ЮКМÖС ДОРЫН

(Иньва, 1992)

Тöвся мича лунö челядь садын керисö субботник. Вениамин, кöдö дженыта шуисö Аминь, асывнас петiс соседыс ордö, рочалiс сiйö.

— Ветлам жö, Матвейко, поткöтчынытö. Тэнат эд садас джын группа, натьтö.

— Эмöсь даки, ог суськись, — быдсöн бекöр пасьта чужöмнас шынньöвтiс Матвейко. — Адззан эд: баля кодь инькаö, оз явуйт... И поткöтчыны ог пыксьы. Только сёйышта. И тэ лок пуксьы мекöт.

— Некытшöм аппетит абу. Кöбы мыйкö...

— Эн ни касьтывлы мыйкöтö, — шуис Матвейко да ыш ловзисис. — Меным уразнöй турун öнi пöжлöны. Юан, подись?

Аминь нюмыртiс öмсö да нырсö, и сiдз ни чукыра да кöсыник чужöмыс лоис эшö нёштöмжык.

— Сэк этöн орсышт, кöд коста сёя. — Матвейко сюйыштiс соседыс киö Рубиклiсь кубик. — Быдöс зелёнöйесö кер öтлаö.

Минута-мöд бöртi Матвейколöн сёйсис, а Аминьлöн орссис, и сiя радуйтчö:

— Кужи эд, сотана, видзöт!

— Сэкыт гажа лун тэныт петас — сiдз инькаö шуö... Но, чапликтам инö, тшöктан поткöтчыны дак.

Петiсö керкуись, черрез — пельпон вылö и тупа-топа — садиклань. Но чожа мыйись нiйö сувтöтiс öддьöн ни мышкыра старуха, кöда бедь бердас только и öшшö:

— Тiйö кытчö нö, кагаэз?

— Поткöтчыны тай мöдам.

— Тэ мый, Матвеюшко! Талун тёшшаытлöн кулан лун, а тэ черöн öвтчыны — синнэсö керавны сылiсь? Пыр, кага, касьтiсьны. Поткöтчöмыт не тури, саридзö оз уттьöвт.

И Аминь сiйö жö:

— Сiдз и эм эд, Матвейко... Лок касьтылыштам, а сэсся — видзöтам.

— Колö, дак мый нö? Ме мортыс вежöра.

И мышкыра баб иньдöтiс нiйö бедьнас, дзик рамыник тпрутюэзöс, касьтiсян пызан дорö.

Матвейколöн тёшша бур морт вöлöм, а бурсö и касьтылöны бура: эта дорын мужиккет джын лунсö путшöтiсö. Вöлись, дрин-дрин пöтöсь да чиж-важ гажöсь, иньдöтчисö гортаныс.

И сэтöн Аминьлö тöдвылас усис юкмöс, кöдö тöн эшö тшöктiс писькöтны иньыс.

— Матвейко, тэ мун бодрит, а ме, батя, юкмöс кера.

— Весь дзуртан, зонка — висьталiс Матвейко. — Асъяпон ачым кери — быдса йöрдан. Лок видзöт...

Лэдзчисö ю дорö, стекло кодь волькыт йы вылö кайисö, сё кыв ньылат баитiсö:

— Декаб, видзöт, тронгö ни, а лымыс — чели-пели, — шуö Матвейко, — Налимсö вач паздасö юсис.

— А вот тöвся Ёгорейыс локтас и лым вайöтас. Баитöны тай: Катерина ольсасьö, Ёгорейыс водö... Ноко кытöн йöрданыт? — сибöтчис юкмöс дынас Аминь да чикыртiс синсö. — Эта я мый я? Да сiйö öнджанат тупкалан... кеписьнат.

— Ноко тэ гудйöвт видзöтаннэтö перво...

— И гуддисьны нем, — шуис Аминь да чапкис юр вывсис шапкасö юкмöсас. Кöч кучикись шапка шлеп пуксис юкмöс шöрас и чуть не быдсöн сайöвтiс васö.

— Тэ!.. Тэ мый керан? — лöгасис Матвейко. — Судзöт сэрпöсьтö... А то...

— Мый — а то?

— Мый? Пельтö орöта!

Аминь мыгöрнас ыджытжык соседысся и сiйöн дозыляйтö:

— Перво быдмы ме сувда и вöлись пондыв.

— А кыдзи быдмытöг? — лöгасис Матвейко да — чер бердö. — А кыдзи этöнка судзöтча?! А?! Вомантö — кок, асьтö — бульк! Сымда и олан.

Аминь сiдз повзис, что кынöмас кизертiс. Сiя окньöвтчис бöрлань, кышасис кокнас йыторö, усис да и Матвейкосö пöрöтiс.

