Эм природаын строгöй порядок

Аслам хозяинсянь, Кöкан Трöпимсянъ, ме кылi, что кытöнкö Мика шор дынын олö лось табун. Луннас лоссес сайласьöны тэлляинын, сёйöны турун да пипу листтэз, а ойнас петавлöны шор дынö, кыдз баитлiс Трöпимыс, пируйтыштны. Лоссез вийöм понда медбöрья годдэзö лесниккез жалейттöг штрафуйтöны быдöнöс, и пишались лыйöмыс сё шочжыка и шочжыка кылö нiя местаэзын, кытöн олöны лоссес.

Морт ме не öддьöн ни том, уна ни быд торсö адззылi чочком светас, но лоссесö, веськыта висьтавны, не только вöрись, но и зоопаркись эг эшö адззыв, не лыддьыны кö Васькалiсь лосьпияноксö. Ме öнi öзйи желаннёöн — мый бы эз вöв, а адззывны лосьöс и, если удайтчас, фотографируйтны сiйö. Вот дивуйтчасö тöдсаэз, кöр мыччала снимоксö! Сэтчö жö меным öддьöн охота вöлi ветлöтыштны настоящöй тайгаöт, тöдсасьны сыкöт буржыка, видзöтны великан кодь пожуммесö аслам синöн. Но кинкöт мунан Мика шор дынö? Кыдз кывсис, сы дынöдз дас верстася унажык, туй öддьöн сьöкыт. Васька абу эшö ештöма вöвны сэтчин и вöрзьыны сыкöт кыкöн, да эшö ойкöлöн, полöм петiс. Сэк и усис тöдвылö Демид. Уджалö сiя конюхöн, луннас нем оз кер, а öтiк ойсö вöввез чулöтасö кыдз-нибудь и сытöг: поскотинаыс ордчöн деревнякöт, турун эм, сёй мымда колö.

Одз асывнас, чуть ли не муöдз поклон сетöм бöрын, ме кеймиси старикыслö:

— Нуöт миянöс Васькакöт Мика шор дынö, стрась охота лосьöс адззывны.

Старик öвтiс киэзöн.

— Некöр, зону, некöр. Эта быль, что луннас керны меным нем, но карчйöрын картов кучиттöм, видчö моньö, да и зонö косöя дзарьялö. Сэтчö жö турунок колö заптыны. А вöввесö кытчö вошта? Загрек, ош сёяс — тюрьма...

— Но ми жö öтiк ой кежö ветлам. Ашын локтам бöр. Ме баитышта Трöпимыскöт, дозирайтас вöввесö.

Но стариклö кыв эз тöр, и ковсис казьмöтны, что фляжкаам верми бы кисьтны васö не простöйö. Эта юöр бöрын Демид ловзис:

— Но, буди, сiдз. Баитышт инö Трöпимыскöт...

Мика шор — Вильвалöн приток. Сы вылö позьö шедны пыж вылын, и ми решитiм Васькакöт уйны. А Демид лöсьöтчис мунны подöн, веськыта нюрöт.

— Значит, сiдз, — баитiс сiя. — Уят тi Кона грива дынöдз, Мика шорыс устьеöдз, казялат ыджыт кедр, кöда вылö пöрöма кöс пожум. Сэтöн ме тiянöс и пантала, Кона Петраыс могила дынын.

Стариклöн вöлi аслас мог мунны нюрöт: сэтöн эмöсь неыджыт видзоккез, кытчö быдмö быдкодь вöр турун. Энö видзоккесö колхоз важын ни оз ытшкы, мыля туруныс öддьöн умöлик да и ядовитöй — сiйö не только вöввез да баляэз, но мöссэз нельки мороз коста оз сёйö. Демид висьталiс, что, может, невна гогналас косаöн аслас мöсоклö.

