Ответ, 20.

Несть нашего лишесловствия по напряжению вашего вопроса: но ваше многажды о том же и таяжде вопрошения много усугублена суть, желающе излишно притеснить наше скудоумие. Но якоже наше соизволение на ответствие стремится не похвалнаго ради кичения, но самыя ради гонимыя святыя церкви от седмоглавнаго зверя, желающаго в своих мерзских водах злаго учения потопити (от коих вод учения и ваш источник истече), ея же ради, яко нашея матере, в сей подвиг защищения изыдохом. Но аще по грубости нашей подробность самую писать и не достизаем: обаче по немощи нашей елико потщахомся, и Божиею помощию и Его невесты святыя и православныя церкви елико вразумихомся, толико о сем изъявити потщимся, да не дастся место диаволу, да не дастся дверь волком, да не дастся вина, ищущим вины, да не дастся же ся от нас притча врагом. Но да возможем, правовернии суще, дерзновенно о ея истинне глаголати, да не порочна она восточная, наша мати, святая соборная и апостольская церковь явится, противных же оной дерзость да посрамится.

Темже, оставльше о сем слово, к вопросу вашему приходим. А понеже в нем вопрошение ваше, от великороссийской церкви приходящих и крещенных в три погружения, не по чину положися (ключимствует бо ему быть в разделе 2-м сея первыя части): убо и мы, наблюдающе порядок чина, двадесять в первом ответе, в начале 2-го раздела, свой ответ с свидетельствами полагаем, в настояшем же ответе о вашем нынешния великороссийския церкви тайны за сущия тайны признании да ответствуем. Ибо вы глаголете: яко есть у нынешних великороссийских архиереов действуемое крещение тайна, яве яко и прочия суть от вас быти мнятся тайнами. Нас же в своем вопросе укаряюще за наше непочтение тайнами, глаголете: почтоже вы неправо ея употребляете.

Темже летьствует с сосудом избранным возопити к вам сие: "О несмысленнии галате (якоже и к вам леть есть прирещи: о несмысленнии поповщина!), кто вы прельстил есть не покарятися истинне; имже пред очима Исус Христос прежде написан бысть в вас распят. [И проходя, указует несмысльство:] Тако несмысленни есте, наченше духом, ныне плотию скончеваете". Глаголет апостол Павел галатом, глава 3.

Принуди нас и к вам, о вопросителю, возвати: кто вы увещал есть не покарятися истинне, еюже пред очима вашима Исус Христос прежде написан бысть в вас распят; егда о благочестии возбудитеся, тогда вся пренебрегосте, вся яко уметы оплевасте, и сраспятися Христу готови бысте. и тако наченше духом, ныне плотию скончеваете, похотем плоти работающе. Прежде бо вопросил еси о православных тайнах, ныне же от еретических виноград собирати листвие, еже закрыти студ страстей своих, приходиши. Их же виноград от виноград содомских есть, и лоза их от Гоморры. Глаголя, защищаеши тайну еретическую: вскую, рече, неправо ея употребляете; самым делом указуете, сице вам рещи благоключимейше: почто вы неправо сие творите, приемлюще тайны еретическия; понеже, везде исходя исходища путей, не нашел еси православнаго священства, от котораго должно всем заимствоватися тайнам: ныне же, не обинуяся, прямо путь к еретическим тайнам приступать указал еси. За что святии (якоже в 12 ответе, в 5-м показании явихом) страждуще, ради не приятия еретических таин, блаженне жизнь свою скончаша. Ты же, о дивне, кроме всякия таковыя нужды, волею и хотением к новодейстию их приступати научаеши. Но мы вемы апостольския и отеческия гласы, зелне запрещающия к таковым тайнам приступати, и оныя приятными исповедовати. Но сия ниже в сем ответе указати имамы. Зде же вначале сосуда избраннаго послушаем гласа, о силе тайны возвещающаго сице: "Тайна сия (рече) велика, аз же глаголю во Христа и церковь". В послании к ефесеом, зач. 231. Виждь, не просто от апостола полагается тайна быти во святей православней церкви, и с верою Христовою не разделена, якоже учит тойже апостол, глаголя: "Един Господь, едина вера, едино крещение". К ефесеом, зач. 224.

