ОРДЧÖН ПРЕДСЕДАТЕЛЬКÖТ

Ошпозъяинскöй колхозлöн правленнё виль. Сулалö сiя деревня шöрас вековöй кыдззез коласын, нёльнан ладорсянь видзöтö мир вылö голубöй наличника ыджыт öшыннэзöн, крыша вевттьöм шатром. Посöдз фронтон вылын öшалö вывеска: «Заря» колхозлöн правленнё». Вывескаыс кыкнан бокын пöввез вылö гижöмась призыввез. Нiя быгалöмась ни шондi увтас, зэррез чышкöмась краскасö, но лыддьöтны позьö эшö: «Тыртам яй вузалöм сьöртi обязательство!», «Босьтам быд гектар вылiсь 15 центнер нянь!». Посöдзись стена вылö дорöмась плакаттэз. Кытшöмкö местнöй художник öтiк плакат вылö вермöма рисуйтны сотняся унажык порсьöс и гижöм увдöрас:

Бур, кöр содö Колхознöй пода.

Мöдiк плакат вылö сiя жö художник рисуйтöма быгалöм синнэза мöсöс и сы коккез увтö гижöма тожö рифмуйтöм фраза:

Мöс сетö йöв, мöс сетö яй, — Вердчан унажык мöслö вай.

Правленнё дынын сулалiс кокнитик рессорнöй телегаö доддялöм томыник жеребец. Сбруя сы вылын бур, быдöс вурöма небытик коричневöй кучикись, сермöт и шлея басöксьöтöмöсь меднöй кружоккезöн, кузь сыррезöн. Дуга пеганитöм уна рöма краскаöн и вачкисис радуга вылö. Вöв, тыдалö, эз тöд, кытчö воштыны вынсö, сулалiс неспокойнöя, одзись коккезöн гарйис мусö, йирис öмлöс и дзарьялiс öтмöдöрö дикöй синнэзöн.

Правленнёын, öтiк ыджыт жырын, пукалiсö кык мужик. Öтыс, кöда пукалiс веськытланись пызан сайын, вöлi сорок пять год гöгöрся, бура бритöм чужöмбана, только ныр увтас сьöд видзисö тшöтшкöртöм усоккез. Кымöссö сылiсь не öтiк местаöт кырöвтöмась пыдын чукыррез, юр шöрас шогмöма кидолонь пасьта лысина. Мужикыс кужöмöн сайöвтöма лысинасö кымöс вылö кольччöм юрси тылöппезöн, и не öддьöн внимательнöй морт эз бы и казяв этö изъянсö. Эта — председатель Илья Сергеевич.

Мöдыс вöлi невна пöрисьжык, но винержык председательысся и мыйöнкö вачкисис тури вылö: юрыс учöтик, нач лысöй, кыдз пöвсалöм калиг, голяыс кузь, тшöка увтö петöма курöг кольться ыджытжык кадык. Синнэс сылöн учöтикöсь, но лэчытöсь, дзардöны, кыдз шомоккез, и дзик баитöны: адззам быдöс, мый керсьö чочком светас. Эз ков ыджыт наблюдательность, медбы вежöртны, что эта морт — бухгалтер. Сы одзын паськыт пызан вылын куйлiсö ыджыт конторскöй книгаэз, папкаэз да быдкодь бумагаэз и, конечно, счётыэз. Ны вылын шваткöтiкö, бухгалтер орöттöг мыйкö гижис и эшö ештiс куритны чукыля трубка.

Кöр ме пыри правленнёас, председатель кытчöкö звонитiс телефонöн.

― Аллё, аллё! — чирзiс сiя трубкаас. — Аллё, мыся, кулiтö ли мый ли... А-а, этö тэ, нылiньöй! Но, здравствуй, малинтусь, куимпöвса привет тэныт месянь. Мый? Öтiкпöвса тырмас? Но мед лоö тэ моз. Йитöт жö, горадзуль, больницаыскöт. Мыйнö, мыйнö, сыкöт...

Бухгалтер öнi öтдруг шваткöтiс счёты вылын, перыта гижис, куритiс трубка и эшö кывзiсис, мый баитiс председательыс. А сiя баитiс вот мый:

— Здорово, здорово, роднöй! Кылi ни, веськалан пö... Лун-мöд бöртi, шуан? Бур! Öддьöн бур! Обязательно иньда жеребецсö... Делоэз? Да мунöны, кулитчыны ог понды. Ытшкисям öнi, только шум сулалö. Бур, öддьöн бур! Погоддя мировöй! Туруныс, батя, кыдз чай, охота заваритны да юны, но кытчö воштiсян — мöссэзлö колö.

Проводыс мöд конецын кинкö сералiс, а председатель баитiс ни бухгалтеркöт:

— Кылiн, Иван Иванович? Лун-мöд бöртi локта пö. ― Бухгалтер шы эз сет. Сiя только гогинялыштiс калиг кодь юрнас.

Трубкасö пуктiкö, Илья Сергеевич гажа синнэзöн дзарнитiс мелань, приветливöя здоровайтчис и, кöр кылiс, что ме не кытшöм-либо начальник, а просто отпускник, горöн серöмтчис:

— Ха! Эта мыйкö виль миян ладорын! Кылан, Иван Иванович, отпускö татчö городiсь локтöма... Гиж, дружок, колхозыс история книгаö, сiдз и гиж: «Талун миянö локтiс шоччисьны первöй отпускник».

Председатель вöлi весёлöй морт и, кöть тешитчис ме вылын, эг öбидитчы, а шуи тожö гажöна:

— Не талун локтi, а лун-мöд ни татöн ветлöта. Ме, ёрт, адззылi ни, кыдз тэ воюйтан нывкаэскöт. Бытшöма тэ нiйö шардöтiн... Да...

— Быд рыт воюйта, кыдз Аника. Узьны канальяэз воть оз сетö, кöть бы чёрт нiйö люкалi. Тэ мый, дыр кежö ли татчö?

— Лун куим-нёль мöда ветлöтны.

— Э-э, етша. Нёль лунöн нем он адззыв. Кöть и не öддьöн ыджыт колхозным, а видзöтны эм мый. Пондöтiм сэтшöм делоэз, что кытчö тэ! Посöдз фронтон вывсис лыддьöтiн? Вот-вот...

Председатель кыскис кармансис чышкöтся ыджытжык клетчатöй чышьянок и чышкис ньылöм воттесö, кöдна петiсö кымöс вылас эшö телефонöн баиттöн, малыштiс лысинасö. Лун вöлi жар, и керкуын эз тырмы воздух. Ог ни тöд, кыдз сiя вермис пукавны эстöн суконнöй гимнастёркаöн да кирзовöй сапоггезöн. Кытöнкö веськыт пельöсас дзингис балалаечнöй струна моз балямош, вартчис öшын стекло бердö. Председатель лöгасис и сöтiс сы кузя чышьянокнас, сыбöрын вачкис ныр йывсис гутöс и хитрöя дзарнитiс мелань:

— А ме тэнö тöда эд! Одззуну вовлi городас типовöй проекттэз корны и пантасьлiм сэки.

