Вöриссез

Нiя, кага, вöриссес, двенадцать сортов, двенадцать личинааöсь, двенадцать балааöсь: и морт кодь, только синкымтöм да сьöд гыжа, и порсь кодь, и коза кодь, и пон кодь, и кань кодь, и кöч кодь, а кай кодьыс абу. Но упсö сюзь моз, кривзö тури моз, клингö тупка пиян моз.

Шуам тай нiйö, нимкодялам по-сякому: мöс кок, кöс пель, рака чунь, сюра-пеля, кöрт чунь, синкымтöм. Сiя уна гöна, уна рожаа.

А ниммес сылöн — Висьман, Висядь, Висьöв, Деман, Макай, Айда, Каймай, Лётэй, Ослядь пон, Аттьöв, Гулёв, Милёв.

Стрась любитö старикö мöдöтчыны, но паськöм шубöвсö пыр шульга вылас керö. А сiдз-ту сiя пасьтöм, гöна, ош кодь кучика.

Ваиссез

Ваисьыс эм мужик, эм инька. Инькаыс морттэслö мыччасьö да дынас бöбöтлö, а мужикыс йирас, ва пытшкас, кыскö.

Ним ваисьлöн абу, а эм нимкодь: вакуль, веж юр, кывтöм, пасьтöм, нювтсёйись, кыйтöм юра, кулютун. Медыджытныс, юровöйныс, — Кульпель.

Инёвöй кульыс кузь юрсиа, а юрсиас — нювт, песок, нять. Кöр лэдзчас шондi, сiя петö васис, пуксьö берег дорö нето ваас косви сулалö и пондö сынасьны — весöтö нятя юрсö. Мукöдпыра ачыс горзö, ойзö, а кöр и ружтö кокнитика — уп-п! ук-к! Сiя öддьöнжык сынасьö тöлiся ойö, лöнь погоддяö.

Мортыслö мыччасьö умöль одзын. А ежели тумана асылö кин адззылас, эта не умöль одзын.

Мужиччöй вакульсö оз тöдö, кытшöм сiя.

* * *

Лыддьöтiс, и оныс пышшис. Югдандорöдз дзуркöтiс диваннас — сё бы лöсьöтчис бытшöмика, паокжыка пуктiс ольпасьö кикок да адззис бы небытжык подушка дор. А кöр онмöссис, онсö сэк жö дзугис нёштöм вöт.

Бытьтö пукалö сiя горт огородечас, сад шöрас, кытöн сылöн быдмöны барбарис, роза да каштан, и кывзö соловейлiсь сьылöм. Кывзö и быдöс вежöртö, мый шувлö кайыс: «Лок жö, лок, сьöлöмшöр, татчö! Меным öтнамлö гажтöм, меным öтнамлö кöдзыт! Ме öтнам ог вермы керны позöс, öтнамлöн оз шогмы семья, и орас миян родным нач. Кин сэки гажöтас шудтöм Олявкасö?» Кывзöв-керис и эшö мöдiкö вежöртiс: да этö эд сiя ачыс сьылö! И корö дынас Андрюша Вереповöс, ассис дона ёртсö, кöда ветлöтö Гублян ю дорöт да лыддьöтö стихотвореннёэз. «Лок жö, лок, сьöлöм бурмöт менам, татчö!» — горöтлö Олявка да макайтö киэзнас.

Вдруг паськалiсö каштанлöн листтэз и ны увтiсь петiс уна киа кöмтöм морт. Сiя пуксис жагöник, важнöя, дзик благочиннöй поп, му вылас, шуис: «Ме индийскöй ен Шива, меным колö тэнат киыт». — «Кытшöм ки?» — «Кöда соблазняйтö тэнö».

Инькаытлö жаль кисö сетны, вот сiя и ылöтчö: «Ме тэнö ог кывзы, менам аслам ен эм — коми». — «А ме коми ен и эм — Ойпель, только Шивалiсь личинасö кышалi». — «Ноко шувлы сэк этö модянкывсö: куим зыртыр зöр тöвбöр». — «Сiя мый! Пондыв-ко сорасьтöг модьны вот этö: дзодзог-модзок дзодзогкöт модзокасис».

Пондылiс Олявка модьны, да сорасис, и Ойпель висьталiс: «Он вермы? Сэкыт вай китö». — «Дак менам и синö, и кылö...» — «И синтö, и кывтö орöт да чапкы понлö.» — «Дак менам и сьöлöмö, а ежели и сiйö чапка, дак кыдз инö сэсся овнытö, кыдз сьöлöмтöг любитнытö? Ог сет ме тэныт, Ойпель, нем!» — «Ме сэк ачым босьта», — висьталiс лёк еныс и, дзик осьминог, нюжöтiс киэсö-щупальцаэсö аслас жертва дынö, медбы орöтны сылiсь öтдруг и кисö, и синсö, и кывсö, и сьöлöмсö.

Повзис инькаыт да ножö горöтны: «Андрюша-а-а! Андрей Никити-ич!»

Сэтчö и саймис. Саймис, кылiс, кыдз öтöрын гужгö-уджалö трактор, кокнита ловзисис: эта вöлöма вöт, и сiйö некин оз понды орлавны, топ öтрепьё, тороккез вылö.

