МЫЙКÖ НЕ СIДЗ

И быдöс ни эд öнi Олявкалöн мунiс басöка-волькыта, кыдз бытшöма пöжöм сур больгис-виялiс. И кажитчис, бытьтö сылöн судьба-додёкыс шыллис-ыскöвтiс, дзик йысялöм туй кузя — некытчö эз кышась, эз шыбляв, эз пöрлась не эз тресит, нельки немымда эз дзурт.

Сiдз вöлi — гортас, важ, но шоныт да гажа керкуас, кöдалöн пытшкыс вачкисис сказочнöй теремокись жыр вылö: öшыннэзын — дона штораэз, диван вевдöрын стена пасьтас — гöрдвевья гобелен; важмöм, коккезöн да песока росöн быртöдз зыртöм джоджас — зелёнöй рöма, небытик, дзик жö öшын увтсис тулысся лудовкаыс, палас; комод вылын — ыджыт экрана телевизор.

Сiдз вöлi и удж вылын, сельпоын, кöда месяцись месяцö пондiс тыртны планнэз, колхоз понда нормася унажык заптiс турун да корось, ар пондöтчикö жö, кöснас, босьтiс да быдöс кыскис городö вывтi уна карч, и райпотребсоюз сетiс сельполö премия, а председательлö кöсйис медаль.

Сельполöн дзин-дзурк вевттьöмöсь складдэз, топöтöмöсь ограда заборрез, вежöма электропроводка, кöда понда ой и лун тöждiсис Шурончик, лöсьöтöмöсь горрез, ваялöма пес, и нельки Сивко, вексö отопка кодь кузь гыжа, öнi бодритö виль «чаркиа» и оз ни чужьясь, и нять керöс увтö лэдзчö не пуксöн, и кайикас оз бырöт пидзöссэсö, оз ляз пиннесö. И Ванько Вань, кöда тыртö колхоз понда лыс заптан план, öнi сьывтöн куштö Жогормыс сайись тэлляиноксö.

Сiдз вöлi и виль семья лöсьöтöмын: пантасисö, гленитчисö öтамöдлö, öтлаасисö — некинлö не янсöтны, не дзугны ны сьöлöммезiсь öтласа волясö, не кусöтны вына бисö.

Андрей Никитич öктiс деньга и лöсьöтчис небны машина. И вöлi важын ни решитöма сiдз: кыкнанныс пондасö уджавны важ местаэзын, тöвнас овны городын, а гожумнас — Гублянын, вöр-видз дорын, али кыдз öнi шуöны — природа пытшкын.

И соседдэзныс, кöть городас, кöть деревняас, — буржыкыс оз ков: радейтöны удж, донтöны отирöс, кужöны сьывны да йöктыны, ежели петас гажöтчан лун, — мунöны оланыскöт öтiк оськöлöн, оз дзугö законнэз.

Мый колö этасся? Ов да ов и бöрат эн видзöтлы!

Талун Олявка мунiс обедайтны гортас — охота лоис сола тшак пешлыштны, и ящикись öтлаын газетаэзкöт кыскис кык письмо. Öтыс — шöри кöстöм тетрадь — техникумись. Медодз видзöтiс сiйö: «Зачтено». Радуйтчыштiс: и куимöт курсыс пондöтчис бура.

Мöд письмоыс — тöдтöм мортсянь. Гижöмыс ровнöй, быд букваыс — дзик чистописаннё урок вылын петкöтöм. «Кытшöм-нибудь студентка бöра гижö, контрольнöй удж, натьтö, корö».

Ящик дорас жö и осьтiс сiйö, лыддьöтiс медодзза строкаэсö — эз вежöрт, мый йылiсь басни, но сьöлöмнас кылiс, что эта письмоыс сылö оз сет гажсö, нем оз вай бурсö, и тэрмасис чожжык тöдны этö, чеччалiс кыввез да строкаэз вевдöрöт. Медбöрын синнэс пыкöтасисö кыза гижöм да увтсяняс веськыт визьöн, дзик линейка сьöртi, кырöвтöм кыввезö: «Андрей Никитичыс менам...» «Мый эта? Быль али кинкö сералö?» — думыш керис Олявка да пондiс мöдпöв, думайтöмöн, лыддьöтны этö невежöртана, видзчисьтöм письмосö.

Дона Ольга Гавриловна!

Уна лун да ой ме думайтi, гижны али не этö письмосö, и решитi: колö гижны! Гижны и висьтавны тэныт правдасö быдсöн, öтiк вотёк не суськыны.

