Ылын, öддьöн ылын Азар дедлöн пасекаыс — вöр пыдöсас. Но сiя местасö ачыс бöрйис и тöдö: кöть ылын, да бур — и мошшеслö эм кытöн öктiсьны, и мошвидзисьыслö гажа.
Медбы шедны пасекаö деревнясянь, перво колö мунны ыббезöт, сэсся шутёммез кузя вöркерасöдз. Эссянь сук вöрö пырö векнитик туёк. Ежели мунны сэтi, то петан палёжö, кытöн гожумбытöн красуйтчö Азар.
Вöрыс сотчывлöма важын ни, и öнi сэтöн путриктö-быдмö ситурун, шыранькытш, кипрей, пыштурун, жельнöг да малинник. Сэтöн жö шочыника пантасьлöны кыдзоккез, нинпуэз да ыджыт листа томыник пипуоккез. А ловпуэз, рябина да сэтöрник поздiсьöны шор дорас, кытöн ыркытжык, да муыс небытжык.
Кöр косьмисö ни тулысся цветтэз да путшалiсö гожсяöсь, Азар дед босьтiс медодзза ма. Эта маыс — тулысся цветтэзiсь, сiя веськöтö быдкодь шогöттэз. Босьтiс только öтiк чуркаись, медбы тöдны, кытшöм урожай лоас таво, и öшис радсяняс: уна лоас, öткöн эстöн нем он кер. И шуис сэк аслыс: «Вай-ко ме гортö лэдзчыла да отсалiсьöс бригадирлiсь кора. И флягаэз унажык кайöта».
Босьтiс сiя маöн туисок, коскас сюйыштiс чер и рытся ыркыт кузя верзьöмöн иньдöтчис гортланяс. Вöлокыс абу ни том, но чож, и Азар дед надейтчис пемытöдззас вöрсис петны.
— Петам эд, Мурöм? — юалiс вöлыслiсь. Вöлыс несйис, и старик гажöн горöтчис:
— Но вот, бур туй оссяс миянлö... Тэ кокнит неса.
Только ештiс саясьны керкуокыс, а вöлыс мыйкö пондiс чуклясьны да мугсис.
— Тэ мый, Мурöм? — кöритöмöн горöтчис Азар дед и вöрзьöтiс поводсö. — Туйным миян кузь, давай тэрмась.
Вöлыс пырснитiс нырнас, бергöтiс юрсö йывтöм пулань, кöда гöгöр быдмöны льöмпуэз да нинпуэз.
Азар дедлöн отиркöт басниыс аркмывлiс зэлыта, а подакöт да аслас мошшезкöт сiя лунтыр вермис сюльтыртны. Вот и эстöн мошвидзись лапкöтыштiс вöлыслiсь голясö, ласкова шуис:
— Мыйись нö повзин? Мун давай, мун, кывзiсь менам. Видзöт, шондiыс лэдзчö ни, а мийö джын верста мунiм.
Но вöлыс эз мун. Сiя эшö öддьöнжык пондiс пырскайтны и вешшис бöрлань. Сэк старик чеччис, кутчис кыскыны поводöт. Мурöм пыкöтасис коккезнас, öвтiс юрнас.
— Эн пов, менам кывзiсь, эн пов, — лöньсьöтiс сiйö Азар дед. — Этö орда сэтöн орсö. Адззывлiн эд сiйö: ур кодь жö, только спинаыс сьöд виззя... Тöда ме сiйö, бöб кульöс! Вот адззылан, часöт пондас чушьявны-пышьявны. Кагаоккез сылöн эстöн, дак ны понда тöждö. И тэ эн пов сыись, сiя...
Сэтöн макерись тупкис öмсö: льöмпуэс коласiсь быгыльтiс-петiс ош, чатыртiс юрсö да пондiс вишкыны-нюкайтны русö. Вöлыс рып-рып гöрöвтыштiс да öдззис жöдзны, дзик йöктiс.
Ошыс пуксис туй вылас да векыштiс öмсö. Голя вывсис гöныс сувтiс, синнэс югйöвтiсö лöг биоккезöн.
Старикыс повзьыштiс: оз я мöд гыжьясьны? Зэлытжыка пуктiс фуражкасö, кутчис чер ороп бердö.
Весь повзис сiя: ошыс пукалiс-керис да тушмыльтчис туй шöрас, нюжöтчис, но син вывсис эз лэдз мортсö да вöвсö.
Куйлыштiс сiдз öт бок вылас, гыжьялыштiс пель гöгöрсö да бергöтчис мöд бок вылас.