И вот мийö петiмö туйö. Демид босьтiс пишаль, коса и оськалiс нюрöт, а Васька да ме пуксимö пыжö. Тэрмасьны вöлi некытчö, сiдз кыдз тöдiмö, что Демид дыр пондас нювсьыны нюрас, если инмас видзок вылö, и уйимö жагöник. Ме дыша вöрöтлi пелыссэзöн, любуйтчи гажа природаöн. Сразу жö прудыс бöрсянь пондöтчис пемыт вöр и видзöтны вöлi мый. Пуэзлö эстöн дзескыт лоöма тайгаас и нiя петöмась топ ваыс дорö, а мукöдыс нельки пырöмась юас. Кöркö важын ни Ошпозъяин сайын вöлöма ыджыт пожар, и юыс кыкнан ладорын сё эшö пантасьлiсö палитчöм ыджыт пожуммез, сэтшöм жö кöззэз. Мукöдыс сiсьмöмась ни начöдз и усялöмась доль и поперёк. Ордчöн кöс пуэзкöт öнi быдмисö вöснитик да кузь кыдззез, путриктiсö винерик рябинаэз. Берегыс дынын, кытчö бы дзар эн кер, лöзöтiс осока, чуть ылынжык тыдалiсö сэтöр кусттэз, лажмытик пон телегаэз. Пыж уйис дзик зелёнöй коридорöт.

Васька куйлiс пыж шöрас гатш и видзöтiс небоö. Кытöнкö тюрликайтiс ыбшар, каньгис кайварыш. Зонка, мый бы эз ло, а решитiс казявны ыбшарсö, но сылö мешайтiс шондi, кöда ассис дженытик югöрресö койис веськыта синнэзас и гусялiс нiйö. Вöлi жар, и Васька чöвтiс шабуроксö, чапкис йöрнöссö и куйлiс öтiк вешьянокöн. Кöр куш кынöм вылас пуксьывлiсö певпон ыжда лöдззез, зонка жалейттöг сöталiс ны кузя долоньнас, и чожа мыйись сотчöм яй кучикыс вевттисис паськыт сьöд кружоккезöн.

Кытöнкö веськытланьын кольччис деревня Кондовник. Сiя эз тыдав миянлö, но кылiс, кыдз сэтчин лявгисö поноккез, горöн китсасисö петуххез да готсисö курöггез.

Ыббез вылын гургисö тракторрез и нылöн говкыс пуктiс веськыта миян пеллезö. Кондовник сайын пантасьлiсö кынымкö кушин и неыджыт видзок. Самöй ю дорас сулалiсö ыджыт льöмпуэз да кыдззез и ны дынын эшö тöдчисö важ керку местаэз. Ме вежöртi, что и эстöн вöлöмась отруббез. Öтiк сэтшöм керку места дынын ми петiмö берегö, водiмö кузь турунö и невна шоччисим.

— Кона Петралöн тожö кытöнкö татöн отрубыс вöлöма, — юöртiс Васька. — Кöр сеталöмась нiйö, Кона Петраыс кольöм Ошпозъяинас важ сьöд керкусö и строитчывлöм кытчöкö Микаыс устье дынö.

— Сiя мый, кулöм ли мый ли сэтчин? Мыля могилаыс вöр шöрын? — юалi ме.

— Дедö тай шуö, вийöмась пö сiйö мужиккез. Важын ни эта вöлöма. Кона Петраыс пö вöввез веськöтны кужлöма, вир сувтöтны нылiсь велавлöм, вот и лыддисьöм татöн тöдiсь мортöн. Но и вот, öтпыр Голован Сергалöн вöлыс пондöма шогавны. Ветлöма Голованыс совла. Мунас здоровöй вöлöн, а бöр локтас шогалiсьöн. Сэсся деревняас мöдiккезлöн вöввез шогавны пондöмась, кувны öдззöмась. Только Кона Петралöн вöлыс дзонь кольччöма: сiйö отрубас ни видзöм. Мужиккес сэк и шуöмась, бытьтö Кона Петраыс лöгасьöм ны вылö, мыля отрубсö вöр дорö сетiсö, да и лэдзöма пö нылöн вöввез вылö кытшöмкö пöрöс, тшыкöтöма пö. Мужиккез лöгасьöмась и вийöмась Петрасö зоррезöн. Этö меным дедö висьталiс, дядя...

Деревняас овтöн ме кинсянькö невна кылi ни эта история йылiсь и öнi, важ керку местасö видзöтiкö, шыаси:

— Эх, Васька, Васька, кытшöм эстöн пемыт народ олöм кöркö. Да эд вöв шогöтсö деревняас Голован Серга вайлiс, мыля жö виноват лоис Кона Петра?

— Ог ме тöд, дядя, мыля нiя сiдз керисö, только кылi, бытьтö дзебöмась Кона Петрасö кытчöкö вöр шöрö и, медбы сiя эз пет мусис бöр, могила вылас пуктöмась ыджыт галя...

