ВИДЗÖТ, КЫТI МУННЫ

Тöн Андрей Никитич мунiс Перемö, и ойсö Олявка бöра узис умöля и чеччис висян юрöн. Кылiс и адззис, что одзöв чеччыны, а онмöссьыны эз ни вермы и, кöр тöдвылас усис, что талун касьтiсян субöта и непременно локтас Дзолинь бабыс, сiдз кыдз эз вöв семикнас, лэбтiсис — сы локтöдз колö кайлыны Виль Гублянö, кытöн сылöн депутатскöй постыс, да видзöтны, кыдз уджалöны пода вердiссез. Да и Андрюша тшöктiс висьтасьны Нина сойыслö армейскöй письмоэз йылiсь.

Котöрок тожö чеччöма ни да и ештöма дзимлявны чагсö, кöда шогмис стын лöсьöтöм бöрын, и аслас, и Олявка межа вылiсь.

Кынымись Олявка баитлiс старикыслö, медбы сiя эз уджав сы понда, да быдöс весь. И часöт эз вермы чöвны, осьтiс öшынсö, кутiс тёритны-йывдыны:

— Карп Иванович, тэныт кыным ни год? Старик бергöтчис сыланьö, шыасис паныт:

— Меным-ту? Годов семнадцатьыс, натьтö, эм ни, раз ичмонька вайöтi. А мый, Гавриловна?

— А сiя, что зонка мывкыдöн олан, дук он кывзiсь... Враччес мый шуисö? Не уджавны!

— А кытшöм ни сэк олан, кöр он вöрöтчы? Уджтöгьяс ме чожажык кула, — и висьталiс, мыля сы одза уджалö. — Талун перво касьтiсьны колö, а сёрöнжык гöрны пондам... Огородеччезнымöс. Венькаыс трактор корöма.

— Ой, а ме луксö эг на бöрйы!

— Ештан эшö. Миянiсьыс эз жö тай... Андрейыс ась петалö, кöр локтас, сурокыс бытшöм шогмöма. И ачыт кежав.

Уна я сыкöт баитан? Максимкасö, сылiсь правнуксö, кокнитжык вежöртöтны.

Öтöрас югьялiс шондi, кымöрыс — волькыт лöз чышьян, быдсöн öтвывса и мича, и Олявка мунiс öтпöвсöн, кокнитик вельветовöй туфлиэзöн да куш юрöн. Зэрок бöрсянь муыс абу на косьмöм, вöлi вöснитик нöгыль, и сiя шедiс кок пыдöссэз сьöрö, чеччис местасис, дзик кень.

Асывсянь тöдчис, что луныс лоас öддьöн шоныт, и эта как раз сiя, мый öнi, басöк зэроккез бöрсянь, колö мулö.

Гублян эшö узис, и кылiс, кыдз посад саяс, ю дорись йöрын, пырскайтöны-несйöны чаня вöввез, кöднö оз лысьтö лэдзавны поскотинаö — сэтчин мыччасьлöны кöиннэз.

Шыркйисö-лэбалiсö сьöдкайез, чавканнэз, ракаэз. Жогор-пожум дынiсь кöз йыв вылын вöрöтчытöг пукалiс тарварыш — вöджжис асывся выть кежö кытшöмкö пистöжокöс, а шедас кö, дак и том курöжокöс. Пожум вылас, тожö йылокас, нюжласьö-видчö, каститö разбойниксö тёковка катша.

Вильгублянскöй туй дорöт, öт бокас и мöдас, кытöн мöйму вöлi клевер, кöдзöмась сю, и быдлаын тыдалöны дудiэзлöн стайкаэз да öтка ракаэз, а посад бердас öктiсьöны курöггез. Шульгаланяс, вылынжык местаас, сюыс петалöма ни и лöсьöтчö вевттьыны мусö, а ю дорöттяс эшö нем оз тöдчы. «Натьтö, анькытш кöдзисö, ежели дудiэс öктiсьöны, — думайтiс Олявка. — Но бöра и дöнзяс тэныт, ыбöй: чисто подтасö!» Сiя кежис туй вывсис, öтпыр и мöдпыр тальччис небыт, бура гöрöм и пинялöм да катокöн волькöтöм му кузяс, пондiс смекайтны сеялкалiсь чуть тöдчан виззесö. Кöдзöмась бытшöма, быд тусёкыс тырöм, вевдöрас öтiк абу. И куйлö сюыс часöт, шонтiсьö шебрас увтас да польдö, лöсьöтчö ёнжыка мöртчöтчыны вужнас ыбыс пытшкись благодатьö, кутчисьны му бердас.

