Жысь Егорлöн медодзза висьт

Овлöма эна местаэзын Гавка — чудскöй морт. Колö висьтавны, чуддэс не öткодьöсь вöлöмась — öддьöн ыджытöсь и стрась поснит йöз. Учöттэс отопкиын, дзик пыжын, уявлöмась, туруныс нылö вöр туйö вöлöма. Ыджыттэс кыкись миянся прокажыкöсь вöлöмась.

Гавкаыс как раз ыджыттэс увтырись и эм. Вына я, не я сiя вöлöма, а бедьыс сылöн, палицаыс, двадцать пуд лэбтöма. Ёнö керлöма бедьсö, сыспуись. Оропыс дона иззэзöн баситöм, а бедь йылас вартöма золотöй тув — быдса пуд. Ыджыт я, не я сiя вöлöма, а Иньвасö öтiк вожмöлöн вожмöвтлöма. Пуксяс сёйны — öтiк вытьöн морда чери сёйлöма, да эшö пикан — быдса кринка.

Вöлöма Гавкалöн басöкся-басöк ныв Зойта. Сэтшöм басöк, что и висьтавны он куж. Öддьöн радейтöма Гавка ассис пиянсö. Видзöма сiйö шоныта и пöта, саридз* сайись мöдöтчаннэсö ваявлöма. Юркытшыс Зойталöн гöрдззöма голубöй бирюзаись да чочком жемчугись, а чикисяс изумруддэз да мöдiк дона иззэз кыйöмöсь.

Бура олöмась ая-ныла, горесö абу тöдöмась. Гавка лун-лун вöралö, а мича Зойта горт гöгöрас видзöтö да гажа песняэз дзульзьö-сьылö. И сьылö сiдз, что быдöс пöткаыс лöньсьö да кывзö сiйö, вöрыс дугдö шушкöтчыны, тöлыс лöньсьö.

Быдöнныслö гленитчö Зойталöн сьылöмыс, да öтiк Ёмалö, нюрись хозяйкалö оз гленитчы. Оз гленитчы нёштöм кульлö нывкалöн мича чужöмыс, дона мöдöтчаныс.

Быднёж пондылас Ёма тшыкöтны Зойтасö, да оз вермы, Мунас мича ныв ягöдавны, а Ёма ягöдас яд тэчас. Но казяласö этö кайез — быдöс тшыкöтöм ягöдсö öктасö. Ыстас нюр хозяйка Зойта дынö змейезöс — жельнöг нылiсь туйсö пöдналас.

Эшö öддьöнжык лöгасяс Ёма, а оз тöд, мый керны. Думайтас, думайтас, пуксяс бадь ув вылö и лэбзяс Вад ты дорö, смертьтöм тупка дынö. Куим лун видзчисяс, кöр тупкаыс саймас, вöлiсь висьталас ассис шогсö. Сунасяс, сунасяс тупка и иньдöтас Ёмаöс ойвыв саридз дорö, куим юра кырныш дынö. Эта кырнышся абу вöлöма пö вынажык вын, и сылiсь полöма быдöс ловьяыс и неловьяыс.

Лэбзяс лёк Ёма сьöд кырныш дынö, висьталас мича ныв йылiсь. Кырныш кырк да кырк горöтас радувьяс и лэбзяс Гавка горт дынö. А кöр сiя лэбзьö, дак одзас и бöрас дас верста ылына тöв уннялö, вöрсö му бердöдз нёкралö.

Локтö Гавка вöралансянь. Пельпон вылас бедьыс куйлö, а бедь вылас ош туша öшалö.

Мый и лоас — ыджыт тöв лэбтiсяс, Гавкаöс чуть кок йывсис оз пöрöт. Казялас сэк вöралiсь неладносö: эта пö сёравно ни куим юра кырныш лэбзьö. Чапкас ош тушасö и давай гортас котöртны. Невна-невна гортöдззас кольччас, да сэтчö вöтас сiйö кырнышыс. Умöль дело пö: гусялас эд, сэрпöсь дук, Зойтасö. И швыргас-шупкас бедьсö кырнышас. Инмöтчас бы сьöлöмас, да шульга юрас инмас — вач юрсö орöтас. Сьöд вир сiдз и брызнитас, дзик зэрок, нятьöсьтас вöрсö да мусö.

