|
Читайте также: |
Талун Никиталöн асылыс шогмис гажтöм. И не сысянь, что öтöрас гардiс февральскöй падер, и сы жырын вöлi кöдзыт. И не сысянь, что айыс дыр кежö мунiс веськöтчыны да öнöдз нем эз гиж.
Сiя и этö лунсö пондöтiс, кыдз быдпырся, гимнастикасянь. Сыбöрын миссис и весöтiс пиннез, мый керлывлiс шоча.
И пызан сайö пуксис кортöг, не кыдз Соня сойыс.
А сэсся.
Колö висьтавны, что быд зоночкалöн, кöда ветлывлiс хоровöй кружокö, вöлi бытшöм, свиттялан кизёка вешьян, а мукöдыслöн ― джинссэз. Никита жö новйис шоркйиссьöм пидзöса вешьянок. Эта йылiсь сiя мамыслö унаись ни баитiс. И талун, просаовöй каша сёйикö, вились казьмöтiс:
― Мам, кöр инö виль вешьянö лоас? Ме бура велöтча, ог ыжмав... И кружокö ветла. Сонька некытшöм кружокö оз ветлы да дваэз ваявлö, а сылöн ― джинссэз.
Мамыс шуис:
― Кысь босьта? Не Америкаын олам, не пыр нiя эмöсь. Кöр адззисяс, сэк и босьтам. Видзчись, Никитушка.
― Дак чожа фестиваль, а ме ― солист. Соня, Никиталöн ыджытжык сойыс, серöмтчис да висьталiс:
― Тэ, солист, пшёнкасö етшаöв панялiн. Сёян ме мымдасö ― и джинссэз лоасö.
Никита сiдз жö лёка висьталiс:
― Тэ уна сёйöмыт, да ульö, и öнi юрат каша пусьö!.. Картiöн орсан, а задача он куж керны!
― Дугдö жö, челядь! ― öлö нiйö мамыс. ― Мыля видчат, а? Дзик пон да кань!.. Асьныс чунь кузяöсь, а кöритчöны, топ инькаэз. ― И репöтiс пызан сайись: ― Лöсьöтчö школаö, пиня кыррез!
Никита пасьтыштiс пасёк, кöдö вурисö сылö важ пасись, тапочкаэсö вежис вочöм пимиэз вылö, пуктiс кузь пеля шапка.
― Эн коль сойтö, Никитушка, ― сувтöтiс сiйö мамыс. ― Öтлаын мунö... Нем эн вунöт?
― Эг, ― не öддьöн рама шуис мамыслö Никита и горöтыштiс сойыс вылö:
― Тэ дыр эшö?
― Счас, счас, ― шуис Соня, но зеркало одзын чатрасьны эз дугды.
― Но тэнö, читкыля-чаткыляöс! ― лöгасис Никита и колис сойсö. Тöдö эд: Соня барыня моз пондас сынасьны, пелькытшшез кышавны, а то и кöмкöтсö вежлавны.
Мамыс Никита бöрсянь квартирасис петiс:
― Никитушка, тэ кытчö öтнат? Эд эз на югды!
Мамыслö паныт шовкнитiс öтöрись ыбöс да пöльтыштiс кöдзыт тöвныр. Ох, челядь, челядь! Кöбы тöдiт, кытшöм сьöкыт эттшöмсö терпитны маммезлö, некöр бы сiдз эд керö!
Школаö мунны Никиталöн туйыс кузь, а öтöрас падера, и сiя подöн эз мун, кольччис видзчисьны автобус.
Тöлыс кок йылiсь пöрöтö, летö шапка пеллесö, ны кöввезöн вурö чужöм кузя, павтыралö пась дорсö. И сулавны тöвпаныт немымда оз позь ― чорыт лымöн вартö синнэзö и пöдтö лов.
Кöдöрö бы эн видзöт, быдлаын öвтчö гудыра лым, сы пырйöт и городыс оз тыдав, кöть буракодь ни югдiс.
Никита сувтiс одзнас тöвньылат, а тöлыс сидзö кос гöгöрас. И вешьянокыс пырйöт шуч пöльтö.
Сайöвтчис кузь пася инькаэз сайö ― лоис шонытжык. И сэтчö локтiс автобус, да Никита эз ешты пуксьыны. А инькаэс мунiсö.
