Ректанын асыв

Ойбыт Макся куйлiс вöрын, нельки ончир эз кер и, конечно жö, вöлi мыдзся-мыдз. Кажитчис: часöт жö, вот эта минутаö, усяс кок йылiсь и сэсся оз и чеччы, сэтöн и лöняс турунас, нитш вылас. Быль, сiдз и кажитчис. А видзöт тэ, кыдз пыкнитiс-öзйис мортыт! Сiя осторожнöя орддис старухасö, петiс Ректановскöй туёк вылö, кынымиськö вирснитiс нюрас ульсалöм нырöн и давай жö вöрöтны коккезнас: ать-два, ать-два! Макся тэрмасис Ректанö, йöз дынö. Сылö охота вöлi, медбы деревняас панталiсö старухасö достойнöя. Вот комедия лоас, говкыссянь быдöс сельсовет чаналас!

Но вдруг мыйкö чорыт дорыша, мыйкö шöмакодь муныштiс юрвем пыр, а сэсся и сьöлöмö чувйыштiс. Недолыт лоис Максялö, дугдiс сiя киэзöн öвтны. Мунас я говкыс быдöс сельсовет пасьта? Пхе, пхе... Эшö некин оз тöд, кыдз сiйö панталас тоша бригадир Спиридон дядь. Усис тöдвылö: Максялöн лукавöйыс, сюраыс, ештiс и Спиридонлö мыччавны неыджыт покась, не öддьöн зубыта, но сё жö люкалiс мортсö, зангис сюррезнас öтiк местаö.

Вöлi делоыс одз асылö. Натьтö, неделя ни чулалiс сэксянь, если не унажык. Пöрись бригадир Спиридон кытшöмкö могöн вовлiс сельсоветö. Председательöс видзчисьтöн, чапкис пельпон вылiсь павжунöн пешорка, пуксис мудьöт вылö да ланьтiс. Тулысся сев коста, а сыбöрын сенокос кежö лöсьöтчикö, сiя пöттöдз некöр эз узьлы. А эна страднöй луннэзö и баитны нем — узьыштан суткинас час-мöд — и то висьтав спасибо. Вот и öшöтiс часöт юрсö морос вылö, ланьтiс сразу.

Макся эта кадö, кыдз пыр, весь олöмсянь эз тöд, кöдöрö юрсö пиньöвтны. Киэсö кос вылö пуктöмöн, сiя ветлöтiс Спиридон дынöт одз да бöр, кынымиськö ыджыт интересöн дзарнитiс пешорка вылö, мигнитiс сылö. Эк тэ, кытшöм доз... Симöтiсь керöмась. Э-э... Зонка чувйыштiс чуньнас ас моросö, и сылöн сюраыс, вельмöм бесыс, сэк жö саймис, öдззис радсянь йöктыны: бур!

Кывзiс Макся бессö, эз понды мугны. Босьтiс мудьöт вылiсь са-сьöд кирпич, чожжык каттис газетаö. А сэсся... Эз чулав и секунда, кыдз осьтiс пешоркасö, пуктiс кирпичсö пыдöсас, павжуныс увтö. Сэтöн удж вылö и сельсоветiсь председатель локтiс, сувтiс бригадир дынö, юрöн гогынялыштiс: ланьтöма, беднöйка. А Макся вöлi навес увтын ни, пельöсын. Саймис ректановскöй бригадир, бытшöмика зэгнитiс юрöн, медбы вашöтны онсö, чышкис тош вылiсь дуль. Виноватöя шыннялiкö, сiя чапкис пешоркасö пельпон вылö, пырис председателькöт сельсоветö. Эз и казяв сэк Спиридон, что пешоркаыс лоис тöдчöмöн сьöкытжык. Макся чикнялiс.

Новйöт, Спиридон, доппаёк!

Интересно, кыдз сiйö талун панталас бригадирыс? Морт сiя серьёзнöй, шутитны оз любит. Пожалуй, печиктас эшö ныр кузя.

И сёдаки бöр оз бергöтчы, сё мунiс и мунiс одзлань. Нёль километра мымда вöлi Ректанöдз, а сiя и шоччисьны эз пуксьывлы, сiдз тэрмасис. Ать-два, ать-два! Пхе!

Вöрись петтöн, сiя пыркöтiс-чышкис паськöм вылiсь турун листтэз да мöймуся кöс лыстороккез, тöдчöмöн чинтiс шаг. Макся тöдiс: ответственнöй работниккез, кöр локтöны йöз деревняö, старайтчöны ветлöтны солиднöя, степеннöя, мунöны невна бокись бок вылö пöлiнясьöмöн, а озö маршируйтö солдаттэз моз. Сiйöн нiя и шусьöны важнöй начальниккезöн..А Макся кин? Сельисполнитель! Этö колö вежöртны. И повны талун бригадирись немымда оз ков. Если кутчисяс, шуам, летны пеллез, дак ачыс нерад лоас. Макся лэбтас сэтшöм шум, что сельсоветiсь быдöс олiссез шай-пай лоасö, весьö пöрасö.

