Вот тэныт, бабушка, и петыр лун

Гортö куимнанным уйимö пыжын. Вильва вöлi не öддьöн визыв, но пыж уйис сёжö кокнита, качайтчöмöн, мыля лэдзчис ва ньылат. Миянлö ковсис только веськöтлыны сiйö пелыссэзöн да шочыника сынны пыдын местаэзын. Васька бöра куйлiс пыжыс пыдöсын, чöлiс, а Демид дугдывтöг касьтывлiс вöрын адззылöм картинасö, висьтасис, кытшöм интереснöй случайез вöвлiсö сыкöт тайгаын, кöр томнас ветлывлiс ош вылö. Джын стопка мымда и пешлiс старик менам фляжкаись, а баитiс неетша. Оз ешты кончитны öтiк рассказ, кыдз пондöтö: «А вот эшö вöлi случай. Муна öтпыр Мика шор сайöт, мöс кошша. А паныт меным ош. Менам сьöрам не чер не пишаль абу, киам нельки бедь тор эз лöсяв. Смерть, думайта, локтiс. А ош осьтiс ни öмсö, пиннесö гер-р лöсьöтöм. Ме лöгаси да кыдз танги киöс гырдззави öмас, кыдз муткыльтi кывсö! Сымда сiя и олiс, проклённöй...» Эта коста и правда и бöбöтчöм сiдз вöлiсö йитöмöсь öтамöдкöт, что сьöкыт вöлi адззыны кытшöм-либо арт. Тэрмасьны миянлö эз ков и туй вылас часто шоччисьлiм, купайтчим, неöтпырись пуим шерба и шутёммез вылiсь сёйим ягöд. Ошпозъяинö локтiм, кöр вöлi ни пемыт рыт.

Кытöнкö ылын-ылын, Чöвпан сайись вöр весьтын, мыччисьлiс тöлiсь, но, тыдалö, стыдитчис, мыля вöлi джыння, и саясис бöр. Ю весьтын и видззез гöгöр бöра кöвъясис туман, лоис ыркыт. Плотина дынын ми Демидкöт кыским пыжнымöс берегö, пöлiньтiм сiйö, Васька сюйыштiс пыж увтас пелыссэз. Сэсся куимнанным оськалiм веськыта видз вылöт деревняö. Кöть вöлi пемыт, а мунiм кокнита, эгö ни маласьö, кыдз тöн, Кона гриваыс сайын. И кыным матынжык вöлi деревня, сыным гажажык лоис Демид. Сiя öнi сайласьтöг ни бöбöтчис и ошшасис вöрын керöм подвиггезöн, часто касьтывлiс эта коста кыв «ме», а деревняыс дынiсь неыджыт лог вуджикö вдруг явитiс:

— Ныр йыв лудö. Кылö, проклённöй, что ашын петыр лун.

Вöлi сэтшöм час, кöр природа недыр кежö дзик онмöссьывлö. Эзö чирскö турунын кöбывкаэз, эз тульöтчö ваын чериэз, чöлiсö вöрын каёккез и нельки герскан стыдитчис шувлыны ассис нёштöм «дра-драсö». Коми морт баитö, что эттшöм лöнь часö вöрын оз узь öтнас ош. Жагöник и гусьöн сiя кыссьö вöв дынö, кöда сунасьö вöр дорас öшöтöм юрöн, рякöстö страшнöй голосöн. Вöв повзьö сэтчöдз, что усьö коккез вылiсь, оз вермы вермасьны хищниккöт. Вына зверь öтпырись сöтöмöн орöтö вöвлiсь горшсö, юö вир...

Тревожнöй лöнь сулалiс и деревняын. Эз сэтчин дзуртö воротаэз, эз кылö нывкаэзлöн гора песняэз, эз горав гармоння. Только курöг фермаын кынымиськö не аскадö шыасис ылöстöмсялöм петух да кытöнкö Кондовник ладорын, деревня конецас, вöснитик голосöн размöд унньöвтiс понжуг. Гажтöм чувство казявтöг пырис сьöлöммезö, и Демид дугдiс касьтывлыны петыр лунсö. Сiя дзарьялiс öтмöдöрö, кывзiсис öшöтöм пеллезöн, содтiс оськöввез.

— Неладно мыйкö деревняаным. Мыля сэтшöм лöнь? — юасис сiя.

