Сему подобно и о Исусове имени, аще во втором или третием лице, сице есть: Исуса Наввина, и Исуса Сирахова, и Исуса Оседекова. Аще в коемждо их имени (I) в начале и полагается, но яко второе или третие лице, того ради союзом чина предлагательнаго разделяется. Якоже и в Библии о Моисеи и о Исусе Наввине пишет [Исход.; в Мин. общей, на Господский праздник паремия]: "И востав Моисей, и Исус предстояше ему, взыдоша на гру Божию". Первое лице Моисеово кроме союза есть: второе же лице Исусово союзом отделяется, и глаголется со двема гласныма, усугубляемо и Исус, яко второе лице есть. А еже в символе ко Исусову имени союза онаго ниже в начале, ниже среди речении не полагается: но яко един член и едина ипостась Господа нашего Исуса Христа, тако и пишется виновным падежем: И во единаго Господа Исуса Христа Сына Божия.

Речеши ли, яко (I) в начале, а (и) среди имене положено суть, того ради не мниши быти разделению. Но понеже аще (I), аще (и), оба гласна еста нарицаются, оба верхнею просодиею единою ознаменована бываюта, оба един глас издают, оба един дух имеют. Не бо едина псилиею, а другая дасиею, сиречь густою и тонкою: но оба единою дасиею, сиречь тонкою, ознаменована еста. И аще един глас ею, един же и дух утончается, убо аще I, аще и, вначале положена еста [Граммат. о страс. речен., часть 4]. Аще ли, по грамматице, удвоение есть тогоже согласна слога, не творящаго среди речения усугубление, яко: боттею вместо ботею, варр вместо вар, и проч. Аще же полгласныя и безгласныя удвоения ради писмен усугубляются: кольми паче самая гласная и самогласная, усугубления ради писмен, сугуб глас издавати имут, яко: и Исус. Но сие имя Господа Исуса Христа, по грамматице, в собственных именех полагается, и по степенем, якоже прилагательное, не уровняется, и с предлогом не пишется.

Зриши ли искусное грамматическаго художества учение, яко имя Господа Исуса Христа со единою литерою писати учащее. И что убо достовернее, что же ли искуснее учения сего может быти.

Нынешния же новомудрствующия учители имя Господа Исуса Христа со двема литерома пишуще, не против грамматическаго учения: и не согласно есть древлеправославныя церкве восточным учителем: не сослагательно всем елико древлеписменным и древлехаратейным и старопечатным книгам, толико и к святым и чудотворным иконам, имеющим начертание с единою иотою, якоже выгорецких ответов, 50-го, статия 13-я, изъявляет. Аще убо не сослагательно, убо и церкви Божиии чуждо есть. Темже и ереси подлежащо обретается.

Ибо аще глаголати Господа, потом союзом разделив, Исуса Христа Сына Божия нарицати, то аки вторая ипостась от Господа союзом отделяется. Якоже и по осмочастному Иоанна экзарха слову, (и) различие сказуется, и посему два состава во Христе Бозе быти являются. Еже и свойственнейшо быти сие приложение союза ереси еретиков Херинта и Нестория показуется, учащим во Христе две быти ипостаси. О чесом Бароний, в лете Господнем 78: и в книзе Кирилове, во главе 28, на лист. 261 на обор., засвидетельствуется.

2-е: Яко со двема литерома пишемое имя Иисус, и пиитическому стихотворству зело не сослагательно показуется. Понеже, по блаженному Иоанну Дамаскину, сие имя стихом пишется амвическим, якоже в грамматице, в части 4-1, о стихотворстве извествуется. Амвический же стих в стихотворстве меры тако употребляется: Исус.

По новолюбцев же начертанию имя Иисус како может соблюсти меру амвическаго стиха; ибо ямва в том никако изобразити невозможно, разве непристойный к тому, нарицаемый по древнему стихотворству анапест сице: Иисус. Иже, по Иоанну Дамаскину, зело ямвическаго стиха меры отнюдствующ покажется.

Темже, не точию грамматическому правописанию и правоглаголанию имя Иисус сопротивно обретается, но и пиитическому стихомерству зело разногласно. Убо и суть познавается сие имя несогласное и иное, инаго изобразующее, убо и ереси есть сопричастно.

3-е: Не точию от нас сие может доказанием утвердитися, яко сие от новолюбцев имя пишемое Иисус инаго, а не самого Спасителя Исуса знаменует. Но и сами новолюбительствующии архиереи, яве от древлеизображаемаго святыми повсюдно, Господа нашего Спасителя имени отрицающеся, и не просто отрицающеся, но протолкующе быти во оном имени, си есть Исусове, некоего равноухаго и инаго Исуса. Якоже архиерей Димитрий, злобствуя на сие спасительное имя, тако подобожабно ругательно пишет: "В руском же (рече) языце раскольщики в две токмо силлябы глаголюще Исус, не исповедуют Спасителя и Исцелителя душ наших. и вправду в них ин Исус: не истиннаго бо Иисуса Спасителя и Исцелителя исповедуют, но некоего равноухаго Исуса". Розыск, часть 1, в статии 1.

Подобно сему и ин предерзостнейший хулитель архиерей Нижегородский на сие имя Спасителя нашего адодыхательне глаголет: "Яко (рече) с единою иотою пишемое имя Исус, не знаменует Спасителя, но равноухаго Исуса".

