ГУНДЫРСÖ КОЛÖ ДЖАГÖТНЫ

Вöвлытöм дело: Олявкаöс неважын пуктiсö председателяс, а сiя бытьтö сизим год ни бергöтлö сельпонас.

Нельки баитö öнi мöднёжжык — не тэрмасьöмöн, думайтöмöн, не оз мыктав, не оз паджсьы.

И эшö вöвлытöм Гублянын дело — быд неделя керö собраннёэз: то вузасиссезöс чукöртас, то заготовителлезöс, то кладовщикöс, грузчиккезöс, конюхöс, шофёрöс...

Эта неделя вылын чукöртiс отирсö мöдпырся ни.

...Жырас жар, кöть и кыкнан öшыныс да ыбöсыс каспöвтöмась ван, и быдöнныс пукалöны лöня, дзик онзыляöсь, и видзчисьöны, кöр локтас бухгалтер Чикиськин да Зуйпиягись вузасись Феня, кöда удж йылiсь талун лöсьöтчöны баитны сельпоын.

Локтiсö дасся унажык морт — сельпо правленнёлöн членнэз. Нiя — Гублянын да сы гöгöр деревняэзiсь олiссез, позьö шуны — ас отир. То школаись директор тэчöма коккесö навижлад и лыддьöтö газета; то Венька листайтö блокнот, мыйкö кошшö сэтiсь; ны коласö тöрöтчöма Максимовна, кыз да рышкыт, öт кинас видзö тшöкасö да öмсö, дзик полö, медбы эз оссьы сiя одзжык да эз лэдз чеччöвтны неколан кывлö, а мöднас сынö русö гöрд печата чужöм вылас. А вон садикись заведующöй сунасьö. Тöдчö, код жöникыс бöра пежитöма, кымöсыс куш лöз.

Олявкалö тожö нем керны, и сiя орсö аканьöн: то одзнас асланяс сувтöтас, то бокнас, то ылöжык вештас да любуйтчö сiйöн, кöть и ровно бы нем вылö видзöтнытö: идзасiсь кöстöм да домыштöм вывтыр и кикок, кокнитик дубасок да чышьян — сэсся и нем, а басöк. Сылö, может, гленитчö сiйöн, что быдмикас ачыс сэтшöммезнас орслывлiс? Может, может... А пондасö я орсны сэтшöмнас талуння челядьыс? Натьтö, пондасö.

Тöн Олявка пыралiс Венька ордö и адззылiс, кыдз учöттэс орсöны ас керöм чачаэзöн, а фабричнöйес, дзик сиротаэз, сулалöны бокын.

Акансьö да мöдiк чачаэз вайис мыччавны школаись директор. Энö чачаэсö таво мöдöны керны школаын, а сельпо пондас вузавны. И кериссеслö, и сельполö, и орсiссеслö польза лоас, кöть и товарыс — дас копейка дона.

Кöр пырисö Чикиськин да Феня, Олявка пуктiс аканьсö, сят-сят керис карандашнас пызан кузяс, висьталiс:

— Пондöтам правленнёлiсь заседаннё. Повесткаын öтiк вопрос: кыдз уджалö зуйпиягскöй магазин. Докладчикыс — Чикиськин... Но медодз ме висьтала, кыдз сельпо уджалiс июньын.

— Гавриловна, колiс бы перво юавны миянлiсь, согласнöйöсь я мийö тэнат повесткаöн, — дзугис баитiсьсö Чикиськин. — Татöн абу на военнöй дисциплина — эстöн не армия, не милиция.

— Эта вопросыс планын, а плансö видзöтiм эшö мöйму. А что месяцöн öксим одзжык, дак сiдз петiс... Но, ладно... Июнь коста уджалiм, колö висьтавны веськыта, умöля.