Ме — инька, тэ — инька; ме — мам, тэ — мам, сiдзкö, миянлö кокнитжык баитчыны, кокнитжык вежöртны öтамöднымöс, вежöртны оланнымöс, вежöртны сiйö, мый колö миян сьöлöммезлö медодз.

Ме дасвит год олi жöниккöт, но пыр радейтi мöдiкöс, олi сы понда. Сiя мöдiкыс — менам олан. Верма эшö висьтавны: кöр ме шогалi, кöр öт кокнам сулалi могилаын ни, сiя менö кыскис сэтiсь. Сiдзкö, ачыт адззан, мый дона сiя ме понда. И эта донаыс, эта мöдiкыс — Андрей Никитич Верепов...

Тэ месся томжык и, может, басöкжык, тэ месся богатжык — олан öтнат и эм аслат керку, сiдзкö, тэ чожжык верман адззыны мöдiк жöникöс... Тэ вежöртан менö, Ольга Гавриловна, и отсалан меным. Тэ умнöй инька, гуманнöй морт. Ме надейтча тэ вылö.

Андрей Никитичыс менам и только менам.

Эм кö охота гижны, дак то менам адресö...

«Вот ашнöй! — Олявка катыльтiс письмосö комокö да швыргис петшöррезö. — Сiя эшö лысьтö гижны, умöлик!.. Тэнат и только тэнат — кыдз инö не да!»

Юрас кайис жар, пидзöссэс сьöктiсö, и сiя пуксис ворота одзись посок вылас и, кыдз бабыс жö этатшöм сьöкыт минутаэзö, пыдына ловзисис. Но мöд минута костас чеччöвтiс местасис — сiя абу сэтшöм морт, кöда бы незьдiс, рапмис небасöк юöрсянь, кöда сетiс бы ассис пайсö мöдiклö, сетiс бы, позьö шуны, ассис сьöлöмшöрсö медодзза корöм сьöртi, пессьытöг! — и босьтiс нöитöм гижöтсö, пырис гортас. «Сы юрись колö пыркöтны энö думаэсö, — сувтчис Олявка эта вылын и пондiс котрасьны одз-бöр горницаöт да панны колан планнэз, но сэтöн жö и кежис мöдöрö: — Да этö эд Андрюшалö колö решитны, кинкöт сылö овны. А сiя, натьтö, оз жö босьт сэтшöмсö... кöда ачыс кышасьö».

Тöдвылас усис, что Вероникалöн, кыдз висьталiс бабыс, уна челядь, дак мый нö сiя чудитö? Но, ладно, шуам, жöниксö оз радейт, а челядьсö? Тожö чапкас? Али сьöрас вайöтас?.. «А мый, вермас и аймамыслö чапкыны. Ме тай коли жö то, и быдтöны да эшö спасибо висьталöны... Сё жö колö гижны вельмöмлö».

Чöвтчытöг, только чапкис шляпаоксö, пуксис пызан сайö, судзöтiс бумага, босьтiс шариковöй ручка. И ылалiс, кöр казялiс кисис сэтшöм басöксö: увдöрись джыныс — бордовöй пластмасса, сы вылын золотоöн гижöма «Олимпиада-80» да рисуйтöма вит йитсьöм кольцо, а вевдöрисьыс — золотитöм кöрт. Бергöтлöв-керис ручкасö, сё любуйтчис сiйöн, и бöра думаыс бертiс письмоыс дын. «А кыдз сiйö шуны — тожö донаöн? Али — ёрт Икотайкина? Может, гражданкаöн да?.. Кытшöм жö сiя — ыджыт, учöт? Рам али лöг? Сы гижöт сьöртi, дак лöг. И мывкыда, конечно. И лэчыт сина да вына киа: казялас мыйкö буржыкö — кватитö и горöтö: «Эта менам лоас, некинлö ог сет!.. И Котöрок сэтшöмö висьталö...»

Жöв керсис и эшö мымдакö пукалiс сiдз, вöлись пондöтiс:

Бур лун, своянка!

Тэнат письмо вылö ме вот мый висьтала: давай огö пондö Вереповнас мырддясьны, огö пондö öтамöдлiсь синнэз кыскавны (миян вермас и сэтчöдз локны), а сетам право бöрйыны сылö. Не кага, не простöй мужик, а интеллигент, коммунист...

