Интереснöй деревня ошпозъяин

Прав вöлi менам друг — корреспондент, кöр баитiс, что гажа местаын сулалö Ошпозъяин. Эз бöбöтчы сiя, кöр юöртiс, что быдöнлöн вöрзяс сьöлöмыс, кин бы эз дзарнит эта пельöсок вылö. Аслам синнэзöн казялi öнi, кыдз ойланьын кыссис пемыт тайга, неылын сыын тыдалiс гöгрöса йыла керöс, а деревняыс дынын визывтiс ю, кöда свиттялiс шондi вылын, дзик зеркало. Лунланьын и рытланьын вöлiсö ыббез, тыдалiсö поснитик рассэз, быд рöма цветтэзöн вевттисьöм видззез.

Джын сотня мымда керку, öтамöд бердö жмитчöмöн, сулалiсö топ вöр дорас, мукöддэс сайöвтчöмась нельки вековöй пуэз коласö, дзик жар нылö лоöма шондi морос вылын и дзебсисьöмась ыркытiнö. Керкуэз вöлiсö бурöсь, строитöмöсь гырись пожумовöй вöрись, унажыкыс вевттьöмöсь шатром. Каждöй хозяин старайтчöма мыччавны ассис искусство. Öтiк вон мавтöма воротаэз да öшын наличниккез уна рöма краскаöн, рисуйтöм цветтэз, каёккез; мöдiк серöтöма наличниккесö кокнитик узöррезöн — кужöмöн пилитöм вöснитик пилкаöн, дзик лобзикöн, быдкодь басöк фигураэз, писькöтлöм ны шöрö напарьяöн осьтаэз; и кöр дзар керан сэтшöм öшын вылö, тэныт кажитчö, бытьтö каймитöма сiя не пуись керöм наличникöн, а быльнöй базарскöй прошваöн. Крыша увтiсь карниз доррезын öшалöны сэтшöм жö прошваэз, гажöтöны син быдöнлiсь, кин нёджжöвтас ны вылö. Вöлiсö, конечно, и умöлик керкуэз, но нiя петитчöмась туй дорсис ылöжык, сайöвтчöмась льöмпуэз сайö. Татöн почти каждöй палисадникын путриктöны саддэз: ыджыт льöмпуэз да кыдззез коласын гардсьöны рябинаэз, пежьялöны, дзик мыйöнкö мавтöмöсь, паськыт листтэза липаэз. Мукöд сад совсем сайöвтö керкусö, уввезнас чышкö öшын стеклоэз, нельки вевттьö крышаэз. Ошпозъяинын каждöй посöдз дынын эмöсь кайпоззэз, и саддэзын лэбалö сымда каёкыс, что ны дзульзьöмсянь нельки пельшы оз кыв.

Вöрыс ладорсянь деревнясö асыкалöма кык вожа пыдын лог. Сылöн öт вожыс чуклясьöмöн кыссьöма Вильва дынö, дзик ыджыт змея петöма юны, мöдыс лэчыт клинöн пырöма тайгаас, керöм сылö неöддьöн веськыт юкöв. Лог пыдöсын больгö шорок, сы пöлöн сулалöны баняэз, эмöсь плашкоттэз, кöдна вылын кöркö белитлöмась дöра, а öнi гывьялöны паськöм.

Кыдз Вильваын, сiдз и лог пыдöсын, ва вöлi, конечно, тыр, но ошпозъяинса асланыс керкуэз дынö мыйлöкö гарйöмась и колодеццез. Нiя вöлiсö керöмöсь асмоза. Мукöдлаын мужиккез тшупöны эд поснитик вöрись сруб, кöдö лэдзöны колодецас, а татöн керны сэтшöм сруб некин абу и думайтöма. Конюх Демид, кöда аслас колодец дынын юкталiс вöв, висьталiс меным:

— Пондi бы ме тшупны сруб, öштыны кад! Ме муна вöрö, пöрöта сэтшöм пожум, кöдö куим морт нюжöтöм киэзöн оз судзö. Этö пожумсö поткöта шöри, гырксö быдöс гарья пазникöн, бытшöмика волькöта гогытöн, кера кык ыджыт öр. Сэсся öтсö пöлiньта мöдыс вылö, öддьöн крепыта асыкала — и быдöс. Дзарнитан — настоящöй кöньöс, только кузь да пыдöсыс абу. Этö кöньöссö отир отсöтöн лэдза колодецö сруб туйö. Сира пожумись керöм кöньöсыс сто год сулалö...

