Медодзза вежöктöм

Адам да Ева медодзза неделясö олiсö лöня. А сы бöрын Ева и шуö:

― Адамко, сет Еныслö ассит эшö öтiк ордлы, ась керö сэтiсь мöдiк мужикöс. Тöдан, гажтöмöв меным, а сiя, может, анекдоттэз пондас висьтасьны. Да и сурок тэкöт пондас юыштлыны.

― Ах, вон мый тэныт оз тырмы ― модз, ― лöгасис Адам и эз сет сэсся ассис ордлысö.

Гöгыт абу дак он надсадитчы

Ассяма морт вöлi Еваыс, жель. Но мый керан ― кытшöм Ен киись петiс. А сiйö оз туй кулитны.

Адам лунтырöн öктö райскöй тшак-ягöд да потшшуйтö сiйöн ассис иньсö. А сылö, Евалö, эта етша.

Öтпыр и шуö Ева:

― Адамко, вай жö яблоксö, öддьöн бы сiйö сёя.

― Оз туй, ― шуö Адам, ― тшыкöтöм сiя. Меным тöн Ен гусьöн висьталiс: кыдз пö сёян сiйö ― стыдитчыны пондан, пасьтöг ме одзö петны он лысьт.

― А Еныс, ― шуö Ева, ― бур дядюшка, кыдз ме адзза: вердö, юкталö. И пасьтöг оз понды видзны.

― А эшö вот мый висьталiс Еныс, ― шуö жöникыс. ― Кыдз пö сёяс Еваыс яблоксö, то кага ваяс. А кагасö вайны не чöскыт пö.

― Эн пов, Адамко, гöгö менам оз письты, вунöтöм Еныс керны,― серöмтчис Ева и топнитiс Адам вылö: ― Тэ кин меным ― Ен, али жöник. Вай часöт жö яблоксö.

Адам кватитас пу бердö каттисьöм сводня-змеясö бöжöттяс, шентiс кытчöкö рай увтас и нетшкöвтiс рöма бока яблоксö.

А Ен эта вылö видзöттöн горшсö летiс:

― Аллилуйя, аллилуйя!

Тыдалö, шедыштöм эд юрас…

Исповедь

Вель дыр Ен-батюшкоыс вердiс и пасьтöтiс мало-дело Адамöс да Еваöс, но сэсся дышыс пондiс петны. Кутчис думайтны, кыдз бы нiйö, весьолiссесö, репйыны райсис. И думайтiс. Греххез пö нылöн эмöсь, сы понда и вашöта пö. Корис сэк дынас Адамöс, копыртiс сiйö одзас, вевттис юрсö шабур поланас, юасьö:

― Эн я грешит, зонö, ме одзын?

― Эг, Енöй, эг.

― Эз я тэнö пырт грехас иньыт?

― Вöлi невна, вöлi.

― Ыджытö я грехсö керин?

― Тэ понда юрси бердам кутчисьлiс.

― Сiдз, сiдз.

― Кор, шуö, Еныслiсь шёлковöй платье да вöснитик каблук вылын чаркиэз. Ме шуа: ог! Эта грех, мыся.

― Сiдз, сiдз.

― А сiя, öнджа, юрси бердам! Кор пö и сё!

― Сiдз, сiдз.

― Мыся, оз сет Еныс, грех эта.

― Сiдз, сiдз.

― Оз сет, шуö, дак и сылiсь пилиммесö лета.

― Дак вот кыдз! ― рякöстiс Еныс да сiдз брынгис Адамыслö бöр понас, что сiя тартарары райсяняс берездасис. А Евасö (эд не дурак, тöдö, что сы одзын том инька) ачыс Илья Пророкыс таратайкаö пуксьöтiс да лэдзчöтiс му вылас.

Сэтчин, небось, дугдатö пö грешитны!

Орис бы отирлöн родыс, ежели…

Вашöтiс Ен райсис первöй грешниккесö, но нiя и му вылас эз вежöртчö: сё грешитiсö. И отир, кыдз кроликкез, йылiс, Енсö нагорнитiс. И решитiс сэк Ен керны потоп ― быдöс ловьясö вöтьны. Кылiс эта йылiсь дёка Ной, сюйыштiс пиас бутылка аскур, кытсöвтiс Енöс. Локтiс сiя, ректiсö посудасö.

― Бур тэ мортыс, Ной, ― шуис Ен. ― Жаль тэнö вöтьны.

― Тэ тожö меным гленитчан, ― баитö Ной. ― Вот мый, дед, коль меным ёртö кöть понöс.

