ВИСЬТАЛÖМ — КЕРÖМ

Эм сэтшöм деревня — Ошпозъяин. Томмес сiйö етша ни сiдз тöдöны, унажыксö шуöны колхозыс ним сьöртi — «Заряöн», а пöриссез коласын нет-нет да и кылан эшö сэтшöм басни:

— Кытчö нö бöра шыбыльтан?

— А Ошпозъяинас! Кыдз инö, кыдз инö... Делоок эм да...

Ме унаись кывлi, что Ошпозъяиныс миян ладорын — медбасöк места. Кин вöлi сэтчин гожумнас, сiя кувтöдз оз вунöт эта деревняись саддэз; сылö век кежö кольччас памятяс кондовöй вöр, кытчö эз на ештö вовлыны вöрзаптiссез, сы син одзын пыр пондас сулавны ыджыт керöс, кöда великанöн лэбтiсьöма тайга шöрö и свиттялö шондi вылас аслас лысинаöн.

Öтiк газетаись корреспондент, кöда мöйму ветлöма Ошпозъяинö, мыччалiс меным сотняся унажык снимок.

Нiйö видзöтiкö, сьöлöм оз вöрзьы только разь сылöн, кинлöн душаыс важын ни косьмис, кыдз гор вылö чапкöм сартас.

Мыйсö только абу кватитöма фотоаппаратлöн объективыс! Вöлi öтiк снимок вылын настоящöй шишкинскöй «Корабельнöй роща», кытöн пожуммез сулалiсö оча бок и аркмöтiсö топöтöм стена. Вöлi пруд, кытöн уялiсö гортся дзодзоггезкöт да уткаэзкöт öтвыв дикöй юссез. Вöлiсö кедррез, пирамида кодь кöззэз, вöлiсö лым кодь чочком цветöн вевттисьöм льöмпуэз.

А öтiк снимок вылын вöлi ош! Быльнöй, ловья ош, кöда страшнöй, учöтик шом тороккез кодь синнэзöн видзöтiс морт вылö и, кажитчö, эрзiс. Корреспондент висьталiс, что этö мишкасö кутiсö колхозниккез тулыснас, кöр вöлi эшö лым. Лэбтöмась сiйö берлогаись и давай гильöтны рукйöсь боккесö лэчыта йывдöм зоррезöн. Мишкалö воштiсьны некытчö, öдззас котöртны. А ылö ли пышшан, кöр лымыс мортлö моросви? Ляшмасьöмöн сiя петöма доддя туй вылö и поннэз одзын котöртöм веськыта деревняöдз. Сэтчин колхозниккез йöртöмась гидö и кышалöмась голяас аркан.

— А мыля нiя эз вийö сiйö? — юалi ме. Корреспондент висьталiс:

— Ошпозъяинсалöн эм сэтшöм обычай: тулыснас чарöм коста кутны ошöс и обязательно ловйöн. Вийны ошсö и дурак вермас, только сет сылö буржык пишаль. А вот пондыв-ко ловйöн кутны! Пожалуй, кольччан кучиктöг и ордлыэзтöг, да и то, если мишкаыс оз мырддьы ловтö. Ошсö ловйöн кутöмыс — ошпозъяинсалö быльнöй спортивнöй праздник.

Уна ме кылi эта деревня йылiсь. И таво, кöр босьтi отпуск, решитi ветлыны Ошпозъяинö, видзöтны быдöс аслам синнэзöн.

Висьталöм — керöм.

Ме лöсьöтчи туйö, босьтi быдöс, медбы вачкисьны отпускник вылö, и талун локтi районнöй посадö, кысянь Ошпозъяинöдз двадцать пять верста мымда. Если оз лöсяв подвода, позяс мунны и подöн. Медбы не сёрмыны и не лöсявны волокас ой кежö, решитi иньдöтчыны öнi жö. Öтiк инькалiсь, кöда ведраэзöн лэдзчис вала, ме юалi Ошпозъяинö туй — и вöрзи.

