Сьылö соловей

Борис Борисович «Зарни карсö» мöдiс керны кык неделяöн, да чожа только сказка висьтассьö, а делоыс дыр керсьö, кöть тэнат и электропила, и электроструж, и берся механизмыс. Кык неделянас нiя волисö керрез, горбыль, тшуписö башня. Эшö неделя мунiс сы вылö, медбы панны шатровöй юр да лöсьöтны тёс. А сэсся падмисö: детсадiсь завхоз кöрттувсö абу заптöма. Мöдiсö одзöстны колхозлiсь — абу, школаись — абу. И районiсь магазиннэзын абу.

Кöрттув бедасис кыскис старичок, кöдакöт Борис Борисович инмис мунны райцентрö да баитiкас висьталiс ассис могсö.

— Уна я колö? — юалiс старичок.

— Кöть бы ящик.

Эта вылö старичок нем эз шу, а бергöтiс баснисö мöдöрö:

— Пода видзан?

— Ог, — висьталiс Борис Борисович. — Тэныт яй колö?

— Яйись менам басни абу! — ошшасьöмöн горöтчис старичок. — Ме фронтовик, и яйнас вердöны... Баля кучик колö. Адззы-ко — кöрттув лоас.

Посадын Борис Борисович виль олiсь и оз тöд, кинлiсь позьö адззыны кучиксö, но надейтчис, что öтiкыс сё ни адззисяс, и кöсйисис. Сiя жö лунö баитiс Гришакöт, и зонка вайис: нылöн кучиккес не öтiк год ни пö öшалöны вöскын.

Кучикыс нятьöсь да чорыт, дзик шöри кöстöм фанера, и Борис Борисович полiс, что старичок сы вылö кöрттувсö оз веж, но сё жö пуксис мотоцикл вылö да мунiс кошшыны удача.

Кыдз и баитчисö, старичок видзчисис сiйö ю дорись улицаын. Ордчöн сулалiс кык колесоа тележка, вевттьöм вöснитик трепичöн.

Мотоцикл сувтчис, и старик ачыс кыскис коляскасис кучиксö, видзöтiс кыкнан боксö да кур-пар паськöтiс — вевдöрас керис вурунсö.

— Абу я травитчöм? — бобгыштiс ныр увтас и места-мöдöт нетшкöвтiс бы вурунсö чепöльнас, но вуруныс не эз шед, не эз ор. — Коргаг абу вöрöтöма, но важмöм бура, умöлик. Содтöт кора.

― Уна я?

— Чапкы гöрдö.

Сулалö я сымдасö кöрттулыс, Борис Борисовичлö и юрас эз пыр. Сiя сетiс десятка и, медбы не öштыны весись кадсö, старичокыс моз жö ачыс босьтiс ящиксö, видзöтiс, сэтшöм я кöрттулыс. И сысянь, что лöсялiс колана товар, кöркöся фронтовиклö сетiс эшö вина талон.

Гортланьö туйыс, шуöны, дженытжык да волькытжык.

Борис Борисовичлöн мотоциклыс, кыдз бура вердöм вöв жö, гортланяс гöнитiс орöтчöмöн, некытöн öдсö эз чинтлы, и кынымкö минутаöн сiя ылö колис бöрас райцентрсö да кайис мыс вылö, кысянь син одзö петiс посадлöн дорыс. Детсад оз тыдав, но сылöн оградаыс сiдз жö вöлi Борис Борисович син одзын: шöрас чочком öшына теремок, сiйö кытшöвтö крепостнöй стена, стена вылас башня, а башня вылас — гöрд сорса золотöй петушок... Лоас сэтшöмыс, и лоас чожа. А талун башня юр вылас пуктас гöгрöса «шапка», да не простöйö, а басöк рöмаö, басöк сераö...

Öбед бöрын Борис Борисович да Гриша кутчисисö крыша бердö, а Шурик орлалiс карниз понда пöввез, стружитiс нiйö да пондiс шаблон сьöртi пилитны серрез.

Уджалöны — öд шедö: улын — чиж-важ да чиж-важ, вылын — тук-ток да тук-ток. Некин эз казяв, кыдз оградаö пырис Лукия. Нятьöсь платьесö, кöдöн гортас пода дынö петавлö, абу и вежöма, киас — кузь бедь.

Пырис, шув-пав мунiс йöрнöстöм Шурик бокöт — дзар эз кер сы вылö, кöс голосöн шыасис:

— Ноко лэдзчы улö, сьöд абыз!