Шытöг, вöрзьöтчытöг сулалiс Азар дед и думайтiс, мый öнi керны. Кывлiс сiя, что эмöсь сэтшöм ошшез, кöдна любитöны орсыштны морткöт. Пантасин кö сэтшöмыскöт, дак эн думайт мыйкö шуны сылö, эн макнитчы сы вылö, а то нöитас, кыдз кужас: и боккетö нямралас, и мышкат тэчас.
Эз ешты решитны, мый одзлань сылö керны: ошыс сувтiс кык кок йылö да басöка гöгöртыштiс кöчкаок, дзик йöктiсь старик тапикасис. Да и öмнас мыйкö вöрöтыштлiс, бытьтö, кыдз и йöктiсь жö, мöдiс прибаутка пондöтны.
Сэсся казялiс гöна кок валёжина дорись кöдзывкар и вугралiс-мунiс сы дынö да паськöтiс сiйö.
«Но висьтав: не хулиган я? — думанас видiс сiйö старик. — Оз тай ровно бы мешайтчы сiя...»
Паськöтiс чукöрсö, кыскис сыись сiсь путор да чапкис бокö и, мортыс вылö дзарьялiкö, пондiс нювны лапасö. Нюлiс и, тыдалö, чöскытсяняс шочыника куньлiс синнэсö да чавкöтiс öмнас.
Сэк Азар кутчис стыдитны ошсö:
— Кывзы жö, гöна вапсыр, дугды ыжмавны, сет миянлö туйсö.
Поперёшнöй ош мунiс кöдзывкар дынсис и, дзик нарошно, пуксис туй шöрас. Сылö, тыдалö, гленитчис старикыслöн голосыс, и ошыс осьтыштiс öмсö да дзик и дзик шынньöвтiс, а сэсся бöра пондiс гуддьыны кокнас пель сайсö.
— Лэдз, мыся, миянöс, — кеймисис Азар дед. — Тырмас орсны. Мийö тэныт нем умöльсö ог керö, и тэ миянöс эн падмöт.
Кывзiс бура, но эз и вöрзьöтчы, бытьтö лякасис му бердас.
— Пукалан, бöб юр, туй шöрас, а он тöд сiйö, что менö гортын старухаö видзчисьö. Ме сылö то маок кыска...
И сэтöн мошвидзисьлöн чужис дума: а не сетны я чукыля коклö масö? Колö пондывны: умöльжыкыс сэтiсь оз ло, а бурыс вермас шогмыны.
— На-ко, пашмöм дядь, пешлышт маоксö! — горöтыштiс Азар и осьтiс да, дзик дона гöсьлö, кыкнан кинас нюжöтiс туисоксö. — Ок кытшöм чöскыт — кывтö ньылыштан!... На, на, боболь...
Сiя сувтöтiс туисоксö мысочок вылö и петитiс вöвсö.
— Тыткы, мед кишкаэт оча лякасисö, да эн падж миянöс...
Чеччис ослопина, вишкайтiс-керис нырнас да сибöтчис туисокыс дын. Сулыштiс мымдакö, дзарьясьыштiс, бытьтö мöдiс буржыка видзöтны, абу я эстöн кытшöмкö бöбöтчöм.
А ма дукыс бöбтö юрсö, дульсö петкöтö, и сiя эз ни вермы терпитны да павкöтiс лапа йывнас туисоксö. Туисокыс пöрис, быгыльтчис, но ошыс кутiс сiйö, водiс кынöм вылас и лакыштiс масö кывнас.
— Вот и бур, вот и бытшöм, — баитö Азар. — Тыткы, ослопина, тыткы, а мийö Мурöмыскöт мунамö, — и старик пондiс иньдöтны вöвсö бокöнмоз, медбы орддьыны зверьсö. Но ошыс эз лэдз: лэбтiсис кынöм вывсис, мурзьыштiс лöга.
Вöлыс бöр-бöр керсис, кыскис сьöрас стариксö, пондiс жöдзны. Старикыт тожö повзис, но Мурöмыскöт баитiс спокойнöя, медбы не мыччавны сылö полöмсö, малалiс чуксö, лапкöтiс голясö. А кыдзи кылас вöлыс, что хозяиныс ачыс дрöжитö, нач бöбмас и уськöтчас пышшыны. Сэк сы сьöрö вöтчас эта зверюгаыс, и — оз ло вöлыт...
А ошыс нюлiс туис дорресö, кытчöдз кылыс судзис, сэсся косявлiс туиссö да вильöтiс пыдöссö. Кöр нем лоис сёйны, чапкис бан торресö, пуксис.
