ЛÖНЬЫС ОЗ ЛО

Эта асылö Андрей Никитичöс саймöтiс Тонька племянницаыс. Саймöтiс одз, кöр сiя вöтасис сэтшöм вöттэз, кöдна узисьыс чужöм вылын öзтöны вир да шынньöв, — мичаöсь, долытöсь, сьöлöм бурмöтанаöсь, кöдна тшöктöны овны-уджавны пизьöмöн да орсöмöн.

— Мунам, дядь, зарядка керны.

— Ме сёрöнжык, Тоню...

Сылö этадз куйлыны вöлi öддьöн бур и эз вöв охота вöрзьöтны не кисö, не коксö, и синнэсö эз бы осьт, но Тонька кульыштiс сы морос вылiсь простыня, пуксьыштiс диван дорокас, кöда вылын дядьыс нюжласис, пондiс видзöтны сылiсь синкагаэсö. Видзöтiс недыр, нем эз шу и, бытьтö тöдiсь невропатолог, кужöмöн, перыта тэчлiс шульга кисис чуннесö дядьыс морос вылö и мöд чунь йыввезнас вачкалiс ны кузя, сэсся кырлалiс-кресталiс козоноккезнас сьöлöм гöгöрсö, видзöтiс пульссö.

— Чеччы, дядь.

— Ме сыбöрын, Тонька.

— Некытшöм сыбöр! Тöд этö: ольпась пöрисьтö и дыштö, а гимнастика томтö, сьöлöм öдззöтö. Колö спортöн занимайтчыны, ваын тульöтчыны, шондi увтын жаритчыны.

— Но и каитчас сiя, кöда тэнö инь вылö босьтас!

— Не каитчас, а сто год пондас спасибо висьтавны... Тэрмась, дядь, томмыны. Вот чышкöт тэныт, — нывка пуктiс сiйö телевизор вылö. — Арашорка дорас лэдзчан, — висьталiс Тонька и петiс.

«А быль, пожалуй, бур инька лоас... Женькаö этшöм жö томнас вöлi. Медиккес нiя чисто öткодьöсь... Эх, Женька, Женька!»

Сiя куньыштiс синнэсö, жöв керсис, и мылякö сы син одзö, первуись эна месяццезö, локтiс не Женя, а Оля Савыркина — лöз платьеа, небыт киа, басöк, гöгрöсакодь сина — кытшöмö адззылiс тöн пемыт посöдзись. Сiя мöдiс эшö уськöтны тöдвылас, кытшöм паськöма вöлi Оля сэк, кöр первуись сыкöт пантасис Перемын, и эз вермы, но бура адззис сiйö Кама пляж вылiсь — гöрд купальникаö, ён кокаö, кузь чикисяö, чатыра моросаö, — и ровно кылiс сылiсь павкöтчöмсö, кылiс шоныт, ва кодь тырппеслiсь кöрсö. Сы юрö пырисö Пушкинлöн стиххез, кöднö сiя ёна донтiс: «Я вас любил: любовь ещё, быть может, в душе моей угасла не совсем...» — и эна кыввез увтö Андрей Никитич чеччис, тэчис киэсö юрбöрас, нюжöтчис размöд, кышыштiс вывтас вешьян и чышкöтöн киас мунiс миссьыны Арашорка дорö.

Эта асылö сыын саймис или, висьтавны кö точнöйжыка, чужис мыйкö, виль, вöвлытöм-кывлытöм; эта вильыс бытьтö чушкис сiйö, вöрзьöтiс сылiсь лöньсьöм-куньсьöм олансö, сетiс, ась эшö не öддьöн вынаö, заряд и, топ компас, мыччалiс, кöдöрын ойыс, кöдöрын луныс, мыччис ориентир, кöдалань видзсьыны мунiкö. И эта минутасянь вдруг сылö дона лоис кадыс, лоис жаль быд öшöм луныс. Мыля нö сiя тöн куйлiс, кыдз чурка, нем эз кер, а нянь сёйис, йöв юис? Сiя том да вына — öшка кодь. Сэтшöмыс вылын колö гöрны да пес кыскавны!

Как раз эта кадö и локтiс Виль Гублянас рам кыла Дзолинь, панталiс Нинаöс, кöда бертiс мöс вашöтöм бöрсянь, и тшöтш сыкöт кайис сы ордö.