Ме дивуйтчыштi невна и шуи мыкталöмöн, что вермас и сiдз лоны — уджала проектнöй организацияын, председателлез миян дынö часто пыравлöны.

— Сiдз, сiдз. Бур проект ме сэк вайи. Сы сьöртi и строитiмö порсь фермасö. Пондöтiм, дружок, делоэз, эм мыйöн ошшасьыштны. Сю мöйму быд гектар вылiсь двенадцать центнерöн босьтiм, а таво решитiм пятнадцать центнерöн вартны. И вартам, пожалуй, если шер оз вий. Кондовниковскöй ыббез вылын осяэз син гажöтöны, а рудзöгсö адззылiн татiсь, Конановскöй керöс вывсис? Не рудзöг, а стена!

— Назьмитöмöсь, видно, муэс? — шыаси ме.

— И торф и назём жалейттöг валитiм. Тырмö сiя миян. Медбöрья годдэзö пода видзам уна, назём аркмö мымда колö, только петкöт, эн дышöтчы. Если му назьмитан, нянь босьтан. Нянь уна лоис, пода кокнитжык видзны. Сiдз сiя и мунö колесоöн. Миян ыббез öнi некытшöм засухаись оз полö. Да мый ме тэныт этö висьтася. Эшö шуан — ошшасьö. Вот ветлöтыштан — и казялан ачыт. Талун кытчö лöсьöтчин?

— Да шатлася сiдз. Может, Чöвпан вылö кайла.

— Чöвпан некытчö оз пышшы, и ашын сы вылö верман кайлыны. А талун висьтав спасибо сылö, кин счастье тэныт сетiс: лöсьöтчи ме порсь фермаö ветлыны, да эшö Пугиновскöй бригадаö кежавны, туй вылас сувтчывлам ытшкисиссез дынö. Мыччала тэныт быдöс. Висьтавны кö, главнöй сенокосыс миян öддьöн ылын. Туланöскöй видззез вылын, но и татöн эм мый видзöтны.

Эта вöлi былись счастье: мунны бригадаэзö, да эшö кинкöт? Ордчöн председателькöт!

— Но, Иван Иваныч, босьт ассит счётыэтö — и шагом марш телегаö! Тырмас тэныт пöжшыны эстöн. Колö лыддьыны фермаас, мый дона миянлö сувтö порсь яйыс.

Иван Иванович шысеттöг öктiс бумагаэз, сюйис нiйö шкапö, игналiс пызан, а ключсö пуктiс карманас. Сэсся сiдз жö шытöг босьтiс счётыэз, кытшöмкö тетраддез и петiс öтöрö. Эта морт вöлi совсем кыдз немöй. Илья Сергеевич орöттöг баитiс, а бухгалтер эз на и осьтлы öмсö, только гогинялiс юрöн да буравитiс менö лэчыт синнэзнас.

— Кинкöт тэ этö телефоннас баитiн, если не секрет? — юалi ме, кöр быдöнным пуксимö телегаö и жеребец тöвчикöн лэбзис деревня сайö.

— Ха! Секрет! — отвечайтiс председатель. — Кытшöм миян секрет вермас лоны? Зоотехник шогалö тулыссянь, больницаын куйлö. Иньдöтчöм ыджыт ванас пыжйын мöс фермаö и клöбыснитчöм, ваыс бергöтöм пыжсö. Öдва ловйöн инькаэз кыскöмась. Морт сiя слабöй, кругом раненöй, уна ли колö? Öдззис шогавны, и вот куимöт месяц ни. А зоотехниктöг öнi совсем не олан, колхоз сытöг сёровно кыдз бордтöм кай. Сэтчö жö партийнöй секретарь сiя миян. А партийнöй организация, кытöн абу секретарьыс, — эта кыдз юртöм морт — не пырны не петны.

— Ыджыт тiян партийнöй организацияыс?

— Кытшöм ыджыт, квать коммунист. Но и то вын. Только вот медбöрья кадö мыйкö умöля вöрöтчам. Баитi тай, мыся, абу секретарь, дак не пырны не петны.

Порсь ферма дынöдз вöлi кык верста мымда. Перво колiс вуджны деревняыс сайись логсö, сэсся невна мунны вöрöт. Туй эстöн вöлi векнит. Вöснитик кыдзоккез öшöтчöмась сы весьтö и мукöдыс зубыта сидзлiсö чужöмö. Шыгыра каджа томыник жеребец мунiс кокнита, не мунiс, а дзик йöктiс: паськыта чапкалiс коккесö, чатралiс юрсö, а пеллес сiдз и ветлiсö öтмöдöрö. Кöр председатель зэлöтлiс вожжи, жеребец чеччöвтлiс шакардаöн, и сы копытаэз увтсянь лэбзисö му тороккез.

— Вон сiя, фермаыс, — гажöна висьталiс Илья Сергеевич. — Не ферма, а быдса городок.

Неыджыт кушин вылын, кытöн одзжык вöлöма шутём, куим типовöй карта ордчöн кыссисö топ вöр дорöдз, югьялiсö шондi вылын виль тёсовöй крышаэзöн. Неылын картаэз дынсянь сулалiс ыджыт башня, тыдалö, водокачка, сы бокын вöлiсö кормокухня, кытшöмкö сарай и чуть ылынжык — неыджыт склад. И быдöс эта строитöма, тыдалö, совсем неважын: веж пожумовöй керрез абу на сьöдöтöмась, воротаэз нач эшö вильöсь.

— Пятьдесят тысяча руб эта сувтiс, — гордöя шуис председатель и кежöтiс вöвсö башняыс дынö, кытöн сулалiс куим öшына неыджыт керку. Сы дынын миянöс панталiс гöрд чышьянока ыджыт мыгöра инька — ачыс заведующöй. Кокас сылöн кирзовöй сапоггез, вывтас сьöд материалiсь халат. Синнэс инькалöн внимательнöйöсь, добрöйöсь, тырп дорреыс шыннялöны. Начальство, тыдалö, вовлывлö татчö часто, и инькаыс лебезитiс сы одзын не öддьöн. Сiя степеннöя горöтчис быдöннымлö «здравствуйте» и, кыдз мужик, крепыта жмитiс киэз.

Мекöт здоровайтчикö, сiя дзарнитiс веськыта синнэзö и висьталiс:

— Анна Даниловна.

— Сiя миян герой, — юöртiс председатель. — Неважын орден получитiс.

Инька гöрдöтыштiс и лэдзис синнэсö — тыдалö, недолыт вöлi кывны ас йывсис гора кыввесö.

Кузь карта дынын, лабичок вылын, пукалiс чочком юрсиа и тожö халата женскöй. Сiя перво дыша дзарьялiс миянланьö, сыбöрын лэдзис юрсö морос вылас и, кажитчö, пондiс сунасьны. Эта вöлi Надя.

