Боболь Ванялöн шапка 1 страница

ВИСЬТ

(Дзар кер и повесь вылö)

Если му вылын эм лешак и олö сiя кытöнкö матын, миян ладорын, то эта не кин мöдiк, кыдз ачыс Иван Петрович Картовкин, или кыдз сiйö шуöны Тубызын — Боболь Ваня. Мыгöрнас не сiдз и ыджыт, но паськыт мороса да ён пельпоннэза, кыз, бытьтö швавья ворота столб. Дзар керан сы вылö и мороз спинатö сывьялö. Юрсисö Боболь Ваня абу сынавлöма мöймуся тулысся Миколасянь, сiя пашмöм и гынмöм, тошыс гöрд, кыдз арся сiмöм осока, гардчöма сiдз и этадз, вевттьöм быдöс, сайöвтöм-шебралöм — куш места абу.

Кöр Тубызын öдззö кинлöн-нибудь базанитны кага, сiйö бурöтны позьö öддьöн кокнита. Висьталас мамыс: «Öнi жö Боболь Ванялö сета» — И кагалö öмас дзик ва кисьтасö, сэсся и пик оз кер. Да только разь кага! И ыджыт морт Ваняись повзяс. И быдöс эта юрсисянь, быдöс эта гöн увья, кöда путриктöм-быдмöм, кыдз важ керку местаын петшöр, петöма пеллезсис, нырсис и, кажитчö, нельки öмсис да синнэзсис — бытьтö сiдз сiя и колö. А мыля бы не шырсьыны да не бритчыны? Видзöтан — морт вылö бы вачкисис...

— А мыйлö? — горöтчас Ваня и овтыштас киöн. — Новйöта, сэтöнкан. Не сьöкыт.

Эта быль. Не сьöкыт. А польза сетö ыджытö. Ме верма вайöтны сотня пример, кöдна мыччаласö, кыдз отсасьö Боболь Ванялö тошыс. Но мыйлö сымдасö, кöр öтiк тырмас? Эшö одззуну корлiсö Ваняöс правленнёö и юалiсö сэтчин, мыля сiя колхозын дышöтчö уджавны. Ваня малыштiс быдöс юрсисö-гöнсö и висьталiс:

— Кöр тi менам годдэзöдз олат да тошныт эттшöм жö быдмас, сэк видзöтам, кыдз уджавнытö пондат.

Правленчи — ны коласын и усоккез некин эз новйы — дзарнитiсö öтамöд вылö и лэдзисö Ваняöс мирöн: старик дак старик и эм — мый сысянь босьтан? А Ванялö шестьдесятöдз эшö овны да овны. И кöр казялiс, что вöрöтны сiйö дугдiсö, решитiс мыччавны быдöнлö, кыдз колö овны: кык лун колхозын уджалыштас, неделя кытöнкö бокын шатласьö. А таво, кöр локтiс армияись зоныс, Ваня колхозас эз на и мыччасьлы — ась пö томмес ниртöны, а ме пö кыдз-нибудь... Уджыс бокын тыр. Öтiк корö керку тшупны, мöдiк карта нето баня артавны, куимöт — рамаэз да пызаннэз керны. Картовкин — мастер. Мый бы эз пондöт, сiя и петö кисис. Деньга сё öксьö и öксьö. А кыным унажык деньга, сыным унажык колö. Локтас Ваня гортас шабашка вывсянь, лыддяс быдöс деньгасö, дзебас ылöжык и шынньöвтас: «Бур, лöсялö!» И вдруг гажтöмтчас чужöмыс, синнэс öзъясö нёштöм биоккезöн: «Э, эта разь деньга... Вот Якунь Иванлöн, покойнöйлöн, деньга вöлi. Кöртовöй ящикын видзис... Ужо...» И тэрмасьö бöра шабашка вылö.