Важ ни деревня вöлi Ошпозъяиныс, уна поколеннёэз сэтöн олiсö. Быдöнныс нiя полiсö и енiсь и чёртiсь, быдöнныс полiсö быдкодь шогöтiсь, эз кужö пессьыны эна шогöттэзкöт, вöлiсö кыдз дикöй зверрез. Не сiйöн ли дыр видзсьö татöн, вöр шöрас, религиознöй дурман? Не сiйöн ли сё эшö вермö бöбöтны кытшöмкö слепöй старушка здоровöй и вына отирöс? Эна сьöкыт думаэз пыдына пырисö сьöлöмö, и ми чöлöмöн уйимö кынымкö час.

Кыным вылöжык кайимö, сыным векнитжык лоис Вильва. Пантасьлiсö перекаттэз, кытöн ваыс визывтiс больгöмöн и ёна качайтiс пыжсö. Ме öддьöн пымалi и, Васька пример сьöртi, чöвтi вывсим быдöс. Ыджыт лöдззез сразу жö чепöссисö куш яй вылö, и меным ковсис öт кинам дугдывтöг сöтавны нiйö. Уйны лоис тöдчöмöн сьöкытжык, и нельки Васькалö ковсис сынны öтiк пелыснас. Кынымкö верста уйöм бöрын ми атшалiмö нач и решитiм бöра шоччисьыштны.

Лажмытик берег вылö петöм бöрын кыкнанным водiмö кузь да небыт турунö. Бур сэтöн, долыт. Небоын öтiк кымöрок абу, шондi сiдз и сотö, дзик лöгасьöм миян вылö. Ми кыссим кусттэз увтö, кытöн вöлi невна ыркытжык. Но шондiлöн öдыс сё вынсялiс и вынсялiс, кысянькö нюрсяняс вайöтiс сьöкыт воздух и нельки кусттэс увтын, вуджöрас, немöн вöлi лолавны. Сэтчö жö быдкодь гнуссянь эз вöв спокой. Неыджыт льöмпуэз да бадёккез увтын орöттöг вöснитика-вöснитика дзингисö номмез, поснитик мошкаэз лэбалiсö быдса кымöррезöн, липакöн лякасисö чужöм бердö. Кынымкö минута бöртi менам сiдз пондiс лудны чужöмö, бытьтö койыштiсö кытшöмкö крепыт кислота.

— Купайтчыштам, Васька! Нем эстöн пöжсьыны.

Купайтчимö джын час мымда, тульöтчим, кытчöдз тырмис мыла и вын, уялiм, öтамöд сьöрö вöтлiсьöмöн. Сэсся керимö кусттэз увтö тшынас, водiм сы дынö и казявтöг онмöссим кыкнанным. Кöр саймим бöр, вöлi рыт ни. Шондi сайöвтчöм и койис югöрресö кысянькö пуэз колассянь.

— Беда, если Демид эз вермы видзчисьны миянöс и мунiс гортö.

Ми перыта чеччöвтiм пыжö и бöра öдззимö сынны. Васькалöн юöрсянь ме эг вермы некыдз успокоитчыны и шуи:

— Пемыт народыс олöма татöн, пемыт. Быд торсис нiя полöмась и аслас невежество увья вийöмась öтамöдöс.

— Мыля жö, дядя, сэк быд торсис нiя полiсö?

— Мыля, шуан? Да только сiйöн, что пемытöсь вöлiсö, неграмотнöйöсь. Вот и мамыт тэнат пемыт инька, тожö быд торсис полö.

— Полö, дядя, — согласитчис Васька и недырик чöлöм бöрын вдруг юалiс: — Дядя, а приметаэз быль висьтасьöны?

— Кытшöм приметаэз?

— А вот мамö шуö: кань поперегалас туйтö, дак лучше берт бöр гортö. Вöрö, шуö, мунан и пантасяс кöчок, дак тожö нем пö бурсö эн видзчись. Быль эта?

— Невежество эта, Васька, суеверие. Тэ школьник и должен ни тöдны, что быдöс сэтшöм приметаэс бöбöтчöны. Тiянлö нем разь учительницаыс эта йылiсь эз висьтасьлы?

Васька чöлiс. Сiя нельки керис вид, бытьтö эз кыв менчим вопроссö. «Хитритö мыйкö», — думайтi ме, ачым сынi быд вынiсь, медбы локны чожжык Кона грива дынöдз. А сiя, гриваыс, сэтöн и вöлöма ни. Только невна и мунiмö, кыдз казялiм ыджыт кедр, кöда вылö тöв пöрöтöма кöс пожум. Кедр дынын кайис тшынок. Этö Демид öзтöм костёр и, тыдалö, мыйкö нуис котелокын.

