Правдаыс öтiк

Пызан вылын трингыштiс телефон. Аида Власовна кватитiс трубкасö, лöгöнмоз, сё эшö книга лыддьöтiкö шуис:

— Этö школа, да... Но, но, кывза... Бур, мм. Умöля кывзiс сiя телефонсö, сё эшö книгаись геройескöт олiс, но баитiсьыс, тыдалö, висьталiс сэтшöмö, что Аида Власовналöн сразу чужöмыс гöрдöтiс.

— Он лок?! — чирöстöмöн моз юалiс сiя. — Этö мыля?.. Шогалан? А кин пондас отчётсö керны? Поди, завучсö тшöктан? Ме не шондi, быдöннысö ог вермы шонтны. Вот сiдз. Давай лок, — прикажитiс Аида Власовна и чапкис трубкасö аппарат вылö.

Телефоныс нёштöма, дзик вачкам пон, жекöстiс. Айда Власовна пуджыштiс малина рöма кофта соссэсö, лöсьöтыштiс юр вывсис руд, топ бабапель, пушитчöм шапочкасö. Блед чужöмыс лоис эшö лöгжык. Синнэс гудыраöсь, дзик неважын чужöм кагалöн, и ровно нем оз адззö. Но вот сiя вöрзьöтчис, мутш-мутш керис чуннезнас, и синнэс ловзисö.

Бура, тыдалö, лöгöтiсö мортсö, места эз понды адззыны. Чеччис небыт директорскöй креслоись, öдззис кокнита быркьявны-котрасьны öтмöдöрö, дзуркöтны виль сапожоккезнас да курччавны гыжжесö.

Ох, сьöкыт тэ, Мономахлöн шапка! Гуляйтö кытöнкö директорыс областьын, а завуч и ассис, и сылiсь уджсö кер. Рыт ни то, чожа сизим час лоас, а сiя эз на школаись петав.

Эз вöв Айда Власовна этшöм лöг да желля учöтсянь, эз. Чужис, кыдз и быдöс здоровöй челядьыс, бур мортöн, и видзисö гортас бура, сетiсö школаö — сэтчин тшыкöтiсö кагасö. Этадз Аидалöн мамыс баитiс, этадз и ачыс нывкаыс думайтлiс.

Öнi Аида Власовна Сырчикова ачыс мам ни, ачыс школаын уджалö — завуч. Кöть и том эшö — институт бöрсянь нёльöдз тöв уджалö, — но руководитель ни, командир. Бур кылыс эта — командир! Шоныт и долыт Сырчиковалö эта кывсянь. Радейтö сiя ассис должностьсö сiдз жö бура, кыдз и асьсö. И лыддьö, что как раз эта должность понда чужöма. И гора голосыс, и чож кылыс, и лöгыс — быдöс эта колö завучлö. Завуч — начальник.

Стук-бряк оссис форточка. Аида Власовна дрöгнитiс, сувтчис, пондiс дзарьясьны. Öнi вöлись казялiс, что нимтöм чуньсис гыжсö вирöдз курччалöма.

Ох-ох, нерввез, нерввез! Нач личалöмась, нач дзугсьöмась. Мыля нiя оз дзугсьö, кöр ковсьö уджавны вот сэтшöм асныррезкöт, кыдз Марья Львовна! То тай гортас бы пукалö, шонытiнас, собраннё вылö оз лок бы. Дышыс, натьтö, нырыштiс, а шогöт вылö ыстiсьö. Да эшö сюйлö юрсö, кытчö оз ков, указывайтö — мöдпырся пö лучше чукöртчыны, а не талун, этшöм умöль погоддяас.

Оссьöм форточкаö чепöссис лёк тöв, койыштiс уль лымöн Аида Власовна чужöмö, соралiс сылiсь думаэсö.

— Фу тэ, срамина, — чушнитiс сiя лöгувьяс да чеччöвтiс стул вылö, медбы игнавны форточкасö. Игналiс, нёджжöвтiс öтöрас, кытöн öвтсис столб бердö öшöтöм электролампа, да и синнэсö эз вермы бергöтны мöдöрö.