Кырныш лёк горшöн кыркнитас да лэбтiсяс вылöжык. Лэбтiсяс и смекайтö, кин сылöн врагыс и кытöн сiя.

Ештас только Гавка бедьсö босьтны, кырнышыс сы вылö уськöтчас. А Гавка кыдз жвангас бедьнас — кырнышлöн мöд юрыс öшöтчас.

Повзяс кырныш: виясö эд сiйö эстöн! — и уськöтчас Зойтаыс дынö, кватитас сiйö гыжжезнас и бергöтчас гортланяс. Надейтчас кырныш кыссьыны öтiк юрнас саридз дорöдз и сэтчин веськöтчыны, да оз пет сы моз.

Бöра Гавка шупкас бедьсö да дойдас кырнышлiсь куимöт юрсö.

Адззö кырныш: не овны сылö сэсся. Öктас медбöрья вынсö, лэбтiсяс кымöррезся вылынжыка и чапкас улö Зойтасö.

Усяс Зойта, разьсяс сылöн юркытшыс, и дона иззэс парма пасьта рознитчасö горадзуллезöн, катшасиннэзöн да колокольчиккезöн.

Усяс и Гавкалöн бедьыс, пыдына муас мöртчас, только оропыс вевдöрас кольччас.

Брякнитчас лёк кырныш пу йыввезас и дзик зу вылö пышнасяс.

Тöждас-керас Гавка да дзебас мича нывсö гажа мыс вылö, шондi морос весьтö. И пондасö сэксянь шуны сiйö местасö Зойтамыс.

Эта мысö Гавкалöн бедьыс усьöма, сiйöн и шусьö сiя Гавкамыс. Самöй мыс йылас эм мыр сувда столб, нитшсялöм да изсялöм. Сiя — Гавкалöн бедьыс.

Гавка дыр эшö олöма да не öтiк нылöс и зонöс быдтöма. Но сiдз и абу тöдöма, что мича Зойтасö сылiсь Ёма, нюр кöзяйка, тшöктöма вийны. Кыдзи бы тöдiс этö — эз бы коль сiйö ловйöн.

А то и öнöдз пö олö сiя, Ёмаыс, только öддьöнсö оз лысьт ыжмавнытö и нюрсис некöр оз петавлы...

* * *

Шондi тöдчöмöн бергöтчис рытланьö, но öдсö эз чинт. Ме шуч пымалi, а вöрзьöтчыны эг лысьт, медбы не дзугны Егорлiсь висьтасьöмсö. И кöр сiя кончитiс, мöдi ме пöрччасьны да чöвтчыны и кöть невночка жаритчыштны шондi югöррез увтын. Только Егорлöн пондöма горшыс косьмыны, и сiя тшöктiс менö котрасьны вала.

Но вала, дак вала. Котраси, джын ведра вайи.

Васö быдöнныс юисö, а Шурка только миссис. Сiя пыр керлiс не сiдз, кыдз мöдiккез. Асныра вöлi сiя мортыс.

Егор тпручыкнитiс — мöссэс вöрзисö. Жагöник чеччисö и куканнес, нюжласисö-керисö да кыссисö мöссэс бöрсянь.

— Вашöтö чожажыка, — тшöктiс Титовна. — А то дыр ни каямö.

— Жагöник мунан, бытшöма местаöдз локтан, — висьталiс Егор. — Кытчö энö, лякöсь бöжжесö, тэрмöтан? — мыччалiс сiя шатьнас жагмöм куканнес вылö. — Дзезсялöмась тай, мунны оз вермö.

— Не пемдыны бы. Вöввезнас ашын станцияö мунöны, талун тöбасьны колö,

— Мыйлö сэтчин?

— Тасянь ог тöд мый кыскасö, а сэтчинсянь раненöйезöс пö вайöтны.

