Чöвпан дынын

Марфа Демидовна мыйлöкö мунiс Кривöй Матрен ордö, а Настя лöсьöтчис миськавны джодж. Сiя пыртiс сьöкыт ведраэзöн ва, сэсся адззис кыськö тыр чуман гырись песок. Ошпозъяинын джоджжез озö краситö и миськалöны нiйö песокалöмöн. Ме видзöтi, кыдз Настя весöтiс песоксö, и думайтi, что этö уджсö буржык бы вöлi керны Васькалö.

— Отсалiн бы сойытлö, — горöтчи сылö.

Настя висьталiс:

— Не, ме ачым...

Страннöйöсь вöлiсö соя-вона коласын отношеннёэз. Городiсь локтöм бöрын Настя бытшöмика эз и баит воныскöт, дзарьялiс сы вылö лöгöн. Васька жö сойыс дырни хитрöя шыннялiс и, кыдз плут, мигайтiс шульга синнас.

— Тi мый — од лöсялö сойыткöт? — юалi ме, кöр петiм öтöрö.

— Лöгалö, — шыасис приятельö. И невна чöлöм бöрын содтiс:— Мöйму адззылi, кыдз сiя ветлöтiс Пугинiсь Гришакöт оча ки, но и висьталi мамöлö.

— И мый жö?

— А нем, мамö летiс сылiсь чикиссесö, а меным сетiс прениккез.

Эта юöр кольмöтiс юрöс. Ме только и верми горöтчыны:

— Эх тэ, нятьöсь морток...

Медбы не мешайтны Настялö, ми решитiм ветлыны Чöвпан дынö. Ошпозъяинсянь керöс дынöдз вöлi нёль нето вит верста. Но Васька юöртiс, что если мунны не туёк кузя, а веськыта волокöт, то эта расстояннё чинас кыкись.

— Мунам волокöт, — согласитчи ме.

Берегись берегö чапкöм колода вылöт ми вуджимö пыдын лог и пыримö ягö. Вöлi сiя сук, пожуммез быдмисö оча бок, и шондi югöррез эз и сидзö мукöдлаас. Руд рöма кузь вуджöррез сулалiсö пуэз коласын, а кок увтын бель видзис быгалöм чорыт нитш. Коккез вöйисö эта нитшö, и миянлö кажитчис, что мунамö дзик кытшöмкö чорыт шöртiсь кыйöм ковёр вылöт. Мöймуся усялöм голиэз да еммез, не совсем эшö сiсьмöм турун да ягöд кор пöжсьöмась öтлаын нитшыскöт и нысянь, кыдз кучаö чапкöм назёмсянь, кайис юр кольмöтан дук. Öтмöдöрын лöзöтiсö туруннэз, пуягöд кор, и почти быд мыр гöгöрын нюжалiсö кузь кöчвоннез.

И вöлi лöнь, сэтшöм лöнь, что кылiс, кыдз усялiсö му вылö кöс голиэз, а кок увтын уввез ризьöтöмсянь шыасьлiс говк. Сир дук öшалiс воздухын, пуэз коласын везъясис вöснитик лöз тшынок и быдöс ягыс вöлi таинственнöй, дзик сказочнöй.

И кыным пыдöжык ми пырим вöрас, сыным пемытжык лоис сэтöн. Эстöн гажöтчисö не только ни веж басöк пожуммез, а öтвыв ныкöт сулалiсö паськыт уввеза тоша кöззэз. Шочыника пантасьлiсö чочком кыдззез, учöтик рябинаэз, и вöлi пемыт, кыдз гуын.

— Ог ли ми тэкöт öшö, стриж пиян? — юалi Васькалiсь.

— Кхе! Да тэ мый, дядя? Да ме эстi куньöм синнэзöн муна и то ог öш. Он верит? Быль. Вот кöртав синнэзöс чышьянокнат и ме тэнö веськыта Чöвпан дынö петкöта.

Интереснöй эта зонка, Васькаыс. Сiя вермö вöснитик потш кузя вуджны шор, ойнас лысьтö пырны пустöй керкуö, быдтö лосьпиянокöс, любитö природа — кажитчö, должен лоны душанас нежнöйöн да добрöйöн, дак на тэныт! Следитö сойыс сьöрын, оз тöд, кытчö воштыны вынсö и этасянь гöняйтö колхознöй пороз вылын.

Ме тöдi, что Ошпозъяинын быд ыблöн, быд расоклöн, нельки быд учöтик логлöн эм аслас ним, и öнi юалi Васькалiсь:

— Кыдз этö волоксö шуöны?

— Сьöд Кулигаöн, дядя. Баитöны, эстöн пö лешаккез олöны.

— Лешаккез?

— Ага. Мамö пыр висьтасьлö, кыдз лешакыс басöк нывкаöс гусявлöм деревнясис. Мунас öтпыр нывкаыс Кулигаö тшакьявны, вон логыс дорö, и сiйö пышшöтöм лешак. Инькаэз да мужиккез кошшасö неделя, кошшасö кыкö, оз вермö адззыны. Только год бöртi öтiк вöралiсь казялас нывкаыслiсь коскаэсö Пальниковскöй дзибись.

Сёйöма сiйö лешакыс.

— М-да-а. И тэ думайтан эта быль?

— Дак... наверно... Нывкаыслöн мамыс сё эшö ловья. Öнöдз горзö сы понда и висьтасьö, кыдз вöлöма делоыс. Водi, шуö, ойнас узьны и вдруг йиркнитiс кинкö ыбöсö. Пырис, шуö, керкуö ыджыт мужик, сэтшöм ыджыт — юрыс потолокöдз павкö, и но жö тешитчыны: ме пö гусяла нывтö, сiя пö менам инь лоас. Инькаыс пондас би öзтыны, и мужикыс öшöма сразу. А гожумнас и гусялöм нывкасö.