Не сiдз, быдöс не сiдз!

Андрюша вылö нем надейтчыны, сiя веж типок кодь: кöдöрсянь одзжык чапкасö тусёксö, сэтчин и уськöтчас. Вероникалö колö веськыта висьтавны, медбы эз ашкась, эз пелитчы, кытчö оз ков, колö вежöртöтны, что Олявка да Андрюша важын ни керисö семья и ежели кин пондас дзугны нылiсь öтувья олансö, Олявка эта дзугисьлiсь лязас пиннесö. Вот сiдз колö Вероникаэскöт баитны!

Но и этшöм письмоыс эз аркмы. «Кыдзкö мöднёж, мöднёж колö. А может, мунны сы дынö да оча син баитны? Баитны кокнитжык, лöсьытжык, нежели гижны — колан кыввес асьныс киссьöны... Не, норовитны ковсяс, не ветлыны кытчöдз. Перво Андрюшасö кутчыла вöрзьöтны, пондыла баитны сыкöт, тöда, мый висьталас».

Чапкис ручкасö, уськöтчис сельпоö, медбы звонитны городö, но горт дынас жö и сувтöтiс сiйö бригадир Венька:

— Эй, тэ кытчö пышшан?! Вот дак акань: сы дынö — гöссез, а сiя — дуй гортсис!

— Кин гöсьыс — не тэ я?

— Не ме, Гавриловна. То öтiк мекöт локтiс, — сiя мыччалiс юрнас мотоцикл дынiсь том морт вылö, — а мöддэс машинаöн кайöны... Воныт студенттэзöс вайöтö, да эшö тятюыт. Чу, татчö кежисö ни.

Васькишна керку сайын гур-гур шыасис машина, и чожа мыйись Венька мотоцикл дынö сибöтчис да сувтчис югыт-лöз рöма учöтик автобус, кöдаись перво кивзöмöн петiсö дас гöгöр нывка, сыбöрын петiс пöрись Савыркин зоннас. Старикыт и кык оськöв эз ешты керны, кыдз сiйö бердас жмитiс да чуп окыштiс Олявка.

— Тэ мый менö чупöтан? Вон этö колö, — айыс кыскис сосöттяс зонсö. — Сiя öнi ыджыт морт, учёнöй, и кöр ни эд адззисьлö! — Старик баитiс, кыдз шуöны, кöдзыт голосöн, но тöдчис, что сiя рад пантасьны нылыскöт — тожö, дзик тури да вöрдзодзог, адззисьлöны.

Том Савыркин айыс сьöртi ыджыт, но сы кодь жö чикыра сина да вапсыра кока — пытшкас каттьö-тальö. Вывтас кучиковöй тужурка, шоныт йöрнöс, джинсовöй вешьян, дженытик сапоггез. Кудриа юрыс фуражкатöм, дзугсьöм юрсиа.

— Ой, Витька! — Олявка кутiс вонсö голяöттяс, мышкыртiс да окыштiс öтпыр, мöдпыр да и куимöтпыр. — Но, пырö инö, пап, Витя! Мый этчö сувтчит?

— Ме пыра, а нiя ась перво сiйö керöны, мый понда локтiсö, — висьталiс пöрись Савыркин и прикажитiс: — Нуöт, бригадир, старухаэс дынö да висьтав, ась оз мугö, ась быдöс пуктасö-висьталасö, кыдз исповедь коста, а нето, шу, Савыркин Гавраыс ачыс локтас... Экспедиция — сiя государственнöй, революционнöй дело. Сiдз эд, челядь?

— Конечно, сiдз — шыасисö нывкаэс. — А тiйö, Гаврила Лекандрович, видзö тöдвыланыт, мый кöсйит.

— Кыдз висьталi, сiдз и лоас: ме чекист и гöрд офицер! — ошшасьöмöн шуис пöрись Савыркин да мунiс Олявка керкулань.

Нылыс сразу казялiс, кыдз пöрисьмöм айыс: и коккес кыскасьöны, и öмыс шавгö, и уна басниа лоöма. Одзжык аслас заслугаэз йылiсь и гортас эз баитлы, а öнi то öтöрын чирзö. И орденнэз да медаллез кышалöма. И бöра новйö калошаа сапоггез, галифе да гимнастёрка, солдатскöй фуражка.

— Кытшöм эта экспедиция, папа? — интересуйтчис Олявка.