Гриша тожö пасьтöм, веж йöрнöссö чапкöм башня слега вылö, и сiя тöдчö, кыдз горадзуль. Ачыс пукалö ордчöн да камгö-дорсьö, нем оз кыв.

Мурзьыштiс мамыс да ыкöстiс:

— Лэдзчы, мыся, эн камöт!.. Зоныс кылiс, дугдiс дорсьыны.

— Быдтi абызöс, пятнадцать год вердi, а мыйлö? Медбы гортсö розоритiс, мамыслiсь рожасö кулис?!

Гриша вежöртiс, мый понда мамыс видчö, да чöлö. Вежöртiс и Борис Борисович: баля кучик понда.

— Эн лок, розоритель, гортö, шатлась кытöнкö! — чижьялö Лукия. — А локтан — этöн бедьнас масьта юртö — тусь не пизь кера! Читкыллетö öтiкöдз лета!

Борис Борисович чеччöвтiс улö, здоровайтчис, лöнь шыöн юалiс:

— Мый лоис, Лукия Гордеевна? Висьтав бытшöмика, — и сувтöтiс бокас виль лабич. — Пукышт-ко миян диван вылын. Сiйö Шура керис.

И, кыдз кöдковну, Борис Борисовичлöн баитöмыс мымдакö лöньсьöтiс öддьöн лöгасьöм инькасö. Сiя шентiс бедьсö кач чукöр вылö, пуксис да пондiс норасьны:

— Ларёкын пимиэз эмöсь, да кучиккез мöдi нöбöтны. Видзöта: öтiк пакмöм! Кин сiйö öтiксö босьтас — вор? Кыдз тэ думайтан?

— Ме сiдз думайта, Лукия Гордеевна: эстöн унажыксö ме виноват. — Борис Борисович пуксис Лукиякöт ордчöн. — Миянлö сiдз колiс кучикыс, сiдз колiс, а тэ эн вöв гортат.

Лукия бöра öзйыштiс:

— Дак Америкаö, натьтö, эг ветлы! Фермаыс не море сайын, локтiт бы да юалiт!

— Конечно, юасьны колiс... Тэ, Лукия Гордеевна, талун Гришаыслiсь кудриэсö эн лет: сiя вежöртiс ни и сэсся сэтшöмыс оз пет... Сiдз эд, Гриша? — Борис Борисович чорытамоз юалiс зонкаыслiсь и сэтöн жö ошкис сiйö: — Ылöстö зонкаыт, мастер лоас.

Лукиялöн сё эз чулав лöгыс, бöра бытшкис зонсö:

— Быднёж, натьтö, ишшо мастеритас... Гортiсь нуöтны юасьтöг!

— Сы понда ме вешта, Лукия Гордеевна, — тэрмасис öвны Борис Борисович. — Талун миянлö аванс сетасö. Зоннэт богатсяласö...

— Но-о-о! Куим лун гуддисисö — и аванс ни? Копейкаэз? Али руббез жö?

— Лукия Гордеевна! — öбида сорöн горöтчис Борис Борисович. — Этадз старайтчöны — да копейкаэз? Семдесятöн сетасö.

— Мый тэ! — шынньöвтiс Лукия. — Кöр сетасö?

— А вот юöр видзчисям.

Лукия чеччис, кытсöвтiс Гришасö, кöда мыйкö керис крыша саяс:

— Гришка! Кылан менö?

Зоныс мыччис юрсö, зэлыта шыасис:

— Но, кыла.

— Кылан, дак вот мый: деньганат некытчö эн пыр, лок гортö. Эн вунöт этö: гортö! — бергöтчис Шуриклань, закажитiс сылö: — И тэ сiдз жö. — И мунiс, сэсся бöрас эз дзарнит.

Лукиялöн юöр, что Гриша гусьöн босьтöма кучиксö, Борис Борисовичлiсь дойдiс сьöлöмсö. Неетша кад эшö колас, медбы зонкаыт пöртчис честнöй мортö. Тырмас я сылöн, том велöтiсьлöн, эта понда выныс да кужöмыс? Оз кö тырмы, Гриша лоас, кыдз шуö мамыс, тюромщикöн. А сылöн велöтiсьыс — мымдакö преступникöн. И сэк сылö, институтiсь петöм специалистлö, не лоны велöтiсьöн. Сэтшöм воспитательлö доныс — быздöм руб.

