ИНТЕРЕСНÖЙ БАСНИ

Кыз вöлi лесниклöн чигаркаыс, и куритiс сiя дыр Куритiс чöлöмöн, юасьны председатель йылiсь дугдiс, мыйкö висьтасьны Максялö, тыдалö, тожö эз лöсьöтчы. Зонкалö лоис гажтöм. Охота вöлi петны öтöрö да мунны кытчöкö, котöртны отир дынö. И эшö гажтöмжык лоис, кöр лесник чапкис окуроксö горö, пуктiс юр вылас форменнöй фуражка. Сiя лöсьöтчис мунны. Вольнöй кай! Кытчö охота, сэтчö и лэбзьы. Вот бы и Максялö сiдз. Вот бы петны часöт öтöрö да и котöртны, шуам, вöрö, Чукашор сайö, кытöн школьнöй дружок Гришка öтлаын айыскöт пастучитö колхознöй пода. Позис бы мунны и лесниккöт. Поди, удайтчис бы фотографируйтны бöра кöть урöс...

Да пондыв мун, кöр домалiсö тэнö телефон бердö! Макся нёджжöвтiс сьöд аппарат вылö и ыш ловзисис сэтшöм горöна, что лесник нельки паймыштiс, дзарнитiс зонкалань: — Мый тэкöт?

— Гажтöм меным, ой, кытшöм гажтöм! Кöрталiсö, адззан, телефоныс бердö и пукав, кыдз цепь йылын понок. Не пырны, не петны. А сiдз охота, сiдз охота, дядя Кузьмич, ветлыны тэкöт бöра вöрö. Ошöс фотографируйтiм бы.

— Да но сiйö вакрамешö, ошсö, — öвтыштiс кинас лесник. — Опаснöй зверь. Да и некöр öнi. Кадыс дона, делоэс тыр.

Максялö усис мыйкö тöдвылас, и сiя бöра ыш ловзисис, чуть эз понды горзыны:

— Неважын вовлiс Чукашор сайись менам дружок Гришка, Миколь Сенялöн зоныс, — пондöтiс сiя, бытьтö ас кежас. — Няньла вовлiс да баняын пывсьыны. Дак вöрзьöтiс сiя менö, висьталiс öтiк диво йылiсь. Мöймуся зверрез-гöссез, дикöй кабаннэз, кывзы, бöра Ошпозъяинас мыччисьöмась. Он верит, дядя Кузьмич? Быль! Быдса семья, шуö, Гришка адззылöм нiйö ылiсянь... Кытiсь нiя вовлöны, мыйлö?

Лесник кывзiс зоночкасö, эз öмав. Дикöй кабаннэз йылiсь юöрыс сiйö, тыдалö, эз вöрзьöт, мужик нельки и синöн кваркыш эз кер, кывзiс Максялiсь баснисö конецöдз и вöлись только шуис:

— Зверрез олöны асланыс законнэз сьöртi. Мыйлö нiя локтiсö миян вöррезö, висьтавны ог вермы. А кысянь локтiсö? Ме думайта, удмуртскöй нето вятскöй вöррезiсь. Сэтчин, кывсьö, кабаннэс важын ни олöны. Миян ладорын нiя и одзжык мыччасьлiсö. Мöйму, ачыт эд тöдан, местнöй газетаын заметка вöлi, бытьтö Гайна сайын быдса табун олöма. Сэтчин и тöвйöмась порссес. Мунöмась пö колхозниккез турунла, локтöны тракторрезöн зород дынö, а сэтiсь, зород увтсис, кабаннэз чеччалöны. Дивнöй дело! Сiдз эд? А одззуну, — одзлань баитiс лесник, — Ошибскöй лесничествоын нiя тожö олöмась. Но сэтчин адззисьöмась мустöм отир — браконьеррез. Нiя и лыйлöмась быдöс кабаннэсö. Конечно, нiйö, браконьерресö, бытшöмика велöтiсö, накажитiсö, кыдз колö, да изъянсö он ни веськöт: пышшöмась Ошиб ладорись кабаннэс, быдöс пышшöмась. И петö, дикöй кабанöс, пармаын виль животнöй видöс, колö берегитны браконьеррезсянь; колö нiйö радейтны, кыдз гöссезöс. Сэк нiя татiсь оз и мунö некытчö. И лоас миян тайга эшö богатжык. Вöрын мыччисясö виль тропкаэз. И лоас миянлö ветлöтны вöрöттяс эшö гажажык.