Старик вöлi лöг и панталiс миянöс неприветливöя. Сiя куйлiс кынöм вылас и, кыдз кöин, нёджжасис вöйöм синнэзнас кымöс увтсянь. Кытшöмкö турун за нямлялiкö, сiя тешитчис:

— Дыржык эд вермö узьны? Ашын бы локтiт самöй раз.

Мый сыкöт лоис, кытшöм гут курччöвтiс? Дыр думайтны эта вылын эз ковсьы, старик висьталiс быдöс ачыс:

— Кинкö, проклённöй, ытшкöм ни видзоккесö. Гогналöм сiдз, кöть шар быгляв. Мутэй Егорлöн уджыс, некинлö сэсся...

Ме сочувствуйтi Демидлö, небытик кыввезöн баитi, что, пожалуй, былись Егор сибалiс татчö. Васька ештiс дзарнитны котелокас и горöтчис радöн:

— О-о, тэ тай, деда, хариуссэз кыйöмат!

Старик вöлi добрöйжык ни, но сё эшö бобгис лöга:

— Тiянöс видзчисьтöн тöвбыт кежö позис черисö кыйны. Хариусыс татöн век бытьтö нем абу адззылöма, гуттэз бердö кутчисьö. Вон кыйи быдса чуман, мыся, гöститöта тiянöс да и ачым сёйышта, кöть и не свокоту.

Ме дзар кери öтмöдöрö и неылын кедрыс дынсянь казялi нитшöн вевттисьöм ыджыт галя. Матöжык сибöтчи сы дынö, видзöтi галясö öтмöдöрсянь. Демид чеччис и, кöр казялiс, мый менö интересуйтö, шуис гусьöник:

— Узьö сэтöн Кона Петра. Бытшöм мужик вöлi...

— Пемыт йöз татöн олöм, деда. Быд торсис нiя полöмась.

— Öнi эшö мукöдыс аслас вуджöрись повзьö, а одзжык ыбöссэз да öшыннэз креставтöг некин эз и онмöссьывлы.

Демид босьтiс би вылiсь котелоксö, кыскис кыськö симöтiсь керöм панёккез, пешлiс шербасö. Эта бöрын сiя локтiс костёрыс дынö и чужьялiс мыр торресö ваö. Сира головняэз лэбзисö дзик бордаöсь, пышкалöмöн пырисö ваö, сьöраныс колисö медбöрья тшынок.

Шерба вöлi бурся-бур. Не весь жö Кöкан Трöпим баитiс, что берег дорын сiя «скуснöйжык», нежели гортын. Демид пуктöма приправа туйö то ли шöмкорлiсь, то ли дикöй луклiсь вужжез, кытшöмкö туруноккез и вöснитик шöм сидзлiс кыв бердö. Хариуссэзлö сёяныс, тыдалö, тырмöма: вöлiсö нiя госаöсь, небытöсь. Куимнанным лотошитiмö пöттöдз.

— А öнi вöрзям, — висьталiс Демид, кöр котелокыс лоис пустöй, — эшö верста-мöд колö мунны. Ох, и туй, висьтала ме тiянлö... Гроб...

Да, туй вöлi не туй, а былись гроб. Эг ештö пырны вöрас, кыдз сразу жö инмимö выскыррез коласö. Гигантскöй тöвчик пöрлалöма вековöй пожуммез, вуж сорöн летöм ыджытся-ыджыт кöззэз да ньыввез, чапкалöм нiйö сiдз и этадз, керöма костёр. Ме дзарнитi природалöн эта расправа вылö и пот мунiс сьöлöмö: «Кытшöм сёжö вын, а? Мымда сэтöн доброыс сiсьмö, стрась!». Мунны сэтшöм выскырникöт луннас сьöкыт, а öнi нем вöлi и баитны. Быд колода, кыдз стена, куйлiс туй вылын и эз позь сiйö не вуджны, не ордйыны. Он ешты кайны öтiк колода вылö, а сэтöн виль, эшö кызжык и увьяжык колода. Му вылö чеччавны ковсис тожö берегитчöмöн: сiйö и видзöт, медбы эн косяв кынöмтö штык кодь лэчыт ув бердö. Эта туй вылын медöддьöн дöнзис Васькалö. Коккес сылöн вöлiсö дженытöсь и, медбы вуджны колодасö, ковсьывлiс керны не öтiк сложнöй операция: перво кутчисьны киэзöн, сыбöрын кыссьыны кынöм вылын, сэсся вожасьны верзьöмöн и вöлись ни чеччöвтны сай ладорас. Нем и думайтны, йöрнöсокыс сылöн бöра бы лоис лешки-вошки, но зоночка вöрö петтöн пасьталöма крепыт дöраись шабур, кöда и дорйис öнi сылiсь кынöмсö.

