Ouml;шмöссэз

В.В. Климовлöн коми прозаа небöггес

Чайдöм ув. 1960.

Пашко менам дона. 1962

Вера Селина. 1962.

Виль нянь-сов. 1963

Гавкалöн бедь. 1968

Тырдоз. 1977

Куськось ― Яшалöн козин. 1985

Лöньыс оз ло. Роман да рассказзэз. 1987

Лöз йöрнöс. 1992

ГУБЛЯН

РОМАН

Босьтöма небöгись:

Климов В.В. Лöньыс оз ло. Кудымкар, 1987

РОМАНЛÖН ПЫТШКÖС:

ВИЛЬ ГОРОД

ВЕЖÖМ

КИНАТ ОН ЛÖСЬÖТ

ДЗОЛИНЬ

«АДЗЗЫ, ИНЬКА, ЖÖНИКÖС…»

КÖТЬ МЫЙ ШУ, А ОТСАВНЫ КОЛÖ

ЛÖНЬЫС ОЗ ЛО

СЬÖКЫТ ЛУН

ГУНДЫРСÖ КОЛÖ ДЖАГÖТНЫ

ГОЖУМЫС МÖДÖ ЛÖСЯВНЫ

ЕНÖШКА, ЕНÖШКА…

КЫТЧÖДЗ АБУ СЁР

ВИЛЬ ДЕНЬГАЛÖН ВАЖ ЛЫД

СЮРАПЕЛЬ

ПОВЗЬÖТЧÖНЫ

МЫЙКÖ НЕ СIДЗ

ТÖВСЯ ЯГÖД

СIДЗ Я, НЕ Я

«КОДЫР САЙКЫТ, КОДЫР КÖДЗЫТ…»

РАМАЗА ЛОАС

КИНЛÖН ВИСЯНЫС ЗУБЫТЖЫК?

КУИМ СОТНЯ ГРЕХ

НЫРЬЯСЬ, ЭН НЫРЬЯСЬ…

МÖДНЁЖ ЭЗ ВЕРМЫ ЛОНЫ

И БÖРА ТУЛЫС

ШЫЛЛЬÖН ДА МЫЛЛЬÖН

ТАЛУН, АШЫН И ПЫР

ОЙСЯ БÖРЙИСЬÖМ

ВИДЗÖТ, КЫТI МУННЫ

Романö пыртöм фольклор тексттэз:

Ай коза лун

Антуссэз

Вöйöм колокол

Вöриссез

Ваиссез

Гор увтiсь клад

Жыбан

Золотöй сийöса вöв

Кöркöся коми мужик

Картiöн орсiсь

Кладыс пышшис

Кудым-Ош да Юкся

Кывзiсикö

Кыдз Зуйпи разбойниккезöс вермис

Кыдз курöг шогöт öвны

Кыдз лудыкöс кольлалöны

Луншöрика

Мыля ид шепыс дженыт

Ошовна

Пеля-богатырь

Простöй морт

Сэтшöм сiя, не мöдкодь

Тшыкöтöм свадьба

Чомор

Чуддэз да чучкöйез

ГУБЛЯН

ВИЛЬ ГОРОД

Кöр Андрей Никитич Верепов мунiс уджавны городö и пырис овны виль квартираö, соседкаыс сэк жö локтiс сы дынö тöдсасьны. Сiя вöлi пöрись морт и пырис не куш киöн: вайис нянь, печатнöй пряник да конфетаэз. Пуктiс гöснечсö пызан вылö, поздравитiс виль оланiнöн и öдззис юасьны. И медодз юалiс не хозяиныс йылiсь, не семьяыс йылiсь, а деддэс-баббес йылiсь, кöдна важын ни, кыдз сералöмöн баитлiс Верепов, «керöны кашниккез».

Мужикыт пондылiс ылöтчыны, но старуха кутчисис сы бердö, кыдз сир, и — мый сэтöн керан, он эд вашöт гортсит первöй гöстятö! — ковсис висьтасьны сылö быдöс, мый тöдiс, но лыддис неинтереснöйöн. И былись, кытшöм гаж висьтасьны, шуам, прадедыс йылiсь, кöда учöтсянь уджавлöма черöн да стружöн, аслас дженытик векö ештöма керны сто пызан да лабич и вöйöма юкмöсö? Невна дыржык и буржыка овлöма дедыс. Сiйö öнöдз касьтывлöны Зуйпияг деревняын кыдз бур кузнецöс: кинлöнкö эм дадь, безмен, гормöччан, кöднö керлöма кужись морт, а пöрись учительлöн эм кöртовöй тури, и сiя и талун кузь нырсö видзö тöв паныт да небурика шевкйисьö борддэзнас. Но и эта мужиклöн олан векыс вöлöма кузь: сороковöй нимлунас, как раз сiя часö, кöр чужлöма, сiйö вийтöдз зуралöма йöй жеребец, кöдö вайöтöмась сы дынö дорöтны.

Бабыс олiс дыркодь, ештiс быдтыны и Андрейсö, айтöм-мамтöмöс, да гажсö етша адззылiс: перво пыр горзiс жöникыс понда, сэсся зон-моньыс понда, кöдналöн оланыс вöлi эшö лёкжык.

Висьтасис и сiйö, кыдз айыс сьöрсянь кольччис зыбкаын, а кöр пондiс котрасьны, дас год мымда берегитiс тележка, кöдö айыс важ шестерняэзiсь керлöма медодзза кагаыс понда. Кынымкö год тележкаыс вöлi кык круга, сэсся Андрей содтiс куимöтö, сыбöрын — нёльöтö, и быд год мыйкö содталiс да вежлалiс сэтчöдз, что тележкаыс пeрво пöртчис тракторö, а медбöрын — танкö, башняöн и пушкаöн. И лыйсис.

Конечно, старуха мöдiс тöдны, кинöс вайöтiс сылö судьбаыс сосед туйö, кытшöм увтырись — бурись али умöлись — петiс Верепов. Может, сэтшöм, что пазйö йöртас, щельö турнитас, кыдз тараканöс, вот вöлись и ов да сьыв песняыслiсь мöдöрсö.

Висьтасис Верепов, а старуха бура кывзiс, гогинялiс да öвтiс юрнас, и вöлi невежöртана, мый сiя эта висьтасьöмись ошкö, а мый кулитö и, натьтö, некыдз эз вермы висьтавны, кытшöм мывкыда мужик пукалö сы одзын и мый сысянь видзчисьны ордчöн олiкö: лöнь да гаж али маитчöм-пессьöм. Эшö юасис-керис и лöньсис: соседыс не öддьöн пиня, не öддьöн гыжа. Сэтшöмыс асьсö оз сет öбидитны, но и йöзыслö умöльсö оз кер: эд баббес-деддэс кöдзысiсь жö петöма.

— Тэ мортыс роковöй увтырись, — висьталiс старухаыс ассис приговорсö. — Ов берегитчöмöн, мед иньыт эз ло ме кодь дöваöн.

— Вермас и лоны — мыйöн тöдан? Менö учöтсянь берегитiсö... кöиннэзсянь, кулöммезсянь, дзöдзыввезсянь... Сэтчöдз берегитiсö, что вöв вылö ог лысьт пуксьыны, уявны ог куж.

— Умöль отирись колö повны. Нiя быдлаö велöтöны: юны, тышкасьны, гуляйтны.

— Эн тöждiсь, соседка, пондам лöня овны: ме вина ог ю, ог хулиганит, ог гуляйт. Челядьö да инькаö не чожа локтасö.

Пöрись морт бöра гогинялiс и бериняйтiс юрнас — натьтö, веритiс и эз. И сы сорöн и мунiс. А сёрöнжык, кöр старуха петалiс магазинö, адззылiс, кыдз öшынсяняс виль олiсь кытсöвтiс басöк паськöма-кöмкöта инькаöс, кöда мунiс тротуар кузя:

— Вероника!

Инькаыс сувтчис, чатыртiс юрсö, но эз шыась, только гажöн шынньöвтiс да вöрöтыштiс лэбтöм чунёккезнас.

— Видзчись! — тшöктiс старухалöн соседыс и минута бöртi пыртiс инькасö гортас. Старуха только и ештiс казявны, что сiя ыджыт, гажа сина да кузь пелькытша, и мöдiс эшö петавны Верепов ордö, медбы тöдсасьны и сы хозяйкакöт, но кытчöдз лöсьöтчис да баитiс телефонöн бытшöм тöдсакöт, кöда пыр инмö звонитны дзескыт кадö, адззылiс модницаыслiсь только басöк каджсö. И эшö гогинялöв-керис дзор юрнас да макнитiс гöстяыс бöрсянь кинас, бытьтö тойыштiс дынсис кытшöмкö беда.

И не весь тойыштiс: вовлiс сы сосед дынö не инь, не инь... А эд басниыс сьöртi мужикыт сэтшöм вежöра, самостоятельнöй!

