Кöкан трöпим гозъя

Вöлi совсем ни рыт, кöр мийö сибалiмö Ошпозъяин дынö. Шондi важын шоччисис кытöнкö вöр пыдöсын. Блед чужöма тöлiсь öшалiс тайга весьтын.

Кысянькö улiсянь, деревняыс дынсянь, вайöтыштiс чери дука уль тöлок. Позис вежöртны: неылын пруд. Чожа мыйись мыччисис кытшöмкö строеннёлöн крыша, а эшö сёрöнжык — слабöя, кыдз умöля миськалöм стекло, свиттьöвтiс строеннё дынас векнитик ю. Слепöй и то бы висьталiс: строеннёыс — электростанция.

Плотина вылöт мунтöн миянлö пантасис страннöй верзьöма: десять-одиннадцать год гöгöрся, вöснитик голяа и пашмöм юра зоночка, кöда вылын рака борддэзöн павьялiс кизявтöм шабур, мымда прок гöнитiс кытчöкö ыджыт пороз вылын и, киэзнас öвтiкö, горöтлiс Демидлö:

— Деда-а, тэнö мамö видзчисьö! Вайöтiн Настясö? Верзьöма локтiс телега дынö, сувтöтiс порозсö. Ме видзöтi зонкаыс вылö и думайтi, что светас овтöн мыйсö только он адззыв, а Демид, бытьтö нем эз и вöв особеннöйыс, спокойнöя отвечайтiс, что Настя талун эз лок, весь только ветлiс сыла. Зонка шы эз сет. Сiя размöд чувйыштiс порозыс паккезö кöмтöм кокпятаэзöн, зубыта сöтiс шатёкöн и шумöн гöнитiс кытчöкö сай берегас.

— Вот, проклённöй! Öтта, кыдз гöнитö! — дивуйтчис Демид и висьтасис: — Эта, стриж пияныс, менам внучек. Öддьöн бöб зонка. Тыдалö, порозыс пышшывлöм деревняö, и Васька вашöтö сiйö бöр фермаас.

Кынымкö минута бöртi ме пондi тöдны, что Васькалöн айыс, Кöкан Трöпим, пастучитö мöссэз, что сiя лоö Демидыслö зятьöн, лыддиссьö деревняын бытшöм хозяинöн, «но öтнас ен тöдö, мый понда народ шуö сiйö Кöканöн».

— Томнас эшö лякöтöмась этö нимкодьсö Трöпим бердö, и мужик öнöдз кыскалö сiйö сьöрас фамиллё туйö, — юöртiс Демид.

Неылын, пруд покатыс сайын, пондiсö тöдчыны керку ряддэз. Сэтчин дзуртiсö воротаэз, жольöтiсö ведраэз. Кылiс гармоння шы, и кынымкö вöснитик женскöй голос сьылiсö частушкаэз. Кытшöмкö инька горöтлiс: «Мурка, Мурка! Ах, нёштöм мыгöр, бöра гортö эн лок!» Сiя корис, тыдалö, гортас мöсöс.

Кöр подвода сибалiс первöй керкуэз дынö, кынымкö пон вувтöмöн уськöтчисö вöв коккез увтö. Öтiк Буско, начöдз бöбсялöм и вельмöм, чеччалiс телега вылö и йирис плетёнкасö. Демид ловкöя быд вынiсь шöрыштiс поныс кузя плетьöн. Буско тшакыльöн тарöвтчис канава сайö, нёштöма унньöвтiс кыз визжитан голосöн. Старик сералiс:

— Во! Правильно, уннялышт, кöин öбед, да висьтав дружоккеытлö, ась юррезнысö оз сюйö, кытчö оз ков. Плетьыс — не блин.

Сэсся юалiс менчим:

— Тэныт мый, натьтö, патера ковсяс?

— Ковсяс, натьтö...

Демид чöлiс невночка, тыдалö, думайтiс, кин ордö кежöтны менö, но чожа зэгнитiс юрнас и висьталiс:

— Ужо, кежöта тэнö нылö ордö, Кöкан Трöпимыс ордö. Керку нылöн бур, ыджыт, а семьяыс абу. Тэныт самöй раз лоас.