Час гöгöр ни чулалiс, кыдз ми вöрзимö Вильва дынсянь, Кона гриваыс дынсянь, а кытöн Мика шорыс, натьтö, и ачыс лешак бытшöмика эз тöд. Демид, кыдз вöв, пырскайтöмöн чеччалiс колода вывсянь колода вылö, жольöтiс котелокöн да горöн инмавлiс пишаль дулонас пуэз бердö.

— Деда-а, чожа ни петам? Бырис етшö, — норасис Васька.

— Терпитышт, öнджа, — отвечайтiс дедыс, — эшö нюр одзаным, ештан.

«Эх, тайга, тайга,— думайтi ме, — маитан тэ миянöс, вот кыдз маитан! Но сулав, локтасö тракторрез, механическöй пилаэз. Дрöгнитан... Да...» Чожа мыйись выскырникыс чулалiс, и мийö петiмö кушин вылö. Эта вöлi не быльнöй кушин, а сэтшöм места, кытöн быдмöны учöтик кöсыник пожумоккез, лажмытик чукыля кыдзоккез, паськыт уввеза кöзоккез. Эта вöлi нюр. Слепöй морт и то бы висьталiс, что эстöн эшö неважын вöлöма ты, но жагöник косьмöм, тырöма торфöн. Кок увтын дюттясис зыбун, и Демид висьталiс, медбы мийö öммезнымöс осьтлiмö шочжыка.

— Вермат купайтчыштны нятяс. Оськалö менам следдэзöт.

Кысянькö вöрыс пыдöссянь путриктöмöн кайис туман, усис сэтшöм лысва, что коккез сразу жö вамисö, паськöм пондiс кышöтны, кыдз брезентовöй. Ме радуйтчи, что вöрзи туйö кузь голенищеа сапоггезöн — пригодитчисö öнi. Городскöй мортлö луннас полöм петö вöрын, а öнi охота вöлi уннявны кöин моз. Бр-р-р! Кытшöм татöн гажтöм! Сiйö и видзöт, медбы не инмыны зыбунö, пыдöстöм ямаö...

Но умöльыс эз шогмы нем. Нильыг колодаэз вылöт ми жагöник петiм нюрись, мунiмö невна пожум ягöт, вуджимö пыдын лог. Неыджыт шутём вылöт оськавтöн, Демид юöртiс:

— Одзаным и эм Мика шорыс. Мöйму эстiсь адззылi лоссесö. Таво бöра пö адззылöмась. Мунö гусьöник, может, сэтöн и эмöсь.

Шысеттöг локтiмö пожуммез дынö, сэсся инмимö тэлляинö. Кытöнкö неылын больгис шорок. Ме старайтчи казявны сiйö, но шор визывтiс дзик му пытшкöт. Сы вылö доль и поперёк усялöмась сiсь пуэз, керöмась свальнöй настил, только мукöдлаын тыдалiс сьöд ваок. Лоссез кужöмöн бöрйöмась аслыныс местасö: эстiсь нiйö, пожалуй, он и вий, кöть лесниккез асьныс тшöктасö. Кытчö яйсö воштан? Пондыв-ко петкöтлы öнi нюрöт да выскырьяинöт — атшалан.

Демид ветлöтiс шорыс пöлöн, дзарьялiс кок увтас. Сiя гажöн юöртiс, что эмöсь свежöй следдэз: лоссез рыт гöгöрас ни войöмась нятьсö, петавлöмась юны. Ладно, эмöсь дак эмöсь. Ми адззим паськыт уввеза кöз, керим сы увтö лыссэзiсь шалаш, пырим сэтчö. Шалашын Васька жмитчис дедыс бердö: сiдз шонытжык и етшажык полöм петö. Ме нырышси гырдззаэз вылö, кывзiси. Б-р-р! Кöдзыт ойнас вöрын. Лысва кöтöтiс начöдз, йиджис, кажитчö, коскаэзöдз. Охота вöлi куритны, но Демид висьталiс, что орöтас менчим юрöс, если лысьта öзтыны папироса.