Самöй деревняыс шöрын сулалiс не öддьöн ыджыт, но кыз да паськыт уввеза кедр. Пöрисьмöм ни сiя, голиэз совсем абу шогмöмась, йывсö кöркö чегöма чарньöв и вевдöрись уввес косьмöмась, нiя чуй видзисö öтмöдöрö, кыдз вила вожжез. Но кедр сё эшö басöк. Сы гöгöрын муыс вачкисьö гуна долонь вылö: бытьтö кытшöмкö богатырь вартöма сiйö чокмарöн, волькöтöма ыджыт катокöн нето бульдозерöн. Кыдз горпод вылын оз быдмы нем, сiдз и эстöн эз вöв öтiк турунок. Вежöртны вöлi не сьöкыт: ошпозъяинскöй нывкаэз быд рыт сэтöн йöктöны кадриль, «масьтöны тусь».

Васька оськалiс ордчöн мекöт и мыччалiс Кона Петралiсь керкусö. Сулалiс эта керкуыс совсем ни вöрас, вöлi сэтшöм важ, что сетны сылö кык сотня годся етшажык некыдз эз туй: джынысви пырöма муö, öт ладорыс пöлiньтчöма — вот-вот пöрас, пельöссэз усялöмась, а крышаыс, тыдалö, совсем абу вöлöма. Кытшöмкö нёштöм сiсь дук сöтiс ныр кузя, кöр ме дзарнитi пытшкас юр тöрик осьтаöт. Керкуын эз вöв нем — не джодж, не лабич, только киссьöм ни гор сулалiс пельöсын, повзьöтчис öтiк бельмоа синöн — горöмнас. Пырны пытшкас, да эшö ойся кадö, лысьтiс бы, конечно, только Васька кодь смелöй и решительнöй морт...

Каждöй деревнялöн эм аслас история. Эм сэтшöм история и Ошпозъяинлöн. Демид талун асывнас ештiс висьтавны меным öтiк легенда. Вот сiя.

Зэв важын ни кöркö, не öтiк век чулалiс сэксянь, кыдз Чердынскöй острогись пышшис каторжанин. Эшö рытнас жольöтiс сiя аслас кандалаэзöн заплоддэз коласö гарйöм пыдын ямаын, а асывнас валяйтчисö сэтöн только кöрт торрез — вына каторжанин жугдöм кандалаэсö лэчыт дора галяöн. Мымда бы эз гöняйтö öтмöдöрö стражниккез, мымда бы эз кошшисьö нiя воррезын да починоккезын, — каторжанинлöн некытöн и след эз вöв, дзик вöйис сiя му пытшкö.

Кынымкö лун бöртi волокын, кöда ольсассьö Колва да Вычегда коласын, мыччисис морт. Вöлi сiя ыджыт мыгöра, паськыт сьöд тоша, рукйöсь зипуна. Ошшез да мöдiк хищниккез ылiсянь казявлiсö сiйö, повзьывлiсö садь быртöдз и, колодаэз да мыррез вывтi веськыта чеччалöмöн, пышшисö ылöжык страшнöй морт дынiсь. Кузьöсь стражниккезлöн киэз, лэчытöсь нылöн гыжжез. И морт, медбы вились не шедны ямаас, месяц мымда эз петавлы тайгаись, мунiс и мунiс сё ылöжык острожнöй места дынсянь, ыджыт пуртöн да ломöн вийис зверрезöс, кытöн-нибудь лог пыдöсын керлiс биок, пöжалiс пöимын яй. И только уна луннэз да неделяэз бöртi, кöр вöлi керöма ни рытвыв ладорö не öтiк сотня верста, кöр морт ачыс ни вачкисис зверь вылö, сiя петiс öддьöн басöк местаö, водiс турунö, нюжöтiс мыдзöм да дойдöм коккесö и онмöссис спокойнöй богатырскöй онöн. Эстöн повны вöлi немись, стражниккез таладорö и ныр эз вермö мыччыны, недобрöй отир эз пантасьлы. Каторжанин узис кык лун и кык ой, а куимöт лунö казялiс, что селитьба увтö буржык места сылö не адззыны. Шульгаланьын визывтiс ю, кытöн шуксис чери, веськытланьын свиттялiс изовöй йылöн керöс. Сiя ылiсянь вачкисис чöвпан вылö, и каторжанин шуис аслыс, что нянь эта ладорын должен шогмыны. Керöс увтын ветлöтiсö лось табуннэз, мукöдпырся рявзiсö ошшез, уннялiсö кöиннэз. Каторжанин лöсьöтiс аслыс шалаш, öзтiс би и пондiс овны. Сотня год бöртi эстöн сулалiс ни ыджыт деревня, кöдö пондiсö шуны Ошпозъяинöн. Каторжаниныс вермöма кыскыны аслас «вотчинаö» быд ладорись недовольнöй отирöс, кöднакöт пантасьлöма вöравтöн...