Сьöкыт вежöртны Васькаöс, öддьöн сьöкыт. Удерлун только баитiс, что гижас Москваö письмо, медбы босьтiсö сiйö сьöрö космонавттэз, кор пондасö лэбзьыны Тöлiсь вылö, а талун видзöт, кытшöм сказкаэз лёбö. Меным охота серавны, но баита сылö серьёзнöя. — Некытшöм лешак эстöн абу и эз вöв. Нывкаыс просто öшис вöрас, повзис и öдззис котрасьны, кытчöдз эз кув тшыгйöн Пальниковскöй дзибас. Тэ жö школьник, а лешакöс касьтывлан. Наверно, эшö пионер? Васька дзебис синнэсö и öшöтiс юрсö.

— Эзö примитö, — шуис сiя гажтöма.

— Этö мыля жö? Умöль отметкаэт понда?

Зонка шы эз сет. Сiя чепöссис кöз сайö, нетшкöвтiс вуж сорöн пöлян и чирзiс радöн:

— Видзöт, мый ыжда быдмöма! Настоящöй пальма! Хитрöй, öддьöн хитрöй Васька. Кежöтiс баснисö мöдiк туёк вылö, сiдз эз и висьтав, мыля сiйö эз примитö пионерö. Но да ладно, кöр-нибудь висьталас.

Ми петiм лог дорö, кытöн вöлi неыджыт кушин, и син одзын оссис чудеснöй картина. Кытчö бы эн нёджжöвт, быдлаын сулалiс пемыт вöр, а логыс пöлöн, шондi югöррез увтын, вöлi дзик мöдiк мир. Эстöн быдмисö пышнöй льöмпуэз, öтвыв кöзоккезкöт да пипуэзкöт сулалiсö кудриа кыдзоккез, учöтик шорок дынын каттисисö сэтöр кусттэз да баддез, пежьялiсö розовöй цвета жельнöггез и почти моросви кайöм турун. Сэтöн пантасьлiсö пиканнэз да ыджыт пучкаэз, пöляннэз, паськыт чочком султана быдмассэз — умраэз. И, конечно жö, цветтэз — лöзöсь, голубöйöсь, гöрдöсь. И быдöс эта лолалiс, лэдзис ас пытшкись чöскыт дук, койис öтмöдöрö сэтшöм аромат, кöдö кыскан моросö и охота кытчöкö лэбзьыны. И меным жаль лоис мылякö этö местасö. Вöр пыдöсын сiя, ылынöв йöзыс дынсянь, некинлö любуйтчыны сы красотаöн.

— Васька, — горöтi ме, — кытшöм татöн гажа! Сiя дзар керис öтмöдöрö и согласитчис:

— Гажа, дядя. Только этчин, увланьынжык, эшö басöкжык местаэз эмöсь. Сэтчин неважын подавöдитiссезлöн праздник вöлi. Öксисö лог дорас, сьöрö вайисö гармонняэз да балалайкаэз и но жö гажöтчыны. Сэк Анна тёткалö, кöда порсь фермаын уджалö, орден сетiсö. Он верит? Быль. Ме ачым сiйö, орденсö, адззылi — учöтик сэтшöм, гöрд рöмöн свиттялö. Анна тётка босьтiс и дыр баитiс...

— Интересно, мый сiя баитiс? Наверно, порссез йылiсь?

— Перво порссез йылiсь, а сэсся природа йылiсь.

— Мы-ый?

— Природа йылiсь. Пöрисьмытöдз, шуö, татöн олi, а первуись казялi, кытшöм гажа природаыс. И аслас синваэз петiсö...

— Вон мый сэтöн вöлöма! Быль, Васька, природаыс вермас синваэз петкöтны. Только не курытöсь, а сэтшöмöсь... Кыдз бы тэныт висьтавны... Сэтшöм синваэз, кöдна петöны ыджыт и гажа чувствосянь.

Ог тöд, вежöртiс ли менö Васька, но кывзiс внимательнöя. Ачыс паськыт синнэзöн видзöтiс öтмöдöрö, лолалiс тыр моросöн и шыннялiс кага моз. Эта минутаö сiя, конечно, вунöтiс лешакыс йылiсь сказкасö, вöлi вдохновеннöй поэтöн. И ме думайтi, что мый бы эн шу, а кык морт олöны эта Васькаын. Öтыс кöркöся ошпозъяинскöй зонка, кöда веритiс и сатаналö и чёртлö, мöдыс — настоящöй советскöй школьник, мечтатель, книгаэз лыддьöтiсь. Интересно, мыля сiйö эз примитö пионерö? Охота вöлi тöдны этö, но юасьны эг понды, полi, что Васька тшыкöтас настроеннёöс кытшöмкö умöль юöрöн.

Ме дыр сулалi вöрзьöтчытöг, видзöтi гажа мирсö и думайтi олан йылiсь. Сложнöй оланыс, öддьöн сложнöй. Не сразу вежöртан отирсö, кöднакöт пантасьлан, он сразу тöд нылiсь душасö да думаэз. Ыджыт ли деревня Ошпозъяин, а и сiя дзик кыкпöвса, дзик кык деревня йитчöмась öтiк деревняас. Öтас олöны честнöй уджалiссез. Нiя вын жалейттöг нетшкöвтчöны одзлань, а мöдас — ляшмасьöны нятьын Кривöй Матреннэз, Макась Домнаэз, думайтöны только ас йылiсь Мутэй Егоррез... И вдруг менам чужис дума: природаöн любуйтчикö Анна Даниловналöн петiсö синваэз, а мый, если вайöтны татчö Кривöй Матренöс? Вайöтны и висьтавны:

— Видзöт, кытшöм гажа татöн! Мирыс керöма натодиль сы понда, медбы серавны да шыннявны...

Наверно, нем бы эз вежöрт Кривöй Матрен. Морт, кöда юрын сьöд думаэз, оз вермы гажöтчыны да чувствуйтны сiйö, мый чувствуйтö, шуам, Анна Даниловна, кöдалö бур удж понда сетiсö орден.