Виждь убо ты, усердный защитниче новолюбия, яко не точию по нашему разсуждению имя Иисус инаго знаменует Исуса: но и внешнии защитницы, новейшии архиереи, своего им Иисуса Спасителем нарицают, нашего же истиннаго, от архангела Пресвятей Деве пронареченнаго, Господа Спасителя, иным и равноухим нарицают. О дивства! новии учители своего Иисуса от нашего истиннаго Господа Спасителя Исуса Христа отделяют: своего же быти сказующе Иисуса Спасителя, нашего же Исуса Христа, истиннаго Бога, иным и равноухим нарицают. От вас же, о защитницы змиевы, за едино полагается: якоже Исус от вас Богом нарицается, убо Иисус такожде Богом именуется. Престаньте убо на обе бедре храмати, о Езавелиной трапезы причастницы! Идите вслед истиннаго и законнаго Бога. Или паки вам глаголем: аще сия мерзость тирская и сидоньская приятна есть, то идите вслед онаго Воала. Вскую убо ниже древнему совершеннейше последуете, и ниже новых учителей гласу всячески соглашаетеся. Аще убо они глаголют, яко Исус несть Спаситель, несть Исцелитель наших душ, не суть Бог истинный, но ин некий и равноухий: (оле несказаннаго долготерпения Твоего Христе Исусе!) убо вы ли можете самем архиереом, самем великоросийския церкве учителем вопреки что рещи, или оных мудрование злохульственное на правое превратити; никогда бо из блата злато и из тмы свет можете учинити.

Но убо явнейше о их отметании от истиннаго Христа Спасителя Исуса, духопрозрительнаго Иоанна Богослова сбысться о антихристе проречение: "Кто (рече) есть лживый; точию отметаяйся яко Исус несть Христос. сей есть антихрист". 2 послание, глава 2, зач. 71.

Второе: В том же символе о Сыне Божии написано: Рожденна не сотворенна. Без пред предлога (а), и не знаменающе противления арианскому зломудрию. Егда бо Арий еретик о Сыне Божии хульныя изрече, яко не рожден есть от Бога Отца, и не единосущен Ему есть, но сотворен есть.

Святии же отцы на 1-м соборе Ария еретика осудиша и проклятию предаша, Господа же нашего Исуса Христа рожденна, а не сотворенна, единосущна Отцу проповедаша. Такоже и в символе предаша церкви глаголати с предлогом (а не) иже знаменование противительное имущее: Рожденна а не сотворена, единосущна Отцу, имже вся быша. И сим предлогом (а не) знаменует арианскому зловерию конечное противление. Новомудрствующия же учители сие речение без противительнаго знаменования пишуще: но точию рожденна не сотворенна. А литеру (а) отъемше, помоществуя Арию еретику. И сим отъятием не знаменует арианскому зловерию конечнаго противления. Темже аще, по Максиму Греку, и единем азбуковным словом ересь в книгу вносится: коль паче в толицем благоговейне хранимом от всея церкви, и с великим опасением противнаго вмещения слове или начертании соблюдаемом, символе веры, ко ипостасем Святыя Троицы прилагаются и отлагаются зело дерзостне литероначертание. Яко (и) прилагается ко имени Исусову, тако (а) литера отъемлется, к противлению положенная Ариевой ереси. Ово приложением согласуются Несторию, ово же отъятием способствуют Арию, сопротивно же святей церкви, паче же святым богоносным отцем перваго вселенскаго собора.

Третие: В том же символе настоящее время царствия Христова изменено на будущее: Его же царствию не будет конца. Якоже архангел в благовещении Богородице прежде рожества Христова тако предрече: "Яко царствию Его не будет конца". Аще и истинну тогда рече архангел, но не нынешнему времени ключимо есть, но тогдашнему. Ныне же, аще родися Христос, аще воцарися, и царствует, то царствию Его несть конца. Но и евангельских словес всеблаженнии толковницы, сие место протолкующе, уже не глаголют: царствию Его (сиречь Христову) не будет конца, но несть конца. Якоже о сем Златоуст, такожде и Феофилакт, архиепископ Болгарский, в толковании 3-го зачала от Луки, утверждают.

Того убо ради ныне и церковь православная в символе светлым гласом прославляет, глаголя: "Егоже царствию несть конца". А глаголющии ныне будущим временем: Не будет конца, присвояются жидом, ждущим антихриста.

Четвертое: В том же паки символе и о Дусе Святем написано: И в Духа Святаго Господа животворящаго, а истиннаго оставлено. А яко обычай есть божественному писанию, ангела или человека свята, либо господина некоего господем нарицати. Но не глаголет же его господа истиннаго, понеже тварь есть, а не Творец и Господь истинный. Такожде и в символе написано, аки о тварех, о ангеле или человеце, тако и о Дусе Святем: и в Духа Святаго Господа, а истиннаго оставлено, по Македонианской злой ереси, иже Духа Святаго Господа истиннаго тварь быти глаголаше. Святии отцы на втором соборе Македония еретика осудивше, и проклятию предаша, Духа же Святаго Господа истиннаго воспроповедаша церкви глаголати: и в Духа Святаго Господа истиннаго и животворящаго, иже от Отца исходящаго.

Нынешния же новомудрствующия учители Духа Святаго истинным Господем нарицати в символе отложиша, но точию Господем, якоже выше рехом, наподобие некоей твари, сиречь ангела или человека, нарицают, якоже и в писании видится, к сим лицам господьственное имя прилагаемо, но кроме истиннаго. Сице убо и о Дусе Святем по новоизображению символа разумети есть: аще и глаголют Его Господа, но не истиннаго, аки тварь Того быти глаголюще, а не Творца и Господа истиннаго и животворящаго. Убо и есть согласно Македонию еретику духоборцу, и соединомудренно ему обретается.

Прочее о том же Дусе Святом Господе истинное в 118 и 119 ответех на ваши вопросы глаголати потребное имеем.

Дата добавления: 2015-07-12