— Дак тэ сiдз?! — лöгсяняс кижгö Матвейко. — Ме тэнö ёртöн шуа... касьтiсьны пыртлi, а тэ... а тэ... — и чернас ковс да ковс йы кузяс!..

Сэтчö локтiс юкмöс дорас иньыс вала.

— Тэ мый татöн гомозитчан? — юалiс сiя. А кöр казялiс юкмöссис шапкасö, кöин моз унньöвтiс: — А кытöн нö Аминьыт?

— Этчинкана, — Матвейко мыччалiс чер оропнас юкмöсас.

— Эн бызды, быздыль!.. Али былись?..

— А тэ кыдз думайтiн? Мекöт эн кутчы, кöть тэ и Аминь!.. Ме — гып! — Матвейко желльыштiс кисис черсö йы бердас, — и покойник!

— Тэ ума али бöбöв?

— Матвейко жöдзис-керис да юалiс:

— Ме — бöбöв?.. А ванювтсö эн на сёйлы?

Оськöвтiс иньыс дынö, кутiс ведрасö. Матвейика шентiс ведраа коромысласö, уськöтчис фермалань, кытöн эмöсь йöзыс.

— Отир! Беда шогмис!..

Юкмöс дорö котöртiсö мужиккез: кöрталiсö Матвейколiсь киэсö да йöртiсö порсь ящикö, а асьныс — кин багорöн, кин пешняöн — чукöртчисö йы вылö, медбы кыскыны ваö кундöм Аминьöс.

Шуксьö отирыс шуч тыдалан йы вылын, нёджжалö ва увтiсь галясö, чувйö багорöн юкмöс пыдöссö.

Локтiс участковöй — ештöма кинкö звонитны ни! — да тожö пидзöс вылас сувтiс, кытöн мужик кыскасьö. Сувтiс да сэк жö бокö керсис: ордчöн мужикыскöт чушыктыны немöн — сы дынiсь путриктö, топ самогон дозiсь, нёштöм дук.

— Мун дынсим, дядя, нето кольмöтан менö, — видчö участковöй.

— Ачыт мун, — пиньгö кодыс. — Эстöн менам налиммес!

— Кытшöм налиммез, тэ мый?!

— Кинöс нö кошшат?

— Мортöс кошшам — Аминь вöйöма.

Участковöй бокись мужик сувтiс кок йылас, öмсö нюмыртiс:

— Эн издевайтчы морттэс вылын!.. Вежöртiн? То ме — Аминьыс.... Гажа лун менам талун, дак мыйлö — ваас? Вежöртiн?

Лэбтiсис и участковöй, видзöтöв-керис Аминь вылö, висьталiс:

— Луныс-то гажа... Тэ былись — Аминь?

— А кин нö?! Не Матвейко жö!

— Луныс-то гажа, — бöра шуис участковöй. — Видзöтам, кытшöм тэнат рытыс лоас. — Адззы-ко шапкатö да пуксьы менам машинаö, а ме ёрттö вайöта.

Аминьлöн öмыс пиньöвтчис, бытьтö ан кузяс сетiсö...

А, может, и гыркыс бöра кизермис, охота баддез коласö котöртны...

МЫЛЯ?

(Иньва, 1992)

Арся ойезö, кöр туриэз мунöны саридзö, ме вöтасьла невежöртана вöт: ме, бордтöмыс, из сьöкытаыс, кай моз лэбала му вевдöрöт и нельки кривза.

Коми примета шуö: лэбалан вöтын — быдман. Но ме важын ни, кыдз баитöны, быдма увланьö.

Кöр сайма, дыр думайта, мый этö лоö, мыля лэбала. Может, быль, кыдз баитлiс кöркö пöрись бабö, меын пизьö турилöн вир, сiдз кыдз миян увтырным петöма пö тури кольтись? Может, былись меын олö кайлöн кытшöмкö ген, кöдö оз вермы ланьтöтны нельки миллионгодся мортлöн природаыс?

Лэбала ме дыркодьöн, ылына, но некыдз ог вермы лэбтiсьны сы вылына, медбы лэбзикам не кышасьны яг йылö, кöда сайын, кыдз кажитчö вöтасикам, и эм саридзыс.

И ме бöра думайта: мый этö лоö, мыля ог вермы лэбтiсьны кымöр увтöдз? Может, оз лэдз гортö, кытöн — зоннэз да внуккез? Али видзö муыс, кöдаын куйлöны айö-мамö да дедö-бабö?

Кин сiйö тöдас, кин тöдас...

ПОБЕДА ЛУНÖ

(Иньва, 1992)

Уськöта тöдвылö том кадöс, и пöдтö лов: кытшöм зонкаэз, кытшöм нывкаэз вöлiсö посаданым, кöдна мунiсö олан пырйöт ме одзын, и асланыс уджöн, асланыс гажöн велöтiсö менö не мугны, не тöждiсьны, а эшö — керны горт понда кыдз позьö буржыка, мичажыка, унажык.