Тöлыс лёксялö, оз тöд, мый керны: то йысялöм туй вывсис лымчирресö чышкас, то тротуар дорись пуэсö кутчас монлавны, то лыма борднас Никиталiсь ныр-öмсö малыштас да спинасö лапкöтас. А мый медумöльсö керö, дак этö Никиталiсь пидзöссэсö калитö-кынтö.
«А джинссэз пырйöт эз бы сайкöт, сiя топыт, кыдз кучик, ― думайтö Никита. ― Сонялö дак бу-ур».
― Никита, тэ тай сё татöн?.. Эз на вöв?
Этö Соня сойыс автобус йылiсь юасьö. Сiя сувтiс воныс одзö, куталö пидзöс йыввесö: бöбасьöма öтöрас петны дженыт пальтоöн, а джинсовöй вешьянсö абу кöмалöма.
Никита оз жалейт сойсö: «Мый сылö, кыз яйлö, эта кöдзытыс?»
― Может, талун абуöсь автобуссэс, Никита?
― Эмöсь. Ме эг тöр... То мöдiк локтö.
Эта автобусын отирыс вöлöм етша, нiя пуксисö дзескöтчытöг и вит минута бöртi чеччисö асланыс школа весьтын.
Вижган тöв кольлалiс нiйö школа ыбöс дорöдз, но Никита эз ешты пырны: сылö паныт инмисö сумкаа-паськöма челядь.
― Никита, эн ни пыр: гöртö лэдзисö!
― Од бöбöтö? ― оз веритсьы Никиталö.
― Ме тэнö кöркö бöбöтлi? ― öбидитчис медбур ёртыс. ― Ноко висьтав, вöлi сэтшöмыс?
― Эз... А мыля оз велöтö?
― Рытся сменаö корисö.
Кöть и падеритö, Никита решитiс гортас мунны подöн. Сiя важынкодь ни эз пыравлы магазиннэзö, а колö маркаэз видзöтны, может, вильöсь эмöсь. А видзöтiкас и шонтiсьны ештас. Медодзза магазиныс сы туй вылын «Универмаг». Сэтöн берсянас вузасьöны: паськöмöн, бумагаöн, баяннэзöн, эмöсь сумкаэз и орсаннэз ― быдöс öтлаын. Мöдiк сэтшöм бур магазин городас абу.
Магазинас шоныт и лöнь. Отирыс öтi-öтi, видзöтчы, мымда тэныт колö, некин оз мешайт.
Сiя мымдакö сулалiс мотоцикл дорын, любуйтчис часыэзöн, вель дыр видзöтчис маркаэз дорын ― вильыс нем абу.
«Может, джинссэз вайисö? ― усис тöдвылас. ― Колö видзöтны».
Паськöм отделын пукалiс öтнас вузасись, пöрись инька.
― Джинссэз эмöсь?
Инька пöлiньтыштiс юрсö, мыйкö дырна видзöтiс Никита вылö, вöлись шуис:
― Эмöсь.
― Позьö видзöтны?
― Позьö. Видзöтöмыс понда деньга ог корö... То нiя. ― Сiя чеччис, джаджокись судзöтiс товарсö да пуктiс Никита одзö. ― Аслыт колö?
― Аслым. Ме театрын понда выступайтны.
Вузасись пöлiньтiс юрсö мöдланьö да бöра мыйкö дырна видзöтiс удав босьтасись вылö.
― Сьывны али йöктыны пондан? Ежели йöктыны...
― Ме сьылiсь.
― Адззан кыдзи-ка! Сiя бур! ― ошкис зоночкасö инькаыс да босьтiс киас вешьян. ― Ноко меряйтам инö.
Меряйтiсö ― дженытöв. Мöдiкыс ― кузьöв. И куимöтыс, и нёльöтыс эз лöсялö.
― Тэ понда абу на вурöмась, ― жалейтöмöн шуис инька. ― Быдмышт инö да вöлись лок.
― Некöр быдмынытö. Чожа концерт.
― Сэк вот мый. Неб этö да мун вон сiя тётя дынö, кöда шöрасьö. Сiя тэныт чинтас кузясö и вешьян пыдöссö... Но кыдз?