Но кыдз керны, медбы зонкаыс чожжык вежöртчис? Быд лун тотьны: этадз эн кер, а кер сiдз, эта бур, а эта умöль? Но Гриша не бöбöв, сiя и сiдз бура вежöртö, кöда чочком, а кöда сьöд... Кыдзкö колö керны сiдз, медбы иньдöтны чочкомыс да сьöдыс коласöт, но мед частожык павкавлiс чочкомыс бердö, а сьöдсö бы только синöн адззис, только кылiс сылiсь нёштöм дуксö. Но Гриша туй дорын матынжык сьöдыс. Нельки книга лыддьöтны абу велалöм, а гортас и телевизор абу. Сэсся мый деревняас? Некытшöм кружок, некытшöм станция. Но эм, эм сэтшöм лекарствоыс: шоныт кыв, кöда йиджö морт сьöлöмöдз, бур пример...

Борис Борисович видзöтiс Шуриклiсь уджсö. Старайтчöма мортыс, но пила пинь кодь сёрыс не быдлаын öтыжда.

— Кытшöм оценка сувтöтам, столяр? — юалiс Борис Борисович.

Шурик жмитыштiс пельпоннэзнас, висьталiс:

— Тришка... А сэсся — петас...

— Кыдз эшö петас! Эд и бур стряпкалöн медодзза блиныс гöрöда. Давай одзлань уджавны.

Но одзлань эз сет уджавны колхознöй кладовщик, кöдалiсь Борис Борисович тöн мöдiс одзöстны кöрттув. Сiя дзарьясьöмöн пырис оградаö, локтiс башня дынö, кытöн Борис Борисович кöрттув ящик вылын пукавтöн зудъялiс чер.

Кладовщик чужйис нятьöсь сапогнас ящик кузяс, сувтöтiс паськыт синнэсö Борис Борисович вылö:

— Кин этö вайис?

— Кöрттувсö? Ме вайи.

— Кытiсь?

— Ылiськодь, тасянь оз тыдав, — ылöтчис Борис Борисович.

— Мöдiклö этö сказкатö висьтав, — öдззöтчö кладовщик. — Ящикыс менам складiсь пышшöма.

— Кöда эз вöв? Тэ жö тöн ачыт шуин: абу.

— Вöлi, но тэныт эг сет. Талун видзöта — нильдöма кытчöкö!.. Бытшöмика кора: висьтав, кинлiсь босьтiн.

Вылiсянь Гриша горöтчис:

— Борис Борисович, эд кывзö сiйö! Кладовщик сылö:

— Тэ, Луки пиян, тупкав öмтö: бöжыт тожö лякöсь! Шуан, ог тöдö, что мöйму сарайсис шпагатсö тэ босьтiн? А может, и эта, — сiя бöра чужйис ящиксö, — тэ сьöрö вöтчис?

— Тэ зонкасö эн нятьöсьт, — сувтiс Борис Борисович кладовщик одзö.

— Эн разь кыв: кöрттувсö вайи ме. Мöдiклаись. И Гриша асьсö дорйис:

— Шпагатсö зоныт сетлiс. А ящиктö юав сылiсь, кöдакöт пируйтiн.

— А тэныт кытшöм дело, что пируйтi? — кладовщик бергöтiс баснисö бокö. — Вöлi выходнöй, и юыштiм. И эн няргы, Луки пиян!

— Кытшöм эшö Луки пиян? — кутчисис кладовщик бердö Борис Борисович. — Сылöн эм ним — Гриша Мизёв, и шу мортсö аслас нимöн. А öнi — адззисьлытöдз!

Кладовщик мыйкö эшö осьтлiс öмсö, но Борис Борисович кайис башня вылö, гажтöма думайтiс: «Но вот бöра пантасим сьöдторкöт... Кыдз тэ сiйö орддян, кöр кытчö бы эн мун, а сiя сэтöн и эм! Да кöть бы бокын сулалiс, а сiя тэ вылö кайö, горш бердö кутчисьö!»

Июнь ошшасис деревенскöй гажöн да мичöн: сöстöм петассэзöн, эшö вежкодь, поснитöв паськöма кыдззезöн да льöмпуэзöн, сьöдöтöм карчйöррезöн, кöднаö неважын садитiсö лук да картов, косьмöм туйезöн, зелёнöйсялöм ва гöппезöн, кытöн уялö нильыг лягуша пöк, видз вылiсь пода чукöррезöн, катша-рака базаррезöн, лöнь да шоныт рыттэзöн, кöр ю дорись баддяинын пондöтчöны вермасьны асланыс сьылöмöн колипкайез.

Тöн рытнас Гриша дыркодь кывзiс нiйö. Не öтнас — Инессакöт.