— Э-э, Надюш, добрöй лун! — чирзiс председатель. — Тэныт мый, ойыс дженыт вöлi, öнi сунасян? Видзöт, шондiыс стыдитö.

Надя шынньöвтiс кыдзкö виноватöя, но шы эз сет, только мыччалiс öмсис лым кодь чочком пиннез. Сэсся босьтiс ведраэз и котöрöн мунiс кытчöкö картаыс сайö.

— Бöра асывнас горзiс, — норасьöмöнмоз шуис Анна Даниловна. — Мамыс, тыдалö, сё тешитчö.

— Ах, Домна, Домна, бöбсялiс сiя пöрисьувьяс. Вот ужо корла сiйö правленнёö, — кöсйисис Илья Сергеевич. Сэсся бергöтчис Анна Даниловналань и висьталiс гажöна: — А ме тiянлö бур юöр вайи. Лун-мöд бöртi локтас Максим Петрович.

— Былись эд бур юöрыт, — шыасис заведующöй. — Атшалiмö ни сытöг.

Немöй бухгалтер аслас канцелярскöй атрибутöн пырис керкуокас, а Илья Сергеевич тшöктiс вайöтны откормочниккез коласiсь öтiк «кабанöс».

— Бöрйö ровнöйжыкö, öшлам сiйö. Может, важын ни государстволö кыскыны туйö, а ми вердам.

— Асывнас только öшлiм куим порсьöс, — шуис Анна Даниловна, — куимнанныс öткодьöсь: 83 килоöн лэбтiсö.

— Етша. Сто кило колö. Кытшöмöсь эта неделяын привессэз? 600 грамм? Тожö етша. Мый, озö разь сёйö, мыля умöля содöны?

— Жар погоддяыс, Илья Сергеевич. Лунтыр куйлöны, кыдз ошшез.

— А тi ойнас, ойнас вердö. Луннас мед куйлöны, а ойнас валитö мый эм. Концентрат, клевер пизь, турун, ва — нем эд жалейтö. Заданнё тöдат кытшöм?

— Кыдз не тöдны...

— Вот, вот. 200 порсь колö кыскыны эта месяцö. Эта лоö 200 центнер. А кытшöм себестоимость? Эд лыддьö? Жаль. Вот ми лыддям öнi. Каждöй копейка лыддям, каждöй грамм...

Куимнанным пыримö керкуö. Бухгалтер ештöм ни осьтны конторскöй тетраддез, пешалöм öмас трубкасö, öнi шваткöтö счёты вылын, гижö мыйкö перыта-перыта. Илья Сергеевич пуксис öшын дынö, кыскис кармансис блокнот, корис учёт сьöртi книга. Ме видзöтi плакаттэз. Стена вылын öшалiсö тöдса ни миянлö художниклöн произведеннёэз. Öтiк плакат вылын вöлi ошся ыджытжык дöчка. Сiя куйлiс му вылын, а пятнадцать учöтик порсьпиян, öтамöд вылö кайöмöн, нималiсö сiйö. Эта картина увтын вöлi пояснительнöй текст: «Унажык приплод — ыджытжык доход». Вöлiсö и мöдiк плакаттэз, вöлiсö зоотехсоветтэз, а джаджын куйлiсö брошюраэз.

— Петавла картанытö видзöтны, — шуи ме, кöр быдöс плакаттэс вöлiсö видзöтöмöсь и лыддьöтöмöсь.

— Давай нёджжась, — шыасис председатель. — Только эн курит сэтчин, а то сотан.

Ме пыравлi öтiк картаö. Нем сэтöн интереснöйыс абу: стенаэз, öшыннэз, потолок, столббез — и только. Дошлöй председатель строитöма не быдöс миян проект сьöртi. Проектас вöлi видзöтöма керны кыкнан стенаас вентиляционнöй осьтаэз, а керöмась только öтiк стенаас. Этö, натьтö, сiйöн, медбы эз вöв сквозняк. Гожумнас порссесö видзöны вöрас, и öнi татöн эз вöв некин. Ме пыравлi кормокухняö, видзöтi водокачка, дзар кери складö. Эстöн оча ныр пантасимö Надякöт. Вöлi сiя ён гöгрöса чужöмбана. Рожабаннэс сiдз пöльтчöмась, кажитчö, чуткы чальöн — и нiя сразу жö, кыдз пурт йывсянь арбуззэз, потасö и брызнитасö сокöн. Юрси Надялöн чочком, кыйöма кык кузь чикисьö, синнэс югьялöны сьöд шомоккезöн. Надя масьтiс ыджыт мел комок, тэчис пизьсö ведраö.

— Но, кыдз ни овсьö му вылас? Миритчит мамыткöт?

Ме думайтi, что нывка шынньöвтас, кыдз шынньöвтiс öнтай председательыслö, а может, и пондас норасьны мамыс вылö, висьталас, кытшöм гажтöм сылöн оланыс, кыдз повзьöтлö Кривöй Матрен страшнöй судöн. Ме бы, конечно, висьталi сэк кытшöм-нибудь ласковöй кыв, велöтi бы, кыдз мездöтчыны мамыс киэзiсь, кыдз лоны гордöйöн, мед не уськöтны нывкалiсь достоинство. Но Надя кöин кодь синнэзöн видзöтыштiс кымöс увтсянь, киэсö пуктiс кадж вылас, керис воинственнöй вид.

— А тэныт кытшöм печаль? Эмöсь тiян коддес... Надя содтiс эшö кытшöмкö кыв и перыта петiс складсис. Ме кылi, кыдз биöн öзйыштiсö рожабаннэз да пеллез, моросын эз понды тырмыны воздух. Охота вöлi котöртны, пышшыны ылöжык, пырны му пытшкö, мед не адззыны нем: «Бöбöв, кытшöм сёжö бöбöв! Мöдi жалейтыштны, кыдз бытьтö ачым ог тöд, что жалейтöмыс оскорбляйтö мортлiсь чувствоэз», — видi ачымöс.

Бур бы вöлi, если некин этö эз адззыв, некин öнi эз пантась, но склад дынö локтiс ни пустöй ведраэзöн да кöртзырöн Анна Даниловна. Сiя дзар керис ме вылö, сыбöрын Надя вылö, кöда кыз каджнас бергöтлöмöн мунiс вöрыслань, и, тыдалö, вежöртiс быдöс.