— Ме эд тiян баб, и тэнö, и вонтö примайтлi, — казьмöтiс старуха пырикас.

— А мый нö не да, — эз суськись хозяйка. — Бабö сё тай висьтавлiс, кыдз вöлöма.

— Мунан жö эд касьтiсьнытö, натте?

— Ветла бы. Причётсö пукта я, ог я, а бабöлö аймамтöм оланö вылö норася...

— Тiян пö эд виль могила таво, — кежис Дзолинь аслас туйвежö. — Упокой, господи, душу рабы твоей...— Дзолинь пернапасасис, пуксис стул вылö.

— Кенакöс дзебим, — шуис Нина и пуксис сылö паныт, лабичас.

— Отпевайтiт жö?

— А кытiсь? Эг ештö... Да и аймамыс эзö бы лэдзö.

— Колö отпевайтны.

— Кöр ни öнi?

— Позаоч туйö... И покойницаыслöн душаыс лöньсяс, и Öндрийколöн юрыс сайкалас...

— Спасибо тэныт, баб.

— Нем понда меным, енлö висьтав... Сё бы отсася отирыслö, сiдз овны ог вермы.

— Лок жö сёйышт, — Нина уськöтчис пызан дынö, осьтiс пызандöраöн сайöвтöм сёяннэз.

— Сёйи ни талун, кага, а уна я меным колö — боби ыжда тупöсёк да ырöш напёрстокöн... Пöжаси жö да кайла, мыся. Олявкасö узьтöн и коли.

— Вот эд, öтнас дак, — завидуйтiс Нина, кöть павжунöдз узь!

— Ойбыт быглясис, аслыс баитö...

— Мый сiдзи?

— Еныс тай шуöма: «Ов, инька, жöниккöт!» — Вон мый!

Старуха судзöтiс пызан вылiсь конфета, горöтчис:

— А воныт кыдз? Поди, инька ни кошшö?

— Ог тö-öд... Одзöв бы эшö да.

— Бытшöм делоыслö, Нинка, сроккес абуöсь. А эд Олявкаыс сы шогья косьмö, кага! Баитны бы сыкöт... Кытöн нö сiя?

— Карпуш ордö, тыдалö, мунiс. Чериавны мöдöны да.

— Талун? Этö мый сiя, пöрись куль, касьтiсян дзугö?

— Тöн тай сiдз вöлi баитчöны...

— Но и ась, — лöньсис Дзолинь да пондiс гуддисьны дубас моросас. — На-ко молитваэз, Нинка, пригодитчасö... «Отче наш», «Верую» да «Воскреснöй». — Старуха пуктiс куим бумажка пызан вылö.

— Молитваэс понда мымда, баб? — юалiс Нина. Сiя тöдiс, что вичкулö колантор и неколантор понда сёравно мымдакö колö вештыны.

— Миян эд абу ценаэс. Кин мымда вермö, сымунда и сетö.

Кöртовöй деньгаэсö кыдзкö небытшöм сетны, старухаыт вермас и öбидитчыны, и Нина пуктiс бабыс кырымö бумажнöй руб. Эта, ежели лыддьыны, что ачыс Христосыс сулалiс тридцать серебренников (сы донöн сiйö вузалiс Иуда), абу етша.

— Спасибо, Нину... Мунны жö колö, — шуис Дзолинь деньгасö босьтытöн. Сэсся петiс öтöрас да тэрмасьöмöн вуджис юок саяс и эз и казяв Арашорка дорись Андрей Никитичсö.

Внучаткаэс да внучоккес коласiсь Дзолинь медöддьöн жалейтiс Олявкаöс и былись старайтчис сы понда быдлаын, кытöн позис, керны бурö-бытшöмö. Старайтчис буржыка, нежели роднöй аймамыс. Этö сiйöн, что внучаткаыслöн судьбаыс сэтшöм жö сьöкыт, кыдз и аслас — жöниктöм олан. Но эстöн старуха öнi адззис эшö и выгода: босьтас кö Верепов ас саяс Олявкасö, дак нуöтас городö, а Гублянiсь керкусö Олявка вузалас сылö. Дзолинь важын ни лöсьöтчö чапкыны ассис сiсьмöм позсö да локны овны Гублянö. Конечно, сiя оз радейт ветлöтны квартираэзöт, сылö колö торья керку, кытöн, дзик монастырскöй кельяын, некин, енся, оз понды видзöтны, кыдз сiя олö да мый керö, оз понды кывзыны, кыдз натужнöя сьылö библейскöй стиххез. Старуха думанас лöсьöтö кулiк кежас аслыс места гублянскöй могильникö ордчöн Опонасей попкöт: сылöн заслугаэс вичкуыс одзын батюшкоысся не етшажык...