Кык неделя бöртi Андрей Никитич вайöтiс иньсö да челядьсö. И вились локтiс соседкаыс да бура юасис Женя аймам да сы баб-дед йылiсь, а вöлись висьталiс:

— Тэ кузь века инька, тэ эшö правнуккетö быдтан. А жöникыт роковöй увтырись. Берегит сiйö, берегит. Пыр видзöт сы сьöрын, мед беда эз павкöт...

Но бедаыс Андрей Никитичöс павкöтiс, только мöдiк ладорсянь.

Некин оз вермы висьтавны, кöр и кысянь локтас бедаыс.

Андрей Никитич тожö эз тöд этö и эз видзчись сiйö, кузь гыжасö, но беда уськöтчис варыш моз сы горт вылö тöвся мича лунö. Уськöтчис ашнöй гырк — и кусiс мужикытлöн синбурыс: том морт кольччис дöвечöн.

Отир баитö: лёк бедаыс не öтнас ветлöтö, сьöрас модзöс новйöтö. Сiдз, тыдалö, и эм: дзебис иньсö Верепов и ачыс ладсис öшис: рапмис, мугсис, киэсö лэдзис. Но кытчöдз зоннэс сы гöгöр бергалiсö, сё гажажык вöлi, морт вылö вачкисис. Ыджытжыкыс, Яшка, дас лун олiс — сы кузя солдатлöн отпуск; Ромка, техникумын велöтчись, невна дыржык. Кöр нiя мунiсö, айнысö сэтшöм гажтöм кутiс — бöбмыны позьö. Öдва-öдва кыскис отпускöдз и нач вельмис, дзик сермöтавтöм Сивко, — юны лэдзчисис.

Кыдзкö кык ой и кык лун пукалiс осьта синнэзöн пызан дорын, кытöн куйлiс разьöм радиоприёмник, öмас и няньтор эз чапкыв, а юис вина да кöдзыт квас. И сё чöлiс да шочыника, дзик сунасись вöв, ойс лолалiс и зэгйис юрнас. Размöд пыралiс пöрись соседкаыс, лöсьöтлiс сёйны, но Верепов ласкова кольлавлiс сiйö ыбöс дынöдз да вились пуксьывлiс важ местаас, и вились то ли думайтiс мыйкö, то ли сунасис осьта синнэзнас.

Этшöмöн и застанитiс сiйö Нина сойыс, кöр локтiс деревняись городас да пырис воныс ордö и сэсся эз лысьт кольны öтнасö.

Рытъявнас Андрей Никитич чеччис, дыр ветлöтiс жыррезöт, босьтлiс киас то книга, то чышьян, то рос и вель дырöн береститлiс нiйö и сё мыйкö думайтiс, думайтiс и думайтiс.

Нина кытсöвтас вонсö, кöр сiя жöв керсяс, но Андрей Никитич оз кыв, бытьтö не сыкöт баитöны. Зато вдруг уськöтчас öшын дынö, ванйöвтас сiйö и паськыт синöн-пельöн видзöтö-кывзö öтöрсö, дзик кинöскö адззö сэтчинiсь да кылö, кöр öшын увтас шы не тöв.

— Тэ мый нö, Андрюша чепöссин? — юалö Нина.

— Кинкö тай мунiс да, — шыасяс воныс мур-мар и бöра жöв керсяс.

Нёджжöвтас сойыс öшынас — сэтчин öтнас шондiа öтöр суналö, нельки кай оз лэбав.

Сойыс чожа казялiс, что Андрей Никитич сорасьлö кыввезнас, аслыс кöтö, и сiйö жарö чапкис: бöбмис эд мортыт! Ниналöн öшöтчисö киэс, и сiя вель дыр вöрзьöтчытöг пукалiс диван вылын. Но вот тöдвылас усис, что Женясö, кенаксö дзебикö, сылö сетлiсö онмöсьтан таблетка, и сiя удiс этö лекарствосö да водтöтiс тшыксьöм мортсö узьны, а ачыс уськöтчис телефон дынö, медбы звонитны больницаö, но номерсö оз тöд, и книгаыс номеррезнас абу. Мöдiс ни соседдэзас пыравны — ордчöн рамыник старушка телефонöн жö олö, да öшынсö пöднавтöн öтöрсис казялiс жебыник тошока старикöс, кöда лыддис деньга. Этшöм ёся тошокыс, дзик козалöн, вöлi только öтiклöн — Гублянiсь Котöроклöн, позьö шуны, соседлöн, сiдз кыдз деревняэзныс пукалiсö ордчöн. Котöрок любитлiс баитны: «Авторитетнöй мужиклö колö видзны тош, — и мыччавлiс ассис тшöка бöжсö: — То этшöмö... Тоштöм мужикыс — васно инька...»

Да, эта вöлi Карпуш, гублянскöй старик. Нина осьтiс öшынсö паськытжыка, горöтiс:

— Öй, Карп Иванович! Тэ мый эстöн керан? Старик чатыртiс юрсö, дзар керис вылö и, кöть эз казяв, кинкöт баитö, шыасис:

— Ме-ту? Ме öнджа кера... стажируйтча... А кытшöм андел мекöт вылiсянь баитö? Не я Виль Гублянiсь Нинка?

— Сiя... А кытöн нö, стажор, машинаыт?

— Вон тай швыргö-ыргö!

Керку пельöс сайсянь уйыштiс-петiс «Урал» мотоцикл. Руль саяс пукалiс бригадир Венька, Котöроклöн внучок.

Мотоцикл сувтчис магазин посöдз дынö. Нина гажмис: гортiсь отир сё ни мыйöн-нибудь отсаласö. Сiя дженытика висьталiс ассис шогсö: воныс шогалö, колö больницаö кыскыны, а немöн. Старик мöдöртiс гублянкасö (сiдз Котöрок шувлiс ас киöн вурöм юр вевтöс — то ли шляпа, то ли шамшура), медбы эз бусöсьмы да эз быгав шондi вылас баныс, трекнитiс коза тошокнас, серьёзнöя висьталiс:

— Отсавны колö, Венька, Öндрийкоытлö. Тэ кыдз бы шуин, а?

— А мый сэтöн шунытö? — эз откажитчы бригадир. — Отсалам. — Сiя пондiс лöсьöтны шогалiсьыслö места: осьтiс коляска вевдöрись запон, дзимлялiс лабичок вывсис кытшöмкö кöртторрез, а ны местö ольсалiс чорыт плащ, кытшöмöсь новйылiсö пятидесятöй годдэзö. — Давай сiйö татчö, Нина!

— Öшынас и мычча?— серöмтчис Нина. — Но и бригадир — велалöмыт командуйтны! Да кöть синнытö керкуас мыччалö! Подикось, горшныт косьмö...

Пырисö, здоровайтчисö. Котöрок йиш-виш керис нырнас, нюмыртiс öмсö:

— Эта но мый? Ветеринарнöйся курытжык тай дукыс! Зынапу разь эм? Этчö менчим Мемесьöс йöрт, дак и сiя кольмас... Кытöн нö ачыс?

— Сайись жырас. Узьö часöт, — шуис Нина да чапкис ны одзö тапочкаэз. — Вот эд иньыстöг кытчöдз быгыльтчис...

Старик вештiс тапочкаэсö сапогнас бокö, мунiс Андрей Никитич дынö и дыркодь видзöтiс сы чужöмö, сэсся пуксис койка дорокас да, дзик профессор, кöда керö уна год ни этö уджсö, юöртiс:

— Мак-маковей! Нерваэс путшалöмась и ниль мунöмась, нем абу кольччöм. Колö кайöтны.

— А примитасö часöт сэтчин? — жырас пырикö юалiс Венька.

— Кыскам сэтчин, кытöн прокод примитöны, — висьталiс Котöрок. — Виль Гублянö нуöтам. Адззисяс, Нинка, тэнат пельöсок? Ежели оз, дак гортö пырта.

— Роднöй вонöлö оз адззись? — бергöтчис сыланьö Нина. — Тэ мый, Карпуш, юасян? Тöдан эд — öнi олам нёльöн, а керкуыс — быдса гуна. Только мыйöн веськöтнытö понда?

— Вöрöн, юöн, видззезöн. Горт рунас, — уна тöдiсь врач моз сетiс рецептсö Котöрок.

— Не ачыт я, Карпуш, мöдан веськöтны?

— Ачым, Нинка. Ыджыт опыт эм: Питкинкöт сiйö уджсö керлi. Йöзыслö ог отсась, а асланым отирлö — кöть кор. Öтпырись ачым сэтшöм жö вöлi.

— Веськöтан, пожалуй, кыдз Мемесьтö, — серöмтчис Венька. Но Котöрок эта пель вылö эз кыв: сiя мыйкö шушкис Ниналö, кöда сiйö кывзiс öддьöн бура и гогиняйтiс юрнас. Кöр Нина вешшис старикыс дынiсь, сiя шуис:

— А больницаас, нучок, этö шогöтсö и сiдзикан оз лечитö. Да, да, мукöдпырсяс оз инмö.