— Бöра грубитiс? Ах сiя, быздöм! Кöть бы йöз мортiсь невна стыдитчыштi, некытшöм лад эз ло. Кыдз вайис кагаоксö, дак дзик вежисö сiйö. Шуа öтпырись вöлi, мыся, не тэ первöй, не тэ последньöй, мый сiдз маитан асьтö, адззан эшö золотöйö жöниктö, дак сiя, лякöсь ныр, сымда нятьсö кисьтiс ме вылö, чуть эз пöдты. «Кытшöм, шуö, тэныт дело, тöд асьтö, тэтöг меным недолыт, кöть юр петляö сюйышт» — и öдззис, и öдззис. А кытшöм нывка вöлi! Мый бы эз пондöт, сiйö и керис, уджыс сiдз и сотчис киэзас, фермаэзын асывсянь рытöдз только сылöн и кылiсö песняэз. А öнi ветлöтö, кыдз öшöм, киас нем оз пыр. А мый тшöктан керны, дак керас тяп-ляп, сэсся пуксяс пельöсö, син сайö, и пукалö, кыдз мыр, думайтö мыйкö.

Анна Даниловна жолькнитöмöн пуктiс му вылö ведраэз, чапкис кöртзыр и, коккесö луд бердö чышкикö, баитiс одзлань:

— А Петькаыс, кузь майöгыс, тожö бур. Бöбöтiс нывкасö и сразу бокö. Нывка синваэз кисьтö, а сiя, кудоба, гармонняöн ойбыт орсö. Мукöдпырся кывза-кывза да сiдз бы и öбыртi бöб юрыс кузя майöгöн: эн ов зверь моз, эн кер отирлö несчастье...

Инька кисьтiс мешöкись концентрат, сорлалiс сiйö клевер пизь сорöн, а ачыс сё баитiс:

— Домнаыс, Надькаыслöн мамыс, совсем ылöстöмсялöма. Кыдз шогмис кагаокыс, дак сэтчöдз нывсö нöшöн песöм, чуть абу вийöм, да и öнi спокой оз сет. Макась Домналöн öтiк басниыс: раз грешитiн, то юрбит, кеймись енлö, мед проститас греххетö, кор счастье. А эта, думайтан, кокнит? Кин öнi томмес коласiсь юрбитö?

Анна Даниловна осудитiс и жалейтiс нывкасö, баитiс спокойнöя, ровнöя и сылöн сёрнитöмсянь лоис долытжык.

Ме юалi:

— А мыля сiя оз мун мамыс дынiсь? Вермис бы сытöг овны.

— Да эд муннытö бöра оз лöсяв. Кыдз не кыдз, а мамыс быдтiс сiйö, няньöн вердiс. Öнi Домнаыс пöрись ни, уджавны оз вермы, отсöт сылö колö. Нылыс жалейтö мамсö да и кывсьö, кагаоксö старушкаыс радейтны пö пондöма.

— Ме кылi, мамыс пыртны кагасö тшöктö?

— Пыртны? Вот эшö! А мый тэ босьтан Домнаыслiсь? Ужо, ме баитышта öтiк морткöт, шонтас сiя Надяыслiсь сьöлöмсö. Эм миян бытшöм старушка, кужö томмесö велöтны. Да и асьным ми не слепöйöсь, тожö отсалам, кытöн колас.

Анна Даниловна лöсьöтiс порссезлö вердас, а ме пыри керкуокас. Бухгалтер сё эшö сöскис чукыля трубкасö, шваткöтiс счёты вылын, лыддис продукциялiсь себестоимость. Илья Сергеевич проверяйтiс учёт сьöртi книгаэз, гижис мыйкö блокнотö и, кöр пырис Анна Даниловна, шуис сылö:

— Локтан месяцö тожö позьö двести кыным порсьöс вузавны государстволö. Сэк и тырас годовöй планыс. Год конецöдз, тыдалö, кык план тыртам, — и дзар керис веськыта чужöмам: видзöт пö кытшöмöсь мийö.

— Тыртам, конечно, — шыасис заведующöй. — Только тэ, Илья Сергеевич, корлы Домнасö правленнёö, баитышт сыкöт. Баитышт и Надькаыскöт. Умöля сiя öнi уджалö, мамыс мешайтö.

Председатель мöдiс мыйкö горöтчыны, но эта кадö бухгалтер лэбтiс калиг кодь юрсö и первуись ме дырни горöтчис кытшöмкö нёштöм вöснитик голосокöн:

— Шестьдесят пять руб тридцать одна копейка. Председатель барöтiс синнэсö:

— Мам-мам-мам! Этö кыдз жö сiдз? Гожумнас öтiк центнерыс сы дона? А Ярослав Чижлöн двадцать руб...

— Лоас чистöй доход, эн тöждiсь, — баитiс бухгалтер. — Государствоыс эд центнерыс понда стося унажык сетö. Прибыль лоас.

Председатель проверитiс бухгалтерлiсь расчёттэсö, гогинялiс юрöн, сё дивуйтчис: мам-мам-мам, кытшöм дона.

— Ме думайтi: не унажык пятнадцать рубся лоас, а сiя чуть ли не семьдесят. Но, ладно, — недыр мыйись успокаивайтiс сiя асьсö. — Ленин нима колхозлöн вон себестоимостьыс сто рубся ыджытжык. Порссезсянь сэтчин öтiк убыток.

Бухгалтер кольччис фермаас эшö мыйкö лыддьыны, а ми Илья Сергеевичкöт чожа гöнитiмö ни Пугинлань. Порссесö ме сiдз и эг адззыв, да и жалейтны эг понды. Локтi татчö не порссез видзöтны, а пантасьлыны отиркöт.

Пугин вöлi учöтжык, но мыйöнкö вачкисис Ошпозъяин вылö. Сэтшöм жö ён керкуэз, кыдз и центральнöй усадьбаын, сулалiсö лог дорын, öшыннэз увтын путриктiсö пышнöй льöмпуэз, рябинаэз да вековöй кыдззез и нельки сэтшöм жö кедр, кыдз Ошпозъяинын, гажöтчис деревня шöрын. Логын больгис шорок и сы пöлöн кыссисö неыджыт баняэз, сулалiс кузница, кытöн кальскöтiс молоток. Илья Сергеевич висьталiс, что пугиновскöй кузнец

Софрон вермö лöсьöтны любöй сельскохозяйственнöй машина, ачыс дорö запаснöй часттез, а гортас осьтöма часовöй мастерскöй.

Улицаын лöзöтiс небытик луд, и председательскöй кокнитик экипаж дюттясьöмöн тарöвтчис дзик ковёр вылöт. Илья Сергеевич дугдывтöг висьтасис, мый бурыс эм эта бригадаын, ошкис отирöс, кöдна уджалiсö вын жалейттöг.

— Вот, босьтам кöть сiйö жö Софронсö. Лок татчö шондi петiкö, и верман кывны, кыдз кальскöтö молотокыс, лок сёрöн рытнас — бöра молотокыс кылö. Мукöдыс нельки норасьöны, что Софрон узьны оз сет. А кукурузасö миянлiсь эн на адззыв? Неважын только и петалiс, а джын метр сувда ни.

— Муыс бур, видно, — шыаси ме.