Воныслö, кöр сiя локтiс гортас, Нина и кывджын эз горöтчы Дзолинь басни йылiсь: вердiс, юкталiс, висьталiс, кытiсь обед адззыны, и колис гöсьсö. Мамыс сьöрö мунiс и Тонька.

Вереповöс талун керкуас эз пукöт: сьöлöмыс кыскис öтöрö — сöстöм лудовка вылö, югыт шондi увтö, кытöн руалö шонытик кöс тöлок, сорлассьöм стряпня да назём дукöн, кытöн асывлiсь лöньсö дзугöны кайез, петуххез, подалöн шыэз, мöс фермаись машинаэзлöн шум.

Ниналöн кытчöкö лоöма посöдзсис замокыс, и Андрей Никитич пöдныштiс посöдз ыбöссö крючок вылö, а ворота одзö сувтöтiс чайдöм вожа вила, кöдöн кытшöмкö гожумö сiя ачыс тэчис турун. Сэтшöм жö «пöданнэз» — то вартанiсь кольтан, то сак шатин йыв, то потöм лямпа — вöлiсö мöдiк ыбöссэз да воротаэз одзын: кöда сюйыштöма ыбöс вугö, кöда сувтöтöма улö, кöть и мукöд пыраныс вöлi замока.

Мужикытлöн костюмыс невна нöитчöм, и ботинкиэс оз свиттьöвтö, да эд не праздникö мунö — чериавны, ежели Котöрок оз керсьы бöрлань. «Миянлö не одзын ветлöтны, не томмезöс бöбöтлыны — и этадз олас», — лöньсьöтiс асьсö.

Деревнясис петiкö вöтiс Венька. Сiя талун гöнитiс вöв вылын, не мотоцикл вылын, а оранжевöй каскасö абу чапкöм. Вöтiс, чеччис вöлыс вылiсь, пондiс подöн мунны — охота лоис, тыдалö, басниэз лöсьöтлыны.

— Кытчöдз нö коктö шупкан, Андрей Никитич? — гажöна юалiс сiя.

— Гублянöдз мöда шупкывны, бригадир, — сiдз жö гажöна шыасис Верепов. — Посадсö видзöтны мöда.

Таланьын овла, а колхознöй столицаас вит год ни, натьтö, эг пыравлы: городсянь каям — асланым туйвежын чеччам, городö мунам — ыджыт туй вылö веськыта петам... Дедыт чериавны лöсьöтчис да мунiс, поди?

— Дедö? Эз. Шогавны пондiс.

— Да, нем он кер... Пöрисьыслö дыр я... А тэ кысянь?

— Лэбала лöдз моз ыббез да видззез весьтöт — вердчаннэз кошша, вöрда, кыдз одзлань мунны.

— Мöссэзлö?..

— Пороззэзлö. Вит сотня дом йылын видзам. Нылö сёян колö, а ыбыс куш, видзыс — волькыт, топ квартирасит ковёрыт. Июнь шöр — и куш ыб! Мöйму эта кадö ытшкисим ни. А таво — кляп! Тэ видзöт, кытшöм бокат клеверыс — дзик улица. Ыбшарыслö некытчö дзебсисьны.

Верепов видзöтыштiс öтланьö, дзар керис мöдланьö: былись, клеверокыс лэбтiсьöма вöлись чунь сувда, кустокыс шоч листока и немымда абу паськалöма, абу на вевттьöм чорзьöм, потласьöм мусö, кöдö öнтай, миссьыны мунтöн, сiйö шуис пар йöрöн.

— Дак мыйöн нö пондат вердны?

— Лысöн. Джын вöрсö ни масьтiм. Кыдзкö пизьыс эм... Но сёравно рудзöгсö колас ытшкыны. Медбöрья ыб кольччис. Кыдзи этна луннэзö эшö оз зэрась — пороззэс асьнымöс сёясö, — норасис Венька. — Тэ он тöд, кытшöм сылöн утробаыс — порозыслöн?