Дыр тэ видзчисин этö гажсö, небзьöтöм муа ыб! Видзчисин, ыш лолалiн пемыт ойезнас, кынмалiн да потласин мороззэзöн, вартсин, вошшитчин зэрикö, косьмин да пуштiн шондi öд увтын и сё видзчисин сiйö — гöрись-кöдзисьсö. И локтiс сiя, и керис сiя, мый колiс, керис сiдз — любо видзöтны. Быдты öнi няньсö, юрвердiсь!

Олявка гуддьыштiс чуньнас мусö и былись кыскалiс анькытшшез, но не öтнанысö, а зöр туссезкöт. Анькытш гöридз некодя, оз вермы сулавны, водö, и вот агроном лöсьöтöма сылö быдмик кежас надёжнöй беддез — чорыт заа зöр. Быдöс этö ыбсö вундасö да ытшкасö зелёнöйöн, кöр анькытшлöн пуртöсыс — ляпушка.

Тыра, кöдзыса ыбыс юö льöмпу цветöн боссьöм русö, радуйтчö шоныт асылыслö, гожся лöньыслö. И Олявка радуйтчö: лоас бöра мыйöн вердны подасö, лоас яй, лоас йöв, лоасö кольттез.

Ферма дынiсь руын сулалiс шöма дук. Сiя кайö траншеяись, кытiсь трактор босьтö силос. Мöд ямаыс вöлi рекмöм эшö тöвнас, öнi сiйö весöтöмась, чышкöмась, кöть талун жö пондöтчы тэчны виль силос.

Трактористыс вöлöма Африкан. Сiя казялiс Олявкасö, колис тракторсö и пондiс баитны:

— Тэныт зоотехник колö, да? Дак сiя абу.

— Абу и абу. Ме сiйö мöдiк лунö пантала.

— Кытшöм делоöн татчö?

— Сельсовет иньдöтiс, тшöктiс тöдны, кыдз уджалат.

Африкан дзар керис Савыркина паськöм вылö, веж туфлиоккес вылö, öзтiс сигарета да висьталiс:

— Тöдан эд, кытшöм миян уджыс: кисель панялам. Только не йöлаö, а назём ваись. Пидзöсви нятьыс — паття. Тракторыс сибдö.

— Не пыр жö эд сiдз...

— Не, конечно. И полойыс не быдлаын, а кытi тракторнам нярьяла. Висьталiс тай кöдковну Венькаыс: кыдз пö кöдзсяс, тракт керны кутчам. И керас, ме верита. Изгарьянсö весöтöны ни пö...

— Сьöкыт сылö часöт, оз ешты быдлаö сибавны, — жалейтiс Олявка соседсö. — Эта ыжда бригада! Фермаэз, кирпичнöй завод... И партбюро сы киын.

— Ыджыт тракторлö — ыджыт додь. А что парторг — миянлö буржык: асланым колхозник, öтiк майöлöн шöммöтöм. Пукты тэнö, кöда миянлiсь нуждасö эз пешлы, — и тэныт умöль, и колхозыслö умöль.

— Этö сiдз, — согласитчис Олявка.

— А мый нö ме баита?.. Тэ вот мый... Али öддьöн тэрмасян? Кывзы невна эшö, кыдз депутатлö норася... Только гиж, пожалуйста, а то вунöтны верман, и басниö весь лоас, кыдз понлöн вувтöм — тöлыс нöбöтас...

— Поди, ачыт бы гижин да сетiн меным?

— Ог любит гижны. Кывзы. И эн думайт, что ас пондам тöжда. Ме не уджсис, не нятьсис ог пов. И, слава главбухлö, деньга локтö... Котöрок тай кöдковну помещикöн шуис... Лоас здоровье — и пенсия сетасö, но горвыв подлöсö ог тунгись... Ме нывкаэсö жалейта. Быдса месяц выходнöйтöг. Эд челядь эшö: школаись — да картаö. Кöр и городö бы ветлiсö али эшö мый. Ны годдэзын, поди, вöлiн жö, дак тöдан.

— Кин сiдз керис? Нылöн эд сменнöй высьтiсь вöлi.

— Кин керис? Оланыс... То öтiк шогалö, то мöдiк, а правленнё ны туйö некинöс оз сет: терпитасö, не киöн высьтыны. И зоотехникыт оз ешты — учöт кагаэз... Кыдз бы кöдакö эз пышшы... Вон асьныс локтöны, баитан вöлись, — и Африкан иньдöтчис трактор дынö.