— Медбур му вылö садитiм. Назём кыскалiмö быд гектар вылö пятьдесят тоннаöн. Но не эта главнöйыс. Главнöйыс сыын, что отир миян кутчисис кукурузаыс бердö. А видзöтiн бы тэ, мый татöн вöлi, кöр первуись кöдзим этö культурасö и сiя эз шогмы. Колхозниккез чуть эз сёйö менö. «Медбур пашня торкин, а мый толкыс? Öтiк убыток! Тшыгйöн ли мый ли пондам овны эта кукуруза увья?» Судитны менö мöдiсö.

— Натьтö, разъяснительнöй удж сэк чулöтiн?

— Ковсис чулöтны. Ме унажыксö старайтчи не кыввезöн, а примеррезöн этö уджсö чулöтны. Кери быдöс сiдз, кыдз наука тшöктö. И отирыс казялiс: кукуруза — вын. Конечно, донöн эшö сувтö, но быдмö. Жагöник велаламö и сiйö вöдитны. Вот ме думайта...

Мый думайтiс председатель, кольччис загадкаöн. Сiя вдруг курччöвтiс кывсö, тэрмасьöмöн сувтöтiс вöвсö деревня шöрас и перыта чеччöвтiс телегаись. Сiя дыр эд видзöтiс куканьлань, кöда мирнöя йирсис луд вылас, и нем эз вермы горöтчыны. Мирнöй животнöй казялiс, что сы персонаöн интересуйтчö ачыс председатель, приветливöя лэбтiс юрсö и шыасис:

— Мэ-э-э!

— Адзза, что тэ, — отвечайтiс председатель. — Кöбы не тэ, дак эг бы и лэдзчы телегасим.

Илья Сергеевич нюжöтiс кыкнан кисö, манитiс куканёксö дынас и норовитiс кутны сiйö гöйтанöт. Но куканёк вдруг öддьöн перыта чеччöвтiс бокö, лэбтiс нятьöсь бöжоксö и зурасьöмöн чеччалiс осьта воротаö.

— Эй, кин татöн ловья эм? — горöтлiс öшын увтын Илья Сергеевич. — Ноко, петавлö минута кежö.

Воротаись петiс ыджыт мыгöра, важ кокошника да кузь дубаса старуха.

— Тiян куканёкыс?

— Миян, миян. Мезмöма страмеч дом вывсис, — шыасис старухаыс.

— Значит, дом вылын видзатö? Сайлалат колхоз шогья? Сiдз?

Старушка часто мигайтiс куньсьыны ни пондöтчöм синнэзöн и баитiс перыта-перыта:

— Мый тэ, мый тэ, кагу! Кытшöм сайлалöм? Сiйöн только и домавламö, медбы мамсö эз нимав.

— А мыля сiя гортын? Мыля не колхознöй фермаын? Мый, постановленнёсö не тiян понда примитiмö? Тöвнас, кöр договорресö гижим, Егорыт баитiс, бытьтö мöсыс тiян абу котрасьöма. Мыля сiя бöбöтiс миянöс?

Старушка эз öш, кöть председатель видзöтiс веськыта сы синнэзö и дзик баитiс: «Менö он бöбöт».

— Неважын токо йöвсялiс мöсным. Мыйнö, мыйнö... Майнас ни йöвсялiс. Думайтiмö, оз ни таво йöвным ло, а сiя то лоис жö. Баитö тай Егорушко: быдтам, шуö, куканёксö мöс вылö. Пöрисьöв, шуö, мамыс лоис.

Председатель вак-вак серöмтчис.

— Ай, пöрись, пöрись! И не стыд тэныт бöбöтчыны? Кин жö порозоксö мöс вылö быдтö? Адззылi эд поди, порозок сiя. Тэ мый, пöрисьувьят пороз йöв мöдан сёйны?

— Да вежны мöдiм нетелёк вылö...

— Висьталiн бы веськыта: петыр лун кежö мöдан начкывны. Сiдз эд?

Старушка шы эз сет паныт, а председатель баитiс ни öддьöн строгöя:

— Висьтав зонытлö, ась рытнас правленнеö вовлö. Сiдз и шу, председатель пö корис...

Старушка пырис оградаас, а Илья Сергеевич пуксис телегаö.

— Адззылiн, мый шогмö? — баитiс сiя. — Эшö тöвнас колхозниккез примитiсö постановленнё сетны куканёккесö быдтыны колхозлö, медбы бурсьöтны общественнöй ферма, отсавны тыртны обязательствонымöс. Сэк жö гижим быд колхозниккöт контрактационнöй договоррез, а Егорыс видзöт мый керö: лючки бöбöтöма миянöс. Ах, Егор, Егор! Не весь сiйö народыс Мутэйöн шуö — сё важсö соровтö.

Телега шумöн тарöвтчис керöс увтö, гымнитiс посок вылöт и недыр мыйись кежис вöроклань.

— Вон рас саяс и эм кукурузаным, — юöртiс Илья Сергеевич.

Чожа ме казялi öддьöн басöк картина. Ыб вылöт, кытöн вöлi двадцать, а может, и унажык гектар, нюжалiсö öт конецсянь мöд конецöдз ровнöй зелёнöй ряддэз. Эшö лажмытик, но паськыт ни листтэза быдмассэз пежьялiсö шондi увтын нежнöй переливвезöн и ыбыс вöлi дзик плакат вылö рисуйтöм чайнöй плантация. Таланись конецын шовкöтiс неыджыт колёснöй трактор, шупыта мунiс ыб пöлöн, и сы бöрын кольччисö тожö öддьöн веськыт бороздаэз — междурядиеэз. Кынымкö нывка ыбыс мöд ладорын кокасисö окучниккезöн, волькöтiсö бороздаэсö и, тыдалö, нетшкисö ёгтуруннэз. Нылöн ыджыт цветтэза платьеэз да сарафаннэз югьялiсö быдкодь рöмöн, и нывкаэз ылiсянь вачкисисö ловья букеттэз вылö.

— Малинник! — шуис председатель. — Нёльöт лун ни весöтöны кукурузасö. Бура уджалöны. Адззан, öтiк ёгтурун абу.

Ыб вылын былись эз вöв öтiк ёгтурунок.

Ми вöтiм тракторсö. Председатель öвтыштiс кинас трактористлö, и машина сувтiс. Ыджыт мыгöра вöснитик детина курни-верни лэдзчис сиденнё вылiсь.

— Но, кыдз делоэз?

— На мази, Илья Сергеевич, — шыасис детинаыс. — Талун готов лоас ыбыс.

Телега дынö локтiкö, зонка качайтчис быдöс вöснитик телонас, кыдз ва вылын шать, и ме кокнита вежöртi, что одзам не кин мöдiк, кыдз ачыс тöння гармонистыс, Надькалöн жöникыс. «Но и кудоба», — мелькнитiс дума. А кузь верзень сералöмöн баитiс:

— Настяыс, Кöкан Трöпимыслöн нылыс, кынöм висянöдз смешитiс миянöс. Локтiс асывнас татчö и но жö сказкаэз баитны. Эстöн, шуö, быдмас кукурузаыс, а вот сэтчин, — кузь верзень мыччалiс вöр ладорас, — нем, шуö, оз быдмы. И дзик быльнöй морт баитö...