— Мöслöн кодь, — висьталiс Андрей Никитич, — Али нiя тiян мöдiк породаись?

— Не просто мöслöн кодь, а пöттöм мöслöн, — содтiс Венька. — Лунтыр пруддьö-сёйö, а пыр тшыг. Тöн асывнас эг ештö сёдiк кежас турунсö вайны, дак сiдз горöтiсö, бытьтö нiйö кульöны! Мортлö висьталан: терпит чассö-кыксö, — и сiя терпитас. А порозыс оз вежöрт этö. И правильно керö: миянöс тшöктö перытжыка бергавны. Горöтö горштырьяс и миянлö этiйöн висьталö: вердö, вердö — эд тiянлö, отир, яй колö!

— Эз лöсяв таво гожумыс...

— Локтöмась тай вöлi Кудымкарись корось чеглавны, а кытöн сiя, ноко висьтав, листыс? Абу, улокыс тожö куш... Иньдöтiмö бöр.

Этадз баиттöн нiя сибöтчисö Жогор-пожум весьтö, кысянь увлань, юланяс моз, кежö волькыт, вылына лэбтöм туй — сiя нуöтö фермаö. Сэтöн бригадир пуксис вöв вылö, лöсьöтчис гöнитны пода картаэзлань, но посадсяняс, столовöй посöдзсянь, пондiс горöтлыны том инька:

— Семёнович, сулышт-ко!

— Öтiк минута верма, — не öддьöн довольнöя шуис бригадир да бергöтiс вöвсö локтiсьыслö паныт. — Талун быдöнныслö вдруг бригадир пондöма ковсьыны — и сельполö, и сельсоветлö, и нельки, видзöт, культура сьöрам вöтчö — клубись зав.

— Сэтшöм удж тэнат, — висьталiс Верепов.

— Сiдз и эм: сэтшöм! Не öтпыр ни мöдi чапкисьны, но думайта-кера да шуа: а кытöн, мортшöн, кокнитыс? Кытöн лöньыс, ежели ладом, морт мозöн уджавны? Тэ, шуа, колхозöн велöтöм, партияöн рекомендуйтöм, отирöн пуктöм, дак и уджав, эн тэчкась ляк куканёк моз...

Сибöтчис инькаыс, кутiс вöвсö сермöтöттяс, пондiс кеймисьны:

— Семёнович, усилитель жугалiс, кыскыв жö менö городö. Ашын свадьба, и вот сiдз аркмис... Пожалуйста, Семёнович, лэдзчöт.

— Ась свадьбаыс и лöсьöтö, Максимовна.

— Свадьбасö мийö керам, клубыс — комсомольскöйö. Тэ эд тöдан.

— Звонит райотделö, нылöн машина эм.

— Станцияö мунöма.

— А менам мотоциклö жугалiс, немöн мунны... Корсьы автобусö. А может, то эта мастерыс видзöтас? Сiя Виль Гублянiсь Ниналöн вон, городын велöтö. — И Вереповлö ни шуис: — Ноко ветлы, гуддисьышт. Музыкатöмыс кытшöм ни свадьба!

— Кежала нö, пондыла лöсьöтны...

Кöд коста Максимовна кошшис инструмент, Андрей Никитич тöдсасис клубыскöт. Сiя эшö виль, нёль-вит год гöгöр сылö, и быдлаöт дзонь, басöк. Медодзза жырыс, фойе, ыджыт и гажа: стенаэс волькыта штукатуритöмöсь и увдöрсяняс краситöмöсь зелёнöйкодь краскаöн, а вывтi серöтöмöсь кушак серöн. Ыджыт öшыннэзас — голубöй штораэз, юр вевдöрын дзардöны кык хрустальнöй люстра.

Веськыт стенасис Андрей Никитич казялiс гöрд бархат, кöда чочком стена вылас аркмöтiс пирамидка. Бархат вылö дорöмась вит мраморнöй пöлок, а ны вылын бронзаöн гижöмöсь ниммез — этö нiя морттэс, кöдна усисö лёк бойын гортнымöс дорйикö.

