ВИЖЛОК ПРОНЯЛÖН МЕДБÖРЬЯ ОЙ

Вижлок Проня, кöдö Важ Пальникын мукöдпырся шуöны эшö Немортöн, медбöрья кадö шоча петавлiс аслас керкуись. Старикöс кынтiс, моросас прокод мыйкö бульöтiс, дзик кинкö сэтчин пуис похлёбка нето керис симöтiсь дьöгöдь. Лун-мöд ни орöттöг висис спина коска, бытьтö кольмöтсянь потласис юр. Охота вöлi водны ольпасьö, пырны кытчöкö шонытiнö, пуктыны киэз кынöм вылö да и узьны. Но старик пукалiс осьта öшын дынын и эз лысьт калькöтчыны местасис. Сiя шоччисьтöг видзöтiс öтöрас, чашыктiс мыдз пон моз, тыр моросöн лолалiс сьöкыт июньскöй русö.

Öшын увтын, паськыт палисадникын, цветитiсö яблоняэз. Любуйтчы только, кыдз нiя цветитöны! Дзик кинкö парнöй йöв киськалöма пуэс вылö, öтiк пустöй места абу ― свальнöй чочком цвет. А дукыс кытшöм! Эн бы и дугдыв, сё лолалiн и лолалiн, нюкайтiн нежнöй ароматсö. И старик лолалiс. Сiя лолалiс и думайтiс, что öнi, кöр цветитöны яблоняэз, садсö дозирайтны колö лун и ой: он и казяв, кыдз пырасö нывкаэз да зонкаэз, увсорöн летасö быдöс, керасö букеттэз ― и сэсся нёджжав пель сайетö. Том отирсянь öнi толк абу. Сiйö и видзöтöны, кыдз бы бöбалыштны, быдöс покаститны. Вот и ковсьö пукавны öшын дынас, дозирайтны садсö, кöть сьöкыт шогöт пöрöтö бы ольпасьö.

Öтöрын лöнь, югыта шыннялö тöлiсь, но аслас садся Вижлок Проня оз адззы нем. Быдöс чочком светсö, быдöс öтöрсö сайöвтö вылын забор. Старик аслас киэзöн дорис сiйö крепыт кузь пöввезiсь, жван-жван вачкис кöрттуввезöн, и, медбы кытшöм-нибудь умöлик морток кодувья сёжö эз разь да эз жугды заборсö, сiя сiдз и этадз гардiс-домалiс быд пöвсö поперечинаэз бердö эшö кыз проволокаöн. Заборыс вевдöрö, быд пöв конецö, Вижлок вачкис йывдöм кöрттуввез, важ вила вожжез. Пондыв öнi пыр садас недобрöй морт! Ачыс лешак косялас кынöмсö, чёрт чеглалас сюрресö. Вот сiдз.

Самöй öшын увтас гажтöма никсö куканься ыджытжык пон ― Бандит. Паськыта осьтöм гöгрöса синнэзöн Бандит видзöтö веськыта хозяиныс вылö, кивыляйтыштлö бöжнас. Сы öмын, натьтö, неделя ни эз вöв крöшки нянь, и поныслöн синнэз одзын ветлöны лöз круггез, кынöмас гыжьясьöны нето варышшез нето каннез ― сэтшöм зубыт, зника абу. Бандитлö охота сьöвзьыны аслас олан вылö, эта сад вылö, петны öтöрö, пышшыны ылöжык, да пондыв! Сьöкыт цепь жольöтö сы голя вылын, нырыштö му бердö. Цеплöн мöд конецыс надёжнöя домалöм кыз проволока бердö, кöда нюжалö оградасянь заборыс пöлöн, омöн садöттяс.

― Вот никсы эшö, кудоба! ― лöгöн баитö Проня и грöзитö поныслö кулакнас. ― Ме тэнö верда! Кутав шыррезöс и пöт лоан.

Но Вижлок садын важын абу öтiк шыр. И гаггез абу. Бандит быдöс нiйö лэдзис ни аслас кишкаэз пыр.