«Мыля нö нiйö сiдз шуöны?» — юалiс Гришалiсь Инесса, зонкалöн соседка да бур ёрт. «Кыдз шуöны — нёштöма?» — юалiс жö Гриша. «Мый тэ — öддьöн басöка!»

— Мыля соловейсö комиэз шуöны колипкайöн? — юалiс Гриша Борис Борисовичлiсь талун. — Од я тöдö тiйö?

— Ог тöд, Гриша.

— А ме тöда: свадьба панталiсь.

— Кин сiдз баитö?

— Мамö. Колип — этö свадьба паныт...

Башня кузя шват-шват вачкисö гырись зэр воттез: кöркö кайöма кымöр — лöз юра, чочком бöжа, дзик вöв водöма туплясьны. Вöлись пондiсö котрасьны, медбы не вадны инструмент, керöм карниззэз, косьтöм тёс. И вамисö буракодь, но горттэзö эз мунö, а сайöвтчисö башня крыша увтö: июньыс не октябрь, кöдалöн синнэс пукалöны ва местаын, — зэрыштас и дугдас. Пукалöны лöня, шоччöтöны мыдзöм кикок, кывзöны зэрлiсь гажсö.

А зэрыс, кöть и лоис поснитжык вотя, дугдыны эз мöд. Сiя кокнита чеччалiс башня крыша вылын да уна шорокöн вöснитика визывтiс му вылö и резсис öтмöдöрö. Эта вылö видзöтiкö Борис Борисовичлö усис тöдвылас примета, и сiя висьталiс:

— Одз гöсьыс олö öбедöдз, а сёр гöсьыс ой кежö енöвтчö. Вежöртiт, Мизёв ёрттэз?

Гриша юалiс:

— А эта кытшöм? Шурик горöтчис:

— Сiя — чокнитчöм.

Зонкаытлöн бура ни лöсявлiс уджыс, а зэрыс костiалiс да тшыкöтiс мортыслiсь настроеннёсö. И, медбы Шурик видзöтчис гажöнжык, Борис Борисович шуис:

— Вон рытвыв ладорас чочкоммö ни. Джын час бöртi лоас кöс. — Сiя лапкöтыштiс Шуриклiсь пельпонсö. — Эн вид природасö: сiя тöдö, мый керö. Сiя умнöйжык миянся, етша сорасьлö.

— Чокнитчöм! — эз öвсьы Шурик.

— А тэ — чакнитчöм, — не лöгöн, дзик и не воныслö, а кинлöкö мöдiклö, шуис Гриша. Шурик только синбугыллесö сылань бергöтлiс и шы эз сет.

Кык воробей, может, тожö воннэз, чивзöмöн-чавзöмöн пыркнитiсö морттэс ныр увтöт да пырисö пес видзанö. Борис Борисович горöтчис:

— А эна — чирикнитöмöсь. Йöзыс чуть оз горзö, а нылö нем абу!.. Гажа йöз воробейес!.. Бедаö сюрасö, и сё чив-чив да чив-чив!.. Вот öтiк воробей шедас кокнас дзугö — вöв сиись петляö — и давай горзыны, давай горзыны! Горзас, горзас, сэсся чик-чик серöмтчас да шуас: «Мыйись ме горза, бöбöв? Кок увтам пыш да лён кöдзыс. Сёя пöттöдз, лэбзьыла ножничла да и орöта сисö...»

Шурик только öмсö осьтыштiс, а Гриша сералöв-керис да мöдiк анекдот висьтасис:

— Бöбöввез дынö, больницаö, локтас комиссия. А бöбöввес потолок бердас онняюрöн öшалöны, дзик кушборддэз*. Нылö шуöны: «Лэдзчö, баитны колö!» А нiя öшалöны... Врачыс шуö: «Тiйö висьталö: локтiс ар, листыс усьö, усьö...» Комисся пырас öтiк палатаö, висьталас: «Локтiс ар, листыс усьö, усьö...» — бöбöввес джоджас усяласö. Пырасö мöд палатас, висьталасö сiдз — бöбöввес усяласö. Пырасö куимöтас, висьталасö сiдз — öтiк бут усяс, а мöддэс сылö: «Тэ мый, люля, ми жö лыса пуэз — не листаöсь!»

Öнi и Шурик шынь-шынь серöмтчис, нельки мыйкö мöдiс горöтчыны, да Борис Борисович одзалiс сiйö:

— Эх, листа пуэз, листа пуэз!.. Миян детдомын нiя быдса чукöр быдмöны! А мыйсянь нiя сэтшöмöсь — тöдат?

— Шогалöны, сэтшöмöсь чужисö.