— Этö кыдз вежöртны, ежели товарооборот сьöртi планыс тыртöм сто три процент вылö? — эз вермы видзсьыны Чикиськин,

— Этö тэ сьöртi сiдз. Правда, и райпотребсоюзын сiдз, да нiя оз на тöдö, что сэтöн бытшöм приписка эм, кöда йылiсь мöдпырся пондам баитны. И сiдз, плансö тыртiсö магазиннэз; эз вермö — сельскöй столовöй, заготларёк, киосккез. Эм растрата. Кинлö сетны премия, кинлö — выговор, решитас местком да партгруппа. А часöт кывзам докладчикöс.

Чикиськин чеччис, нёджжöвтiс öтлань, мöдлань, зэлöтыштiс галстуксö и кыскис нöитчöмкодь папкаись бумага да йöзыс одзö петiкö пондiс баитны:

— Меным эз висьталö, мыля эта собраннёыс чрезвычайнöй, но кыла, что миян дона правленнё, а точнöйжыка шуны, сылöн председатель, мöдö одзавны кадсö.

— Эн гöграв, дело баит, — советуйтiс кинкö. Докладчик öбидитчис:

— Ме ог любит, кöр мешайтöны... Но мед... Зуйпиягас мийö ветлiм кыкöн и уджалiм сэтчин кык час. Öнi висьталö, мый мийö ештiм керны эта кадö. А сё жö керим, кöть и нем вылö вöлi: Феня плансö тыртiс сто восемнадцать процент вылö.

— Кыдз эд тыртiс...

— Вот-вот, — шыасисö бöриссес.

Чикиськин лэбтыштiс пельпоннэсö, нюмыртiс öмсö:

— Кыдз? Да кыдз быдöнныс. Торгуйтö няньöн, солöн, ö-ö, сахарöн, шыдöсöн, табакöн, паськöм эм, — сiя мыччис неыджыт гижöт, — то список, видзöтö. Правда, не быдöс эм, мый колö, да быдöссö и Гублянас оз сетлö. Öтiк кылöн шуны, Феня, кыдз пыр, уджалö бура, культурнöя. Отирыс, ö-ö, оз кулитö сiйö.

Часöт вöлись казялiс Олявка, что Зуйпиягас Чикиськинсö эз ков иньдöтны. Не весь баитiс Шурончик: Кирилл Потапович ачыс шыралö и отсалö мöдiккезлö, кöдна оз вермö честнöя овны.

— А кыдз пыртö оланö райисполкомлiсь медбöрья распоряженнёсö — турун заптiкö винаöн не торгуйтны? — юалiс Максимовна.

— Кыдз и быдöнныс, — орöтiс Чикиськин. — Райисполкомлö — указывайтны, а сылö — вузасьны. А кыдз инö? Давайте дзебам водкасö, петкöтам квасина. А кысь оборотсö вайны? Деньгасö кысь? Тэныт зарплатаыс колö? Колö! Велöтiсьлö колö? Колö! Медиклö колö? Тожö колö! Тысячаэз, тысячаэз колöны. Вежöртан менö, Максимовна? А квасыт руббез сетö... Вот сiдз, донаэз менам!

Жырыс лöньсис, öшöтiс юрсö, сетчис Чикиськинлö, и сiя эшö öтпыр лöсьöтыштiс галстуксö, трекнитiс полаэзöттяс пиджаксö да сувтiс «Ф» букваöн — то пö ме кытшöм умнöй да басöк, и некин менö оз вермы пезьдöтны не кылöн, не вынöн!

Но Максимовнатö сразу он сермöтав, сiя тожö пиня и, кыдз любитö баитны, адззылöма «огни столиц, Минводы и газовые трубы».

— Вежöртi тэнö, Кирилл Потапович: колö деньгаыс. Да эд сiйö не öтiк винаöн колö керны. Ме неважын вöлi Зуйпиягас и адззылi, мый керсьö: луншöрнас юöны. Кытшöм сiя порядок? И сэтöн неетша винаыс миян, правленнёлöн, председательлöн.