— Сё история гуддьöны, сякöй бывальшинасö, сказкасö гижöны. Висьтаси тай, кытшöм орсаннэзöн челядь коста орслывлiм, кыдз играэз вылын згальничайтлiм — быдса комедия!.. Вот Витькаыс локтас — висьтасяс, мый нiя кошшöны.

Кыным ни год эстöн олö Олявка, а старикыт только öтпырись и вовлiс — керкусö небны. И öнi медперво видзöтiс, кыдз нылыс видзö хозяйствосö — и гид, и баня гöгралiс, карч яма дын сибöтчылiс. А керкуас, кöр чапкис плащсö да фуражкасö, рамыника, довольнöй шыöн висьталiс:

— Мамыт да зоныт, дочи, поклон иньдiсö. Эн жö эшö нiйö вунöтчы? И бабыт сiдз жö... Татчö вöлi лöсьöтчö, срамина, кайны, да эг лэдз. — Мунiс мöд жырас, кытшöвтiс сiйö, чувйис чуньнас диван, пуксис. — Небытö бöрйöмыт, председательскöйö. Али козьналiсö?

— Кин козьналас? Ачым неби, — висьталiс Олявка. — Тэ нылö, гортiссетлö, привет висьтав... Лёваыслö костюм неби, поди, лэдзчöтан? И гöснечок ыста.

— Лöсьöт, нöбöта.

— И сёйны лöсьöта?

— Ме, дочи, не сёйны локтi, а видчыны... Пуксьы кытчöкö, не часовöй эд. И эн пильскы, а кывзы, мый шуöны! — лöгасис Савыркин, нельки быдöс чужöмыс гöрдöтiс.

— Кывза, пап, баит.

— Кывзан тай... Быздöм мыггесö да сводницаэсö. А мамыт да айыт — нуль, нiя бöбöлöсь, нiя нем оз вежöртö!

— Весь тэ Дзолинь бабöс видан...

— Ошшасьö тай срамина: «Спасибо енлö, бур мужикöс Олявкалö адззим, умнöйöс», — Савыркин басöка нерис Дзолиньсö и лöньсис, дыркодь чышкис голясö да пельбоккесö ыджыт чышьянокöн. — Дак тэныт кыным жöник колöны? Али тэ, сельпоись председатель, законнэсö он тöд? Петан эта сайö, а сэтчö важыт локтас — мый лоас?

— Нем оз ло, пап, — жагвыв висьталiс Олявка, — эн пов... Етша сiйö ме велöтi, етша разь видзчиси, кöр бертас? Ежели бы колi сылö, эз бы мун татiсь. Нето сьöрас бы корис менö. Нето шатласьöв-керис да локтiс гортö.

— А тэ видзчись! Тэ сылöн инька!

— Мыдзи ни, мыся, видзчисьнытö, пап.

— Сiдзкö, петан Вереповыт сайö?

— Кöсйиси.

— Не кöсйисин, а, кыдз ме вежöртi, вöзйисин этакöт... чукыля кокораыткöт.

— Кöсйисьны али вöзйисьны — сё öткодь: делоыс керöма. И давай сы йылiсь ог пондö... Вон Котöрок, Карп Иванович, пырö. Может, тiянлö удыштны?

— Тэ разь он тöд — ме ог ю?

— Тöда, но...

— Мый нö эшö, кытшöм но?.. Гöснечтö лöсьöтiн? Тэрмась-ко давай, — небытжыка ни шуис медбöрын и мунiс пасьтасьны. Карп Иванович сiйö застанитiс порог дорас ни, стыдитiс:

— Сы мымдочка и олiн нылыт ордын, Лекандрович? Мак-маковей! Али умöля панталiсö-привечайтiсö, али керкуыс эз гленитчы? А эд ачыт сiйö бöрйин-ошкин, ме только да-эсö да не-эсö висьтавлi да юрнам зэгйи,— стыдитiс гöсьсö Котöрок. — Ай вунöтчин ни?

— Усадьбаыс бытшöм, спасибо, кыдзкö туйдöтiн сы дынö. А одз пышша, дак сiйöн, что не гöститны кайи, а видчыны.

— Мак-маковей! Öнi эд и начальниккес оз видчö, а тэ мыля нö сё важмоз олан?

Гаврила Лекандрович уськöтчис Карп Иванович вылö:

— Тiян мый — вöрныт абу али мужиккеслöн родныт орис, али киэзныт косьмисö? Мыля поснытö од лöсьöтö? Керрес гольöтöны — полöм петö кайны — кок чегöтан... Мый нö бригадирыс видзöтö, сельсоветыс, а?