― Дозирайт, кудоба, эн унняв! Чожа и тэныт праздник лоас, ― нюжвыла баитö поныслö хозяин. ― Чулалас эта гожумыс, казявтöг чулалас. Кваркыш он ешты керны, сибалас ар. Тöбала ме сэк быдса додь чöскыт яблоккез, базарö кыска, городö. Бöбöв народ городас олö. Быд учöтик яблок понда готовöсь лов сетны. Но вот и лоас миян быдса мешöк деньга. Кылан, быдса мешöк, мыся. Мöйму тай тожö неетша шедiс, кöть и неурожайнöй годыс вöлi. Тöдан, кытшöм чöскыта ме тэнö вердi? Ох-хо! Кык мöс кок лавкаись неблi. Вот эд кыдз! А мый, кöин öбед, гленитчö тэныт мöс коккесö вильöтны? А, гленитчö. То-то жö. Но ладно, дозирайт!

Мöс коккез йылiсь баснисö Бандит кывзiс бöжнас кивыляйтöмöн, но стариклöн медбöрья кыввезсянь öшöтiс юрсö. Дыр эшö арöдззас, гожумыс вöлись пондöтчö. Кыдз дозирайтны садсö, кöр кынöмын ой тöв шутнялö?

Забор саяс, ыджыт кыдззез вылын, быдкодь нёштöм голосöн карзöны сьöдракаэз, видчöны öтамöдныскöт, споритöны, некыдз оз вермö артавны кытшöмкö дело. Вижлоклö охота босьтны пишаль да бузнитны-лыйны öшынсяняс, мед оз нёштöмасьö лёквиррез. Но керны этö оз лысьт. Эм сэтшöм примета: виян сьöдракаöс, дак сэсся олансö он ни адззыв, быдöс добротö тöвныр нöбöтас. И Пронялö ковсьö терпитны. Да, нем он кер ― ковсьö терпитны. Но кыдз терпитны вот этö, кöр забор сайöт орöттöг ветлöтö отир? Кинлöкö усьöм тöдвылас нюжöтны сэтi тротуар, и öнi чуть да бöра кылöны кок шыэз. Вот мунiс кинкö пöрись морт: öдва коккесö кыскис, чушки-пашки мегырасис. Вот том детина оськалiс: торс-торс каблуккезнас керис. Каблуккес детиналöн ёнöсь, ― тыдалö, дорöмöсь. Детина бöрсянь сералöмöн мунiсö нывкаэз, сэсся бöра зонкаэз утугаöн торскöтiсö, кытшöмкö кино йылiсь басни боньгисö. «И кытшöм нiйö лешак кыскалö, кöр узьны колö?» ― думайтö Проня.

Да, узьны былись кад ни. Сьöдракаэз шумитöв-керисö и лöньсисö, клуб дынын дугдiс триньгыны балалайка, турунын озö ни чирскö кöбывкаэз. Пронялöн иньыс, Мавраыс, важын ни оз бергав бокись бок вылö, карöтö-узьö шоныт гор вылын. Сылö и дело абу, кöть быдöс мед гусялöны. «Ёрдöм старуха! Сё бы только узьны!» Проня мöдiс чеччыны лабичись, локны старухаыс дынö да гильöтыштны боксö гормöччанöн, но эз ешты: тротуар вылын бöра кылiсö кок шыэз. Пельтöм морт и сiя бы висьталiс ― мунöны нылочкаэз. Каблуккез только шват да шват, дзик не мунöны нывкаэс, а йöктöны. Нiя гусьöник мыйкö баитiсö öтамöд коласын, пильскисö-сералiсö, а кöр локтiсö Проня öшын увтöдз, öтыс шуис дивуйтчöмöн:

― Марусь, видзöт, яблоня цветитö ни!

― Быль эд! Май, кытшöм басöк улокыс: нежнöй-нежнöй...

Сiдз баиттöн и мунiсö. Эз и сувтчывлö. А Вижлоклöн пот мунiс сьöлöмыс, коскас лыйис-заваритiс, моросас тасасис мыйкö лэчыт да чорыт, эз сет лолавны. Улок? Кытшöм улок? Кытiсь сiя?

― Мавра! Да тэ мый, кулiн я мый я?! ― чирöстiс Проня.

― Ох, беда! Мый лоис? ― ружтыштiс старуха. ― Сотчам али мый?

― «Сотчам, сотчам!» ― нерсис старик. ― Эн разь кыв ― нывкаэз öтöрас баитiсö, кытшöмкö улок касьтылiсö. Ноко, пет да видзöт заборсö, эз я кинкö пильтырав...