Ми шысеттöг оськалiмö кушиныс вылöт, лог пыдöсын вуджим шорок и, бадь кусттэз бердö кутчисьöмöн, кайим мöд ладорас. Сьöд Кулига кольччис бöрö. Ыджыт пуэз öшисö совсем, только кусттэз гардсисö öтамöдкöт да тшöк турун кышöтiс кок увтын. Вöр весьтын гажöна югьялiс шондi, сьöлöм вылын вöлi кокнит и долыт.

Миян одзын кылiс поноклöн негора лявгöм. Васька дзар керис чужöмам и шуис:

— Ананикалöн поныс кылö. Бöра важ керку местасö, тыдалö, старухаыс дозирайтö.

— Кытшöм важ керку места?

— Да эстöн жö отруб вöлi. Только неважын Ананикаыслöн зоныс, Данькоыс, керкусö разис. Ошпозъяинö нiя виль горт сувтöтiсö.

Отруб! Сьöд Кулига сайын, пемыт вöр коласын, сiдзкö, олiс отир. Интересно, кытшöм нылöн вöлi оланыс? Ох, страшнöй, наверно. Усисö тöдвылö лыддьöтöм книгаэзiсь картинаэз, ловзисö геройез и воображеннё чужтiс мылякö не талуннякодь мича да шондiа лун, а пемыт ойшöр. И зэр. Эшö рытнас пондiс кайны ыджыт кымöр, локтiс Сьöд Кулига ладорсянь и öдззис гымавны Чöвпаныс весьтын. Кузь чарньöввез, кыдз плеттез, шулялiсö керöссö, вот-вот поткöтасö сiйö, вöрын лэбис страшнöй шум. Сэтöн лотшкöтöмöн чегласисö пуэз-великаннэз и кинкö ружтiс нёштöма да сьöкыта. Сэсся ыджыт лешак кутчисис ваксьыны-серавны — го-го-го!

— Господи! Свят, свят... — пернапасасьöны отрубын олiссез, асьныс чожжыка пырöны пемытжык пельöсö, кытöн оз кыв лешакыслöн горöтлöмыс.

Ог вермы висьтавны, мыля сэтшöм картина чужлiс, воображеннёын, только тöда, что этö думайттöн куньлi синнэзöс, а спина кучик вылöт мунiсö кöдзыввез. Ме вежöртi: вöрын öддьöн кокнита чужöны быдкодь думаэз, природа кужö орсны морт воображеннё вылын... Чожа ми петiмö неыджыт ыб вылö, кытöн лöзöтiс ося. Зэррез важын ни эзö вöлö, и ме думайтi, что сю таво быдмас öддьöн умöль. Но эстöн, вöрыс коласын, ося кайис дружнöй да тшöк и эз вöв сэтöн öтiк ёгтурунок. Не весь, тыдалö, баитiс Илья Сергеевичыс, что ыббес сылöн озö полö некытшöм засухаись.

Ыб дорöт чуклясис туёк и, сы вылöт оськалiкö, ме видзöтi местаэсö. Быдлаын сулалiс тшöк вöр, сiя топ стенаöн асыкалöм кушинсö и только öтiк местаын, шульгаланяс, изовöй клинöн мöртчöм тайгаыс шöрö ыджыт керöс. Эта и вöлi Чöвпаныс. Сылöн таланись покатыс почти веськыта, кыдз волькöтöм стена, лэбтiсьöма стогодся пуэзся вылöжык, йылыс мöртчöма чуть ли не небоас и быдöс аслас видöн керöс вачкисис грознöй крепость вылö.

Ми поперегалiмö ыбоксö и самöй Чöвпан увтсис, вöр дорсис, казялiмö ыджыт льöмпуэз да сэтшöм жö кыдззез. Эна пуэз коласын тыдалiс чочком сёйись вартöм ыджыт гор. Неылын сы дынсянь сулалiс кöньöс кыза керрезiсь тшупöм учöтик избушка. Öтмöдöрын куйлiсö сiсьмöм пу торрез, чегласьöм плахаэз да слегаэз. Горыс дынын путриктöмöн быдмис кузь петшöр и ылiсянь позис вежöртны, что эстöн вöлöма кöркö усадьба.

Öтiк лапытик кыдз увтын, кöда быдмис невна бокынжык, сiсьмыны ни пондöтчöм кер вылын пукалiс набойнöй дöраись вурöм дубаса, важ кокошника старушка, и, кымöс вылас кисö пуктöмöн, видзöтiс миянлань. Мöд киас старушка видзис неыджыт туисок. Сы коккез увтын куйлiс рукйöсь гöна пон, кöда öдззылiс вöлi лявгыны, но старушка, кылö, öлiс, и сiя лöньсис.

Вöлi старушкаыс сэтшöм ни пöрись, что не только юрсиыс, но и синкыммес лоöмась лымся чочкомжыкöсь, рожабаннэсö и кымöссö доль и поперёк вевттьöмась пыдын бороздаэз, а син гöгöрсö поснитик чукыррез каттьöмась дзик чераньвезöн. Киэс сылöн косьмöмась сэтчöдз, что вачкисисö курöг коккез вылö, а пельпон вылас йöрнöсыс видзсис дзик вешала вылын. Но пукалiс старушка кер вылас веськыта, мир вылö видзöтiс гажöна и кыдзкö гордöя, дзик баитiс: ме эшö ловья и вына...

— Здравствуй, бабушка!

— Локтан, кагу, здорово, — шыасис старушкаыс. Голос сылöн вöлi дрöжитана, но приятнöй, кыдз не совсем эшö сiмöм сильканоклöн шы.

Меным охота лоис баитыштны эта пöрись морткöт, юасьны, кыдз нiя олiсö отрубын, но эг тöд, мыйсянь пондöтны, и юалi:

— Поныт абу лöг? Оз пурсьы?