Сiя перыта лыддьöтiс списоксö — Бушуеввез, Лунеговвез, Радостеввез, Мошеввез, Которковвез — быдöс тöдса фамиллёэз. Нельки Верепов эм. Верепов Н. А. «Эта жö айö, — думайтыштiс Андрей Никитич. — Конечно, сiя — Никита Авдеевич... Да не, кысь сiя татöн лоас? Зуйпиягын сылö местаыс». И сэтöн сiя бöра видiс асьсö сы понда, что институт кончитöм бöрсянь эз на ветлы чужан местас, кытöн олiс семнадцать годöдз, кытöн дзебöма добрöй бабыс, кытöн быдмöны мамыс киöн садитöм кык нинпу, кытöн мусюр увтiсь дзольгö-петö ключок, а сы гöгöр вöвдöм гырись галяэзiсь джодж — эта айыслöн удж.

Максимовна вайис школьнöй портфель, пуктiс сiйö бильярд вылö, шуис:

— То инструмент, а усилительыс куйлö сцена дынас. Тiйö керö, а меным колö кутны сельсоветiсь предсö.

Предсö Максимовна вель дыр куталiс, а Верепов гуддисис эшö дыржык. Только месяц-мöд эз босьтлы киас отвёртка да плоскогубцы, а чуннес вугмöмась и вунöтчöмась ассиныс уджсö, и этасянь то ключ уськöтас, то винток, а клубас абу сэтшöм югыт, медбы учöтторсö чожа адззыны джоджсис, а кадыс оз сулав, сё одзлань путшöтö ассис тшакыльсö.

Обед кежö усилительыс лöсьöтсис. Радуйтчис Максимовна, рад сьöлöмöн петiс клубсис Верепов: эшö öтiк бур дело керис.

«А палисадник нёштöмöв и краситтöм, — казялiс Андрей Никитич. — Эд эмöсь бур плотниккес, а керöмась тяп-ляп. Шабашниклöн уджыс — сразу тöдчö!»

Позис бы и Карп Иванович ордö пыравны, но Максимовна кыдзкö казявтöг петкöтiс сiйö Виль Гублян туй вылö, и сiя эз ни берт. А кöр ылöкодь ни мунiс да эшö дзарнитiс бöрланяс, инька сылö кинас макайтыштiс. «Женька этадз жö кольлавлiс», — думайтыштiс иньыс йылiсь, и сiйö бöра кутiс гажтöм.

Петiс посадсис, кежис машина туй вывсис бокас, клевера ыб дорас, и сэтi, векнитик, нач кык кок пасьта туёк кузя, пондiс кайны могильник мыс вылö да чожа мыйись и панталiс старушкаöс. Сiя мыйкö öвтiс киэзнас, дзик панлалiс кинöскö, и мыччавлiс нето козоноксö, нето эшö кытшöмкö знак. Андрей Никитич видзöтiс боккезланьö, бöрланяс — некин сы гöгöрын абу, сiдзкö, старушка сылö макайтö. «Тыдалö, немöй, а немöйыслiсь разь вежöртан, мый сiя мöдö висьтавны?» — решитiс Верепов и вынöнжык шагньöвтiс мортыслань.

— Куталöны, мыся, сэтчин... Кручок кручокасьö, — том голосöн висьталiс старушка и бöра легöтыштiс кöстöм чуньнас. — Он разь авйы, мампиян? И сельсоветсис предыс сэтöн... Налле он пов? Але ны коласiсь жö ачыт?

Серöмтчис Верепов, кöр вежöртiс:

— Меным крючоксит нем повны, ме абу код, абу тöв чужьялiсь.

— Учаликö туракнитöмыт жö, — шуис старушкаыс. Эшö öддьöнжык вакйöвтiс Верепов, шуис:

— Этö тэ, бабпиян, туракнитöмыт рюмка-мöдсö, а не ме!

Öнi старушкаыс ни серöмтчис:

— Ак-ак-ак! Бабпиян пö! Бабыс разь пиясьö? Ме тожö мампиян... Но, ладно инö, таль одзлань, кошшы ассит чассётö, — висьталiс старухаыс, пыдöжык кисой вылас кышалiс сумкасö и кокнита иньдöтчис посадлань.

«Этö мый сiдз Гублянас талун кутасьöны: Максимовна — предöс, предыс — менö мöдö, а ме кинöс? Максимовнасö? Сiйö, натьтö, позис бы, ровно не öддьöн ме дынiсь пышшалö...»