Нiя дыр эшö баитiсö раненöйес йылiсь, сыбöрын пленнöйез йылiсь. Титовна висьтасис, что уна немеццез, пленнöйес, öнi уджалöны Перемын. И буржык пö вöлi бы нiйö не босьтны пленас, а шырзьыны пулемётiсь, кыдз керöны асьныс. Весь пö нянь ны понда изводалöны.

— Мыля жö бöра сiдз, — поперегалiс Титовнаöс Егор. — Морттэз жö эд нiя, а не кöиннэз. Миян политикаыс сэтшöм.

— А нылöн? Кытшöм нылöн политикаыс? — сувтчис Титовна да лöга видзöтiс Егор вылö. — Мыля нiя отирсö ловйöн дзебöны, мыля стариккесö и кагаэсö душегубкаын пöдтöны, дзик тараканнэзöс?

— Не пленнöйыс сэтöн виноват. Да и не быд солдатыс эд фашист. Мортсёйисьыс пленас оз и сюрöтчы... Виноват сэтöн приказ. А кин приказсö сетö?

— Кöть мый тэ шу, а зверься умöльжыкöсь нiя!

— Сэтшöм кодьöсь даки, — сётаки соглашайтчö Егор и кежö бокö, мед панöвтны янсöтчöм куканьöс.

Вöр дорсис Егор нетшкис да сёйис кытшöмкö туруннэз, сыбöрын дыр нёджжалiс ыджыт кöз — видно, урöс казялiс — и вöлись петiс миян дынö.

Баитны сэсся дугдiсö, кöть и мунiсö ордчöн.

Сiдз и шагнялiм мийö жагöника Шулим грань кузяс каждöй аслас думаэзöн, аслас шогöн, аслас гажöн. А миян вевдöрын сiдз жö не тэрмасьöмöн уйисö куим кымöрок, Шуркалöн нора песня да кöклöн каитчана, бöрдöмсора голос.

А меным зника эз сет öтiк дума: мыля Егор оз шедты Гавкалiсь бедьсö, ежели сыын эм золото и дона иззэз? Может, сэтöн быдса миллион руб куйлö. Эта деньга вылö позис бы строитны нето небны американсалiсь не öтiк самолёт.

Кузьтуй ме олi эта думаöн, некыдз эг вермы вунöтны Егорлiсь висьтасьöмсö. Колö пондывны шедтыны сiйö бедьсö. Талун жö. Босьтны зыр и ойнас гарйыны. Эшö чер ковсяс — жугдыны бедь оропсö, пельдöтлыны сэтiсь дона иззэсö. А сыбöрын сетны нiйö банкö. Не, перво колö гижны Ворошиловлö письмо, висьтавны сылö, что менам эм уна золото да брильянттэз (дона иззэс, конечно, брильянттэз) и что ме быдöс сiйö сета государстволö. Копейка ог коль, быдöс Москваö ыста. Буди, шапка аслым неба, а то тöвнас нем лоас юр вылö пуктыны. И эшö фотографируйтчам быдöнным да иньдам карточкасö айöлö. И Семёнлö, очавонöлö, тожö ыстам. Гажажык сылö лоас, ранаэс чожжыка веськаласö. Сiя эд командир, а командирлö колö командуйтны, не госпитальын куйлыны. Вот эшö мамöлöн шаль абу, и тöвбыт сылöн юрыс кынмö...

Интересно, тöдö я кинкö Гавкаыс бедь йылiсь? Кыдз бы эз одзалö менö. А может, важын ни кыскисö?

Титовна кольччис мыйлöкö бöраным, и ме пондi юасьны Егорлiсь, мыля оз шедтö чудскöй бедьсö.

— Пондылöмась, шуöны, нö Висьöлыс оз сет, — отвечайтiс Егор.

— Кин, шуан, оз сет?

— Кöда чудскöй кладдэсö дозоритö. Вöрисьыс инö, веськыта шуны дак.

— Некинлö-некинлö оз сет?

— Счастливöй мортлö сетö, кöда некöр эз грешитлы Висьöлыс одзын.

— Кыдз эз грешитлы?

— Но, эз ёрд сiйö, молитва сы юр вылö эз иньдöт, эз лöгöтлы сiйö.