— Сiдз бы и висьталiн: мукöдпырсяс по, — велöтiс дедсö Венька.

Этшöм случайес йылiсь — что больница не быдöннысö вермö веськöтны — Нина тожö кывлiс и вöлi рад, кöр туйдöтiсö сiйö мöдiк туй кузя. Котöроклö, пöрись мортлö и соседлö, сiя веритiс.

Карп Иванович Которков олö кузь олан и быдкодь берсясö тöдö и берсяыс сы киись петö. Кöть и Карпушлö природаыс ыджыт вынсö абу сетöма — сiя учöт да винерик, — а стрась мывкыда и кок йылас öддьöн чож — котöрок дак, котöрок и эм. Школаын и öтiк лун эз вöв, а ликбезö котрасис дышöтчытöг и бура велалiс лыддьöтны, пондiс грамотнöя гижны письмоэз, а сэсся кутчис получайтны «Уральскöй газета» да сы дынö сетсян книгаэз и лоис культурнöй крестьянинöн — сiдз сiйö шуис Питкин, районiсь медодзза врач.

Да, учöт мыгöра вöлi зонкаыт, но ассис пуктöмсö судзöтiс: бытшöм инька адззис, нёль ныв да зон ештiс быдтыны и отирö петкöтны, вöлi армияын и фронт вылö сюрлiс. Таво, кыдз кöдзсис да садитсис, Котöрок ветлiс Сибирьö, Алтайö, Перемö, быдöнныслiсь олансö видзöтiс, внучоккесö любитöв-керис, да некин дынö эз кольччы: йöзас бур-бур, а гортын эшö буржык. Быд пиянлö висьталiс: «Кытöн чужи, сэтчин и век понда овны, сэтчин и кула. И дзебат менö Гублянö, инькаöкöт да зонöкöт ордчöн. Быдöс вузала, быдöс вина вылö вежа, а гортöс — коля!»

Гублянскöй могильникын куйлö сылöн и зон, Венькалöн ай, кöда кулiс гортын оссьöм фронтовöй ранаэзсянь.

Иньтöг сiя олö куимöт год ни, быдöс ачыс велалiс керны. И пода сьöрын ачыс видзöтö, öнöдз эм сылöн сьöд коза — Мемесь, кöда йылiсь и казьмöтiс Венька.

Нина котрасис магазинöдз, вайис вина да лимонад и пуксьöтiс соседдэсö пызан сайö.

— Удав, Карпуш...

Котöрок осьтiс бутылкаэсö, Венькалö кисьтiс лимонад, хозяйкасö юкталiс винаöн — öтпыр удыштiс, а ачыс пöрöтiс сьöрсьöн-бöрсьöн кык рюмка и бутылкасö винанас дзебис пиджак карманас.

— Саймöт öнi, Нинка, вонтö. Кайны колö, — тшöктiс Котöрок. — Менам эшö могильникö колö кежавны: старухаöлöн крестыс пöлiньтчöма, он кö лöсьöт — сераласö йöзыс, ашын эд семик...

А хозяиныс узис и вöтасис вот. Андрей Никитич нёль год ни татöн, городас, олö, а вöтö уськöтчö сё посад, кöда школаын директоралiс. И вöтасьö вот мый.

Ойшöр ни сибалiс, а сiя бытьтö куйлö дзирыт баня полок вылын и вотшкö-пывсьöтö кок гумаэсö. Жарыс небыт, коросьыс виль, и мужикытлöн сьöлöмыс шардö — быд жилкаыс, быд коскаыс небзьö-пöжсьö!

Вдруг стена кузяс пондiсö йигйыны-вартны — йиг-йиг-йиг! Кам-кам-кам!

— Кин сэтчин? — юалiс Андрей Никитич.

— Этö ме локтi! — горöтiсö öтöрсяняс мöс голосöн.

— Кин тэ и мый тэныт колö?

— Вай менчим керöс! Кытiсь босьтiн, сэтчö жö и пукты!

Андрей Никитич сылö:

— Кытшöм кер тэныт, лёквирлö, колö? Пета кö, пета — мыччала вöлись керсö! — и пондiс бытьтö пишаль кошшыны. А локтiсьыс эшö öддьöнжык гымöтö — баняыс зэгалö – и сё горшсö летö:

— Эд шуи: эн вöрöт чужöй пусö! Вот и вештiсь öнi. Он вай добром — ачым босьта!

Зарядитiс пишальсö жаканöн, дзарнитiс öшынас: сэтчин сулалö шпын юрсиа старик. Казялiс сiйö Андрей Никитич и сылiс местаас: ачыс вöрисьыс лешегон* вылын локтöма! И вежöртiс вöлись, кытшöм кер сiя босьтö бы: вон сiйö, кöда матичаыс увтын куйлö... Тьфу, былись эд вöрдядьыс шуис сэк: «Эн керав вожа йыла пусö, сiя менам дюттян!» Вот эд кыдз не кывзынытö!

— Дак ваян, он?! — рявкнитiс айдаыс* да сiдз зэгнитiс банясö, что Андрей Никитич берездасис кок йывсис, ойзыны пондiс...

— Андрюшка, чеччы жö, чеччы ни! — корис сойыс. — Мыйкö тай ружтан, мурзян, разь умöльö вöтасян?

— Сiя... сiя керсö мöдö кыскыны... паровöйсö... Сэтчö пырис Котöрок, горöтчис Андрей Никитичлö:

— Тэ видзöт, мымда мийö — некинлö ог сетчö... Здорово, Никитич! Лэбтiсь-ко, басни эм.

Шогалiсьыс пуксис, видзöтiс одзас, бöрас повзьöм синнэзöн и кутчис юр бердас:

— Сотö...

— Кытi сотö, Никитич? — Котöрок пуксис койка дорокас.

— Юр кучикöс... Сiдз и кыртöтö. И юр коскаö зубыт.

— А-а, сiя нем абу! Часöт кусöтам, — и старик вайис стаканöн лимонад. — На жö юышт этö öльöксирсö.

— Эликсир? Вай, — Андрей Никитич нюжöтiс кисö. Старик сетiс, и мöдыс горша быдöс юыштiс.

— Бу-ур!.. Чудодейственнöй! — шуис сiя да шынньöвтiс, но эта шынньöлыс только тшыкöтiс чужöмсö.

— Вот, вот — чудо, Никитич, — отсалiс Котöрок. — Сойытлö эд ытшкисьны колö, тэ мый но думайтан? Ме косасö лöсьöтi ни.

— И меным?

— Кыдз инö? Главнöй ытшкисисьсö ог жö вунöтö.

— Кöр каям?

— Öнi жö и петам. Венька как раз мотоциклöн лöсялiс. Давай-ко кöмась-пасьтась... Ыжманыс, озъягöдыс сэтчинка — маччикан доль! А турун дукыс, вöр дукыс — сьöлöм сьылö! — ошшасис Котöрок. Ачыс сеталiс Андрей Никитичлö туфлиэз, пиджак, кепка, кöднö мыччис Нина. — Сылöтiкас таво мочевина кöдзи, ассим и Нинаыслiсь ытшкассö удобритi.

Ытшкисьöмыс Вереповлö прокод вöвлi праздник туйö, и кытöн бы сiя эз вöв: командировкаын, лунвыв курорт вылын — а туруналан кежö бертлывлiс гортас и видз вылын овлiс сэтчöдз, кытчöдз оз тэчсьö зороддэз. Эта понда кос гожумö ковсьывлiс неделя гöгöр, а зэрас — кык нето куим неделя. Öнi, городын олiкö, ытшкисьны дугдiс, шоча ветлывлiс деревняас.

Ниналöн да Котöроклöн ытшкассэс куйлiсö ордчöн, и турун дзимлявтöн нiя часто отсасисö. А кыдз лэбасö зороддэз, мукöдпыр и рамаза* — праздничок осьтлiсö, и сэк Котöроклöн балалайкаыс чижьялiс-горалiс не умöльжыка, нежели мартовскöй праздник коста — инькаэс лунö.

Но вот и лöсьöтчисö туйö. Нина сетiс Котöроклö неыджыт сумка, босьтiс ассис да воныслiсь плащщез, и быдöнныс петiсö öтöрö.

— Тöрам я эт мымдаыс? — тöждöмöн шыасис Нина.

— Тöрöтчам кыдзкö. Андрей Никитичыс зыбкаас пырас, дедöс сы пидзöссэз вылö, а Нина — ме бöрö...

Бура пуксисö, бура вöрзьöтчисö и жагвыв петiсö городсис. А сэтчин туйыс волькыт, дзик джодж — вашöт, зэлöт газоксö! И Венька эз жалейт газсö, зэлöтiс, да сiдз, что медодзза жö мысок вылас дедыслöн мöдöра гублянкаыс лэбзис юр вывсис, кыдз бордтыв. И кöд коста старик котрасис юр вевтöсыслö да лöсьöтчис важ местаас, нiйö вöтiс автоинспектор. Сiя сувтöтiс мотоциклсö ны одзö, чеччис, юалiс:

— Кытчöдз мунам, ёрт водитель?