— Кино да спектак видзöтöны, Лекандрович...

— А тэ, гöназей, кытчö видзöтан?

— Ме-ту? Кöр рюмкаö, а кöр и стаканö.

— Тьфу тэнö, бульды-бальды! — серöмтчис Савыркин да кутчис ыбöс вуг бердö. — Тэ, дочи, нöбöт гöснечсö да коль машина пытшкас.

Стариккес мунiсö, а Олявка сеткаö тэчис-каттис берсясö: и компот, и колбаса, и сола чери, кытшöмö Ыштаяс нылö и век не адззывны, и дона конфет да пряник, да котöртiс ны туй кузя жö.

Автобусок öнi сулалiс вöв карта дын. Ворота дорас öксьöмась дасмöд морт, унажыксö инькаэз, и кывзöны винерик, дзик косьмöм ньöр, нывкаöс. Радзтöм телегаын, куш дорогаэс вылын, пукалöны Савыркин да Карп Иванович — тожö кывзöны да шыннялыштлöны тошсялöм öм доррезнаныс.

— Комиэслöн абу сэтшöм кыв — гублян, — коялö кыввесö нывка. — Да, абу. Ме думайта, что тiянлiсь посаднытö колö шуны Гоблян. Гоб-лян... Вежöртат?

— Мыля — Гоблян? — шыасис Васькишна. — Вексö тай Гублян шувлöмась и мийö сiдз жö: Гублян да Гублян.

— Сiдз шуöны сысянь, что озö тöдö эта кывлiсь этимологиясö. А сiя вот мый лоö: гоб — тшак, лян — тöрмöм, сiсь. Сiдзкö, гоблян — сiсь тшак.

Котöрок чöвтiс виль гублянкасö юр вывсис да шуис:

— А вай-ко, мак-маковей, ме юала тэнчит: тэ кытiсь ачыт, кага?

Винерик нывка, кöть и шуисö сiйö кагаöн, эз обидитчы, бергöтчис стариккеслань, перыта висьталiс:

— Ме Кудымкар сайись, Пешнигортiсь. Кывлiт, натьтö? Куим герой миян посадiсь петiсö...

— Не токо кывлiм, но и вöвлiм сэтчин. И тшакьявлiм, кöр военкоматас олiм, а гобсö эг пантавлö.

— Сэтчин, дед, абу военкоматыс, тэ соралан.

— Часöт абу, а кöркö вöвлi... Вот... Дак висьтав жö, кага, кытшöм сiя — гобыт?

— Ме ог тöд, сiйö миян сiдз оз шуö.

— И татöн озö. А посаднымöс Гублянöн шуöны и Гублянöн величайтöны, а не сiсь тшакöн.

— Может, тэ, дед, висьталан, мый сiя лоö — гублян? Котöрок бöр пуктiс гублянкасö юр вылас — сайкалас кушмöм воманыс.

— Висьтала, мыля ог? Гублян — этö нёп.

— Кыдз, кыдз? — нывка кыскыштiс не öддьöн сöстöм дöраовöй кöшелись блокнот да ручка. — Нёп али нёб, — медбöрья шысö шуис чорыта да кузя.

— Нёп, нёпин.

— Мый сiя лоö?

— Сiя — гöп... Нето ярка.

— Кыдз, кыдз?

— Ярка, мыся.

— Сiя мый лоö?

— Да йирок.

— Кыдз, кыдз?

— Йир, мыся, ва пыдöсын гöп. Гублянканым быдöс сэтшöм: гöп да кось, гöп да кось.

— Кыдз, кыдз? Кось? — чикньöвтiс нывкаыт. — Интересно!

— Кось — лажмытiн, непыдын места — курöг брод. Вон Косьва юсö, кытчö Гублянкаыс котöртö, эшö шуöны Кося.

— Вон кы-ыдз! — ымьялiс нывкаыс. Кинкö инькаэс коласiсь велöтiс:

— Тэ, нывка, удышт сылö, дак сiя быдса короб изас тэныт. Профессорытся буржыка висьталас,

Велöтiсь инькаыс вылö ыкöстiс Савыркин Гавра

— Удышт, удышт! Сiя только и эм юраныт, курыт горшшез! А думайтiт бы: мый пö челядьыс удас, кытшöм кляп вылö удансö босьтас? Али асьныт эд быдтiсьö? — Чышкис кымöссö чышьянокöн, дзебис карманас. — И вообще, эта — дело государственнöй, а сiйö бур отирыс керö винатöг!