А кутасиссес сэтöн и вöлöмась, медодзза кöзоккес дынын, кытöн сулалiсö машина да трактор, а милиционер видзöтiс шофёрлiсь документтэз. Старуха, тыдалö, эз вежöрт, мый сэтöн керсьö, думайтiс, что куталöны быдöннысö, да повзис и бöр бертiс гортас. «Неужто и мийö кöркö ны кодь полiсьöсь лоам? — негажа дума сидзыштiс Андрей Никитич юрö. — Пожалуй, сiдз. Пöрисьыс осторожничайтö... — и, кöр мыччисисö могильникись кресттэз, содтiс: — И быдöнным вон этчö... Только не öтiк туйöт, не öтмоз сэтчöдз локтам».

Эна думаэс казьмöтiсö айсö да мамсö, кöдналöн коскаэс куйлöны кытöнкö ылын муэзын, öтласа могилаэзын, а может, и сотчисö война биас, и пöимыс войсис-тальсис солдатскöй сапог да танк гусеницаэз увтын.

И айыс, и мамыс сылöн, кыдз висьтасьлiс бабыс, оланас пырисö сьöкыта, зэлыта, нылö учöтсянь колiс весöтны и юждыны туйнысö аслыныс, а весöтiкас — этö каждöйыс тöдö — öшö уна вын, лязсьöны и гыжжез, и пиннез, одзжык пондöны висьны коскаэз.

Медбы вашöтны энö думаэсö-иззэсö, Верепов тэрмасис кайны мыс вылас, кöда местын öнi горöнжык, нежели милиционер (сiя мунiс могильниклань), тракторист да шофёр споритiсö мужиккöт да инькакöт.

Андрей Никитичлö нылöн басниыс эз ков, и сiя орддис споритiссесö, но сiйö кытсöвтiс мужикыс:

— Кежав-ко татчö, том мортöй, мыччась-висьтась миянлö!.. А тiйö, челядь, бертö уджавны. Касьтiсьны рытнас пондат, — шуис мужикыс — сiя и эм, тыдалö, председательыс.

— Меным и мыччасьнытö немöн, и висьтасьнытö нем, — откажитчис Андрей Никитич, но раз корöны, кежис и тюк пантасис Савыркина Олякöт и мыйкö сразу нем эз вермы горöтчыны и сысянь, натьтö, здоровайтчис кыкись, вöлись юалiс:

— Тэ мый, Оля, тожö инспектор?

— Вачкися разь? — юалiс Олявка да видзöтiс аслас веж босоножкаэз вылö, паськöтыштiс чунь йыввезнас лöзкодь рöма вöснитик платьесö, буржыка пуктiс юр вылас сера кепочка. — Кыдз депутатöс иньдöтiсö... Дышкучиккезöс да кодуллезöс вашöтлам.

Кöр дугдiсö шумитны трактор да машина — нiя бергöтчисö да мунiсö — Верепов шуис кыдз бы извиняйтчöмöн нето жалейтöмöн, что весись öштiс кад:

— Ветлi то Гублянöдз, видзöтчи да мый да... Радиола клубын лöсьöтi... Ашын пö свадьба...

— Быль свадьба. Миянiсь невестаыс, сельпосис... Нылiсь баснисö дзугис мужикыс:

— Тэ эд, тыдалö, телемастер? Дак, поди, кежалан миянö? Экраныс мыйкö пондiс йöктыны.

— Ме велöтiсь, не мастер, — висьталiс Верепов, — а татöн — гöсь.

— Но, гöстит инö, — бобгыштiс мужикыс да мунiс пантавны инькаэзöс, кöдна тыра киэзöн, неперыт лёдзöн, дзик дзодзоггез, пöлiнясисö-кайисö мыс вылас.

— Тэ дыр татöн олан, Андрюша? — одзлань нюжöтiс баснисö Олявка.

— Ог и тöд... Нина кайöтiс менö ытшкисьны, а ытшкынытö, кыдз ме видзöта, нем.

— Ме мöда висьтавны мыйкö... мöда баитны. Вовлы миянö, Андрюша... Меным Витяыс магнитофон колис, да ме сiйö мыйкö тшыкöтi.

— Жöникыт колис?

— Вонö. — Олявка чöлыштiс, бöра лöсьöтыштiс кепкаоксö. — Жöникö меным нем эз коль. И дукыс сылöн абу. Сизим год ни сытöг тукта, госсяла.