Эшö кынымкö лун бöрланьын Ваняöс адззылiсö Тубызiсь. Ветлöтiс сiя аслас керку дынын и ыджыт кöртзырöн чукöртiс кучаö ёг, кöда петöма тöвся столаэз увтiсь. А талун сiя дас верста ылынаын ни: уджалö Пальник посадын, тшупö пальниковскöй учительлö виль керку. Вот, сруб вылын пукалiкö, вылына сiя лэбтiс черсö, паськыт моросас кыскис унажык тулысся уль воздух и камгис-сöтiс кер кузя. Уп! — керис пуыс, дзик ружтыштiс и юалiс, мыля сiйö дойдöны. А Ваня сöтiс ни мöдöтпыр, куимöтпыр, сэсся öдззис и öдззис. Гырись чаггез, дзик бордаöсь, ылына лэбзьöны срубыс вывсянь, увгöны и шутнялöны, тыртöны русö сир дукöн. Мöд пельöсас камöтö черöн не сiдз эшö пöрись старичок Кона Егор. Кыкöн нiя медасисö удерлун тшупсьыны — удерлун только! — а талун, видзöт, дасся унажык ряд куйлöны ни öтамöд вылын, куйлöны сiдз, дзик лякöмöсь. Бура уджалöны Ваня да Егор, перыта. Вит-квать минута камöтiсö черрезöн и угöввес готовöсь. Öнi колö лэбтыны керрез, пуксьöтны нiйö тшупöттэзö да сэсся пазитны.

— Но, Егор, лэдзчам я мый я, сэтöнкан, лэбтам керсö, — корö Боболь Ваня. Ачыс дöраовöй кеписьöн чышкис тшупöтсис поснит чаггез, пöльыштiс сэтчö, бытьтö кузнечнöй мех ушнитiс. Егор эшö кынымиськö сöтiс черöн, тожö чышкис быдöс ёгсö, треситыштiс тошокöн:

— Готов.

Кык плотник лэдзчисö му вылö.

Неöткодьöсь вöлiсö эна морттэс. Боболь Ваня — богатырь, лешак; Кона Егор — винерик, векнитик чужöма, учöтик мыгöра. Но кöр дзарнитiсö асланыс киэзöн тшупöм сруб вылö, кöр, казялiсö, кытшöм бытшöма пукалöны одзжык лэбтöм керрес, — шынньöвтiсö öтмоз довольнöя, паськыта: вот пö кытшöмöсь мийö, вот кыдз колö уджавны.

— Но вот, дас руб эм бöра, — чикыртiс синнэсö Боболь Ваня. Удерлун, кöр учитель медалiс нiйö тшупсьыны, кык плотник редитчисö босьтны быд ряд понда дас рубöн. Учитель невна споритыштiс жö, но кытчö воштiсян? Чукöртны помеч — не етшажык петас. Да и тулыс öнi, чожа сев пондöтчас, колхозниккез öдва ли согласитчасö помечавны. Сэтчö жö правленнё каверзитчыны пондас, висьталасö эшö: учитель, а бöбöтлö колхозниккесö аслас керку дынö, öштöма стыдсö. Думайтыштiс-керис сiя и согласитчис. Дас руб, дак дас руб — мый нö керан? И вот, луныс пондöтчö вöлись, а плотниккез карманын дас руб эм ни. Тöн нiя тшуписö вит ряд да удерлун сымда жö. Видзöт, мымда заробитiсö ни!

— Талун вит рядсö тшупамö бöра, пожалуй, — бобгыштiс Ваня и малалыштiс перво тошсö, сэсся кынöмсö. Малавны вöлi мый: тош гöгви, а кынöмыс буждöма вешьян гасникыс вевдöрöт, öшöтчöма торшень моз. — Вит ряд, мыся, тшупам! Этö лоö пятьдесят руб. Öт джыныс меным, мöдыс — тэныт... сэтöнкан...

Кона Егор тожö волькöтыштiс тошоксö.

— Э-э, унаöв, поди, талун лоас да. Быд лун вит ряднас сьöкытöв жö эд кыкöн-ту...

— Но, пондöтiс! — лöгасис Ваня. — Вит ряд — и точка! Тэ висьтав, мыйлö татчö локтiн? Деньга шедтыны? То-то жö... Но дак уджав. Деньга любитан, а уджись полан. Кöркö томнам строшнöялi Якунь Иван ордын, дак кыкöн сыкöт, покойнöйкöт, дас рядöн луннас тшуплiмö. Вот кыдз уджавлiм. А тэ «унаöв»...