— Кытiсь ни сылö пурсьынытö? — бодрöй шынньöв пыр отвечайтiс старушкаыс. — Пöрисьмис, ме кодь жö лоис. Куйлö тай вот. А томнас öддьöн бöб вöлi...

Васька пуксис поныс бокö и волькöтiс кинас сылiсь рукйöсь пасёксö. Понок благодарнöя дзарнитiс зонка вылö, пондывлiс вöлi чеччыны, но дышыс вермис, и сiя таралiс бöр бок вылас. Сiдз куйлöмöн и нюлiс Васькалiсь кисö быгалöм гöрд трепич кодь кывнас.

Ме пукси старушкаыс бокö. Ананика юасис, кин ме и кытiсь татчö локтi. Ме подробнöя отвечайтi, а сыбöрын и ачым юалi:

— Тiян мый, отруб, шуöны, эстöн вöлöма?

— Кыдз инö. Сетлiсö кöркö вöр шöрас, пятьдесят годся дыржык татöн олiмö. Эстöн сэк пемыт волок вöлi. Быдöс айкаö, Ананюшкоö, öтнас весöтiс: пуэсö пöрлалiс, мырресö мöдралiс, вот и ыбок лоис. Мымда вынсö песiс, беднöйка, ой-ёй-ой...

Менам воображеннёын чужис картина. Вот мунö деревенскöй сходка. Мужиккез рявзöны лёкгоршöн, готовöсь ульöн сёйны öтамöдöс, а öтлаын и землемерöс, корöны буржык му. Но богатжык морттэз землемерсö ештöмась ни юктавны крепыт самогонöн, гусьöн сетiсö сылö деньга и эта понда получитiсö деревняыс дынiсь буржык муэсö. А нылö, кинлöн эз тырмы выныс небны землемерсö, сходка вылын сетiсö вöррез да нюррез: не охота тшыгйöн кувны, дак весöтат аслыныт ыбоккез. Ананьлö дöнзис Чöвпан дынiсь волок, кытöн небоыс öшалiс вековöй пожуммез да кöззэз вылын, асланыс грознöй видöн нiя повзьöтлiсö любöйöс, кин вовлiс татчö черöн.

Но не полiсь морт вöлi Анань. Ыджыт мыгöра да паськыт пельпоннэза, настоящöй богатырь, кöда лöгувья аслас кулакöн вермис бы кольмöтны порозöс, босьтiс чер и давай юкьявны тайгасö. Сiя пöрлалiс пуэсö, тарлалiс нiйö бокö, кыдз ош, мöдралiс мыррез, сыбöрын öзтiс би и сотiс быдöс окропоттёсö. Сiдз, пожалуй, и буржык: палёж вылын рудзöг путриктö стенаöн, муыс бытшöма вежтö мортлö кисьтöм ньылöм понда.

— Натьтö, гажтöм татöн вöлi, бабушка? Эд вöр быдлаын...

— Кыдз не гажтöм. Перво öддьöн гажтöм вöлi. Кытчö бы дзар эн кер, быдлаын волок. Гожумнас ошшез ветлöтöны, а тöвнас öшын увтын кöиннэз уннялöны. Сэтчö жö и баитыштны некинкöт. Умöль, кагу, вöрас овны öтiкöн. Кöиныс и то старайтчö матiжык мортлöн оланiн дынöт бергавны, а ми эд не зверрез вöлiм. Но велалiмö тай, олiм жагöник. Да и то шуны, етша сэк гажыс и Ошпозъяинын вöлi. Пемыт йöзыс кодувья токо и гажöтчывлiс. Да разь гажöтчöм эта, кöр кок вылын он öшшы? Юасö мужиккез аскурсö и давай тышкасьны, öтамöдöс зоррезöн пöльтöны, вийöны. Кыдз праздник, сiдз и покойник, да эшö не öтiк мукöдпырся. А айкаö менам аскурсö öмö некöр эз босьтлы, сурок токо юыштлiс, покойнöй, и то не быд праздник коста.

Старушка недыр чöлiс, кажитчö, думайтiс кытшöмкö сьöкыт дума. Но вдруг ме казялi, кыдз синнэс сылöн перыта пондiсö томмыны, чукыррез тöдчöмöн чинiсö, быдöс чужöмыс вевттисис кытшöмкö гажа вдохновеннёöн. Старушка шынньöвтiс. Мый сылö усис тöдвылас?

А вот мый.

— Эз Ананьö аскурсö ю, а гажöтчыны кужис. Кужи-и-с, батя. Юыштас праздник коста ырöш, пешлас сурок и корö менö керöс вылас, Чöвпаныс вылö кайны. Вот каям кыкöн, а то и челядёккезнымöс сьöрö босьтам, пуксям сэтчин самöй йылас и давай жö тонньöтлыны-сьывны! Син одзын пемыт вöр, кыдз окиян-море ольсассьö, лöзöтöны видзоккез, миян ыбокным лöзöтö, быдлаын пöткаыс сьылö, приволлё! И ми сьылам. Сэтшöм горöн сьылам кыкöн, говкыс вöрас валлэзöн ветлö. Ошпозъяинöдз миян песняным кывлöма. А то эшö пондам йöктыны, öтамöд сьöрын вöтлiсьны! Гажыс, гажыс мымда! Вот сiдз и чулалас праздникным.