― Вай эшö аскуртö, сэк коля.

Ной быдса жбан вайис.

― Ладно, ― шуö Ен, ― коля тэныт быд звирь-пöткасö параöн.

― Во! Правильнöй тэ, дедыс! Эшö инька меным коль. Стряпайтны да мый да.

― Но и отир! ― сьöкыта ловзисис Ен. ― Сылö кукиш мыччан, а сiя видчö: кыкö, шуö, колö!.. Пуксьöт нö пыжат и инькаöс.

Ежели бы не жбаныс, орис бы отирлöн родыс.

КАЛЯННЭЗ

Пётр Петрович, шöрöт мыгöра колхозник, — стрась дёка да збой морт. Кöть и шуöны, что кудель рöма юрсиаыс да торта пеляыс пö дыш, а Пётр Петрович не сэтшöм. А вот Иван Иванович, сылöн ёртыс, чукыра пеля да дзöдзыв сина морт — дышöв и жаг. Но эта неöткодьöмыс оз мешайт нылö уджавны öтлаын.

Иван Иванович думайттöг некöр оз горöтчы, но зато кыдз висьталас, дзик цемент вылö кирпич пуксьöтас — он ни бöр сiйö шедты. А Пётр Петрович сылiсь висьталöмсö делоö пöртас, кыдз дзирыт öгыр вылын блин пöжалас — чиж-важ и готов!

Кöркö нiйö правленнё сувтöтлiс бригадасö кок вылö лэбтыны. Сэки мукöдыс кыввезнысö миськалiсö, что быгыль-Ваню да чиж-Петра оз лэбтö бригадасö, а бок вывсис кыминь керасö. Но сэтшöмыс эз жö аркмы: отир казялiс правленнёлiсь ошибкасö да кыкнаннысö веськöтiс аскадö. Бöрйис виль бригадирöс да учётчикöс. Сэксянь кык ёрт öтамöд дынiсь оз и калькöтчö, бытьтö нiйö öтiк кушакöн кушакалöмась. И уджалöны, кутчасö кö, дзик бур машина. И уджаласö сiдз-ту сэтчöдз, кытчöдз син одзаныс рюмка оз шед.

Важ праздник Илья лунö быдöнныс мунiсö уджавны. Сiдз и петiс, кыдз бригадир мöдiс керны. Пётр Петрович лöсьöтчис жö мунны вартны, пырыштiс Иван Иванович ордö: не то что юны, а пешлыштны сур-брагалiсь кöрсö. Пешлiсö. Сэсся мунiсö Пётр Петрович ордö. Юыштiсö туран брага да быгья сурок. Кöр тöдмалiсö, кытшöм кöра сук юаныс, кутчисö кизержык бердö. Пöрöтiсö рюмкаöн и öманыс крöшки эз ештö чапкыны, кыдз казялiсö, что ны дынö лöсьöтчöны пырны гöссез: вороталаньö шатласьöмöн сибöтчисö Пётр Петровичлöн сват Проня да эшö кынымкö морт.

— Мый керны? — юалiс Пётр Петрович ёртыслiсь. — Игнасьны, али лэдзны? Пондасö эшö сыбöрын кöритны, что празднуйтiм...

Иван Иванович гыжйыштiс гöрдöтöм ныр йывсö, гуддьыштiс чукыра пель сайсö да мыччалiс чуньнас джоджув ыбöс вылö: дзебсисьны пö. Чож Пётр Петрович ачыс эз казяв, кыдз нетшкöвтiс джоджув ыбöссö, тойыштiс сэтчин гöсьсö и чеччöвтiс ачыс. Сэтчö шурк оссис керку ыбöс, гыма-ёрка пырисö гöссез. Пырисö, здоровайтчисö, кепкаэз — пöлатьö, асьныс — лабичö и — кок вылö кок — куритöны, видзчисьöны тыра кружка. А хозяин абу. Проня сват бергöтчис гöгöрпöв, кытсöвтiс Пётр Петровичöс — некин оз шыась. Мунiс комö да осьтöн кольöм джоджув ыбöс сьöртi вежöртiс, кытöн хозяиныс: сiйö эд Илья-пророкыс мыжйöм, джоджулас йöртöм, тыдалö. Бур, кöть ыбöссö абу пöдналöм, сёжö чочком светыс копейка кодь да тыдалö.