— Во, эта мужскöй басни, — Чикиськин чöвтiс боккезсис киэсö. — Сельпоын предöн уджавны — абу женскöй дело. Сэтчö колö мужикöс. Ме правильно баита, ёрттэз?

— Может, тэнö пуктыны? — серöмтчис садикись заведующöй.

Чикиськин чуклясьтöг лыйис:

— Ме разь умöльжык кинкöся? Али не сельпоас уджавтöн пиньтöг и юрситöг кольччи? Али советскöй торговлялiсь уджсö ог тöд? — Сiя мöдiс босьтны записка, кöдö иньдiсö жырсяняс, но Олявка эз сет, и мужикыт босьтiс стул, сувтöтiс пызан дорас, пуксис.

Бухгалтерлöн кыввес дойдiсö жö Олявкасö, но сiя шы эз сет, терпитiс и нельки эз понды сувтöтны баитiссесö, кöть и нiя баснинаныс мунiсö невна бокö.

— И бур, тöдан кö уджтö, — согласитчис Чикиськинкöт Максимовна. — И уджав сэтöн. А мийö бöрйим преднас инькаöс, и ме лыддя, эг сорасьö: эстöн колö уджавны сэтшöмлö, кыдз Савыркина... Дак вот, Фенялöн «культурнöя» вузасьöм йылiсь. Локтi, адзза: магазин дынас телегаа трактор гургö, тополь увтас мужиккез юöны. И закуска праздникся дзик: сола чери, сола тшак, дзор помидоррез — тожö солаöсь, и нельки гос. Дзик кафеын!

— Тэ давай етшажык бöбöтчы, не клубат выступайтан, — советуйтiс Чикиськин. — И висьтав меным: мый умöльыс, ежели отирлöн чöскыт сёян?

— Мый умöльыс? Öткö, быдöс эта Фенялöн, и сысянь богатсялö Феня; мöдкö, сiя дзугö и паджö отирлiсь удж; куимöткö, öддьöнжык зорöтö винаюöм. Мийö, депутаттэс, сельсоветыс, ойсö ог узьö, отсалам колхозлö керны турун да силос, а сельпо эта коста, кыдз бур ань, юктасьö медбур водкаöн.

— Кытöн этö? Миян öнi водка абу, — висьталiс товаровед.

— А кысь нö Фенялöн? Али ачыс керö?

— Важ вайöм, тыдалö...

Феня пукалö — öмсö оз осьт, нельки рожаыс, дзик симöтовöй, оз гöрдöт, бытьтö не сiйö видöны-кöритöны.

И Олявка шы оз сет — ась баитöны. Правленнёыслö и сылö быдöс этö колö тöдны. А бухгалтер мыйкö дугдiс баитны и лöсьöтлыны гöрд галстуксö.

— Ачыс Феняыс, шуöны, юö. Быль я сiдз? — шыасис Венька.

Чепöссис местасис Чикиськин, öдззис горöтлыны:

— А кин оз ю?!. Уджалiн, мыдзин — пешлышт на здоровье!..

Пызан дорас пуктiсö мöдiк гижöток, но Чикиськин и сiйö эз ешты босьтны, да юалiс пуксикас:

— Кинлö нiйö, Гавриловна? Адзза: тэ мыйкö месянь суськан.

Сэсся Олявка эз понды чöвны:

— Одзза гижöтокас юалöны: «Дыр я мийö пондам кывзыны код докладчиккесö?», мöдас тшöктöны висьтавны Фенясö, кыдз сiя кольöм неделя вылын торгуйтöма пизьöн... Кыдз адззан, Кирилл Потапович, ме нем ог суськы тэ шогья. Мый нö сэтчö висьталан?

— Висьтала сiйö, что татöн докладчиккеслiсь öмнысö тупкалöны нятьöсь гижöттэзöн, и нылö эстöн нем керны.

— Что керны нем, тэ, пожалуй, прав, — отсалiс сылö Олявка, и Чикиськин босьтiс папкасö да шытöг петiс кабинетсис. — А мый висьталас Феня?