Егорлö охота вöлi споритыштны, но эз понды. Вит ряд, дак вит ряд. Лишь бы деньга унажык шедтыны. И не только унажык, но и чожажык. Морт шедiс бедаö: зонсö не талун, дак ашын пуксьöтасö решётка сайö, оз кö вежты растрата. Уджалiс зонкаыт сельпоын заготовительöн и вот — юöма, каналья, винаок да и öштöм документтэсö, öштöм сто рубся унажык казённöй деньга да эшö кодувьяс быдса телега кольттез рез-паз керöма. Беда! Мöдiс Кона Егор мöсоксö вузавны, да иньыс герьявны öдззис. Ветлiс Егор öтiк-мöдiк ордö — вит рубся унажык некин одзöсöн оз сет: абу пö. А зоныс öнi места оз адззы, готов петляö пырны. Мый сэтöн керан? Думайтiс, думайтiс Егор и мунiс Боболь Ваня дынö. Деньга одзöсöн сiя, конечно, эз сет, но спасибо Бобольлö: адззöм шабашка и сомуститiс компанияö. Только сорасис, тыдалö, Егорыт, а öнi казялiс, да сёр ни. Вон тшупсьö куимöт лун, и куимöт лун сьöлöмсö каннез гыжьялöны, моросас ыждö и ыждö кытшöмкö тревога. Мед ни öддьöн потласьö сьöлöмыс талун, дзик умöль тор мыйкö кылö...

Керыс, кöдö бöрйисö лэбтыны сруб вылас, вöлi веськыт, но öддьöн кыз дына. Сiйö, дынсö, ковсис лöсйыны, сэсся гогнавны. Боболь Ваня шупыта волькöтiс быдöс, а Егор, ассис думаэсö думайтiкö, бытшöмика ровняйтiс ув местаэз, мукöдлаись дзимлялiс культöм кач, сэсся сöтiс обухнас керыс кузя. Пу вöлi кöс и гора, кыдз барабан. Сэтшöм пу вылö видзöттöн быд плотниклöн öзйö сьöлöм, сэтшöм пусö любо и рядö пуктыны.

— Лэбтам! — командуйтö Ваня. Ачыс босьтiс зор, быгыльтiс керсö. Гым-гым-гым тарöвтчис сiя потшшез кузя и ёткисис сруб пельöссэс бердö. Эстöн кыкнанныс кутiсö перво дынсö, пондiсö лэбтыны. Басöк керыс, а сьöкыт. Егорлöн пöльтчисö рожабаннэс, вевттисисö бурöй точкаэзöн, коккес дрöжитöны. Зато Иван Картовкин дзик эз и кыв сьöкытсö: дундöтчыштiс невна и — оп! — кер конецыс лоис сруб вылын, йывсö сылiсь лэбтiсö совсем ни кокнита.

— Гезокöн бы колiс... öнджа... сьöкытöв этадз-ту, — горöтчис Егор. — Кила вермас петны.

— Тьфу тэнö! — сьöвзис Картовкин. — Эттшöм потшшесö гезокöн пондам лэбтавны, дак курöггез серавны öдззасö. Висьтала ме тэныт, Егор: кишкаоккет — ой-ёй — сунис только и керны бы ныись. Эта разь кер? Эта — потш! Якунь Иван, покойнöй, вугыршаттез вылö кызжыкöсь ваявлiс. А ноко, лэбтам эшö мöд стена вылас!

Лэбтiсö эшö öтiк кер — басöкö, ровнöйö. Сэсся чышкисö кеписсезнаныс кымöссэз вылiсь ньылöм и кутчисисö пазитчыны. Ваня уджалiс перыта, дзик не уджалiс, а орсiс чернас. Сiя син одзын ошшасис выннас, вöлi довольнöй тошнас, аснас и, кöть кин бы казялiс, сьöлöмас поздiсисö песняэз. Думайтны только — кыдз ряд, сiдз дас руб! Егор лолалiс пыдына, сьöкыта и керасьтöнняс гажтöма видзöтлiс деревня сайись ыббез вылö, кöдна кушамисö ни лымсянь и öнi паритiсö тулысся шондiыс увтын. Егорöс сё ёнжыка и ёнжыка кыскис гортас, Тубызö. Уджыс öнi колхозын тыр. Колö парниккезö назём тэчны, сьöд му, колö эшö öтпыр капуста кöдзыс проверитны, росада видзöтны, а сэтöн нювсьы сруб дынын, уджав Боболь Ванякöт, кöдö старик и синöн бы эз адззы. «Лешак дак лешак и эм, — думайтiс сы йылiсь Егор. — Шабашник, каналья... А ме ачым? Кин ме ачым?»

— Эх!.. öнджа...

— Тэ мый, Егор? — кылiс сылiсь ышлолалöмсö Боболь Ваня.

Егор шы эз сет паныт. Сiя лöгöн тюкöтiс черöн и жагöник пельдöтлiс пазсис свежöй, вирöма вöснитик чаггез.