Кыдзза расiсь, кöда торйöтiс картаэсö да деревнясö, петiсö нёль нывка. Öтiксö ны коласiсь Олявка сразу тöдiс: Андрей Никитичлöн племянница, Ниналöн шöрöт нылыс, кöда мöйму кончитiс дасöт класс. Пасьтасьöмась не дона паськöмö, но басöка, сöстöма и моднöя. Конечно, нылöн эм спецовка, но нывкаэс видзöны сiйö фермаас, а пыр озö новйö, кыдз инькаэс.

Но Олявкалö син вылас усис эшö öтiк морт, кöда котöрöн пырис ферма оградаö — Венькалöн зон Максимка. Сiя пöдöма котöртöмсянь, и инькаыт сразу казялiс, что этö сы дынö иньдöтöмась и не бытшöм юöрöн. Сьöлöмыс нёштöма бергöтчис моросас, дульыс сибдiс горшас, и сiя нем эз ешты горöтчыны.

— Тётя Оля, тiян бабныт кулöма... Корöны Ыштайö... Дзебсьыны.

Савыркина ньылыштiс дульсö, ловзисис бытшöмика, юалiс:

— Дзолинь бабö?

— Ну, сiя. Папныт сельсоветö звонитöма, тшöктöма часöт жö локны.

— Ме локта. Спасибо, Максимка.

Нылочкаэс сибöтчисö сы дынö, здоровайтчисö. Олявка тэрмасьöмöн, шывтi-вывтi баитыштiс ныкöт и кöсйисис вовлыны мöдiк лунö да петiс ферма оградаись.

«Дак вон мыля семикнас эз вовлы — шогалiс ни,— жалейтiс бабсö Олявка. — А майнас эшö боёка вöрöтчис...»

Дзолинь медбöрьяись кайлiс Гублянас узик кежö. Сэк быдкодь баснисö баитiсö, важсö и вильсö казьмöтлiсö, да сё лöня-бытшöма. А сiя басниыс, кöда понда, может, и вовлiс старуха, пондöтчис рытнас.

— Сотчиссьö ни масiсьö, — чай юикö шуис Дзолинь. — Огарочок кольччис. Колö думайтны, кыдз душаöс весöтны, кытшöм спасеннё кошшыны.

Вежöртiс внучкаыс, что пöрисьыт серьёзнöя баитö, мöдö керны кытшöмкö важнöй оськöв, и эз понды дзугны сылiсь плансö, а нельки отсалiс:

— Ачыт тай шувлiн, что душалöн спасеннёыс — молитваын да каитчöмын, а тэ эд еныс нимöн и водан, и чеччан.

— Сiя етша, натте, кага, — юрбитöмыс. Греххезö уна менам да неучöтöсь. И власьсö, и отирсö, и енсö нельки бöбöтлi... Сiйöн, натте, и накажитiс господь-батюшко — дзир öтнамöс колис... Öтiка оланыс — не олан, а наказаннё. Эн вунöт этö, Олю... И некинлö ме öнi ог ков, а кула, дак и коскаэзöс, поди, оз тыртö.... Попыс даки не мукöд кодь, да эд... Ок!..

— Тыртасö, баб, кыдз колö.

— Эд и деньгаокö вель тума öксис. — Сiя павтыртiс кофта подувсö, пöрччалiс векнитик дöраовöй йи, кöдö пöрись отирыс шуöны тельник, нюжöтiс Олявкалö: — На-ко лыддьы, кыным гöрöдок.

— Куш гöрöд тай да, — дивуйтчис Олявка и береститöв-керис йисö да вöлись висьталiс: — Ровно сорок гöрöдок.

Бабыс пöрччалiс мöдiк тельник, тшöктiс эшö лыддьыны. Мöдыс эз дышöтчы, лыддис, и бöра сымда жö петiс — нёль десяток.

— Да квашня гасник вылын двадцетя, — ошшасьöмöн горöтчис старуха да öддьöн довольнöя вырснитiс чайсö. — Гöрд йыоксö — Кудымкарö тэчи. Лöзсö — тожö сэтчин. А двадцетьыс — горт посадын.

— Мымда жö эта лоö?

— Сорок сороков, да сорок сороков, да двадцать сороков — эта лоö, кага, сто сороков... Сыным руб деньгаö... Городсис, кыдзи пуктi, эг и вöрöтлы, а татiсь чинтлi кыдзкö.

«Но купчиха, но спекулянтка! — видчис Олявка думанас, да шы эз сет. — Эшö проценттэсö оз тöд».