Старухалöн петiс оныс, неохота вöлi и вöрзьöтчыны, сэтчö жö сiя нем эз вежöрт, но жöникыслöн голос вöлi страшнöй, и не кывзiсьны ― значит, смерться одзжык кувны. Курни-верни лэдзчис гор вылiсь, пернапасасис лик одзын.

― Мый, кытшöм улок?

― Петав да видзöт заборсö. Эн разь кыв? Ох-хо, кудоба. Кальскыны бы юрвоманат öбукöн.

Мавра öтпöвсöн чепöссис öтöрö, дыр маласис посöдзын, жольöтiс ыбöс иганöн. Старик мымда вын дзарьялiс öтöрас, кывзiсис, оз я кинкö кышöт садас, но нем эз кыв. Только Бандит никсiс сё гусьöника, жольöтiс цепнас. Пон кылiс хозяйкалiсь петöмсö и, тыдалö, надейтчис казявны одзсис няньтор. Весь надейтчис. Старуха ветлöтiс забор саяс, ойзiс и позевайтiс, кинöскö видiс и ёрдiс, а понлö эз сет нем. Бандит пуктiс чуксö одзас нюжöтöм лапаэз вылö и лöнис.

― Но мый сэтчин, кытшöм ув? ― юалiс старик, кöр иньыс маласьöмöн пырис керкуас.

― Беда! Öтiк ув петöма öтöрас, заборас колас шогмöма да... сiсьмöмась пöввес...

― Ох! Öнi мый? Чеглаласö эд увсö!

― Озö жö, поди. Эзö тай вöрöтлö одзжык-ту...

― Ох, кудоба! Да позьö разь надейтчыны öння отир вылö! Висьтав эшö спасибо, что керкутö öнöдз эз сотö. Ох, ох, мый нö кернытö!

Старушка ружтöмöн кайис бöра гор вылö, бобгыштiс мыйкö ныр увтас, а Проня сё пукалiс и пукалiс öшын дынын, думайтiс. Сы син одзын чужис ни картина. Вот локтiс асыв. Вылын забор дынöт, тротуар кузя, лёдзöн мунö отир. Öтiк бöб нывка казялiс: сiсь пöввез коласöт петöма садiсь яблонялöн кузь ув. Ув вылас тыр чочком цветтэз. Нылочка чеччöвтiс вывлань, судзöтiс увсö и ― ризь, ризь! ― чегис. И прощай яблоккез!

― Ох! ― ружтыштiс старик и кватитiс кинас мороссö. Сэтчин, моросас, сё эшö шваргис-пизис похлёбка, бульöтiс нёштöма и пöдтiс ловсö. Колö мыйкö керны! А мый? Может, улыс бердö сильканок öшöтны? Пондас кин чегны, дак сразу кылан. Сэк и пишались позяс бузгыны. Да кысь сiйö адззан, силькансö? Колö вöскö кайлыны, да каян разь, кöр каждöй коскаок висьö, каждöй жила доймö!

Öтöрын вöлi не шы, не тöв. Садын эз вöрö листтэз, эз кышöтö уввез. Кытöнкö лявкнитiс понок и тшöк мунiс. Соседлöн оградаын шевк-шевк керис борддэзнас петух, тыдалö, мöдiс китсасьны, но думайтыштiс и лöнис ― одзöв эшö. А старик пукалiс, кыдз тупка, полiс онмöссьыны.

― Мавра-а! ― чирöстiс бöра пемытiнас.

― Ы-ы, ― шыасис Мавра да бергöтчис мöд бок вылас.

― Гажтöм! Вот шогала, а сэтöн забор сiсьмöм... Мавра сэсся шы эз сет.

Вижлок дыр эшö думайтiс öшын дынас, пукалiс вöрöтчытöг. Коскас сё лыйис и лыйис, кынтiс, ляскöтiсö пиннез. Сэтчö жö петiс он, кажитчö, кунь синнэз и сразу жö ланьтас, кыдз вийöм. А узьны оз туй. Садiсь забор коласöт мезмöма ув, вермасö сiйö чегны. Беда. Мый сэтöн керны? И не пукавны жö этадз ойбыт.

― А, лешак! ― вдруг горöтiс сiя и сувтiс кок вылö. ― Не мортлö, не чёртлö, а лучше понлö бöж увтас...