Первöй керкуэз дынö сибалiкö ми казялiм, что деревня оз узь. Правленнё дынын кöин синнэз моз югьялiсö биоккез — этö колхозниккез пукалiсö поспуэз вылын и куритiсö махорка. Кык нето куим инька гусьöн шушкöтчикö локтiсö паныт миянлö. Не öтiк керкуын сотчис свет, мый овлö гожумнас Ошпозъяинын öддьöн шоча.

— Мый татöн шогмö, мыля сэтшöм лöнь? — юалiс Демид, кöр инькаэз ровняйтчисö миянкöт.

— Беда, деда! Кагаокöс лёквиррес пöдтöмась... Старик кыдз вöлi, сiдз и тувдiс аслас местаö осьта öмöн. Васька перыта котöртiс гортас, а ме шагнялi правленнёлань. Сы дынын сулалiсö и пукалiсö посöдзын инькаэз да мужиккез, гусьöн шушкöтчисö öтамöдкöт.

Шадраа чужöма инька, кöда видз вылас кöсйисис вашöтны Онтонсö аслас группаись, тэрмасьöмöн, дзик полiс, что сiйö öмаласö, висьтасис:

— Лöсьöтöм кикимораыс купельсö, лыддьöтыштöм молитва и — аминь! — сюйыштöма кагасö ваас и давай тульöтны. Эта коста и ёркнитас мыйкö посöдзас. Может, пон пыралiс, может, шыр мыйкö джадж вылiсь уськöтiс, а может, и тöв крыша вылiсь сiсь пу тор лэдзис, а кикимораыс чайтöм морт пö пырö, сiдз повзяс, что уськöтас кагаоксö кисис, тульс только пуксьöма, беднöйка, кöньöс пыдöсас. Кытчöдз ох да ах, кадыс чулалас, уна ли кагаоклö колö — тувдöма. Вöлись и мамыс, Надькаыс, локтöма фермаись.

— И совсем сiя тувдöм, кагаокыс?

— Дак, наверно. Кöр больницаас кыскисö, сьöлöмокыс вöрис жö, а синнэсö эз ни осьтлы. Мамыс ассис юрсисö летö, а Макась Домна молитваэз шушкö: ен сетiс — ен и босьтiс пö.

— Может, ловзяс жö...

— Ох-хо-хо, кытшöм этö терпитнытö...

— А кикимораыс мый?

— А мый! Мунöм пö, бытьтö, Пугинö, дзебсисьöм кытчöкö.

— Кутны бы, паразитöс, да öшöтны онняюрöн вон кедр вылас.

Ме пыри правленнёö. Эстöн пукалiсö — кин пызан дынын, кин гор бокын — тожö инькаэз да мужиккез, мукöдыс локтöмась нельки Пугинiсь да Кондовникись. Колхозын кинлöн бы эз шогмы бедаыс, а сiя лыддиссьö öтласаöн, зубыта дойдö сьöлöмсö каждöй честнöй мортлiсь. Кин вермас öшсьыны гортас, кöр деревняын сэтшöм дело?

Илья Сергеевич пукалiс аслас местаын. Вöлi сiя талун бриттöм, юрси тылöппес, кöднаöн одзжык сiдз кужöмöн сайлавлiс лысинасö, лэдзчисьöмась кымöс вылö, синкыммес гартчöмась и козырёкöн вевттьöмась синнэсö. Кöр казялiс менö, сiя гажтöма шуис:

— Шогмас жö, батя...

Колхозниккез чöлiсö, чöлiс и председатель. Да и мый сылö вöлi баитны. Сiдз вежöртана быдöс. Кривöй Матренлö павкас эта понда или оз, а сылö, Илья Сергеевичлö, коммунистлö и колхознöй руководительлö, павкас, конечно. Типпез кольччöны типпезöн, яй — яйöн, нянь кольччö няньöн, а отир коласын идеологическöй удж кольччö идеологическöй уджöн. Вунöтны эта йылiсь некинлö оз ков.