— А мыля сэтшöмöсь чужисö?

— Маммезныс умöля олiсö... Умöля сёйисö, натьтö, и тожö шогалiсö.

Этö Гриша причинаэсö кошшö. А Шурик видчö:

— Адззисьöма тöдiсь! Борис Борисович Гриша дор:

— Умöля сёйисö, но бура юисö, куритiсö, ойбыттэзöн гажöтчисö. Мöднёж шуны — мый кöдзан, сiйö и быдтан. Этö не ме сiдз шуа, этö оланыс, этö наука сiдз шуö. А ме вот мый шуа: часöт ветлам авансла да столовöйö.

— Ура-а-а! — гусьöника нюжöтiс Гриша да медодз петiс башнясис...

Авансöн нылö бура лöсялiс, и нiя — нельки зэрыс эз повзьöт — котöртiсö столовöйö, медбы эшö сэтчин содтыштны гажнысö. Но эта чассянь нылöн лöсялан визьыс дзугсис.

Сiдз кыдз столовöйсö пöдналöмась ремонтируйтны, Борис Борисович мунiс сёйны квартираас, а зонкаэс — гортаныс. Мöдiсö бертны чожа, но быдöнныслöн мыйкö адззисис сэтшöм, кöдö колiс керны талун, öнi жö, и баитчисö сiдз, медбы пантасьны кык час бöртi.

Гриша локтiс сёрмытöг, кынымкö минута видзчисис вонсö, кöда кежис магазинö, но сiя эз лок, и зонка пондiс вольны столббез.

Зэрны важын ни дугдiс, небоас и кымöртор эз кольччы. Шондi да чож тöлок некой пору косьтiсö вамöм мусö.

Уджавны сьöкыт: öткö, жар, ньылöмыс пöдтö, синнэз и чужöм бердö лякасьöны гуттэз, а мöдкö, оз лэдз мышкырасьны пöт кынöм. Эта кузя Гриша чапкис черсö да кутчис гарйыны столббез понда ямаэз — сё етшажык куснясьны.

Детсадiсь петiсö челядь, и öтöрыс лоис горажык да кыдз бытьтö дзескытжык, а Гришалö — сьöкытжык уджавны. Сiя пуксис гарйöм яма дорас, лэдзис коккесö пытшкас, ыркытiнас, да видзöтö, кыдз орсöны челядьыс. Сы дынö сибöтчис витгодся Лёшик, сосед, пондiс нерсьыны:

— Гриша да Инешта — жöник да невешта! Гриша да Инешта...

Гриша сапкис-кутiс сiйö киöттяс:

— Шедiн? Öнi он пышшы! Ноко кин тэныт сэтшöмсö каттис?

— Ог виштав.

— Эшö кыла — пельтö орöта! — повзьöтiс Лёшиксö Гриша. — А кылас Инесса сойыт — мöд пельтö орöтас... Эн лёб, мый оз ков! Эн лёб!

Лёшик вешшис Гриша дынiсь, бöра сьылыштiс:

— Гриша да Инешта — жöник да невешта!

— Тэ эшö? Дугды буди! — Гриша вöрзьöтчис местасис. Лёшик котöртiс ылöжык, шуис:

— Керан пиштолет: шек дугда. Он — дак понда.

— Ладно, Лёшик, кера...

И керис. Кытчö воштiсян? Кöр сералöны — нелюбо кывзыны. Кöр Гриша кутчисис куимöт яма бердö, локтiс Борис Борисович. Видзöтчис-керис, юалiс:

— Öштiт менö? Школаö корлiсö. Иньдöны лагерьö. Неделя кежö лэдзисö, сiдзкö, ковсяс тэрмасьны... Давай сувтöтам кык столбсö да карниззэсö керыштам. — Казялiс, что Гриша öтнас, ошкис: — А тэ абу дышöтчöмыт, кык понда керöмыт.

— Мунiс тай магазинö да öшис... Ковсяс ветлыны.

— Ветлы, кор татчö.

Джын час бöртi кык вон локтiсö: Гриша — одзас, Шурик — бöрас: велосипед тарöвтö.

— Адззат, мый керöма, — видчö Гриша. — Велосипед ештöма небны! И тарласьö, оз бы и лок! — И Шуриклö: — А мамö мый шуис? Сiя деньга миянсянь видзчисьö, асныр!

Шурик сувтöтiс велосипедсö тополь увтö, нырнас вирскöмöн пырис инструментла. Борис Борисович мунiс сы сьöрö, юалiс:

— Былись босьтiн, Шура?