— Сулав, сулав! — öмалiс председатель. — Тожö меным «быльнöй морт». А кин сiя тэнат думаöн, мыр? Мыля пö оз быдмы кукурузаыс?

— Сказкаэз баитö. Бытьтö муыс тшыкöма пö...

Нывкаэз казялiсö председательсö и сьылiсö эшö горöнжык, нежели тöн рытнас, дзик мöдiсö досадитны, но Илья Сергеевич и дзар сэсся эз кер нылань. Настя кык год ни велöтчис сельскохозяйственнöй техникумын, вöлi вежöра, скромнöй нывка и баитны кытшöмкö сказкаэз, медбы кузь верзень «сералiс кынöм висянöдз», конечно жö, эз бы понды. Трактористлöн юöр повзьöтiс председательсö.

— Мыйлö вовлiс татчö Настяыс?

— Да сiя и öнi татöн. Вон уджалö нывкаэзкöт...

— Ноко ветлам!

Председатель кузь шаггезöн, бороздаись бороздаö тальччалöмöн, веськыта мунiс сы ладорö, кытчö мыччалiс Петькаыс. Мунiкас сiя нетшкöвтiс öтiк за, видзöтiс вужсö, бергöтлiс сiдз и этадз и нельки нюкайтiс, кыдз цветокöс.

— Настенька! Ягöдтусиньöй, лок жö татчö! — чирзiс сiя.

Настя чапкис кисис окучник и котöртiс миянланьö. Талун пасьталöма сiя состöм платье, одзас öшöтöм запон. Медбы шондi эз сот чужöмсö, Настя лэдзöм чышьянсö чуть ли не синнэз вылö.

— Молодец, Настенька, молодец! — панталiс сiйö председатель. — Любита нiйö, кин колхозлö отсалö.

Настя видзöтiс бокö и невна гöрдöтiс.

— Ме и отсала мыйкö. Кукурузасö видзöтöм могись локтi.

— Но и кыдз?

— Быдмас, Илья Сергеевич. Если проволочник оз тшыкöт, зелёнöй массаыс уна öксяс. Только эм татöн öтiк участок, гектар мымда — тшыкöма.

— Кылi ни. Ноко мыччав!

Быдöнным петiмö межа вылö, паськыт шаггезöн оськалiм Настя бöрын. Öтiк местаын ыбыс клинöн пырöм расок коласö и, сы дынö сибалiкö, нывка мыччалiс кинас:

— Вот...

Илья Сергеевич тэрмасьöмöн нетшкöвтiс кынымкö за, бергöтлiс нiйö киас. Сылöн опытнöй синнэз казялiсö ни, что быдмассэз пондöмась нильзьыны, вужжес сьöдöтöмась, вевттисьöмась ва полёккезöн. Настя мыччалiс сiсьмыны пондöтчöм местаэсö и шуис:

— Техникумын баитiсö миянлö, что сiдз овлö ядовитöй му вылын.

— Ах тэ, чёрт!.. Да мый жö эта сэтшöмыс? Сiдз и тöд, юртöм морт кинкö уджалöм. Да эд кöртлöн закись сюрöма муас! Конечно! Закись и эм! Ноко, звеньевöй, — бергöтчис сiя трактористлань, — висьтав, кысь сэтчö торфсö кыскалiн?

— Вон, юыс сайись...

— Тулыснас? Тöвзьöттöг? Да тэ мый, бöбсялiн? Кин жö ядовитöй торфсö тöвзьöттöг ыб вылö кыскалö?

— Назёмыс етшаöв вöлi татöн...

— Назём вöлi етшаöв? А Ошпозъяинiсь мыля эн кыскав? Мыля агрономлiсь эн юав, мыля ме дынö эн вовлы?

Кузь верзень кваркышалiс синнэзöн и сулалiс кыдз öшöм. — Ме жö буржыка мöдi керны...

— Буржыка? Юрыт абу, дак керан буржыка. Тöвнас курссэз вылö тшöктi ветлыны, дак ветлiн? Нывкаэз сьöрын вöтлiсин, а велöтчыны эн и думайт. А ме, бöбöв, сетi тэныт звено. И кыдз тэ, каналья, быдöс ыбсö эн тшыкöт? Вöлi бы кукуруза.

Председатель гöгöртiс быдöс тшыкöтöм участоксö, летiс заэз, исследуйтiс нiйö и кыдз кужис, сiдз и видiс звеньевöйсö. Петька эз дорйы асьсö, а только пишкис нырнас. Да и мый сэтöн дорйисьны, кöр кругом виноват? Тöвнас иньдывлöмась сiйö курссэз вылö, но недель бöртi локтöм бöр: гажтöмтчöма гармонняыс понда. А курссэз вылын баитiсö, что мукöд нюрын торфыс овлö ядовитöй, мыля абу сэтöн кислород, и кöртлöн окись кислородтöг пöрö закисьö. Ыббез вылö кыскалöм одзын сэтшöм торфсö колö быдса год тöвзьöтны, медбы ядовитöй закисьыс воздух вылын бöр лоис окисьöн. Илья Сергеевич, конечно, тöдiс этö, и колхознöй агроном тöдiс, а кысь сымдасö тöдны Петькалö?

— Ах, Настенька, Настенька, — норасис нывкалö председатель. — Вот кытчöдз вайöтö невежествоным. Лок жö чожжык колхозаным, главнöй агрономöн тэнö пукта. А тэ, Петрован, гиж объяснительнöй записка и вай сiйö правленнёö. Тшыкöтiн тэ менчим настроеннёöс быдса неделя кежö.

Весь баитiс председатель, что тшыкис сылöн настроеннёыс быдса неделя кежö. Тырмöмви вöлi петны Пугин дынiсь ыббез вылö, кыдз сiя паськыта шыннялiс ни, гажöн дзарьялiс öтмöдöрö и баитiс:

— Шогдiыс, шогдiыс мый керö! Öтта, кыдз путриктö! Если шер оз вий, босьтам двадцать центнерöн.

Шогдi былись вöлi сöстöм да тшöк, дружнöя лöсьöтчис петны трубкаö и кöсйис богатöй урожай. Эта ыб вылö мöйму петкöтöмась назём да торф, коялöмась невна суперфосфат, и нянь быдмис ошшасьöмöн.

— Шер оз вий, дак тырамö няньнас.

Пугинын Илья Сергеевич эз вермы не кежны Софронлöн кузница дынö, кытöн паськыт тоша мужик кышалiс телега колесо вылö виль шина. Öт киас сiя видзис кузь клещи, а мöднас — ып да ып! — сöталiс молотокöн колесоыс кузя. Кузница ыбöс дынын, кöрт куча дынын, мыйкö гуддисис паськыт виззеза йöрнöса да кузь юрсиа зонка. Öтiк дзар керöмöн позис тöдны, что сiя неважын локтöма городiсь: йöрнöсыс моднöй, да и причёскаыс виль — «А ля Тарзан».