Телега гымнитiс колесоэзнас кругляккезiсь керöм посок вылöт и кежис виль воротаа ограда дынö. Сразу жö оссис калитка и сэтiсь котöрöн, ышки-пойки, петiс кыз инька.

— Настенька локтiс! Ой, нылiньöй, кытöн тэ, ягöдтусиньöй?

Ме не тэрмасьöмöн лэдзчи телегасис, босьтi турунсис спиннингöс и кошши котелокöс, кöдö чапкывлi туяс ремень бердiсь.

— Эз талун внучаткаö лок. Ашын, видно, только. Инька чуть только эз ляпкись местаас.

— Ой, господи! Да мыля нö эз лок? Вот бедаыс, вот бедаыс. А ме лунтыр видзчиси, нельки сёйны эг пуксьывлы.

Вöлi сiя чужöмыс сьöртi не сiдз эшö пöрись, но ён. Рожабаннэс öшöтчöмась, куимпöвса тшöка лэдзчисьöма моросöдз, синнэс, кыдз и айыслöн, сы пыдына вöйöмась, нельки эз позь казявны нылiсь рöмсö. Паськыт сарафан вачкисис халат вылö, топ пукалiс эта инька тело вылын. Трöпимика ойзöмöн дзöрис телегаыс дынын, дзарнитiс плетёнкаö, дзик эз верит, что нылыс былись эз лок, и сё нюжвыла шувлiс: «Вот бедаыс, вот бедаыс! Да эз ли сыкöт мыйкö умöль шогмы? Вот и вöтаси талун нёштöма». Демид эта коста ештiс висьтавны, кин сэтшöмыс ме, мыйлö татчö локтi, а медбöрын содтiс, что деньга городскöй мортлöн, пожалуй, эм и «патераыс понда, конечно, вежтас». Эта юöр ловзьöтiс инькасö. Сiя приветливöя дзарнитiс ме вылö и здоровайтчис.

— Сiдзкö, миянö? Кыдз инö, кыдз инö... Колö жö видзöтны селитьбанымöс.

Маласьöмöн быдöнным кайим посöдзö, пырим керкуö. Демид юис быдса туис квас и мунiс гортас, а ме пондi нёджжасьны. Керку вöлi ыджыт, кык жыра. Порог дынас, веськытланись пельöсын, сулалiс бура белитöм ыджыт крестьянскöй гор, шульгаланись пельöсын вöлi цветтэза покрывалоöн вевттьöм паськыт пуовöй кровать. Стенаэз пöлöн сулалiсö лабиччез. Кык стул да öтiк джек вöлiсö пызан дынын. Öтiк пельöсын, пызан вевдöрас, свиттялiс джаджок вылын кытшöмкö святöйлöн лик. Сылöн лэчыт синнэс югьялiсö пемытiнас и видзöтiсö веськыта ме вылö. Стенаэз вöлiсö лякöмöсь узöра обойезöн. Забор вылын öшалiс зеркало, ордчöн сыкöт стариннöй часы дыша лыддис минутаэз.

Порог дынiсь стенаö хозяин вартöма пуись чукыля тув. Сы вылын öшалiсö сийöс, сермöт, нагайка, вожжи, черезседельник да эшö кытшöмкö гезок. Ме чöвтi котомкаöс и öшöтi сэтчö жö, а спиннингсö сувтöтi стена бокас.

— Вот беда, абу эд локтöма нывкажугным. Эз ли мыйкö шогмы сыкöт? — баитiс Трöпимика комас.

— Локтас, нем сыкöт оз ло, — отвечайтiс мужиклöн кыз голос.

«Гортын, тыдалö, Кöкан Трöпимыс», — думайтыштi ме.

Хозяйка — сiйö шуисö Марфа Демидовнаöн — босьтiс ведра и чепöссис высьтыны мöс, а ме пукси лабич вылö и дзарнитi комас. Сэтчин джек вылын пукалiс важын ни бриттöм чужöма, топытик мыгöра мужик и весöтiс чери. Сiя любопытнöя нёджжöвтiс мелань и гогыньыштiс юрöн: здорово пö. Ме тожö сетi поклон. Гöрд тыввеза чериэз потрошитiкö, Трöпим юалiс:

— Сiдзкö, городсянь? Интересно, мый сэтчин вильыс эм? Год-мöд ни эг сибавлы городас.