Гöссез миянö эзö вовлывлö, тöдiсьöн Ананьöс шуисö. Родня миянöс тожö эз радейт. Айö, покойнöй головушка, богатöй морт вöлi, гордöй, лöг. А Ананьö беднöй семьяын быдмис, пыр миянын строшнöявлiс. Ме боё-ок томнам вöлi, и Ананьыс тожö öддьöн боёк вöлi, кöть и шоча пöттöдз сёйлiс. Вот и пондiм радейтны öтамöдöс. Менам сьöлöмö висьö-косьмö сы понда, сiдз бы и лэбзи сы дынö. А айö и пельöн нем оз кыв, синöн нем оз адззы. Öнöдз паметям, кыдз корасис жöникö. Локтiс Анань асывнас и бух токо усис пидзöссэз вылас. Вывтас сылöн шабурок умöлик, вешьян пидзöссэс бырöмась ни, токо сiя и эм вильыс — кокас нинкöммез. Айö кыдз рявкнитiс ош моз — стрась! Мун, шуö, куш кынöм, грехас эн вошты менö! Марш! И давай чужьясьны. Чеччис Ананьö пидзöссэз вылiсь, дзарнитiс ме вылö, а ме не кулöм не ловья сулалi. Сетiс меным поклон и петiс.

Эта рытö ме гусьöн котöртi Анань дынö. Мунiм сыкöт вичкуö, öдззим кеймисьны попыслö. Ананьö адззöма эд кыськö быдса четвертнича аскурсö. Юкталiс попсö. Сiя кодувьяс и веничайтiс миянöс.

— И мый жö одзлань? — юалi ме, кöр старушкаыс дугдiс баитны.

— А мый... Бурсö мийö эг и видзчисьö нем. Токо сы йылiсь и думайтiмö, медбы öтлаын кольччыны. Айö лöгувьяс ёрдöма менö, некытшöм козин эз сет. Сiдз öтiк йöрнöс-дубасöн и олi перво. Да олi тай. Нем эз ло. Ананьö öддьöн радейтiс менö, пыр радейтiс. Бытшöм сьöлöма морт вöлi. Кöр строитчим эта Чöвпан дынö, менам кагаок ни шогмис. Дак Ананьö менö öтöрö эз лэдзлы. Быдöс ачыс керис. Пуэсö вöрсис кыскалiс, ачыс керку тшупис, почти öтнас и лэбтiс сiйö. Мымда ме сыкöт олi, и öтчид нельки пес эг поткöт, öтчид эг пырт сiйö керкуö. Кöр сьöкытöн ветлöтлi, дак и ва эг кайöтлы некöр. Мöдiк бы ме местын совсем дышмис. А менö дышнас бöра эзö жö шуö. Уджавны старайтчи. Мунас Ананьö волокö вöравны, неделя сэтчин ветлöтö, а ме эта коста вундыны пета. Локтас Анань гортö, видзöтö, — а сюным и вундiссьöма ни. Кутчас менö видны, асьтö, шуö, он берегит, менö он радейт, а меным эта видчöмыс и бур.

Ананика сё баитiс и баитiс ровнöй небытик голосöн, а ме кывзi да видзöтi картинаэз, кöднö дугдывтöг чужтiс воображеннёö. Вот сулалö колодец дынын бытшöм статя, мича чужöма да басöк паськöма инька. Сiя лэбтö ва. Лэбтыны сьöкыт, инькалöн етша выныс, мыля сьöлöм увтас кагаок новйöтö. Эта минутаö вöрись петiс сьöд тоша ыджыт мыгöра мужик. Пельпон вылас сылöн пишаль, спина сайын пестер. Пестер вевтыс оссьöма и сэтiсь тыдалö ошлöн лэчыт гыжжеза лапа. Мужик локтiс иньыс дынö, кокнита лэбтiс сiйö киэзас и окалiс дзирыта-дзирыта: горадзуль тэ менам...

— Вот сiдз и олiмö. А мый инö сэсся? Инькалö нем оз ков, токо бы жöникыс радейтiс, — висьталiс Ананика и бöра шынньöвтiс, мыйсянь лоис дзик томжык.

— Тэ ошшесö, натьтö, и ачыт адззылiн, бабушка?

— Баитi ни тай, мыся, тыр быдкодь звирыс татöн вöлi, — ошшасьтöг горöтчис сiя. — Уна нiйö адззылi: и ошöс, и кöинöс, и ручöс, а туаннэзöс да кöччезöс ачым кыйлi.

Шондi важын ни öшалiс юр весьтын, пöжис и сотiс пельпоннэз нельки паськöм пыр. Кыдзыслöн вуджöрыс жагöник вешшис и вешшис, джендамис начöдз, а меным сё эшö охота вöлi кывзыны старушкасö, дугдывтöг юаси, а Ананика ыджыт охотаöн висьтасис аслас олан йылiсь.

— Вон, разоритiм важ познымöс, разим быдöс. Ошпозъяинö зонö керку камгис-сувтöтiс вильö и олам сэтöн. Бур сэтчин йöзыс коласын овны, гажа. Но мылякö сьöлöмö сё татчö кыскö. Локта, видзöтышта-кера и ловзьö быдöс паметям. Талун вон кашничок адззи и чуть эг горзы: сiдз сьöлöмö и вöрзис местасис. Зонкаö, Данькоö, чапкöма керкусö разьтöн, а ме босьтi кашничоксö. Сiйö эшö Ананьö, покойнöй, Усольеись вайлiс. Ветлiс сэтчин совла первöй германскöй войнаыс панытö и небöма базарись.

Эна кыввез бöрын Ананика босьтiс керыс бокись кашничок, чапкалiс сiйö киись-киö, кыдз кагаокöс, шыннялiс дзик ловья мортлö и чувственнöя шуис:

— Видзöт, кытшöм сiя: кокнитик да басöк. — И нюжöтiс посудасö меным. Ме босьтi сiйö да видзöтi. Бурыс, конечно, нем эз вöв: кашник кыдз кашник, потласьöм дорреза и горö унаись сюйыштлöмсянь сьöдöтöма начöдз. Но старушкалö сiя вöлi дона, кыдз память, и ме шуи:

— Бытшöм вöлöма дозыс.

— Чöвпан дынас вит кага быдтi, и быдöнныс эта кашничокись каша да пöжöм йöв сёйисö. Данькоö öнi ыджыт морт, а тожö эта кашничоксянь лэбис. Öнi тай чапкöма, оз сэсся ков...