А бабыс одззаыс дынö содталö:

— Эшö пиялiс, натте, тумакодь, эг юасьлы öнi... Да гортын кöс малина коласын — горвыв потш бердö паголёнки домалöм... Кынымкö сорок жö сэтöн.

— Шыррес эд сёясö!

— Каньыс мыйлö нö? Шыр менам оз ов. Одзза книжкаэсö сэтöн жö и видза... Сэтöн... — Старуха сорасис, мый мöдiс висьтавны — эз инмы. Думайтiс, думайтiс да макнитiс кинас. — Епимей пыр зiльö: «Джынтö — меным, мöд джынтö — вичкулö. Кыдз румынскöй артиепископöс дзебам, и вексö пондасö касьтывны». Адззывлöм сiя, кыдз Румынияас дзебöны... Да эд быдöнныс юöны. Нылö сетны — кыдз кöбыла бöж увтö дарсавны...

— Но и баб! Мыля нёштöма баитан?

— Кыдз инмис... А сiя сiдз и эм. Тöда нiйö, кыдз ассим киэзöс... Витялö, вонытлö, мыся, коля — гöтрасьны пондас и пригодитчас бы, — дак сiя енсö öддьöн кулитö бöрана. Васно жö Гавраыс — айкокпöв... Тэныт, Олю, коля...

— Меным?

— Тэныт, кага. Эд Лёва зоныт жöник лоö. Меным, шуö, мотоцык, колö... А сэсся машина ковсяс. А мый вылö сiйö босьтан? Гавра дедыслöн — вочöм пыдöса вешшан да чесность, тэнат — чередь я унаыс эм... Сыбöрын Лёваыслö кыдз ассит сетан, зон пай бытте.

— Норовит, баба, эн тэрмась.

— Некытчö ни норовитчынытö. Олöм зарубкаэзö — кык сорок ни. Талун — эм, ашын — абу. Эна луннэзö жö, кыдз кöс лоас, городас ветла, а семикнас татчö котöрта да висьтала...

Виль Гублянсянь бертiкö Олявка кежалiс сельсоветö, мöдiс буржыка юасьны бабыс кулöм йылiсь, но сэтчин тöдiсö öтiкö: талун дзебöны.

Колiс тэрмасьны, и Олявка гортас только вежис паськöмсö да босьтiс сумка. Тöдiс, что дзебсьыны куш киöн оз мунö, а мый нöбöтны — эз тöд. «Муна сiдз, а сэтчин адззылам, мый ковсяс. Мамö да папö сёравно бокö оз керсьö, отсаласö... Вот бы Андрюшаыс эшö локтiс. Ноко звонита техникумас, поди, гортын ни...»

Бöра пырис сельсоветö, звонитiс. Техникум шыасис чожа, и Олявка юалiс, эз я лок командировкаись Верепов.

— Кытшöм командировка? Сiйö некин эз иньды. То тай кытшöм сылöн Андрюшаыс: повтöг пондiс бöбöтчыны. Первöй жö год вылас кö сiдз керö, дак мый сыбöрын лоас? Не, не олан сэтшöмыс! Кинкö, может, и велалiс бы сiдз овны, а Олявка — оз. Сiя не джыння морт, и не джын пай сылö колö, а быдсаö. Только сiдз, а не мöдмоз! Эм — дак эм, абу — дак и слава абу! Сiдз сiя и висьталас Андрюшалö: «Адззин буржыкö — ов сыкöт, красуйтчы... И вунöт ме дынö туйсö...»

И лоис сэтшöм охота горзыны, да вöлi не гортас, а йöзас синвасö чапкыны эз велав. Да и эз на вöв, тыдалö, сы ыжда лöгыс, медбы герьясьны да нетшкыны ассис юрси, а просто кутiс недолыт, кайис горшас öбида...

Сельсовет öшын увтас пантасис Катай Катя, кутчис быздыны ладтöм басни:

— Мыля сетчöма карланыслö, святöй кывсö тöдö да?

— Кытшöм эшö карлан, Катя?

— Да эд аййöлыс, вöрдядьыс, бабтö кыскалöма!

— Не гортас разь кулöма?

— Пистикавтöн пö, не гортас... Лётöйыс вийöма.

— Ох и кужат тiйö сказкаэсö висьтавлыны!

— Сказка не сказка, а сiя, антус, декуйтчöма... Дельнöй морт вöлi бабыт: и кага примитiс, и шогалiсьлö отсалiс, и кулöмöс кужöмöн кольлалiс.

— Дыр олiс, сiйöн и велалiс быдлаö.

— А гортас пö оз и мöдö пыртлыны — ыб вывсянь да шойна вылö...