— Ну, — нукöстiс Шура.

— Поздравляйта бур товарöн? Менам сэтшöм жö. Öддьöн кокнит. — Казялiс Шуриклiсь пыктöм тырпсö, жалейтiс: — Кытшöм аварияö сюрлiн? Пиннет дзоньöсь я?

Эта вылö горöтчис Гриша, а не Шурик:

— Талун дзоньöсь, а мöдпырся вермасö киссьыны.

Лоис вежöртана: зонкаыт тырп бердö сибавлöма Гришалöн кулакыс.

Шурик петiс ножовкаöн, швыргис кисис ножовкасö, котöртiс велосипед дынö.

— Тэ кытчö? — воныс уськöтчис сы сьöрö, но Шурик вожасис велосипед вылö и пöльтыштiс-петiс оградасис.

— Асныр дак асныр и эм! — лöгасис Гриша. — Шедлан тэ бöра гортын!

— Видзöта ме тэ вылö, Гриша, и думайта: тэись не воспитатель, а партизан петас, — лöсьöтчис бытшöмика баитны Борис Борисович. Но бöра нем эз пет, бöра эз ешты: оградаö шакардаöн уськöтчис Лукия — лöг сина, жмитöм тырппеза. Тöдчис, что часöт чорыта сiя гымалас. Но этö гымсö небзьöтiс Лёшик. Сiя гусьöн сибöтчис Лукия дынö, кыр моз тыргыштiс:

— Тррррр... бах, бах! Баба Луки, тэ вийöм!

— Вийöм? Тэ менö вийин? Дак кин нö öнi ягöднас вердас тэнö?

— Да мийö шидз оршам!

— Но, но... Морттэсö, кага, оз вийлö... А лыйсяныт тай виль, кысь инö?

— Гриша кериш. Ме шуи: «Гриша да Инешта — жöник да невешта», — и шия кериш.

— Но, но, — то ли ошкис, то ли осудитiс зоночкасö Лукия да сибöтчис кар кериссес дынö.

— Мый нö бöра, абыз, керин, а? — кутчис видчыны зоныскöт.

— Ачыс виноват, мам, и тэ сiйö эн дорйы... Адззисьöма тай умник: деньга босьтiс — и аллё?

Борис Борисович уджалö да кывзö.

— Кин виноват?

— Дона зонокыт.

— Ме не сы йылiсь, — вежöртiс мамыс. — Милиционер тэнö кошшö, сельсоветö корö... Мый бöра каракулитiн? Али гортын дзескыт, абыз, — казённöй жыр да казённöй нянь колö?

Борис Борисович чапкис уджсö да Лукия дынö:

— Чöв жö, Лукия Гордеевна... Милиционерыс не Гришаыс дынö, а ме дынö локтiс... миян дынö. Тэ мун гортат, мийö сельсоветас каям.

— Öтнасö корис да, — сё эз вермы лöньсьыны Лукия. — Ох, олан ни тэ менам!.. Дак мый бöра гудыртiн, абыз? Мый?

Зоныс лöгасис, пондiс ряксыны:

— Мый, мый?! Кыдз ме висьтала, кöр нем эг кер? И мун эстiсь!

— Гриша! Баит, пожалуйста, гусьöнжык, мамыт бура кылö, — стыдитiс Борис Борисович зонкасö. — Тэныт, адззан, недолыт, а мамытлö — долыт, кöр сылiсь зонсö милиция кыскалö? Тöда, что тэ только свидетель, но мам сьöлöмыс — мам сьöлöм и эм. Да сэтшöм, кöдö унаись ни повзьöтлiсö... Нöбöт инструментсö да ветлам недырик кежö.

Лукия эна басниэз бöрын только кинас макнитiс да мунiс!

Недырик кежö... Не пыр петö сiдз, кыдз тэныт колö.

Участковöй локтöма не кладовщик юöртöмсянь, кыдз думайтiс Борис Борисович, и сiйö тшöктiс мунны. Но Борис Борисович босьтiс секретарь дынiсь газета и пуксис посöдзö, медбы видзчисьны зонкасö. Лыддьöтiс öтiк йылiсь, и мöдiк йылiсь, а юрас бергалiсö Лукиялöн кыввес: «Мый бöра гудыртiн, абыз? Мый?»

Гришакöт участковöй пантасьлiс ни, и талун нылöн басниыс пондöтчис кыдз важ тöдсаэзлöн басни: — Но, кыдз олан-вылан, Мизёв? Сё чериалан?

— Шочыника, — шуö Гриша. — Некöр лоис — уджавны кутчиси.