― Ме гортын юася.
― Юась, юась.
Магазинсянь Никита веськыта котöртiс гостиницаö ― сэтчин мамыс уджалö. Локтiс, кöдзытсяняс дубалöм тырппезöн висьталiс:
― Эмöсь нiя... Ачым адззылi!
― Мыйез эмöсь? Кысь адззылiн, Никитушка?
― Бытьтö оз тöд сiя, мыйез! Джинсовöй вешьяннэз, вот мыйез! Только ыджытöлöсь, колö невночка чинтыштны.
― А-а, вешьяннэз! ― вежöртiс мамыс. ― А тэ мыля он велöтчы? Али бастуйтан жö, кыдз вöр кералiссес?
Никита висьталiс, мыля оз велöтчы, и мамыс лöньсис:
― Сiдз дак сiдз. А мийö то кыдз керам тэкöт, Никитушка. Кык лун бöртi меным сетасö деньга, сэсся лоас шоччисян лун, и мийö вешьянтö адззам не учöтö, не ыджытö, а как раз тэ сьöртi... А фестивальыт кöр эшö!.. Адззам, сёравно адззам, Никитушка, и небам.
― Небам, небам!.. Тэ только бöбöтлан менö, ачыт он и мöд небнытö! ― лэбтiсис видчыны Никита. ― Быдöнныслöн эмöсь, а менам кöр лоас?.. Он кö босьт, дак ме чапкися сьывны, ачыт вöлись кружокас ветлы! Вот сiдз! Ветлы и сьыв! Мымда колö... А ме ог понды.
Мамыс повзис:
― Никитушка, мый тэ сiйö баитан ― кружок чапкыны! Тэ жö солист! Кин пондас сьывны тэ туйö?.. Огö, огö чапкö, Никитушка! Шуи тай: лоас деньга, и босьтам. Кылан, Никитушка? ― Сiя кыскис жакет кармансис полтинник, пуктiс зоныс кырымö. ― Буфетас петушоккез эмöсь, тэ радейтан нiйö. Пырав сэтчин.
― Тэ только Сонькитö пасьтöтан, читкыля-чаткылятö, ― лöгасис Никита и петiс мамыс дынiсь. Но деньгасö эз чапкы: ковсяс!
― О-х-х, ― пичкис-петiс мамыс моросiсь сьöкыт ловшы.
Никита, Никита!.. Тöдан я тэ, что мамыслö быд пияныс öтдона? Шуам тай: кöдö бы чуньтö эн курччöвт, сё зубыт. Мамытлö что Соня, что тэ ― öтiк киись чуннез.
Никиталö сiдз и эз ештö небны виль вешьянсö.
Ох, отир, отир! Кöсйисьны кöсйисят, а керны од тэрмасьö. Разь бытшöм сiдзи?
Но кöть Никита и повзьöтлiс мамсö, а кружоксö эз чапкы: сылö сiя вöлi школаыс дона жö. И фестиваль вылö мунiс.
Думайтат, важ вешьяннас и мунiс?
Вильöн. Свиттялан кизя вешьянöн. Джинсовöйöн.
И видзсис сцена вылас повтöг, бытьтö унаись ни выступайтлiс. Ачыс вöлi гажася-гажа, синнэс тожö сьылiсö, öмыс шыннялiс, кокнит туфлиа коккес асьныс йöктiсö.
И сэтшöм бура сьылiс, что сьылöмыс бöрсянь сы дынö, сцена вылас, кайис городiсь артист, жмитiс сылiсь кисö да юалiс:
― Никита, тэныт кыным год?
Никита сiдз жö кокнита, кыдз сьылiс, висьталiс:
― Меным кыкьямыс год.
― А кин велöтiс сьывны?
― Ачым велалi.
― А эшö мый радейтан керны?
Эстöн Никита падмис. Сiя видзöтöв-керис артистыс вылö югьялан синнэзнас да сыбöрын горöтчис:
― Велöтчыны... Эшö маркаэз öктыны.