— Гублянöдз.

— Мыля пассажиррет каскатöмöсь?

— А ми, зарни морт, жагвыв, жагвыв, — шуис Котöрок. — Ытшкисьны бригаданым лöсьöтчö, дак косаэз да зуддэз небим...

— Ладно. А мыля нёльöн? Лэбзяс эд сетiсь дедокыс!

— Ме эд абу кича, — шутитö старик. — Нельки не курича — ог лэбав!

Инспектор нюжöтiс ни кисö, медбы Венькалiсь корны документ, но местатöм пассажирыс зонка моз чожа лэдзчис му вылö, горöтчис:

— Ме кольчча... Вот только старухаöлiсь крестсö ог ешты веськöтны, да ась ни.

— Ашын веськöтан, дед. Старухаыт некытчö оз пышшы, — сералöмöн висьталiс инспектор. — Бур туй!

Старикыт мöдiс вежöртöтны сералiсь мортсö, что сылöн старухаыс важын ни эта мирись пышшис, да сёрмис: инспектор колис нiйö.

Недырик баитчисö, мый керны одзлань, и решитiсö не дзугны чукöрсö — мунны öтлаын. Старикыт бöра мöдöртiс гублянкасö, кышалiс юр вылас пеллесви, зэлытжыка, да пондiс поздiсьны Верепов öлöдзö. Но инспекторскöй мотоциклыс вдруг сувтчис лог сайись мыс вылас, и Котöрок решительнöя чеччис да банöвтiс гублянкасö.

— Мунö, ме, подикось, автобус вылö шеда, — висьталiс сiя.

Венька мунiс. Котöрок нимыштiс бутылка голюксö, волькöтiс усоккесö да тошоксö и бертiс магазин дынö, кысянь отирыс пуксьылöны машинаэз вылö. Эстöн вöлись казялiс, что городсö рыт ни нырыштö, а сiя некинлö эз закажит, медбы дозирайтiсö Мемесьсö.

Мемесь, кöть и не сiдз уна йöвсö вайö, а хозяинсö пöттöдз вердö йöвнас да и яй сетö — быдпырся кык-куим пиянок пиявлö. Овлö, кöр и фокуссэз мыччавлö, да кытчö воштiсян?

Мöйму тулыснас, лым сылöтiкö, Мемесь вöлi мезмöма картасис да пияннэскöт мунöма Гублян ю сайö — шать-бадь понда, натьтö, номсöтчис. Ачыс вуджöма, а пияннэс кöдзыт васис повзясö да кольччасö горт ладораныс и ножö горзыны, ножö мамнысö кытсавны. Куим öмись öтдруг чирöстöны:

— Меме-эсь! Меме-эсь!

А Мемесь пруддьö-сёйö пипуоккез да бадёккез и дзар оз кер мöдöрас, бытьтö немымда сылö абу жаль ассис учöттэсö.

Кылас коза дзеллезлiсь горзöмсö хозяиныс, котöртас ю сайö, волькöтас тоша скотиналiсь лядьвейесö шатьöн да гортас вайöтас. Ашынас Мемесь кашляйтны пондас — кынмалöма зажоррезас, лым ваас броддьытöн.

Кынмалöмсö, кыдз тöдам, вашöтöны пым коросьöн, гормöг пуртöсöн нето переца винаöн. Мемесьлö, конечно, не пывсян, не горчичниккез оз лöсялö — только перцовка.

Ваяс миян Айболит сулеясö, стопка-мöд пидзыртас ачыс да петкöтас кольччöмсö картаö.

— Лок жö, Мемeсюшко, лекарствосö юышт, — рочалö козасö пода лекарь.— Вот этадз чурснит токо!— и голюк понсис гульк ньылыштас, гульк!

Козаыс юрнас и тошнас трекйö: ог пö ю!

Кутас старик некывзiсь кульсö сюрöттяс, чатыртас юрсö да кисьтас öмас винасö. Пияннэс бокын сулалöны, шы оз сетö, видзöтöны — не миян пö дело.

— Ах тэ, менам бытшöм! Ах тэ, менам волькыт! — вöлись ошкö сюра клиентсö. — Вот и веськалан тожно!

Мемесьлöн синнэс люммисö и садьыс бырис — вöрзьöтчыны оз вермы, только тырппесö нюлö-вильöтö.

— А на-ко öнi сёйышт, — и шупытсялöм дед сюйыштас козаыс öмö кушман торок. — Сiя лекарство жö эд.

Мемесь ярс-ярс сёйыштас кушмансö да бöра голюк бердас кутчисьö. Сы дынö пияннэс бы сибöтчöны, а сiя сюррезнас беринялö, кокнас топöтö.

— Эшö колö, быздöм тош? Мак-маковей! Ог сет сэсся, тырмас. Давай öнi узь, — и чапкыштас сылö чочком идзасок да мунас вöввесö вердны.

Час я, джын я сэтчин олас — котöртöны сы дынö Венькалöн челядьыс:

— Деда! Деда! Сiя бöбмöм!

— Кин бöбмöм, углашкоэз?

— Мемесьыт!

— Мак-маковей!

— Керку юр вылат хулиганитö...

Котöртас гортас старик, адззö: сюра хулиганыт трубасö люкалö. Сiдз и тöд — пöрöтас и öтлаын трубаыскöт ачыс берездасяс да сивилёнсö мургыльтас.

— Мемесюшко, умнича менам, эн жö сiйö кер, неуджсö, — ласкова баитö старик. — Лок жö ме дынö, матушка, ме тэныт корья турунок сета...

Коза дугдас бöбавны, дзарьясьö да кывзö, мый улын баитöны.

— Лэдзчы жö, эн тшöкты менö видзчисьны... Сола няньöн верда. И каньпеток эм...

Коза амликтыштас öмнас да бöжнас трекнитас.

— Чöв, лэдзчан менам часöт, — шуас хозяиныс да пырас оградаас. Сэтчинiсь сiя петкöтас бутылка и бöра пондас бöбöтлыны аснырсö: — Раз чöскытыс оз ков, солаыс оз ков, сiдзкö, курыт ва тэныт колö. То сiя, Мемеська, адззан?

Коза вильöтыштас тырппесö, рып-рып шыасяс и кыдзкö бокöн-бокöн лэдзчас карта вевдöрись навес вылö, а сэсся веськыта чеччöвтас улö...

Бур туйыс Котöроклöн эз аркмы. Этö сiя асывсяняс жö и тöдiс: горт улицасис петiкö пантасис Катай Катя. Инькаыт быдсöн бытшöм: и волькыт чужöма, и басниа, и пасьтасьны кужö, да синнэс сераöсь, не öтiк рöмаöсь, а сэтшöм мортыс, кыдз лыддьöны Гублянын, туй дзугись.

Кок бердас пондiс каттисьны чочком канёк.

— Мак-маковей! Мый нö кернытö пондам, Белько? Горзыны али сьывны? Ноко висьтав!.. Сьывны, конечно. — Босьтiс канёксö киас, пондöтiс вöснитик да гусьöник голосöн:

Кöкö горттöм басöк сера кöкиньöй, да ой,

Парма яг шöр-ы-ын...

Сьылыштiс сiдз, дугдiс, а песня одзлань норасьö сы голосöн жö:

Норöн бöрдö чочком юра нылiньöй, да ой,

Югыт шор дор-ы-ын...

— Мак-маковей! Сьöлöмö сьылö али кин? Бергöтчис, адззö: ыджыт, басöк синнэз видзöтöны сы чужöмö, и шыннялö öм, а пеллез бердын пежьялöны кузя öшöтчöм пелькытшшез. Шынньöвтiс старик, висьталiс:

— А-а, нылiньöй жö, да сьöд юра тай, бöрдö Юголь туй дорын! Тэ не Гублянöдз я?

— Виль Гублянöдз бы колö, да мыйöн? Автобус мунöма ни, мöдiк машинаэз рытнас сэтчин оз мунö.

— Немöн, немöн, бöрдiсь кöкиньöй!

Сьöд синнэс эшö ыджытжыкöсь лоисö, юалiсö кöдзыта:

— Кöкиньöй? Мыля этö ме кöкиньöй? Ме морт, ме мам, менам горт эм... А впрочем, горт я?.. Да, да — кöкиньöй... — и синнэс öшисö.

Сэтöн вöлись Котöрок казялiс: сы дынiсь мунö статя инька, кöдалö сiдз бура лöсялö лöз трико.

— И тэ мун, Белько, öтнам понда кöкны, — лэдзис сiя канёксö.