— Тю, челядь,— горöтчис Проня сват,— юрсим совсем петiс Пётр Петровичлöн басниыс: ачыс уджавны мунiс, а удасьнытö эд менö тшöктiс! Вай-ко ме тiянöс потшшуйта... — и эна кыввес дырни кайис гöбечö да кринкаись кунганö кисьтiс брага. Мöддэс юисö, кряксiсö да ошкисö брагасö и добрöй Пётр Петровичöс: вот пö эд аслыс некöр, дак сёжö абу игнасьöма и сур-брагасö кольöма гöссес понда. Сэсся Проня сват кыскис лабич увтiсь сур кринка, сувтöтiс пызан вылö. Чинтiсö сэтiсь джынысви, мед кокнитжык вöлi хозяинлö сiйöн новйöтчыны, эшö öтпырись тшынöтiсö белитöм потолоксö табак тшынöн и пондiсö судзлавны пöлатись кепкаэз.

— Норовитö, челядь, — боткö тырöм нырнас Проня сват. — Петраыс джоджув ыбöссö вунöтöм игнавны, — и хлопкис ыбöснас. — Öнi, челядь, ва кöньöссö местаас сувтöтамö. Сылöн то кытöн, джоджув ыбöс вылын местаыс.

И вит гоз тöрик кöньöс, топ джек, вöлi вештöма аслас местö да сэтшöм бура, что öтiк капля эз плеснитчы сэтiсь. Сьöкыт удж бöрсянь эшö пидзыртiсö кунган-мöд и тыра кынöмсянь жагвыв тальччалöмöн да пöлiнясьöмöн, дзик зэрк вердöм уткаэз, колисö Пётр Петровичлiсь керкусö.

Кыдз чулöтiсö кадсö джоджулас, не Пётр Петрович, не Иван Иванович некинлö эз висьтасьö. А Проня налькись мезмисö то кыдз. Бригадаö локтöма районiсь фотокорреспондент, медбы снимайтны бура уджалiсь отирöс. Снимайтöма сiя и Пётр Петровичлiсь инькасö, а иньыс кут да и вайöт сiйö гортас пажнайтны, да эшö и Проня сватсö ёрттэзнас рочалас. Вайöтас иньыс гöссесö, адззö: керку ыбöс ванйöв осьта. Вежöртас, что хозяин гортас. Пырасö керкуö, иньыс кытсалö Пётр Петровичöс. Мöдыт и шыасяс джоджувсяняс, оз тöд, что иньыс не öтнас.

— Но, тiян каляннэз, я мый я, керкуаныт олöны? ― юасьö Проня. — Ноко, инька, осьт джоджувтö, видзöтам нiйö.

Вештасö кöньöссö, осьтасö ыбöссö. А «каляннэт» казяласö, что не öтнас инькаыт, да öманыс дзик ва босьтасö: шы абу. А Проня быдкодь кульсö ни адззывлöма, только каляннэсö абу на. Öзтас биок, босьтас гормöтчан да пырас джоджулас. А сэтчин мудьöт вылын пукалöны да бергöтлöны синнэзнаныс, бытьтö тупкаэз, Пётр Петрович да Иван Иванович. Öтыслöн киас простöй бутылка, а мöдыслöн — рюмка.

— Но, каляннэслöн талун тожö праздник тай! — рызйö-сералö Проня. — Вот дивоыс! Лок жö, том морт, да сятнит нiйö аппаратнат!

Ох тэ, беда-корюка! Ох, ёрдöм ильялун, мед кöстiс сiйö нёлькусiнь! Пётр Петровичлöн сьöлöмыс кытчö и уйыштiс, оз и тöд, кытöн н путькöтö сiя. Да мый сы йылiсь баитны? Кин сюрлiс сэтшöмас, дак ачыс тöдö, а кинлö эз на дöнзьыв сэтшöмыс, дак ась ен оз шу!

Петiсö кык ёрт джоджулiсь да сэтшöм гажтöмöсь и мыдзöмöсь, бытьтö кукань нiйö мусолитöм, нöитöм тёрка кывнас.

Сы коста хозяйка гöбечö кайис, перво, кыдз и колö, брагаöн мöдiс юктавны. Гумыштiс вевттьытöм кринкаись налевканас да мöдiс кисьтны кружкаас, да сiдз чирöстiс-горöтiс, что быдöнныс уськöтчисö сы дынö. А Пронялö лякасис моросас мыйкö ва да гöна: чулки не чулки, крыса не крыса. Лэбтiс бöжöттяс, адззö: каньпиян! Трек-трек бöжöттяс керис да только и горöтчис:

— Локта и думайта: бура я, не я, мыся, Пётр Петровичыс потшшуйтас, а сiя, видзöт, кыдз удiс-вердiс!..

МИЧА ШОНДI

Ме пукала ордчöн шофёркöт дука кабинаын и думайта иньö йылiсь, кöда дынö муна часöт...

