Гублян да Зуйпияг — кык сосед, кык колхознöй бригада, кöдналiсь муэсö торйöтö только Гублянка ю, но олöны нiя не öтмоза и видзöны не öткодь слава: öтыс — одзын мунiсь, мöдыс, кыдз шуö Котöрок, — культун. Мый эта лоö, мийö ог тöдö, но тöдам мöдiкö: Зуйпиягын олöны уна дышкучиккез да майöв радейтiссез, а этасянь и йылö сэтчин быдкодь кимöсьыс.
Кыдзкö арнас, кöр быдöс сю да карч вöлi ни амбарын да гуын, Олявка Венькакöт мунiс Зуйпиягö, öтöрыс кöдзыт, но кöс, мича да гора, кытшöмöн сiя овлö октябрь конецö. Арыс петiс шоныт и кузь, и кыдззеслöн вежöтiс вöлись йылыс, и нiя сулалiсö, дзик веж кофтаа и зелёнöй юбкаа иннез, кöдна петыштöмась туй дорас, медбы вуджны мöдöрас, ёрттэз дынö, да видзчисьöны, кöр мунас Венькалöн мотоциклыс.
Пуэс-модницаэс кольччисö бöрлань, и «Урал» петiс мысок дорö, кöдö Зуйпиягись отир шуöны Гажа нöрыс. Эссянь видзöтан да, быдöс мöдлапöлыс син одзын куйлö, дзик ки долонь вылын: и зелёнöй öзима клин, и бурöйсявны ни пондöтчöм видззез, кытöн чукöрöн-чукöрöн сулалiсö стожартöм зороддэз, ровно ловзьöм мамонттэз, кöдналöн бивеннез öнöдз пантасьлöны эна местаэзын, и гöрда-вежа расоккез, и ю сайись яг, кытöн кöркö сулалöма чудскöй крепость Зуйкар, а öнi шувгö-олö мича пожумьяин.
Кытшöм ни басöкöсь Гублян гöгöрын местаэс, а сэтöн эшö басöкжыкöсь, и Олявка эз вермы калькöтчыны эта басöк бердiсь.
Мотоцикл лэбзьыштiс векнитик посок и зэркыта сувтчис.
— Видзöт жö, Гавриловна, — Венька макнитiс крагаа кинас мыс увтас, — машина берездасьöма. — Ноко ме котрася сэтчин, — и Венька лэдзчис улö. Олявка петiс коляскасис, адззис нежык крут места и мунiс сы бöрсянь.
Медодз сiя казялiс кудриа юрсиа инькаöс. Мортыс куйлiс ровно бы бок вылас, но чужöмнас кыминь,
Олявка бергöтiс сiйö гатш и чирöстiс мый вын да чепöссис бöрлань: инькалöн чужöмыс эз вöв, сы местын гöрд видзис вирульяй.
— Эн вöрöт, Гавриловна! — горöтiс Венька. Сiя кутiс Олявкалiсь кисö и сьöрас кыскöмöн кайöтiс вылö. — Пуксьы да мунам, мийö немöн ни ог вермö отсавны нылö... Квать морт! Öтiк минутаö — квать покойник! Эд быдöнныс тöдiсö, что Аркашко оз садясьлы, а руль сайись эз чеччöтö.
Венька лöга тальччис рычаг вылö, лöга горöтiс мотор, и, кöр бледöтöм Олявка пырис коляскаас, мотоцикл лöгöн жö нетшкöвтчис местасис, крутöя бергöтчис и тöвчикöн пöльтiс Гублянö.
Эта бöрсянь Олявка эз вермы лöньсьыны быдса неделя. Син одзас пыр вöлi вирульяйыс, а юрсис эз и петан дума: «Мыля сiдз? Мыйсянь, мыйсянь эта?» Мымдакö лöньсис вöлись сэк, кöр гижис областись газетаö статья и нöбöтiс мыччавны Венькалö да тшöктiс пуктыны сы увтö и ассис кырымпассö. А Венька мунiс статьянас школаö — мед пö волькöтыштасö сэтчин статьяыслiсь чукырресö...
Лэбзисö луннэс, коялiс и гаж, и горе, а статья газета листбок вылын эз мыччись.
То и ой тöв унньöвтiс, то и лымовöй парашютоккез руас лэбалöны ни. Олявка одзö мöдiк проблемаэз сувтöны и вижлок öмöн ванзöны: «Бергав, вöрöтчы, эн сунась!» И вунöтсис газетаас гижöмыс.
Сэк и звонитiс Олявкалö Верепов:
— Оля, статьяыт петiс! Бура горалö! Савыркина чапкис трубкасö и бордпавйöн мунiс почтаö, босьтiс сельповскöй газетаэз, сэтöн жö и кутчис лыддьöтны.
УМÖЛЬ ТРАДИЦИЯ
Мийö некöр эгö гижлö газетаö и, натьтö, некöр эг кутчö бы, кöбы не öтiк случай.