— А тэ эн грешитлы, деда?

— Кыдз тэныт шуны... Молитваэсö ме тöдлi, да важын ни вунöтi. И юрбитны, натьтö, ог ни куж. А сiдз-ту, конечно, грешнöй. Раз му вылын ола, значит, грешнöй. Святöйес пö только, кулöммес, абу грешнöйöсь.

— Сэк мийö быдöнным грешнöйöсь? И некин бедьсö оз вермы шедтыны?

— Мыля оз? Сiдз только баитсьö — грешнöй пö. Посадiсь Йöрга вот, тожö не святöй, адззöма вöлi золотöй лагунок, а лагунокас пö золотöй акань — чудскöй ен. Сысянь и богатсявлöма...

Синяшорö мийö локтiмö эшö вылын шондiöн, но мöссэсö йöртiм загонö. Егор бöра лыддис нiйö йöр вывсянь, а ме нёджжаси гöгöр, тöдсаси виль местаыскöт. Ме вöвлi ни эстöн одзжык, но сэк эз вöв казармаыс, кыдз Егор шуис тёсiсь керöм керкуоксö, эз вöв шор весьтын лысöн вевттьöм сарайыс — йöв видзан. Да и öсексö нюжöтöмась шор пöлöнняс улöжык, ыждöтöмась. А поссö сiдз и абу лöсьöтöмась: пöлiньтчöма сiя, увтiсь керрес кöстiсьöмась.

Местаыс гажтöм. Шульга берегас, посыс увдöрын, вöлi огородеч пасьта кушин. Öтмöдöрсянь сiйö дзескöтö вöр, тшöк да ён — кондовöй. Стогодся кöззэз да ньыввез нюжöтöмась кушинас уввезнысö, дзик ыджыт ош лапаэз, бытьтö лöсьöтчöны кинöскö кватитны.

Веськыт берегыс крута лэдзчöм самöй шор бердас. Сiйö поперёк орöтöмась кык кырас: öтыс ордчöн посыскöт, а мöдыс тридцать метр мымда улынжык. Вот и шогмöм ны коласö Ошкымöс, кыдз шуöны кырассэз коласiсь крутиксö.

Логас кайöма осока, бражник, сьöктантурун, туригум. Гöгöр сiсьмöм да нитшсялöм валёжник, кöчкаэз, гöппез. Мукöд местас шорыс совсем оз тыдав, котöртö чашья увтöт. И только Ошкымöс весьтöттяс сiя кушамöма да паськалöма, но и сэтöн шочыника быдмöны баддез да ловпуэз.

Гажтöмтöны этö местасö кырас дорись кöс пуэз. Нiя, дас мымда, мöддэс сьöртi дзик орласьöм паськöмаöсь, а мукöдыс — нач пасьтöмöсь. Быдöнныс пöлiньтчöмась шорланяс, бытьтö лöсьöтчöмась чеччöвтны мöдöрас да тальны казармасö.

Но ме эг повзьы не пемыт вöрсис, не нёштöм кöс пуэссис, не гажтöм кырассэссис. Эшö айöсянь тöда: полан вöрсис — эн мун вöрас; а мунiн, дак эн пов.

Кöр водiсö мöссэс, Егор эшö öтпырись лыддис нiйö и висьтасис:

— Öтiк кольччöма. Ковсяс кошшыны.

— Поди, локтас эшö, — горöтчис Титовна. — Öтнас некытчö оз мун.

Меным тöдвылам усис, что Гавкамысас, кöр шоччисим, öтiк мöс ветлöтiс вöр дорöттяс. Эз я сiя енöвтчы сэтчин?

— Гавкамысас, натьтö, кольччис, ― висьталi ме. — Кöр ме ваысла мунi, торйын вöлi, а локтiкам эг адззыв.

— Кытшöм? — юалiс Титовна.

— Чочком, паськыт сюра.

— Этö Майка. Ноко видзöт, Егор, эм я сiя.

— Как раз сiя и абу, — висьталiс Егор. — Мыля нö кольччис? Некöр тай эз янсöтчыв.