Вöлi эшö одз асыв, шондi только-только лöсьöтчис мыччыны кымöссö, но Ректан важын ни саймöма. То öтiк, то мöдiк конецын кылiс горöна тачкöтöм. Учöтик молотоккез басöка йöктiсö тожö учöтик наковальняэз вылын, кöдна вöлiсö дорöмöсь кыдзовöй чурка доррезö. Ток-ток-ток, чап-чап-чап! Этö, видз вылö лöсьöтчикö, ытшкисиссез вачкöтiсö литовкаэз, медбы нылöн жалоэз вöлiсö вöснитжыкöсь и лöчытжыкöсь. Хозяйкаэз лонтiсö ни горрез. Асывся сöстöм воздухын кылiс симöт да сира чаг дук.

Вон öтiк инька лэбтöм сарафан подолсö, медбы не кöтöтны сiйö сук лысваын, и, коккесö вылына лэбталöмöн, кыссьö аслас карчйöрын гряддэз дынö: тыдалö, луктурун чеплявны мöдö асывся пызан вылö. Мöдiк томыник инька босьтöма киас ведра и котöртö колодецлань. Мыдз тöн рытнас вöлi, дышыс петiс вала лэдзчывны. «Сiдз, сiдз, — шынньöвтiс Макся. — Тöн дышöтчин, дак талун, югдандорас, котöрт. Аслат уджсянь некытчö он пышшы, сьöлöмшöриньöй...»

Сiя не öддьöн радейтiс дышшесö, кöть ачыс... Да ладно ни!

Крепыт, но дженытик он бöрын деревня жагвыв ловзис, тырис быдкодь шыэзöн. Кыдз сельисполнитель, Макся вовлывлiс Ректанö öддьöн часто и, конечно жö, тöдiс этö селитьбасö и доль и поперёк. Да и мый сэтöн не тöднытö? Ректанын керкуэс, натьтö, куим десятокся не унажык, нiя аркмöтöны только кык улица. Öтыс кыссис сё сiя жö Веретя юок берег пöлöн, мöдыс лог дорöт орöтö деревнясö шöри. Талун том сельисполнитель дзарнитiс öтмöдöрö и сразу жö вежöртiс, кытöн мый сулалö. Вот бригаднöй контора ляпкисьöма му бердö, пуксьöма öшыннэзви, пильтыртчöма, старушка, кыдз важ чуман; сы дынсянь невна улынжык — бригадир Спиридонлöн коромина. Важ ни тожö керкуыс, но ён эшö, бур кондовöй пуэзiсь тшупöма.

Улицаыс мöд ладорын виль ыджыт öшыннэзöн гажöна видзöтö чочком светас Кузьма Кузьмичлöн керку. Сулалö сiя нач ни вöр дорын, öтiк паськыт уввеза кöз нельки карчйöрас быдмö. Бур лесниклöн керкуыс, öддьöн бытшöм. Дас год гöгöр только и олö эшö лесник эта гортын, позьö шуны — нач виль. Заботливöй хозяин стенаэсö дорöма волькöтöм пöввезöн — вагонкаöн, öшын увтын кокнитик палисадник, крыша вевттьöма шатром. Бур керкуыс — нем он шу. И фундаментыс, тыдалö, ленточнöй, öшын наличниккез вачкисьöны прошва вылö, краситöмöсь нежнöй голубöй краскаöн. А ограда воротаыс, видзöт тэ, — крепостнöй!

Сразу казялан — сьöкыт сiя, дорöма кыз плахаэзiсь. И не кыдз-нибудь, а век кежö — быд плахаыс поперечина бердö кутöма нёль болтöн. И медбы болттэс эз мöртчö пуö, ны шляпкаэз увтö хозяин пуктöма паськыт шайбаэз. Кужöмöн строитчöма лесник, бытшöма

быдöс керöма!

И керку гöгöрсö сiя обиходитöма сiдз — ёгторок он адззы. Нiя öшыннэз увтö, кöдна видзöтöны улицаас, палисадникас, Кузьмич садитöма акация да сирень кусттэз, сэтöн жö эм цветник — быдмöмась гладиолуссэз, астраэз. А нiя öшыннэз одзын, кöдна нёджжасьöны карчйöрас, соседлöн важ керку ладорö, быдмöны öддьöн паськыт льöмпуэз. Нылöн кузь, öтамöд бердö гардчöм уввез лэбтiсьöмась керку юрысся вылöжык, аркмöтöмась свальнöй шатёр. Сэтшöм льöмпуэсö добрöй хозяиннэз садитöны да быдтöны не только син гажöтöм могись. И, конечно жö, не льöмягöд понда. Эна пуэзлöн эм асланыс служба-задача: если, шуам, мыйись-мый öзъяс соседлöн важ керкужугыс, дак би некыдз оз вермы чеччöвтны тэнат керку вылö — льöмпуэс сувтöтасö сiйö. Макся тöдiс этö. Но часöт думайтыштiс, что этшöм льöмпуэз увтын гожся жар лунö, натьтö, беда кытшöм бур шоччöтны мыдз высин, мöднёж шуны, быглясьыштны-узьыштны бок вылын. Позис бы, конечно, и спина вылын...