Старик жöдзöв-керис туй дорас и пуксис пуок вуджöрö, вина увтiсь ящик вылö. Лунтырся мыдзыс да жарыс сэк жö кунисö сылiсь синнэсö, и юрыс лёпыр öшöтчис. И пишкöв-керис бы, натьтö, кöбы эз инмы сэтчö локны Ольга Гавриловна Савыркина. Сылöн синнэс лэчытöсь, дзик кайварышлöн, и горт мортсö казялö ылiсянь. А пестрединнöй гублянкаа Котöрокöс, конечно, сылöн син некöр оз орддьы.

Олявка (сiдз шуисö Савыркинаöс аймамыс, сiдз пондам шуны и мийö) сибöтчис матöжык тополёк дынö, негорöн шуис:

— Карп Иванович, пöднав жö öмтö — гуттэс какасö...

Котöрок эшö узикас тöдiс этö вына голоссö, горöтчис паныт:

— Ась, сiйöн ог виньды...

— Он, конечно, да эстöн узьнытö оз бы ков — «тёщаыт» ордö шедан.

— Сiя öнi райын сусло, натьтö, вийöтö, дари керö: кöркö вичкуын сьывлiс, дак сэтшöммесö пö сэтчин чукöртöны.

— Ох, посувтын тэ быдмöм! Горожанаыс эд сiдз ласкова вытрезвительсö шуöны! Эн на сюрлы?

— Ась ен оз шу!.. Ме, Гавриловна, транспорт вöджжа. Абу я тэнат кытшöмкö таратайка?

— Эм, Карп Иванович. Часöт локтас. Только брезент увтö колас дзебсисьны.

— А эта наказаннё понда мыйкö пельдас меным?

— Конфетка.

— Спасибо. Ась сетас тэныт еныс боёк жöник,— шуис Котöрок. — Али ачыт адззан?

— Тэнат запаснöйет абу ни? Поди, эшö кытшöмкö дöвеч адззисяс?

— Мый ни, новду...

И сэтчö старикытлö тöдвылас усис Андрей Никитич, и Котöрок кокнита лэбтiсис ящик вылiсь, шентiс гублянкасö му вылас.

— Эм! Эм, зарни... Вот эстöн сулала — адзза!

— Аттьö-спасибо инö! Кытöн жö сiя?

— Гублянö иньдöтi, тэ дынö матöжык...

Котöрок, кыдз только босьтiс киас гублянкасö, висьтасис быдöс, мый адззылiс, да эшö ассяняс содтыштiс:

— Только öмтö осьтöн эн видз, солдат моз действуйт. Инькаок сы дынö леститчö пö, важ модзок. Видзöт, ась оз одзав. Ченпиёнка пö, чань моз гöняйтö.

Пондан мошкоритчыны — пытшынтöг кольччан: городскöйес оз маласьö, озö гуддисьö.

ВЕЖÖМ

Мукöд мортыс одз пондö вежöртны олансö и тöдö сiйö бура, кыдз ассис мамсö, и кужö бура овны. Горт ладорас ли, йöз муын ли, пыд вöрын, пустыняын — лöсьöтчас сiдз, что и му вылас олö-уялö, дзик ваын чери. Сэтшöммес тöдöны, кытöн куйлö чöскытжык шöрöм, шонытжык пась, тöдöны, кытöн сайласьö счастье — кокнит борда, мича сина олан, кöдасянь сьывсьö луннас и узьсьö ойнас, тöдöны, кыдз колö кутны сiйö: кöр жагвыв, гусьöника босьтны боксянь, а кöр уськöтчыны сы вылö веськыта да мöртны, топ варыш, лэчыт гыжжез.

Олан тöдiсьöн шуис асьсö и Савыр Гавра, кöркöся чекист. Этаö — тöдны олансö — велöтiс и медбöрья нывсö, Оляöс, да эз пет сыись не варыш, не руч: бур оланыс сы дынiсь пышшалiс, кыдз кöч, и мортыс эз вермы вöтны сiйö не челядь кадö, кöр олiс аймамыс дын, не нывкаалiкö, не сыбöрын, кöр петiс жöник сайö.

Восемнадцатöй год вылас сiя лоис кузь кока ёныник нывка; рожабаннэс кызöсь, дзик пöльтöмöсь, öм доррес бытьтö невна оссьöмöсь — вот-вот шынньöвтас. Ыджыт синнэс мыйкö рудкодь голубöйöсь, öддьöн бытшöма лöсялiсö векнитик синкыммескöт, русöй юрсиыскöт, кöдö кыйлiс кузь чикиссезö.

Голосыс вöлi сöстöм альт, сiя басöка горалiс хорын, и дуэтын, и öтнас. Пасьтасьны-мöдöтчыны радейтiс и, кöть дона паськöмсö эз неблы и эз вурöтлы, а мода сьöрись эз кольччыв.

Шöрöт школа бöрын нывкаэс чисто мунiсö уджавны, а сiя пырис университетö. Медодзза жö нeделясянь ештылiс ветлöтны Кама дорöт, кежавлiс зоосадö, музейö, а художественнöй галереяын дырöн видзöтлiс пуовöй важ еннэз и некыдз эз верит, что эна умöлика лöсйöм-кералöм колодаэз одзын кöркö пидзöссэз выланыс кыскасьöмась вына отир — сылöн баббез-деддэз. Но эта вöлöма и вöлöма миян векын. Öтiклö ны коласiсь, чуд кодь сьöд болванлö, кеймылöмась учöтнаныс и сылöн айыс да мамыс, сылöн соседдэс — «лыдтöм пасмаэз», кыдз нимкодявлiсö ыштайсаöс ордчöн олiсь деревняэс.

Нем и шуны, Савыркина лоис бы бур историкöн, сыись вермис петны учёнöй, сiдз кыдз одзза жö курс вылас сiя гижис коми отирлöн важ паськöм йылiсь трактат да пондiс чукöртны караваннöй бунт йылiсь висьтасьöм. Но сэтчö сы одзö петiс, ровно гудыра лунö шондi, басöк зонка да сайöвтiс аснас и университетсö, и Кама дорсö, и берся еннэсö.

Мыйöн сiдз гленитчис зонкаыс, невежöртана: кöсыник, öшöтчöм киа, паськыт нырборда, тувдöм сина.

Нывка эшö эз на ешты тöдны, кин сiя, кытiсь, мый уджалö, но кöр панталiс, сэк жö и висьталiс, кыдз пушкинскöй Татьяна: «То сiя». А шогмис эта сентябрьскöй лунö, кöр университетö локтiсö Прикамьеись поэттэз. Стиххез лыддьöтiс öтiк, мöдiк да и куимöт. Вöлись сетiсö кыв сылö — том гижисьлö. Сiя баитiс сорасьтöг, повтöг, только тэрмасьöмöн. Öнöдз Савыркина эз вунöт сылiсь баснисö: «Миян гижиссес етша, миян, позьö шуны, абу на проза, но омöн коми му вылас, быд посадын, дзик вына петассэз, мыччисьöны том таланттэз. И локтас лун, кöр комиэслöн лоасö повесттез, романнэз, эпопеяэз...»

И лыддьöтiс стиххез — горöн, ятнöя, дзирыта. Кöр дугдiс, нывка тшöктiс кöть невночка лыддьöтны комиöн. И зонка лыддьöтiс. Оля этö стихсö сё эз вунöт, кöть и сiя базарнöй, кытшöмöсь вермö гижны быд студент:

Тэ эн вид сiдз менö, мама,

Мыччы нылытлö бур кыв.

Доймö мусö, дзики рана,

Доймö сьöлöм, дзик нарыв.

Пемыт ойнас онö пышшö,

Мича лунöн öшö садь,

Бытьтö виззьö менö свищень,

Бытьтö лöсйö пöжöм шать.

Тэ эн видчы, мам, эн летсьы,

Он ни вермы керны нем —

Сёравно ме муна сэтчин,

Кытчö кыскö том сьöлöм...

Эта коми поэтыс вöлi Андрюша Верепов, кöда олöма Олякöт öтiк районын, Зуйпияг деревняын, а öнi кончитöма пединститут и велöтö Югольскöй шöрöт школаын.

Баитны вöлi мый йылiсь, и сiя лунö нiя ветлöтiсö Кама дорöт пыд ойöдз. А ойыс вöлi шоныт, дзик тулысся, руалiс небытик тöлок, шушкöтчисö шочалöм листа пуэз, сöстöм небоын дзар видзис вожа Дзодзогтуй и лöз биöн орсiсö ылiсь звездаэз. Мушар гöгöрись кымöрö сюрлiсö метеоррез, и нылöн дзирыт туйныс секунда кежö öзйылiс не öддьöн веськыт визьöн. И руас, топ тулыс конецын, кöвьясис чöскыт дук.

И ны мороссэзын кувтыртiс тулысся гаж.

Нiя лыддьöтiсö стиххез вольнöй Кама йылiсь, сы весьтiсь золотöй биэз йылiсь и чöлiсö, пароходдэзлiсь сьылöмсö кывзiкö, и пöжисö-нежитiсö ыджыт мечта, видзöтiсö оланыс вылö виль синнэзöн — югьялан, невночка паджсьöм, счастьесянь баралöм синнэзöн.