— Эй, Гриша! — горöтлiс председатель. — Тэнö разь попö городас велöтöны? Юрсиыт, видзöт жö, пеллетö вевттьöма.

— Не попö, Илья Сергеевич, а механикöн лоа, — гажöн отвечайтiс Гриша. — Адззан, косилка воча.

— Косилка? Металломись косилка мöдан керны? Эн ни весь мырсьы.

Илья Сергеевич пыралiс кузницаас, дзар керис быд пельöсö, ушкыштiс невна мехöн, сöтiс наковальня кузя молотокöн. Кальс! — шыасис молоток и чеччöвтiс кынымиськö кокнитика.

— Кыным телега кольччис лöсьöтны? — юалiс председатель.

— Куимö эшö кöмöтны колö, — отвечайтiс кузнец.

— Тэрмась, дружок. Вунданыс ныр вылö пуксьö ни. Вон рудзöгыс быгалöма. Жаткаэз готовöсь?

— Кöть талун жö доддяв.

— А тэ, Гриша, — горöтчис Илья Сергеевич зонкаыслö, — чапкин бы этö косилкасö. Отсав лучше телегаэсö вочны...

— Не ашын, дак мöдлун ытшкисьны пета, — увереннöя шуис Гришаыс и гаечнöй ключöн вились пырис косилка увтö.

Кузница дынiсь мунтöн ни ми кылiм, кыдз Софрон баитiс зоныслö:

— Кынымись ме шуи тэныт: шыр юртö, дак эн кывзы. Ачыс председатель казялiс, тьфу!

Председатель шыннялiс. Настроеннё сылöн лоис эшö буржык, кажитчö, совсем вунöтiс кузь верзеньлöн ошибка йылiсь. Но вот мыйкö усис тöдвылас и баитiс мечтайтöмöн.

— Эх, грамота учöтöв миян народлöн. Умöль годдэзö томмес городö мунiсö, Петька кодьöммес только и кольччисö. А кытшöм бы кокнит вöлi уджавны, если быд бригадирлöн вöлi специальнöй высшöй образованнё. Тыримö бы няньöн да яйöн.

— Мыйлö тэ объяснительнöйсö корин? — юалi ме.

— Ачым ог тöд бытшöмик. Колiс бы накажитны, да кыдз накажитан? Зонкаыс эд инициатива мöдöм мыччавны, бур дело керны думайтöма. Да грамотаыстöг петас разь мыйкö. Вот корла правленнёö, баитышта, мед велöтчыны мунö. Любитö сiя мусö, бур колхозникöн лоас.

— Вот и Гришаись, тыдалö, механик петас? А Настяыс! Тöн локтiс гортö, а талун уджалö ни, — шуи ме.

Председатель кыскис папироса, тарс-тарс керис портсигар бердö, шуис довольнöя:

— Народ миян золотöй. Том йöзыс смелöя кутчисьö удж бердö, крепытжыка сувтö муыс вылö. Чулалас кынымкö год и асланым лоасö механиккез, агрономмез, инженеррез, высшöй образованнёöн бригадиррез.

Илья Сергеевич öзтiс папиросасö.

Меным охота вöлi баитыштны Кривöй Матрен йылiсь, но бура вердöм жеребец котöртiс öддьöнöв чожа, и ми казявтöг петiмö видз вылö, кытöн пажнайтiсö ытшкисиссез. Председатель гажöна здоровайтчис ныкöт:

— Бур лун тiянлö, инькаэз! Кыдз аппетитныт?

— Шедан, дак тэнö сёям! — шыасисö кынымкö инька. И сразу öтмöдöрсянь пондiсö киссьыны вопроссэз:

— Мыля миянлö косилка эн сет? Сё важмоз гогнасям!

— Ытшкисьны ли одзлань? Куртны оз ештö. Медбы эз жö кошенинаным зэр увтö сюр...

— Мый керсьö Туланöскöйын?

Илья Сергеевич кывзiс вопроссэсö, гогинялiс юрöн и, кöр инькаэз дугдiсö горöтлыны, жагöник лэдзчис телегасис, сiдз жö не тэрмасьöмöн кок нырнас чукöртiс вöв одзö турун, вöлись локтiс инькаэз дынö. Эта морт велалöма ни видзны асьсö отир коласын, действуйтiс увереннöя:

— Косилка тiянлö эг сет сiйöн, мыля кöчкаа видз вылын оз мун — жугалö. — Сэсся дзар керис шондi вылö и баитiс одзлань: — Ытшкисьны, Парась, колö и одзлань — зэр талун оз ло, ашын позяс содтыны куртiссесö, и нiя вöтасö тiянöс. Мый керсьö Туланöскöйын? Машинаэз мунöны бура. Недель бöртi сэтчин ытшкиссяс, бригада локтас Кондовник дынö. Быдöс?

— Быдöс. Лок пуксьы, сёй миянкöт.

Илья Сергеевич висьталiс, что асывнас сёйис куим дюжина блин и кынöмыс öнi сё эшö чорыт, кыдз галя.

— Мыччалö лучше, кытöн тiян Егор, — тшöктiс сiя. — Эз ли чериавны мун?

Гöгрöса чужöма инька, кöдö шуисö Парасьнас, вöлöма татöн групповодкаöн. Сiя не тэрмасьöмöн сёйис öмсис быдöс и мыччалiс кусттэзлань:

— Вон узьö ни...

Öддьöн тшöк баддяинö вöлi татшкисьöма морт. Миянлö сiя эз тыдав, только коккес чуй видзисö кусттэс увтсянь, кöдна сьöртi и позис тöдны, что узьö сэтöн кинкö богатырь кодь: нинкöммеыс вöлiсö только невна разь учöтжыкöсь тшак ваялан пестеррезся. Председатель локтiс эна коккез дынö, сапог нырнас размöд вöрзьöтiс нинкöммесö да горöтчис:

— Эй, Егорушко! Чеччы жö, зонка, баитыштны колö. Кусттэз павтыртчисö öтмöдöрö, и недыр мыйись петiс саженься ыджытжык, паськыт да ён пельпоннэза мужик. Сылöн дöраовöй запон да бырöм пидзöссэза вешьян вöлiсö куш турунчир, пашмöм юрсиыс и щетина кодь тошыс тожö вевттисьöмась турунöн. Егор размöд осьтлiс öмсö, тулис синнэсö кулакöн, сэсся жагöник пыркöтiс паськöмсö да сыналiс юрсö чуннезнас.

— Пыравлы жö, зонка, рытнас правленнёö, басни эм, — висьталiс председатель.

Егор нёджжöвтiс сы вылö беспокойнöй синоккезöн, малыштiс тошсö.

