Ответ, 118.

Благочестивый царь и великий князь Иоанн Васильевичь, самодержец всероссийский, слышаяй сие разноличне в символ веры, еже: и в Духа Святаго истиннаго и животворящаго, и еже: и в Духа Святаго Господа истиннаго, в России глаголющих, желаяй, чтоб едино согласие и в том сияло: и то собору не во утвержение предлагаше, но на разсуждение. Сверх же сего, желаше самую подлинность ведети: кое убо из сих с самым древлегреческим преводом будет согласнее. И сие убо не есть предел утвердительный, но предложный. Но святая древлероссийская церковь последующими времены зело согласно с греческих добрых преводов исправи, и извести едино согласие быти повсемественне, чтоб глаголано было: и в Духа Святаго Господа истиннаго и животворящаго, по согласию прочих дву ипостасей. Понеже в том же символе вышше, кийждая ипостась Богом или Господем истинным нарицается, убо благоприлично есть и Духа Святаго ипостась Богом или Господем истинным нарицати. Но кая суть нам нужда от себе и своими утверждати доводы. Самое бо Никейскаяго собора изложение веры таиньство тако написано показует, якоже о сем святейший Фотий, патриарх Константинопольский, засвидетельствует: о чесом в книге Кириловой, во главе 47, на листу 507 явствуется.

Но оле ваших неопасных, паче же блазнительных неразсмотрений! и не дивно есть вам все бывшия древле неисправности приводить в защищение вашея матере великороссийския церкве, понеже ея символы за святы почитаете. И аще все без разсмотрения имате приимати, или случившееся в преводех или во описех, то не точию се, но и явне на все три божественныя ипостаси неблагоприличность обрящете. Понеже многая в древних книгах от святых премудрых преводников исправишася: якоже от Максима Грека, и от Дионисия архимандрита Троицкаго, тако и от прочих показуется. И если некоей древности, еще не дошедшей до исправности, будете без разсмотрения последовати, явне обрящетеся согласующеся со множайшими ересьми, якоже вышеименованнии Максим Грек и Дионисий архимандрит и прочии извествуют. Есть же негде обрящете от согласников Иова роспопы Псковскаго и трегубое аллилуия написанное, еда и сему верити должно? Никакоже никако.

Темже леть есть не на древнее неисправное взирати, но на последственное, соборне и премудрыми святыми мужи исправленное, и святейшими патриархами повеленное и напечатанное. Якоже и о сем речении, еже есть: "и в Духа Святаго истиннаго и животворящаго", летьствует свидетельствованному святыми патриархами и напечатанному во всех древлепечатных книгах последовати, и тако глаголати. Верно есть слово сие, и всякаго приятия достойно.

Дата добавления: 2015-07-12