— Кыдз кужи, сiдз и вузаси.

— Кыдз сётаки? Отирыс бы тöдöны. Феня курччöвтiс тырпсö.

Олявка кыскис пызансис бумага.

— Сэк то эта письмоыс висьтасяс. Ме мымдакö сэтiсь лыддьöта. «Виль Гублянын вузалiс мешöк, сы понда юис стопка, трактористыс — тожö. Мöдiк деревняö колис куим мешöк — бöра юисö. Куимöтас сiйö жö керисö, и деньгасö кинлiсь босьтiсö, кинлiсь — эзö. Магазинас вайисö öтiк мешöк, чапкисö посöдзас, и мешöксö косявлiсö порссез».

— Культурнöя уджалö!

— Этадз колö кужны!

— Да-а, дзик аслас лавкаын соровтö. Феня сайöвтiс чужöмсö чышьяннас и чöлö.

— Сы кодь уджалiссес миянлö оз колö, — горöтчис Максимовна.

Феня пондiс риксыны-горзыны.

И, кыдз часто овлö, синваэс вöрзьöтiсö кинлiськö небыт сьöлöмсö:

— Кытчöдз ась уджалас, но колö ёна предупредитны...

И эшö уна да ёна баитiсö, сiдз и этадз бергöтлiсö Фенялiсь уджсö да сы сорöн и лэдзисö мыжа мортсö, но висьталiсö: кыдз накажитны сiйö, ась решитасö местком да администрация.

Олявка пöдналiс заседаннёсö, но корис кольччывны коммунисттэсö, медбы решитны, мый керны Чикиськинкöт.

— Эта вопросыс öтмöдöрсянь тыдалö, кыдз Жогорыс, — шуис Венька. — Председатель накажитас аслас властьöн, а парторганизация, ме думайта, предупредитас медбöрьяись... Медыджыт проблема — винаюöмкöт пессьöм.

Юасьтöг-висьтасьтöг пырис Гаврила Савыркин, пуксьыштiс ыбöс дорись стул вылö. Венька видзöт-керис Олявка вылö, чöлыштiс и эшö мöдпöв висьталiс:

— Да, винаюöм быдöс дзугö, сiя лоис миян первöй проблема. Мый сэтöн керны, давайте думайтны öтлаын. Этö вопроссö ковсяс сувтöтны партсобраннё вылын.

— Первöй проблема, дак кутчы сы бердö талун! — висьталiс Савыркин. — «Ашын, а не талун!» — дышкучиклöн лозунг.

— Папа, миян партсовет, тэ пукышт мöд жырас, — пондылiс öвны айсö Олявка, кöть и тöдiс, что сылiсь öмсö öнi он ни каличав.

— Эд полö менчим, ме тожö коммунист. Тридцатöй годсянь.

— Ог полö, Гаврила Лекандрович, — шуис Венька. — Баит, мийö кывзам.

— Проблемаэс öткодьöсь что Ыштайын, что Гублянын: ог уджалö бы, гусясям, гуляйтам... Сьöлöм потö, кöр ме адзза энöка... аляммесö, кык кока подасö! Сымда пессим, медбы югыт олан керны! Йöзлiсь киэз пиньлалiм, юррез сырйим, ассиным лов пуктiм. А мый понда? Эта понда?

Дзирдалö старикыт, нельки чужöм вылас вежсис и куш юрвоманыс пондiс свиттявны сiдз жö, кыдз пызан вылiсь гöгрöса графиныс. Сiя кужö баитны, вермö, а часöт кыввес оз тырмö, медбы вежöртöтны сы одзись грамотнöй йöзсö, позьö шуны, гублянскöй активсö, что винаюöм — умöлься-умöль дело, медбöрья дело, что сы кузя отирыс нач лэдзчисис, что немöдз локтас, ежели не сувтöтны сiйö, не мырддьыны сы киись бутылкасö.