«Пöрисьмöм, пöрисьмöм, — бöра тöждiс Олявка и шытöг мунiс вöв карта дынсис: сылö абу охота кывзыны айыслiсь горöтлöмсö, кыдзкö не ас сьöртöттяс лоö.— Мыйлö Витяыс сiйö татчö вайöтöма?»

Ыджыт радöн тырис Олявкалöн сьöлöмыс, кöр сiя автобус дынас панталiс айсö да вонсö: вот и гöссез, вот рытнас и лöсьöтас-тыртас сёян-юанöн ыджыт пызансö, вот вöлись сылöн керкуыс, кöда уна год ни эз адззывлы гажöтчöмсö, тырас визыв горöн, песняэзöн, может, и музыкаöн: кутас да и ачыс гитараöн орсыштас, эд кöр ни тув вывсис эз чöвтлы. Мöдiс и соседдэсö корлыны — добрöй старик Карп Ивановичöс, бригадир Венькаöс иньканас, и Васькишнаöс. Ась бы и Шурончик пыралiс, кöдакöт Гублянас первöй лунсянь öтлаын уджалöны. И, может, кокнитжык бы сьöлöм вылас лоис Олявкалö, мымдакö ямис бы шогыс, кöдö козьналiс сылö басöк, но лёк письмоыс.

«Ёрдöм, ёрдöм ме... Несчастнöй Олявка, — норасис аслас судьба вылö. — И тöдi эд: сэк эз дöнзьы Вереповыс меным, и öнi сiдз лоас».

Сiя казялiс, что неладно думайтö и не сiйö керö: сылö колö пессьыны счастьеыс понда, а оз ков сюльтыртны, оз ков сунасьны. Счастье-бабылок сы дынö ачыс оз ни лэбзьы-павйöвт, сiдз кыдз сiя, Олявка, — важын ни путшалöм цветок, вадлöм и тöвзьöтлöм, нöитчöм и быгалöм...

Вонсö сiя адззис сельсоветiсь, петкöтiс öтöрас.

— Вовлiн бы, Витя, ме ордö, висьтасин кöть...

— Талун ог ешты, Оля, мöдпырся... Мийö татчö эг и локтö бы, да бригадирыс ошшасис: öтiк морт, шуö, миян былина тöдö. А сэтчö и папö отсалiс: «Ветлы и менö кыскыв, менам басни Олявкаыскöт лоас». Баитiт я? Али эд на ештö?

— Баитiм, Витя, — кымöртчис Олявка. — Тэ эн на гöтрась?

— Ог и думайт, кытчöдз диссертация ог гиж. Сiя ме понда важнöйжык, вежöртан? Инькаöс ме кöть кöр адзза.

— Но-но...

— А тэ, Оля, эн кывзы нылiсь, — вдруг горöтчис Витя. — Ас мознат быдöс кер, öння моз... Да, эн кывзы...

— Кинлiсь не кывзыны?

— Папöлiсь да мамöлiсь. Аслат юрöн ов да кер биографиятö. Ме кылi, кыдз мамö чидö: «Ловья жöник дырни мöдiкöс кошшö!» да сiдз одзлань. А ме шуа: кер, кыдз тэныт колö. — Сiя чöвтiс очкиэсö, пондiс чышкыны нiйö. — Нiя колхоз керисö, мийö — коммунизм строитам и сiйöн нач мöднёж олам. Вежöртан? И быд мортыс, кöда нельки роднöй сойыс-воныс сьöртi мыйöнкö мöдкодь ни, должен и мыччавны асьсö мöдкодя и этöн мöдкодьнас мымдакö мöдкодьсьöтны гортсö, нациясö, а нацияыс этö мöдкодьсö, конечно — медбурсö, мый сылöн öксяс, должен сетны мирыслö.

— Ме öтiкö не ас кодьöмсö сетi ни мирыслö, — пондылiс шутитны Олявка. — Поди, тырмас эсся?

Воныс кышалiс очкиэсö ныр вылас, керис вывод:

— Сiдзкö, Оля, ов ас мознат, семьятö кер ас сьöртöттят — аслат мывкыдöн и вежöрöн. Конечно, законнэз дзугтöг.

— Ме тэ моз жö, Витя, думайта: этаын меным некин оз отсав, ежели не лыддьыны сiйö, кöдакöт семьясö ковсяс керны.

