Кöть горзы, кöть серав

Отир мунiс видз вылö. Бригадир Спиридон недыр кежö кольччылiс гортö. Сiя корис Исай Сергеевичöс да зонкаэсö аслас коромина дынö, первöй делоöн гöститöтiс кöдзыт быгья квасöн, тшöктiс пуксьыны мудьöт вылö. Гришка да Макся косöя дзарьялiсö лесниклöн виль керкулань, лукавöя мигнитiсö öтамöдныслö: разоблачитiмö таёжнöй руд разбойниксö, öнi немись повны.

— Быдöс вежöртана, — гажтöм председательлiсь пельпонсö лапкöтiкö, баитiс бригадир. — Лыйсин, лыйсин тэ, весёлöй и удав згальник, и тырмас, öнi тэ получитан, мый заробитiн, и эшö пишальтö сетан кинлö колö. Конфискуйтасö сiйö тэнчит, Исай Сергеевич. Эстöн и баитны нем.

— Конфискуйтасö, — согласитчис Исай Сергеевич. — Сiдз меным и колö. Важын колiс мырддьыны да йирö шупкыны.

— Аслат векын, ме думайта, тöн лыйин тэ медбöрьяись.

— Медбöрьяись. Эта сiдз. Этасянь и меным, и народлö спокойжык лоас. И инькаö пельсайесö адззыны пондас.

Макся и Гришка шушкöтчыштiсö гусьöн и лöсьöтчисö мунны гортö. Исай Сергеевич сувтöтiс нiйö, висьталiс, что мунасö öтлаын. А ачыс вöрзьыны эз тэрмась, сё пукалiс юрсö öшöтöмöн, думайтiс. Сiя шочыника дзарьялiс Кузьма Кузьмичлöн усадьбалань и быдпырся, кажитчö, дрöгнитлiс, мыйкö бобгис ныр увтас, дзик гусьöн лыддьöтiс молитва. И бöра думайтiс, думайтiс... Видно, кылiс сьöлöмыс, что одзын видзчисьöны мортсö сьöкыт луннэз.

Макся жалейтöмöн нёджжöвтiс председатель вылö, тожö думайтiс. Таёжнöй кöин... И кытiсь только сэтшöм паразиттэс му вылас чужöны? Олан, олан деревняын, нем он думайт, а сэтöн вдруг...

Кытiсь сэтшöммес чужöны-петöны?

Часто висьтасьö радио, и лекторрез и докладчиккез баитöны, и учёнöй отир газетаэзö да книгаэзö гижöны, что видзсьö эшö мукöд бердын важ пережиток — частнособственническöй тенденция. Унаись кывлiс ни эта йылiсь и сiя, ачыс Максяыс. Унаись кывлiс. И быдпырся сразу вунöтлiс. Мылякö думайтсис, что, может, кытöнкö йöзыс и новйöтö ас пытшкын кытшöмкö пережитоккез, а Веретя ладорын кинлö нiя ковсясö? Кин пондас кыскасьны эна тенденцияэзкöт? А сэтöн видзöт, мый вöлöма! Кытшöмкö паршивöй лесник, медбы тыртны кармансö деньгаöн, калхознöй добро вылö кисö лэбтöма. Исай Сергеевичöс, честнöй мортöс, чераньвезö каттьöм, позорö воштöм.

И мый эшö одзын лоас, мыйöн чулалас эта историяыс? Некин оз тöд. Натьтö, бытшöмика чужьясö сылö бöрас. И лэбзян сэк тэ, Исай Сергеевич, кыдз резиновöй мяч, канава сайö, ыджыт туй бокö. И лоан тэ аслат роднöй деревняын абутöм морт, пондан смешитны йöзсö. Кинлöн дышыс оз пет, сiя и сöтас горбыт кузя зорöн. Не зорöн, конечно, а лöчыт кылöн, крепыт фразаöн. И эн кутчись пиньгыны — эшö ёнжыка павкас.

Кыдз сэк овны Веретяын, роднöй деревняын?

Тьфу! Петас жö история!

— Таёжнöй кöин...

— Мый, мый? — дзик саймис да юалiс Гришка.

— Да нем. Просто сiдз.

Спиридон тожö мыйкö думайтiс, гыжьялыштлiс юрбöрсö, вель дыр шы эз сет. Но вдруг сылö усис мыйкö тöдвылас, зубыта сöтiс пидзöсыс кузя долоньöн, пондiс пильскыны-серавны:

— Бöб тэ вöлöмат, Исай Сергеевич. Уж сэтшöм весёлöй да удав згальник! Ноко висьтав, мыйлö кöдковну менам пешоркаö кирпичсö тапкин?