Перемас Андрюша олiс кык лун и мунiс аслас раса-вöра пельöсокö, вöйис формулаэз да тетраддез коласö и сьöрна вунöтiс аслас кöсйисьöм йылiсь — ветлыны Оханск дынiсь колхозö, кытöн сiя арö дзимлялiс карч Оля Савыркина.

Андрюшасö видзчисьтöн нывкалöн садьыс бырис, и сiя чапкис да, бытьтö борд йылын, пустöй киэзöн уськöтчис гортас, медбы сапкыны-кутны счастьесö, кыдз арканавтöм вöлöс, бурсиöттяс да век кежö доддявны сiйö аслас додьö-оланö.

Юголь посадö сiя локтiс сёркодь рытöн и Ыштайöдз, аймамыс дынöдз, эз ни мун: öткö, сiйöн, что сэтчинöдз ылынöв и туйыс нятя, а, мöдкö, сiя локтiс не ны дынö.

Адззис школьнöй керку, Андрюшалiсь квартира, кайис посöдзö, ёркöтчис.

Абу шы.

Эшö камöтiс-керис — некин эз пет, и би эз öзйы. И пырис мöд квартираас, ордчöн.

— Сiя талун оз ло, сiдз и висьталiс...

— Кытчö мунiс?

— Вермис и сойыс дын кайны. Ашын эд не велöтны...

Иньдöтчис подружка ордö, кöда таво локтiс уджавны медпунктö. Шарк пырис юасьтöг, кыдз одзжык керлывлiс, нёджжöвтiс заборка сайись жырокö, а сэтöн табуретка вылын пукалö нечулим Верепов да югъялö стыдтöм рожанас, дзик весöтöм меднöй самоварыс, кöда ошшасис кыз кынöмнас пызан шöрас.

Баралiсö Олялöн синнэс, кылыс кынмис. И сулалiс сiя, кольмöтöм этатшöм пантасьöмнас, дзик неловья.

Верепов чеччис пызан сайись, петiс порог одзö, юалiс:

— Тэ кысянь нö ойнас?

Оля шы эз сет, эз тöд мый горöтчыны.

— Ме тэнö эг видзчись...

И эта вылö нывкаыт нем эз висьтав, только куньыштiс синнэсö, перыта бергöтчис и вотьыштiс-петiс öтöрö. Андрюша топытжыка пöдналiс сы бöрсянь ыбöссö да осудитiс гöстясö:

— Одзöв, горадзуль, зонкаэс сьöрын котрасян. Тэныт, бöбöв, диамат да Фрейдöс колö велöтны...

Öтöрсö дюттьöтiс ой — лöзöв-пемыт, лöнь, сук руа. Эта пемытыс нырыштiс, ляпкöтiс сылiсь пельпоннэсö, мыдзтöтiс коккесö, коссö. Юрас мöртчис, кыдз майöг, дума: «Джагöтчыны! Сы öшын увтын джагöтчыны — ась видзöтö!.. Ась тöдö, кыдз серавны...»

Мунiкас и пöрччалiс курткасис йисö, пешлiс, крепыт я, керис петля — дженытöв петiс. Тöдвылас усис, что сы злодейлöн öшын увтас öшалö песлалöм паськöм, сiдзкö, сэтöн эм гезок.

Чапкис йисö кок увтас, тэрмасьöмöн, веськыта ва гöппезöт да сирсёя нятьöт кайис вевдöрись улицаö, палисадникöт пырис огородечö, зэлыта пöдналiс вороткасö каличöн. Оградаын пондiс камгыны-увтны пон. Олявка сувтчис, бöр керсис. Сэтчö и уськöтчис поныс да размöд курччöвтiс сылiсь коксö, кöр палисадник вевдöрöт петiс йöрсис, но кыдзкö сапог пырйöттяс, а не вывтiжык.

Посöдз бокас неыджыт чукöрокöн куйлiс жугалöм кирпич. Сiя босьтiс кык тор, кытшöмöсь шедiсö киас, да öтсö иньдöтiс поныслö, а мöдсö — Верепов öшынö.

Керкусис петiс Вереповлöн сосед, фонарикöн югдöтiс тротуарсö, мунiс öшыннэс дынö. Савыркина повзис, что сiйö вермасö пурöтны поннас, и шентiс-котöртiс ыджыт туй вылö, минута кeжö сувтчыштiс чукыляс, медбы дзар керны бöрланьö да кывзiсьыштны, мый пусьö посадас.

Жугдöм öшын увтас сё эшö, кылö, чижьялiс лöгöтöм пон, бытьтö ош поз адззис.

«Колiс бы злодейыс юрö виззьыштны... Да и Женькаыслö кыв-мöд козьнавны бы, — думайтiс Олявка. — Бур модзанка, он кулит».

Зубыта доймис да чижьялiс и Олявкалöн сьöлöмыс, но бурöтны да веськöтны сiйö вöлi некинлö. Этö шогсö эз бы вермы кокньöтны и роднöй мамыс — мед ни небыт сьöлöма морт. Сылö öтнаслö, только аслыс колö кыдзкö лöньсьöтны мидзöвтан сьöлöмсö, чышкыны сы пытшкись курытсö, отсавны сылö сувтны аслас местö, медбы вермыны одззамоз долыта да спокойнöя керны ассис уджсö. Бöбись вартсьö сьöлöмыс, ыждалö, вирыс сотö чужöм, поткöтö кöсича жилаэз.

Мый öнi керны? Кöдöрö мунны? Кытчö юр пиньöвтны?

Öтiк думанас мунö бы гортас, мöдiкнас — пыкöтасьö. Может, ой кежас Юголяс кольччыны?

Эз кеж гортланяс. И посадас эз кольччы — эстöн сэсся нем керны, öнi сылö туйыс öтiк — Кудымкарö да сэтчинсянь — Перемö. Только сiя сетас долытсö.

Гиззьыштiс-койыштiс негырись, но тшöк зэрок. Олявка эшö öтпыр дзарнитiс биоккес вылö, кöдна сiдз шоныта югьялiсö улiсь улицаас, и лэбтiс куртка воротничоксö да кузя оськöвтiс городлань.

Мунiс перыта, бöрлань дзар эз кер, и ёрдiс зэра лунсö, кöда тшыкöтiс сылiсь гажсö, мечтасö.

Мамыссянь сiя унаись кывлiс: мортыс чужöма гажöтчыны. А часöт сылö мöдiк, аслас дума оссис: мортыс чужöма маитчыны. Да, да! Этö сiя талун ачыс адззылiс, аслас сьöлöм пыр сысъялiс, только эшö синваэсö эз ешты рудзöтны.

Тэрмасис кузьтуй, медбы чожажык кольны местасö, кытöн сылö дöвгисö: «Ме тэнö эг видзчись», кольны сiйö лёк минутасö, кöр кисö нюжöтiс гезок дынö, кöр лöсьöтчис ни прощайтчыны чочком светыскöт. И колiс бы висьтавны ыджытся-ыджыт спасибо лöг поныслö, кöда кыскис, позьö шуны, петлясис, а ойся ветлöтiсь оз и касьтыв сiйö, бытьтö эз и думайт кошшыны гезоксö, бытьтö эз мöд пышшыны эта вежöрттöм оланiсь, кöда öт кинас малыштö, а мöднас мышкат тэчö...

Городыс панталiс сiйö гажа биэзöн да зэв нятя туйöн — и тальччыны бытшöмика некытчö. Жагвыв, медбы не резны асьсö, пуовöй тротуаррез кузя Олявка кыссис автовокзалöдз, тёсовöй öр дорын гывйыштiс сапоггесö, пырис пытшкас. Нырас вачкис ва паськöмлöн пöжсьöм дук. Отирыс етша, и нiя чисто узьöны. Ыбöс дынсянь медылiсь батарея бокö, пуовöй диван вылö, нюжöтчöма кузь кока солдат. Натьтö, кыдз и Савыркина, тожö ылiсянь локтö — нельки пидзöссэс резсьöмась гудыра ваöн, а чемодан бокыс, кöда тыдалiс вещмешöк сайсянь, вöлi мавтсьöм чунь кыза сёйöн. Нöитöв-керис, тыдалö, кузь коккесö, мыдзöтiс киэсö, пельпоннэсö и öнi саркйö-узьö — пушкаись лыйöм оз саймöт.