Басöка быдöс керöма, быд торыс син гажöтö, сьöлöм югдöтö. Макся сыбурна осьтiс öмсö усадьбанас любуйтчикö, что казявтöг муныштiс бокö, тальччис канаваö и чуть эз берездась онняюрöн нятьö. Мамук тэ, маминьöй! — дивуйтчис сiя и чожжык дзарнитiс ас гöгöрас: абу я матын отир? Улица вöлi пустöй, и зоночка радмис. А то смешитöв бы керис йöзсö, осьта öма рака!

Макся бытшöмжыка пуктiс юр вылас кепка, пыркöтiс паськöм и кежис бригадир керкуланьö. Кутчисьны калитка иган бердö эз тэрмась, перво нёджжöвтiс оградаö забор плахаэз коласöт. Сiдз и эм! Бригадир тожö эз ни узь. Кöмтöм, кизявтöм косовороткаа, сiя пукалiс посöдзлöн медвылiсь поспу вылын и вочис куран: шедталiс куран юрсис бырöм и чегласьöм пиннез, ны местö вачкис вильöсь, кöдна вöлiсö мавтöмöсь смолаöн. Бригадир вöлi сiдз ылалöма интереснöй делонас, что эз и кыв, кыдз жолькнитiс калитка иган. Зонка пырис оградаö.

— Бур асылöн тэнö, Спиридон дядь?

Спиридон дыша лэбтiс сынавтöм юрсö, мыдза видзöтыштiс кортöм гöсь вылö, кваркышалiс синнэзöн.

— Мы-ый?

— Бур асылöн, мыся, тэнö, — горöнжык ни шуис Макся и вайöтiс кисö козырёк дынö. — Крепыт здоровье тэныт желайта, овны уна годдэз и сiдз одзлань.

Хозяин минута сьöрна нюлiс кöс тырппесö, шы сеттöг дыр видзöтiс Макся синнэзö, дзик сулалiс сы одзын тöдтöм морт, и вöлись вештiс дынсис курансö.

— Асылыс и быль öддьöн бур, да вот некыдз ог вежöрт ме, мыйлö эта одза локтiн тэ Ректанö, весь олiсь и дышкучик?

— Ужо висьтала быдöс сьöрсьöн-бöрсьöн. Юöрта тэныт, Спиридон дядь, кытшöмöсь миян делоэс. — Макся, кöть эз и рочалö, пуксис ордчöн поспу вылö, сьöкыта ловзисис. — Мыдзи ме талун, садь абу. Ойбыт немымда эг узь. Вот лякасисö заботаэз... А тэ шуан — дышкучик. Кöбы дышкучик вöлi... Пхе!

— Баит дело, эн бобгы. Тэ думайтан, менам сымда и удж — тэкöт абусö лёбны? Но, мый эшö висьталан?

Макся керис вид, бытьтö чышкö кымöс вылiсь ньылöм, вештiс посöдзсис ылöжык куран, пуксис бытшöмика.

— Вот тэныт и но! Сэтöн сымда быд берсяыс пансьö, а бригадир нем оз и тöд. Тэнат соседыт, Кузьма Кузьмичыс, не морт вöлöма! Натьтö, думайтан, что сiя... Да мый ни!

Бригадир эз вермы пукавны местаас, сiдз и чеччöвтiс кок йылö, пондiс курччавны тырппесö.

— Баит, мыся! Эт, Чомор. Да ло жö тэ куимись... Кульпиян!

Мыдз вöлi бригадир, не совсем нормальнöй. Дженытик ойся он эз бурмöт сiйö, а только дразнитiс. Макся вежöртiс этö, и эз понды кыскыны кадсö, сьöрсьöн-бöрсьöн висьталiс быдöс, мый тöдiс, мый кылiс и адззылiс. Спиридон кывзiс юасьтöг, часто дивуйтчöмöн дзарьялiс лесниклöн керкулань.

— Он бöбöтчы? Згальничайтан, поди?

— Вöлi бы нужда. Не шутитöмöдз талун.

Ныр увтас бобгикö Спиридон пырис мыйлöкö керкуö.

Дата добавления: 2015-11-16