«Не циркись я тэ мезмин, дивовежа? — думайтiс Азар дед. — Кыдз морт керö...»
Эшö пондылiс старикыт öвны ошсö, но сiя эз и видзöт мортыслань, а лапанас чышкис ляксьöм чуксö — дзик и дзик кань миссис.
Шондi медбöрьяись öзйыштiс веж-гöрд биöн, югдöтыштiс пипу йыввез и öшис, бытьтö сылiс да сорлассис лöзöтöм небоыскöт.
Кытöнкö вöснитика жекöстiс тупкапиян, сылö лöга шыасис катша и дыркодь китшкис-видчис. Лöньсис сiя, и ордчöн кусттэзас пондiс кывны кышöтöм — этö, натьтö, лöсьöтчис узик кежö орда, а может, и петiс шыравны чужмöр нето ёж.
Унажык и смевжыкöсь лоисö номмез: дзингöны норöна-норöна, пельсадь мортлiсь бырöтöны, пырöны вöлыс нырпыссэзö, пеллезö, синнэзö.
Лöгасис Азар дед, öддьöн лöгасис.
— Öй, рукйöсь чушни! — горöтiс сiя. — Дугды буди ме вывтi тешитчыны, а то обукнас корпатö волькöта!
Ошыс эз и вöрзьöтчы.
— Ме ог понды тэкöт орсны, ог понды кадсö каттьыны, — видчис сiя, — а кута да нарошно бöр берта. Пукав вöлись сэтöн, личкы туйсö бöрнат.
Старик бергöтiс вöвсö керкуокланяс, лöсьöтiс поводсö и лэдзис Мурöмсö одзас. Ачыс бокöн-бокöн, ошыс вылö видзöтöмöн, жагвыв иньдöтчис вöлыс сьöрö.
Пукалö ошыс, видзöтö ны сьöрын синтырьяс, но оз и вöрзьöтчы.
Йöртiс вöвсö потшшезiсь керöм картаокö, кöда вöлi лякöтöма керкуок бокас да вевттьöма лысöн, и пуксис порог дорас. Кöть и нем эз уджав, а только ош вылö чирзiс, но кикокыс ёна мыдзöма.
Мый одзлань керны? Мунас я эта поперёшнöйыс сы дынiсь?
Но, шуам, ачыс дзебсисяс керкуокас, а вöвсö кытчö? Сьöрат эд он пырт — ыбöсыс лажмытöв.
— Öк, пишальыс абу! — пизис старик. — Вöлi бы, дак öддьöн уннялiн менам!
И решитiс сiя сiдз керны: ежели оз мун вельмöм юрыт, лöсьöтны кык бипур: öтсö ыбöс одзас, а мöдсö керкуок бöрас и сотны нiйö ойбыт. А песыс заптöма, тырмас. Да и чагыс, кöда шогмис додь полоззэз лöсйöмсянь, уна чукöртчис.
И пипуовöй чуркаыс — сiя кольччис пыж колодаись — пригодитчас: бурасö оз понды сотчыны, а турундитас асылöдз.
Тэчис пессö кык би понда, но öзтiс только ыбöс дынсис. Чочком тшынок сэк жö кокнита чепöссис вывлань, дюттясьöмöн кыссис вöр ладорö. Ыждiсö и смевсялiсö бикыввез. И кыным югытжыка сотчис костёрыс, сыным пемытжык лоис ойыс.
Тарöвтiс старик биас и уль чуркасö да пуксис порог одзас. Кывзiсьö да смекайтчö, видзчисьö, мый ваяс сылö ойыс. Но нем оз тыдав, нем оз кыв — гöгöр пемыт да лöнь. Номмез и то лöньсисö — пышшисö тшын дынсис.
Вöр руыс ульсалiс, и лоис кöдзыткодь. Старик кышыштiс пельпоннэс вылö солдатскöй шинель, кöдö тридцать год эз пасьтавлы. Кöть и важ сiя, шоркйиссьöм да вошшитчöм, а вот бöра пригодитчис, кыдз и кöркö, шальнöй война луннэзö.
Вдруг — каж-каж! Кажöтö сэтчин, мачуркаэз дын. Неужто ошыс ыжмалö?
Босьтiс чер, вешшис би дынсис, смекайтчö, но синыс адззö только пемытсö — сiя, пемытыс, би бокас и öшалö, дзик топыт сьöд öн.
— Ой, ляк бöж! — кыдз позьö лöгжыка горöтiс дед. — Тэ мый сэтчин керан?! Видзöтлы менам, а то кыдз ыпка-лыя!..
