Ouml;ТIК ОЙÖН

(Бичирок, 1961)

Пронинса соревнуйтчисö ыковсакöт, кöдналöн колхозниккес вöлiсö только дас гöгöр. Сiйöн эта бригадаын унажык уджсö керисö шöрöт школаись велöтчиссез. Нылöн асланыс и трактор, и комбайн эм. Öтiк кылöн шуны — школьнöй бригада. Гöрдя Вась, пронинскöй бригадир, эта бригада вылын сералiс и прокод баитiс:

— Угланнэскöт абу охота вермасьны... Пызан сайын разь токо...

Былись, челядь эз на ештö öзиммесö назём ваöн киськавны, а пронинса кöдзны ни петiсö. Челядь ветлöтiсö дзик öшöмöсь да зiлисö Михаил Петровичлö, шöрöт школаись физиклö:

— Кöдзны колö, Михаил Петрович! Пронинса вон мый керöны, пондыв-ко нiйö вöтны!

А Михаил Петрович ассис:

— Миян быдöс керсьö график сьöртi, а нылöн — кыдз шедас.

Сы сьöртi петiс, что челядь пронинсаöс одзаласö севнас, кöть и сёрöнжык пондöтчасö. А öнi колiс петкöтны назём да öзиммез зорöтны. Эта эд тожö вермасьöм. Урожайсö, батя, назьмиттöм муыссянь эн видзчись.

Челядьлöн трактор петiс кöдзны сэк, кöр пронинсалöн лунпокатыс кöдзсис ни. Пондiсö уджавны куим сменаö. Чожа мыйись челядь асьныс казялiсö, что мунö быдöс сiдз, кыдз баитiс физик. Володя Бажин, сьöдыник, ыджыт мыгöра зонка — чатыра юр — кыдз шуисö сiйö ёрттэс, сэк висьталiс: «Ме мый баитi: одзалам, мыся, нiйö, пронинсасö!»

Но пронинса тожö эз сулалö весь.

Гöрдя Вась малалiс ассис медь рöма пилиммесö да сё ошшасис:

— Ныр увтныс эшö лякöсь, мед миянöс одзавны. Мийö кутчам дак öтiк лунöн курни-верни суктам!

Челядь чöлiсö да ассиныс керисö. Нылöн тракторныс гурöтiс и сэк, кöр пронинса ыббез вылын только ойтöв шутнялiс да повзьöтлiс шыррезöс тупка. Öтiк асылö Гöрдя Вась казялiс, что ыковсалöн трактор ветлö неылын öтка пожум дынсянь, кöда торйöтiс кык бригадалiсь ыббесö. Вермас петны сiдз, что пожум увтöт кыкнан тракторыс мунасö öтдруг.

Челядь думайтiсö мöднёж: нiя одзаласö. Кöть лекаэзныс öткузяöсь, а школьнöй трактор бергалö чожжыка.

Но сэтчö аркмис сiя, кöдö некин эз видзчись: челядьлöн жугалiс трактор. Кöд коста лöсьöтiсö — шондiыс сайöвтчис. Сэк Володя, механизаторрезлöн бригадир, рычаггез сайö пуксис ачыс. И вот трактор бöра поткöтö-косялö рытся лöньсö, паськöтö говксö ылö-ылö öтмöдöрö, лэбзьö вöррезöдз да посадöдз и сорласьö сэтчин гармоння шыкöт да сьылöмкöт.

Володялö тожö гажа, охота сьывны. И зонка сьылö. А трактор чышкö-мунö сё одзлань да одзлань, и быд кытшöлöн матынсялö заветнöй пожумыс.

Но бöра — тыр-тырк-тыр — и моторлöн öткодь сьылан торыс дзугсис. Ковсис сувтöтны тракторсö.

Вельдыр гуддисисö, кошшисö, мый неладноыс, да сiдз и нем эз пет. Челядь надейтчисö Володя вылö: сiя уджалö мöдiк тулыс ни. Но зонкаыт, мавтчöм чужöма и пашмöм юрсиа, шытöг петiс трактор увтiсь, чапкис ключчесö да курччöвтiс тырпсö.

Думайтiсö-керисö и мунiсö пронинса дынö. Ыб вылiсь застанитiсö и Гöрдя Васьöс, и механикöс, корисö отсавны.

Жугалöм тракторсö видзöтiсö недыр.

— Мунö узьны, челядь, — шуис механик, — эд пальöтö весь оннытö.

— Мы-ый?! — öтiк öмись горöтчисö челядь. — Узьны?! Вайö миянлö мöдiк трактор... только ой кежас.

— Абу, — шуö механикыс. — Да мый тiйö тöждат? Кык час кежö уджныт кольöма. Ме бы сетi, ежели бы...

— Эмöсь, ме тöда, — шыасис школьнöй бригадаись учётчик Сеня Норов. — Вон колёснöйныт лунтыр весь сулалiс, немымда эз пилитчы. Кöть сiйö сетö.

А Гöрдя Вась кыскис ни механиксö кипöлöттяс: тырмас пö весь кадсö öштыны, шоччисьны колö.