Коккез видзисö сiйö умöля, суставвезын зубыта ветлiс мыйкö чорыт и лэчыт, дзик чегöм ем. Но старик терпитiс быдöс. Сiя нельки вермис мышкыртчывны, босьтны лабич увтiсь чер. Пев гыжнас пешлiс, лэчыт я черыс, мыйлöкö пöльыштiс оропыс вылö. Чер вöлi лэчыт, самöй раз керасьны. Сёжö старик эз тэрмась петны öтöрас. Сылöн лэчыт пеллез вдруг кылiсö кытшöмкö осторожнöй шыэз, кöдна петiсö кань öшынöт джоджулiсь. Гырс-гырс... Гырс-гырс! Неужто шыр? Проня дрöгнитiс быдöс кöс вывтырнас, шушкыштiс молитва. Кристос-батюшко! А мый, если шыр вермис пырны кашникас? Эд сэтöн деньга, деньга! И неетша ― кык век кежö тырмас. «Ужо, пырала джоджулас, ― решитiс старик. ― Колö видзöтны. Нет, перво петала öтöрас, вöлись».

Сiя осьтiс ыбöс, жагöник вуджис порог.

Топыта дорöм оградаын вöлi пемыт, кыдз гуын, и стариклö дыр ковсис ляшмасьны посöдзас, сэсся öдва лэдзчис джуджыт поспуэз вылöт, чуть ли не чибу-чаньöн кыссис учöтик воротка дынöдз. Эстöн сiя шоччöтiс ловсö, лэбтiс вешьянсö, кöда умöля öшшис кöс кадж вылас, и петiс öтöрö. Тротуар вывсянь сразу жö казялiс яблоня увсö. Вöлi сiя кык вожа, кузь, сваль вевттьöм чочком цветöн. Вижлок малалыштiс кинас, видзöтiс öтмöдöрсянь, пондылiс сюйыштны бöр заборыс сайö, но эз вермы. И сэк вылына лэбтiс черсö, сöтiс, мымда вöлi прокыс, и ув небыта усис сы коккез увтö.

― Вот сiдз. И меным спокой, и отирлö бур ― нюжласьны оз ков, ― шуис сiя. Сэсся думайтыштiс и содтiс: ― Эх, отир, отир! И кыдз тiянöс сымдасö муыс терпитö. Дзик кöдзыввез коят öтмöдöрö, овны добром мортлö од сетö. Тьфу!

Старик свистнитiс увсö канаваö, эшö öтпыр сьöвзис и пырис оградаö. «А сильканоксö колас сёжö лэдзчöтны, да», ― мелькнитiс юрас. Пемытiнас оськавтöн сiя вылына лэбтiс коксö, думайтiс, что одзас поспу. Но одзас эз вöв нем, кок эз инмы поспу вылас, а тальччис кытчöкö пустотаö, и старик öштiс равновесие. И эта жö мигö кытшöмкö страшнöй вын сöтiс сылö косас, пиньöвтiс öмсö, мургыльтiс лёнсö, и старик кыдз вöлi, сiдз и брякнитчис гатш. Шогмис эта сiдз видзчисьтöг, что Проня эз ешты нельки ойнитны, сразу жö лöнис.

Одз асывнас сы öшын увтöт, виль тротуар вылöт, мунiсö удж вылö отир, котöртiсö кытчöкö челядь. Мунiсö асланыс делоэзöн и кык нылочка.

― Марусь, ой, Марусь! Видзöт! ― шуис öтыс.

― Май, кин сiйö?

― Марусь, да мый жö эта сэтшöмыс? Эд эшö неважын улокыс дзонь вöлi. Сiя цветитiс...

― Кинкö неморт тай вöлöм! Видзöт, черöн сöтöма. Вот паразит! Мыйлö?

Нылочкаэз дыр эшö сулалiсö изводалöм улокыс дынын, баитiсö горöн, видiсö «паразитсö». Но ачыс «паразитыс», кöть вöлi ордчöн, эз ни кыв нем. Сiя куйлiс оградаас гатш, öт киыс сюрöма спина увтас, мöдыс усьöма морос вылас. Сы пиньöвтчöм öмись петiс вир, и тшыг пон Бандит нюлiс хозяиныслiсь чужöмсö. Сiя никсiс нюжвыла, кыдзкö страннöя осьтлiс öмсö, дзик паськыта шыннялiс, и радöн кивыляйтiс бöжнас.