Син одзас мыччисисö псалтырись строкаэз: «И если глаз твой соблазняет тебя, вырви его и брось от себя: лучше тебе с одним глазом войти в жизнь, нежели с двумя глазами быть ввержену в геенну огненную».

«Кытшöм ерунда! — досадуйтiс Олявка. — Сэтшöмсö и бöбöв некöр оз кер!» Сiя бергöтчис спина вылас, тэчис киэсö юр увтас, бура нюжöтчис и эшö мöдiс куйлыштны, но тöдвылас усис Андрей Никитич, и сiя чапкис вывтсис кокнитик одеялосö, чеччис.

«Нюжласьны некöр, колö действуйтны, колö тэрмасьöмöн котрасьны!»

КÖТЬ МЫЙ ШУ, А ОТСАВНЫ КОЛÖ

Могильник дорас быдмис öшöтчöм уввеза ойбадь, кöда гусьöн-гусьöн, дзик ыджыт шог пыр, шушкис-вашкис кузь листтэзнас да гажтöма видзöтiс кöртовöй пирамидкаэз, пуовöй кресттэз да бетоннöй столбоккез вылö, а нiя, ыджытöсь и учöтöсь, нитшсялöмöсь да чегласьöмöсь, пиньласьöмöсь да потласьöмöсь, сер видзисö быдкодь рöма табличкаэзöн, кытöн гижöмöсь кулöммезлöн ниммез, сулалiсö и дзик сералiсö бадьыс вылын: мый пö тэ кöдзан гусь шыэтö, мый дзуган лöньсö, лучше öвсьы, жмит бердат небыт увветö и сунась миян моз жö, сiсьмы жагöникöн кок йылат: сёравно тэ некинлö он ков, сёравно кöркö усян, лоан колода, кокора, сыбöрын — пизь да бус: муись тэ шогмин, муö и пöртчан.

Котöрок лöсьöтiс буждöм могиласö, веськöтiс пöлiньтчöм крестсö да пуксьыштiс бадь увтас.

Шоччисикас старик досповна юыштiс, мый кольччис бутылка пыдöсас, и решитiс, что Андрей Никитичлöн оланыс тшыксис, что сылöн юрас пизьö майöв, и не сувтöтны кö этö пизьöмсö, пазаласö мукöд шариккес. А сувтöтны этö пизьöмсö, эшö решитiс старик, вермас только сiя — Карп Иванович Которков.

Банöвтiс гублянкасö, кышалiс сiйö юр вылас пыдынжыка и, зырнас беддясьöмöн, иньдöтчис веськыта паррес кузя Виль Гублянö.

Эшö городсянь кайтöн сiя бöрйис рецепттэз, кöдна бы вермисö лöсявны Вереповöс веськöтöм понда. Рецепттэс сылöн вöлiсö — нiйö кöркö козьнавлiс Питкин, таланьын медодзза доктор, кöда, пожалуй, унажыксö ветлöтiс деревняэзöт да посаддэзöт, нежели пукалiс приёмнöй кабинетын, да веськöтiс трахома, сьöд писти, гыжна, умöль шогöттэз — чельчак да картошки* — и не öтiк ойöн узьлiс Котöрок ордын. Эта коста, частожык кринка брага дорын, доктор сетлiс Котöроклö быдкодь урок, кыдз пöртны морттэзö бöбмöм-ылавлöм отирöс.

Öнi Котöрок бöрйис медкокнитö, но медбур или, кыдз шуис уна тöдiсь Питкин, медэффективнöй средствосö: пывсьöтны жaрся-жарöн и, кöр коросьöн нерадсьöтöм мортыт оз ни понды терпитны жарсö да уськöтчас öтöрö, койыштны вывтас ведра понiсь ключ ва. А банясö Нина лонтiс — этö Котöрок адззылiс могильник вывсянь, кöр расок дорись кулис ежа, сiдзкö, этö процедурасö колö керны талун жö. А сэсся...

Стариклöн чужис öддьöн бытшöм план, кöда сьöртi сылöн и кузь корось лоас, и дзирыт полок, и медбöрын — сусло: Нина касьтiсяннэс кежö пыр сур вийöтлö. Но лекарьлöн гениальнöя гöрдззöм планыс олiс только Нина порог дорöдз, кöдö смелöя вожмöвтiс Котöрок: Андрей Никитич, кöмтöм и йöрнöстöм, небзьöм, дзик парёнка, куйлiс диван вылын — сайкöтчис пывсьöм бöрсянь.

— Мак-маковей! Сiя, видзöт, гывьялöма ни греххесö! — горöтчис старик. — А ме, пöрись лягуша, сё эд городсяняс кая, гортын эг на вöв. Но и порйöтö, натьтö, менö Мемесьö!..

Пуксис лабичö, пондiс видзöтчыны ас гöгöрас, любуйтчыны сöстöм, неважын миссьöтöм стенаэзöн: быд керыс зыртöма пуртöн, гывьялöма матега ваöн и ошшасьö югытнас да басöкнас, дзик виль.

— Тэ разь, Карп Иванович, не öтнат олан? — юалiс Андрей Никитич.

— Ме-ту? Менам паськыткодь компанияö: радио, кань, мамдзель Мемесь да сылöн кык пиянок-чавылёк.