Нылыс вежöртö, öддьöн бура вежöртö сiйö. И тöдö, кыдз сылöн аймамыс татöн, а сыбöрын Ыштаяс овтöн, керлöмась «гöрд помеччез», «комсомольскöй рыттэз» да берсясö сы понда, медбы чожжык мичамис крестьянскöй олан и петiс комиыс бусiсь-саись, ёртасис газетакöт да книгакöт, и эшö сэксянь нiя пондöмась вежöртны, мый лоö овны.

— Керим колхоз, осьтiм... энöка... школа, институт, сетiм сапог, машина, а сiя, несчастнöй, пöртчис нечулимö!

— Тэ кин йылiсь, папа? Кытшöм несчастнöй?

— Сiя, кöда вöв моз винасö пичкö... Муна часöт Которковыс памятник дынöт, а сэтöн, садокас, куим абач* пируйтöны. Нёль бутылка одзаныс. Одзжык сымданас свадьба чулöтлiмö... Кытчöдз эшö не быдöнным кольмим, колö кутчыны эта пöрöс бердö. Джагöтны колö зелёнöй гундырсö... винагагсö!.. Видзчися тэнö öтöрас, Оля, — орöтiс баснисö Савыркин и вычкöп петiс ыбöс сайö.

Мыйкö дырна некин эз горöтчы, тыдалö, бергöтлiсö юраныс пöрись коммунистлiсь шуöмсö. А эд сiйö, мый висьталiс Савыркин, нiя быдöнныс адззисö и тöдiсö и нельки баитлiсö ас коласаныс, но мылякö некин эз пондыв лэбтыны этö баснисö сы вылына, сетны сылö колана дон. Этö тöдöны и районын, и областьын, а тожö мылякö чöлöны.

— Но мый, чышкис öмнымöс старикыс? — юалiс Максимовна и мыччис совет: — Сётаки эстöн дзарьясьтöг керны оз туй. Эта йылiсь ась думайтас Савыркина и висьталас миянлö, кыдз татöн пессьыны винаюöмкöт.

— Мыля ме? — повзис Олявка. — Мийö жö... ме жö... Эд торгуйтам винанас асьным и вдруг... Сiдз оз лöсяв!

Максимовна, кöда вексö олö депутатын и сельсоветын председательöн уджалiс, бура тöдö, мый баитö, кужас кöть кинöс вежöртöтны.

— Как раз лöсялö: тэ и партбюроын, и депутат, и тöдан, кыдз юöны...

И Олявкалö лоис кыдзкö недолыт, не ас сьöртöттяс. Не сысянь, что сылö поручитiсö сэтшöм удж, а сысянь, что сэтшöм кадö, кöр сылöн пеллезви мöдiк заботаэз и что нiя тожö важнöйöсь, кöть, может, и учöтжыкöсь и личнöйжыкöсь, да эд сэтшöм жö зубытöсь, кыдз и ыджыттэс, нiя сiдз жö быдöс сы бердын, сы юрын, сы сьöлöмын.

«Ме тöда, кыдз ювлiс Колька Баканов, менам жöникö, а кыдз юöны öнi — только боксянь адззывла... Да ладно ни, ог пондö боньгыны!»

Рытъявнас Олявка гижис приказ: нечестнöя уджалöм да кодалöм понда Чикиськинлö и Фенялö сетны выговор и не сетны премия.

— Талунсянь прокод сiдз лоас: кин мый кошшас, сiйö и адззас,— висьталiс Олявка приказсö öшöтiкö. — Ме тiянöс велöта овнытö, абыз чукöр!

Техничка Татя сэтчö шуис:

— Чукыля пусö он веськöт, ылöстöм мортсö он велöт.

— А пондывны колö! — горöтчис Олявка да сетiс Татялö нёль гижöт: — Энö быд магазин вылö лякöт, ась отирыс тöдö, кыдз мийö олам-вылам.

Дата добавления: 2015-11-16