Старушка осторожнöя пуктiс кашниксö бöр кер бокас и сьöкыта ыш ловзисис. Тыдалö, усис мыйкö тöдвылас.

— Ми Данькоыскöт тöдсасимö ни, — юöртi ме. — А мöд зоннэт кытöн инö?

Ананика дрöгнитiс, дрöжитана кисö вайöтiс тшöкаыс дынö. Сiя дыр пукалiс чöлöмöн, а сэсся шыасис гусьöн:

— Куим зон вийны, кагу, шедiсö. Мунiсö война вылас и эзö ни бöр локтö. Ох-хо-хо, мымда ме синвасö кисьтi ны понда. Эттшöм отир вöлi. Айныс кодьöсь жö быдмисö вежöраöсь да бытшöмöсь. Сё баитлiсö: тэ, маму, кыдз райын öнi овны пондан, киын ми новйöтны пондамö. А кыдз мунiсö — сымда и адззылi. Данькоö только и кольччис ловья, да ныв эшö жöниксайö петiс. Ананьö зоннэыс понда тöждiсьöмсянь и кулiс. Кыдз вайисö куимöт похороннöйсö, усис кок йылiсь и эз ни чеччывлы. Вот кыдз павкис войнаыс. Ме казялi, что старушкалö сьöкыт баитны öштöм челядьыс йылiсь, и кежöтi баснисö мöдiк туй вылö. Ме мыччалi избушкаыслань:

— Мый нö эстöн вöлi?

— А эта миян гуок вöлi. Чöвпан увтсис ключ петö, стрась кöдзыт ваыс. Вот и гарйис Ананьö ямаок, тэчис сэтчö иззэз, медбы мусö ключыс эз кырöт, а ме сэтöн, ваас, гожуммезнас йöв да нöк видзлi, ырöшок петкöтлi, медбы эз шöммы чожа. Адззан, керрес мый кызаöсь? Этö натодиль сэтшöм вöрись Ананьö тшуплiс, медбы шондiыс шучкöп эз босьт, медбы гуас прокод кöдзыт вöлi. Керкусö разимö, а сiйö тай колимö. Ась сулалö.

Эта юöр чуткис менам моросö. «Дак вот кытшöм ключ йылiсь баитiс кикимораыс! Адззöма, батя, святöй ва!»

Старушка дыр эшö висьтасис öтi-мöдi йылiсь, размöд пондывлiс гöститöтны миянöс озъягöдöн, но колiс тöдны совесть и ме кужöмöн откажитчывлi. Ананика вдруг перыта чеччöвтiс местасис, вачкис кинас боксö.

— Тi, поди, делоöн мыйкö, а ме ылалi. Вот мымда манитi. Эдö жö осудитö. Совсем эд вунöтi, батя, внучаткаö йылiсь. Сiя öдва ни, натьтö, видзчисьö.

Старушка босьтiс öт киас туисоксö, мöд киас кашничоксö и иньдöтчис вöрыслань. Мунiкас ни сiя юöртiс, что колö ветлыны эшö талун порсь фермаö, баитыштны öтiк морткöт. Кынымкö шаг бöртi сiя бергöтчис и кытсöвтiс понсö, кöда узис сэтшöм крепыта, что эз и кыв хозяйкаыслiсь вöрзьöмсö.

Ананика мунiс ровнöй походкаöн, джöмдавтöг, кыдзкö важнöя. Ме кольлалi сiйö синнэзнам вöр дорöдз и думайтi, что оськалö туёкыс кузя не просто кытшöмкö морт, а ачыс история — мудрöй и непреклоннöй.

Ми Васькакöт пондiмö кайны керöс вылö. Кайимö веськыта, кöть тöдiм, что кытöнкö сай ладорас эм тропка и покатыс вöлi не сэтшöм крут. Миянлö охота вöлi мыччавны асьнымöс эта великан одзын, босьтны крепостьсö штурмöн, кыдз шуи ме Васькалö, «курччöвтны Чöвпансö медöддьöн жаритчöм боксянь». Весь ми этö керимö. Сразу жö аслас подошвасянь Чöвпан лэбтiсис вылö почти веськыта и быд метр понда ковсис кисьтны сир-ньылöм. Мукöд местаын пантасьлiс поснитик пизь кодь песок и сы вылö тальччöм бöрын коккез ыскöвтлiсö улö дзик бура волькöтöм и матегалöм пöв вылöт. Ми нильдалiмö, усялiм и кыссимö одзлань öддьöн жагöна. Медбы не тарöвтчыны улö, ковсис видзсьыны пожумоккез да верöс кусттэз бердö, кöдна зубыта бытшкасисö асланыс еммезöн да чорзьöм кöс уввезöн. Эна уввес гыжьялiсö чужöм и летiсö паськöм да эшö норовитiсö сотны ныр кузя нето инмыны синнэзö.

Васька, кыдз кань, гыжьясис одзам. Сiя ловкöя чеччалiс пуок дынсянь мöдiк пуок дынö и мыйкö бобгис ныр увтас. Зонка берегитiс йöрнöсоксö, но лэчыт уввез не öтiк местаöт поткöтöмась ни сiйö. Ме вöтчи сы сьöрö и думайтi Ананика йылiсь. Интереснöй сiя старушка. Пышшöмöн мунöм жöниксайö, быдса век ассис олöм пемыт вöр шöрын, любитöм жöниксö и вöлöм счастливöй. И вот диво: не годдэз, не сьöкыт нужда абу вермöмась кöстыны мортсö. Мый сылö отсалiс? Ен? Нет. Быд торыс йылiсь баитiс старушкаыс, а еныслiсь и нимсö эз касьтыв. Абу сiя веритöма еныслö. Дак кытшöм жö вера отсалiс сылö лоны вынаöн и мудрöйöн? Неужели, öтiк любитöм? Эта вопрос вылö сознаннё кошшис ответ, и ме жалейтi ни, что етшаöв баитi старушкаыскöт, эг юав сылiсь главнöйсö. А мыйлö сiя мöдö ветлыны фермаö, кытшöм морт дынö? И меным усисö тöдвылö Анна Даниловналöн кыввез: «Баитыштi ни öтiк морткöт, отсалас сiя миянлö». Да сiдз, натьтö, и эм. Ананика, конечно жö, вермас шонтны аслас душевностьöн да мудростьöн Надялiсь чорыт сьöлöмсö.