Верепов нельки серöмтчис, кыдз забавнöй старикыт лыддис чуннес вылын ассис «семьясö», и сэк жö, кымöртчис: «А ме тайнö öтнам, вач öтнам... Колис Женяö...»

Кöр пырис керкуас Нина сойыс, юалiс сылiсь:

— Тэ мыля нö öнöдз он висьтав, что Карп Ивановичыс инь вайöтöма?

Нина пуксьыштiс воныс коккез дынö, шуис:

— Ачым первуись кыла! Вот тэ и кутчись сыкöт! Кинöс нö, Карпуш, пыртiн? Не я Катясö? Сiйöн и часто тiян ладорö котрасьö.

— Хе-хе... Бырöм бонсö мыйлö меным?

— Али томö бöбöтiн? Эн я бöбмы, Карпуш? Вешьяныт оз ни öшшы да...

— Öшшынытö, поди, и öшшас эшö — семьдесят два вöлисьтен, — но кин висьталiс, гöтраси что?

— Кык челядя мадмуазель тай, шуан, — казьмöтiс Андрей Никитич. — Али бöбöтiн?

— Мемесьö? Тоша мамдзель сiя, коза.

Вак-вак серöмтчис Нина, китшкыштiс Андрей Никитич, шыннялiс тошсö малалiкö Котöрок. И, поди, эта минутаö как раз высьтiс тошсис, кыдз баитлiс ачыс старикыс, виль лекарскöй идея и сразу жö кутчис пöртны сiйö делоö.

— Кывзы, Никитич, кай-ко ме ордö коза йöвсö юны. Неделя юан — сизим год кежö томман! Да сэтчö эшö виль ма — о! — виль ма босьтам! И чарньöвсö кошшам, кöда йылiсь мöйму баитiмö тай. Ме тöда, кöда местö пырис. И ёдiэсö кыям — тöда йирок, кытöн нiя шердын ыждаöсь уялöны.

— Былись? — гажмыштiс Андрей Никитич. — А мый, позьö и сiдз! — и пуксис, пондiс кöмавны тапочкаэз. — Кыдз, сойö?

А сойыс шуис сэтчö:

— Öтiк йöв вылас он ов... А кин стряпайтнытö пондас?

— Мак-маковей! А мийö разь китöмöсь? Да и стряпкаыс адззисяс, колас дак.

— Но сэк мун, желайтан кö...

Быдöс дзугис Тонька. Сiя петiс сайись жырись, висьталiс:

— Дядьöлö колö больницаö, ме некытчö сiйö ог лэдз.

— Кылiн, Карп Иванович? — паськöтiс киэсö Верепов. — Врач эм врач. А колiс бы ветлыны.

— Менам и вугыррес, и гаггес лöсьöтöмöсь, и чериэс очередьö сувтöтöмöсь, — бöбöтчис Котöрок. — Может, ашын ветлам? А?

Нина сё думайтiс, кыдз керсьыны ашын воныскöт. Могильникö сiя оз мун, сiдзкö, вердны и дозирайтны сiйö некинлö: Тонька городö лэдзчö, а аслыс и уджавны, и касьтiсьны колö ештыны. Жöникыс лунтыр гöрны пондас, а учöт челядьыс мый? И бöра шуис:

— Ась ветлöны, Тонька... Мöдлун больницаас мунат. Ладно?..

— Но, мед сiдз лоас, — согласитчис старик и сувтiс порог дорö:

— Эн на жö мун, Карпуш, кöть суроксö юышт, — и Нина петiс сурысла гуö.

— Пасьтась сэкыт, мунам, — висьталiс Вереповлö Котöрок, но Тонька калькöтчис лыддьöтан журнал бердiсь, ятнöя висьталiс:

— Талун некытчö оз мун. Ашын — пожалуйста... Ю, дядь, турун васö.

— Нем он кер, Карп Иванович, — бöра паськöтыштiс киэсö Верепов. — Талун пондам юны турун ва, а ашын — черива вызгыны. Одз я локны?

— Одзжык колö бы, — шуис Котöрок, но думыш керис: «Мак-маковей, а менам эд нем абу лöсьöтöм!» — и содтiс: — Ужо, перво шоччись пöттöдз... Чериыс öнi тожö дыр узьö... Ачым тэ дынö локта...

Мöд рецептыс чож лекарьлöн вöлi — сунгыны Вереповöс кöдзыт ваö: видзчисьтöм сунгöмыс тожö вашöтö юр диксö. И петас эта вот кыдз. Дас час гöгöр асывнас, вöввесö дозирайтöм бöрын, нiя мунасö Гублян йир дорö, кытöн ваыс прокод тöвся кодь кöдзыт — ю пыдöсас ключовинаэз. Ёдiэс, конечно, сэтöн оз олö, но нiя как раз сэтчö, крут бережок увтас, и пуксясö вуграсьнытö. Конечно, пöрччасясö, чöвтчасö. Оз кö ло тöла. Вöтясö вугыррез, видзчисьны пондасö, кöр поплавок вöрзяс. А видзчисикас Котöрок мунас ёртыс дынö гагла, кöдна Верепов бокын лоасö, и джöмдас, усяс да бытьтö казявтöг тойыштас сiйö йирас — ло здоров, Верепов!