Ой вöлi пемыт. Бадь кусттэз да лапытик кыдзоккез сьöд видзисö лог дорас, вачкисисö лэчыт йыла шалашшез вылö. Шорыс ладорсянь вайöтыштлiс уль воздух, сы весьтын кöвьясис кизерик йöв рöма туман. Сай ладорас, баддяинын, перво несмелöя и дыша, а сыбöрын сё горöнжык и горöнжык пондiс шыасьлыны ойся кай — герскан, сэтчинсянь жö кывлiс дрöжитана шы — мер-р-р! Этö пешлiс ассис голоссö тожö ойся учöтик каёк, кöдö коми морт шуö вöр баранок.

Ми шыасьтöг пукалiм не öтiк час, ляскöтiм пиннезöн, кывзiсим, но лоссезлöн некытöн и дук эз вöв. Демид тöдчöмöн нервничайтiс, летiс тошоксö. Менам петiс он, но быдпырся, кыдз юрö öшöтчывлiс морос вылö, старик зубыта сюйыштлiс бокам: «Локтiн, дак пукав, ештан эшö узьнытö». Васька шоналiс, тыдалö, дедыс бокын, тшакыльтчис, кыдз понок, и онмöссис. Демид сё ёнжыка летiс тошоксö, гусьöн видiс лоссесö проклённöй сатанаэзöн. Сылöн вöйöм синоккес свиттялiсö лöг биоккезöн, и ме полi, кыдз бы старик эз понды мыччавны ассис крут характерсö.

Асыв кад гöгöр туман лоис сукжык, и вöрын пондiс дзик зэрны. Быд улок вывсянь усялiсö сьöкыт воттез. Воздухын öшалiс поснитик уль бус. Лоис эшö кöдзытжык. Но чожа казялi, что перыта пондiс югдыны. Асыв ладорын перво чочкоммис небоыс, сэсся казявтöг вевттисис гöрд рöма полосаöн, и недыр мыйись чавкнитiс шондi. Сiя мыччис вöр пыдöссис перво джын гöглянсö, иньдiс му вылö медодзза кузь югöррез. И тайга сэк жö саймис. Тысяча каёк öтдруг, дзик кылiсö команда, пондöтiсö асывся концерт. Кытöнкö совсем матын кривзiсö туриэз, чуть ли не юр весьтын курзiсö таррез, и нельки кöк, таёжнöй горемыка, öдззис лыддьыны кинлiськö годдэз. А лоссез эз и думайтö мыччисьны, дзик кулiсö быдöнныс.

Саймис Васька и тулис кулакнас синнэсö. Гöжöма. Пиннес кисьтiсö поснитик дробь, тырппес лöзöтöмась. Демид кучикас оз тöр: дугдывтöг гусьöник бобгис ныр увтас, видчис, шуис лоссесö бöжтöм ведьмаэзöн, а асьсö адззывтöм дуракöн, кöда петыр лун панытö ылалiс мунны вöрö, лешаккез дынö, кöр соседдэс юöны, натьтö, сур и висьтасьöны öтамöдлö гажа историяэз. Лöгувьяс старик öзтiс трубка, сэсся петiс шалашсис да гымыштiс чочком светас пишались. Страшнöй говк чанöтiс миянлiсь пеллез, инмис пу йыввез вылö и чорыт валлэзöн тарöвтчис берег пöлöн кытчöкö улö, повзьöтiс быдöнöс, кин вöлi вöрас и шор дорас... И эта минутаö пондiс шогмыны чудо. Совсем матын, кынымкö дас сажень ылынаын, тэлляинас, дзик лэбис пурга и вуж сорöн летiс пуэсö, лотшкöтöмöн чеглалiс колодаэз, павтыралiс кöззэз. Ыджыт шумöн ризьöтiсö рябинаэз да вольпуэз, зэв уна да вына копытаэз увтын дрöгнитiс муыс, и чожа неылын миян дынöт чепöссисö лоссез. Ыджыт гордöй зверрез пуляöн петiсö вöрсис, локтiсö шорок дынö и, саженься кузьжыка чеччалöмöн, юррезнысö вылына видзöмöн, лэбзисö шорыс сай ладорö. И быдöс эта кыссис öтiк минута, не унажык. Ме эг ешты кваркыш керны, кыдз зверрез öшисö, а чожа мыйись и кокшы нылöн дугдiс кывны.