Артистыс лöсьöтчис мöдпырся жмитны Никиталiсь кисö, но зоночка шуис:
― Эшö вурсьыны радейта. Этö вешьянöс ачым вури. Соня сойöлiсь чинтi. Эта йылiсь Никита эз мöд висьтавны, а кыввес асьныс öмсис петiсö. Отирыс серöмтчисö да пондiсö шовкöтны, оркестр гымыштiс гажа музыкаöн. Артист пондiс нёджжавны Никиталiсь вешьянсö. И кöть öт вешьян кокыс вöлi дженытжык, артист шуис Никитасö бур вурсисьöн и дзирыта зэгöтiс сылiсь кисö. А залыслö висьталiс:
― Отир! Эта том мортыс ― талант! Берегитö сiйö, отсалö сылö быдмыны!
РЫТСЯ БАСНИ
Гожумнас Сёмасö прокод одз водтöтöны. Эшö вель вылын шондi, эшö кайез сьылöны, а бабыс висьталас: «Видзöт, кага, кутюэз водiсö ни, и миянлö колö узьны», — и пыртас керкуö, ольпасьö водтöтас.
А Сёмалö öддьöн охота тöдны, мый керсьö рытнас öтöрын: кыдз шондiыс узьны мунö, кысянь пемытыс локтö, кöр цветоккез ланьтöны.
И вот зоночка тöн бöбöтiс бабсö: енöвтчис узьны, а ачыс эз онмöссьы. Бабыс шебралiс сiйö буржыка, медбы уль тöв эз вижгы, малыштiс небыт юрсиоксö да петiс весöтны лук.
Сёма чеччис — да сы бöрсянь, только не огородечö, а видз ладорö, юланьö, мунiс, кытчö шондiыс узьны ветлö.
Кöд коста зоночка бабыввезкöт одзасис, шондiыс ештöма ольсасьны ни: ылiсь мыс вылö зелёнöй перина паськöтöма, перинасö лöзвевья простыняöн вевттьöма, юрöдзас подушка пуктöма.
«Вот часöт водас, — видзчисьö зоночка, а шондiыс оз тэрмась. — Сiя тожö оз на бы вод, а бабыс, натьтö, тшöктö, — думайтö Сёма и шушкö шондiыслö: — Тэ эн на вод, котрасьышт мекöт! А охота кö, дак вöв вылын гöняйтам». — Сылö тöдвылас усис бадёвöй бедёк, кöдö луннас дзебис ловпуэз увтö. Казялiс тшöтшкöр, пондiс öктыны сiйö и эз адззыв, кыдз шондiыс узьны водiс. Адззö: водöма перина вылас, небыт одеялоöн шебрасьöма. А одеялоыс гöрдся-гöрд, кымöрыс кодь жö, только лöз каймиа.
«Öнi видзöта, кыдз цветтэз ланьтöны», — думайтö зоночка. Локтыштiс сiя горадзуль дынö, а цветокыс узьö ни, юрсö мышкыртöма. Кутыштiс сiйö кинас, мöдiс видзöтны, куньöмöсь я горадзульыслöн синнэс, а ю сайсяняс кыдз кинкö горöтас:
— Пыть-пырöт! Эн вöрöт!
Зоночка дзебис кисö йöрнöсок увтас, шуис:
— Ме ог вöрöт, только видзöтны мöдi...
Кайис вадорсис горт дынас, видзöтчö, кöдöрсянь ойся пемытыс локтö, а сiя некытöн эшö оз тыдав.
«Ме сы коста орсышта!», — думайтiс Сёма и бедёвöй вöвнас пондiс сяркöтны стын кузяс — сяр-сяр-сярк!
А ва сайсяняс бöра кыдз кинкö горöтас: — Пыть-пырöт! Эн сярöт! Пыть-пырöт!
Чапкис зоночка бедёксö, думайтö: а кин сiя сiдз командуйтö? Поди, бабыс сiдз горöтлö да?
Но оссис посöдз ыбöс и бабыс кытсöвтiс:
— Сёма, Сёма-а, тэ кытöн? А ва сайсяняс лöг приказ:
— Пыть-пырöт! Эн горöт!
Сёма сэтчинсянь эз лысьт горöн шыасьны, а котöртiс бабыс дынö да гусьöн шуис:
— То ме, баба.
— Ак тэ, некывзiсь! Мыля менö бöбöтiн?
— Ме мöдi видзöтны, кыдз цветок узьö, а сiя эз тшöкты, — норасьö Сёма.