Ниналöн сурыс, кыдз пыр, вöлi сук да быгья, но кöдзытöв, и Котöрок сэтшöмсö эз понды юны, а только размöд тырпыштiс и тэрмасьöмöн лэдзчис Гублянö.

Картаын сулалiсö эшö кык вöв — абу на сайкалöмась сьöкыт удж бöрын, видз вылö лэдзны одзöв. Видзöтiс телегаэз, быдöс я эмöсь, абу я кыт жугалöмöсь, и кольччис довольнöй: эмöсь и быдöс дзоньöсь, только назём кыскалан таратайкалöн резиновöй колесоыс невна личалöма, но сiйö недыр пöльтны.

Порядок вöлi и сбруя видзан керкуын, нельки кытшöмкö добрöй сьöлöм джоджсö миськалöма да и посöдзоксö вабоналöма. «Васькишна бöра сибавлiс, тыдалö, — спасибо сылö... Гортас, шуö, чомувт ыбöссис петляэс бырöмась, дак колас вежны кöркö. Да и идзасок пö порсьыслö вайтöм... Ужо, ашын жö, поди, касьтiсьöм бöрас, и отсала».

Казялiс орöтöм гез, кöдö ыджыт гöрöдöн оча йитöмась, кыскис öшын подушка вевдöрись сьöктан, разис гöрöдсö да йитiс конеццесö волькыт йитöтöн — тылöппесö кыйöмöн, вöлись вöввесö видз йöрö йöртiс.

«А почтальонлöн вöлыс сё абу, бöра модзыс дынö, тыдалö, мунiс. Чисто моритас, арттöм торта, уськöтас кок йывсис... Ужо, кутла ме тэнö, ворогöс!»

Пемдандорас ни колис сельполiсь сторожлö зыр да мунiс гортас, кытöн сiйö видзчисисö Мемесь да Мемесишнаэз.

Ашынас саймис одзöв, эшö шондiтöг, пасьтасис-кöмасис, вердiс тшыгьялöм каньсö йöлокöн да бöр водыштiс. Вились саймöтiс сiйö Максимка, правнучокыс — корис пым шаньгаэз сёйны. А кадыс — öкмысöт час ни. Кытшöм сэтöн сёйöм!

Петiс огородечас, летiс тоша мöсыслö йöн да жабрей, а сэтöн эшö Олявка юасьны пондiс:

— Кытöн нö, Карп Иванович, тöн сы дырна гуляйтiн? Али ичмоньöс адззин?

— Виль Гублянын тай вöлi, олан йылiсь баитыштiм, инмим да. И тэ йылiсь басни вöлi, — содтыштiс старик, медбы бур юöрöн шонтыштны соседкаыслiсь сьöлöмсö. — Андрей Никитич юасьö тай, кыдз пö овлö, мый керлö, кытшöм пö öнi лоис...

— Мый нö сэтчö шуин?

— А шуи, кыдз эм: морт, мыся, бытшöмовöй, работнича уджалiсёвöй, невеста богатовöй.

— Богатовöй?

— Богатовöй, мыся, шоныта олiсёвöй.

— Сiя мый инö сэтчö?

— Но, лöсялас, шуö.

— Сiдз и висьталiс?

— Ровно бы сiдз...

— Ладно инö, сiдз дак, — серöмтчис Олявка да пырис гортас.

Котöрок пыртiс ёгтурунсö, чили-чоли высьтыштiс козасö, репйис картасис да котöртiс Ойвожка шорок дорö — сэтчин олöны вагаггез, кöдна вылö шедö гырись чери. Но туйыс сылöн эз шогмы: посад саяс, Виль Гублян кузя, тюкйис-мунiс Дзолинь — тöдiс сiйö кузь дубасыс сьöртi да татшкасян, марафонскöй походкаыс сьöртi. Киас сылöн эз вöв не доз, не сумка, сiдзкö, сiя мунö не касьтiсьны, а Нина ордö. «Мак-маковей! Андрейыс эд öтнас сэтчин, тшыкöтас сiйö монашкаыт, не сiдз лечитас! Одзавны колö, одзавны...»

Чапкис йöр дорö банкасö, кöдö гаггес понда босьтлiс, да уськöтчис вöв карта дынö, медбы кутны вöв, и сторожовка боксис казялiс Венькалiсь мотоциклсö. «Сiя и кайöтас», — решитiс думанас.

— Венька! Эй-эй! — чирзö Котöрок. — Кытöн тэ, кытчö кульпельыс чапкис?!

Чирзöм шы вылас вöв карта сайись петiс Мемесь, а бригадир некытöн эз кыв. «Мый нö кернытö? Пукся да и муна, как раз заводитöм, — лэдзис смевсö старик и вожасис небытик седло вылö. — Вöрзьöтчы, звир, бваассээсь...»

Козаыс синнэсö барöтiс, кокнас тюкнитiс: тэ пö эн я бöбмы, менам вердiсь? И осуждайтöмöн юрнас трекнитiс, только тошокыс лет-лет керис.