Ме гöститöтi мужиккесö папиросаэзöн, öзтi öтiкö ачым и пукси порог дынö. Öтöрись пырисö томмез и пöриссез, гусьöн шушкöтчисö, дзик локтiсö собраннё вылö, кöть некин эз и кор. Илья Сергеевич дзарнитiс быдöн вылö мыдз синнэзöн, сувтiс пызан сайö и шуис тешитчöмöн:

— Дак мый, ёрттэз колхозниккез? Ашын петыр лун, тi, натьтö, сурок керит, чери кыйит, винаок небит, сiдз эд? Юрбитыштам ашын енлö, тшынöтам керкуэз ладанöн и öдззам пируйтны. Сiдз ме баита?

Отир чöлiс. Не этö видзчисисö нiя асланыс председательсянь. И Анна Даниловна, порсь фермаись заведующöй, кöр казялiс, что отир öддьöнöв öшöтiс юрсö, висьталiс председательлö:

— А тэ, Илья Сергеевич, эн тешитчы. Юрбитны некин оз думайт, а мый баитны талуння случай йылiсь, дак, ме шуанöн, унажыксö тэ виноват. Тэ мукöдлаын öддьöнöв боёк, а мукöдлаын — кыдз ваö кöтöтöм курöг. Да... И эн лöгав, пожалуйста. Кынымись ни баитiм: примит Матренкöт мераэз, дак тэ сё шутитлiн. А кин баитiс, что Домнасö корлан правленнёö? Поди, корлiн? Кыдз бы не сiдз. Кöсйисин и вунöтiн. Яй да кольть сайöвтiсö тэ одзись быдöс, кыдз слепöй лоин.

— Вот, вот, — шыасис шадраа чужöма инькаыс. — Ме эшö тöвнас баитi, мыся, Матренсö, лёквирöс, вашöтны колö деревнясис, мед оз позорит миянöс...

— Сулалö, сулалö, — дорйисис председатель, тi мый думайтатö юррезнаныт, кытчö ме сiйö вашöта? Вон баитi прокуроркöт, дак шуö: оз туй вашöтнытö, воспитывайтны пö колö. Кытчö сiйö воштан, не ловйöн жö муö сюйыштны.

— А кыдз тэ сiйö воспитывайтан?

— Да кыдз... Асьныт жö мешайтатö. Ме ли мый ли кагаоккесö нöбöта сылö пыртны? Асьныт нöбöтатö. Вердат, юкталат, паськöм сетат, а сылö только эта и колö. Вон осьтöм пö Чöвпан увтö чуть ли не вичку и кин сэтчин юрбитiс? Бöра жö инькаэз: Егорлöн иньыс, Трöпимика, Петришна Öгрöпен...

— А тэ перво томмесö, Öгрöпен коддесö воспитывайт. Вон клуб кытшöм вöлi, дак тэ сэтчö типпез йöртiн. Курöггез сералöны тэ вылын, вот мый, — баитiсö сразу кынымкö инька. Илья Сергеевич дугдiс пиньгисьны. Сiя вöлi сэтшöм морт, кöда кужис чöвны, кöр подчинённöйес баитiсö правда. Инькаэз жö, кыдз мошшез ма чуркаын, кытчö пырис лöдз, дыр эшö волнуйтчисö и горöтлiсö:

— Адззы кикимораыс вылö управа. Вашöт сiйö деревнясис — и быдöс.

— Орöтны бы сылiсь юрсö да чапкыны поннэзлö. Эн сомушшайт, полакала.

Но вот чеччис аслас местаись Анань Данько, увереннöй походкаöн локтiс пызан дынö, мымдакö чöлöмöн видзöтiс йöзыс вылö и шуис чорыт голосöн:

— Не собраннё талун, но баитыштны колö. Оланным миян — кыдз кöс нянь. Сёян, сёян кöс няньсö, а сьöлöм оз бурмы, сёровно колö то ли яйтор, то ли йöлок. Кöр видзöтан, дак ровно быдöс эм: и нянь, и карч, и яйыс мыччисис, кажитчö — сьыв да ов, а мыйкö оз тырмы. Огö ми кужö гажöтчыны, огö кужö овны настоящöй культурнöй оланöн. Сымда и керам, кыдз деддэзным керлiсö: луннас уджалам, а ойнас узям.

— Да, этö сiдз! — öтiк öмись горöтчисö кынымкö морт.

— А Кривöй Матренöс колö судитны, — одзлань баитiс Данько, — мымда ми сыкöт вожгайтчим, мымда терпитiм — тырмас сэсся! Если ашын оз нуöт сiйö милиционер, то судитны колö общественность судöн, висьтавны сылö медбöрьяись сэтшöм кыв, медбы сразу вунöтiс святöйеслiсь ниммесö.