Вопрос вöлi общöй, ме эг тöд, мый висьтавны. Но пукавны чöлöмöн вöлi недолыт и юöртi, кытшöм спектакллез сувтöтö театр, кытшöмöсь мунöны виль кинофильммез. Быдöс эта, тыдалö, совсем эз интересуйт Трöпимсö, и сiя паныт шы эз сет, только пишкис уджалiкас. Сэсся сiдз жö чöлöмöн чеччис, гывьялiс киэсö ваын и петiс öтöрö. Недыр мыйись сiя пыртiс запон öлöдзас сира чаггез, горöдзö сувтöтiс таганок, пуктiс сы вылö ваöн чугун и öзтiс би. Вöлись бöра юалiс:

— А мый, эм ли городскöй прудас чери?

Вон мый сiйö интересуйтöма! Ме висьталi, что черисö кыйöны, но етша.

— А татöн, Вильваас, кöть киöн кутав, стрась уна.

Вот гöститöта ужо тэнö.

Öшын сайын, кытöнкö деревня шöрас, орöттöг базанитiс гармоння, басöка сьылiсö нывкаэз и öтвыв ныкöт туриэз моз кривзiсö зонкаэз. Кынымкö весельчак, кылö, йöктiсö лудыс вылын. Керкуын лоис пемыт, и Трöпим öзтiс лампа, сiдз кыдз сенокос одзын прудсö лэдзöмась, медбы эз вöть видззесö, и электростанцияыс эз уджав.

— Тыдалö, уна тiян том отирыс? — öшынас мыччалöмöн юалi ме. — Ёна гажöтчöны, пель чаналö.

— Тырмö молодёжыс. Медбöрья годдэзö, кöр няньнас мало-мало вердны пондiсö, томмес гортö кольччöны. А одзжык неграмотнöйес только гортын олiсö.

Сiдз баитiкö чулалiс джын час мымда. Марфа Демидовна эта кадö ештiс высьтыны мöссö, ветлiс кытчöкö соседка ордö лэдзны йöвсö сепаратор пыр, кисьтiс кашничокö нöк и петкöтiс сiйö лым вылö гуö. Трöпим пешлiс шербасö, солалыштiс и висьталiс:

— Готов.

Кöр Марфа Демидовна пырис гусис, Трöпим шуис сылö:

— Кисьт жö, мам, шербасö миянлö пуовöй бекöрö, да кошшы пуовöй паннез. Пуовöй бекöрас шербаыс дзик чöскытжык.

Кытчöдз хозяйка кошшис пуовöй бекöр да сэтшöм жö паннез, Кöкан Трöпим шöралiс небытик шогдiовöй нянь и юöртiс меным:

― Любита ме шербасö берег дорын сёйны. Мылякö чöскытжык сэтчин, нежели гортын. Да эшö панялан кö симöтiсь керöм панёкöн — кыв ньылыштны позьö. Öддьöн скуснöй. Шерба (может, и сiйöн, что кисьтiсö пуовöй бекöрö!) вöлi кöра, и сiйö панявтöн öзйис вöвлытöм аппетит. Ме только öнi казялi пуовöй паньыслiсь достоинствоэз: вöлi сiя ыджыт, сёяныс тöрис уна, сэтчö жö немымда эз сот тырппез, кöть дзирытся-дзирыт чериваöн, кажитчö, позис кыртöтны порсь кучик бердiсь щетина.

— Бур сёяныс, öддьöн лöсялö, — ошки ме черивасö.

— Ёкышоккеись пуи, — довольнöй голосöн шыасис Трöпим. Сэсся бергöтчис иньыслань, кöда тэчис ен одзын муöдз поклоннэз, и шуис:

— Пыртiн бы миянлö сурок, юыштам мортыскöт.

Марфа Демидовна керис медбöрья паськыт пернапас и петавлiс гуö, пыртiс тыр туис кöдзыт, быгья сур.

— Пешлы жö, — ласковöя гöститöтiс менö. — Неважын керыштi.