Святая же церковь дает нам знать, что есть тайна, яже в Катихисисе велицем, во главе 83, сице по вопросу ответствует: "Тайна есть (рече) невидимыя благодати Божия видимое знамение, во освящение наше от Бога нам преданная". До зде Катихисис.

Еретическия же тайны сея невидимыя благодати, сиречь Духа Святаго освящения, суть лишаеми, убо и тайною святою нарещися она не может, ниже во освящение душам нашим есть ключима. О чем преподобный Никон Черногорский в книзе своей, заповедей Господних, в слове 63-м, пиша о раздорниках церковных, глаголет: "Иже от церкве отступльшеи, не ктому имеша благодать Святаго Духа в себе. оскуде бо подаяние, внегда пресещися последованию. [Ниже:] Ктому не могуще благодать Святаго Духа инем подати, от неяже тии отпадоша". Никон Черногорский, слово 63.

Подобне сему преподобный во иеромонасех Матфей правилописец, в книзе своей состава а, во главе 2-й, глаголет: "Аще и не о вере расколницы погрешают. [Ниже:] Сии же от состава удов телесных отторгошася, не ктому пребывающую в них имут благодать Святаго Духа. еже убо не имут сами, како иным преподадут". Матфей канонист, состав а, глава 2. В толковании же Алексей Аристин на 1-е правило Василия Великаго, именно о тех раздорниках извествующи, глаголет тако [Кормчая, правило 1 Василия Вел.]: "Наватиан же, рекше чистых и воде предстоящих и воздержащихся, крещение аще и не приятно есть, понеже оставляет их Дух Святый".

Виждь убо, аще на раздорническия действа, или крещение, Дух Святый не может присутьствовать присещением, кольми паче на самыя еретическия, от них же последовательне да свидетельствуем.

Святейший патриарх Филарет в соборном своем изложении сице глаголет: "Яко вси еретики, различных вер, не имут права святаго крещения, еже водою и Духом Святым". Потребник, лист 561.

Вселенский патриарх Мелетий к белорусцам, пиша, глаголет [книга Кирилова, лист 505]: "Яко все веры прочии, иже верами зовутся, не суть веры, но прелести, наченши от латыньския и до прочих всех. и почто не суть достойни называтися верами; того ради, яко ни едина от них не вмещает Духа Святаго даровании, ни пришествия Его сподобляется". Мелетия патриарха послание 10-е.

Зиновий мних Отни пустыни, ученик премудраго Максима Грека, глаголет: "Имать бо всяк еретик в себе дух диаволь, темже и противится Святому Духу". Соборник малый, слово 40.

Преподобный же Иосиф Волоколамский пишет тако: "Кроме (рече) благодати Святаго Духа, ничтоже может кому сотворити от священных. еретицы же в себе нечистый дух имеяху сатанин". Книга Иосифа Волоколамскаго, слово 12.

И иная прочая свидетельства о сем за краткость словесе оставляем. Темже аще не приходит Святаго Духа благодать на еретическая действа, остаются их тайны без благодати Божия, убо и тайнами истинными нарещися не суть достойны, такоже и во освящение не есть потребны. Якоже скуделник, не причащься огненнаго ожжения, неприятен в надлежащую потребу: сице и тайна кая, огня Святаго Духа не получившая, не суть на спасение и освящение душам потребна, того ради святая церковь непотребными и неприятными быти их показует, о чем в Катихисисе великом вопросоответствует сице: "Вопрос. Истинныя ли и правыя пресвятыя тайны Христовы суть у еретиков? Ответ. Понеже они истинныя и правыя веры Христовы не имеют, то како пречистыя и святыя тайны Христовы у них быти могут. Вопрос. У еретиков убо такожде, яко же и у православных христиан, служба Божия совершается, такожде святое писание и книги прочитаеми бывают, такожде церковное строение, и духовныя чины и уставы, и образы имеют. [Ниже:] Како убо у них невозможно быти истинным пречистым и животворящым тайнам Христовым? Ответ. Поистинне ничто у них несть истинно. но все убо еже еретики творят, от смышления своего. како могут совершати действа Божия на игралищах своих; аще и Христа проповедают, и веру свою похваляют, но вся сия льстиво и лживо творят. аще и церкви своя, и клирики церковныя, и писания божественныя почитают, и мнятся еже тем же крещением крещатися, такоже и тайны божественныя, еже есть пречистое тело и честную кровь Христову имети, вся же сия не тако имеют, но инако и нечестиво. [Ниже:] Сего ради разумети имамы, яко еретическая писания и празднества, и службы, и тайны, и проповеди не суть правы". Катихисис великий, глава 4.