Верунь усис менам юр вылö мича гожся лунöн. Усис не кымöр увтсянь, а куимöт этажсянь.

Ме, прораб, сэк сулалi чоропа да изъя му вылын, стена дынын. Юр вевдöрам вöлiсö выходаэз, или, кыдз шуöны нiйö строителлез, — подмость. А выходаэз вылын уджалiсö маляррез и ветлöтiсö челядь, видзöтiсö, кыдз керсьö ны понда школа. А новйöтiс нiйö да мыйкö висьтасис том учительница Вера Ивановна. Уна я сiя арталiс малярнöй уджас, ог тöд, но челядь кывзiсö сiйö бура. И ме осьтаöмöн видзöтi вылö, кытöн меланьö бöрöн сулалiс ёныник учительница. Но мый и лоис, сiя петитчыштiс бöрлань, тальччис ортсö, паськöтыштiс киэсö, дзик кай борддэзнас шевкнитiс, и берездасис улö, пазалöм кирпич да бетон чукöр вылö. Ме ог тöд, кыдз ештi керны кык-куим оськöв, ог тöд, кыдз меным шедiс киэзам усьöм мортыс: садяси сэк, кöр кылi, что куйла чорыт груда вылын, а медвылын вöрöтчö морт. Менам сiдз зэлöтсьöма мортсö, что только кинкö отсöтöн верми осьтны чунись чуньö прятясьöм киэзöс...

Рытнас Вера Ивановна локтiс ме ордö, мед висьтавны меным ыджыт спасибо. Сэк вöлись ме казялi, кытшöм сiя басöк — чача. Юрсиыс ― арся пипу лист, синнэс ― öшмöсiсь сöдз ва. Пантасисö менам синнэзö сы синнэзкöт — и пемдiсö.

Ашынас ми ветлöтiм ни сыкöт посадöт: сiя таво только локтiс татчö, и ме тöдсöтi нывкасö асланым горткöт...

«Инь... Не нянь, не шондi меным öнi оз ков — менам эм инь: том, басöк, ласков, — этадз ме думайтi свадьба ашынö. — Ась кусас шондiыс — меным пондас югдöтны иньö; ась шерöн вартас сюэсö — ми пöтам радейтöмöн...»

Да, сiдз ме думайтi джын год одзтi, кöр гöтраси кузь чикися Веруньö вылын. И öнöдз сылöн голосыс кöвьясьö менам пеллезын, öнöдз олöны мекöт сылöн сэтшöм кыввез: «Öнiсянь вексö ми лоам öтлаын, миянöс оз вермы янсöтны би не ва». Этадз сiя висьталiс, кöр пырис ме ордö овны. Висьталiс сiдз и чöскыта-чöскыта чупнитiс менö, дзик начальник печать пуктiс чек вылö...

Да, сiдз вöлi кольöм арö. А сэксянь то тöв ни унньöвтiс-мунiс да локтiс и ымйöвтiс быдöс ловьясö и неловьясö гаж тулыс, а ме чунь öтнам, дзик паськыт ыб вылын кругляк увтiсь стожар.

Мыля сiдз петiс? Кин виноват, что ми торьясимö, кыдз тулысся ва коста йы пласт? А может, ми öтамöдлö колiм сiдз жö, кыдз пушка да снаряд — случай вайöтiс миянöс оча, судьбалöн ударник поткöтiс олан капсюль — взрыв!— п пушка кольччис местаас, а снаряд мунiс кошшыны ассис цельсö?

Не, не сiдз. Ме сытöг овны ог вермы. Да и сiя менö радейтiс, но öтiк абутöм тор дзугис миянлiсь олансö...

Öтiк рытö пукалiмö ми сыкöт шоныт горок бокын и видзöтiм альбом. Не менам сiя — мамöлöн, кöда сэк ме дынсянь олiс ылын, важ гортаным, и сё некыдз эз вермы локны ме дынö. Эта альбомын унажыксö важ фотографияэз, и то не уна.

Верунь бергöтiс ни медбöрья листоксö и мöдiс пуктыны альбомсö этажеркаö, но пытшксис усис фотокарточка. Ме лэбтi сiйö, пуктi пызан вылö. Миян одзын свиттялiс лöз-зелёнöй мундира военнöй морт — царскöй офицер. Том, статя. Синнэс — биа шомоккез — дзирытöсь, лэчытöсь. Чужöмыс волькыт, небытик: сразу тöдчö — не умöль оланын гуддисьöма.

— Этö кин? — юалö Верунь.