Ме юи веськыта туиссис, ошки сурсö. Вöлi сiя тагья, но не öддьöн курыт. Городын сэтшöм сурсö озö вузалö. Трöпим тожö юис и, кыдз и ме, ошкис сiйö, мыйöн керис аслас хозяйкалö ыджыт удовольствие. Марфа Демидовна эшö öтпырись пернапасалiс кымöссö и пуксис ордчöн жöникыскöт. Сёйис сiя спокойнöя, не тэрмасьöмöн, нельки дыша. Медбы не киськавны шербасö, Марфа Демидовна пуктывлiс паньсö нянь шöрöм вылö и сiдз вайöтлiс öмыс дынöдз. Но кисьтны öмас эз тэрмась, а нюмыртлiс пыктöмкодь кыз тырппесö и дырöн ушкис сёяныс вылö. Сёйис сiя только васö, сiдз кыдз «висьö сьöлöмыс и черисö сёйны озö тшöктö». Зато Трöпим лэбталiс чери бöрын чери, ошкис нiйö и вильöтiс нельки коскаэсö. Эг кольччы сы сьöрись и ме.

Медбы пондöтны кöть кытшöм-нибудь басни, ме юöртi, что локтiс деревняö миянкöт страннöй инька: ветлöма вичкуö натодиль юрбитны... Эта юöр кыдз пыжьянöн чуткис Марфа Демидовнаöс. Сiя нельки чеччöвтыштiс местасис и пуктiс паньсö.

— Ой, господи! Сiдзкö, Матрёнушка локтiс? А ме öдва ни видзчися сiйö. Но кыдз сiя, мый? Здоровöй жö?

— Тыдалö, здоровöй, — шыаси ме. — Мылякö пондылiс миян шогья пышшыны вöрö и котöртiс öддьöн перыта.

Баитны вöлi нем, и ме висьталi быдöс, кыдз вöлi делоыс. Трöпим тестьыс моз жö пондiс нюжласьöмöн ваксьыны-серавны, а Марфа Демидовна öддьöн строгöя дзарнитiс сы вылö и айсö осудитöмöн баитiс:

— Эз жö сiдз кернытö ков. Матрёнушкаыс миян святöй татöн, и вдруг пöрись морт вöтлiсьö сы сьöрын. Грех эта. Мый сыись, что странница сайöвтчис морт син сайö? Мамö, покоенка, гарйис бы эта понда синнэз.

Ме только эна кыввез бöрын вежöртi, кытшöм ыджыт ошибка кери, лоис öддьöн недолыт и, пызан сайись петтöн, старайтчи кежöтны баснисö мöдiк туёк вылö. Ме юалi:

— Значит, городын нылочка тiян велöтчö? Бур делоыс.

— Пондiм тай велöтны, — шыасис Трöпим. — Может, и петас мый.

— Видзчись, петас, — лöгöнмоз горöтчис Марфа Демидовна.

Сiя пуксис ме бокö лабич вылö, пуктiс киэсö öлöдзö и кыдзкö бедуйтöмöн, пыдына ыш лолалöмöн, öдззис баитны:

— Кытшöм нысянь толк, öння нывкаэзыссянь? Быдтан, быдтан, панялан нятьсö, велöтан, вердан, порой ачыт он сёй, а сё сылö удан. А кыдз быдмыштас, чуть работничаöн лоас — чывк жöниксайö. И касьтывлы, кыдз сiйö быдтiн. Да кытшöм эшö жöникыс шедас, быдкодьыс эд овлö. И то эшö полан, кыдз бы невестаавтöнняс нем эз шогмы...

Марфа Демидовна вешшис топ ме бокö и таинственнöя вашкис чуть ли не пелям:

— Вон Макась Домналöн кöбылаыс, Надькаыс, кага жöниктöг торскис. Мыйнö, мыйнö... Уж кытшöм строгöя мамыс видзис, öтöрö рыттэзнас эз лэдзавлы, а сiя на тэныт — кыквичкоснас таво вайис зоночкаöс. А кытшöм эта мамыслö? Ачыс Домнаыс войнаыс первöй луннэзö öштiс жöниксö, век мырсис няньтöг, быдтiс нывсö, а сiя, пон кучик, мамыслö спасибо туйö — мирскöй кага...