Тубыз деревняын, аслас бригадаын, Кона Егор лыддиссис медхозяйственнöй мортöн, медбур колхозникöн, и кынымкö год бöрланьын сiйö пуктiсö главнöйöн карчвöдитiссез дынö. Егор арталiс парниковöй хозяйство, небзьöтiс муэз, кыскалiс унажык торф да назём — быдöс керис сiдз, кыдз велöтö наука, и пондiс босьтны вöвлытöм урожайез: гожумбыт вузалiс городын огуреццез, лук, арнас машина бöрсянь машина иньдалiс помидоррез, капуста. Правленнёын сiйö ошкисö, гижлiсö сы йылiсь газетаö. Таво районнöй совещаннё вылын Егор босьтiс обязательство: быдтыны быд гектар вылын триста центнерöн капуста. «Молодец!» — шуис сэк райисполкомись председатель.

Молодец! Вот тэныт и молодец. Медсьöкыт кадö, кöр ой и лун колö теплицаын да парниккез дынын уджавны, Егор мунiс шабашничайтны, колис звеносö. Позор! Ох, кытшöм позор!.. Кылас районнöй начальство, дак тшöктас колхозiсь вашöтны. Иньдöтö, шуас, этö весьлёбисьсö дыв, ась Боболь Ваняыскöт шатласьö. А мыля сiдз петiс, кин виноват? Зоныс! Сiя, каналья, трескöма вина, öштöм казённöй деньга. Адззöм тожö дружоккесö посадас... А эд кытшöм зонка вöлi! Кытчö бы эн иньды, мый бы эн тшöкты керны — быдöс кисис петiс. И вот на тэныт — юöма вина. Мыля?

«Лöгöтiм мусö, чапким сiйö. Вот и вежтiсьö, муокиньöй, миянкöт», — решитiс Егор.

А вöлi сiдз.

Кынымкö год бöрланьын Сеня, Егорлöн зоныс, кончитiс сизимöт класс. Медбы гожумнас весь не чужьявны тöвсö, зонка кутчисис уджавны прицепщикöн. И велалöма сiя механизаторрез дынын нельки рулитны тракторöн. Тулыснас, школасö кончитöм бöрын, мечтайтiс мунны техникумö, а арнас вдруг явитiс:

— Некытчö ог мун. Понда трактористöн уджавны. Велöта машинаэз, а сэсся...

Трактористöн дак трактористöн. Кона Егор думайтыштiс-керис и согласитчис. Велöтчыны некöр не сёр. Уджалыштас год-мöдсö и техникумö позяс мунны. И уджалiс зонка. Бура уджалiс. Но вот мöймуся засушливöй годö эз шогмы нянь. Колхоз öдва-öдва бергöтiс кöдзыссö и трудодень вылö сетiсö совсем етша. Етшаöн дöнзис и деньга. Сэк Кона Егор и керис ошибкасö, кöда понда öнi вежтiсьö. Корис сiя зонсö дынас и висьталiс:

— Ме — мужик. Ме чужи ыб вылын, век мусö гöри да кöдзи, вексö, э-э, видзси му бердас и торйöтчыны сы бердiсь ог ни вермы. А тэ — том и грамотнöй. Давай, кошшы бытшöмжык удж, адззы места, кытöн шедiс бы деньга. Ачыт пöт лоан и меным отсалан. Адззан, нянёкыс таво... э-э...

Сеня учöтсянь кывзiс айсö, веритiс сылö, некöр эз сувтлы поперёк. Эз понды пыксьыны и öнi. Кöть и дзугыльтчис, тыдалö, сьöлöмыс, но колис ассис тракторсö, мунiс сельпоö. И вот — тшыксьыны пондöма. Да и кыдз не тшыксьыны, кöр нелюбöйö уджсö керан? Мöдiк, может, и бур заготовительöн вöлi бы, кинлö уджыс эта, шуам, сьöлöмви, а Сенялö? Сеня машинаэз любитö, сэк машинаэз дынын и уджöт. Вежöртiс öнi Егор, да мый то керан. Кидтiс зонсö муыс бердiсь, как раз сы бердiсь, кöда быдтö мортсö, юкталö-вердö, вын быдöнлö сетö. Калькöтiс. И вежтiсьö муокыс, мыля сiйö öбидитiсö. Вот и ковсьö сруббез дынын нювсьыны. Баитö эд йöзыс: беда некöр öтнас оз вовлы. Быд беда, кытшöм бы сiя эз вöв — ыджыт нето учöт — кыскö сьöрас мöдiк бедаöс. Перво зоныс вылö усьöма, сэсся и Егор юр вылö камгисис, шабашничайтны тшöктiс мунны... Эх!