Вöлi луншöр кад. Шондi öшалiс чуть ли не юр весьтын и сiдз пöжис, что ме люзь пымалi. Мунны сьöкыт. Ньылöм ыджыт воттезöн визывтiс чужöм кузя, пырис öмö и солалiс тырппез. Ме босьтi юр вывсим шляпаöс и думайтi ни чöвтны куртка, кыдз вдруг казялi, что вöтö подвода. Телега бердö домалöм плетёнкаын пукалiс дöраовöй запона да аскерöм колпака старичок и веськöтлiс вöвнас. Вöлi старичокыс кöсыник, читкыля сьöд тошока и керöма дзик сира кöс пожумись: чужöмыс векнитик, коричневöй, кыдз дубитöм кучик, а синнэс сы пыдына пырöмась орбитаэзö, что вöрöт мунтöн некытшöм ув оз судзöт и ош аслас гыжжезöн оз вермы кыскавны нiйö.

— Не Ошпозъяинö ли, гражданин? — вöйöм синнэзнас ме вылö видзöтiкö, юалiс сiя.

— Сэтчин.

— Но дак пуксьы. Кыкöн сё гажажык.

Ме тэрмасьöмöн кайи плетёнкаас. Тöдсасимö сразу. Шуöны стариксö Демидöн, уджалö сiя ошпозъяинскöй «Заря» колхозын конюхöн, талун ветлiс посадö почтала да внучаткаысла, кöда велöтчö городын. Внучатка кöсйисис каникуллэз вылö, но такси локтiс, а сiя — эз.

— Ковсяс ашын сыла ветлыны, ашын обязательно ни локтас, — старик охотнöя висьталiс этö и ыджыт любопытствоöн видзöтiс менчим снаряженнёöс.

— Эта мый нö киат? — юалiс сiя. — Эта спиннинг.

— Видзöт тэ, кытшöм штукаыс! А мый сiйöн керöны?

— Щукаэз кыйöны.

— То тай, батя! — Демид перыта босьтiс спиннингсö, дыр сiйö бергöтлiс сiдз и этадз, но, тыдалö, нем эз вежöрт и сетiс меным бöр.

— Котелокат, адзза, нем абу, а фляжкаас мый нö новйöтан?

— Ва. Мыся, горш пондас косьмыны, дак юышта невна.

— Сiдз. А ме думайтi — винаок...

Свиттялан гöна мерин котöртiс бодрöя, чатралiс юрнас и орсiс пеллезöн. Телега колесоэз увтын няжöтiс поснитик галька. Ме дзарьялi öтмöдöрö, любуйтчи живописнöй местаэзöн. А ямщик öшöтiс юрсö морос вылас и мурзис кытшöмкö гажтöм кузь песня. Ме дынö сылöн эз ло некытшöм интерес.

— Местаэс, местаэс кытшöмöсь! — горöтчи ме. — Кытшöм татöн гажа!

— Э-э, эта разь гажа, — шыасис Демид. — Вот локтан миян деревняö и синнэтö колялан.

— Паныт висьтавны нем ог вермы. Кылi ни, гажа пö тiян. Натодиль видзöтчöм могись и вöрзи деревняаныт. Кылi и сiйö, бытьтö ошшез ловйöн тi куталатö. Эта быль?

— Озö бöбöтчö. Ошшез, конечно, не сiдз ни уна, деревняöт оз котрасьö, но мымда бы эг вийö, сё эшö вöрас пантасьлöны. Кутлiм ми мöйму тулыснас öтiкö. Ыджыт вöлi, öдва арканалiм.

— И кытчö жö тi сiйö воштiт?

— Кинöс? Ошсö? Да не видзны жö сiйö, проклённöйöс, картаын, не яйöн жö вердны. Вийимö. Кымöсас тонгим пуляöн, кучиксö кулим да вузалiм, а яйсö — кöдö сёйим, кöдö чапким. Сымда и дело. Да эта мый! — Старик макнитiс кинас и керис сэтшöм вид, бытьтö басниыс мунiс совсем не ош йылiсь, а кытшöмкö нятьöсь гут йылiсь. — Тэ бы лучше юалiн, кыдз ми уджалам. Нянь медбöрья годдэзö сiдз öдззимö быдтыны... Фермаэз быд год строитамö, а сё оз тырмö: сымда подаыс лоис. Но и доход босьтам неучöтö.

— Уджала, тыдалö, народыс?

— Народ уджалö, да и председательным юра морт. Областнöй газетаын портрет вöлi.

Нет, не весь ме вöрзи Ошпозъяинö. Кылö сьöлöмö, что неетша адззыла. Адззыла интереснöй отирöс, адззыла настоящöй олан! Но тэрмасьны некытчö. Мый лоас — видзöтам.

Дата добавления: 2015-11-16