— Ох, тöда ни, Илья Сергеевич, мыйлö тэ коран, — голос Егорлöн вöлi кыз, шыэз петiсö дзик не мороссис, а пустöй кöньöсiсь — бу-бу-бу.

— Если тöдан, то и баитны нем. Вашöт, дружок, куканёктö талун жö фермаö. Вежöртiн?

— Кыдз не вежöртны, не шульга кокöн несъя...

Инькаэз горöн сералiсö мымда прок, а Егор лöсьöтчис вились пырны кусттэз коласö. Ме видзöтi сы вылö и думайтi: эмöсь эшö миян ладорын богатыррез. Сет эта мортлö зор да висьтав: «Пизьды!» — и сiя öтнас репöтас быдса деревня. Сёрöнжык ме кылi, что олö сiя богатöя, паськöм эм тырдоз, а бырöм вешьянсö новйö только сiйöн, мыля скупöй — жаль кышавны вильсö.

Егорыс ответöн председатель кольччис öддьöн довольнöй и мунiс пешлыны зороддэз. Локтас зород дынö, гöгöртас сiйö, дзарнитас вывлань, сэсся сюйыштас кисö турунас, нюкайтас быдöс — оз я пöд? — и мунö одзлань. Ме сувтчи öтiк важ остожья дынö, кытöн лысöй юра старик, ён и гöрд, кыдз помидор, сувтöтлiс стожаррез.

— Уджалан, деда?

— Кытчö нö воштiсян, кынöм сималö да... — шыасис сiя.

Старик сувтöтiс стожарсö и пуксис шоччисьны.

— Шогала öнi, а уджавны колö. Зоннэзö пышшисö колхозсис, деньга озö иньдалö. Кила менам кöркö петавлiс, а сё вот уджала. Вот, кыдз тэ думайтан, петас öнi килаö али оз?

— А кыдз тэ ачыт думайтан?

Наивнöй старичок дыр эз шу нем, пукалiс осьта öмöн, гыжьялiс юрбöрсö. Только дыр мыйись горöтчис:

— Да мый думайтны? Пантасис талун асывнас öтiк инька, дак шуö, кила петас, кор пö правленнёсянь пензия, эн уджав сэсся.

— Этö не Кривöй ли Матрен?

Старик öшöтiс юрсö. Вöлi сiя вына и здоровöй, немымда эз вачкись сэтшöм дед вылö, кöдалöн уджсянь петiс бы кила, но Кривöй Матрен повзьöтöма начöдз: видзöтiс мир вылö гажтöма, дзик нырыштiс сiйö ыджыт галя, лолалiс сьöкыта.

— Ох-хо-хо, греххез, греххез, — бобгис ныр увтас.

Ошпозъяинö гöниттöн ме баитi председательлö:

— Старичоксö вон Кривöй Матрен кувтöдз повзьöтöма: кила пö петас...

— Но-о!

— Вон, чуть оз горзы.

Ме думайтi, что эта юöр тшыкöтас Илья Сергеевичлiсь настроеннёсö, а шогмис совсем мöднёж. Председатель сералiс, кыдз вермö серавны только здоровöй морт, нюжласьöмöн да заразительнöя, и шувлiс:

— Кила пö петас? Ах, кынöм висян, кынöм висян! Эта морт, кöда готов вöлi гöйтанöт кутны Пугинас куканёкöс, кöда порсь фермаын кужис лыддьыны каждöй грамм, кöдалöн быд курöжок понда висис сьöлöмыс, тыдалö, некöр абу и думайтöма отир коласын идеологическöй удж йылiсь.

— Кривöй Матреныс деревняас кагаэз пыртö, — бöра шыаси ме и юöртi быдöс, мый адззылi ни Ошпозъяинын.

— Тöда, дружок. Ачым не слепöй. Но честнöя висьтала, ог тöд, кöда ладорсянь кутчисьны кикимораыс бердö. Вашöтны мöдi деревнясис, дак прокурор паныт лоис — оз пö туй. А мый сэсся керан?

— Кыдз этö мый? Лекцияэз колö лыддьöтны отирыслö, кино мыччавны. Ачыт шуан — отирыс татöн золотöй, а енлö юрбитöны.

— Уна ли юрбитöны? Кык-куим — и быдöс.

— Бочка ма тшыкöтны не уна дьöгöдьыс колö. Председатель дивуйтчöмöн видзöтiс ме вылö, тыдалö, думайтiс, мый мекöт керны: вашöтны телегасис нето терпитыштны эшö.

— Адззылöмат, кыдз кык ылöстöм старушка енлö юрбитöмась, и керан политическöй выводдэз. Да сьöвзьы тэ ны вылö, долытжык лоас. Ыджыт беда, если кытшöмкö инька кага пыртас — сöстöмжык кагаокыс лоас — и только.

— Массово-политическöй уджсö колö сёжö чулöтны...

— Ме и чулöта сiйö, только не кыввезöн. Вон пессям яй да нянь понда, быд год ыджытжык доходдэз получайтам. Эта — и массово-политическöй и агитационнöй удж.

— Правильно, конечно. Но яйыс да няньыс понда кöркö и кулак пессис, а сознаннёыс сылöн вöлi капиталистическöй. Ме верма шуны, что тiян колхозын мукöддэс озö и тöдö, мыйлö öнi колö унажык яйыс да няньыс. Сэтчö жö, öтiк яйöн да няньöн коммунизмсö он строит.

— Öтта, кытчö тэ сразу — коммунизм! А мый баитöны философфез? «Бытие определяйтö сознаннёсö». Вежöртiн? Бы-ти-е! Вот кыдз. Лоас миян тырмöмви быдöс — кысь тэ сэсся кикимораэсö адззылан?

— Тэ моз лоö — Кривöй Матренлöн сознаннёыс лэбас стихийнöя? Да эд сiя öнi ни пöт. И паськöмыс, кывсьö, неетша, а мыля нö енлö юрбитö?

— Тырмас тэныт кикимораыс йылiсь. Вунöт сiйö. Председатель кунис синнэсö, öшöтiс юрсö. Сiя керис вид, что шоччисьö. Меным охота вöлi эшö споритыштны, лöсьöтчи ни вöлi мыйкö шуны, но Илья Сергеевич вдруг треситыштiс юрсö и öвтыштiс кинас:

— Ыджыт эта вопросыс. И не талун разрешитны сiйö. Мöдiк дело спокой оз сет: не талун дак ашын вундыны колö петны, а миян горючöй абу. Значит, бöра посадö мун, зырт сэтчин пороггез, кöть гортын делоэс — шоччисьны некöр.

Жеребец шупыта пырис деревняö, и Илья Сергеевич сюйыштiс меным кисö:

— Ладно, адззисьлытöдз...

Ладно дак ладно. Ме — отпускник. Локтi татчö не председателькöт споритны. Вот кайла Чöвпан вылö, видзöтышта мирсö и мый адззыла — гижа тетрадям...

Дата добавления: 2015-11-16