Трöпим пуксис тожö лабичö, корис менчим куритны, осьтiс öшын и öдззис тшынйыны. Осьта öшынöт эшö буржыка пондiс кывны, кыдз гажöтчис öтöрас том отирыс, кылiс, кыдз шушкöтчисö рамыник тöлок увтын палисадникас ыджыт липаэз да кыдззез, öвтiсö уввезöн паськыт льöмпуэз. А Трöпимика сё баитiс и баитiс, öмсис, дзик резьдöм мешöкись, сiдз и киссисö лэчыт кыввез. Кöр Трöпим пондывлiс сiйö öмавны, Марфа Демидовна уськöтчис сы вылö:

— А тэ эн öмав менö, ме умöльсö нем ог шу, ме дело сёрнита. Тожö мужик шусьö! Кынымись ме тэныт баитi: эн иньды Настяöс техникумас, ась гортын олö, мам кипод увтын быдмö. Нывкалö ли велöтчыны кытöнкö городын. Вот торскас тожö...

— Дугды жö, эн ни модь! — чорыта шуис Трöпим. — Тэ мый, арттöм пасма, йöз мортiсь нельки он пов? Только сiя и басни тэнат, что кулитан том нывкаэсö, а вунöтiн ни сiйö, кыдз баняас пукавлiн?

— Ми баняас пукавлiм, да асьнымöс кужим видзнытö, кагаэсö эг ваялö, — эз сетчы Марфа Демидовна.

— Быд торыс вöвлi, — нюжöтiс Трöпим. — Тожö не пуовöйöсь вöлiт.

Хозяйка эна кыввез бöрын лöнис, и ме гусьöника юöртi, что позяс кö, то водi бы шоччисьыштны. Марфа Демидовна, кыдз мяч, чеччöвтiс коккез вылö, вачкис киэзнас боккес кузя и ылöстöма пондiс котрасьны öтмöдöрö дженытик оськöввезöн. «Господи, совсем эд вунöтi; морт туйсянь, а ме вот мый...» И чепöссис öтöрö. Кынымкö минута бöртi чирзiс ни сэтчинсянь, корис менö. Ольсасьöм сiя амбарö, ма кöра свежöй турун вылö.

— Эстöн бур лоас, а керкуас жар, да и гуттэз курччасьöны.

Марфа Демидовна сулалыштiс невна, шуис пемытiнас: «О господи, господи, мыля нö эз лок, неужто беда?» — и петiс амбарсис.

И кöть неылын дугдывтöг базанитiс гармоння, нывкаэз да зонкаэз сё эшö сьылiсö и йöктiсö, ме эг ни кыв нем. Эг ешты куньны синнэзöс, кыдз онмöсси крепыт онöн.

ВАСЬКА

Лэчытся-лэчыт, сингусялана шондi югöр инмöма неыджыт щельöт амбарас и, кыдз вöснитик емок, чуткис менам нырпысö. Ме дрöгнитi, буржыка куни синнэзöс и бергöтчи бок вылам. Югöрыс чуткалiс öнi рожабанö, гильöтiс пель сайöт. Ме мöдi шебрасьны дзик, но, кыдз нарочно, ки увтö эз шед нем. Сэтчö жö вдруг пондi чувствуйтны, что кинлöнкö любопытнöй синнэз орöттöг видзöтöны чужöмам. Ме сайми.

Неылын ме дынсянь, тожö турун вылас, куйлiс вöснитик голяа, пашмöм юра зоночка и ыджыт интересöн кваркышавтöг видзöтiс мелань. Вöлi сiя топытик, ыджыт голубöй синнэза, шондi увтын начöдз сотчöм чужöмбана, пыктöм кыз тырпоккеза. Эта вöлi Васька. Сы юрси бердö сынаныс абу павкавлöма не öтiк месяц ни, и сiя гынмöма, каттисьöм и гардчöм сiдз, что лöсялiс бы рака поз вылö.

— Э-э, шпын юр, тэ кысянь инö чужин? — гырдззаэз вылö лэбтiсикö, юалi ме.

Зонка стыдитчöмöн паськыта шынньöвтiс и мигнитiс шульга синнас:

— Этö не ме, а тэ, дядя, кыськö чужöмыт, — зоночкалöн голос вöлi вöснитик, вачкисис силькан шы вылö. — Пыри тöн рытнас татчö, а сэтöн кытшöмкö морт. Чуть весьö эг пöр, сiдз повзи.