― Шедö?

— Чериыс? Кöр шедö, кöр оз.

— Кытöн кыйсян?

— Горт увтын.

Зонкаыт тöдö, что эта — учöтик басни, и отвечайтö дженыта, медбы чожажык лоис ыджыт басни, кöда понда локтiс участковöй. А сiя сё мöдiк йылiсь:

— Воныткöт чериалан али öтнат?

— Öтнам.

— Тöн рытнас ветлiн жö?

— Эг... Некöр, мыся...

— А мамыт шуö: ветлiс.

— Эг, мыся, — чорытжыка ни висьталiс Гриша. Вежöртiс: часöт пондöтчас сiя ыджыт басниыс, сылö оз ков сорасьлыны.

— Верита: эн. Но ю дорас вöлiн: адззылöмась.

Повны Гришалö немись, а вот эстöн öшис, гöрдöтiс пеллесви и дыркодь эз адззы, мый сэтчö шуны. Участковöй казялiс, что юасьöмнас инмис кытчö колö и веськыта ни сöтiс лёк кылöн:

— Вот тэ и шедiн, Мизёв! Öнi висьтав веськыта: кинкöт тракторсö гусялiн?

— Трактор? — Гришаöс жарсяняс чапкис кöдзытö, сiя нельки чеччис. — Эг адззыв некытшöм трактор...

— А кинöс адззылiн? — участковöй эз сет и ловзисьны мортыслö. — Тэ пуксьы, пуксьы да висьтась чуклясьтöг...

Да, мам сьöлöмыс — мам сьöлöм и эм: сiя öддьöн бура кылö, кöр пияныслö колö отсöт.

Сэксянь, кыдз Лукия видзис зоныслö милиционерсянь юöрсö, аслыс места эз адззы. Кöть Гриша и висьталiс, что нем умöльсö эз кер, да мамыс тöдiс, что сылö не первуись бöбöтчыны.

И то Лукия сельсоветын ни, зоныскöт ордчöн сулалö.

— Висьтав жö, бытшöм морт, — корö сiя милиционерсö, — мый бöра лоис?

— Тэ бытьтö эн на и кыв? Ойнас трактор гусялiсö. Шуöны: Мизёв.

— Кин шуö? — пизьö Гриша, — Тэ эн верит сылö, мам. Ачыт тöдан: ойнас гортын узи... — Гриша видзöтö мамыслö веськыта синнэзас.

— Узин, Гриша, узин даки, — отсалö зоныслö Лукия. — Быль эд зонкаыс баитö, бытшöм морт. Он верит миянлö, Шурикыслiсь юав.

— Мöд зонытлiсь? А сiя разь святöй — оз куж бöбöтчыны? — пыксис милиционер, но вдруг горöтчис: — А ноко вайöтлы, Лукия...

Важ часы, кöда öшалiс ордчöн Ленин портреткöт и вöлi кыкись кузьжык портретысся, не тэрмасьöмöн тронгис-шуис кватись: «Мун-н-нö... мун-н-нö...» — бытьтö мöдiс вашöтны отирсö. Эта дырни, дзик старик, часыыс небурика ружтiс, медбöрын дженытика, кань моз, несйис да бöра пондiс лöня öвтны веж маятникнас: сэт-чин, тат-чö, сэт-чин, тат-чö...

— Тэ тöдан, Мизёв, кыным год эта звонарьлö? — участковöй качыкнитiс часы ладорö юрнас. — Стося унажык! А мыля сы дырна дзуртö? А вот мыля: олö лöня, уджалö честнöя, оз бöбöтчы. Царь дырни эз бöбöтчы, Сталин дырни — эз, и талун — оз. Ов сы моз — лоан счастливöй, сы дырна жö дзуртан...

Мöйму участковöй баитiс Гришакöт эстöн жö, и сэк зонкаыт пыр пукалiс мышкыра юрöн да эз и адззыв этö часысö. А талун и часысö, и портретсö, и тачанкаэза картина ештiс бура видзöтны, нельки участковöйлiсь синнэсö казялiс: нiя зелёнöйöсь, не öддьöн лöгöсь, ныжöсь. Нельки сы öмись золотöй пиннесö лыддис — нёля, и паськыт кымöс вывсис кырöввесö — нiя куима. И баитны талун немымда эз пов, и мöдiс ни висьтавны, что часыыс оз ов, а öшалö, что сiя керöма дубись да бронзаись и сiйö мортысви оз позь пуктыны, но сэтчö мамыс тойлалiс ыбöсас Шуриксö, горöтчис боёка:

— Юась сылiсь, мый мöдiн.