— Берегитны нiйö колö, — согласитчис Макся. — Дикöй кабан! Кыдз сiя вöрас тöвйö? Кöдзыт эд!

— Кабаныслö кöдзыт? Хе-хе! Да тэ тай, зонка, сы йылiсь нем он тöд. Кабан, вонö, сэтшöм зверь-животнöй, любöй мороз сылö нем туйö. Кучик увтас сылöн аркмö вершокся кызжык гос. Сiя и отсалö бимороз коста. Зверьыс нельки рад, кöр öтöрын кöдзыт. Вот кывзы-ко. Тöвнас дикöй кабаннэзлöн шумнöй свадьбаэз овлöны. И сэк нiя, айпöввес, тышкасьöны, кыдз бöбöввез. Тышкасьöны мукöдпырся сэтчöдз, что кыкнанныс усясö и чеччыны оз вермö. Во! Нiя жалейттöг нетшкöны öтамöдлiсь боккез да кынöм, лэчыт ковпиннезöн резьöтöны-косялöны кучиккезнысö, быдöс лешки-вошки керöны. Страшнöя тышкасьöны нiя. И сэк, свадьбаыс кежö лöсьöтчикö, быд кабан старайтчö вевттьыны асьсö, быдöс вывтырсö, кызжык броняöн, пасьталö, кыдз баитöны вöралiссез, свадебнöй мöдöтчан.

— Броня? Свадебнöй мöдöтчан?!

— А кыдз тэ думайтiн? Йыовöй броня. Колö тэныт тöдны, что тöвйöны кабаннэс пыдын логгезын, сэтшöм йиррез дынын, кöдна некöр оз кынмывлö, тöвбыт, дзик самоваррез, паритöны. И свадьбуйтны лöсьöтчикö, дикöйес обязательно купайтчöны. Пырас кабан ваö, путрайтчас тинаын и петö мороз вылö. Сылöн тшöк да кузь щетина бердын нятьыс сразу жö торс-торс кынмö, йыö пöртчö. Кабан вились нырнитö тинаö. Сэсся бöра петö мороз вылö. И сiдз неделя сьöрна. Купайтчö сiя сэтчöдз, кытчöдз броняыс дас кыным сантиметр кыза оз ло. Да сэтшöм крепыт броня — пуля оз босьт. Заваритан-лыян жаканöн, а сiя, жаканыс, чеччöвтö бöр, только бичиррез öтмöдöрö резсьöны. Свадьбуйттöн, кöр соперниккöт битва пондöтчас, эта панцирьыс-броняыс и отсалö кабанлö. Кинлöн кызжык броня, сiя и хозяин.

— Колö жö! Но и но!— дивуйтчис Макся. Сiя вöлi öддьöн рад, что Кузьма Кузьмич дзарнитiс сельсоветö, эз мун боки. Зонкаыс нельки быднёж видiс да кöритiс асьсö некодя думаэз понда. «Быдмас бородавка, лоас басöк сюр... Нестандартнöй ныр... Ехиднöй...» Видзöтыштiн бы перво ас вылат, а вöлись и критикуйтiн йöз нырресö. Некöр оз ков бур морт йылiсь умöля думайтны!

Небытшöм петö.

Зоночкалö öддьöн охота вöлi кöть невночка кывзыштны лесниксö, эшö мыйкö кывны кабаныс йылiсь, и сiя юалiс:

— Интереснöй зверь — эта кабан. И опаснöй, натьтö?

Лесник малыштiс ныр увтсис чорыт усоккесö, нюлiс тырппез и жагöник öвтыштiс киöн:.