— Сiя ай кодьöм менам, — серала ме. — Бурдов.

— Ай? Тэнат ай? Чочком офицер — тэнат ай? И тэ меным эта йылiсь öнöдз шы эн сет?

— Да эг ешты эшö, Верунь. А интереснöй история эд.

— Тэ суськин ме шогья?! — пондiс горöтлыны сiя. — Полiн, что ме ог мун враг пияныс сайö, и суськин!

— Верунь, тэ былись этö?

— Ежели бы ме панталi этö палачсö, синнэсö бы кыскалi гыжжезнам, горшсö бы йири пиннезнам.

— Тэ мый, Верунь?

— А сiя, что поручик Бурдовыт менчим дедöс и бабöс ловйöн юкмöсö сюйыштöма. Да мый дедö и бабö — сiя джын коми мусö стрöйдiс да сэрпöсьтiс!,

— Кывзы, Верунь: тэ менö он я лыддьы кытшöмкö петлюраöн? — костiалi ме сiйö.— Не ай сiя менам. Менам абу айö, ме мирон. Забыль, эм айö, но не сiя. А эта вöлöма мамöлöн жених, но, адззан, туйезныс нылöн эз öтлаасьö, кöть и клятва сетлöмась...

— Тырмас! — горöтiс Верунь. — Ме абу учöтик, быдöс вежöрта.

— Дугды тэ абусис. Он я мöд ме вылö лöгавны? Водам узьны.

— Лöгавны?! Ме ог вермы сэсся тэкöт ордчöн пукавны, ог вермы лолавны öтiк руöн, нетолишто öтiк шебрас увтын узьлыны...

Этадз ми баитiмö рытнас. Асывнас меным вöлi некинкöт ни баитны. Кот Васька, кöда не эз адззы, не эз кыв, и öтiк дозiсь, натьтö, сыкöт шыррес сёйлiсö — и сiйö сьöрас нуöтöма.

Ме сералыштлi перво иньö лöгасьöм вылын: этта, мыся, кытшöм чача адззисьöма! Чегласяс-керас, мыся, и бöр локтас ме дынö, бöра пондам ветлöтны öтлаын киноэзöт, а субботаö ресторанын джаз кывзыны. И бöра кöркö кыз повар Маркыч, миянöс синнэзнас кольлавтöн, висьталас Верунь йылiсь: «Мда-а, чöскыт тусёк!.. Вöрзьöттöм эшö, осьтытöм...» А сiя вот оссис ме одзын, дзик шампанскöй вина бутылка, кöдö осьтöны некужан киэз: шовкнитiс-лыйис — и абу!

Сiдз чулалiс лун, кык, неделя — Верунь эз мыччись. Кытчö сiя мунiс — ог тöд. Мунi деревняö, тестьö ордö. Казялiс тестьö, что ме локта, — воротасö тасалiс, öшыннэсö штораэзöн везтiс. «Ох тэ, партизан, партизан! Кöркö öтнат чочком взводкöт пессин, а öнi менчим öтнамлiсь повзин, — думайтi ме и сэк жö öмалi ачымöс: — Не повзис, а нылыс моз жö — ордчöн пукавны оз понды. Вот мый!»

Не ас сьöртi, кöр тэнö немись орддьöны отир; юрси кышöпöн сувтö, кöр тэнö лыддьöны врагöн!

Пыри тöдса ордö, юаси, оз я нiя тöдö, кытöн Вера Ивановна, но и нысянь нем эг вермы тöдны, сы сорöн и мунi гортö.

Эшö неделя уджалi öтнам овтöн. Не уджалi, а мырси. Кресенняö тёщаö локтiс. Гусьöн, конечно, мед мужикыс эз тöд. (Ох, инькаэз, инькаэз! Сэтшöмöсь ни тiян сьöлöммез — небытöсь.) Сiя эз лапкöт сэк менчим пельпонöс, эз малышт юрсиöс, а только висьталiс, кытöн нылыс, и тшöктiс ветлыны бурöтчыны: поди, проститас пö. Бур морт сiя тёщаö, да ассяма. Сылö öтiкö колö: коли пö гижситö Веракöт, то и овны пö колö öтлаын — ен пö сiдз шуöма.

Миськалiс сiя бекöрпань, чышкис джодж, киськалiс доззэзiсь цветтэз (иньö бöрсянь эттшöмыс менам тöдвылам эз вöв) и бöр мунiс. Ме кышыштi вывтам плащ, чепöсси öтöрö и ештi сюрны городскöй автобус вылö. Но туйыс, туйыс кытшöм кузь — сорок километр колö мунны! Да автобус я эта? Кыссьö, дзик дбруньгаг. «Тэныт только öшкаэзöн ветлыны», — думайта шофёрыс йылiсь и кора сiйö:

— Оз я туй перытжыка?