— Кин эз тшöкты?— юалö бабыс.
— Кöда мöдöрас горöтлö. Кылан?
— А-а, кыла! Сiя пытьканкай. Узьны миянöс тэрмöтö, мунам-ко чожажык.
Сёма кывзыштiс-керис, а кайыс и былись иньдöтö:
— Поть-порот! Узьны вод! Поть-порот!
И зоночкаыс пырис гортас и водiс узьны.
ЭЗ ТÖД
Лиля да Рима школа бöрсянь пыралiсö магазинö и посадсис петiсö медбöрын.
— Мунам шупытжыка, — тэрмöтö Рима, — а то мультиккесö видзöтны сёрмам.
— Ештам эшö, — оз тэрмась Лиля.
— А Кивулькоыс дынö кöр? Сiя эд видзчисьö миянöс.
Кивулько — нылöн тöдса понок, кöда олö Фиса баб ордын. Понокыс учöтик, сьöд, только моросас, кыдз шуö Фиса баб, чочком медаль эм, да эшö бöж йылыс чочком, ровно белитчан дозö сюйыштлöма.
Кивулькоыс öддьöн и орсiсь!
И умнöйся-умнöй, берсясö кужö керны. Тшöкты кык кок йылын мунны — мунö, тшöкты серавны — сералö. Нельки пес пыртлыны отсалö — вот кытшöм вежöра. И мый баитан, быдöс и быдöс вежöртö. Ежели бы кутчин сэк, кöр эшö учöт вöлi, дак и баитны, поди, позис велöтны.
— Сы дынö ог кежö ― вот и быдöс, — шуö Лиля.
— А сiя паныт петас, — баитö Рима.
— Ась петö. Мунам бокöттяс, бытьтö ог и тöдö сiйö.
— Этö абу честно.
— Но и мун, а ме мультик понда видзöтны. Рималöн абу телевизорыс, сiя ветлö Лиля ордö киносö видзöтны, и колö öнi согласитчыны ёртыскöт. А сiдз охота Кивулько дынö кежавны!
Локтiсö горт деревняö, вуджисö посок кузя шорок, и веськытланись мысок вылын пондiс радöн вувтны Кивулько.
— Эн видзöт сэтчин, бытьтö мийö — не мийö, а чужöйöсь, — шуис Лиля да вежис походкасö — чотöмöн мунö, чапликасьö.
Вот Лиля кайис мысок вылö, бергöтiс юрсö мöдöрö да орддис поноксö, но сiя чепöссис ворота дынсис да уськöтчис мысок увтас, кытчö лэдзчис Лиля. И кыдз только вöтiс сiйö, сразу эрнитiс и сапкис-курччöвтiс Лилялiсь коксö.
— Ой, мама-а! — чирöстiс нылочкаыс да шляп пуксис нятя туй шöрас.
Понокыс тожö повзис да пышшис горт дынас и пуксис ворота одзас да пондiс ас мознас серавны, бытьтö не сылöн и дело.
— Пурис? — юалiс Рима. — Ноко мый бура? — Сiя кошшис пурöм местасö, но подружкаыслöн кокыс вöлi дзонь. Сiдзкö, эз пур, а только повзьöтiс.
Умнöй понок! Ох и умнöй!
Кöр Лилялöн повзьöмыс чулалiс, сiя пондiс видчыны:
— Бöжа чурка, бöбöв! Ме сiйö и булкаöн, и шаньгаöн вердлi, а сiя, понжуг, вон кыдз менö!
— Сiя эз тöд тэнö, — горöтчис Рима. — Эд тэ вöлiн не тэ...
— А-а, тэ дорьян сiйö?! — пичкис лöгсö Лиля. ― Сэки кольччы сыкöт и эн вовлы миянö киносö видзöтны.
Öбидитчöм нылочка шырк бергöтчис подружкаыс дынiсь да котöртiс гортас.
Рима видзöтiс, видзöтiс сы вылö да кежис Кивулько дынö.
Дата добавления: 2015-11-16; просмотров: 42 | Нарушение авторских прав
| <== предыдущая страница | | | следующая страница ==> |
| КУСЬКОСЬ — ЯШАЛÖН КОЗИН | | | ЯГÖДАВТÖН |