— Верма вовлыны, — не öддьöн кöсйисис Андрей Никитич, но сэтчö жö и содтiс: — Вовла, Оля, вовла.

Мотоциклнас локтiс милиционер, сувтчис канава дорас, кытöн инькаэскöт баитiс председатель, дугдöтiс моторсö и чеччытöнняс шуис:

— То видзöтö: енлiсь агитаторöс вайöтi! Пернаэзöн да молитваэзöн торгуйтö. Кин сылö сэтшöм правосö сетiс, а? — и бергöтчис «агитаторыс» ладорö. — Ноко, чеччы да висьтав честнöй отирыслö, кин тэнö иньдöтiс татчö и кытшöм заданнёöн. Может, ЦРУ?

Олявка дзар керис вайöтöм мортыс вылö и сылiс местаас: бабыс!

— Еныс и ыстiс, кин сэсся? — висьталiс Дзолинь да пондiс жагвыв вöрöтчыны-чеччыны. — Тэ видчан вот, кага, а сiйö он вежöрт, кинлö ме бурсö кера... Не ас пондасим тöжда, кага, а йöзыслö буржыксö кера бы. — Чеччис, сувтiс милиционерыс одзö, дöвгис: — Тэ енсö видан, сылiсь заветтэсö кулитан, а кывлан я, кыдз партейчиыс шуöны: мортыс мортыслö товариш да вон, радейт вонтö, отсав сылö сякöйнас — и кывнат, и кинат, бедаись мездöт, сылiсь шогсö чинты, зубытсö лöньсьöт.

— Ух тэ! — серöмтчыштiс милиционер. — Кужан, верман баитны!.. И этö пон баснитö да неуджтö тэ керан мортöс радейтöм кузя?

— Сiя не пон удж менам, фарисей! — кутчис пинясьны Дзолинь. — Али тысяча рубсö да кык козасö, сорок-ту треттём, не отирыс понда оборонаыслö пуктi? — Сiя брезгуйтöмöн видзöтiс постовöйес вылö, велöтiс: Лутшше бы городсис шпанасö кыйит да суййит, лёгостайез. Тьфу, ырбыль стабун!..

Сэсся Олявка эз ни вермы видзсьыны, котöртiс Дзолинь дынö:

— Тэ пернаэзöн торгуйтан? Молитваэзöн? Старуха барöтiс синнэсö, эз вермы шыасьны.

— Ноко вай татчö быдöс, мый тэнат эм, — Олявка нюжöтiс бабыслань жаритчöм киэсö, и дженыт соссэс увтiсь тыдыштiс чочком кучикыс. Сiя ачыс эз тöд, мый вермис керны, ежели бабыс сетiс бы ассис товарсö: али койыштiс синнэзас, али резiс тöв ньылат, али паздiс кок увтас.

Но Дзолинь эз сет. Сiя пондiс тальны внучаткаыслiсь кок нырресö.

— Сiя товарыс, Олявка, не сельповскöй, натте, и не тэныт, пырттöмлö, сiйöн бергöтлыны. Кайöтöмыт тай дуксялöм черитö — сiйöн и вузась... Но, кольччö инö, бур отир, со Христом, — висьталiс Дзолинь, зэвжыка кутiс сумка кöввесö да мöдiс петны канава сайись туёк вылö, но сiйö сувтöтiс милиционер:

— Эй, пöрись, тэ кытчö?! Эн тэрмась, протокол пондам гижны.

Олявка швырк бергöтчис бабыс дынiсь да чепöссис посадлань. Не председательыс, не милиционер сiйö эз пондö видзны, эз кытсöвтö бöрсяняс. Нiя адззисö, что сылö часöт недолыт, öддьöн недолыт, нельки зубыт сысянь, что сылöн, посадiсь активисткалöн, сэтшöм несознательнöй баб.

Мыля сiдз мунiс Оля, Андрей Никитич вежöртiс вöлись сэк, кöр кинкö инькаэс коласiсь висьталiс:

— Адззылiн, кыдз нучаткасö шырзьыштiс?! Небось, дыр чушкас этасянь сьöлöмыс...