— Значит, герой, если мортiсь повзин. Тэ мый, ойшöрöдз порозыс вылын гöняйтiн?

— Гöняйтыштi невна, — гажтöма и норасьöмöнмоз шыасис Васька. — А мый меным сэсся керны? Сымда и удж, что котрася лунтыр. Дружоккезö быдöнныс мунiсö кин лагерьö, кин городö экскурсияöн, только кынымкö нылочка кольччисö. Вот и гöняйта гажтöмсянь порозыс вылын. Сiя рамыник, радейтö менö.

— А мыля эн мун öтлаын дружоккеткöт? Поди, мамыт эз лэдз?

— Не-е, мамö лэдзис бы. Этö Мария Сергеевнаыс эз босьт сьöрас. Пукав, шуö, гортын, раз ар кежö кольччин, велöт уроккез. Ачыс жö пуктiс арифметика сьöртi умöль отметка, а ме виноват. — Васька вирснитiс нырнас и лоис эшö гажтöмжык.

— Да, умöль тэнат делоыт, — согласитчи ме, — гажтöмсянь кувны позьö. А нывкаэс мый, оз любитö тэнö? Мыля ныкöт он гажöтчы?

Васька сэтшöм синнэзöн дзарнитiс ме вылö, дзик мöдiс шуны: «Вот эшö! Ыджыт морт, а мый юасьö?», — но отвечайтiс серьёзнöя, кöть и не аслас кыввезöн:

— Да нiйö ме ачым покорень ог радейт. Кытшöм нысянь толк? Öтiк горе. Панялыштi ме ны увья бедасö. Тырмас. Корисö мöйму вöрö ягöдавны, огö пö лысьтö отнаным мунны, но ме и мунi, кыдз бытшöм морт. А Ванька, торта пель, адззылöма и висьталöм зонкаэзыслö: Васька пö нывкаэскöт котрасьö, нывка пастух пö сiя. Вот и öдззисö серавны ме вылын. А эта думайтан бур? И кеслiсö кыввезнысö ме бердö почти тöвбыт. Но ме и лязi торта пельыслiсь нырсö. Ась оз сюй сiйö кытчö оз ков.

— Да-а, умöльöсь тэнат делоэзыс. И мый жö, сiдз лунтырöн и гöняйтан пороз вылын?

— Не-е, мукöдпырся айöлö мöссэз пастучитны отсала, мукöдпырся чери кыя, да эшö лосьпиянокöс дозирайтла. Эм менам ловья лосьпиянок. Он верит? Быль... Тулыснас таво поннэз вайöтiсö вöрсис, мырддьöмась мамыслiсь. Торта пельыс и шуö: «Миян Лапконым вайöтiс, сiдзкö, куканёкыс менам», а ме и шуи, мыся, миян Бусконым вайöтiс, менам куканёкыс. Öдззим споритны, мороссэз бердö кутчисим, чуть синнэз ог гарйö öтамöдлiсь. А Петька, менам дружокö, висьталiс: «Дугдö, весь толькö кад öштат, мыччалö лучше геройство. Кин ойнас пыравлас Кона Петралöн пустöй керкуö, сылö и дöнзяс куканёкыс». А Кона Петралöн керкуö луннас полöм петö пырны, не только ойнас. Ванька — торта пель, конечно, сразу жö нырсö öшöтiс и откажитчис, а ме пыралi. Пыри ыбöсöт, сулалыштi пытшкас невна и чеччöвтi зонкаэз дынö öшынöт. Сымда и вöлi.

— И мый жö одзлань? — юаси ме. — Пышшис лосьпиянокыс?

— Э-эз. Мöссэзкöт поскотина вылын олö. Голяас ме домалi сильканок. Мунас вöрö, дак сёровно мамыс оз примит, повзяс силькан шысис. Председатель миян, Илья Сергеевичыс, шуö: «Ась быдмö, арнас яй вылö государстволö сетамö. Босьтiм, шуö, обязательство содтöтöн тыртны яй вузалöм сьöртi годовöй план, вот и лоас содтöтыс». Только, ме думайта, пышшас куканёкыс. Орöтас ув бердö силькан кöвсö и котöртас мамыс дынö. Думайтан, охота сылö яй вылö мунны?