Пронинсалöн трактор сё гöгралiс и гöгралiс, дзугыльтiс челядьлiсь сьöлöммезнысö. Вöлi бы гортын Михаил Петрович, сё ни бы мыйкö керис. А öнi кытчö воштiсьны? Нельки Володя оз куж лöсьöтны, а мöддэс уна я авйöны?..

Пронинсалöн тракторыс вдруг кежис бокö, лэдзчис гараж дынö да чожа дугдiс гурöтны.

Гöрдя Вась, кöр тöдiс, что ыковскöй трактор сувтiс, тшöктiс сувтöтны и ассиныс: ульöв пö муыс да и ойыс пемыт, вермасö челезнаэз кольччыны.

Челядь пукалiсö пемытiнас, сю мешöккез вылын и жугдiсö юрнысö, мый öнi керны.

— Давай, — горöтчис Сеня, — вайöтам нылiсь. Нiя узьöны, а тракторыс гаражсö караулитö.

— Сторожыс оз сет.

— «Оз сет», — дразнитiс ёртсö Сеня. — А мийö и юасьны ог пондö.

— А мый: муыс колхознöй? Колхознöй. А тракторыс кинлöн? — горöтлiс мöдiк. — Горючöй миян асланым эм.

Голосуйтiсö. Володя чöлiс. Тöдiс, что сылö павкас эта понда. Сiя бригадир. А мый павкас? Разь кöдзны колхознöй тракторöн — преступленнё? А сулöтны тракторсö эттшöм кадö абу преступленнё? — Ноко, Сеня, котрась председатель дын, — тшöктiс Володя. — А мийö ветламö тракторист ордö.

Гаражö мунiсö быдöнныс. Сеня, кок йылас медчожыс, котöртiс посадö. Гаражын саркйис-узис Питю дед. Мöдiсö саймöтны сторожсö и юасьны сылiсь, но дед только пиннезнас гирчыктiс.

Пронинын шы не тöв. Мымдакö ванзiс кылö Гöрдя Вась — сёр гöсь — да и сiя дугдiс. Челядь мунiсö трактористöс кошшыны, а сiя гортас абу и вовлöма. Öнi öтiк надежда — видзчисьны, кытшöм юöр ваяс Сеня.

— Давайте заводитам тракторсö, — баитö Володя. — Шы вылас, поди, локтас кинкö. — Заводитiсö, уджöтiсö недыр. Некин эз лок. Мöдiсö ни сувтöтны, да казялiсö Сеняöс.

— Сетiс, сетiс, — чирзiсö челядь. — А то бы эз котöрт сiдз.

Сеня сiдз жö висьталiс, и челядь иньдöтiсö тракторсö асланыс ыббез вылö.

* * *

Тракторист ойшöрнас локтiс Питю дед дынö куритны. Треситiс, треситiс — эз вермы чеччöтны стариксö.

— Бур сторож, — сералiс тракторист. — Кöть асьсö кокпöлöттяс кыскы. — И пырис сылö юрас, что колö кешитчыштны Питю дед вылын. Чöвтiс сылiсь виль сапоггез, кöмöтiс ассис, бырöммесö. Кылiс жö Питю дед, но чайтiс иньыс пöрччöтö, и только шыннялыштлiс. Тракторист кöмасис, куритiс и петiс öтöрас. Видзöтö: тракторыс абу. Чепöссис öтöрö-мöдöрö — абу да и только. Дед дынö пырис, юасьö, а сiя коза моз мексö да чужьясьö.

Сэк тракторист котöртiс бригадир дынö, öдва-öдва лэбтiс сiйö. Кытчöдз Гöрдя Вась нюжласис да кöмасис, öтöрас дзар югдiс. Локтiсö гараж дынö, а трактор важ местаас сулалö.

— Вöтасин я мый я, али синнэт йöймисö, — кутчис видчыны Гöрдя Васьыс.— Отирсö весись вашöтлан, вежöм! Ме тэнö!..

Питю дед тожö трактористöс видö да сы сапоггез вылö видзöтлö: ме кодьöсь жö кыськö пö небöма, яловöйöсь. Сэсся видзöтыштiс кок ныррез вылас — и сьöлöмыс пик мунiс: кокас сапоггез не сапоггез, пимиэз не пимиэз — он тöд — сэтшöм нятьöсьöсь. Сэк вежöртiс Питю дед, мый аркмис, да горöтiс бригадирлö:

— Тырмас, нокотьöсь, весись дульны, уджавны колö...

А кöр шондi лэбтiсис öтка пожум весьтö, ыб вылö локтiс машина-летучка. Сэтiсь петiсö Михаил Петрович, колхознöй механик да эшö кинкö. Михаил Петрович видзöтiс кöдзöм ыб вылö и серöмтчис:

— Но и челядь! И кин нiйö уджавны велöтöма?

— Бур колхозниккез ныись петасö,— ошкис механик,— видзöт, севсö медодз ештöтiсö.

Дата добавления: 2015-11-16