Локтiс автобус, вайöтiс медодзза гöссезöс, чериалiссезöс да касьтiсиссезöс. Сэтöн вöлiсö, натьтö, и аймам, кöдналöн челядьыс шоччисисö пионерскöй лагерьын. Локтiсö, и Гублян нач саймис, шыасис ёнжыка, горöнжыка, пондiс видзöтчыны ёсяжык синнэзöн.

Локтiссес коласiсь унажыкыс иньдöтчисö пуовöй тротуар кузя, кыдззез да тополлез увтöт лöз палисадник пöлöн, кöда пытшкын сулалiс гöрд звездаа обелиск. Шондi югöррез кöчокöн чеччалiсö горожана очкиэз вылын, чемодан замоккез вылын, бидоннэз вылын и керисö асывсö эшö югытжыкöн, ласковжыкöн, гортiсьжыкöн.

Отир ванырöн пырис магазинö — кин конфетла, кин табакла, а кин и просто сiдз — инмис визывтан шорокас да и кывтiс öтлаын.

Магазин дорас чатрасис Чикиськинлöн зятёкыс, но тöдтöм да эшö городскöй йöз дынö сибöтчыны эз лысьт и некинлö эз шыась. Сiя, абыз, ештöма ни кытöнкö «касьтiсьны», но зобыс абу на тырöм, и кошшö ёртöс, кöда вермас содтыны кынымкö десярик, медбы небны сур, а сэсся, ежели нöбöтасö коккес, кайны могильникö. Сы вылö видзöттöн Олявкалö бöра жаль лоис Венька, кöда этшöммескöт уджалiкö öштö уна вын и етша адззö долыт лунсö. «Нöш — нöш и эм, — кулитiс сiйö Олявка. — Дыш, ныж и тыасьöм...»

Шофёр босьтiс колонкаись ва, содтiс радиаторö и сэк жö вöрзьöтчис бöр туйö, кöть и салонас, Олявкася, некин эз вöв. Тöдiс, что сiйö быдса базар видзчисьö Ыштай туйвежын, тасянь сизимöт километр вылын, и Кудымкарöдз мунiсьыс лоас тыр автобус.

Олявкалö вöлi бур: ыркыт, пукавны небыт, некин эз мешайт думайтны. Но медодзза жö километр вылас думаэсö дзугис балямош: пондiс лэбавны-йöктыны чужöм одзас, бытьтö видзöтiс синнэзас да мöдiс тöдмавны, мый пусьö мортыс юрын, нето висьтавны-торйöтчыны аслас гореöн, кöда сыкöт аркмис часöт — шедiс пленö — да корны отсöт.

«Конечно, колö отсавны, — догадайтчис Олявка. — Мошыс, поди, как раз бабöлöн душаыс и эм и вовлiс прощайтчыны Губляныскöт? Висьтавлiсö тай: Савыркиннэс — балямош увтыр...»

Сiя осьтiс матiсьжык öшын, но осьтаас уськöтчис тöвныр и пöльтыштiс мошсö мöдланись лабиччез весьтö. Олявка эз дышöтчы чеччыны да осьтны öшынсö и сэтчинiсь. Мошыс звигнитiс-лэбзис медодзас, бура люкасис стеклоас и усис капот вылас. Шофёр шовк да шовк вачкис сы кузя кепканас и чышкыштiс вийöмсö джоджас. Сэтöн и кырöтiс Олявкасö: эз вермы зэлöтны нерввесö да йöртны синваэсö, и нiя öсилейтiсö да сiдз и тарöвтчисö, дзик анькытш туссез, чужöм кузяс. И тырмисö нiя машинаыс сувтчытöдз...

Медодзза жö вöрокас, тракт дынсянь джын километр ылына, Олявкалö пантасис Ыштайись Игнат, кöркöся сосед, висьталiс:

— Мун шупытжыка, дзебны ни лöсьöтчöны...

— Одз тай нö?

— А мый видзны? Ачыт адззан: жара!

Тэрмась эн тэрмась, а куим километрсö он чеччöвт. И Олявка эз ни адззыв бабыслiсь чужöмсö: локтiс сэк, кöр старуха, зэв пöдналöм медбöрья гортас-позас, куйлiс могила пыдöсас и нёль мужик шытöг лэдзисö сы вылö чочком кодь изсялöм сёй, и стружитöм гроб пöввес нёштöма, ружтöмöн, дрöбалiсö чапкöм мусянь.

Видзöтчис-керис Олявка и казялiс, что Дзолиньлö местасö бöрйöмась не сэтшöмö, кытшöмö колiс старухаыслö: нёпын, кытчö чапкавлöмась быдкодь ёг, кытчö быдмöм шышыбар, урбöж да петшöр.