Эм деревняын олiссезлöн привычка: если тшупсьö виль керку, то обязательно вовлыны да видзöтны, кыдз сiя тшупсьö. Мукöд морт тэрмасьö кытчöкö аслас делоэзöн, сiдз пöльтö-мунö, кажитчö, и минута сылö жаль öштыны, а кылас черрезöн камöтöм да казялас сруб вылiсь плотниккезöс, — и, видзöтан, кежис ны дынö. Мортлöн йитсьö виль керкукöт виль олан йылiсь мечта, йитсьöны виль думаэз, виль счастье и не интересно разь дзарнитны, кыдз шогмö эта счастьеыс, виль оланыс? Кежас боки мунiсь, висьталас тшупсиссезлö: «Удача да кокнит пуэз тiянлö!» — и сулалö. Мукöд сiдз ылалас видзöтны ловкöй плотниккез вылö, что совсем вунöтас аслас срочнöй делоэз йылiсь: öзтас чигарка да и сулалас казявтöг кынымкö час.

Кона Егор тöдiс этö привычкасö и перво öддьöн полiс, что пальнишана спокой оз пондö сетны, быдыс пондас кежны и видзöтны ны вылö. Полiс, что локтасö тöдсаэз — Пальникын почти быд олiсьыс Егорлö тöдса — здоровайтчасö Егоркöт и кутчасö осудитöмöн качайтны юррезöн: «И тэ шабашка вылö инмин?..» А мöдiк, может, шуас: «Ха, эта не Кона Егор ли сэтöн?!» Эх, олан, олан...

Полiс этаись Егор, öддьöн полiс.

Но вот тшупсис öтiк ряд, тшупсис мöдiк, куимöт. Вот одзза срубыскöт ордчöн лэбö мöдöдз ни, а ны дынö некин эшö эз кежав, некин эз здоровайтчы и некин эз шу: «Кокнитжык керрез тiянлö». Мыля бы эта? «Осудитöны, — вежöртiс Егор. — Умöлик морттэзöн лыддьöны. А умöль морткöт охота разь кинлöкö баитны?»

Нёштöм делоыс, кöть вакрамешö мун. И быдöс эта зоныс кузяись. Да и Боболь Ванясö тожö он ошкы. Казялiс, что морт сюрис бедаö, и сомуститiс.

Егор пöвсиннас нёджжöвтiс ёртыс вылö и бöра ыш ловзисис. А Ванялö мый? Нем сылö абу. Орсö чернас и лыддьö, натьтö, кыным копейка заробитас керыс кузя быд сöтöм понда. Сьöкыт уджавны ордчöн сэтшöм мортыскöт, недолыт. А кытчö воштiсян? Кинöс сэтöн винитны пондан? «Ачым, ачым виноват!» — вдруг муркнитiс Егор да сэтшöм вынöн камгис-сöтiс керыс кузя, — нельки киэс дрöбалiсö.

Павжунöдз тшуписö куим ряд. Кыкнанныс атшалiсö-мыдзисö, люзьва пымалiсö. Картовкинлöн пашмöм тошись кайис пар. Ыджыт ньылöм воть летъялiс ныр конецас, син одзын польдiс — и тёп! — усис чаг вылö. Лось кучиковöй малахай увтсянь сiдзжö петiс пар, визывтiсö ньылöм воттез. Луныс вöлi жар, а Картовкин, чёрт тöдö мыля, эз на и босьтлы юр вывсис шапкасö. Тыдалö, быль баитöны: деньга пö шапка подклад коласас вурöма. Пыдына лолалiкö, не тэрмасьöмöн Ваня гöгöртiс срубсö, дзарнитiс быд пазö, любуйтчис уджнас. Егор, кер вылын пукалiкö, думайтiс гажтöм думаэз.

— Но, сэтöнкан, онмöссин тай, некö, — локтiс сы дынö Ваня. — Сёйыштны, зонка, колö, куим ряд тшупим, тридцать руб заробитiм. Деньга! Ха...