Матö солдатыс дынсянь, панытмоз, поздiсис и Олявка: пуксис чорыт скамья вылö, лöсьöтчыштiс бокöн, паокжыка, пуктiс юрсö скамья спинка вылас и кунис синнэсö, да сiдз и эз вермы онмöссьыны: син одзас ойбыт вежмасис кытшöмкö невежöртана, фантастическöй мир, кöдаын шуксисö киннэзкö уна кокаöсь, уна юраöсь, куимсувда öмаöсь, и быд öмыс рызйис-сералiс векыша пиньöн да мöдöра тырпöн. И быдöнныс нiя вöлiсö только кык рöмаöсь — вежöсь да гöрдöсь, и эна рöммес быд минутаö вежласисö, топ цветнöй киноын. Мукöдпырся эта бöбöв мирыс пондылiс горавны да матынсьöтчыны сы дынö, и сэк Олявкалöн оссьывлiсö синнэс, и сiя казявлiс руд стена да кывлiс магнитофонлiсь бунчитöм, кöда орсiс стена саяс.

Асывнас сiйö кытсöвтiс солдатыс, кöда ештöма ни нöитны да пыркöтны пидзöссэс вылiсь косьмöм нятьсö:

— Тэ разь некытчö он мун? Видзöт, мый керсьö!

Кыкнан касса одзын тойласис уна отир. Мукöд мунiссес ештöмась ни небны билеттэз и видзчисьöны öтöрас, кöр нiйö корасö пуксьыны автобусö.

Медодзза рейсыс вылö Олявка, натьтö, эз и шед бы, ежели не солдатыс. Сiя юалiс, кытчö мунö нывкаыс, колис сы дынö чемодансö да мешöксö и очередьтöг босьтiс билеттэсö аслыс и Олявкалö.

Автобусас ни, ордчöн пукавтöн, солдат висьтасис-путшöтiс ассис некузь олансö. Сылöн аймамыс Волга дорись, вовлöмась татчö вöр керавны. Мöдöмась овны öтiк тöв, да сiдз и пöрисьмöмась татöн. Таво мунöмась горт ладораныс, только нывнысö посёлокас кольöмась. Вот сы дынö, сойыс дынö, и кежалöма солдатыс.

Öддьöн визыв сёрниа морт, сiя баитiс и баитiс, кыдз челядь понда радио: сё бытшöма-волькыта, кокасьтöг-нырьясьтöг. Олявка кывзiс сiйö, да кывзöмыс вöлi, топ тöв: кöть и вижгис пеляс, но юрас эз сидз. Нывкаыт олiс аслас кышын, аслас шогын, аслас зубытын. Шыасис жö рaз-мöд солдатыслö, а сэсся мылаыс бырис, и сiя ляпкöтчис местаас, жöв керсис да сiдз, пожалуй, кузьтуй и чöлiс.

А Перемас, кöр чеччисö, солдат юалiс, кытöн олö Олявка, и сiя висьталiс адрессö, ассис ним-фамиллё и нельки рочалiс вовлыны. Мыля рочалiс — ачыс оз тöд. Может, сысянь, что юрыс пизис, дзик горын каша гырнич, и эз казяв, мый горöтчис кылыс, а может, и сiйöн, медбы вештiсьны Вереповлö. И эта казявтöг рочалöмыс нач дзугис нывкалiсь олöмсö, сувтöтiс сiйö онняюрöн: Олявка чапкис и велöтчансö, и гортсö и, кыдз некодя борда кай, пондiс лэбзьыны тöв ньылат. И лэбзьöтiс тöлыс нiйö, öшöм нывкаöс да солдатöс-сверхсрочникöс, Сибирьö, кытöн видзчисьö, кыдз думайтöны уна отир, паськыт сывтыра счастье. Но счастьеыс — руч, сiйö сьöкыт вöтны и кузь кока солдатыслö; счастьеыс — ваын ёкыш, сiйö он гумышт ведраöн, он кут куш киöн.

Сыбöрын, кöр солдат петiс армияись, нiя кошшисö ассиныс шуднысö и Енисей дорись вöррезын, и кын муа Ямалын, и шоныт Ферганаын, да мыйкö некытiсь эз адззö...

Куимöт гожумас Олявка — не нывка, не инька — бертiс гортас, сы кузя одзöв пöрисьмöм-рапмöм аймамыс дын, кöдналö Сибирресö гöгравтöн и бырöм гижöток эз иньдыв. И бертiс не öтнас — кагаöн. Учöт вöлi кагаыс, вöлись дадiöн талис мусö, но стрась мывкыда, зыркыт сина и айыс кодь жö кузь кока.

Олявкалöн мамыс казялiс кагаа нывсö оградасис, хлоп вачкис бокас, гусьöн горöтчис:

— Ен тэ, батюшко! Олявкаыс, кöбылаыс, пиянöн локтö!

Паныт эз пет, видзчисис керкуас да тэрмасьöмöн чышкис синваэсö. Кыдз пырис нылыс, сэк жö юалiс:

— Айыс... айыс кытöн нö?

— Кузь командировкаын. Арнас локтас, натьтö.

— Гижситö кöть?

— Эг ештö.

— Но тэ и Олявка! — только и шуис мамыс да кутчис чöвтны кагасö. Сэсся не эз видчы, не эз корит. Проститiс быдöс понда.

Кöть и нылыс шы эз сет, эз висьтась, кыдз олiс, мый адззылiс йöзас овтöн, но мамыс сьöлöмнас кылiс: не чöскыта. Да и тыдалiс: яйыс косьмöм, синнэс ровно багсялöмась — кусöма ныын одззася, нывкася, югытыс, чужöмыс нюжалöма да вежöтöма.

Сэксянь Оля лоис пыр кежö Олявка. Сiдз прокод шуис мамыс, сiдз пондiс шуны йöзыс. А виль нимкöт сы бердö лякасис, дзик сирвезтурун, и виль, небытшöм слава: чапкöм.

Савыркин гозъя эта вотöдз олiсö лöня-гусьöна, етша и йöзас петавлiсö, сё асланыс позын, дзик шыррез, сайласисö. И сё медучöт нывныс кузя, кöда эта бура позоритiс да лöгöтiс нiйö аслас пышшöмöн. А Лёва, внучокныс, нач вежис нылiсь олансö, ровно томмöтiс кыкнаннысö. Гаврила Лекандрович бöра пондiс пыравлыны школаö да висьтасьны, кыдз нiя кутавлöмась Распутинлiсь да Курайлiсь бандаэз, кыдз адззöмась пудся унажык золото, кöдö дзеблöма öтiк купец.

Недыр мыйись Олявка кутчис вузасьны ларёкын донтöмик товаррезöн, и лöсялiс оланыс, дугдiс курöтны да желлявны сьöлöмсö, и мортыт небис виль пелькытшшез да чунькытш, öдззис сьывны-нюргыны, кöр мыйкö керö öтнас, а сыбöрын и ветлывлiс ёрттэс нимлун вылö, бура гажöтчис кооператоррезлöн праздник коста — зукйис-йöктiс, дзик том нывка, и гармошка сьöртi рытывбыт сьылiс частушкаэз. И быдлаын, кытöн лöсялiс, сьылöтiс-касьтывлiс жöникыслiсь ним — Коля. А то этö:

Ме радейта, ме радейта,

Ме радейта Колясö.

Коля армияö мунас —

Эшö нёля колясö.

— сьылiс унапöв.

Сельпоись председатель горöтiс сыкöт öтiк öмись да сё топытжыка жмитчис Олявка бердö да сэтчöдз топöтчис, кытчöдз предлöн иньыс эз лякöт сы пельбокö дзирыт «тупöсь».

Лöсялiс Олявкалöн оланыс, вились пуксис аслас öрö, кыдз тулысöн ыждалöм ю, и пондiс жолльыны-сывны лун бöрсянь лун.

Сiдз бы и олiс уджын да гажын, но арнас былись локтiс жöникыс — Колька Баканов, тури кока, вöснит голяа баюн.

«Кавтыкыс мöс шег ыжда, сэтшöмсö винаыс оз курöт», — казялiс Гаврила Лекандрович да пондiс думайтны, кыдз лöсьöтчыны овны зятьыстöг. И былись эз сорась Савыркин, что Колька Баканов — винаюись: сiя олiс Ыштайын неделя да джын и эз и садясьлы бытшöмика, быд лун паджис олансö не только гортас, но и соседдэзас, и каждöйыс сы вылö видзöтiс косöй синöн.

Старик ветлöтiс-керис Ыштай гöгöрись деревняэзöт и Гублянын босьтiс важ керку, кöда пустуйтiс не öтiк год ни. Сэсся корис колхозiсь вöлок, сэтчö тэчис нылыслiсь пажытьсö, öтi-мöдi посудаись пуктыштiс, телегаас гатш водтöтiс код зятёксö да иньдöтiс том гозъясö небöм керкуас овны.

А Лёвушка дед-бабыс дынö и кольччис — чача туйö пондiсö видзны, номлö эз сетö курччöвтны, шолкö да кучикö пасьтöтiсö.

Кыза я, вöснита я, а том гозъя олiсö öтлаын эшö год мымда. Олявка, кыдз и Ыштаяс, вузасис, а Коля унажыксö сiйö дозирайтiс: шоныт кадö пукалiс посöдз лабичокын, а кöдзытнас — шоныт горок дорын, ларёк пытшкас.