«Простит менö, баб, ежели мыйкö не сiдз кери, — думанас шуис Олявка, яма дорас сулалiкö. — Простит, пожалуйста...» И бöра петiсö синваэс, и сiя сайöвтiс чужöмсö содзнас. Сы дынö сибöтчис мамыс, горöтчис:

— Айыт эз тшöкты касьтiсянсö керны, и ме гортас нем эг лöсьöт. Татчö сёян да юан кайöтыштi.

— Асьныт тöдат...

Мама-ныла дынö гез каттикö сибöтчис Савыркин. Сiя талун вöлi жаг и лöнь — эз вачкись ас вылас.

— И олiс не морт моз, и кулiс не морт моз, — шуис сiя да сьöкыта ловзисис. — И касьтывны некинлö.

— Кыдз кужис, сiдз и олiс, — шуис Олявка. — Сы йылiсь, папа, талун огö пондö баитны. А касьтывны пондасö... Мый сёянсö кайöтiт?

— Черинянь, тупöссез, пистикись пирöггез. Кольттез эмöсь, брага.

Одзжык коми отир кулöммесö дзебис винатöг и кузь басниэзтöг, лишньöй стряпня эз вöв, но пыр вöвлi черинянь, пельнянь, ырöш. Ежели гожумöн да не кöс видз коста — керлiсö селянка, йöла сёян. Абу кö яй, пельнянь керöны капустаись, тшакись, кушманiсь, пиканiсь, пистикись — мый эм заптöмыс. Öнi, уль лун я, кöс лун я — касьтiсьöны кöть кытшöм сёянöн, но медперво босьтöны вина, и Олявка этö обычайсö тожö эз орддьы: котрасис магазинöдз, кайöтiс яг вылас квать руба водка — медбур чочком вина.

Мужиккес зыррезнаныс эшö лапкöтiсö лэбтöм нюдз мусö, а Савыркин гозъя ольсалiсö ни сы вылö сера дöраись пызандöра, тэчисö сёян.

— Ноко сёйыштам инö да старухасö сёян дорас касьтыштам, — рочалiс Олявкалöн мамыс.

— И юан дорас, — содтыштiс нылыс да сетiс мужиккеслö бутылкасö. — Этö сiя тожö ювлiс...

— Эн митингуйт, Олявка, — шыасис айыс. — Касьтылö да и гортö!

Часджын бöртi, кöр могильникас пондiсö чукöртчыны касьтiсиссез, пöрисьжык мужикыс копрасьöмöн гöгöртiс могиласö, шуис:

— Куйлы вöлись, старуха, шоччöт кок шеггетö... Сы бöрсянь кытшöвтiс могиласö и Олявкалöн мамыс. Савыркин только фуражкасö чöвтыштлiс, а могиласö эз гöгöрт и шы эз сет, сiдз и катыльтчис ворота сайö да тапикасьöмöн лэдзчис яг вылiсь.

— Простит, баб, — бöра шуис Олявка, и синнэзсис вились брызнитiс синва, и сiя эз понды чышкыны сiйö, а сiдз и мунiс ва синнэзнас могилаэс коласöт.

Ая-мама-ныла яг вывсяняс мунiсö Дзолинь ордö, медбы видзöтны, мый кольччис покойница бöрсянь, да думайтны, кытчö сiйö воштыны

Öтiк öшына керкуок, пуксьöм и ёна пöлiньтчöм керöсок ладорö, деревня дынсяняс сулалiс торйынмоз, дзик ыджыт семьяын паччöр ныв. Ойланьсяняс сы бердö жмитчöма учöтик чомок, кöдалöн кузьжыка лэдзöм керрес аркмöтöны векнитик посöдзок. Чомок бокас турун додь пасьта карта, джынысви тыртöм песöн, карта понас — гидок, а сы бöрын, огородеч мöдöрас, гажтöмтчö ляпкöса баня. Быдöс важ, сiсь, и невежöртана, мый вылын öшшö, мый бердын видзсьö. Этö казялiс и Олявка и эз шу нем паныт айыслö, кöр сiя висьталiс:

— Баран люкыштас — гиль-голь пöрöтас. Кытчö сiйö сэтшöмсö? Песö, буди.

Чомын — квашня, кринкаэз, чуж öр, сельница, пожжез да няньбекöр. Сэтöн жö печкан, куддэз, зу, пыркöтчан. Потш вылын öт дорсяняс öшалö дубас-йöрнöс, чулкиэз, нинкöммез, а мöдöрас — косьтöм туруннэз.