— Правильно! — бöра горöтчисö колхозниккез.

— И эм менам эшö öтiк предложеннё, — веськыта народыс вылö видзöтiкö, лöгöнмоз баитiс Данько. — Колö дугдыны празднуйтны этö петыр лунсö. Кад ни! Давайте примитам постановленнё, что ми, колхозниккез, откажитчамö эта праздниксянь. Не миян сiя. Петö öтiк позор!

— Правильно!

— Позор!

Адззисис и сэтöн шутник: гор сайын пильскнитiс öтiк женскöй и вöснитик голосöн шуис то ли аслыс, то ли соседдэслö:

— Вот тэныт, бабушка, и петыр лун!

Кынымкö морт горöн серöмтчисö и нельки председатель паськыта шынньöвтiс, а Данько чышкис пымалöм кымöссö и кокнит сьöлöмöн мунiс аслас местаö.

Мутэй Егор (ме эг и адззыв, кыдз сiя пырис татчö) сьöкыта ловзисис и пондывлiс вöлi баитны, что раз хозяйкаэз лöсьöтчисö таво праздникыс кежö, то колö юыштны суроксö, не порссезлö жö сiйö валитны, а мöдчид позяс и не празднуйтны сэсся. Но кынымкö инька öмалiсö сiйö сразу, висьталiсö веськыта, что тырмас сылö, важ Мутэйлö, соровтны арттöмсö. Егор тшöк мунiс, нёджжöвтiс кöин моз, а Илья Сергеевич хитрöя мигнитiс сылö, дзик шуис: адззан пö делоэс кытшöмöсь... Егор эз вермы терпитны этö и чожа петiс öтöрö. Председатель чапкис лысинаыс вылö юрси тылöппесö, шуис чорыта:

— Бура баитiс Данько, öддьöн бытшöма. Сенокос бöрын чукöртам общöй собраннё и примитам сэк постановленнёсö, ог сэсся пондö празднуйтны поповскöй праздниккесö, öтiк вред нысянь. А талун мунö шоччисьö и висьталö нылö, кин татöн эз вöв, медбы ашын быдöн вöлi удж вылын. Кин лысьтас юны вина и оз мун уджавны, ась бедуйтö ас вылас: накажита! Турун колö заптыны, а не енлö кеймыны. Вот и быдöс.

― Нет, не быдöс, — шыасис Анна Даниловна. — Тэ висьтав отирыслö, кöр клуб осьтан? Эд клубыс сёжö не курöг поз...

— Ашын жö клубын öтiк типок оз ло. Адззам нылö местасö фермаын. А клубын организуйтам художественнöй самодеятельность. Ачым гижся хоровöй кружокö, тожö сьыла не умöльжыка мукöдся.

Илья Сергеевич висьталiс этö и пуксис местаас. Сiя лöсьöтчис, тыдалö, эшö уджалыштны, а отир рознитчис горттэзö.

Öтöрын вöлi ыркыт. Ю ладорсянь пöльтiс уль тöлок. Чöвпан весьтын öшалiс югыт тöлiсь. То öтiклаын, то мöдiклаын китсасисö петуххез и, веритны кö нылö, — вöлi ойшöр кад. Но деревня эз узь. Пугин ладорын гургис трактор, Кондовникын уннялiс пон. Ме мунi Домна посöдз дынöт. Эстöн ыбöс порог вылын тупка моз пукалiс старухаыс, а сы одзын сулалiс Мутэй Егор. Нiя гусьöн шушкöтчисö, часто ыш лолалiсö и позис вежöртны, что сьöлöм выланыс вöлi сьöкыт. «Тыдалö, дружитöны», — думыш кери ме и содтi оськöввез.

Ме пыри Кöкан Трöпим чомö и водi Васька бокö. Зонка эз на узь. Сiя бергалiс бокись бок вылö и размöд пильскнитiс горöн. Зонкаöс пöдтiс то ли смех, то ли горзöм.

— Тэкöт мый? Мыля он узь?

— Нем, дядя. Сейчас онмöсся, — шыасис Васька и пырис зипун увтö. Эта морток вунöтöма ни деревняын горе йылiсь, олiс аслас оланöн.

Ме решитi ашын мунны гортö.

Дата добавления: 2015-11-16