(Бичирок, 1959)
Неылын Кöч посад дынсянь эм деревня Лягай. Вельыджыт сiя и гажа местаын сулалö, керöс дорын. А шуöны этö мыссö Чöлпан керöс. Нюжалöма деревняыс ойланись покат пöлöн. Видзöтан кö сы вылö вылiсянь, вачкисьö, бытьтö керкуэс лöсьöтчöмась пышшыны увдöрас да сибдöмась сэтчö.
...Öтпыр тулысъявнас правленнёын баитiсö сы йылiсь, кыдз чожажык керны виль картаэз. Эта понда колiс заптыны уна вöр, пилитны тёс да плаха. Отир етшаöв, а колö и строитчыны, и гöрны-кöдзны. Сэтчö кинкö негорöн, дзик ас пондасис, висьталiс:
— Велöтчиссез мымдакö отсаласö.
— Мы-ый? Угланнэс? Нiя эд, батя, абу работниккез! — горöтчис мöдiк.
— Вермасö отсавны...
— Вожасясö угöв вылас да пондасö тшупсьыны? Но-но!
— Галя öктасö фундаментыс понда. Как раз ны сьöртi уджыс...
Гажа öтöрын тулысся лунö: югыт, шоныт, а небоыс дзик сöдз ва. Чöлпан керöс то кушамис ни, а улын сё больгöны шоррез. Кайпöлöс дугдывтöг лöсьöтö аслыс поззэз, сьöдракаэз тышкасьöны готовöй «керкуэз» понда. Кырныш паськöтöма борддэсö да уйö ны вевдöрöт, бытьтö локтö мездiсьны. Но сибöтчыны оз лысьт: сюйыштас юрсö ны коласö, дак дöс бордтыввесö ассис перкьясö.
Эттшöм кадö челядёк некыдз оз öшшы гортас. Кыдз только петасö школаись, кин кытчö и рознитчас. Кöда шордiсьö, кöда тележка керö, а кин бергалö ыджыттэс коласын жö. Уджавтöнняс он и казяв, кыдз мыс сайö лэдзчисяс шондi. А морозко сэтöн и эм: бöра кынтö незьдöм му вевдöрсö. Сэки сiя вачкисьö сур кень вылö: сэтшöм жö некодя и рöмыс сылöн жö...
Кыдзкö школаын висьталiсö челядьлö: колö отсавны колхозлö. Вон, Китайын пö челядь пессьöны сы понда, мед орöтны родсö крысалiсь, гутлiсь да номлiсь. А мый вермасö керны лягаевса? Берсясö. Шуам, весöтны ыббез галясянь. Да и эз ков челядьöс корны. Только висьтав — керасö. А нёльöт классiсь велöтчиссез Витя Шипицын, Миша Минин, Анна Кучевасова да мöдiккез — медодз мунасö. Кöр ни нiя пукаласö гортын? Эд не весь новйöны гöрд галстуккесö!
Медодзза лунас жö ыб вылö петiс дöс школаыс, пятьдесят морт гöгöр. Иван Семёнович Тиунов, строителлезлöн бригадир, эшö одзжык висьталiс, мый гырисяö колö öктыны галясö, кыдз и кытчö тэчны.
Челядь бура тöдiсö, кытшöм польза нiя сетасö колхозлö. Öткö, лоас весöтöма изъя муыс — унажык нянь быдмас; мöдкö, кирпич туйö мунас эта донтöм галяыс; куимöткö — челядь мездасö аймамнысö эта уджись кöдзан кад кежö.
И вот ыб вылын пизьö удж. Öтмöдöрсянь лэбзьöны галяэс öтiклаö, чакöтöны усикас. Нылöн горыс сорласьö челядь шумкöт. Мукöдыс тэчöны перво йöрнöс подуланыс, сэсся нöбöтöны чукöрас и вились котöртöны галяэзла.
Час-мöд бöртi öтi-мöдiлö сивьяс, тыдалö, дыш пуксис. Дыш я не я, а сёжö диво ни мышкырасисö: мыдзисö. Кöть и шуöны, что челядьлöн пö абу косыс, кöстасьöмсянь оз пö мыдз, а не сiдз вöлöма.