— Рытнас... э-э... гортö муна, — шыасис Егор. Боболь Ваня дивуйтчöмöн осьтiс öмсö:

— Егор, тэ мый, сэтöнкан? Ноко пешлы юртö, абу я пым? Да кыдз жö сiдз; редитчим кыкöн, редитчим...

— Мунны, мыся, колö. Ог вермы сэсся.

Ваня чöлöмöн минута дырна буравитiс Егорсö синнэзнас, сэсся сьöвзис кок увтас — «Совсем некö ылöстöмсялiс!»— мöдiс шуны Ваня, да дульыс каттисис тошас, лякис тырппесö, и му вылöдз эз усь, конечно, öтiк воть.

Пажнайтны пырисö керкуö. Учительлöн хозяйкаыс, мича чужöмбана томыник ичмонь, пуöма яя шыд, пызан вылö вайöма солалöм капуста, луккез, шöралöма небытик шогдiовöй нянь. Чöскыт дук пöльыштiс ныррезö, вöрзьöтiс дуль. Боболь Ваня виш-виш керис, шлёпнитiс тырппезнас:

— Мыдзсьöма, лешак. Киэзö тувдöмась.

— Вешшö пызан саяс, сёйыштö, — паннезöн жольöтiкö рочалiс том хозяйка.

Кык плотник гывьялiсö умывальник увтын сирöн ляксьöм киэзнысö, малыштiсö чужöммез — и пызан сайö.

— Э-э, шапкатö, шапкатö... öнджа... — горöтчис Кона Егор, кöр казялiс, что ёртыс шапкаöн и пелитчис ен угöлас. — Не кабакö эд, э-э... пырин.

— Быль эд, вунöтi, — согласитчис Ваня. Сiя босьтiс юр вывсис малахайсö, дзар керис сы пытшкö, бергöтлыштiс ныр одзас, нюкайтiс и вöлись сюйыштiс ас увтас. — Но вот...

Не öткодьöсь вöлiсö кык плотник. И сёйисö нiя не öтмоз. Боболь Ваня шамыртiс киас чуть ли не джын чöвпан, табанитiс öмас и давай масьтыны. Егор чегöтiс неыджыт шором, курччöвтiс пинь йыввезнас.

— Няньыс небыт, бур. Не кöркöмоз керöны öння хозяиннэс, — броткис Ваня. — Якунь Иван, покойнöй, помеч коста пыр ваявлiс пызан вылö чорыт нянь и шöравлiс сiйö вöснитика-вöснитика, шöрöмыс шучкöп тыдалö. Вöснитика шöралöм чорыт няньтö помечанин етшажык ештö сёйны.

— Мый, жаль я мый я няньыс вöлi? — интересуйтчис хозяйка.

— Дак кыдз не жаль. Нянь — нянь и эм, туй вылын оз валяйтчы. Вöвлi, пуксян гöртöн павжнайтны, дак Якунь Иван перво турун сёйлiс.

Тшыгувьяс.

— Турун?!

— Мыйнö. Нетшкас остожьяись небытик петассэсö, бöрьяс бытшöмика да öтiк листокöн и чапкалö öмас, нямлялö и ошкö: «Видзöт жö, кытшöм чöскыт, кыдз ма». И работниккеслö тожö тшöктö перво турун сёйны. Вöлись и нянёк сетас.

Ваня висьталiс этö ыджыт охотаöн, дзик мöдiс мыччавны, кытшöм; экономнöйöсь вöлiсö кöркö богатöй хозяиннэс. Ачыс сё гардiс и гардiс, бытьтö быдса год тшыгйöн олöма. Перво марскис-сёйис джын бекöр капуста, ньылыштiс кынымкö лук, сэсся вырскис кык бекöр шыд. Хозяйка öдва ештiс котрасьны гор дынсянь пызан дынöдз, сё содталiс и содталiс Ваня бекöрö. «Розореннё тай сыкöт! Ох!» — думайтiс котрасьтöнняс.

— Бура тэ, Иван, изан, верман эшö сёйнытö, — завидуйтiс ёртыс аппетитлö Кона Егор. И медбы эта комплиментöн не лöгöтны сiйö, тэрмасис содтыны: — И тшупсян тэ... э-э... öддьöн бытшöма. Уджалiн бы колхозын, дак тырин няньнас...

— Öмтö осьт да видзчись, — тош бердсис поснитик крöшкиэз да капуста чиррез мездöтлiкö, шыасис Ваня. — Вот тэ пыр колхозын уджалан и, кывсьö, неумöля пö уджалан, а кынымкö сотня руб растрата вежтыны он вермы. Видно, уна эд заробитiн...