Барöтiс Исай Сергеевич синнэсö, зэгнитiс юрнас, дзик нöшöн сы кузя заваритiсö, тырппез нюмыртiс:

— Кытшöм кирпич?

— А сэтшöмö! Са-сьöд, нятьöсь. Вунöтiн я мый я? Пешоркаö тапкöма. Ха-ха... Только ланьтi минута кежö, а сiя сэтöн и вöлöм. Згальник!

— Тэ вот мый, Спиридон Иваныч: баит сякöйсö, да мера тöд. Кытшöм кирпич?

— Этта! Артист! Бытьтö ачыс оз тöд.

Исай Сергеевич совсем рапмис, ыш ловзисис. Сэсся видзöтыштiс Макся вылö, кулак мыччалiс: тэ ыжмалiн, кульпиян? Ах, мöдöра кучик! Макся кужöмöн дзебис синнэсö, юрöн гогынялыштiс: не ме пö. Спиридон ехидничайтiс:

— Зонкасö эн вöрöт. Не сылöн делоыс. Кöр ме сайми, дак сылöн дукыс матын эз вöв. Тэ пешоркаö дынын сулалiн, тэ пильскин сэтöн. Кöр осьтi пешоркаöс, сразу вежöртi...

Исай Сергеевич бöра трекнитiс юрнас, кымöртчис. «Вот и пондöтчö ни, — думыш керис Макся. — Эз на ештö чужйыны небыт местаас, эз на вашöтö сельсоветсис, а мукöд граждана керöны ни Исай Сергеевичись шутöс, сералöны сы вылын. Эхма! Кыдз пондас овны, былись кö вашöтасö?»

Колiс бы мыйкö керны, мыйöнкö отсавны Исай

Сергеевичыслö. Бур сiя мужикыс, небыт сьöлöма, кöть и старайтчö кажитчыны строгöй начальникöн. Пхе!

Строгöй... Хе-хе-хе, важын ни тöдам, кытшöм тэ строгöй! Унажык бы тэ кодь строгöйесö...

Колö отсавны сылö мезмыны бедаись. Но кыдз? Мыйöн?

Мудьöт вылiсь чеччикö, Макся юалiс:

— Исай Сергеевич, а кыдз тэ тöдiн, что ме льöмпу вылö кайи?

— Умöль жö тэ разведчикыс, Максим Максимыч, — серöмтчис тырп доррезнас Исай Сергеевич. — Не сiдз эшö уджалан, кыдз колiс бы. Вот кывзы-ко. Пыри ме керкуас, ыджыт жырас, нёджжася. А öтöрас осьта öшынöт тожö дзарнитi. Видзöта, а сэтчин льöмпу уввез вöрöны. Мыля бы нылö вöрны: öтöрас эд лöнь, абу тöла? Эшö öтпырись дзарнитi. Адзза: Макся ув вылын дюттясьö, кузь нырсö листтэз коласöт мыччö... Бур эшö, что лесникыс эта кадö кытшöмкö дело понда иньыс вылын чирзiс. А то казялiс бы сiя тэнö...

Максялö недолыт вöлi кывзыны этö и кежöтiс баснисö мöдiк туёк вылö. Сiя öдззис пильскыны, лукавöя шыннявны.

— Бытшöма тэ сiйö кольмöтiн, Исай Сергеевич. Сiдз и осьтiс öмсö да кынмис местаас. И кывсö ньылыштiс!

— Вит минута мымда шы эз вермы сетны. Только мыкталiс да голясö нюжлалiс, бытьтö джагöтiс сiйö нечистöй вын. Ме и ачым бура повзьывлi, думайтi — кудоба мортсö монлалö. Но ловзис сёдаки. Казялiс öшынöт мамсö и сэк жö ловзис, чеччöвтiс ыбöс сайö, кыдз ылöстöм.

Сiя эз тöд, мый эшö содтыны, мый висьтавны зонкаэслö. Видзчисьтöг петыштiс юр вылiсь важ кепка, жалейттöг пондiс нöитны сiйö. Сэсся дзарнитiс шондi вылö, кöда, кузь югöррез койикö, сё перытжыка и перытжыка лэбтiсис вöррезöн вевттисьöм уваллэз сайсянь, кайис голубöй небоö. Дзарнитiс и öддьöн дивуйтчис: сэксянь, кöр петiс сельсоветiсь да мунiс тöн вöрö, — кадыс чулалiс ровно сутки. Усисö тöдвылö кыввез:

Кöть кытчö бы тэ эн мун: Сутки — этö ой да лун.

Ой да лун. Пемыт и югыт. Ой да лун...

Дата добавления: 2015-11-16