— Эн пов, Мемесюшко, друндулитам кыдз-ненабудь! Руль вывсис адззис сiйö рычагсö, кöдö шульга киöн колö зэлöтны, кок увтсис нырыштiс мöдiкö, содтыштiс газ — быдöс керис сiдз, кыдз висьтавлiс Венька, — и лэдзис шульга кисис рычагсö. Машинаыс гыркын мыйкö сятнитiс, и мотоцикл сiдз нетшкöвтчис, что Котöроклöн гублянкаыс усис.

«Мак-маковей! Перытöла тайнö?» — повзьыштiс старик и мöдiс чинтны скоростьсö, да эз инмы, мöдiс сувтöтны — эз куж. А ыджыт туй кузяс, кытчö колiс петны мотоциклнас, мунö машина — недыр и люкавны сiйö.

«Мак-маковей! Мак-маковей!»

А зверьыт, тыдалö, только сiйö и видзчисис, кыдз бы люкасьны: ыркнитiс быд горшсис, чепöссис, дзик повзьöм чань, ыджыт туйланяс. И сэтчö старикыт одзö петiс Мемесь, дзик мöдiс панöвтны хозяинсö, но вежöртiс, что сiйö вермасö тальны, и пондiс пышшыны. Котöрок син одзись быдöс öшис, бытьтö сы одзын нем эз вöв, и сiя адззис только öтiкö — Мемесьлiсь восклицательнöй знак моз лэбтöм бöжоксö — и сё веськöтiс эта знак вылö.

Дыш, бура госсялöм Мемесь, кöда некöр эз котрасьлы аслас векын, лэбзис веськыта, кыдз ньöвьёсь, гортланяс. Сы бöрсянь сярзис-гöнитiс мотоцикл. Стариклöн öнi юрас эз вöв думалöн и вотёк, кыв йылас бергалiс öтiк «мак-маковей».

Мемесь котöртiс, котöртiс улица шöрöттяс и шырк кежис Венька сайись учöтик уличкаö, кытi вадöрись кайöтлiсö ва, и лыйис-мунiс Васькишна керку дынö. А Васькишна песласьöма да паськöмсö öшöтöма öтöрас — быдöс уличкасö стынсянь стынöдз йöрйöм, только шöрас джын метр пасьта коласок — морт тöрик — кольöма. Эта кушокö и свигнитiс Мемесьлöн веж знакыс, а мотоциклыс мунiс бокижык, и ва йöрнöс-вешьян бура виззисö старикыслiсь чужöмсö, лысмöм юрвомансö. Кытшöмкö трепич — то ли подушка вевттян, то ли öшын шторка — мезмис гезок бердсис, каттисис мотоциклист юр гöгöр. Бур, кöть трепичыс вöлi шоч, сы пырйöт бура тыдалiс туйдан знакыс, и дёка водитель эз жвангись дбруньгаг моз кымöснас стын столбö нето карта пельöсö, а бура-чожа петiс уличкаись, гургис-гöнитiс тоша скöтина бöрсянь негырись кöчкаа видзок кузя. Мотоцикл чеччалiс, кыдз козаыс жö, чеччалiс и рульыс, но машинаыс эз пöр и вашöтлiсьыс эз усь, бытьтö вöлi кöртасьöм.

Берег дорас, буждöг весьтас, Мемесь секунда кежö сувтчыштiс, дзар керис бöрланяс да чывк чеччöвтiс бокö, а мотоцикл зангисис-пырис Гублян йирö, кытöн старик талун мöдiс купайтны Андрей Никитичöс.

Кöдзыт ва гывйöвтiс чужöмсö, тупкалiс нырсö, осьта öмсö, сайкöтiс и нырыштiс кос гöгöрсö, и сiя думайтiс: «Видзöт, кытчö кульыс пыртiс!.. Мак-маковей!..»

Венька бутки-батки чеччöвтiс берег увтас, ки бöрнас чышкис кымöссö, юалiс моросви ваын пукалiсь дедыслiсь:

— Кикокыт бердатöсь, гонщик?

— Бö-бö-бö... ме-ме-ме... — бобгыштiс старик, тыдалö, мöдiс висьтавны, что сiйö бöбöтiс козаыс. — Пы-пы... пышшöтiс, икота.

— Коккет, мыся, эмöсь жö?

— Э-эмöсь тай...

— А киэт вöрöны?

— Вöрöны, некö..

— Сэк мездöтчы руль бердсис, пет берегас да вöв вайöт, — тшöктiс Венька.

— Мыйлö вöвсö? — васис петiкас юалiс дедыс.

— Не Мемесьнат я машинасö мöдан кыскыны?.. Вайöт Богатырьсö. Сийöсав, ёнжык гез босьт. И эшö...— думайтiс-керис Венька и шуис: — Ладно, ачым ветла,— и мунiс.

Старик чапкис юр вывсис шторасö, пуксис ваöн вайöтöм шактар* чукöрок вылö, кыскалiс сапоггесö, чöвтiс пиджаксö и вешьянсö, а йöрнöссö вывтас и пидзыртiс, кыдз вермис.

Шондiыс шонтiс эшö умöля, а ва дорсяняс кыссис сайкыт тöлок, и Котöрок пондiс зэгсьыны кöдзытсяняс. Котöртны бы гортö, перцовка сорöн шоныт чай юыштны, да эд внучокыс эз тшöкты муннытö. Пондылiс сiя гимнастика керны, медбы не тувдыны досповна, да мыйкö шульга киыс оз бы кöстась, да косас лыйö, и чапкисис.