Зоночка вöлi не аслас годдэз сьöртi серьёзнöй и, тыдалö, вежöра. Кöть и пуктöмась сылö арифметика сьöртi умöль отметка, кöть и öддьöнöв часто ыджыт голубöй синнэзас орсiсö кульпияноккез и висьтасисö быдöнлö: бöб эта зоночкаыс, шалопут, — меным гленитчис сiя. Дженыт кадö Васька ештiс юавны, мыйлö ме татчö локтi, кытöн уджала и кытшöм эта сэтшöм машинка сулалö керкуас стена бокын, мый сiйöн керöны. Обстоятельнöй ответтэз получитöм бöрын Васька керис вывод, что гажтöмтчыны öнi, пожалуй, некöр лоас. Чожа мыйись ми — кык приятель ни — чеччимö и петiм амбарись. Сразу жö казялiмö, что луныс пондöтчöма мича да гажа. Небоын эз уяв öтiк кымöрок, шондi быдса кольтаэзöн койис золотистöй югöррез, перыта косьтiс лысва, кöда ыджыт, шучтыдалана сöстöм доноккезöн öшалiс быд заок вылын и кöсйис, народнöй примета сьöртi, бытшöм погоддя.

Ме чикыртi синнэзöс и тыр моросöн лолалi асывся свежöй воздухсö. Охота вöлi горöтлыны: «Мирыс, мирыс кытшöм!»

Но не быдöнлö гажöна овсис эта чочком светын. Кöр ми миссимö и пыримö керкуö, первöйыс, мый усис синнэзö, эта вöлi Марфа Демидовна. Куйлiс сiя порог дынас паськыт пуовöй кровать вылын, подушка кодь кыз киэсö тэчöма крест-накрест морос вылö, синнэсö куньöма. Рожабаннэс сылöн шойöтöмась, тырппес лоöмась лöзöсь — покойник покойник и эм. Марфа Демидовна жалобнöя ойзiс, лолалiс часто и пыдына. Одеяло пыр тöдчис, кыдз сылöн кыз телоыс часто-часто дрöжитiс, а моросыс лэбтiсьлiс сiдз, бытьтö пöльтчывлiс ыджыт мяч.

Кровать дынын, джек вылын, сулалiс эмалированнöй кружкаын ва, мöдiк сэтшöм жö кружкаын вöлi йöв. Сэтöн жö сулалiс пузырёк валерьянкаöн. Удж вылö мунiкö Кöкан Трöпим летöма иньыслö лук турун, вайöм нянь торок, но Марфа Демидовна нем абу вöрзьöтöма.

Васька мигнитiс шульга синнас и шуис гусьöник:

— Бöра кудобаö чапкöма. Лоас комедия... Сэсся локтiс мамыс дынö и юалiс горöн:

— Мам, поди фельдшерицаыс дынö ветлыны? Марфа Демидовна сьöкыта ойнитiс, пондылiс бергöтчыны бок вылас, но эз вермы, а только осьтiс вöйöм синнэсö и шуис слабöй голосöн:

— Мый тэ, мый тэ, зону... Некинöс эн кор, некин меным оз отсав, святöй молитва, буди. Ох-хо-хо, греххез менам, греххез. Смертiньöй, тыдалö, локтö...

Ме, кыдз кужи, сiдз и бурöтi сiйö, баитi небытик голосöн, что фельдшерицасö, пожалуй, колiс бы корны, может, и отсалас мыйöн. Но Марфа Демидовна решительнöя протестуйтiс. Ачыс сё ойзiс и ружтiс, часто нюлiс косьмöм лöзöтöм тырппесö и быгалöм чышьян конецöн чышкис петöм синваэз.

Васька шуис:

— Эн вöрöт сiйö, чулалас. Этадз пыр овлö, кöр ойнас умöль вöт адззылас...

Зонка пыртiс гуись кöдзыт йöв, свежöй солалöм чери, вайис кыськö ыджыт чöвпан нянь. Быдöс этö сёйöм бöрын ми кок чуннез вылын петiмö öтöрö: Марфа Демидовна висьталiс, что сiя кольччö бы керкуö öтнас....

Дата добавления: 2015-11-16