— Кинлö, конечно, кыдз. Кин оз тöд этö зверьсö, дак сылö, пожалуй, лучше бы вöлi не пантасьны. Пышналас сэтшöмсö кабаныс ковпиннезнас, вияс öтiк секундаö. А кин тöдö сылiсь быдöс качествоэсö, повадкаэсö, дак сэтшöмыслö эта зверь не öддьöн опаснöй. Вöлi мекöт таво тöвнас öтiк случай. Сувтi ме лямпаэз вылö, котöрта Чукашор сайö, Гора перекат дынö, налиммез кыйны. Вот сибала Гора дынас, а сэтöн — люкав менö сюра чёрт! — кабан следдэз омöн... Дикöйыс сэтöн и тöвйö! Нёджжöвтi ме öтмöдöрö — и былись сiя! Бöрйöма аслыс местасö йир дынас, тинаын нырьясьö. Эг ме понды вöрöтны сiйö, срамöс, бергöтi оглобляэзöс — и бöр. А сiя, лешак, кылiс эд лямпа кышöтöмсö, рёксыштiс и бергöтiс нятьöсь юрсö мелань. «Беда, — думайта, — непременно вöтчыны пондас!» И былись эд! Уськöтчис, бытьтö кöин, вот-вот сёяс. Но ме тöдi сылiсь качествоэсö, эг повзьы. Лэбзя лямпаэз вылын мымда вын, пöльта веськыта нюрöт, кушиноккез вылöт. Кабан вöтчö ме сьöрö, рёксö. Кöть сiя и лямпаэзтöг, а котрасьö — кытчö тэ, ого!

Макся нельки лолавны дугдiс, öмсö осьтiс.

— Но эз вöт? — юалiс сiя дрöжитана голосöн.

— Вöтiс бы. Непременно вöтiс бы. Но как раз сэк, кöр пондiс вöтны, ме крута чеччöвтi бокö. Кабаныс, кыдз артиллерийскöй снаряд, лэбзис бокöттям! Хрюк-хрюк!

— Бокöт?

— Кыдз инö. Кабан — зверь öддьöн сьöкыт, маневрируйтны чожа оз письты. Если уж öдззöтчис котöртны, то и лэбзьö, кыдз торпеда, веськыта, чуклясьтöг. Пятьдесят, а поди, и сто оськöв мымда сэк котöртiс сiя, некыдз сувтны эз вермы. А кöр вежöртiс, что ме чуйнитi бокö и кöр вермис сувтчыны, ме ылын ни вöлi. И сiя эз понды сэсся вöтчыны ме сьöрö — мыдзис.

— Интересно! — горöтiс Макся, кыдз кагаок. — Вот бы фотографируйтны, кöть öтiкöс! Кöть бы пöвсинöн дзарнитны дикöйыс вылö. Ветлам, дядя Кузьмич, Чукашор сайö? Вот бöрьямö кад, мунамö кыкöн и...

Лесник дыркодь шы эз сет. Сiя нёджжöвтiс öтöрö, кыдз бы кывзiсьыштiс, бöра кыскис кармансис кисет да кутчис каттьыны виль «оглобля». Кöр öзтiс чигаркасö да тыр морос кыскис махорка тшын, шыасис негорöн:

— Радейтан вöрсö?

— Эшö бы!

— Адзза, адзза, радейтан. А если радейтан тайга, значит, тэ бытшöм морт. Значит, тэкöт кöть кытчö позьö мунны. Сiдз эд? И лоан тэ, зонка, менам отсасисьöн. Чожа ми организуйтам ыджыт дело. Лесничествоö ме гижи заявленнё-бумага. Если сетасö разрешеннё, а ме думайта — обязательно сетасö, — организуйтам дело. Пукта ме тэнö командирöн. Ыджыт отрядöн командуйтны пондан. Во! И вöрись сэк нельки петавлыны од пондö, сэтчин и узьлыны вермат. Во!

Эна кыввес бöрын лесниклöн чужöмыс тöдчöмöн югмис, лоис гажажыкöн, совсем не строгöйöн. И синнэс мичамисö, эзö ни дзарьялö ехиднöя. Басöкжыкöсь лоисö нiя.

Максялiсь быдöс вывтырсö сiдз и сотыштiс дзирыт вир, сiя нельки паймыштiс, дыр эз письты горöтчыны нем, öмсö осьтны эз вермы. Сэсся вдруг усисö тöдвылö Ректанiсь дружоккес. Ошшасисö кыдзкö, что мöйму гожумнас отсасьöмась нiя лесничестволö: Пуртымовскöй кулигаын öтлаын Кузьмичкöт öктöмась кöз да пожум голиэз, косьтöмась нiйö шондi вылын, пазöтöмась — кöдзыс заптöмась. Интереснöй удж!