Тöдвылас бöра усис Дзолинь, и сэтшöм лöг кутiс сiйö, что унньöвтiс кöин моз, кöда чук увтiсь пышшис чöскыт сёян, шукыр-шакыр каттьыштiс паськöмсö да öдззöтчис ни вöлi люткыны-котöртны Виль Гублянö, но кузница сайсянь мыччисис верзьöма вöла Венька и дзугис старикыслiсь плансö:

— Тэ кытчö нö вешьянтöмыс? Шуасö эд: шариккес оз тырмö. Да и перво бы машинасö колiс мездыны. — Но казялiс старикыслiсь кынмöмсö и жалейтiс, лэдзис гортас. — Пасьтась да кай нö. Да углансö иньды, ась отсыштас меным. И гублянкатö дзимляв, кытчöдз эз тальсьы...

Джын туйсяняс стариктö öдöлейтiс несйöм да кашляйтöм, но сё жö думайтiс котрасьны Виль Гублянö и не лэдзны пöрись шешкунняöс Верепов дынö. Сувтчылöмöн, чужьясьöмöн, курыт нессянь ва синнэзöн сiя кежис вöв карта дынö, медбы босьтны гублянкасö, и не сразу вежöртiс, мый сэтöн керö семьяокнас Мемесь. А сiя тальччöма чöрс кокнас гублянка вылö и перкйö-сёйö ачыс да и öдззöтö пияннэсö.

— Мак-маковей! — только и петiс öмсис. Лöгувьяс кватитiс йöр дорö чапкöм шать, медбы швычкыны срамина бок кузя, но умнöй коза Мемесь сэк жö вежöртiс хозяиныслiсь могсö да шыасис гажöн:

— Меме-эсь!

Бытьтö шуис, что босьтö весь, и рып-рып котöртiс сiя жö туй кузя, кытi неважын туйдöтiс мотоциклсö.

Гублянкаись кольччöма долонь пасьта дöмас. Старик сулыштiс сы весьтын юрсö öшöтöмöн, дзик прощайтчис дона ёрткöт, кöдалö дыр бы эшö колiс овны да керны дело, кытшöмö сысянь корöны. И может, эта шляпа торыс нето ваын купайтчöмыс и кыскис сiйö думанас ылiсь Дон дорö, кытöн сыкöт öтлаасьö Непрядва ю, кöдö сiя форсируйтiс война костас кыкись, уськöтiс тöдвылас Куликово ыб — Россиялiсь священнöй му, и командирлiсь кыввез: «Этö ыбсö эз вермы мырддьыны миян деддэзлiсь Мамай, дак неужли сетам сiйö Гитлерлö? Лов пуктам, юр пуктам этчö, а врагсö ог лэдзö!» Военнöй жö годдэс казьмöтiсö нач ни чочком юрсиа пöрись сестраöс, кöда кудымкарскöй госпитальын каттьывлiс сылiсь ранаэз и гусьöн враччезсянь мавтлiс нiйö, медбы чожажык бурдiсö-веськалiсö, бильöн — сулема растворöн, и быд кресення вердлiс сiйö то сёртниöн да морковöн, то туримольöн да жельнöгöн, то поснитик косьтöм чериöн.

Эстöн жö, гублян дорас, юрас пырис Паладькаыс, иньыс, кöдакöт, шуöма оланыс овны сорок годся дыржык, шуöма быдтыны челядь, строитчыны, ытшкисьны, керавны пес да керны быдöс сiйö, мый тшöктö семья, колхоз, олан.

Ны понда муыс не прокод вöлi небыт да рам, не пыр вöлi небоыс сöстöм, не быд гожумыс гаж, сысянь, поди, и кулiс иньыс костi, эз судзöтчы нiя луннэзöдз, кöр киносö гортын пондiсö мыччавны.

И стыд кутiс пöрись морттö, мыля сiя талун и кöдзыт нянь дорö эз касьтыв иньсö, не только дзирыт тупöсь дорö, и эта стыдсянь да недолытсянь юрыс пондiс висьны да коссö кутiс жугдыны-бытшкыны. Сы сорöн и кыссис гортöдззас, вежис ва паськöмсö да гор сайись шкафокись кыскис перцовка — и лекарство туйö, и касьтiсьöм понда лöсялас.

«Шонтышта гыркöс да лонтышта гор и тожно стряпайта мыйкö, — решитiс сiя. — Кольттез пöжала да эшö öтi-мöдi пызан вылас пуктышта.»

Юыштiс öтiк дозок — шоналыштiс невна, дрöжитны дугдiс, и курыт несыс чулалiс. Петалiс картаö, курöг позiсь судзöтiс кык кольть — мöдiс плитка вылын жаритны, да дырöв видзчисьны, и чегис кыкнансö бекöрокö, солалiс, нöитiс пуовöй паньöн, сэтчö няньторрез кöтöтiс. Ачыс сёйис и каньсö вердiс — бöра ештöма тшыгьявны ни сiя. Сыбöрын дозоктыр сёйис сметана сорнас шöмйöв, шуис:

— Дрин-дрин пöт лои. Öнi и горсö немлö лонтны. Сiдз эд, шыр пастух? — юалiс каньыслiсь. — Проститас Паладькаö менö, и сiдз прокод касьтыла. Могильникас тöн вöлi, мöдпырся эшö ветла, а талун меным нем керны сэтчин.