Сымда и баитiсö соя-вона, сымда и видзöтiсö öта-мöд вылö...

Сельпоын Олявкаöс видзчисис милиционер. «Эталö эшö мый колö?» — только и ештiс думайтны Олявка кабинетö пыртöн.

— Но тэ и сёян, председатель — Анна Каренина моз, тыдалö, — кöритiс милиционер дыр обедайтöм понда. — Да ладно эшö, что не весь сы дырна панясян, — и мыччалiс киэзнас ас гöгöрас, — эм мыйöн ошшасьны миян кодьöмыс одзын. — И сразу висьталiс: — Ме Икотайкин.

Виньдiс Олявка эта фамиллёöн, öмсö осьтiс. Сэсся вежöртiс: «Сiя союзник менам лоас, ежели Вероникалöн жöникыс...» — и шуис вöлись:

— А ме Савыркина.

Сэтöн мöдыс öмсö осьтiс да вöлись дыр мыйись юалiс:

— Ыштайись Гаврилалöн, поди, ныв? Сiя миянöс весь овнытö немымда оз лэдз.

— Сылöн и эм.

— Не сы сьöрья, не чекист... Ыжмалöны сельпоат, а тэ бытьтö он и тöд, чöлан. На-ко лыддьöт то этö,— Икотайкин пуктiс председатель пызан вылö бумага. — А ме петала куритны.

— Тэнат иньыт Вероника? — сувтöтiс сiйö Олявка.

— Иньö? — бергöтчис Икотайкин ыбöс дынас. — Но и отир! Он на делосö пондöт, а нiя — кыдз бы иньыткöт тöдсасьны: сыкöт, думайтöны, баитчам пö, и сiя Икотайкинсö рамтас.

— Меным нем думайтны, ёрт Икотайкин. Дак кыдз иньтö шуöны?

— Линга.

— Сiдз шуöны иньтö? — бöра осьтiс öмсö Олявка. — Эм сэтшöм морт ним?

— Мортлöн я сiя нимыс, понлöн я, а менчим инькаöс шуöны сiдз, — висьталiс Икотайкин и петiс кабинетсис.

Председатель кутчис лыддьöтны. Жагвыв лыддьöтiс, быд запятöй вылын, быд точка вылын, бытьтö первоклашка, сувтчылiс — мöдкодь знаккес эз вöлö. Локтiс медбöрья точкаöдз, гажтöма висьталiс:

— Тальччисö сётаки бöж вылат, Чикиськин! Чуш-паш пырис Шурончик, мышкыртчис председатель дынö:

— Мый сiйö кыскалö, Гавриловна? Школаын, столовöйын нюкайтчис, поваррескöт мыйкö быздiс... Не весь сiйö öнджаыс новйöтö.

— Кыдз бы тэ дынöдз эз вайöт.

— Сiя и эм, сiя и эм, — и Олявкалö пель одзас: шу-шу-шу. Кöть и торья кабинет, и стенаэс дзоньöсь, но самöй пель одзас. И вöлись горöнжык: — Павкас, павкас и меным! Фактураас гижöмась, а эз и мыччалö — сразу пö мöдiк точкаö кыским. А кытчö, яг чуддэслö я мый я?

— Ладно, пондам тöдны.

Шондi лэдзчан кадö, кöр нач ни мыдзисö и синнэс, и киэс, и косыс — не öтiк час лыддьöтiс вöрзьöтчытöг отчёттэз, видзöтiс бухгалтериялiсь бумагаэз да видзчисис Андрей Никитичöс, а сiя эз лок городсянь, — Олявка петiс сельпоись. Сирень да акация кусттэз сайын, кытöн сулалö гöгрöса пызанок-грибок, кылö, орсiсö доминоöн, и Ванько Вань висьтасис кытшöмкö история.

«Вот сiя и юалö, — гарддьö Ванько Вань, — кыдз нö сiдзи, инюшко, а? Мыля инö метöг зонö чужöма?» А иньыс и сьылö жöникыслö: «Ой; шондi тэ менам, ой, дона! Да эд чужтöнняс нылö оз ков айныс!» «Да ме не сы йылiсь». «А мый йылiсь нö, шондi менам?» «Мыйкö тай ровно бы не тово... Етшаöв некö да...» «А тэныт куима колiсö?» «Да етшаöв тово керöмыт». «Новйöтчи етшаöв?» «Во-во! Ме январьнас локтi, а тэ июль вылас простамин». «Ох, сокол, ох, дона! Да эд сизим месяцсяö вайи!» «Досрочнöя?» «Ага. Быдöнныс вон обязательствоэз босьтöны, и ме тожö... Кöть этöн, мыся, ачымöс мыччала... Лок жö, мича шондi менам, юртö малышта, небыт тырпат окышта!» — кончитiс Ванько Вань и ошкыштiс инькасö:— Дипломатка дак дипломатка!»

