Трöпимика веськалiс

Эз юась Кöкан Трöпим аслас инь йылiсь нем, а колiс бы. Марфа Демидовна сё эшö шогалiс, важмоз куйлiс кроватьын и нельки ойзыны дугдöм — бырöма етшыс. Ми мöдiмö Васькакöт невна сёйыштны, но кытшöм ни сэтöн сёйöм, кöр сiйö и видзöт: керкуын покойник лоас. Жаль вöлi Марфа Демидовнаöс, да мыйöн отсалан — фельдшерицаöс корны эз тшöкты, а святöй молитваэсö ми Васькакöт, конечно, эгö тöдö. Миянлö только сiя и кольччис керны, кыдз гусьöн пырны амбарö да невна шоччисьыштны свежöй турун вылын. Но не быдöс шогмö сiдз, кыдз думайтан. Марфа Демидовна вöлöма öддьöн полiсь мортöн и, медбы амбарас эз пыравлы вор, миянтöг игналöма сiйö бытшöма: ыбöс вылас öшалiс вöв юр ыжда замок. Öтнас ен тöдö, кыдз шогалiсь инька вермис петавны öтöрöдз да кышавны пробойезö сыыжда замоксö.

Водiм ми Васькакöт посöдзö, кытöн Кöкан Трöпимлöн вöлi ольпась. Медбы ойнас эз курччасьö номмез, Трöпим öшöтöма ольпасьыс весьтö öн, керöма шатёр. Öн увтын вöлi ыркыт, и ме радöн нюжöтi мыдз коккезöс. Васька онмöссис сразу, кыдз только юрыс павкис подушка бердö, пишкис нырнас, а ме думайтi деревенскöй олан йылiсь, анализируйтi сiйö, мый адззылi ни. Кöть пернаа нывка и дзуглiс асывнас настроеннёöс, кöть и часто усявлiс тöдвылö Кривöй Матрен, кöть адззылi, кыдз косялiс вижлоксö Макась Домна, — ме кери сёжö вывод, что шоччисьны гожумнас сельскöй местаын öддьöн бур дело. Городын öнi бус, немöн лолавны, а татöн быдлаын лöзöтö турун, шушкöтчö настоящöй тайга, путриктöмöн быдмöны сюэз, больгöмöн визывтö Вильва. Нет, не весь ме локтi Ошпозъяинö!

Ошпозъяин йылiсь думайтiкö, мöда ни вöлi онмöссьыны, кыдз эта кадö кинкö маласьöмöн и ружтöмöн пондiс кайны посöдзö. Кин сiя? Может, Кöкан Трöпимлö усис тöдвылас шогалiсь иньыс и сiя локтiс гортö? Нет, не сiя. Трöпим пырис бы сразу, а эта кинкö гыжьясис, кыдз кань, слепöй моз кошшис ыбöс вугсö. Сёжö недыр мыйись жолькнитiс иган, и невна лэбтыштöм öн дор увтöт ме казялi ыбöссис Кривöй Матренöс. Тöн сы коккезын вöлiсö бырöм нинкöммез, вывтас нёштöм йöрнöс-дубас, а талун кöмалöма виль небытик чушниэз, пасьталöма набойнöй дöраись дубас, гöрд кофта, юр вылас пуктöма басöк чышьян. Ме только бельмоа синыс сьöртi и тöдi, что посöдзас — Кривöй Матрен. Сiя паськыта пернапасасис, бедьсö сувтöтiс пельöсö да ойзöмöн пырис керкуö. Сэтчин дзуркнитiс пуовöй кровать, кылiс Марфа Демидовналöн слабöй ойнитöм.

Медбы эзжык ло жар куйлыны кроватьын, керку ыбöссö Марфа Демидовна кольöма вöлi осьтöн, и öнi охота вöлi или эз, а ковсис невольнöя кывны быдöс, мый керсис и мый баитчис керкуас.

— Христос тэкöт, Марфушка, бöра, некö, шогалан? — юалiс Матрен.

Менам хозяйка бергöтчис, кылö, бок вылас и баитiс нюжвыла:

— Ой, матушка тэ менам... Локтiн жö бöра? Öдва ни тэнö видзчися, сiдз сьöлöмö и косьмö. Пондi вот шогавны, быдлаын висьö, ловзисьны ог вермы. Ох-хо-хо, смертiньöй, тыдалö, локтö...

— Мыйсянь жö бöра эта пöрöсыс кутчисис, Марфушка?

