Ответ, 115.

О сколь удивительно есть твое вопрошание, дивный вопросителю! Понеже взираеши на едино точию погрешение символа существенне в членах веры, а не и в речах, или в литерах, или пословицах. Егда тии не внятельно есть возглашение третияго вселенскаго собора 7-м правилом; аще не суть внятельно, или и своего 69-го вопрошения предложение забыл еси, то обнови паки зде. Понеже того собора в толковании явственне извествуется, яко не точию что в самех членах символа не летьствует изменяти, но ниже ино кое сложение зловерно приложити. Якоже того самого толкования словеса зде на среду предлагаем [Кормчая, лист 90 на обор., прав. 7, 3-го собора]: "Иже (рече) паче веры, яже святии отцы Никейстии, сшедшеся изложиша, еже есть, верую во единаго Бога. к сему аще ино сложение зловерно приложит кто, на развращение и на погибель, [Ниже:] аще же есть епископ, или причетник, от епископии да будет изгнан, и от сана извержен". До зде от толкования.

Виждь убо, не рече аще самыя члены изменятся, но аще и кое любо сложение зловерно приложится, убо на развращение и погибель. И тако сотворшии епископи, будут из санов извержени. Но аще сим уверитися не имаши, воньми и прочим премудрым святым богословцем, опасающим зельнейше ко еже приложения символу не точию в литерах, но и в самых чертах. Якоже всепремудрый Максим Грек пиша глаголет: "Да никтоже бы (рече) прочее дерзнул по малоумней своей дерзости, ни приложити что отнюд к нему, ни уложити из него ни едину черту, ни иоту, еже есть ни пременити ни едино речение, ни писмени отъяти в нем. иже тако (святии) рекоша: аще последи дерзнет кто таково что во святем символе православныя веры, да будет проклят, и чужь благословения и сообщения христианьскаго".

Зри внятельно зде, не по тебе святии богословцы повелевают точию во изменениях членов символа веры смотрити, но и в писменах и в самех начертаниях. Ибо и от сих не точию в символе, толь преопаснейшем месте, но и в книгах чрез едино слово ересь вмещается. Якоже той же премудрый богослов глаголет: "Единем (рече) азбуковым словом ересь в книгу вносится". Слово 13.

Еще же и в книзе Кирила Иеросалимскаго пишет: "Яко еретицы и малое слово писанное развращают, но многия в том ереси возставляют". Такоже и от Лимонаря удобь есть познати [Лимонарь, глава 46]: "Яко двух ради слов еретических, пресвятая Богородица не вниде в храмину Кириака отшелника. ибо рече не приях пользы, но токмо погибель приобретох".

Темже от сих свидетельств показуется, яко не точию в самех членах изменении есть и познавается ересь и противеньство символу православныя веры, но и в речениих, и буквах и начертаниях, якоже и есть: о чесом в грядущем ответе засвидетельствуем.

Дата добавления: 2015-07-12