И вöлись сылö не ас сьöртöттяс лоис, что сiя, Карп Иванович Которков, кöркöся колхознöй бригадир и ударник, но не врач, мöдiс кутчыны веськöтны мортöс, веськöтны чудскöй кам моз. Не, не сiя туй кузя мöдiс мунны. Сэтшöм туйыс — Дзолинь понда, ась сiя камлайтö-шаманитö.

Пöрöтчис койка вылас, мöдiс шоччисьны, да эз сетö: öшын увтас сувтчис трактор. «Отир, отир! Этадз и кувны оз лэдзö, — шутитыштiс старик. — Ноко кин бöра весись горючöйсö сотö?»

Эз ешты и öшын дорöдз локны, кыдз пырис Африкан, и керкусö пöдтiс солярка дук.

— Котрасян эшö, Карп Иванович? — бат-бат горöтчис тракторист.

— Умöлик коза моз ляшмася...

— Сэк ло здоров! — Африкан зэлыта нямыртiс веськыт кинас ассис шульгасö да вежöртöтiс: — Куш ляк киö, гырдззави паняси.

— А тэ сё гöняйтан, кыдз помещик? Сэк локтан здоров!

Африкан нюмыртiс ыджыт öмсö, жмитыштiс пельпоннэсö.

— Мыля — помещик?

— Не помещик, дак кулак.

— Но, гвардия, мöдöрö тай пондiн бергöтны!

— Ме вексö öтланьö бергöтi — крессяналань.— Котöрок пуксис, рочалiс Африканöс: — Эн сулав, шоччöт коккетö...

— Ог ни лабичтö мавт. Миськасисьыт эд сё абу? Дак мый нö нитшсялöм мыр моз пукалан, мыля он корась Гавриловнасö?

— Таса ыбöс люкавны — кымöс жугдыны...

— Видзöт, гвардия, гусяласö! Öмсит, позьö шуны, лэдзан, — торгис-баитiс Африкан, кок йылас жöдзикö. — А сётаки висьтав, кöдöрсянь ме помещикыс?

— Одзсянят и бöрсянят: кынöмыт — öртя, мышкыт — каламашка, дзик жö Тырвöз пиянлöн. Тöдлiн сiйö?

— Чикиськин Киркалiсь айсö?

— Вонсö, кöда Распутиныс шайкаын вöлi. Савыркин Гавра тай кочкöма вöлi... И хозяйствоыт сысся абу умöльжык.

— Тю-у-у! — шутньöвтыштiс Африкан. — Кöр Распутиныс гуляйтiс, сэк ме öтiкö тöдi — мамöлiсь нянясö. — Сiя рыз-рыз серöмтчис да сэтшöм вынöн, что зэгнитчисö öшöтчöм рожабаннэс, яя пельпоннэс, кыз кынöмыс, и висьталiс: — Ме вот мыйлö пыри, Карп Иванович: ма колö. Иньö зон пöжö, дак сьöлöмыс кошшисьö.

— Ö-ö-ö, — нюжöтiс Котöрок да макнитiс кинас. — Кыдзи ма корö, дак сiдз и тöд, дзелька лоас, не мужик.

— Эн бажит, гвардия! Вита ни нiя, дзеллес... Мымдакö адззан?

— Кило куимыс тырмас? Öтi годö Виль Гублянiсь Нина новйöтчикас кык кило лакис. И кык ныв торскис-вайис..

— Тю-у-у! — бöра шутньöвтыштiс мужикыс. — Кыдз кило, сiдз и кага? И керис вывод: — Куим пань миянiсьыслö тырмас!

— Тырппесö мавтны? Кöть килосö босьт.

— Вредитель тэ, Карп Иванович... Но да ась ни, вай инö... А помещикнас менö некöр эн шу. Помещикыс эд тунеядец, а ме нирта — ого! И хозяйствоö некинсянь эз дöнзьы, ачым кери. Колхозыс, конечно, отсалас...

Карп Иванович сетiс ма, гаж кылöн кольлалiс трактористсö ворота сайöдз, пуксис öшын увтiсь лабичок вылö да пондiс видзöтны, кыдз лудовка вылын котрасьöны Венькалöн уткапияннэз — тыдалö, вöтлiсьöны кöбывкаэз сьöрын, кöдна сэтшöм одз таво петалiсö. Одзасьöны, мырддясьöны, асьныс кретшкöны то норöн, то гажöн. Вон öтiк öддьöнöв чожа чепöссис бокö да люкасис радио столбö и чер-бар таралiс — коккес вевдöрын.

— Мак-маковей! — горöтчис старик. — Вийсин эд, пöлiня зоб! — и лöсьöтчис чеччыны, медбы видзöтны, мый лоис, но доймöмыс вевдöрöт котöртiс мöдiк, и сiя сувтiс кок йылас да, бытьтö нем эз и вöв, эшö бöбжыка öдззис крестасьны-сорласьны мöддэс коласын.

