Вот шуöны: Кöспельыт пö только повзьöтчö. А не, сiя и очкоöн орсö. Пуксясö пö кык кöспель мыр дорö и давай картiнас шовкйыны! Ойбыт орсасö, ежели ойыс югыт, орсасö сэтчöдз, что кöдакö быдöс ассис подасö проиграйтас. И кöда выиграйтас, вашöтö звирсö аслас вöрö — веськыта ыббез кузя, деревняэзöт.
Налле ассиныс вöрнысö проигрывайтöны. А вöлись пö жугдöны вöрсö, пöрöтöны, вужсорнас пуэсö шедтöны, жалейттöг кажйöны-чегöны. Вот эд кыдз нылöн!
Шуöны, мукöдпыр и морттэскöт орсöны. Ыштайись мужик вöлi инмылöм орсны. Петкöтö нин ноша, адззö: мыр дын старик пукалö.
— Шоччись, мужик, мыдзин эд, натте...
— Эм невнаыс, мыдзи кодь.
Токо пуксяс — кöспельыт сылö — картi.
Орсасö, орсасö — мужикытлöн öтiк нин полоска кольччас. И сэк казялас: шулеритö кöспель! А мужикыт кокнит киа вöлöма — кöбöвтас сылö пельбокас: эн жульничайт сэсся! — а инмас мырас. Мöдпырся курмыштас бы — сiя бöра мужикытлö мырсö сюйыштас. И сэк мужикыт кватитас галя да синнэс коласö жвангас сiйöн — кöспельыт чер-бар таралас.
Видзöтö мужикыт — коккес мöслöнöсь...
Вежöртас, кинкöт орсiс, но оз вермы вежöртны, кыдз кужис смертьтöмсö вийны.
А сiя не галяöн вачкöм, а енгымöн* — сiйöн только и туйö вöрисьтö пöрöтны.
Чомор*
Эмöсь я, шуат, чоморрес? Эмöсь, натте, кöр абу. А одзжык-ту вöвлiсö даки...
Ог тöд, кыным год меным сэк тырис, — вит я, квать я. Мунiм бабöкöт пуягöдла. Сiя господскöй вöрас быдмö, дак Виль Гублян сайö сё мунiм ыббес кузя веськыта. Петiм Ероп сордö, а сэтöн гамазей:* йöктöны, сьылöны, чеччалöны, юр вевдöрöт берездасьлöны. «Этiя мый?» — юала ме. «Медбöрья кольта кöрталöмась да Чоморсö потшшуйтöны». «Кытшöм Чоморöс?» «Кöда ыбсö гöгралö, няньсö воны тэрмöтö, а сюэсö чуддэслö подтыны оз сет». «Кöда нö сiя?» «А сiя абу на эстöн. Мöдiлаын часöт, кытчö сылö сурöн да брагаöн туиссэз сувтöтiсö, шулимовöй черинянь осьтiсö. Сёяс-юас пöттöдз да вöлисьтен йöктыны кутчö. Перво öтнас йöктö, сэсся иньсö корö да челядьсö. А мукöдпыра, кöр кодззас, морттэс коласö петö, ныкöт öтлаын йöктö. Дедö висьтасис тай, кыдз öтпыр ныкöт йöктöма. Старухаö, шуö, чарлаэзöн орсö, а ме, шуö, зоннэзöкöт зукья-йöкта да песня горöта. Сэсся, шуö, видзöта: тöдтöм мужичок коккесö вежлалö. Мыйлö пö сiя, йöз мужикыт, сэтчö локтöма? Кутi пö киöттяс, мöдi юавны, кытiсь сiя, а киыс — йы и йы, дзик покойниклöн. Сiя дзарнитiс пö ме вылö, пеллезнас, кыдз баля, трек-трек керис да пуэс коласö пырис».
Ме сэтчö пондi синöнжык видзöтны и казялi эд чоморокöс — мöдiк кушинок вылын йöктö. Коккес оз тыдалö — жельнöг да малина сайöвтö, — а юрсö да пельпоннэсö бура адззылi: йöрнöсыс гöрд пестредись, юр вылас ноёвöй колпак. Öддьöн эд йöктö — пизьö токо, киэзнас öвтö, юрнас бериняйтö...
Дата добавления: 2015-11-16; просмотров: 47 | Нарушение авторских прав
| <== предыдущая страница | | | следующая страница ==> |
| СЬÖКЫТ ЛУН | | | ГУНДЫРСÖ КОЛÖ ДЖАГÖТНЫ |