Уна сера канёк Чыско олiс гажтöма.
Мунасö морттэс гортсиныс, колясö сiйö öтнасö, и каньпиян лунтыр öшын вылын пукалö.
Часто корсьывлiс öтöрö — гажаас, да сiйö полiсö лэдзны: öшан пö нето кырныш кокыштас.
Паныт, улица саяс, олiс нылочка. Сiйö мамыс тожö öтнасö колявлiс. И нылочкаыс тожö часто öшын вылас пукавлiс.
«Колö сыкöт тöдсасьны да öтлаын орсны», — решитiс Чыско и öтпыр, кöр ыбöсыс вöлi осьта, сiя петiс посöдзö.
Хозяйкаыс мунiс уджавны, а Чыско котöртiс улица сайö.
— Няу-няв! Бур лун тэныт, нылочка! — шуис канёкыс.
— Бур лун, Чыско!
— Тэ öтнат?
— Öтнам.
— Тэныт гажтöм?
— Абу. Ме книга лыддьöта.
— Меным гажтöм, — шуö Чыско. — Мунам миянö орсны.
— Кыдз орсны?
— А вот кыдз: тарöвтны мячок, вöтчыны сы сьöрö, кутны öмнат. Сэсся водны гатш да гыжьявны коккезöн.
— Ме эд ог гыжьясь. И ог туплясь, — откажитчис нылочка.
— Сэк пондам гуттэзöс повзьöтлыны.
— Сiя разь орсöм?
— Но шыррезöс кошшыны.
— И эта не орсан.
— А мый нö орсаныс?
— Орсаннэс уна... Вай-ко то этадз орсам, — висьталiс нылочка да петiс öтöрас.
Сiя петкöтiс сунистор, сы бердö домалiс бумажка да пондiс кыскавны му кузяс. А Чыско — сы бöрсянь да лапканас — сап! Мöднас — сап! А бумажкаыс оз сетчы, пышшö!
— Чöв, шедан тэ меным!
Котрасьö канёк, бергалö — коккесö вынсьöтö, гыжжесö йывдö, синнэсö зорöтö да гажтöмсö дынсис вашöтö.
Дыркодь сiдз орсiсö да пырисö керкуас.
Нылочка пондiс лыддьöтны, а Чыско куйлiс сы öлöдзын да мурзис-сьылiс гажа песня.
ГАЖА ТШАККЕЗ
Таво тшаккес петiсö одзжык, гожум шöрнас, и öтпыр Светалöн дедыс шуис:
— Эна миянлö как раз: и шоныт, и кайес сё эшö сьылöны, и быдкодь туруныс мортыскöт здоровайтчö.
— А тшаккес? — И нiя здоровайтчöны.
Баитiсö сiдз деда-внучатка и мунiсö тшакьявны.
Рас дорокас, шондi гаж вылас, нiйö панталiс тшаккезлöн веж чукöрок. Нылочка казялiс тшаккесö, юалiс:
— Энö öктöны?
— Öктöны, — шуис дедыс. — Нiя маслянкаэз, ныись бур тшакьяшыд шогмö.
— Здравствуйте, маслянкаэз! — горöтчис Света.
Рамыник тöлок вöрзьöтiс катшасиннэз, и быд цветокыс пондiс гажöна гогинявны чочком юрнас. Сэк жö чирк-чирк шыасис енкöбывка, чивöстiс каёк. А тшаккес чöлiсö.
— Мыля нiя озö здоровайтчö? — обидитчис нылочка.
— Здоровайтчöны, — шуис дед, — только ас мознаныс: гусьöн. Видзöт, кыдз дорисьыс юрсö лэбтыштöма! Этадз садиксиныт завхозыс здоровайтчö — шляпасö лэбталö.
— Быль, деда! — радмис учöтик тшакьялiсь да эшö öтпырись здоровайтчис.
Öктiсö этö чукöроксö, тэчисö доззэзö: ыджыттэсö — дедыс пестерö, учöттэсö — Света корзинкаö.
И бöра иньдöтчисö одзлань.
— То эшö öтiк здоровайтчö, — дедыс мыччалiс чуньнас кусток увтö.
— А шляпасö тайнö абу лэбтöма?
— Сылöн не шляпа, тюбетейка, — висьталiс дедыс и жагвыв вундыштiс тшакыслiсь коксö, босьтiс киас. — Эта томыник коровяк, или мöсгоб. Сiя медчöскыт тшак. И кöть косьты, кöть жарит, кöть пу — прокод чочком.
Керöсок дорын, кытöн паськыт листтэзнаныс орсiсö том пипуэз, пантасис гöрд юра тшак. Сiя вöлi кузь кока, шапкаыс неыджыт, вöснитик и öддьöн ни югыт, сiйöн и ылö тыдалiс зелёнöй турун весьтас.