— А сiдз, видно, ен-батюшкоыслö ковсис, ох-хо-хо... Тöн ни юрö висис, тöн ни места эг адззы, и рытнас жö, эг эшö онмöссьыны вермы, вöтаси. Öддьöн нёштöма вöтаси...

— Дугды, дугды, эн бöрд, Марфушка. Умöля юрбитiн рытнас, сiйöн и вöтасин. Поди, мужикыт йылiсь думайтiн молитвасö лыддьöттöн да?

— Мый тэ, мый тэ, матушка! Кытшöм дума лоас мужикö йылiсь. И тöдвылын эз вöв. Нывкажугö вöтö уськöтчис. Пукалö бытьтö этадз гажтöма-гажтöма, видзöтö ме вылö и шы оз сет. Сэсся кыдз öдззас горзыны, кыдз пондас причитайтны — бурöтны оз позь. «Мый нö, мыся, тэкöт, нылiньöй, лоис? Мыля сiдз горзан?» Сiя эшö курытжыка горзö, эшö ёнжыка синваэсö кисьтö. О господи, господи. Дзарнитi ме кынöмыс вылö и шай-пай лои... — Марфа Демидовна эна кыввез бöрын öдззис сыркьявны, пондiс бöрдны, мыктавны: — Ох-хо-хо, сьöктöма бытьтö. Сэтöн менö и кутiс умöльыс, сэтöн и уси киись-кокись. Эд лунтыр тöн видзчиси нывкаöс, лунтыр маитчис сы понда сьöлöмö, дзик кылiс умöльсö...

— Дугды, дугды, Марфушка. Быдöс бур лоас. Вот лыддьöтышта молитва, кеймисьышта святöй Сергалö и нöбöтас сiя синватö да печальтö боки. Святöй Серга оз лэдз нылытлö керны нёштöм делосö, — спокойнöя баитiс Матрен. — А мöдöтпыр пондан водны, дак юрбит еныслö буржыка, оз лöсяв молитватöг...

Эна кыввез бöрын сiя шупыта петiс посöдзö, кöшöн гумыштiс кöньöсiсь ва и, порог вылын сулалiкö, минута дырна шушкис кöшас и пöлялiс сэтчö. Сэсся пырис керкуö и куимись брызгайтiс шогалiсьсö и, кылö, тшöктiс окавны ен. Брызгайтiс сiя сiдз жö, кыдз мукöд инька брызгайтö вомдзасьöм кагаöс. И, веськыта висьтавны, керис чудо: перво дзуркнитiс пуовöй кровать, сэсся мутшнитiсö джодж плахаэз — этö Марфа Демидовна сувтiс кок йылö!

— Ох, енiньöй тэ менам, батюшко! Ох, святöй угодник! Отсалiс эд! Дзик кинас шогöс босьтiс, видзöт, долыт лоис!

— Тырмас, тырмас, Марфушка! Оз лöсяв дивуйтчыны, лыддьöт лучше молитва, — довольнöй голосöн баитiс Кривöй Матрен и пуксис лабичö.

«Лоас комедия», — висьталiс асывнас Васька. Умöля сiя тöдiс, тыдалö, мый сэтшöм комедияыс. Эта «комедиясянь» охота вöлi сьöласьны, чожжык петны öн увтiсь и мунны кытчöкö ылöжык. Ме каитчи ни, что одзöв локтi гортö. Ветлöтi бы öнi видз вылын нето кыйи чери, а эстöн куйлы, кыдз йöз шогья дзебсисьöм вор. Петны öн увтiсь, конечно, эз туй — Кривöй Матрен и Марфа Демидовна повзисö бы кувтöдз. Кылi ни, Кривöй Матрен öддьöн полö быд торсис, сiдз кыдз керö нятьöсь дело. Вот и öнi баитö сiя:

— Эд колiс жö айытлö вöтны менö! Эшö вичкуын попыс висьталiс: тэ, шуö, Матренушка, эн шед некинлö, кер быдöс гусьöнжык, недобрöй йöз син сайын. А ме туй вылас жö чуть только эг шед. Котомкаам эд менам святöй крест вöлi... Загрек, председатель — мырддис бы сiйö...

— Ужо, ме баитышта айöкöт, — кöсйис Марфа Демидовна. — Висьтала öтiк кыв. Стыд сылöн абу.

Кривöй Матрен öддьöн подробнöя висьтасис, кыдз сiя ветлiс вичкуö (сто верстася унажык сэтчинöдз), мый адззылiс туй вылас, кытшöм отиркöт пантасьлiс.