А керöс вылö кайны лоис эшö сьöкытжык. Джын туй вылас быдмассэз вдруг öшисö и кутчисьлыны лоис нем бердö. Ыджыт зэррез öтiк местаись начöдз гывьялöмась мусö, кольöмась только лэчыт дорреза из. Сiя сулалiс керöс покат вылас и аркмöтiс аснас саженься вылынжык стена. Ми мöдiм ордйыны сiйö, но чожа вежöртiм, что казявтöг шедiмö мешöкö: веськытланьын и шульгаланьын сулалiсö эшö вылынжык и волькытжык иззэз.

— Эта Чöвпаныслöн кушак, — висьталiс Васька.

— Кытшöм эшö кушак?

— Дедö шуö: медбы зэррез эз поткöтö керöссö, сiя йиасьöма изовöй кушакöн. Но важ ни сiя, кушакыс. Сэтчин, сай ладорас, орöм öтiк местаöт. Сэтöн и эм туёкыс.

Сiдз ли не ли, а воштiсьны вöлi некытчö, и ме решитi лэбтыны стенаыс вылö перво Васькаöс, а сыбöрын ни кыдз-нибудь кая и ачым. Конечно, миянöс некин эз вашöт. Позис бы бертны бöр и кайны Чöвпаныс вылö туёк кузя. Но кытшöм жö сэк отпускник меись! Ме шупыта лэбтi Васькаöс аслам пельпоннэз вылö. Зонка кутчисис киэзнас из дор бердö и чожа лоис сай ладорас.

— Мый сэтчин? Туйö кайнытö?

— Туйö, дядя! — шыасис Васька. — Татöн кыдзоккез быдмöны. Ужо, ме чеглала нiйö и керамö пуовöй гез...

Но видзчисьны Васькалiсь кытшöмкö пуовöй гез вöлi недосуг. Ме, кыдз кань, быд вынiсь чеччöвтi вывлань и öшöтчи изыс бердö. Дорыс зубыта сотiс киэз, дзик пуртöн орöтiс чуннез, но ме умöля кылi этö. Сапог ныррез кошшисö выступпез, гыжьялiсö изсö, кисойез пöльтчисö и минута мымда ме öшалi, кыдз мешöк. Но вынсьöтчыштöм бöрын сёжö удайтчис лэбтiсьны вывланьö. Раз! Эшö раз! Пригодитчис турник вылын кöркöся тренируйтчöм. Кынымиськö кöстiсьöм бöрын менам сьöкыт тушаö лэбис стена вылö. Отсалiс и Васька. Сiя кутчис менам ремень бердö и шысеттöг кыскис мымда тырмис прокыс. Ньылöм шороккезöн визывтiс чужöмö кузя, йöрнöсö лякасис, кылö, спина бердö, кидолоннез и чуннез садейтiсö, дзик вöлiсö сюйыштлöмöсь дзирыт ваö, а синнэз одзын кывтiсö паськыт гöрд круггез. «Фу, чёрт! — сьöласи ме. — Не весь шуöны: юр оз уджав, дак ньылöм отсалас». Ме только öнi казялi, что долоннез вылiсь кучикыс не öтiк местаöт кульсьöма и гыжьяссьöм вирöдз.

Одзланьын туй вöлi кокнитжык. Эстöн шочыника быдмисö сьöд коростаа золотушнöй кыдзоккез, кудриа верöс кусттэз. Быдмис лишайник кодь лажмытик чорыт турун, мукöдлаын вежöтiсö озъягöд коррез. Коккез нильдалiсö не öддьöн и, кыдзоккез бердö кутчисьöмöн, öтiк куст дынсянь мöдiк дынö чеччалöмöн, ми жагöника вешшимö одзлань. Кытöн покатыс вöлi öддьöнöв ни крут, сэт ковсьывлiс кайны бокöн, кыдз тöв коста лыжаэзöн. Кад öшис уна. И эшö унажык киссис ньылöм, но бöр лэдзчöм йылiсь и дума эз вöв.

Кöр ми вöлiмö почти йылас ни, кусттэз и быдмассэз бöра öшисö. Коккез сразу жö вöйисö поснитик песокö и быд вöрзьöтчöм бöрын нильдалiсö. Песокыс, дзик ва, визывтiс улö, а öтлаын сыкöт визывтлiмö и ми. Медбы сiдз не маитчыны конецтöг, ковсис сувтны чибу-чаньöн, мукöдлаын кыссьыны кынöм вылын. Песокыс пырис öмö, неприятнöя няжöтiс пиннез увтын, и ми кыкнанным сьöласимö, нюлiм пиннезнымöс. Бур ни вöлi и сiя, что кольччис кайнытö етша, керöс йылыс тыдалiс ни. Ыджыт желаннё — кайны медсьöкыт местаöт — вермис быдöс. И сразу жö настроеннё лоис бурся-бур. Охота вöлi горöтлыны, шыннявны!

— Курччöвтiм, Васька! Меджаритчöм местаöт курччöвтiм!

— Курччöвтiм, дядя. Но висьтала кö мамöлö, дак сiя менö тожö курччöвтас: адззан, йöрнöсö лешки-вошки лоöма...

Да, Васькалöн йöрнöсiсь нем абу кольччöм, только векнитик сыррез öшалiсö пельпоннэз вылын. Но не беда. Позяс сылö небны виль йöрнöс.