Сiдз ли, не ли вöлi — споритны ог пондö. Не миян дело гуддисьны деревня историяын. Миянöс интересуйтöны öддьöнжыксö отир да сылöн олан.

Кыдз ми тöдам ни, Демид уджалiс конюхöн, ойнас сiя дозирайтiс вöввез, а луннас нем эз кер. Конечно, позис бы узьыштны кытöнкö ыркытiнын, но медбöрья годдэзö, кыдз баитiс ачыс старикыс, сiя вермö узьны суткинас только куим час, и талун, медбы не пукавны весь, решитiс бöра доддявны вöв и ветлыны посадö внучаткаысла да почтала. Сiя мавтiс телега колесоэз, доддялiс вöвсö и лöсьöтчис ни вöлi мунны, кыдз сы дынö чепöссис квать нето сизим годся нылочка — неыджыт мыгöрока, бытшöма сыналöм чочком юрсиа. Нылочка вылын вöлi узöра покромкаöн йиалöм кокнитик платье, чикисяс павьялiс ленточка, а киас сiя босьтöма, тыдалö, поннэз шогья бедёк.

— Деда!! — чирзiс нылочкаыс. — Мамö письмо тэныт тшöктiс сетны, ась пö нöбöтö почтаö.

— Дак вай чожжык, адззан, муна ни, — шыасис Демид. — Мый нö мамыт керö? Бöра, поди, ягöдавны мунiс?

— Эз, сiя ытшкисьны лöсьöтчö, а öнi кривöй тёткакöт пукалö, мыйкö сёрнитöны тай.

— Адззöма удж. Плетьöн бы малавны спинасö. Кривöй тётка, конечно, вöлi Матрен, но не сiя интересуйтiс менö. Дзугыльтiс сьöлöмöс и дзугис эта асылö бур настроеннёöс совсем учöтик деталь. Кöр Демид корис письмосö, нылочка öдззис кошшисьны пиас, старайтчис мыйкö кыскыны. Медбы не öштыны письмосö, мамыс, тыдалö, сюйыштöма сiйö зэв ылö. Нылочка гуддисис-гуддисис и, кöр казялiс, что нем оз пет, шупыта пöрччалiс быдöс кизёккесö, и сэтöн ме казялi голя вывсис вöснитик сунисiсь кыйöм гöйтан, кöда вылын öшалiс учöтик перна. «Вот тэныт и на! Деревняын некытшöм вичку абу, а челядь вон мый новйö» ― думайтi ме и мöдi юавны, кин сылö öшöтiс пернасö. Но нылочка чожа сетiс письмосö Демидлö, шупыта бергöтчис öтiк кок вылас, эта коста ештiс сотны бедёкнас кычан кузя, кöда питкылясис сы кок увтын, и ньöвьёсьöн котöртiс гортас. Сiя эз и кизяв платьесö, и перна öвтчис öтмöдöрö, кыдз модница голяын кокнитик медальон.

— Кин сылöн мамыс? — юалi ме Демидлiсь.

— Да колхозница тожö, эм сэтшöм дышкуль. Народыс важын ни видз вылын, а сiя, проклённöй, кикиморакöт бöра вежмасьö, — шыасис Демид и пуксис телегаö.

— Нылочкасö пыртöмась ли мый ли — перна тай голяас?

— Перна? Вермас и перна лоны. Думайтан, кикимораыс весь вичкуас туйсö тальö? Не-е, батя. Попыс эд тожö дошлöй, тöдö ассис делосö. Велöтöма пö бытьтö кикиморасö кагаэзöс пыртны да пернаэз нылö öшлыны.

И меным эта асылö мöдпырся ни усис тöдвылам приятельö, газетаись корреспондентыс. Беспокойнöй сiя морт, етша и гортас узьлö, пыр деревняэзöт ветлöтö и мый адззылас — гижö газетаö. Вот и шуис сiя öтпыр: «Нет, менö он бöбöт! Пöрись ме воробейыс. Если кытшöм деревняын челядь новйö пернаэз, сiдз и шу — умöля уджалö партийнöй организация». «Неöддьöн, тыдалö, уджалöны и ошпозъяинскöй коммунисттэз, — думайтi ме. — Нылочка арнас школаö ни мунас, а голяас — перна». Но вöлi ме сёжö не корреспондент, деревняын вöвла шоча и керны кытшöмкö строгöй выводдэз öнi эшö эг вермы.