ПОСОК

Асылыс вöлi кöдзыт. Сьöкыт туман руд тшакыллезöн путриктiс Нипанка юок весьтöт и аслас ульсöтöн нырыштiс пöрись Евсейöс, везъялiс чужöмсö поснитик-поснитик вачиррезöн, кынтiс. Старик каитчис ни, мыля одзöв лэдзчис татчö, быднёж видiс тумансö, кöда эз сет сылö кутчисьны удж бердö. Но вот вöррез сайсянь чавкнитiс шондi и туманыс дзик повзьыштiс, син одзын пондiс кизермыны. Ю сайись вöрокын тысяча каёк öтдруг пондöтiсö ассиныс гожся песняэзнысö. Сираяг деревняын öдззисö базанитны петуххез, готсьыны курöггез, и паськыт мир ловзис, тырис быдкодь шыэзöн. Евсей дыр видзöтiс шондiыс вылö, кывзiс кайезлiсь дзульзьöмсö и, быд цветок боссьöм воздухсö тыр моросöн лолалiкö, довольнöя шыннялiс. Нет, не весь талун чеччис одз, видзöт, бöра адззылiс, кыдз петö шондiыс. «Бöбöв сiя, кин узьö öнi крепыт онöн», ― решитiс Евсей.

Эта вöлi öддьöн ни пöрись морт, кöсыник и горбыля. Кузь годдэз, дзик тшыг поннэз, вильöтöмась яйсö, жалейттöг мургыльтöмась спина коскасö и, медбы старик эшö ёнжыка вачкисис старик вылö, лякöтöмась сылö чужöм бердас гынмöм тош, юр пыдöсас пуктöмась ки долонь пасьта лысина ― новйöт нiйö, старичок, да эн вунöт годдэсö!

И старик новйöтö и некöр оз вунöт ассис годдэсö. Аслас сьöлöмöн сiя важын чувствуйтiс, что олö му вылас медбöрья гожум, вермас лоны, медбöрья луннэз, и старайтчис весь не öштыны öтiк минута, сё эшö мечтайтiс керны мыйкö сэтшöмö, медбы, кöр кулас, дак йöзыс кöть невночка касьтывлiсö сiйö. Вот и лэдзчис талун ю дорас öтiк могöн, решитiс эшö служитыштны аслас соседдэзлö, народлö.

Кынымкö лун бöрланьын Сираяг весьтöт шумитöмöн мунiсö гырись июньскöй зэррез. Кöс му перво жаднöя юис шоныт васö, казявтöг кизермис и пöтiс сiдз, что эз понды вермыны примитны сэсся öтiк вотёк. А зэр сё колöтiс и колöтiс, кисьтiс дзик ведрапонiсь. Ва воттез öксисö шороккезö, шороккес ― ыджыт шоррезö, а нiя, öтамöдöс одзалöмöн, чепöссисö Нипанка юö. Быд канаваöт, быд кырасокöт визывтiс гудыра быгья ва, и Нипанка, кöда нельки тулыссэзнас шоча петавлiс береггезiсь, öнi, гожум шöрын, вдруг пöльтчис, ыждiс и неöтiк местаын вöтис береггез, сибалiс карчйöррез да баняэз дынöдз. Сираягись старухаэз полöмöн дзарьялiсö öтамöд вылö и пернапасалiсö кымöссэз: «Сорок лун да сорок ой вот зэрас этадз-ту и сэсся...»

Но умöльыс эз шогмы нем. Тöн рытнас зэрны дугдiс, кокнитик тöлок дзик росöн чышкис небосис медбöрья кымöррез, вайис бур погоддя. Сэк вöлись и кывсис, что ыджыт ва керöма сёжö öтiк изъян: нöбöтöма деревняыс дынiсь тёсовöй посок, кöда кузя отир вуджавлiс сай ладорас.

― Умöль овны эта посоктöг, ― висьталiс Евсей. ― Юок саяс видззез, вöр. Вöрас öнi, небось, тыр тшакыс да ягöдыс, челядёклö самöй раз котрасьнытö. Да и гыриссез ветлöтöны. Сираягись каждöй лун кин-нибудь мунö Софроновкаö, Софроновкасянь татчö локтöны. Кыдз нiя посоктöг юсö вуджасö? Не ветлöтны жö йöзыслö посадö тракт кузя, кöр веськыт туёк эм. Колас лöсьöтны посоксö.