— Э-э, сякöйыс овлö. Ачыт тöдан, засуха мöйму вöлi...

Боболь Ванялöн öмыс вöлi тыра и эз вермы сразу шыасьны. А кöр ньылыштiс быдöс, шуис:

— Не засухаын делоыс. Дело, Егор, сыын, что тшыкöтiм ыббезнымöс. Вокорень тшыкöтiм. Кöркö сабаннэзöн нiйö гöрим, да нянь сёйим. А öнi тракторрезöн. Якунь Иван, покойнöй...

— Но, öдззис! — öмалiс ёртсö Кона Егор. — Якунь Иван да Якунь Иван!Тöда ме сiйö тожö. Йöз киэзöн любитiс няньсö быдтыны. Кулак вöлi.

— Не кулак, а хозяин! — эз сетчы Ваня. — А öнi кин хозяиныс? Кинлöн дышыс оз пет, сiя и пуктö асьсö хозяинöн. Вот лоас эшö одзлань сiдз, дак кулам тшыгйöн, сымда и дело. А тэ — гортö муна, колхоз! Тэ вот мый, Егор: чапкы этö думатö, сьöвзьы сы вылö. Тшупсьыштам лунмöдсö и деньга заробитам. Колхозыс некытчö оз пышшы...

— Сiя сiдз. Колхозыс тэныт кöть эм, кöть абу.

— Дак мый, конечно... А минимумсö сёровно ковсяс тыртны. Минимумтöг оз туй. И тырта, Егор. Тэсся одзжык тырта...

Егорлö неохота вöлi споритны пызан саяс, но эз вермы видзсьыны, висьталiс:

— Минимумыт тэнат, Иван, öтiк, а менам мöдiк. Меным колö триста центнерöн капуста быд гектар вылiсь босьтны... — и содтiс гажтöма: — оз кö вашöтö парниккес дынiсь. Ох, пырöв-кери грехас аслам дзор юрöн. Öтiк срам.

— Но и сёй тэ ассит капустатö, чёрт! — лöгасис Ваня.

Хозяйка ыджыт вниманнёöн кывзiс нiйö и думайтiс аскежас: «Кык кырныш, а кокалöны öтамöдлiсь синнэзнысö». Сiя эз тöд, конечно, кытшöм нужда вайöтiс Егорöс Пальникö, эз тöд, кыдз маитiс этö старикöс стыд, кыдз казнитiс Егор асьсö шабашничайтöм понда. Тöдiс хозяйка, что босьтöны нiя быд ряд понда дас рубöн, вот и лыддис кыкнаннысö кырнышшезöн. Но мый бы эз вöв, кыдз бы эз лыддьы, а вердiс бытшöм öбедöн, нем эз жалейт. Тöдiс, что расходдэзтöг виль керкусö он строит. Конечно, эттшöм Боболькöт кутчисьны эз жö бы ков, да бöр он бергöт.

А Ваня сёйис и баитiс:

— Тшыксьö öння йöзыс. Син одзын тшыксьö. Вот тэ, Егор, аслат векын, поди, бутылка вина эн ю, а зоныт, страмеч, пируйтны лэдзчисьöм. Эта разь дело? Тэныт бы колiс плеть босьтны да шöравны спинасö: эн дурит, сэтöнкан, ов морт моз... А тэ, старик, деньга сылö шедтан да эшö тöждiсян: тюрьмаö, шуан, пуксьöтасö... А босьт менчим зырымöсь бедьсö, Максимсö. Мыйöн буржык? Локтiс армияись и сразу жö куим чунись агрегат ныр увтам: «Некытчö ог мун! Колхозын понда уджавны!» Этö кин сiдз керö? Позьö разь айöс не кывзыны?

— Дак кытчö эд велöтан, — шынньöвтiс тырп дорнас Егор. — Э-э, бурö велöтан, дак кывзiс бы...

Ваня вежöртiс, кытчö сiя кöстö, и нёджжöвтiс осудитöмöн: сьöкыт пö тэкöт артавны солиднöй баснисö. Сэсся бöрйис тарелкаись кызжык нянь шöрöм, курччöвтiс джынсö и мурзьöмöн öдззис вильöтны пöжшöм коска.

Кона Егор чожа пöтiс и висьталiс хозяйкалö спасибо. Боболь Ваня чапкис коскасö, эшö тарскнитiс паньнас пустöй бекöр бердö.