Асылыс лöнь и шоныт. Небоыс не öддьöн сöстöм, бледöв, бытьтö пизь бусöн пырзьöтöм, но омöн öткодь рöма, дзик öтпыр малыштöмöсь-краситöмöсь, и только матi шондiыс гöгöр невна югытжык, быгалöмкодь.

Таой Котöроклöн бöра висисö кисойес, но тöдчö, что зэрыс, кöдö кöр ни видзчисьöны гублянса, оз ло. «Пöрисьмöма, тыдалö, — тöждiсис старик. — Одзжык непогода одзын висьлiсö, а öнi, видзöт, и кöс гожумнас маитöны... А сё сьöкыт уджсянь да войнасянь. Африкан даки сто год олас и мурк оз кер: кучикыс кыз, коска дзонь, уджалö кокнита, а сёйö чöскыта. И коккесö оз нöит. Винала и то, шуöны, тракторöн ветлö, кöть лавкаыс бöрпонас и эм. Мыйöн не кулак? Вöлiсö бы, кыдз одзжык, йöррез, дак эз бы, натьтö, понды осьтлыны, а тракторнас кажйис, кыдз Тырвöз пияныс Карконас...»

И пырис Котöрок юрö виль дума: небны трактор. Не ыджытö, а учöтикö, кытшöммезöн огородеччез гöрöны. Сэтшöмнас быд уджсö кер, гöняйт, мымда колö — не мотоцикл, оз пышшöт, и бензинсö етша сотö. «Дона я бы сiя?.. Машинася, натьтö, абу донажык. А раз абу, дак будичи тысяча мымда оз тырмы. Сiйö Васькишна сетас... Славнöй старушкаыт, — ошкыштiс соседкасö думанас. — Отсалас, нем и думайтны... Да, небны колö... Ягöдавны, тшакьявны, пес вайны, базарö карч кыскыны — пожалста, тэныт! Кись бакö горючöй, вöрзьöт пускач и — тра-та-та-ра-ра-ра-тррр! — Сiя нельки кылiс ни, кыдз горалö öдззöтöм моторыс, и сьöлöмыс ордъявны пондiс. — Мак-маковей!..»

Небоыс сё кымöртöм, и шондi шонтö, а руыс дзик ульжык лоис. Мыйсянь инö? Старик дзарнитiс видз ладорö и тувдiс осьта öмöн: сэтчин пежьялö енöшкалöн сюр! «Да эта мый лоö сэтшöмыс? Кульыс я мый я ме вылын кешитчö?»

Чеччис, лэдзчис Венька керку дынöдз да öмсö эшö öддьöнжык осьтiс: шогдi ыб шöрас кöртовöй труба чижгис, дзик брандспойтiсь, сто али унажык метр ылына сöстöм ва!

«Мак-маковей! Шупкö дак шупкö! Эта лейкаыт минутаöн джын ыбсö киськалас! И кöр и ештöмась керны.»

Гублян берег кузя ветлöтiс йöрнöстöм Африкан да малалiс кыз кынöмсö. Самöй ва дорас, галесник вылас, шумитiс кытшöмкö машина, натьтö, ыджыт насос.

Огородеч пельöсас петыштiс Максимка, юалiс:

— Деда, юртö разь оз сот, гублянкатöм да?

— Эм невна, — кутчис юр бердас дедыс. — Адззан, виль помещиккес мый керöны?

— Сю киськалöны. И клеверсö пондасö, и видзсö. Только нiя не помещиккез, а механизаторрез. Вежöртiн?

— Вежöртi, — шуис Котöрок да катыльтiс-кайис гортас, медбы вурны виль гублянка.

Вурис и жалейтiс Андрей Никитичöс, бур мортöс, кöдö черöшланнэзöн вермас тшыкöтны Дзолинь.

«Мый сiя повно керис Виль Гублянас? Колö ветлыны...»

Вурыштiс гублянкасö да сётаки лонтiс баня, медбы пывсьöтны Вереповöс. Кöть мый шу, а отсавны колö. Да и аслыс колö пымöтчыны.

Ва кайöтлiкö пантасис Венькоика Лена, видчö:

— Эн я ылав, дед — семикнас банясö лонтiн?

— Кынмалi öнтай да пывсьыны мöда. Кывсис, поди, кыдз лёквирыс йирас тангис?

— Мöдпырись он пуксьы.

— Да, сэсся оз ни сетö...

Кöд коста лонтiсис баняыс, лöсьöтiс стрась вына лекарство, кöдалiсь рецептсö кольлiс Питкин: мясорубка пырйöт лэдзис вирвужьялiсь турунсö и вужсö, пидзыртiс — быд вотёксö босьтiс. Öксис стопка етш сьöд-веж ва — видзöтан сы вылö да кезöтö и курöтö. Сэтчö содтiс кык сымда спирт да джын кило ма, шонтöмö, кизерикö. Пуктiс сiйö ыджыт сьöд бутылкаö, бура тупкалiс, сайöвтiс шкафö — лекарствоыс, кыдз чуд жö, югытсö оз любит.

Кöр пöдналiс банясö, мунiс Виль Гублянö. «Кöдзыт васö сыбöрын ключись босьта. Сiйöн и гывьяла Андрейкосö...»

Дата добавления: 2015-11-16