— Оз. Сiдз ни шестьдесят видза, — шуö сiя паныт.

Сэсся шы ог сет, только пиннезöс йира. А синнэз одзын сiдз и сулалö Веруньлöн чужöмыс: шыннялö, корö менö, кыскöмöн кыскö дынас, кыдз мошöс кипрей цветок. А юрам пизьöмöн пизьö быдкодь дума, тшöктö пессьыны сьöлöмöс...

Но вот и город, вот и сiя керкуыс, кöдö висьталiс тёщаö. Сувтi ме сiя керку весьтö, мед невна сайкалыштны, чапкыны юрсим да сьöлöмсим пизян öгырсö, и сулала да видзöта чочком штораа öшыннэзас, кытöн сайласьö менам мича шондiö. Сулала сiдз, ог вермы вöрзьöтчыны местасим, мед поперегавны улицасö да пырны керкуас и жмитны чепсасян сьöлöм бердам ассим меддона ёртöс, мед висьтавны сылö быдöс, кыдз сiя сорасис, висьтавны, что ме и ачым сы кодь жö и синнам ог адззы нiйö, кин тешитчö отир вылын, кин паныт мунiс Совет властьлö, народлö.

Эз на ешты пуксьыны местаас шардöм сьöлöмö, кыдз подъездiсь петiс Веруньö. Ме уськöтчи сылö паныт и чуть эг шед машина увтö, кöда тöвчикöн лэбзис керöс вывсянь. Сибöтчи сы дынö, шушка радсянь горзöмсорöн: «Верунь, лок мунам гортö!» Сiя тöдiс менö, но сiдз чарöтiс-видзöтiс ме вылö, что ме сразу öши да немми и сулала, киэзöс паськöтöмöн, кыдз гряд вылын обороника. А сэтчö миян дынö йöктöмöнмоз локтыштiс том морт и нуöтiс Веруньöс одзсим. Меным жар лоис, пöдтiс ловöс, пемдöтiс сингажöс. Паськöтi плащöс, нетшкöвтi йöрнöс киззезöс. «Велöтны сiйö колö, велöтны», — дзик кинкö сомущайтö менö. «Да, этадз оз позь кольны», — мелькнитiс юрам дума, и ме кватитi канава дорсис ыджыт галя да уськöтчи сэтчин, кöда пельöс сайö саясис, бытьтö сьöд вöр сайö шондi, менам Веруньö. Пельöсас люкаси морткöт да вöлись вежöртчи сы ыксöмсянь: кытчö муна, мыйлö? Вийны сiйö мортсö? Да меын тай чуд пукалö! Не советскöй морт тай ме, не строитель, а йöй чуд!

Сувтчи, нирта кымöсöс да юрöс жугда, мый öнi керны, кытчö эшö кинитчыны. Поди, мунны милицияö, ась менö йöртасö, кытчö колö, да видзасö сэтчöдз, кытчöдз оз дугдö лудны кулаккезö? Не, сiя тожö абу дело. И мый понда ме сiдз пизя, кытшöм бур понда? Мый сэтшöм бурыс сыын, медбы ме косьми сы понда, медбы öштi ассим вежöрöс, мывкыдöс? Гöрд юрсиыс? Гöгрöса, дзик тупкалöн, синнэс? Тьфу! И сэтчö жö пондiс шушкыны кинкö, öзйöтны менö: «Тэ он вермы сэсся адззыны мöдiкöс, полан, что век кежö кольччан ловья дöвечöн». «Ме пола? — отвечайтiс, кинкö мöдiк, кöда вöлi ме дор. — Да сэтшöммес öнi сымда, мымда анькытш туссез кудö тöрöны! Колас кö, öнi жö мöдiкö аслым адзза. Мед чезнитас кытöнкö, палитчöм выскыр!» Но первöй голос кöритiс мöдсö: «Сiдзкö, ась чезнитö... И тэ этасянь лöньсян? А тэнат честьыт, бытшöм мортлöн нимыт? Сiдз и кольччас, тальöм да нятьöсьмöм? Да и ёрттэт тэ вылын пондасö серавны: проктöм пö, тыдалö, коли иньыс пышшис». «Эн карзы, дзик рака свежöй падина весьтын! Сэтöн совсем не сiя, прока али проктöм. Сэтöн совсем мöдiк: преступникöн мортсö лыддьöны. И сiя мортыс абу кытшöмкö нетопыр, кöда оз вермы весöтны ассис нырсö...»