Усис эта тöдвылö, и Макся юалiс:

— Мый ми пондамö керны вöрас, дядя Кузьмич?

— А эта кытчöдз секрет. Секрет, мыся, кытчöдз. И вот мый, зонка-детинка. Кывтö, ужо, видз кытчöдз пиннез сайын, эн лёб унасö. Некöр эн вунöт: таёжнöй кöинлö колö кужны чöвны. Тöдан эд, мый пöриссес баитöны: «Колö мыйкö ёртыткöт гусьöн сёрнитны, дак мун паськыт ыб вылö. А вöрö эн мун. Ворыслöн пеллес кузьöсь». Вот сiдз, вонö. Оз ков уна лёбны вöрöт ветлöттöн, чöвны колö...

Макся кывзiс Кузьмичсö и син одзын рапмис, сайкалiс. Сiя только и вермис горöтчыны:

— Бур öнi вöрöт ветлöтны. Гришка дружокö висьтасис, бытьтö...

Лесник сьöкыта лэбтiс синнэсö Макся вылö, ёна кымöртчис:

— Балбес сiя, тэнат Гришкаыт! Мургыльтны бы сылiсь юрсö. Позьö разь дикöй кабаннэз йылiсь, кытöн колö и оз ков, ванзыны? А вдруг и миян браконьер адззисяс? Тожö öмсö даровöй яй вылö осьтас? И лыйлас сiя, жаднöй кöин, быдöс порссесö, нельки сосунокöс оз коль. И оз ло сэк пармааным виль животнöй вид. Эх!

Лесник висьталiс этö ловзисьтöг, сэсся тэрмасьöмöн иньдöтчис порогланьö. Мунiкас броткис:

— Кадыс дона öнi. Золотося донажык, удж вылö колö мунны. Жаль, эг застанит Исай Сергеевичöс, жаль. Дело сы дынöдз вöлi, не öддьöн ыджыт дело, да важнöй. Аслас чужан лун йылiсь сiя медбöрья кадö нем эз баитлы? Джын век эд сылö чожа тырö...

— Нем эг кыв. А мый?

— Кыдз этö мый? Добрöй отирыс лöсьöтчöны асланыс юбилей кежö бытшöмика. Аскадö пондöны лöсьöтчыны. Ёрттэзныслö, общественнöй организацияэзлö и сякöй ыджыт начальстволö юöррез иньдöны: вот сiдз и сiдз пö... Юбилей менам сэк-ту и сэк-ту. Рочала тэнö гöститны, нимлун менчим пасйöтны-отметитны.

— Мыйлö бы ыджыт начальствосö рочавны? Оз лöсяв кыдзкö, — гусьöн шыасис Макся.

— Хе-хе! Вот сэтöн и эм быдöс делоыс. Вот сэтöн делоыс и эм. Начальствоыс ас пельпоннэз вылын тожö юр новйöтö, а не пустöй гырнич. Начальство сразу вежöртас: раз Исай Сергеевич юбилей йылiсь казьмöтiс, сiдзкö öнджа, бöра да мöс вöра... Козин колö заптыны.

Да! Нимлун вылö, зонка, куш киэзöн и дурак оз мун. А сэтöн начальство. Сы кипод увтын деньгаыс не аслас: эд... Жаль я мый я?

Лесник хитрöя нюмыртчис, невна жöдзис-керис порог дынас и совсем видзчисьтöг бöра ёна кымöртчис. И бöра лоис сэтшöм жö, кытшöмöн пырис сельсоветас: синнэс кöдзытöсь, лэчытöсь, гудыраöсь, тырппес пиньöвтчисö и лоисö ехиднöйöсь, кыдз бытьтö бы брезгливöйöсь. Нестандартнöй кыз нырыс Кузьма Кузьмичлöн мылякö гöрдöтiс и пондiс вачкисьны чуклясьöм-пиньласьöм ыджыт гöрд картов вылö. Лесник строгöя горöтчис Максялö:

— Висьтав балбес Гришкалö, медбы эз лёб унасö. Дикöй кабаннэс йылiсь мед эз ванзы. Кыласö недобрöй отир зверрес йылiсь и пондасö тожö даровöй яй вылö киэз лэбтавны. Öтiк сосунокöс оз кольö, быдöс пизьдасö. Да и ачыт öмтö тупкав. Тожö эд Чомор. Эх, тi! Дак пастуххез дынö, шуан, мунiс председательыс? Сiдз, сiдз...

