Ответ, 109.

Обычно есть всем еретиком свое зломудрие, похищенным от них аще от пророк, аще от евангельскаго благовестия, аще от апостол, священным писанием покрывати, да всяко удобно их прелесть вместится в сердца, препростием связуемая. О чесом святии мужие внимательно о сем блюстися повелевают, глаголюще: "Да навыкают сице вси, яко обычай есть общь вкупе, зломудренным еретиком, привсеяти во своих писании, некия догматы благочестивыя. да сим образом достоверна являются и благоприятна бывают, от православных списуема ими хульная. сего ради, и всех Бог и Владыка, составная премудрость Отчая, Господь наш Христос, утверждает своя ученики, и ими всех нас верующих вонь. и завещавает крепце, глаголя: внимайте от лживых пророк, иже приходят к вам во одеждах овчих, внутрь же суть волцы и хищницы. убо от плодов их познавайте". Максим Грек, слово 10.

В велицем Катихисисе о содержании вещей духовных еретиков вопросоответствует сице: "Вопрос. У еретиков убо такожде, якоже и у православных християн, служба Божия совершается. такожде святое писание и книги прочитаеми бывают. такожде церковное строение, и духовныя чины, и уставы и образы имеют. такожде поучаются заповедем Господним. пост держат, и милостыню творят. такожде и девство соблюдают, и крещение у них бывает. и причастие тела и крове Христовы приемлют. и паче мнятся православных христиан, во благочестии преходити. како убо у них не возможно быти, истинным пречистым и животворящим тайнам Христовым. Во ответе: Поистинне ничто у них несть истинно. но все убо, еже еретики творят, от смышления своего. [Ниже:] вся же сия не тако имеют, но инако и нечестиво. [Ниже:] и македониане ветхий закон приемлют. обаче другия пророки вводят". и проч. Катихисис вел., глава 4.

Но и премудрый творец книги О вере о сообразии притворном еретиков глаголет сице: "Понеже вся вещи, иже суть свойственне, и истинно Христовы, и еретицы имут в раздрании, подобныя имут церкви. такожде святаго писания, подобныя епископы, и иныя в духовном чину клирики, подобное крещение, подобныя святости, и ины вещи вси наипаче же самого Христа". Книга О вере, глава 23.

Кая убо суть тебе от сего привниде польза о древних еретиках вопрошати, все ли или не все приемлют евангельское благовестие? Зри убо, аще и приемлют, но криворазвращенне: то кая от того приятия им обретается польза, аще евангельская словеса превращают на свое зломудрие. Приимаше бо евангельское благовестие Арий, приимаше и Павел Самосатский, но зле на свою прелесть превращаху евангельская словеса [Благовестник, зач. 16]. Такоже творяху и прочии мнози еретицы вящьшии и среднии, якоже и в 21-м ответе, в части 3-й кратко изъявихом. Но что убо о древних глаголати еретиках, приемлют бо благовестие евангельское и нынешнии, всех сих древнейших еретиков обновители ересей, папежники, люторове и калвини: но ради вящьших и множайших ересей паче нечестивейшими нарицаются. Якоже о латынянех преподобный Феодосий Киевопечерский к блаженному князю Изяславу сице по вопросу ответствует: "Яко всех язык (рече) поганейши и злейши суть, зане не мощно ублюстися их, а поганых мощно. латина бо евангелие и апостол имеют, и иконы святыя, и в церковь входят. но вера их и закон нечист множеством ереси их". Патерик Киевопечерский древлеписменный.

О люторах же и калвинах премудрый Зиновий мних, ученик Максима Грека, от лица их глаголет: "Еретицы глаголют в чесом развращают лютори и калвини закон Божий преступающе того, сами крепце держат евангельскую проповедь з законными заповедьми". Соборник малый, лист 13.

Зри убо, яко и люторове и калвини евангельскую проповедь держат, но с развращением. Прочее же услышим, что о них той же премудрый старец глаголет: "И по многому убо, а не по единому образу познаваются безбожнии люторове и калвини, и инии иконоборцы, паче по всему от учения их, яко исполнено всякия хулы на Бога, аще и лукавством проповедати единаго Бога мнятся". Собрник малый, глава 11, лист 3 на обор.

Зри убо, не стыдится сей учитель церковный люторов и калвинов нарицати безбожными, аще и единаго Бога чтут, аще и евангелию повинуются: но за важность и количество ересей от него безбожными нарицаются. Сице и о древних и о нынешних еретицах летьствует разумети, не за ради точию евангельское благовестие, все ли или не все отвергающих, за вящьших вменяти долженствует. Но смотрити потреба, аще великия ереси имеют, аще множайшия, аще с древними со множайшими еретики согласующияся. Темже не на словеса еретиков оболщатися должно суть, но смотрити тех плоды. Понеже и самая превечная Правда, пророческая словеса предлагая, сице о сих злейших лицемерах глаголет: "Добре (рече) пророчествова о вас Исаия глаголя, приближаются Мне людии сии, усты своими, и устнами чтут Мя, сердце же их далече отстоит от Мене". Мф., зач. 60; Мк., зач. 28.

Дата добавления: 2015-07-12