«Но вот... Мöдi лöньын да гажын туплясьны, а, тыдалö, оз сетö, — думайтiс Верепов. — Лöньыс оз ло. Некöр оз ло, кытчöдз ветлöтан, адззан, кылан...»

Сiя кайис Виль Гублянö, керкуас юыштiс кöдзыт сурок да петiс огородечö. Сэтчин чöвтчис, нюжöтчис пес видзан дорö, кытöн бура сотiс шондi и эз сидз тöлокыс.

Куйлiс синнэсö куньöмöн да касьтылiс важсö. И мыйыс только эз пыр сы юрö, но мылякö сё умöльыс, гажтöмыс, мыйсянь горзыны охота.

Öтпырись чуть ордлыэсö эз чеглалö. Нiя вуграсисö и адззисö чапкöм деньга кöшель. Мый и пырис юраныс: кышалiсö сiйö вугыр бердö да пуктiсö подöна туёк вылö, асьныс туригуммезö пырисö.

Вот мунö мужик, коколюкаöн беддясьö. Казялiс кöшельсö, мышкыртчис, мöдiс босьтны, а сiя — шырк бокö. Мужикыт — сап, а сiя — бöра шырк! Мужикыт — кокнас, а сiя — туригуммезö. Вак-вак серöмтчисö зонкаэс и — пышшыны! Мужикыт ештiс крюкавны Андрейлiсь коксö, уськöтiс и давай воззьыны, давай воззьыны...

Мöдпырся Женяыс, иньыс, чуть сьöлöм поттöдз эз вайöт... Пукалö би дын, гуддисьö телевизорын — нем ас гöгöрас оз адззы, нем оз кыв. А иньыс кöр и пырöма керкуас да кыдз чуткас бокас — Андрей садьсö öштас. И, кыдз садясяс, — Женялö пиннезас сёдас... Сысянь, пожалуй, и донтöммис иньыс... «Эх, Женя, Женя!»

Жальсянь ли, мыйсянь ли, но сiдз винатор охота лоис юыштны, что мужикыт магазинöдз котрасис и вайис «чудпиянок» — сiдз Виль Гублянын шуöны четушка. Вайис, сувтöтiс лудовка вылас, чöвтчис да бöра паськöтчис: жарит, шондi, эн жалейт öдтö! И бöра важсö öдззис касьтывны да сiдз и ланьтiс.

Сэтчö и локтiс Котöрок. Адззö: Андрей Никитич узьö, дзик садьтöм, и жарсяняс люзь ва, бытьтö баняись петöм.

— Мак-маковей! И баняыс оз ков — сiдз лöсялас...»

Старик котрасис колодец дорö, вайис ва. «Чöв-ко, не этадз колö... Ага, вон навес дорас лиснич сувтöтöмась, как раз лöсялö...»

Кайис вылö ведранас, буржыка метитчис и шоль койыштiс пасьтöмыс вылö.

Андрей Никитич ы-ыкнитiс, кöрчитчис и, дзик мяч, чеччöвтiс кок йылö, пондiс шардöм моз дзарьясьны, но некинöс ас гöгöрсис эз казяв. Эшö öтпыр ы-ыкнитiс, унньöвтiс, кватитiс «чудпиянсö» и жекйыштiс сiйö столб бердö да котöртiс керкуас, натьтö, чышкöтла. Сы коста старик кыш-паш лэдзчис улö да шымырöн-шымырöн сайöвтчис льöмпуэз увтö.

«Эстiсь колö пышшыны, кытчöдз пельбокат эз клёпкö», — думайтiс лекарь. Но дзар керис стын вылö — и сьöлöмыс пот мунiс: сiя сажень сувда, стынникыс сэтшöм йыла — рака бытшкисяс. И кык кöрттув вылö пуксьöтöм. И некытшöм осьта абу стынас.

«Мак-маковей! Винитчыны али йöрсö жугдыны? Ноко ворожита чуннезнам... Ага, жугдыны... Но кылас кö? А, мый лоас, сiя и ло!»

Вартiс да вартiс сапогнас — и öтiк чегис, а мöдiк шедiс. Пелитчис керöм осьтаас порсь моз, петiс, но йöрыс вешьян пыдöссис долонь пасьта вот босьтiс.

«Абу жаль, Виль одзын...»

Мало-дело тупйыштiс осьтасö да шыбыльтiс-лэдзчис Арашорка оляс.

Дата добавления: 2015-11-16