— Гыжыс, поди, чайдiс нето эшö мый, — решитiс Титовна. — Эгö эд тшöтшкöртö. Видзöтiн бы, Егор, — и содтiс: — Öшас удой — йöв тiянлö оз ло.

— Дедö мыдзис, — висьталi ме, — ась шоччисьö невна. А меным дыр я ветлыны? Котрася часöт.

— Öтнат? А ежели мый лоас? — повзис Титовна.

— Мыйкö кера жö эд, — эг сетчы ме. — А ог вермы, дак татчö локта.

— Рам мöсыс, — шуис Егор. — Кыдзи гыжыс чайдiс, то жагöник вайöтас. А куйлö, дак вундыштас. Только жагöник сибöтчы, лапкöтышт, сюррес колассö гыжйышт перво. А мийö сы коста поскотинасö видзöтам.

Быдöс мунiс сiдз, кыдз меным колiс.

Босьтi ме Егорлiсь учöтик чероксö, нара увтiсь кыска зыр. Сэтчö Егор пыртiс отопкисö.

— А зырсö мыйлö? — дивуйтчыштiс сiя.

— Ковсяс, поди, он эд тöд, — бобгыштi ме и тэрмасьöмöн петi грань вылас.

— Да тэ нывкаэскöт лэдзчы, — сувтöтiс менö Титовна. — Часöт нiя вöрзясö.

— Видзчись нiйö, кöр эшö вöрзясö. Может, сибдiс Майкаыс, — орöтi ме, баснисö и сэсся бöрам эг видзöт. Нем сэтöн кыскыны, а то эшö оз лэдзö. Пöриссеслöн часто сiдз овлö: висьталасö öтнёж, а керасö мöднёж. И правöн асьнысö лыддьöны.

Гавкамысö ме локтi шондi пуксяндорас, а вöввезнас менö сiдз и эз вöтö. Вот и надейтчы ны вылö.

Доль и поперёк ме кресталi мырьяинсö да сы дорись вöрсö, но Майкаöс эг адззы. Чисто пымалi, горшö пондiс пактыны. Лэдзчи логас, кысь павжуннас гумыштi васö, юи содззезнам да мисси. Бöр кайи мысок вылас, пондi кытсавны Майкасö. И шыасис эд!

Умнöй мöс тэ, Майка!

Котöртi сы шы вылö, ляга йывсис адззи. Сюйыштöм юрсö вожа кöз коласö и сулалö.

— Майка, тэ мый сэтöн керан? — юалi мöсыслiсь. Нюргыштiс мöсыс жалобнöя да лэбтыштiс вывлань юрсö —

зыртыштiс сюррезнас пуэсö, — дзик мöдiс висьтавны: видзöт пö, оз тöрö сюррезö пуэс коласö.

— Тэ сибдiн?

Мöсыс сьöкыта ловзисис: адззан пö, а сё юасян.

Чапки черöс да зырöс, пондылi отсавны сылö мездöтны сюрресö. Кысь ни! Эттшöм нальксис, если сюрас, ачыс вöрдядьыс оз пет.

Кыдз сiя пырöма сэтчö?

Гöгöртi мöссö, видзöтi бытшöмика — и вöлись вежöртi.

Охота лоöма Майкалö нинпу листтэз сёйыштны. А нинпуыс быдмö кöз бердас, но лягаланяс. Мöсыс дышöтчöма улö лэдзчыны и пондöма судзласьны мысок вывсяняс. Только мысокыс не мысок вöлöма, а зыбунын кöчка. Вот и мöртчöмась коккес, и не одз, не бöр.

Пöрöтны бы колö пусö, да черокö учöт. И пондi буждöтны берег дорсö мöсыс коккез увтö. Унакодь чапкалi пу дынас, топöтыштi нинкöммезнам, ась, мыся, лэбтiсяс сэтчö Майкаыс.

Но сiя эз и вöрзьöтчы. Коксö пондылi кыскыны, бöрсö мöдi бокö вештыны — нем эг вермы керны. А коккес пидзöсви ни мöртчöмась, голясö зэлöтны ни пондö.