Сему подобно и святый Иоанн Никейский на армены еретики пишет сице [Кормчая старописмен., слово на армены]: "Какоже лживии христиане и лживии правовернии и скверное их крещение, и жертвы их, яко истинныя и крепкия творят; аще бо тмократицею прокляти бывше и диаволу предани, како от анафемы и от клятвы благословение изыдет, или како от диавола духовное и святое дело совершается; от анафемы бо благословение не бывает, и от проклятия молитва не исходит, и от диавола Христова таинства не совершаются, и от гноища благоухание не исходит, ни от гнилаго трупия ин исцелится, ниже от червивых удов здравие иному телеси подается, ни паки от ереси или от неверия духовное действо исполняется. [Ниже:] Якоже Христос глаголет: Не собирают бо от терния грозды, ни от репия смокви, темже проявленно, яко крещение их, и вся, яже от них содеваема, неприятна и непотребна суть, аще и тщатся несмысленнии и неразумнии, и неутвержении, и лживии христиане, яко истинна и благоприятна творят делания их". Кормчая писменная.

Согласует же сему и в книзе 6-й завещания святых апостол, идеже тако пишется: "А иже от нечестивых приемлюще осквернение, обещницы разума их будут, ниже бо суть тии священницы. глаголет к ним Бог: понеже ты отринул еси разум, отрину тя и Аз священствовати Мне. ниже крестившыися у них очистишася, но осквернени суть. не оставление грехов приемлюще, но связания нечестия". Книга 6-я, Завещания святых апостол, глава 15.

Златоуст же святый о всех еретических тайнах, пиша, глаголет [Апостол толковый, друг. преводу]: "Тайны (рече) без единости церкви христианския ничесоже суть. ибо всем отлучившымся от единения церковнаго Бог пророком рече: Послю на вы клятву, и проклену благословение ваше, и оклену е. и разорю благословение ваше, и не будет в вас: сиречь, положу клятву на благословение ваше, имже тайна совершаема бывает. ибо церковь Божия есть, якоже глаголет писание, вертоград заключен, и источник запечатлен. и того ради не возможно нигдеже тайне совершатися, точию во единости церкви Божия, еяже между сонмищи и еретиками несть, тогда и тайны в них несть ни единыя". До зде Златоуст.

Подобне и святый Максим Исповедник о еретиках единоволниках извествует: "Иже (рече) единоволники сами от себе прокляти, и от поместнаго собора, бывшаго в Риме, извержени, и священства отчуждены. тии кая совершают таинства, и который дух приходит на тех, иже от таковых хиротонисаются". Минея четия, генваря 21.

И Бароний пишет в лете Господнем 258-м: "В первенствующей церкви, о том во Иконии во Фригии собор сотворше, уставиша ни едину тайну у еретиков в тайну вменяти". До зде Бароний.

От сих убо вышепредложенных свидетельств, ясне доказуется: яко еретическия тайны не могут тайнами истинными нарещися, яко на оныя Дух Святый не приходит: яко тех действа, и тайны святою церковию не приемлются. Темже убо право во святей нашей церкви употребляется, еже еретическия все действа и тайны не приемлются. Обаче же в сем ответе предъидущая от нас вам предложишася, точию о неприятии генерально от еретик всех таин. В последующем разделе, в 21-м и прочих ответех, якоже выше рехом партикулярно, о едином неприятии нынешняго новодействуемаго от великороссийския церкве крещении, и с подлежащими тому новинами, и от нея и от них же чесо ради отлучаемся, явити имамы.

Дата добавления: 2015-07-12