— А мый, ягöд тусиньöй, абу я тэнат кушманок?

— Кушманок? — дивуйтчис хозяйка.

— Мыйнö. Сёйи, сёйи, а сьöлöмö дзик эз бурмы. Стрась кушманоксö радейта. Вын содтö.

Хозяйка пыралiс джоджулö и петкöтiс ыджыт кушман. Вундышт сылiсь бöж йывсö и пöттöдз сёян. Но Боболь Ваня тшöктiс весöтны быдöс. Хозяйка весöтiс и думайтiс радъялöмöн: «Öнi потан, небось!»

Тёритны кушмансö Ваня кутчисис ачыс. Пуктiс öлöдзас бекöр, жмитiс сiйö пидзöссэзнас, лöсьöтiс бытшöмика тёрка да изiс бекöрас доррезви. Сэсся корис кöдзыт квас, кисьтiс невна кушманас, сорлалыштiс паньöн, содтiс луккез, солалiс — и сёян вöлi готов. Сэтшöм сук — пань оз пöр. Керкуын лолавны лоис немöн. Нёштöм дук кöвьясис воздухас. Хозяйка несйис и тулис курöтöм синнэсö. А Ваня, бытьтö нем эз и вöв, öдззис панясьны.

— Бур, öддьöн лöсялö, — пильтыралiс öмсö. — Вот ежели, шуам, содтыны этчö эшö чеснöг да джын кырым мымда тёритöм хрен, нем бы сэсся эз ков.

Медбы не адззыны, кыдз сiя сёйö, хозяйка висьталiс кытшöмкö мог и петiс öтöрö.

Кона Егор пуктiс юр вылас фуражкасö и тожö — чожжыка ыбöс сайö.

Тöдiс бы морт, кытчö сiя усяс, ольсалiс бы сэтчö идзас. Вермис бы, конечно, ольсавны и небытжыкö мыйкö. Тöдiс бы сiя, что чожа кылас бур юöр, некöр бы эз понды маитны сьöлöмсö гажтöм думаэзöн. Но делоыс сыын и эм, что морт оз вермы висьтавны, мый сыкöт лоас не только ашын, но и талун. Оз сiя тöд этö.

Öдва ештiс Кона Егор петны öтöрас да сьöкыт кушман дук бöрын тыр морос кыскыны тулысся небытик воздухсö, кыдз учитель керку дынö кежис ноёвöй зипуна да кузь пеллеза дзелёвöй шапкаа пöрись морт. Конувтас сiя видзис кыз почтальонскöй сумка. Дзарнитiс Кона Егор эта морт вылö и пикнитiс сьöлöмыс: «Тöдса!»

— Егор сват? Здорово, мужик! — шынньöвтiс почтальон и нюжöтiс кисö.

— Здорово, Прокоп! — паныт горöтчис Егор. Горöтчис приветливöя, шынньöв пыр, керис вид, бытьтö рад пантасьöмыслö, а ачыс думайтiс: «Кыскалöны тэнö сюраэс».

— Кылi, тшупсян пö татöн и вот кежи, — баитiс Прокоп. — И не пустöй киэзöн. Йöкты, мужик! Бур юöр вайи...

— Йöктiссьöм менам, Прокоп сват. Э-э... Кытiсь меным бур юöрсö видзчисьны? Бедаö сюри да. И тэныт, пöрись мортлö, эз бы ков серавны ме вылын.

— Кытшöм сералöм? Быль! Вот, он верит дак...

Почтальон шупыта кыскис сумкасис газета, павтыртiс сiйö. Егор кваркышалiс синнэзнас. Сiя тöдiс Прокопöс кыдз згальникöс и несерьёзнöй мортöс и видзчисис сысянь кытшöм-нибудь неумнöй шутка, кешитчöм. Но почтальон вöлi серьёзнöй:

— Вот, зонка, лыддьöт!

Кона Егор, колö висьтавны, и спокойнöй обстановкаын öдва öктiс букваэсö, а эстöн, öтöрын, да эшö сэк, кöр сьöлöмыс готов вöлi потны, газетасис эз адззы нем. Синнэс сылöн вазисö, мылякö вевттисисö лöз сора веж круггезöн, киэс дрöжитiсö, и букваэс чеччалiсö газета вылас. Но заметкалiсь заголовоксö сёжö вермис артавны: «Честнöй поступок»,

Дата добавления: 2015-11-16