И вöлись петiс. Макся юрсö киэзöн жмитiс: кытшöм бумага гижис лесничествоö? Кытшöм отряд йылiсь боньгис? Эх, тöдан разь этö! Поткöт юртö шöри, а нем он тöд.

Зонка дзар керис öшынö. Кузьма Кузьмич шагнялiс калиткалань, гымöтiс тротуар кузя подкова сапоггезöн. Тальччалiс чорыта, увереннöя. Шед сы киэзö браконьер, мыччалас бур олансö. Не лесник, а таёжнöй кöин! Кынымкö загадочнöй кыв и горöтчис только, а дзугис Максялiсь олансö. Мöдiс зонка водны чуланö да узьыштны пöттöдз, а оныс казявтöг пышшис, мöдiс котрасьны ю дорö да тульöтчыны садь быртöдз, а лесниклöн кыввез бöрын и берегыс эз понды кыскыны. Кытшöм сэтöн купайтчöм вермас лоны, кöр Кузьма Кузьмич сiдз и брякнитiс: «Ыджыт отрядöн командуйтны пондан...»

Кытшöм отрядöн? Кин сылö сетас отрядсö? Кытшöм сэтшöм заданнё? Поди, этö... э-э... Нет, нем юрö оз пыр. Думайт кöть эн думайт — некытшöм толк.

И эшö вот мый: кытшöм сэтшöм могöн лесникыс председательлiсь нимлунсö касьтiс? Тожö козин заптö? Вот козьналас лесничество нимсянь мыйкö сэтшöмö, что öмтö воротася паськытжыка осьтан. Лесничествоыс районас ыджыт и стрась богатöй...

А сётаки кытшöм сэтшöм отряд артавны мöдö? Поди, организуйтас натодиль команда, медбы пессьыны браконьеррезкöт, дозирайтны пожаррез шогья вöр? Эта вöлi бы дело! Ветлöт гожумбыт пожума ягöт да нюррезöт, ло, удав чомор, тожö таёжнöй кöинöн, мыччав асьтö.

Макся пуксис бöра пыдын креслоö, юрсö пуктiс ки долоннес вылö. И бöра думайтiс, думайтiс. А сэтöн вдруг тётка Марфа, местнöй магазинiсь вузасись — Исай Сергеевичлöн роднöй сой, сельсоветас пырис. Сiя гажöна здоровайтчис Максякöт, сюйыштiс чышьян увтö юрси тылöппез, кöдна вöлi петöмась кымöс вылас и, телефон дынö локтiкö, гогынялыштiс юрнас: — Öтнат и начальникалан? Но-но... Тётка Марфа вöлi гöгрöса чужöма, топытик вывтыра, öтiк кылöн шуны, öддьöн симпатичнöй томыник ичмонь. Сiя звонитiс райпоö, юалiс, лоас я талун «кольцевöй завоз», керис колана товаррез вылö заявкаэз. «Но вот», — шынньöвтiс сiя, кöр пуктiс трубкасö. И юöртiс Максялö, что талун «кольцевöй завоз» увья ытшкисьны оз мун, быдса лун лоас гортын. «Кöть песласьышта невна, а то...» — висьталiс том инька и чепöссис гортас.

Макся сувтiс кок йылö, невна ветлöтiс пельöсiсь пельöсö, гыжьялыштiс мыйлöкö юрбöрсö и вöлись петiс чуланö.

— Но, привет тэныт, друг Храповицкий!

И только ештiс нюжöтчыны топчан вылö, кыдз сразу жö вунöтiс телефон йылiсь, лесниклöн загадочнöй басни йылiсь. Нем сэсся эз понды ковны.

Чöскыт он тэныт, Чомор!

Дата добавления: 2015-11-16