— Сiя мый, — пондöтiс мöдiк, — а вот эта... Рытнас инькаыт пельнянь кöрыш кöвдалö, а öтöрас дружокыс — гырс-гырс шыр моз. Инькаыт и давай ылöтчыны: «Папочка, ме бы öтöрö петала, а киэзö гырдззави пизьöсьöсь, чапкышт-ко пельпон вылам гунька...» Вот кытöн дипломаткаыт!

Эз и казьмöтчы сторожыслö Олявка, сiдз и мунiс.

Рытыс шоныт да лöнь. Посадын сулалö лöз тшынок да курыт чад — öтмöдöрын сотöны картов кор, кöда эна мича луннэзö неумöля косьмöма. Раз сотöны кор, дак Губляныс карч страдасö, сылiсь кыз нырсö, нырыштiс, öнi пондас вöджжыны погоддя сьöрын, медбы покровöдз керавны капуста, сыбöрын вайны понуль да бучитны кöньöссэз. Ась и шоныт эшö, а куимöт спасыс чулалiс ни, а чулалас куимöт спас — пась лöсьöтны как раз.

Гортас, кыдз только пырис да вежис вывсö, Савыркина сразу пуксис гижны письмо и бöра жöв керсис, шöммис местаас.

Сьöлöм вылас — из. Кыдз сiйö, сьöкытсö, чапкыны? Мыйöн вештыны, кыдз зыртыштны?

Юрас дума-ёрш дарсасис да бытшкасьö: «Может, сiйöн и эз кай гортö Андрюшаыс, что сыкöт... Да но, оз жö сiдз кер! Важын я баитiс: «Ме öтiк ен öнiсянь тöда и только сы вылö юрбита, сы оланöн ола. Эта еныс — тэ, Оля...»

А пеллезас горалiс Ванько Ваньлöн голос: «Дипломатка дак дипломатка!»

«Ага, дипломатка... Сiдз, сiдз и эм...» Сiя матöжык вешшис стулнас пызан дынас, перыта кырлалiс медодзза кыввез:

Олан-вылан, дипломатка! Кывзы, мый ме висьтала тэныт...

Гижис перыта, гижис сiдз лёка, кыдз неважын, кынымкö часöн одзжык леш-вош ругайтiс Шурончикöс сы понда, что потакайтö Чикиськинлö, созлöй барыгалö. Кыввес буждiсö-киссисö, дзик шер, и Олявка ровно бы кылiс, кыдз нiя шваткöтöны-вартöны своянкаыс юр кузя, и ровно адззис, кыдз Вероника сайöвтö юрсö киэзнас...

Ашынас, асывсяняс одзжык, Олявка звонитiс Андрей Никитичлö. Мöдiс баитны ласкова, висьтавны, кыдз гажтöмтчис сытöг, но сыись дипломатыс эз пет.

— Андрюша, талун каян ни? Кöр локтан?

— Менам кружок, дак ог тöд эшö, кытчöдз кыссис.

— Кай одзжык. Кылiн?

— А мыйлö одзжыксö, Оля?

— Модзытлiсь письмо лыддьöтны.

— Кытшöм модзлiсь? Кысь тэ сiйö адззин?

— Этö тэнчит, чачасинушко, колö юавны — тэ эд сiйö адззöмыт.

— Былись письмо эм? Али сералан?

— Тэныт бы менчим этшöм сералöмсö, — синва сорöн висьталiс Олявка да стук-бряк чапкис трубкасö аппарат вылö. — Чöв, шедтан тэ аслат корпа вылö!.. Ме тэныт мыччала!..

Тöдвылас усис клён листокыс, кыскис сiйö книга коласiсь, пондiс синмöн видзöтны: эз я чукрась, эз я потлась, эз я кыт чег?

Абу, быд чальпаыс быдса, и шöрыс волькыт.

Сiдзкö, повны немись: радейтöмныс дзонь.

Дзонь я?

Дата добавления: 2015-11-16