И вот нiя — Пашкаэз, Марусяэз, Алёшаэз, Митяэз — эз лоö.

Нiя куйлöны кытöнкö Волга дорын, Москва сайын, Берлинын, Китайын.

Нiя оз вундö, оз керö керкуэз, оз гажöтö хромкаэзöн да частушкаэзöн рытся посаднымöс, оз тыдалö лунся уджын, но ме прокод нiйö адзза одзсим и сё бы вöта нiйö уджнам, гажнам, горт понда тöждöмнам — и лов пöдö ыджыт долытсянь, мича югытсянь: кöбы не нiя — Пашаэс, Марусяэс, Алёшаэс, Митяэс, — дак эз бы вöв талуння мичлуныс не менам, не гортöлöн.

Касьтыла ме том кадöс, и пöдтö лов, пот мунö, дзик зонкалöн, пöрись сьöлöмö.

ЮСИНЬÖЙ

(Иньва, 1992)

Усьö кокнитик лымок. Руыс чöскыт, лолассьö моростыр, и сьöлöм вылын долытся-долыт.

Ме видзчися автобус да пель джыннам кывза старухаэзлiсь, кöдна пукалöны ордчöн, неперыт басни. Нылöн öмныс оз и тупкассьыв, бытьтö тöвбыт ни абу пантасьлöмась, кöть и олöны öтiк деревняын.

— Тöн зонö вовлiс, — юöртö Петруника, шынь-серöма инька.

— Кöда нö? — юалö Анки. — Лэбалiсьыт али уялiсьыт?

Анкилö семьдесят ни, а сё чатыра юра и кымöс вылас чочком-чочком читкыллез — не дзорöсь, а сё сэтшöмöсь, кытшöмöсь вöлiсö кöркö, томувьяс.

— Ванюö мыччасис, лётчикö, — шуö Петруника. — Вöлöма Сирияын, вайис апельсиннэз. Кежав öмтö чöскöтны, нiя пö дышсö чинтöны, — сералö инькаыт. — Вот сёя кило-мöд, чожсяла да вились бригадиравны кутча.

— Мöдiк орден шедтан бы? Кöть тэ тонна сёй — он ни томмы, — норöн горöтчис Анки да сьöкыта ловзисис. — Ме апельсинсö Будапештiсь вайлi, кöр армиясис петi. Джын родняö торокöн пешлiс и öтiк öмись шуис: «Не калиг, не сёртни...» И ме ог радейт сiйö. Вот узюм — ммм! — кывтö ньылыштан. Будапештас жö мадьяр вердiс менö...

— Мигнитiн разь сылö? — рызйö Петруника. — Эн тай нö висьтавлы, кöть подругаöн шусин.

— Быдöс разь висьтасян, мый вöлi? — кокнита вöрзьöтчыштiс местасис Анки. — Не мигнитi, а сiя, мадьярыс, кинас макнитiс, и ме чеччöвтi сы дынö... — Анки бöра сьöкыта ловзисис, öмсис чепöссис чочком парок. — Ме сэк ранитöм солдаттэзöс кольлалi, и пос кузяс вачкис мина. Миянiссес понтон вылас кольччисö, а сiя, пленнöйыс, ваас усис, пöв кинас тульöтчö... Чöвтi сумкаöс, сапоггезöс чапкалi да и чеччöвтi...

― Ой-ёй! Бöбöв тай вöлöмыт! — оз ошкы подругасö Петруника. —

А кыдз бы вöйин? Сэки мый?..

Эта вылö Анки шы оз сет, одзлань висьтасьö:

— Нуöтi нiйö лазаретö да коли... Месяц бöртi менö командир корö, шуö: «Санитарка Чивизгина, тэныт козин вайисö.»

Видзöта: одзам мужик сулалö, шувлö: «Купорсь, хотанг, купорсь!» — и джоджöдз мышкырасьö. Копрася пö, юсиньöй, копрася. И корзинатыр узюм сувтöтiс, пельпон вылам чышьян пуктiс...

— Тэ юсь кодь и вöлiн... Чивылёк-чавылёк...

Локтiс автобус, и мийö пондiм пуксьыны. Автобуслöн поспуыс вылынöв, кок сыви оз и лэбтiсь, и старухаэс кайöны жагöна, ружтöмöн, а кондуктор карзö ны юр весьтын:

— Вöрöтчö, вöрöтчö, кокораэз! Кытшöм куль тiянöс новйöтö?! Кокораэз...

А менам син одзын сулалö солдатскöй паськöма, югыт вира нывка — чатыра юсиньöй.

Дата добавления: 2015-11-16