Висьталöм ― керöм. Старик босьтiс чер, лэдзчис ю дорö. И вот сулалö, радуйтчö шондiыс первöй югöррезлö, мича гожся асывлö. Старик одзын орсö Нипанка, тарлалö öтмöдöрö крутöй валлэз, старайтчö койыштны гудыра васö Евсейлö кок ныррес вылö. Но чинöма ни вынокыс, оз тырмы прокыс коясьнытö. А зэртöнняс вына вöлöма; видзöт, кыдз монлалöм майöггесö да поперечинаэсö, кöдна вылö чапкавлöмась пöввесö. «Быдöс пильтыралöм, ковсяс вильöсь мöртны», ― думайтö старик.

Шондi калькалiс вöрыс бердiсь, койис му вылас сё дзирытжык и дзирытжык югоррез, туман кизермис совсем, пондiс перыта рознитчыны. Евсей чапкис вывсис зипун, кöдö шучкöп вазьöтöм ульсöтыс, и лöсьöтчис кутчисьны удж бердö. И сэтöн сiя казялiс, что деревняыс ладорсянь тэрмасьöмöн локтö морт. Кинлö бы сiдз тэрмасьнытö? Кытчö?

Морт вуджис неыджыт ляга, петiс берег дорас. Паськыт тош кöвьясис морос вылас, кузь зипун полаэс вамöмась лысвасянь. Морт öт киас видзö чер, мöдас ― кöртзыр. Евсей тöдiс ассис приятельсö, Пахом Пиляöс, кöдакöт чеччöны и водöны öтлаын.

― Евсей?! Тэ татöн ни? Ах, лотось-мотось, бöра одзалiн... А, поди, татöн и узин да? ― юасьö Пахом.

― Татöн? Кыдз позьö татöн узьны, кöр иньö эшö ловья? Сiя вежöктыны пондас... Кытчö нö сiдз?

Этö позис бы и не юавны. Кытчö эшö мунны стариклö эта одза, кыдз не посок вочны? Посоктöг йöзыслö некыдз оз туй...

― Дырöв талун узи, зонка, ― виноватöя баитö Пиля. ― Локтiс тöн внучекö, сьöрас четушкаок вайöма. Но и ректiмö кыкöн.

― Сё абу гöтрасьöма?

― Внучекö? Абу, зонка. Перво, шуö, армияö ветла, вöлись и гöтрася... Но дак мый, пондöтам я мый я? Шондiыс, адззан, сералö...

Кык пöрись морт босьтiсö черрез, сьöвзисö ки долоннез вылö.

Öтыс кутчисис йывдыны кыз майöггез, мöдыс ровняйтны тёссэз. Уджалiсö жагöник, мыля кыкнаннысö пöдтiс да эшö маитiс кашель.

― Мый нö бöра внучекыт висьтасис? ― юасьö Евсей. ― Поди, война кывсьö.

― Мыйлö сiя, войнаыс? Ась вакрамешö мунö. Не, война йылiсь басниыс эз вöв. ― Пиля минута кежö веськöтiс коссö, курзык-курзык керис, сэсся лукавöя чикыртiс синнэсö, шынньöвтiс тошас. ― Небывальщина бöра висьтасис.

Евсей шупыта лэбтiс юрсö, лöсьöтчис кывзыны.

― Миян йылiсь эд лöсьöтöмась... Пантасьöмась, шуö, Евсей да Пиля и сёрнитöны. Öтыс пö шуö: «Мунам талун рытнас нывкаэз дынö?» А мöдыс и шлёпнитöм паныт: «Пожалуй, позяс ветлыны, оз ло тöла дак...»

Евсей перво нем эз вежöрт, а кöр вежöртiс, давай китшкыны-серавны. Сералiс сэтчöдз, нельки синваэс петiсö. А Пиля шыннялiс довольнöя, радуйтчис, что вермис гажöтны приятельсö. Сэсся кыкнанныс бöра тюкöтiсö черрезöн, уджалiсö. И кöр майöггес вöлiсö готовöсь и тёссэс волькöтöмöсь, бадь кусттэз увтiсь кыскисö пыж, тэчисö сэтчö майöггесö. Эта удж сьöрын и застанитiс нiйö Мариш баблöн учöтжык зоныс, Иванокыс.