— Чудо! — челядёк моз радуйтчöмöн горöтiс Демид. — Вот дивовежка, кыдз пöльтiсö! Но мый, адззылiт, кытшöмöсь нiя?

— Кытшöм адззылöм! И кваркыш керны эг ешты! — шыаси ме.

— Ха! Тэ бы узин эшö дыржык, лоссес видзчисисö бы, может, — шынньöвтiс Демид. Довольнöй аслас кыввезöн, сiя, кыдз петух, чеччалiс шалашыс дынын, клопöтiс боккесö и сё горöтлiс: — Ах тэ, дивовежка! Ах, проклённöйез! Но колö жö, а? Миянкöт ордчöн и узьöмась. А бура повзисö, бöжтöм öнджаэз, кöр гымнитi пишальсим! Нельки юррезныс бöбмöмась, чуть только выланым эз кайö!

Но чудолöн конецыс абу на сибалöм. Кытчöдз Демид дивуйтчис да клопöтiс боккесö, а ме старайтчи вежöртны, мыля лоссес эз пышшö мöд ладорö, а мунiсö шор сайö, — öтiк лось эта коста ештöма садясьны. Первöй сiйö казялiс Васька.

— Вон, вон, дядя, сай берегас, вон! — мыччалiс зоночка шор саяс.

И быль, перво ме, а сыбöрын и Демид, казялiмö, кыдз тшöк понуляинiсь мыччисис лосьлöн повзьöм синнэза ыджыт юр. Эта юр нюкайтiс воздухсö, полöмöн дзарьялiс öтмöдöрö и нёштöм кыз голосöн лэдзис кытшöмкö шыэз. Ме чожжыка кыски фотоаппаратöс и сьöрсьöн-бöрсьöн кери кынымкö кадр. А лось сё сулалiс сайласьöмöн и лэдзалiс тревожнöй шыэз. Мый сыкöт лоис? Бöбсялiс ли мый ли начöдз?

— Пиянок сылöн, сiдз и тöд, пиянок таланьын кольччис, — горöтчис Демид. — Быль, сiдз и эм! Вон сiя, вон, вон! Ах тэ, кöин öбед, ах, нёштöм мыгöр!

Учöтик лосьпиянок, кöда тöн, видно, только и чужöма, дрöжитöмöн сулалiс кузь коккез вылын. Сiя полöмöн вовлiс шорокыс дынö, нюкайтiс васö и петитчывлiс бöр: тыдалö, абу на адззылöма васö, полiс вадны коккесö и эз решитчы пырны шорокас, кöть мамыс корис дынас. И сэк, кöр пöрись лосиха вежöртiс, что пиянокыс сiдз и кольччас сулавны, казявтöг кöстiс кузь тушасö, горбыльтчис, пуктiс нёльнан коксö öтiк точкаö и, дзик борда, лэбзьыштiс шорыс вевдöрöт. Сiя шупыта локтiс пияныс дынö, нюлыштiс сылiсь юроксö и жагöник, мед не уськöтны куканёксö слабöй коккез вылiсь, пондiс тойлавны чуканас кусттэз сайö. Ми видзöтiм эта картина вылö осьта öммезöн, полiм вöрзьöтчыны местаись. Охота вöлi отсавны заботливöй мамлö сайöвтны пияноксö, шуны сылö ласковöй кыв. Но и миян отсöттöг лоссез чожа пырисö чашьяö, дугдiсö ризьöтны уввез да павтырасьны лыссэз.

— Чудо! — горöтчис бöра Демид. — Диво! Мымда ни му вылас ола, а эттшöмсö эг на адззыв.

Старик дыр эшö чеччалiс петух моз, жалейттöг вартлiс боккесö и, кöр невна успокоитчис, висьталiс, кыдз философ:

— Эм природаын строгöй порядок: мам некöр оз чапкы ассис пиянсö... Да...

Сэсся чöлiс невна, мечтательнöя дзарнитiс фляжкаö вылö, шуис чорыта:

— Ладно, видзöтiт комедь и тырмас. Öнi лöсьöтö ыджытжык костёр, шонтiсьыштам, а то пиннез вот-вот чегласясö, сiдз и йöктöны, проклённöйез...

Дата добавления: 2015-11-16