Ме видзöтi Чöвпаныслiсь йывсö. Вöлi сiя гöгрöса и не сэтшöм векнит, кыдз кажитчис улiсянь. Природа чужтöм керöссö и, медбы тöввез да зэррез эз нарушитö сiйö, пуктöма самöй йылас öддьöн ыджыт из, кöда и свиттялiс шондi вылын, кыдз гигантскöй могильнöй плита. Талун шондiыс сэтчöдз жаритöма изсö, что кажитчис: брызнит ва и сысянь, изыссянь, кыдз бура лонтöм баня горсянь, койыштас пар сорöн вöвлытöм öд, а ачыс шовкöтöмöн потласяс и резсяс öтмöдöрö учöтик тороккезöн. Эз быдмы сы вылын некытшöм турун, только багсялöм веж нитш, чорыт, кыдз проволока, петiс потласьöм местаэзöт да начöдз ни сотчöм лишайник бель видзис öтi-мöдiлаын.

Ме весöтi песоксянь синнэзöс да дзарнитi деревнялань. Ошпозъяин вöлi кыдз кидолонь вылын, но мукöд керкуэз эз и тыдалö пуэз коласiсь. Ыджыт льöмпуэз, вековöй кыдззез, паськыт уввеза кедррез аркмöтöмась свальнöй ыджыт сад, сайöвтöмась зелёнöй вевтöсöн постройкаэсö. Только мукöдлаын пежьялiсö виль керку крышаэз, тыдалiсö складдэз да сарайез, кöдна сулалiсö торйынжык деревняыс дынсянь. Эта сад дынöт, учöтик расоккез коласöт, видз вылöт голубöй лентаöн чуклясис Вильва. Сiя локтiс топ Чöвпаныс дынö, вартчис сы бердö поснитик валлэзöн, аркмöтiс крутöй хобот и визывтiс Пугинлань. Плотина дынын сланнез вывсянь киссисö поснитик-поснитик вачиррез и вöлiсö нiя дзик серебрянöйöсь. Пруд вачкисис тасянь ыджыт неправильнöй треугольник вылö, кöдалöн öтiк лэчыт пельöсыс мöртчöма тайгаö, мöдыс клинöн нюжалöм кондовниклань, а куимöтыс пырöм деревня дынiсь логö. Эта пельöсын уялiсö дзодзоггез да уткаэз, гегзiсö мымда прок и ныряйтiсö ваö. Деревня бокись ыб вылын лöзöтiсö сюэз, а ордчöн, руд рöма бус лэбтöмöн, öтмöдöрö ветлöтiсö кык трактор: гöрисö пар и пинялiсö ыбсö. Вильвалöн сайись берегын, как раз Чöвпан увтас, ытшкисисö быд рöма паськöма мужиккез да инькаэз, а чуть ылынжык, вöрыс дынын ни, мöдiк звено куртiс турун и тэчис зороддэз.

Быдлаын мунiс удж, пизис олан. Вон и туй вылöт кыссьöны кытчöкö подводаэз. Бусiсь паськыт бöж сьöраныс кыскикö, тарöвтчисö машинаэз: нiя нöбöтiсö, натьтö, государстволö Анна Даниловналiсь порссесö.

Ме бергöтчи ойланьö и перво нем эг казяв. Улын уйис только лöз рöма кокнитик тшынок, кöда вöснитик шёлковöй шебрасöн сайöвтiс вöрсö. Но синнэз жагöник велалiсö, и шебрас увтсянь мыччисисö пожуммезлöн зелёнöй шапкаэз да кöззэзлöн лэчыт йыввез. И эз вöв тайгаыслö не конец не дор. Уваллэзöн кыссис сiя топ горизонт бердöдз, вачкисис море вылö, кытöн орсiс кокнитик штиль. Тысяча синöн тайга видзöтiс веськыта ме вылö, шушкис сотня невежöртана шыöн и дзик баитiс:

— Но мый, адззылiн, кытшöм ме эм? Кинкöт верман сравнивайтны менö? Морткöт? Не, оз лöсяв. Морт, ась сiя и кайö кöть медыджыт керöс вылö, мекöт ордчöн сёровно он сувтöт. Мортыс — кöдзыв!

Эта лöгöтiс менö. Ме кыски моросам унажык воздух и горöтi мымда тырмис вынö:

— Э-э-э-й-й! Кывзы, пемыт тайга! Мортыс сёровно вынажык тэсся! Кылан, вынажык! Чожа локтасö Чöвпан дынö тракторрез, автомашинаэз, механическöй пилаэз и тэ, вына тайга, дрöгнитан мортыслöн ки увтын, пондан петитчыны, пышшыны деревняыс дынiсь. Сiдз сiя и лоас. Да, да-а!

— Да-а-а! — отвечайтiс говкöн вöрыс, может, нерис, а может, и согласитчис мекöт.

Васька осьта öмöн и паськыт синнэзöн видзöтiс ме вылö.

— Дядя, тэ мый? Кинкöт баитан?

— Нем, Васька, некинкöт. Лок пуксям, шоччисьыштам невна.

Ме кери куритны, пыдына кыски курыт тшынсö моросам. Ачым сё видзöтi и видзöтi тайгаыс вылö, меряйтi вöрыслiсь строгöй линияэз, кери быдöс, медбы кольччис эта картинаыс век кежö памятьö. Менам воображеннёын, кыдз и сэтчин, Чöвпаныс увтын пукалiкö, чужисö картинаэз. И эз ни маит менö вопрос: кин сетiс Ананикалö душевность, кин отсалiс сылö лоны мудрöйöн да вынаöн. Вöлi вежöртана, что морт, кöда олiс эта природа коласын, кöда быдöс душанас чувствуйтiс сылiсь величиесö — оз вермы лоны чорыт сьöлöмаöн да вынтöмöн.

Дата добавления: 2015-11-16