Октябрь конецö Зуйпияг деревняись öтiк шофёр ваяс соседыслö турун. Эта понда сыкöт вештiсясö винаöн да корасö кайлыны песла. Код водитель согласитчас. Пуксьöтас кузовас вит мортöс и неылын деревня дынсяняс берездöтас машинасö керöс увтö. Вийсясö шофёрыс да эшö вит морт, кöдна коласын уна челядя маммез.
Сэтшöмыс Зуйпиягын петiс не первуись.
А мыля? Кытшöм причина сылöн?
Сiйöн, что Зуйпиягын öнöдз олö öддьöн умöль традиция — шабашниклö-трактористлö, шофёрлö вештiсьны винаöн да сола огурецöн, кöть и машина видзöм понда колхозыс босьтö донтöма.
А эд быд керкулö колö вайны пес, турун, идзас, ветлыны мельницаö, кыскыны гортiсь карч, пода, гöрны огородеч, петкöтны назём да керны берся уджсö. Почти быдöс этö керö тракторист да шофёр. И кыдз жö не потшшуйтны мортöс, кöда сэтшöм бура отсалiс тэныт? Мöднёж некыдз оз туй!
Этадз думайтöны и керöны, пожалуй, быдöнныс.
Дак мый жö петö?
Ненадёжнöй водительлö мийö огö сетö магазинiсь вина, сiйö проверяйтам уджö петiкö, а соседыс миян удж вылö пуктö крест!
Талун быдöс Зуйпияг видö и ёрдö вийсьöм шофёрсö, а сiйö «добрöй дядясö», кöда сэтшöм бура потшшуйтiс шабашниксö, некин и кылöн оз павкöт.
Тiйö юалат: а кытöн вöлiсö зуйпиягскöй бригадир, механик? Мыля нiя оз контролируйтö уджалiссесö?
Висьталам: сiя лунö нiя асьныс керисö шабашка и трагедияыс йылiсь тöдiсö вöлись асывнас, кöр садясисö. Но ежели начальствоыс ачыс сiдз керö, дак кытшöм бур кыв сiя висьталас рядовöйеслö, мыйö велöтас?
И эшö öтiктор оз лэдз миянлö лöньсьыны — этö прогуллэз.
Зуйпиягын сто гöгöр уджалiсь, нiя керöмась мöйму четырестася унажык прогул. Сiя бригадаын лым увтö сюрис сю да картов, тöвнас тшыгьялiс пода — и сё винаюöм кузя. Дак мый жö лоис крестьяниныскöт? Кин сiйö вайöтiс этчöдз? Мийö шуам, что сiйö этчöдз вайöтiс уджлöн система, кöр мортыслö вештöны не сы понда, мый сiя быдтiс, мымда керис йöв да яй. Видзöтö асьныт: шофёрлö вештöны тонно-километр понда, трактористлö — сiдз жö. А кöдалöн оклад — скотник, слесарь, учотчик — сiя и нач нем оз думайт, сiдз кыдз тöдö, что эм ли, абу ли урожайыс, а сылö сёравно вештасö.
Колö керны сiдз, медбы уджалiсьыслö колхозас вештыны сы сьöртi, мымда быдтöма нянь, высьтöма йöв, вузалöма яй да кольть. Сэк и только сэк колхозникыс асьсö пондас лыддьыны хозяинöн, кутчас мöднёж уджавны и дугдас юны не только уджалiкö, но и сы бöрсянь. Сэк и оз лоö сэтшöм бригадиррез, кöдна кутчöны велöтны уджалiссезöс, а асьныс оз тöдö, мый керсьö гортаныс, кытшöмöсь быдмöны сылöн челядь.
Миян посадын, миян бригадаын тожö не быдöс бур, но сэтшöмыс, кыдз Зуйпиягын, важын ни абу и оз ло одзлань, сiдз кыдз винаюöмкöт Гублянын пессьöны и парторганизация, и сельсовет, и сельпо, и школа, и культура учрежденнёэз, и здравпункт, и каждöй культурнöй морт. Шоччисьöм понда эм клуб, сэтöн уджалö быдкодь секция, дискотека. Эм хор, пöрись отирлöн ансамбль, кöдö чукöртiс Которков К. И., пенсионер. Неважын асьныс олiссес строитiсö виль кафе. Локтас час, и сэтöн отирыс пондас рытйыны самовар дорын, юны соккез, сёйны блиннэз, ягöд вареннё, сьывны, висьтасьны сказкаэз, печкыны да гöрдззисьны.
Кыдз овны деревняын — сiя зависитö миянсянь, и бур оланыс понда колö пессьыны быд мортлö, но бригадир, профорг, парторг, комсорг, Советiсь председатель да депутат, велöтiсь — эта пессьöмын ась мунö медодзас.
В. Которков,
колхознöй бригадир, парторг.
О. Савыркина,
сельпо правленнёлöн председатель, сельсоветiсь депутат.
Дата добавления: 2015-11-16; просмотров: 41 | Нарушение авторских прав
| <== предыдущая страница | | | следующая страница ==> |
| ШЫЛЛЬÖН ДА МЫЛЛЬÖН | | | ОЙСЯ БÖРЙИСЬÖМ |