Васька кеймисьöмöн корис менö мунны мöссэз дынö и видзöтыштны лосьпияноксö. Эта вöлi öддьöн интересно, и ме согласитчи. Мунiм ми сыкöт паськыт и совсем пустöй улицаöт. Деревняын страда коста народ чеччö одз, быдöн, кин вермö уджавны, мунö видз вылö, ыбö, фермаэзö. Гортö кольччöны только поснитик челядь да совсем ни пöрись отир. Кöкан Трöпим дозирайтiс мöссэсö кытöнкö электростанция сайын, кыдз баитiс Васька, Софроновскöй расын, и миянлö колiс поперегавны быдöс деревнясö. И кöть бы öтiк морт шедiс паныт.

Софроновскöй рас — ыджыт логгеза да нюрреза места. Турун сэтöн быдмö пö не öддьöн чöскыт, но небыт, и Трöпим луншöр кадöдз вердö мöссэсö татöн, а рытъяв гöгöр вашöтö нiйö матöжык ферма дынö, кытöн зелёнöй подкормка вылö кöдзöма вика сора зöр. Öнi пастух пукалiс бадь куст сайын и кыйис то ли нинкöм, то ли пешорка. Буско пырöма лапытик кöзок увтö, чапкöма öмсис гöрд кывсö турунö и дыша видзöтчö сэтчинсянь, жар сылö, оз бы и вöрöтчы.

— Вот и бур, что локтiтö, — панталiс миянöс Трöпим. — Велöтi, öнджа, лосьпияноксö порозкöт вермасьны, дак стрась интересно видзöтны.

Эта юöр не только ме понда, но и Васька понда вöлi виль торöн, и зонка лукавöя дзарнитiс чужöмам: видзöт пö, кытшöм делоэс сэтöн вöлöмась!

— Вермасьны велöтiн? Ноко, видзöтам... Васька чепöссис кусттэз сайö. Сiя мыйкö горöтлiс, корис кинöскö, шутнялiс. Буско никсöмöн котöртiс сы дынö. Неылын вöрас тронгисö джынняннэз, кыз голосöн шыасьлiсö мöссэз и нельки миян дынöдз кылiс, кыдз ыджыт животнöйез марскисö кок увтiсь турун. Чожа веськыта миян вылö петiс Васька. Сiя пукалiс пороз вылын, а Буско одзын шакардаöн чеччалiс вöснитик коккеза, руд гöна да ыджыт юра лосьпиянок. Куканёк бура ни велалöма не только мöссэз дынö, но и отир дынö. Сiя немымда эз пов Трöпимись, дугдывтöг лебезитiс Васькакöт, бöбалöм могись вовлiс пороз дынö и неöддьöн зубыта сöтлiс сы кынöмö.

Трöпим жагöник петiс куст увтiсь, кутiс куканёксö силькан кöлöт да сувтöтiс порозыскöт оча чук.

— Но, давай, пондöтö инö, — шуис сiя.

Пороз лöга мöдöртiс синнэсö, мышкыртiс юрсö и керис вид, что готов люкасьны. Куканёк кокнита шмыгнитiс невна бöрлань, кыдзкö казявтöг сувтiс бöрись коккез вылас и тангис ыджыт юрнас порозыс кымöсö. Сöтiс, тыдалö, неумöля, но пороз и кваркыш эз кер, сулалiс, кыдз дорöм, аслас местаын и шочыника бергöтлiс юрнас. Трöпим нюжласьöмöн ваксис-сералiс, а Буско чеччалiс вермасиссез гöгöр, лявгис нюжвыла, дзик тшöктiс нылö янсöтчыны.

— Дядя, вот комедияыс! — радöн горöтлiс Васька. ― Видзöт жö, кыдз пизьдö порозсö.

Куканёк былись жалейттöг сöталiс пороз кымöсö, да эшö мöдiс пуктыны коккесö сы голя вылö и нырыштны му бердö, но пороз öвтыштiс юрнас, и лосьпиянок мутыльнитчис кöчкаэз коласö. Эта коста сiя мукнитiс кыз голосöн, дзик шуис: зубыт! Сёжö дыр куйлыны эз понды, а перыта чеччис бöр и вились лöсьöтчис вермасьны.

— Кыдз тэ думайтан, пышшас сiя вöрö али оз? — юалi ме Трöпимлiсь.

— Кин тöдö, — шыасис Трöпим. — Öнi тай велалiс мöссэз дынö и олö кытчöдз. Кöркö ме пондывлi быдтыны, дак пышшис, батя...