Эттшöм сёрнисянь ме готов вöлi уннявны, но сёжö крепитчи, кöть и неетша пиннезöс йири-бырöтi.

Сiдз шатласи-ветлöтi город кузяс час-мöд, и коккезö асьныс вайöтiсö бöра сiя керку дынö, кытöн олö öнi иньö. И бöра видзöтi öшыннэзö, бöра гирчыгалi пиннезнам. А пызан сайын пукалiсö кык морт — этö ме бура адззи и занавесыс пырйöт. И öтыс ны коласiсь вöлi иньö, а мöдыс — мужик. И нылö, конечно, вöлi сымда жö бур да долыт, мымда меным зубыт да шог. Юрам пырисö кытшöмкö лэчыт, лёк кыввез: «Инь, кöда тэтöг гажöтчö мöдiккöт, вачкисьö кöдзыт тупöсь вылö, кöдö нямралiсö нятьöсь чуннез и кöдö абу ни охота сёйны...»

Ме ачым эг казяв, кыдз лои коридорын, кыдз адззи колан квартира и... син вылам усис почтовöй ящик, кöда вылын гижöма: «Позов понда». Кинкö дзик чувйыштiс менö, и ме садяси: да эта жö Веруньлöн воныс!

Дзикöдз бырис менам кок садь, и ме пукси кытшöмкö ящик вылö да вель дыр пукалi и ниртi кымöсöс. Сэсся öдва-öдва лэбтiси местасим да ляшмаси-кысси автовокзалöдз.

* * *

Быдса неделя ме ветлöтi дзик онзыля, кöть и удж бöрсянь гортiсь некытчö эг петавлы, нельки столовöйö эг ветлывлы.

Локтiс суббота, гажа да шоныт лун. Стройка вылiсь отир тэрмасисö чожжык гортаныс, асланыс семьяэзö. А меным некытчö тэрмасьны. Но и мöдiклаö кытчöкö мунны тожö эз вöв охота, и локтi гортö да, кыдз прокод, пöднаси аслам жырö и водi кроватьö. Он эз вöв, ме куйлi гатш и видзöтi самöм, тшынасьöм потолокö, нёджжалi гор вылiсь киссьöм печина. Вдруг öшын увтiсь кылi мича, тöдса голос — Веруньлiсь. Чепöсси öшын дынö, но сылöн кокшыэс кылiсö ни посöдзын, и бöбись котöртi порогувтö, ванйöвтi ыбöссö: ме одзын сулалiс Маруся, налоговöй агент...

Чожа мыйись Маруся мунiс и нöбöтiс менчим быдöс деньгаöс, мымда вöлi кошелёкам. Ме öнi ог ни ло недоимщикöн, но ковсяс, тыдалö, тшыгьявны. И кытчö сымдаыс мунö? Неважын получка вöлi — и абу ни. А эд пирöжоккез вылын, пожалуй, и олi öнi.

Бöра пöднаси, бöра водi, думайта, кытiсь одзöстны деньга. Мунны дядя Костя ордö? Но сiя, конечно, гортас абу часöт — чериалö, а иньыс эшö öтiк мужиклö деньгасö одзöсöн эз сетлы. Нылö пö сетны — что ваö чапкыны: юас и быдöс. Ветлыны важ гортö, мамö дынö? Дак бöра жö билеттэз вылö деньга колö. Буржык лоас, ежели корны Митрофан Васильевичлiсь, пöрись учительлiсь. А сыбöрын ковсяс сётаки гижны мамöлö, висьтавны, кыдз менам дзугсис оланö...

Сайми ме öшынö ёркöтöмсянь. Öтöрас нач пемыт ни, и ме эг вермы тöдны, кин сулалiс öшын увтас. Осьтi öшынсö, мед юавны, кинлö мый колö, и джöмдi джын кыв вылас: эта вöлi мамö.

— Тэ кысянь эта сёрöна, мам?

— Перво керкуат лэдз да вöлись юась, — сералöмöн баитiс сiя. Ме котöртi öтöрас, отсалi пырны сылö керкуö, бöра юася.

— Öзты битö, зонö, öзты! — корö мамö. — Одз тi водат узьнытö! Шовкнитi выключательöн, и лампочка койыштiс ассис югöрресö и джоджын валяйтчан рабочöй паськöм вылö, и пызан вылiсь рознитöм книгаэз вылö, и паськöтöм ольпась вылö.