Сёр арöн кай чукöррез чепöссисö саридзö, и Коля Баканов тури моз быркнитiс-лэбзис тöвтöм-лымтöм муэзö.

Кыдз кокнита пантасисö, сiдз и чожа янсöтчисö.

Иньыс только этö и видзчисис — кöть пö невночка лолышта вольнöй рунас, ог понды кольмöтны юрöс вина дукнас, дугда ветлöтны сюра кымöсöн. Сылöн кытöнкö ылын-ылын, сьöлöм шöрокас, дзик бичирок, шаитiс-югьялiс надежда, что эшö адззас аслыс ёртсö сэтшöмö, кытшöмö öнi видзчисис, пожалуй, не сьöлöмнас ни, а мывкыднас.

Видзчисис и видзчисьтöнняс бöра волькамис вывтырнас, югмис чужöмнас, только пемдöм син гöгöррес эз сöстöммö, и Олявка пондiс мавтны нiйö краскаöн.

Но кыссис год бöрсянь год, а сэтшöм ёртыс, кытшöмö часто вöтöн вöтасьлiс, эз пантась. Мöдкоддес, кöднö шувлiс сiя клёктаччезöн, вöлiсö, пыр гардчисö сы гöгöр, да нiя эз колö. Правда, корасис сiйö öтiк офицер — серьёзнöй мужик и, тöдчö, деньгаа морт (козьналiс золотöй пелькытшшез), но Савыркина, кöть и козинсö примитiс, а мунны сыкöт эз понды: и строгöйöв, и юрсиокыс шочöв ни, и Гублян дынсяняс ылынöв олö — не пикан, не пистик, не мöдiк пермяцкöй деликатес сэтчин абу.

А öтка важ керку гöгöрын, кöдалiсь стенаэсö серöтiс вагонкаöн да краситiс городскöй мастер, лэбтiсис ограда, сöстöм баня, карчйöрсö кытшöвтiс, топ городын, тёсовöй стын. Хозяйка велалiс быдтыны карч да ягöд, берся цветсö, мыдзтöг дозирайтiс нiйö. Котöрок, соседыс, дивуйтчыны эз вермы: кыдз сэтшöм басöка позьö видзны керку гöгöрсö?

— То эд кытöн волшебницаыс! — шуас старик, кöр сибöтчас палисадник дынö да босьтас юр вывсис гублянкасö: эта гажыс сы понда вöлi, дзик святöй — кыдз нянь, кыдз песня, кыдз ен. — Тöдiсь эд тэ, тыдалö? Мак-маковей!

— Эм невна, — серöмтчас Олявка. — Не весь эд Дзолинь бабö гöгöр бергалi, да Перемас велöтчи, да ылiсь муэсö меряйтi.

— А и быль! — шуас Котöрок да ыш ловзисяс. — Вот бы жöник тэныт — кыдз райын олiн бы.

— Колö бы, Карп Иванович, — сы сьöртi баитö «волшебницаыс», — да кытiсь сiйö ваян?

— Öтiкö видза син вылам, видзöтам, кыдз повно сьылö, — кöсйисяс старик.— А несьылiсьыс райсö оз кер...

Сизим год сiдзи кöсйис старикыт, но кöсйöмыс йылiсь тöдiс только горт ворота дорöдззас.

Гублянын овтöн кыкьямысöт годас, кöр Олявка лоис товароведöн, öтпыр Лёвушка юалiс:

— Мам, кытöн менам папö?

Мамыс видзчисис этшöмсö, лöсьöтчис сы кежö и веськыта висьталiс:

— Сiя мунiс татiсь, чапкис миянöс.

— А кöркö локтас?

— Чередь...

— Кор, ась локтö... Быдöнныслöн эмöсь, меным тожö колö.

Колö! Зоныслö колö пап!

А вот эта йылiсь Олявка некöр эз думайтлы.

Кресенняас жö мунiс посёлокö, кытöн олiс Колялöн сойыс, медбы корны Бакановлiсь адрес. Сойыс, Коляыс сьöрья кузь мыгöра инька, вöлi гортас, песласис. Кöр тöдiс, мыйлö локтiсö сы дынö, веськыта вотшкис-висьталiс:

— Алименттэз дугдiсö локны? Кöть и тöдi бы, дак эг висьтав.

Мамыс халат бердын видзсисö кык нылочка, понпутшаöсь. Джоджас кык зоночка — шыртöмöсь, зырымöсьöсь — разисö будильник.,

— Меным ачыс колö, не алименттэс. — Олявка кыскис сумкасис апельсиннэз, чукöрокöн тэчис пызан вылö. Челядьыслö сеталiс конфеткаэз. — Да не меным колö... Зоныслö пап колö...

— Конечно, колö... А одзжык кытöн вöлiн? Мыйöн думайтiн? — кöритiс хозяйкаыс гöстясö. — И быль тай инькаыслöн юрсиыс кузь, да умыс дженыт, оз любит думайтны тарабаннас.

Сулалiсö джодж шöрас, тöдмалöмöн видзöтiсö öта-мöд вылö.

— Инькаа сiя?

— Эг юась... — Кытöн олö?

Гажтöма, мыдз синнэзöн хозяйка видзöтiс кенакыс чужöмö, мöдiс вежöртны, быль я сiя баитö, быль я сы зонлö колö ай.

— Ог тöд, — бергöтiс синнэсö мöдöрö хозяйкаыс. — Миянлö оз гиж. То ли Монголияын, то ли Вьетнамын. Куим год кежö мунöма.

— Кытöн уджалiс?

— Ой, ог и тöд ни, вунöтi.

— Областьсö кöть тöдан?

— Тюменскöй... Кошшыны кутчан?

— Пондыла.

Невна чöлыштiсö, сё сiдз жö джодж шöрас сулавтöн, вöлись видзчисьтöм гöстя корис юны.

— Чай нö пизьöта, — хозяйка чöвтiс одзсис дженытик, лöз цветока клеёнкаовöй запон, и кынöмыс сразу лоис гöгрöсажык — мылькйö кайис.

— Кисьт кöдзыт ва...

— Миян эд газ, чожа.

— Эн манитчы, вай ватор, — эшö öтпыр шуис Савыркина, и сылö ыджыт зелёнöй чайникись кисьтiсö ва.

Юис, кружкасö сеттöн синнэзнас мыччалiс хозяйкаыс кынöм вылö:

— Кöрсянь?

— Чужьясьö ни.

— Витöт лоас?

— Сизимöт...

Петтöнняс Олявка висьталiс:

— Может, товарись мый ковсяс, вовлы. Ме ола Гублянын... Савыркина Оляöс кошшы.

Ны коласын эта вöлi медодзза и медбöрья басни.

Колька Бакановлiсь адрессö иньыс адззис мöд годас. Гижис öтпыр и мöдпыр, ответсö эз вермы видзчисьны и öвсис, дугдiс бумагасö весь тшыкöтны.

А сьöлöмыс эз öвсьы, эшö öддьöнжык ордалiс, доймис, бытьтö сы вылö койыштiсö дзирыт ва; сiя тшöктiс тэрмасьны овны, а не дзöрны маятник моз öтiк местаын, тшöктiс кошшисьны. Абу жö сiя медбöрья морт, медбы не адззыны жöникöс.

Кошшыны, кошшыны!

И адззыны!

Эта кадö как раз и вайис бытшöм юöрсö Котöрок.

И эшö öтiк бытшöм юöр сылö вайис газета, кöр машинасö видзчисикö Олявка осьтiс талуння номер: окрпотребсоюз ошкö Гублянскöй сельполiсь пондöтчöм — лэбтыны культура вузасьöмын, буржыка тöдны, мый колö деревняын олiссезлö, а медодз — нылö, кин быдтö нянь, дозирайтö пода. Этшöм бур делосö пондöтiс керны Савыркина, а туйдöтiс этаö сылöн партийнöй совесть да техникумын велöтчöм.

Конечно, не быдöнныс сiйö ошкисö эта понда. Бухгалтер Чикиськин собраннё бöрсяняс сразу жö и бытшкис:

— Тэныт мый — медуна колö? Али орден видзчисян?

«Кыз ныр, вежöм... — усисö айыслöн видчан кыввез.— Быль, тыдалö, ме, сэтшöм и эм. Быдöнныс перво ас пондасиныс тöждöны, а ме? Может, öнi менам главнöйыс — кошшыны жöник?.. Баитöны тай, ежели гортат нем абу бурыс, дак и удж вылат сiдз лоас. — Но сэтöн жö и панöвтiс асьсö: — Нетушки! Быдöс понда колö тöждыны, а медодз — уджыт йылiсь. Сiдзкö, сувтöтам ас одзаным задача: уджавны честнöя, вежливöя, магазиннэз видзны сöстöма. Босьтам обязательство и сiйö быд деревняын лыддьöтам — ась каждöй тöдö, кыдз мöдам уджавны, и ась отсалö миянлö, кыдз вермас...»

Дата добавления: 2015-11-16