|
Читайте также: |
Висьтася ме тэныт, нывка, öтiк бывальшина. Меным чожа девяносто тырас, а сэк, натьтö, годов десяться вöлi...
Тiйö шуат: колдун да колдун, а кин сiя, колдуныс? Во-во, тiян шуанöн — некин сiя, сказки пö. А ме бура тöда, мый колдуннэс керлiсö. Сэк нiя быдлаын вöвлiсö, каждöй деревняын — кöда учöт тöдiсь, кöда уна тöдiсь.
Ме нывканам Белоевись, дак Белоев йылiсь и висьтася.
Öксяс свадьба, юöны, гуляйтöны. А колдунсö свадьба вылас оз корö, вунöтасö. Лöгасяс колдуныс, дзугны шуас. Локтас свадьба вылас, пырас гусьöник, колдовскöй пуртсö — стук ыбöс юрас! Повзясö: неладно эд петö! Удасö вина, сiя дзурснитас винасö да эшö корö: четверть пö вайö. А винаыс юсьöма ни.
А, дак жаль пö? Вöтя быдöннытö! И давай повзьöтлыны: «Джоджулас ва пырö. Кылат?» Кывзöны, а ваыс: — буль-буль-буль, керкуас ни петö. Отирыс кайöны лабиччез вылö, а ваыс — лабич вевдöрö. «Лэбтась, невеста, подувтö эн вад, — шуö колдуныс. — И тiйö, нывкаэз, инькаэз, лэбтасьö!» Лэбтасьöны — кынöм куш. А колдун ваöттяс келö-броддьö и сё васö содтö. Шум, чирзöм, горзöм. Кöда полатьö кайö, кöда гор вылö...
Мунас колдуныс гортас, ванас и колис свадьбовшанасö.
Ашыння асылас мийö, челядькельöпыс, локтiм кудпыдöс сёйны. Осьтiм ыбöссö — джодж ва, лабич ва, запання ва — некытчö пуксьыны. Йöзыс гор вылын да полатьын, а жöникыс да невестаыс — сёр вылын, кык кусiнь кöстiсьöмась да пукалöны...
Этö ме аслам синнэзöн адззылi.
Висьтасис Мусюрова Т. П.
Гижис Савыркина О. Г.
1960 г.
Ошовна
Кывлiт, натте, Ошовнаыс йылiсь? Сылöн мамыс ош сайö петалöма.
Мунас тшакьявны инькаыт. И пыртас сiйö деманыс* вöр пыдöсас... Пöттöмыслö эд сё уна колö. А сэтчин тай ошгу вöлöм. И усяс инькаыт гуас, а сэтöн ош узьöма. Кутас сiйö ошыс да видзас девять дён. Вöлись мезмас кыдзкö да пышшас.
Локтас гортас, пöднасяс. Полö, öтöрö оз лысьт петны: локтас кö ошыс, дак бöр нуöтас! А ошыс кык неделя эшö сы керку дынöт ветлöтас. Каждöй ой локтö. Локтас да горзö и горзö. Вот эд!
Сысянь и ваяс инькаыт нывсö, Ошовнасö. Жöниккöт двадцать год олас — некин оз вöв, ошкöт девять дён олас — сьöктас.
Сiдз, натте, еныс шуис... Леманыс* ли...
Жыбан*
Вдруг мужикытлöн картапонас виль жыбан лоас, а кытiсь — пон тöдас. Может, соседыс колис? Юалас сылiсь — эг пö ме коль, менам пö только öтiк, и сiя гортын.
Но дак мый, сулалö и ась сулалö, юны-сёйны оз тай кор. Оз вöрöт чужöйсö: аслас не умöльжык — кокнит и ён. Сэсся сарай дорö чапкас и вунöтас сы йылiсь.
Арнас турун ваяс, сараяс лэбтавны кутчас. И тальччас жыбан вылас да шöри поткöтас сiйö. И кинкö морт голосöн ойнитас пö: «Ойй!» Чапкас потöм жыбансö мужикыт улö — песö пö мунас.
Ойнас иньыс вöтасьö: нывка сылö причёт пуктö да шувлö:
Мамушко тэ мамöй,
Мыля жыбансö тэ
Кинат эн кутышт,
Мöднат эн малышт,
Менö, ёрдöмтö,
Гортö эн примит?
Саймас и быдöс вежöртас: эта эд öшöм нылыс жыбанöн гортас бертас да мамыс киö корсяс! Пондасö кошшыны жыбансö — абу ни.
А öшлöма нывкаыс аслас свадьба лунö — кöчö пöртлöмась.
Дата добавления: 2015-11-16; просмотров: 44 | Нарушение авторских прав
| <== предыдущая страница | | | следующая страница ==> |
| НЫРЬЯСЬ, ЭН НЫРЬЯСЬ... | | | МÖДНЁЖ ЭЗ ВЕРМЫ ЛОНЫ |