— Экскурсияöн бöра мунiс? — юасис мамö, öшыннэз везтiкö. — И дыр кежö?

Ме бытьтö эг и кыв сылiсь юалöмсö, негорöн нюрги кытшöмкö песня и дзимляси пызан гöгöрын, а ачым думайтi, кыдз висьтавны мамöлö, что Верунь совсем мунiс ме дынiсь, и мунiс мамö кузя. Но мамö сибöтчис ме дынö, шытöг кыскис менö диван дынö, пуксьöтiс бокас. Ме дзар кери сы чужöмö и повзи: синнэс мамöлöн вöлiсö сэтшöм жö мичаöсь да биаöсь, кыдз Веруньлöн сiя пораö, кöр меным висьталiс, что миянöс оз янсöт не би не ва.

— Зонö, тэ не öтпыр юавлiн менчим учöтнат айыт йылiсь. Ме прокод чöлi, эг висьтав. Сёровно бы эн вежöрт сэк. А öнi дугдiн юасьны... Но ме нарошно локтi и талун быдöс висьтала... То кин тэнат айыт, — и паськöтiс газета, кöдö ме эг казяв сы киись. Ме босьтi газетасö, нёджжöвтi — и тувдi местаам: ме вылö видзöтiс том офицер.

— Бурдов?! — чеччи да пички тымуссим этö противнöй кывсö, кöда сымда ни керис меным шогсö да зубытсö, и шентi газетасö диван вылас.

— Лётчик Мартин, герой, — кыдзкö торжественнöя да небыта-небыта шуис мамö.

— Лётчик? Айö — лётчик? Мам, тэ он я шогав?

— Ме, зонö, ог шогав... Кывзы-ко... пуксьы да кывзы, мый ме висьтала.

Сiя пондöтчис висьтасьны, а ме эг лысьт пыдынжыка ловзисьны, мед не соравны сiйö, и кывзi сiдз, кыдз, натьтö, война костас, пемыт ойö, кывзiсис менам соседö — дядя Костя, пост вылын сулавтöн.

Кынымкö минута коста син одзам паськалiс менам челядь кадся оланö. Олiмö ми сэк учöтик керкуокын, кöда шусис «Метеостанция». Сэтöн мамö вöлi и сторожиха, и конюх, и эшö кинкö. Олiм лöня, некин миян олан йылiсь эз тöд, некин эз юась, разь только öтнас начальникыс — добрöй старушка, кöдалö ми мамöкöт пилитлiмö пес да арнас керлiмö карч. Ме чуть-чуть тöда, кыдз мамöс корлiсö военкоматö (этö вöлi 1945 годö, сiдзкö, меным вöлi витöт год ни), и мамö сэк ойбыт горзiс, а сыбöрын лун-мöд нельки мекöт эз и баит, только малалiс юрöс да ыш лолалiс. И бöра некин эз тöд, мый керсис мамö сьöлöмын и кыдз сiйö эз кöсты паралич. А военкоматас висьталöмась, что лётчик Мартин самолётнас пышшис немец дынö...

— На жö лыддьöт, зонö, — мамö бöра нюжöтiс меным газетасö. — Эстöн гижöны сы подвиг йылiсь... и ме йылiсь.

Ме жагвыв; кыдз дона тор, босьтi газетасö и мöртi синнэзöс сэтчö, кытчö мамö тюкнитiс кöс чуньнас, и лыддьöтi гырись букваа заголовок: «Борда герой». Лыддьöтi öтпыр, мöдпыр, лыддьöтi письмо, кöдö гижöма айö мамöлö и кöда локтiс мамö дынö только öнi. А улынжык вöлi летчик Мартинöс наградитöм йылiсь Указ...

Ме газетасорнас жмитi бердам мамöс, и синнэзö тырисö синваöн. Не сола синваöн, а сöдзöн, сöстöмöн, долытöн. А сьöлöм чепсасис, дзик первуись сермöталöм чань, и минута бöртi, туй вылас пасьтасикö, ме петi тракт дорö и макайтi ни мунан машиналö газетаöн — кори сувтчыны. Эта вöлi не просто газета, а государственнöй важностя документ, кöть и сы вылын эз вöв некытшöм печать. Эта документыс осьтас иньöлiсь синнэсö, а ме вылiсь бöр кыштöтас умöлься-умöль нятьсö.

И менам оланын вились мыччисяс мича шондi. Мыччисяс и некöр сэсся оз саясь некытшöм кымöр сайö, прокод лоас ордчöн мекöт, прокод пондас и шонтны, и югдöтны, и гажöтны менö.

Дата добавления: 2015-11-16