Света казялiс сiйö, шуис:
— Часöт вон кытшöм здоровайтчö!
— Ай да гöрд гриб! — ошкис тшаксö дедыс. — Радейтö миянöс — паныт петiс.
Босьтiсö, пуктiсö Света дозокö. Сэтöн жö, понулёк сайын, нылочка вак-вак серöмтчис да висьталiс:
— Ой, эта мöдiк тшак вылö кайöма! Света пуктiс дозоксö му вылас и кутчис нёджжавны адззывлытöм тшаксö.
Видзöтö дед: кыксувда гриб. Вот дивоыс!
— Сiя тэкöт öддьöн здоровайтчöма бы, вот и лэбтiсьöма вылöжык, — висьталiс дед.
Нылочкалö этасянь лоис эшö гажажык, и сiя öдззис йöктыны да киэзнас шовкöтны. Вот кыдз сiйö тшаккес видзчисьöны!
А дедыс шыннялiс и кошшис виль диво: оз я матын рыжик рызйы-серав, оз я чатрась косясьöм чышьяна бабапель, оз я ошшась онняюра шляпанас гöстшак? Может, неылын уртшаккез кругöн йöктöны? Может, кытшöмкö пипудзурк чеччöвтiс мыр вылö да макайтö шляпанас — корö дынас?
Вермас, вермас и сiдз лоны: эд тшаккес отирсö видзчисьöны да панталöны нiйö. Ветлö-ко да видзöтö асьныт.
КИН КИНÖС САЙМÖТÖ
Менам эм учöтик соседка — вит годся нылочка Тоня, öддьöн басниа морт. Сiя пыр одз чеччö. Нельки гожумся асылö, кöр медчöскыт он, чеччö öтдруг мекöт. Ме мисся да муна ю дорö вала, а Тоня — бöрсяням: нылочка быдтö цветтэз и часто киськавлö нiйö. Киськалас, любуйтчыштас цветтэзнас и садикö мунö.
Вот öтпыр ме и юала:
— Тоню, кыдз инö тэ сы одза сайман?
— Менö мамö саймöтö, — шуö сiя.
— А мамтö будильник саймöтö, да?
— Мыйлö будильниксö миянлö? Миян баб эм. Бабö и саймöтö мамöс. Пыр и пыр саймöтö.
— А бабтö? Бабтö кин?
— Бабöс?
Тоня чöлыштiс недыр, дзар керис ме вылö ёся синоккезнас и горöтчис:
— Петухыс сiйö саймöтö. Тöдан эд миянлiсь Петконымöс?
— Тöда, тöда, — шуа ме. — Öддьöн басöка сьылö сiя.
— Öддьö-ö-öн! А тöдан, мый шувлö?
— Мый жö? — юала ме, и Тоня сьылöмöн меным висьталö:
— Ку-ку-рек-ку-у! Юртö лэбты!.. Бабöлö сiдз сiя и шувлö. Öтпыр горöтас, да бабö оз кыв, и Петкоыс мöдпырся кытсалö: «Юртö лэбты!»
— Вон кыдзи! А петухсö кин саймöтö? Тоня шуö:
— А сiйö — шондiыс.
— Но эд шондiыс не пыр овлö, — висьтала ме да видзчися, мый сэтчö шуас удав нылочка.
Сiя сувтчыштö недыр кежö, дзарьясьö-керö, и, дзик бура тöдö, шуö:
— Одз асывнас шондiыс пыр эм. Только мийö сэк узям и не пыр адззывлам сiйö. Сiя миянся медодз чеччö.
— А шондiсö кин саймöтö?
— Некин оз. Сiя ачыс чеччö. И цветоккес тожö асьныс.
Тöдвылас усисö цветтэс, и Тоня орöтiс баснисö да уськöтчис вадöрö, медбы векнитик вала-посок вывсянь чожажык гумыштны сöстöм васö узöра ведёркоас.
Чу, баксö дыш порозок Мастру, кöдö оз лэдзö мунны мöссэскöт, а вашöтöны кукань йöрö, кöчковника видз вылö.
Чу, деревня шöрас пондiс тюкйыны молоток — этö вартлöны ныжмöм коса. Берег дорокöттяс мотоциклöн гöнитiс бригадир, осьтiс кузницасö Данила дед. Сiдзкö, и миянлö колö чапкыны гортся уджнымöс. И тэрмасьöмöн, но не сiдз, медбы резсис ваыс, мийö шы сеттöг каям асланым цветниккез дынö.
Дата добавления: 2015-11-16; просмотров: 59 | Нарушение авторских прав
| <== предыдущая страница | | | следующая страница ==> |
| КЫК ÖТКОДЬ ДА ЧИКА | | | СЭК НЕМ И ТÖЖДIСЬНЫ |