И кутчи сэк пöрöтны пусö. Тэрмася, быдöс вынöс пукта, но кыр моз черокö кокасьö. Тякйи, тякйи — киэзö орисö, а джынсö эг керав. И лэчыт черокыс, да кокнит — немымда оз мöртчы. Жаралi, йöрнöсö вамис. Чапки шабурöс, миссьöтi чужöмсим ньылöмöс — и бöра сизьдыны. А мöсыс совсем ни чатыртiс юрсö, но сё оз и вöрзьöтчы. Кыски пуртсö, голя увтсис качкасö кули — личытжык лоис. Сэк вöлись вежöртi ме, мыля мöсыс оз вöрзьöтчы: озжык коккес мöртчö. Скотина, а вежöртö сiйö. Пöрись ни эд, оланыс велöтiс, натьтö.

Керала, ачым баита мöсыскöт, медласков кыввез кошша, тшöкта терпитны невночка.

Номмес пышналöны спинаöс, пырöны öмам, лякасьöны юрси бердам. Ме сьöлася, öвта юрнам и сё керала да керала. И вот ризьнитiс пуыс, кватшöтыштiс невна, но эз пöр. Эшö кералi, досповна орöтi, но сёравно сулалö. Мöсыс вöрöтыштiс юрнас — оз шед юрыс. Кутi пусö, вöрзьöтi — уввез вылас öшшö. Кылiс Майкаыс личытсö, кира-лопка кыскис одзись коккесö, мездöтiс юрсö. И кайис ляга берегас да веськыта тэлляинöттяс петiс кушинас — зыртiс вывсис номмесö.

Ме пасьтаси, босьтi зырсö да мунi сы дынö. Лапкöтi голясö, малалi боккесö, гыжжесö — быдöс дзонь, некытi абу дойдöма. Только коккес дрöжитiсö, кыдзи менам жö. Этö мыдзöмсянь да повзьöмсянь.

— Но, вот и бур, Майка, что петiм эта кляпчаись, — баита ме мöсыскöт. — Давай-ко шоччисьыштам öнi да думайтам, мый одзлань керны. — Ме пукси, мöсыс нюкайтчыштiс да водiс бокам. — Вот и ладно, куйлышт эстöн, а ме аслам дело бердö кутча. Кöть и пемыт, да кыдзкö гарья.

И полöмö петiс медодзза шагсö керны, и öддьöн колiс меным миллион рубыс. Усис тöдвылам айöлöн басни. Эта вöлi важын ни, кöр ме кайлi Синяшорас первуись.

Егор висьтасис, кыдз сiйö пондылöм кыскыны йирö вакуль, но повзьöма сы гöна чужöмись и пышшöма. Кывзiмö сылiсь висьтсö, и айö висьталiс меным:

— Тэ, Петю, кывзыны кывзы, но тöд: не быль сiя, а сказка. Не вöрись, не ваись, не суседку — некин абу.

Да, ме тöда ни этö — абу нiя. А вöлi я Гавкаыс? Эм я сылöн бедьыс? Может, тожö сказка? Не, вöлi, натьтö. Историчканым тай тожö висьтасьлiс чудскöй каррес йылiсь. И книгаись лыддьöтiс. А книгаас только правда гижöны. Немись повны, колö кошшыны.

Медвылын местасö ме примечайтi эшö луннас и сэтчö сразу инми. Но бедьсö кошшöв-кери. И чередь адззи бы, да зелёнöй биоккез инмöтiсö. Повзи перво нiя биоккезiсь — кöин, мыся. Мый дырна и сулалi сы одзын, эг лысьт сибöтчыны. И сiя сулалö да орсö синнэзнас: то куньыштас, то бöр осьтыштас. Сытьнитi — эз и вöрзьöтчы. Кытшöм сэтшöм притча, мыся, мыля оз пышшы? А кывлi, что гожумнас нiя пöтöсь и мортсö оз вöрöтö. Но черокöс сё жö лöсьöтi — сякöйсö позьö видзчисьны. А сiя сулалö!

Лöгаси да чапки зырöс веськыта синнэзас — кунис öт синсö, а сы туйö куима öзйисö. Дак этö жö дона иззэс, натьтö, югьялöны!