Казялiс этö учительница Алевтина Николаевна, висьталiс:
— Талун тырмас. Позьö гортö мунны, уроккез велöтны. Ашын бöр татчö локтам.
Мунiсö. А бöраныс кольччисö не öтiк чукöр, кöдна веж видзисö пар вылас.
Сiдз пондöтчис колхозлö отсöт. Сибалiсö экзаменнэз. Ыджытжыккес лöсьöтчисö ны кежö. Но шочыника тожö петавлiсö ыб вылö. Ветлiсö сэтчин и нiя, кöдна эшö эз на велöтчö. Разь видзан нiйö?
Каникуллэз вотöдз бура уджалiсö. Но этö етша. Джыныс абу керöма.
Челядь висьталiсö: удж огö чапкö. Пондам öктыны гожумбыт. Сiдз и керисö.
И бöра челядь чеччисö öтдруг аймамныскöт да тэрмасисö ыб вылö. Эз вунöтö и асланыс карчйöр да сад йылiсь. Öнi татöн быдмисö ни малина да сьöд сэтöр. Öшын увтын да посöдз дынын путшалiсö почкаэз сира тополёккезлöн, вöснитик кыдзоккезлöн да рябинаоккезлöн. Аскадö муись петалiс и картошка.
Кöр чукöррес лоисö вельтума, сетiсö машина. Велöтчиссез пондiсö кыскавны галясö карта местаö. Асьныс тэчисö машинаö, асьныс и ректiсö. Вачкисис, челядь орсöны одзасьöмöн — кин унажык чапкалас иззэсö.
Сибöтчас шофёр галя чукöр дынö, пондас лöсьöтны мыйкö мотор бердiсь, а челядь тэрмöтöны ни:
— Вашöт одзлань!
Дзар керас — чукöрыс бытьтö пакмöма шондi югöррезсянь да рамыник тöлоксянь, только подмöм местаыс кольччöм. Заводитас — и бöра лэбтö буссö машинаыс, мунö сэтчин, кытöн куйлöны керрез. Машина вылын мелькайтöны куш да дженытик чикисёка юррез. Ыркыт ру ласкова малалö нiйö, дзик мам жö ассис вежöра дитяöс, пöльтö йöрносоккезнысö.
Сiдз и уджалiсö челядь кузьгожум. Галяись, кöдö чукöртiсö эта кадö, вöлi сувтöтöмась цемент сорöн 128 столб мöс карта увтö да деревня Васькинын кисьтöма порсь карта увтö бетоннöй фундамент. Эта понда челядь вайисö 34 машина галя. Медбы öктыны сiйö (только öктыны), öтiк мортлö ковсис бы кадыс вит месяц мымда. А лыддьö-ко, уна я бы колiс эшö сiйö тэчöм да ректöм понда.
Этася, челядь туруналiсö, весöтчисö, кыскалiсö назём и керисö уна мöдiкö.
Эз вунöтö и карчйöрнысö. Пыр дозирайтiсö, и картошкалiсь босьтiсö бур урожай. Сэтiсь 60 ведра сетiсö закупö.
Кин уджалiс буржыка? Сьöкыт висьтавны.. Öтiк лун весь эз öштö Нина, Володя, Саша и Коля Кучевасоввез, Паша и Маня Шипицынаэз, Саша Маскалёв. А Лена, Вася да Борис Мининнэз вöлiсö медчожöсь, кöть нiя и вöлiсö медучöт велöтчиссезöн.
Да и мöдiккезлiсь некин оз бытшкы синнысö, оз шу нiйö дышкучиккезöн.
Сентябрь первöй лунö челядь вились пуксисö партаэз сайö. Гожумнас быдöнныс быдмыштöмась, чужöммезныс тöвзьöмась, кикок вынсялöма.
Дата добавления: 2015-11-16; просмотров: 37 | Нарушение авторских прав
| <== предыдущая страница | | | следующая страница ==> |
| ЮКМÖС ДОРЫН | | | Ouml;ТIК ОЙÖН |