Трöпим чувйыштiс куканёк пакö плеть оропöн, и зверь эшö яражык кутчисис пороз бердö. Сiя тарашитчис быд вын, старайтчис вöрзьöтны порозсö местаись, но нем эз пет. Етша эшö вöлi вынокыс сы вöснит коккезын, эз тырмы прокыс.

Васька вожасис бöра аслас «вöв» вылö. Буско гардчис куканёкыс дынын, никсiс и лявгис нюжвыла, куканёк бергöтлiс юрнас, сё эшö мöдiс вермыны порозсö. Боксянь видзöттöн, картина вöлi былись интереснöй, и ме кыски фотоаппаратöс да кери кынымкö снимок.

Трöпим дыр эшö ваксис-сералiс, сэсся, тыдалö, бырис мылаыс и шуис Васькалö:

— Вашöт нiйö вöрас...

Ме думайтi, что сiя пондас юасьны иньыс йылiсь: здоров ли, оз ли ков кытшöм отсöт? Но Трöпим дзик вунöтöма сьöлöмшöрсö. Сiя кыскис кыськö вугыршаттез и висьталiс:

— Эм кö охота, может, чериок кыят? Вон Софроновскöй йирас бура шедö, стрась гырисьöсь щукаэз эмöсь...

Васька эшö асывнас корис мыччавны, кыдз кыйöны черисö спиннингöн, и öнi öмалiс айсö:

― Кыян, поди, мыйкö вугырöн эта йирись. Ми баитчимö ни кыйны щукаэсö... Кыдз сiя, дядя, шусьö? ― Спиннинг.

― Во, во, спиннингöн.

Трöпимлö вöлi сёровно, и ми мунiм деревняö. Ошпозъяин вöлi сё эшö пустöй, только кынымкö юр мыччисьлiсö öшыннэзiсь, кöр ми оськалiм улица шöрöт. Инькаэз локтöмась, тыдалö, фермаэзiсь пажнайтны и öнi внимательнöя видзöтiсö, кин сэтшöмыс оськалö Васькакöт. Ми содтiм шаггез. Мылякö пыр овлö не ас сьöртi, кöр тэ вылö видзöтöны боксянь да эшö гусьöн шушкöтчöны.

Эстöн ме казялi, что Ошпозъяин — сэтшöм деревня, кöда улицаö петан, дак сёровно ни мыйкö адззылан вильсö. Эг ештö ми мунны джын туйнымöс, кыдз öтiк посöдзись оссис ыбöс и сэтiсь пуляöн петiс гöгрöса ён чужöма, сьöд халата нывка. Öт киас сiя видзис нянь шöрöм да луккез, мöднас шупыта лöсьöтiс чышьяноксö, кöда лэдзчисьöма юр вывсис. Нывка дзарьялiс öтмöдöрö и сувтчывлытöг котöртiс лог ладорö. А ыбöссис крöмликайтöмöн петiс ни ыджыт мыгöра да кöс чужöма старуха. Öт кокыс туйö сылöн вöлi пу торок, киас старуха видзис ырöш соровтан мутэй. Сорасьтöг позис висьтавны, что эта минутаö старухалöн вöлi öтiк дума — кутны нывкасö да пöвсавны буржыка. Но не вöтлiсьны, тыдалö, öтiк кока мортлö сы сьöрын, кинлöн кык здоровöй кок, и старухаыс пондiс метитчыны нывкаыс спинаö. Вот сiя быд вынiсь иньдiс мутэйсö цельö, нывка кокнита чеччöвтiс бокö, и мутэй увгöмöн лэбзис канава сайö. Старуха öддьöн лöгасис, мыля эз инмы нывкаыс спинаö, и горöтлiс кыз вижлокöн:

— Локтан тэ, кобыла, рытнас, мыччала ме тэныт праздниксö!

Нывка и дзар эз кер бöрас, шупыта мунiс лог сайö. Ме кольлалi сiйö синнэзнам и дзарнитi Васькалань: мый, мыся, сэтшöмыс?

Васька висьталiс:

— Макась Домна тай бöра нывсö репöтiс. Пыр нiя тышкасьöны.

— Мый нö юкалöны?

— Этö ог ме тöд, дядя. — Васька вирснитiс нырнас и полöмöн дзарнитiс старухаыслань. А коктöм старуха сё эшö горöтлiс аслас посöдз дынын, грöзитчис вартлыны нывсö кулавлытöдз. Медбы не кывны сылiсь нёштöм баснисö, ми чожжыка пырим оградаö.

Дата добавления: 2015-11-16