― Здорово, добрöй отир! Примитö компанияö! ― гажöн горöтчис сiя.

― Э-э, да тэ мый?!

― Мамö саймöтiс. Мун, шуö, артав посоксö...

― Хо, мамыт! Ачыт, небось, эн бы вежöрт... Дыр бöра тöн Марусяыткöт вежмасин?

― Кöбы дыр, дак талун бы менö эта одза эн саймöт.

― Мда-а! Давай, Евсеюшко, перытжыка кутчисям. А то ог ештö кернытö, быдöс деревняыс чожа татöн лоас.

Иванокöс, кыдз томöс и вынажыкöс, пуксьöтiсö пыжö, тшöктiсö сылö мöртны ю шöрас майöггез, кутны нiйö öтамöд бердö поперечинаэзöн, ньöравны, керны быдöс сiдз, медбы некытшöм ваныр посоксö сэсся некöр и трек эз кер. Иван уйис, кытчö сылö тшöктiсö, кутчисис чер обухöн вартны майöггез. А стариккес эта кадö волькöтiсö перилаэз понда вöснитик кузь потшшез, нöитiсö льöмпу шаттез, кöднiйöн крепыта домалiсö берег дорись майöггез бердö поперечинаэз. Джын час бöрын быдöс вöлi готов, и куимöн нiя некой пору чапкалiсö тёссэз, топыта вöвдiсö, крепитiсö кыдз колö ― и посок кузя ветлöт кöть ой и лун, некытшöм беда оз ло. Иванко сразу жö мунiс деревняö, тыдалö, кынöмыс симавны пондiс, а кык ёрт керисö кыз чигаркаэз и пуксисö бадь кусттэз увтö шоччисьны. Нiя дыр обсуждайтiсö международнöй положеннё, баитiсö сы йылiсь, что эна шоныт июньскöй зэррез бöрын пондасö син одзын быдмыны осяэз, и колхоз, быдöс приметаэз сьöртi, таво должен лоны няньöн.

Шондi пöжис ёна ни, лысва чожа косьмис, ва турунiсь кайис пар. Кайез дзульзисö сё эшö дугдывтöг, славитiсö гажа мирсö, коккез увтын шумитiс Нипанка, а кокнитик чож тöлок вайис ю сайсяняс цветтэзлiсь да быдкодь туруннэзлiсь чöскыт аромат, волькöтiс стариккезлiсь тошшез да медбöрья юрси тылöппез и мыйкö шушкис пель одзö.

Дед Евсей пондывлiс сунасьны, но ёртыс эз сет онмöссьынытö, трекнитiс йöрнöс сосöт, мыччалiс кинас деревнялань:

― Видзöт, бригадир локтö...

― Поди, Софроновкаö мунö да?

― Ужо, саясь, эн шумит. И чигаркатö чапкы...

Бригадир оськалiс перыта, кытчöкö тэрмасис. Кöр сибалiс берегыс дорö да казялiс виль посоксö, дивуйтчöмöн нёджжöвтiс öтмöдöрö, гогинялыштiс юрнас. Сэсся кайис тёссэз вылö, пешлiс периласö, качайтыштiс сiйö да бöра гогинялiс юрнас.

― Гленитчис уджным, ― гажöн шуис Евсей, кöр бригадирыс вöлi мöд берегас ни.

― Гленитчис, тыдалö...

Кык дед петiсö кусттэз сайсянь, иньдöтчисö деревняö.

― Кытчö талун лöсьöтчин? ― юасьö Пиля.

― Куштыла увтын йöр пö разьсьöма...

― Но дак мый, ветлам инö, ― согласитчис Пиля. Сэсся думайтыштiс невна да содтiс серöм пыр: ― А рытнас, может, нывкаэз дынö ветлам?

― Хе-хе... Ветлынытö позис бы, да тола, поди, лоас да?.. И кыкнанныс бöра китшкисö-сералiсö, паськыта шыннялiсö öтамöдлö. Шыннялiсö истово сiдз жö, кыдз шыннялiс мича гожумся асылыс.

Дата добавления: 2015-11-16