|
Читайте также: |
Ветеринарнöйын Чикалякалiсь бордсö мыйöнкö мавтiсö да каттисö бинтöн, и чаркиа акань саймис. Саймис, морток моз сувтiс пызан вылас, кытöн куйлiс, видзöт керис ас гöгöрас да горöтчис:
— Ме бы муна папö дынö.
Тоша фельдшер лöсьöтчис керны укол и, то ли сысянь, что кайыс ловзис, то ли сысянь, что борда клиентыс баитö, горöтыштiс:
— Да тэ тай быдса чудо! Сэк висьтав: кыдз шуöны, кыным год, кытöн олан?
— Корö папöс — Канин Шураöс, сiя висьталас. Старуха юалiс:
— Кытöн олö Шураыс? Пионерлагеряс?
— Сэтчин. Сiйö Вабай кутiс, вартлыны мöдö.
— Кытшöм Вабай?
— Умöль тётя. Менö вийны кутчылiс, вот и шогала.
— Лоан здоров, вай только укол керам.
— Укол? Кöда емöн то этчö — тюк?! — Чикаляка лапаокнас тюкнитiс бöрпонас.
— Эккк! — И чорыта шуис: — Бытшкö папö лядьвейö.
Висьталiс сiдз — да пышшыны. И джоджö чеччöвтiкö бöжнас кышалiс кытшöмкö посуда. Сiя усис джоджас, рез-паз жугалiс.
Этасянь Чикаляка эшö öддьöнжык повзис и — осьта ыбöсö!
— Берт ноко, Канин пиян! — ыксö фельдшер. Кытшöм ни сэтöн бертöм, кöр тэнö емöн видзчисьöны!
— Сулав, сулав! — корö старуха.
Кытчö тэ!
Кöть и бордыс зубыт да мешайтö котöртны, но Чикаляка эз сувтчы, эз берт.
Старуха уськöтчис Чикаляка сьöрö.
Ветфельдшер, ёма шприцöн киас — старуха сьöрö.
А нылö паныт — кузь инька да овчарка пон, кöдалöн бöжыс каттьöма гöрд чышьянöн.
Вежöртiс кузь инька, что мöдö аркмыны умöль дело (шприцас, конечно, яд!) и рякöстiс тоша мужикыс вылö:
— Тэ мый керан, злодей?!
И кышалiс сьöд очкиэз, кöдна морос вылас öшалiсö. И пон кöвсö сiдз кöстiс, бытьтö сылöн пистолет. И лоис страшнöй-страшнöй!
И ветфельдшер сувтчис, нельки киэсö вывлань лэбтiс да шприцсис лекарствосö чижгис старухаыс вылö, кöда сулалiс одзас.
— Мый эта лоö? Эшö лöгöнжык юалiс кузь инькаыс, и старуха висьталiс:
— Укол мöдiс керны, да эз ешты.
— Пышшис, — содтiс ветфельдшер.
— Ветеринарнöйын — и мортлö укол? — ыждöтiс голоссö кузь инька. — Этö кöрсянь сiдз лоис?
— Да тi мый? — öбида пыр шуис ветфельдшер да лэдзис киэсö. — Не старухаыс пышшис, а сылöн кай.
— Кай не кай, а ловья акань, — вежöртöтiс старуха. — Кутны бы колö. — И кытсöвтiс: — Öй, Канин пиян, тэ кытöн?!
Ветпункт одзас асфальт, и ёгтор некытöн абу, а Чикаляка оз тыдав сэтöн. Сiдзкö, керку саяс котöртiс.
Сэтчö гöрд бöжа поныс нюкайтчыны пондiс, и старуха висьталiс:
— Поныс оз я кыв акань дуксö? Ноко, ась кошшö!
А кузь инькаытлö мый? Ась кошшö! Аслыс охота жö ловья аканьсö адззывны. Ветфельдшер пырис керкуас, а мöддэсö овчарка нуöтiс керку бöрас. А сэтчин кытшöмкö склад, сы дынсянь пöльтö нечöскыт дук. И поныс одзлань эз мун. Кытчö тэ мунан, кöр ныр вужтö дукыс пиньöвтö? А Чикаляка пырис ящиккез сайö да оз и чушыкты. Старуха бöбöтлö сiйö.
— Кага, пет ме дынö. Ме тэнö чиньöн верда и вöлись мунам гортö, папыт дынö!.. Кыдз инö сiйö шуöны?
Чикаляка öмсö ни осьтлiс, медбы висьтавны папыслiсь нимсö, да вежöртiс: колö чöвны, а то укол керасö.
— Пет жö, кага, пет. Ме чинь тэныт сета, да столовöйö ветлам! Мый сэтшöм чинь, Чикаляка эз тöд, а столовöй — этö бу-ур!
И мöдiс бергöтчыны да видзöтны, эм я фельдшерыс. Кыдз абу, дак петны и мунны столовöйö.
Но бергöтчыны эз вермы: кыдз вöрзьöтчас, сiдз зубытыс и сидзö бордас. Да и бергöтчынытö оз позь, öддьöн дзескыт.
«Ой, ой, сибдi тай! Не петны öтнамлö лоас!» — вежöртiс Чикаляка да и шыасис:
— Ме пета... Пета ме, только отсалö! Но отсалiссес матын эз ни вöлö.
А эта кадö...
Дата добавления: 2015-11-16; просмотров: 68 | Нарушение авторских прав
| <== предыдущая страница | | | следующая страница ==> |
| Мый и керсьö! | | | Канин Шура вермасьö аскöттяс |