— О-о, да сiя тай вонсö вöтöма ни! — вежливöя панталiс Шурикöс участковöй... — Жöник, кöть часöт гöтрав!

Шурик букыша синöн видзöтiс Гриша вылö — сё лöгыс петiс — бобгыштiс:

— То жöникныт, одзаныт пукалö.

Мамыс кулакнас чувйыштiс Шуриклiсь сивилёнсö:

— Эн лёб абусö, а висьтав...

— Лукия, тэ сэсся он ков, — сувтöтiс участковöй. — Давай шоччись.

— Шоччисьнытö, батя, некöр: ферма видзчисьö.

— Сэк фермаат мун.

И Лукия колис зоннэсö участковöйкöт. А сiя пуксьöтiс Шуриксö одзасжык, бöра пондiс юасьны тöння рыт йылiсь — кытöн вöлi, мый керис, кöр гортас локтiс, и нельки сiйö — мыля Гриша жöник.

Эта вылö Шурик горöтчис:

— Жöникасьö да... Тöн пемытöдз ю дорын пукалiсö. Гришалöн чужöмыс бöра рöмсялiс, дзик воöм озъягöд, и зонкаыт мышкыртiс юрсö.

— Пемытöдз? — кутчис эта кыв бердö участковöй. — А шуö: одз пö водi. Кылан, Гриша Мизёв? Мöдпырись ни шедiн тай!

— Кытчö шедi?

— Кыдз кытчö? Менам налькö!.. Тракторсö пемдан дорас и петкöтöмась. И ась не тэ, да сёравно тэ кылiн нето адззылiн.

— Жöникыс адззылас? Ныр увтсис! — зубытжыка бы дойдö вонсö Шурик. — Мöдöровса тай вовлiсö.

— Мöдöровса? Он бöбöт?

— Гаг лоа!..

Участковöй чеччис, жмитiс Шуриклiсь кисö, павкöтiс Гришалiсь пельпонсö, горöтчис петтöнняс:

— Но, лоö честнöйöсь, Мизёввез!

Важ часы ружтöмöн шыасис öтпырись: «Мун-н-н!». Эта музыка увтö жö петiсö Мизёввез, панталiсö Борис Борисовичöс да куимнанныс иньдöтчисö детсад оградаö, медбы чожжык босьтны киö инструмент да матынсьöтны сiйö лунсö, кöр позяс висьтавны челядьлö: «То тiянлö и зарни кар!»

...Öтiк лунö детсад оградаын кытсöвтiс золотöй петушок, кöда сулалiс башня вылын, и зарни кар осьтiс ассис шондi чужöма ворота. Челядь одзасьöмöн уськöтчисö кар пытшкö, рознитчисö öтмöдöрö: кин пырис пос увтö, кин пондiс дюттясьны, кин вузасьны-босьтасьны, а Лёшик быдöннысö одзалöма пырны башня пытшкö да лыйсьö сэтчинсянь.

Гришаöс да Шурикöс юкталiсö дзирыт компотöн да киэзнысö зэгöттöн висьталiсö ыджыт спасибо. Эна шоныт кыввес вöрзьöтiсö кык вонлiсь сьöлöммез, и нiя шыннялiсö, дзик видз вылiсь катшасиннэз.

Но ыджытжык гаж, кöда оз тöр сьöлöмö да паськалö бы посад пасьтас и лэбтiсьö кымöрöдз, челядьлöн лоис сэк, кöр нiя босьтiсö ас киöн шедтöм деньга. Нiя, кырымтыр десяткаэз, вöлiсö нач вильöсь, волькытöсь да сöстöмöсь, и пежьялiсö синодзын зарни рöмöн, пöдтiсö ловнысö тöдтöм чöскыт дукöн. Гришалö кажитчис, что эта дукыс не деньгаыслöн, а уджыслöн, кöда понда сетiсö деньгасö.

Шурик эта минутаö вунöтiс июньскöй шондiлiсь сотöмсö, кисис вира гаддесö, Гришалiсь чувйисян кулаккесö. А Гришалöн тöдвылас вöлiсö кладовщик да участковöй. Сiя думанас мöдiс ни нiйö нимкодявны нёштöм кылöн, но син одзас сувтiс мамыс, Борис Борисович, пеллезас горалiсö колипкайлöн чирликасьöм да Лёшкалöн нерсьöм: «Гриша да Инешта — жöник да невешта!» — и нiя нач вештiсö нёштöм кыввесö.

Дата добавления: 2015-11-16