Бертiс сiя би дынас да гымгис чер обукнас пипуовöй чуркаыс кузя. Вывланьö койыштiс бичир чукöр да невына, небыт говклöн горыс.
Да повзяс я этасянь ошыс? Может, ыджытжык би керны? Чапкис биас кöс чашья. Сiя сэк жö пыкнитiс-öзйис, и бикыввеслöн вуджöррес пондiсö йöктыны керку стена вылын.
Бöра ризьнитiс, только öнi керкуок саяс ни, и небурика гöрöвтiс Мурöм. Азар дед пырис вöлыс дынö, малыштiс голясö, висьталiс гажöн:
— Эн пов, басöк син, эн пов! Этö сiя жö бöб кульыс ыжмалö. Мыррез, тыдалö, шедталö. Ась няркйö, миянлö пригодитчасö. А би дынас оз лысьт сибöтчыны.
Картаок бокас мыйкö бут-бут усис, но вöлыс эз ни сiдз повзьы. Старик петiс йöрдансис, кыскис бисис сотчан вуж, югдöтiс карта боксö. Неылын куйлiс неыджыт мырок: сiйö и чапкис ошыс.
— Ваяв, ваяв меным пессö, — сералiс Азар дед. — Да ыджытжыкöсь мургыляв, мед гöгыт письтiс!
Биа вужнас, дзик факелöн, öвтчикö, сiя судзöтiс мыроксö да чапкис биас. Неылын кылiс ветлöтöм, и старик макнитчис ни вöлi говнянас сыланьö, да падмöтчис: гöгöр чашья, он и казяв, кыдз палёжсö мöдпöв палитан.
Сюйыштiс говнясö биас, вевдöрас пуктiс паськыт вужья мыр и пырис вöлыс дынö да лöсьöтчыштiс сы коккез бокö...
Узис эз узь, а сунасьыштiс мымдакö. Эстöн и вöтiс сiйö югытыс — кузьöсь я июнься ойес!
Петiс Азар дед вöлыс дынiсь, нёджжöвтiс öтмöдöрö. Биыс кусöма ни, только пипуовöй чуркаыс сё шайтö-чискö. Лог дорас китшкö катша — вайö медодзза юöрресö. Карта юр вылын треситö бöжсö пичик, бергалö кокнита. А турунас быд листок вылын пежьялöны лысва вотёккез — бытьтö жемчугись доноккез турунас киссьöмась. Сэтшöм басöк — жаль и тальччыны эта сöстöм зелень вылö.
Но колiс мунны, и Азар босьтiс чер, лэбталiс шинель полаэсö да тэрмасис мачуркаэс дынö. Бöрсяняс, дзоркодь туруна видзок вылас, кольччис югыт-зелёнöй визь. Сылö паныт лэбзисö мошшез, и старик велöтiс нiйö:
— Паськыт мысас мунö, кагаэз, сэтчин кöс ни туруныс — борддэзныт оз вамö. И вöйтуруныс цветитö — дзик сотчö...
Мачуркаэс быдöс вöлiсö дзоньöсь — сэтчö ошыс абу сибавлöм.
Мошшес пырисö-петiсö самöм осьтаоккезöт. Кöдна локтiсö, лэбзисö жагöна, но гажöн, и эта сьöртi Азар дед тöдiс, что нiя вайöны уна ма, и ошкис нiйö:
— Ай да чож борддэз менам. Спасибо тiянлö, спасибо! Уна отирöс бöра вердат манас, уна челядь тöвбыт чöсмасясö. Только эд лэдзö дынаныт ма панялiсьсö. Чушкалö сiйö жалейттöг, самöй чукас бытшкö. Сiя, рукйöсь кадж, велалас öнi татчö вовлыны. Но, ужо... Вот пишаль кайöта, дак велöта, кыдзи локтас. Сьылас сэк менам.
Азар дед сёйыштiс кöтöтöм сухарь, юис гöрд сэтöрись да маись керöм настой и пондiс лöсьöтчыны гортас. Сiя топыта пöдналiс керку ыбöс, пробойесö каттис проволокаöн, медбы эз пыр сэтчö бöбалiсь ош. Сыбöрын кусöтiс турундитан чуркасö, картаись петкöтiс вöв.
— Но, мунам, Мурöм...
И мунiс, только вильлаöт — орддис тöння умöль местасö, кытöн сё эшö куйлiсö туис торрес.
Дата добавления: 2015-11-16; просмотров: 46 | Нарушение авторских прав
| <== предыдущая страница | | | следующая страница ==> |
| ЛЁК КАЙЛÖН УДЖ | | | СЕВАЛÖН ВÖТ |