— Мыччалi ме сэтчин ваоксö öтiк тöдiсьлö, дак öддьöн ошкис. Святöй пö ваыс, шогöттэз пö веськöтны туйö. Тэ, шуö, миссьöт синоктö — и адззыны пондан. Быдöс ключыс пö святöй...

— То тай, то тай, — рад голосöн шыасис Марфа Демидовна, — поди, и менö веськöтас да... Тэ, матушка, уж старайтчы, а ми ог вунöтö тэнö...

Марфа Демидовна (бытьтö некöр эз и шогавлы) чылöмöн ветлöтiс керкуас, жольöтiс комын бекöрпаньöн, петавлiс размöд гуö и пыртiс сметана да йöв, таган вылын жаритiс кольттез да чери, шöралiс нянь.

— Вот беда, вот беда, — баитiс сiя. — Мыйöн жö ме гöститöта тэнö? Горöс талун эг лонт, дак и пызан вылö вайны нем.

— Эн кошшись ме понда, Марфушка. Уна ли меным колö? Кöс нянь солалышта, кера няп-няп — и пöт, — скромничайтiс Матрен.

Хозяйка эшö петавлiс гуö, пыртiс туисын кытшöмкö юан, сэсся джын час мымда юрбитiсö енлö и вöлись пуксисö пызан сайö.

Кривöй Матрен висьтасис:

― Мöдi асывнас тэ дынö пыравлыны, да эг ешты.

Вовлiс ойнас Пугинiсь Егорика, кагаоксö пыртны тшöктiс.

— То тай, то тай, — шыасис хозяйка. — Мыйкö бöра сетiс жö?

― Сетiс. Кык аршин дöраок вундыштöм да туисам матор кисьтöма.

— Етшаöв жö дöраоксö сетöм...

― Тырмас и сiя, Марфушка. Мыйлö меным унасö, кинлö копитны? Ен понда му вылас ола. Баитö тай вöлi и Домна нылыслiсь кагаоксö пыртны, да оз пö Надькаыс соглассёсö сет. Вартлöма ни Домнаыс, а нылыс тарсасьö эшö. Яслиын пö кагаоксö видзö.

― Вот эшö, кобыла! — лöгасис Марфа Демидовна. — Öштöма стыдсö. Колö спасибо висьтавны, а сiя тарсасьö. Домнаыс ась жö кагасö гортас корö, гусьöн пыртiм бы...

— Оз лысьт эшö. Да и меным думайтны колö. Медбы эз жö кывсьы, Марфушка.

Сёйис Кривöй Матрен ыджыт аппетитöн, кöть баитiс, что олö кöс нянь вылын. Сiя лэбтiс быдса бекöр сметана, ошкöмöн сёйис жаритöм кольттез, няжйис луккез, вильöтiс чери. Хозяйка мыччис сылö туиссö.

— Ю жö, матушка. Суслотор видзи натодиль тэ понда...

И кыссис быдöс эта öддьöн дыр. Ме чувствуйтi ачымöс совсем ни умöля, быд вынiсь старайтчи онмöссьыны, Думайтны природа йылiсь, касьтывны интереснöй случайез, но нем эз отсав. Сэтчö жö охота вöлi несйыны, кашляйтны и, медбы не шыасьны, примитi ыджыт мукаэз.

Чожа саймис Васька и пондiс бергавны. Ме чувйыштi сылö бокас.

— Эн шумит...

— Мый, комедия?

— Сiя.

Керкуын сё эшö кылiс, кыдз тарскöтiсö бекöр бердö паннез, кыдз ыджыт гульккезöн, вöв моз, Кривöй Матрен юис сусло и дугдывтöг сярзис-баитiс. Хозяйка, кылö, осьтлiс коробья и мыйкö сетiс аслас гöстялö, мый понда получитiс ыджыт благодарность. Сэсся ме адззылi, кыдз Кривöй Матрен ружтöмöн и ойзöмöн, виль чушниэзнас кышöтöмöн петiс керкусис, маласьöмöн лэдзчис посöдзсис. Марфа Демидовна кольлалiс сiйö ворота сайöдз, кöсйисис ашын вовлыны Матреныс ордö гöститны. Сэсся сiя пырис гортас, дзимлялiс пызан вылiсь и водiс кроватьö.

Нервнöй припадок бöрын морт онмöссьö чожа. Кынымкö минута бöртi кылiс ни, кыдз Марфа Демидовна пишкис ныргорöн, узис праведниклöн крепыт онöн. Ми Васькакöт чожжык петiмö öн увтсис, босьтiмö сьöрö нянь и лэдзчимö берег дорö кыйны спиннингöн щукаэз.

Дата добавления: 2015-11-16