Сибöтчи, пешлi кинам — не из. Чувйыштi чер оропнас — няж паськалiс. Быдöс пазöтi, быдöс нямралi киэзнам, а иззэсö сiдз и эг адззы. Мусö пондi гарйыны — вужжез петiсö, чорытöсь, дзик коскаэз. Вежöртi: сiсь мыр пазöтi, а югьялiсö пугаггез-светлячоккез.

Сулалi-кери, чурс сьöвзи да пондi петны мöсыс дынö, и инми мöдiк мыр вылö, только эта вöлi кузьжык. Пешлi сiйö — нильыгкодь из, чуть нитшсялöм.

Бедьыс!

Нетшкöвтi турун, чышки изсö. Брильянттэс оз югьялö. Сiдзкö, не вевдöрас, а пытшкас нiя. Конечно пытшкас! Вöлiсö бы вевдöрас, дак важын ни бы кулисö нiйö.

— Сiя бедьыс, сiя, сiя, — зiли ме аслым ыджыт радсянь. Эта жö радыс меным сетiс сэтшöм вын, что кынымкö минутаöн ме пазöтi джын изсö. Чер обух увтiсь чеччис би, синнэзам резсис песок, а ме сё паздi и паздi. Уджалi сэтчöдз, что киэз дугдiсö черсö видзны, а брильянттэс эз мыччисьö.

— Раз абу вевдöрас, дак, натьтö, улынжык, муас, — висьталi ме и кутчи зыр бердö. — Сёравно адзза.

Джын метр пыдына гарйи öт боксö. Зыр йылыс кальскнитiс мыйкö бердö. И сэк жö кусттэзас горöн ризьнитiс, дзик потш чегис. Ме сiдз и ляпкиси местаам. Юрсиö кышöпöн сувтiс, вывтырöс дзик кöдзыт ваöн гывьялiсö, синнэз совсем пемдiсö. Кыла, кинкö кусттэсö паськöтiс бöрам. Дзар кери — сивöй тоша да кузь сюра рожа ме весьтö мышкыртчöма. «Сiя!» — вирдыштiс юрам дума, и ме тöвчикöн лэбзи Висьöлыс одзись.

Да разь пышшан сы дынiсь? Кери шаг-мöд да буткиси кыминь — коккезöс гезöн каттис.

Сюйыштi нырöс нитшас, куйла садьтöг, горöтчыны ог вермы. Кыла, локтö меланьö, сьöкыта шагнялö. Локтiс, сувтiс. Вот пöльыштiс юрбöрам уль руöн, сэсся горзьöтiс, и нырам вачкис сирсора назём дук. Голиэз да кульбуккез сёйöма.

Куйла, видзчися, мый пондас керны. А сiя сулалö, ружтö да ушкö юрбöрам.

— Ммм, — мурзьыштiс сiя, и ме вевтти юрöс киэзнам. А сiя сё тешитчö ме вылын, не оз куль, не оз сёй, а только нюргö мöс моз.

«Мöс и эм, поди?» — думайтыштi ме и видзöтi синджыннам. Сэсся лэбтi юрöс, буржыка видзöтi — сэтöн сулалiс Майка.

А кин нö коккезöс гезнас каттьыштiс? Тожö мöсыс?

Судзöтчи, путшöтi кок бердсим сьöвтöтсö — кöчвонь вöлöма. Не весь, тыдалö, баитсьö: шардöм ракаыс и мырись полö.

Чулалiс полöмö, сьöлöмö дугдiс чепсасьны, и ме бöра кутчи зыр бердö. Невна только пыдынсьöтi ямасö — пöрис изыс. Сы кузя и вöлöма. Вештi сiйö бокö, увтсö эшö чувйи, шамралöв-кери киэзнам мусö, но му кыдз му, небыт да баг дука. Сiдзкö, эта не Гавка бедь и некытшöм брильянттэз сэтöн оз вермö лоны.

Босьтi ме черокöс, зырöс и вашöтi Майкасö грань дорö. Сэтöн и пантасис Егор: локтöма менö кошшыны.

Дата добавления: 2015-11-16