Керкуас медбурыс, пожалуй, вöлi коробья, кытшöмö шуöны купецкöй сундукöн: краситöм и серöтöм вевдöрсяняс кöртöн. Сы пытшкын зэв тэчöма, нырöмöн, ситец, батист, шёлк, сукно — тор да тор. Сортi-костi шедлiсö чышьяннэз, кофтаэз, запоннэз. Этö соровттöн мамыс кыдз бытьтö ас пондасис горöтчис:

— Деньгасö, шуöны, тэныт, Олявка, гижöма...

— Может, и сiдз, — шуис Олявка. — Ме ог на тöд, вот юася... А кытчö паськöмсö?

— Меным даки нем оз ков, — брезгуйтöмöн юöртiс мамыс. — Кинлöкö колö сетны.

Савыркин сувтöтiс нiйö:

— Ась олö кытчöдз, поди, тожö кинлöкö завещайтiс. Сьöдрака табуныс сылöн разь учöт?

— Монашкаэс? Нiя босьтасö-ö, — нюжöтiс мамыс. Пызан вылын куйлiс кучиковöй коркаа Библия да кынымкö молитвенник. Олявка адззывлiс нiйö, но киас некöр эз босьтлы. «Колас гортö нöбöтлыны, Андрюшаыс бы öддьöн лыддьöтö нiйö, — и книгасö осьтiкö сьöкыта ловзисис: нельки эта гажтöм часö тöдвывсис некыдз эз мун Вереповлöн бöбöтчöмыс. — Сёравно сы дынö уськöтчис, пöттöмыс дынö... Кыкнанныс öткодьöсь, рожаныс некöдалöн оз кульсьы...» — и горшсö бöра зэлöтiс горзöм, дзик гезокöн жуöтiс, но вынсьöтчис и синваэсö вермис видзны.

Книгаыс оссис сiя местаöт, кытöн вöлi письмо. Олявка босьтiс сiйö, бергöтлiс-керис, мыччис айыслö:

— Видзöт, пап, заграничнöй. И абу на лыддьöтöм... Штемпельыс Хельсинкилöн, финскöй.

— Кытшöм дивовежа гижö? Может, не сылö да?

— Сылö, пап: Савыркиной Полине Изотовне, — лыддьöтiс Олявка да чиж косялiс конверт дорсö, кык чуньöн кыскис гижöтсö. Эта эз гленитчы айыслö: сiя сувтöтiс барöтöм синнэсö нылыс вылö, кутчис выргыны:

— Чувйöны тэнö куллес, терпитны он вермы! Колiс перво районö нöбöтлыны.

— Ковсяс, дак и нöбöтам, — повтöг шуис Олявка и пондiс лыддьöтны паськöтöм письмосö горöн:

Милостивая госпожа Савыркина

Довожу до Вашего сведения, что 13 дня сего января преставился...

— Рочöн разь гижöм? — юалiс Савыркин.

— Ну да, рочöн.

— Нудаыс только порсьлöн, вунöтчин разь?! — ыкöстiс Савыркин. — Но, лыддьöт одзлань.

...преставился книготорговец господин Йозеф Лячканен и завещал Вашей милости часть движимого и недвижимого имущества, а именно: жилой дом двухэтажный каменный с флигелем и садом и со всем имуществом, а также вложенные в Финляндском национальном банке ценности на сумму 128000 фин. марок... Жду распоряжения Вашей милости.

Поверенный в делах г-на Лячканена

Яакка Суронен.

— Нем ог вежöрт: кинсянь, мыйсянь, кысянь? — сярзис Олявка.

— Мый сэтöн не вежöртнытö? — бöра ныкнитiс Савыркин. — Ёська Лячканов, кöда пышшис татiсь, олöма Финляндияын да чорзьöма и кольöма наследство...

— Родня разь миянлö?

— Тэ мый?! — рякöстiс Савыркин. — Тэ челядёк али тово? — сiя паськöтöм чуннезнас бергöтлыштiс юр вевдöрас. — Миян родын предателлес эз вöлö и оз лоö! Лöсйы этö ныр вылат и некöр эн вунöт!

— Дак кыдз инö? — эз мездöтчы Олявка..

— Кыдз инö, кыдз инö! — дзирдалiс айыс. — Бабыт сьöрын кöркö котрасис, клёктач... Печиктыны эг вермö, хитрöй вöлi, росомага... Тэ вот мый: ежели завещайтiс тэныт, дак и эна тысячаэс тэнат. Ветлы райкомö, юась сэтчин. Ежели тшöктасö, босьтан.

— Ме-э? Да кыдз этö ме?!

— Кывзы, а эн мексы — не коза, поди. Сэтчин велöтасö, кыдз керны. Эта ыжда деньга — кыдз тэ он босьт? Да и миян жö, натьтö, деньгаыс, российскöй. Ёськалöн айыс, тунгус, революциянас тожö пышшис татiсь и золотишко нöбöтiс сьöрас.

— Ой, пола мыйкö...

— Кинлiсь? Сэтчин куллес абу, оз кульö... Челядь сад Гублянас керат нето школа... кыдз сiйö шуöны, кытöн сьылöны-йöктöны? — осьтат. Кылiн?

— Но, ладно инö.

Луныс чулалiс — басниын да спорын, и Олявка гублянскöй тракт дорö петiс рытъявнас ни. Сэтöн, поснитик листока пуэз увтын, некыз вуджöрас, сайласисö инькаэз, унажыксö старухаэз, кöдна вовлöмась Ыштаяс касьтiсьны. Сэтöн вöлiсö и город ладорись, и Гублянiсь отир. Мыдзöсь жарсянь, могильникын горзöмсянь, нiя пукалiсö да сулалiсö лöня. Мукöдыс сунасисö, мукöдыс шытöг бобгисö ныр увтаныс да шочыника, вынсьöтчöмöн, шыасьлiсö:

— Оз на лок?

— Абу тай...

Но вот мыс вылас мыччисис автобус, и отирыс вöрзьöтчис. Пукалiссес ружтöмöн да бергалöмöн сувтiсö пидзöссэз вылö, сэсся лэбтiсисö кок йылö и кыссисö туй дорас, сувтiсö кузькодь лёдзö да мöртчöтiсö синнэзнысö шондi вылын свиттялан автобусö, кöда перыта тарöвтчис долонь кодь волькыт, лöзöтöм тракт кузя и недыр мыйись сувтчис отирыс весьтö...

Шондi пуксян дорас, кöр быдöс гортся уджыс вöлi керöма, Олявка пуксьыштiс палисадник одзись лабичок вылö да пондiс думайтны, кыдз чулöтны кооператоррезлiсь локтан праздниксö, но думайтсис умöля, юрас пырисö мöдiк думаэз: öткö, бабыслöн кулöмыс, а мöдкö, — Андрей Никитичлöн орсöмыс.

«А может, тырмас ни орснытö? — бöра кысянькö сöдзис сунис кыза дума да öдззис бергавны юрас, пондiс ыждыны, сьöктыны, топ путшкан шöрттэзiсь тшакыль. — Быдса год ни эд кыссьö, а сiя сё öвтчö то сэтчин, то татчö, дзик дюттян жö... Да, тырмас! Печикта ме сылö, — решитiс Олявка. — Ась тöдö, что ме не öртя и менö оз позь новйöтны кöлок понын...»

Посад шöрсянь улицаöттяс сукыльтiс-локтiс морт. Тöдчис, что сiя бура мыдзöм, öдва коккесö вешталö, кузь юрсиыс пашмöм, дзугсьöм.

«Сiя тай, Андрюшаыс!» — тöдiс Олявка да чепöссис лабичок вывсис, но чожа мыйись, дзик стоп-сигнал сьöртi, сiя тран сувтiс, сьöкыта ловзисис и секунда-кык кежö тувдiс местаас, нельки синнэсö куньыштiс, медбы эшö öтпыр думайтны, кöдöрö керны одзланись оськöвсö: жöникыс ладорö али гортланяс. Кык минута бöртi Андрей лоас сы посöдз дын и сэк...

Осьтiс синнэсö, веськöтчис, бытьтö чапкис сивйысис сьöкыт ноп, бергöтчис гортланяс, чорыт кокöн пырис оградаас, жиль-жоль пöдналiс вороткасö да камгис-вештiс ойся иган и коккесö кыскалöмöн пырис керкуас да везтiс öшыннэсö.

Юрас, кытшöмкö пыд пельöсокын, бичирöн лыйыштiс ньöвьёсь-дума: «Кинсянь, инька, тасасин-пöднасин — не аслат счастьесянь я?..»

Гижöма 1979’—1982’ годдэзö.

ПОВЕССЕЗ

ПЫТШКÖС:

Гавкалöн бедь (< Лöз йöрнöс. К.,1992; одзжык пет.: 1968)

Ме ыджыт ни, мама (< Бичирок. К.,1975)

Туйсö бöрйö сьöлöм 1961 (< Виль нянь-сов. К.,1963)

Дата добавления: 2015-11-16