Öшын саяс кöвьясис, дзик мельница пытшкын изiкö, чочком бус. Арттöм тöв гардiс лымсö, бытьтö павйöтiс лён содззез. Лымыс чавкйис öшын кузя, но Аида Власовналö кажитчис, что сiя вартö сы сьöлöм кузя и керö сылö зубыт.

Этшöм погоддяыс, шуöны, маитö мортсö, медодз, конечно, пöриссесö. Да и томмеслö, тыдалö, абу сысянь чöскыт. Не эта погоддясянь я чепсасьö Аида Власовналöн сьöлöмыс — готов мороссис чеччöвтны? Лэдзчис джоджö, пуксис книга сайö.

Коридорын öдззис сьывны звонок, и сразу жö пондiс кывны ёркöтöм, котрасьöм, сералöм. Этö челядь мезмисö классэзiсь и тэрмасьöны мунны гортаныс. Чу, и велöтiссез чукöртчöны учительскöйö — кöда урок вывсянь, кöда гортсяняс. Чожа позяс пондöтны собраннёсö.

Завуч дынö пырис Роман Матвеевич, кузь мыгöра, но вöснит морт, дзик вугыршать. Бур морт, ровно бы, сiя, да кык кöра, дзик неважын вильдöм ырöш. Роман Матвеевичöс сiдз шуис техничка Марина: сiя пö тэ дырни тэ дор баитö, а тэтöг — тэнö кулитö.

— Аида Власовна, — эшö порог дорсянь пондiс баитны Роман Матвеевич, — меным колö баитчыны тiянкöт кыдз завучкöт.

— Давай чожажык, — поперегалiс сiйö завуч. — Эн разь вермы одзжык вовлыны?

— Дак вот, ме кера талун доклад. Ошка Лихоношеваöс да Марья Львовнаöс...

— А сiйö мый понда? Сы понда, мыля кужö лыддисьны да указывайтны? — лэбтiсис видчыны завуч. — То расписаннё не сы сьöртi, то челядьсö пö мийö не сiдз велöтам... Оз ков сiйö ошкыны.

— А эд сiя, пожалуй, медбур классрук школаас. И сы предмет сьöртi челядьыс уна тöдöны.

— Челядьыс бурöсь, дак и велöтiсьыс бур, — орöтiс баснисö Аида Власовна. Но мöдыс эз кывзы сiйö, ассис баитiс:

— Дасöт год ни ме татöн, и сiя прокод этадз уджалiс. Медаль сы понда сетлiсö.

— Тэ кылiн, мый висьталiсö? — чеччöвтiс местасис завуч.

— Дак не ошкыны, сiдзкö?

— Да, да — оз ков ошкыны, — спокойнöйжыка ни висьталiс Аида Власовна. — И эшö вот мый, Роман Матвеевич: профсоюзат некытшöм порядок абу.

— Кыдз жö абу? — паськöтiс синнэсö Роман Матвеевич. — Ме кыдз месткомись председатель...

— А ме кыдз союз райкомлöн член шуа: да, абу! — бöра лöгасис завуч. — Собраннёэз вылö быдöнныс оз вовлö, быднёж нарушайтöны устав, а тэ шы он сет. Дак вот, кин талун оз лок, öктамö местком да накажитам нiйö.

— Но, öтпырисьыс понда огö жö... Тiйö тай тожö не пыр овлат.

— Эшö öтпыр висьтала: ме райкомлöн член и тэ одзын ог понды правдайтчыны. Кер кыдз тшöктöны.

* * *

Марья Львовна Буртанова куимöт десяток ни тыртö школаын. Да не кыдз шедас уджалö, не сiдз, что урок чулалiс — и ладно, а быдсöн асьсö уджас пуктö, не вынсö, не кадсö оз жалейт. Может, мый и гортас, семьяыс понда, оз ешты керлы, но школаыс понда пыр ештö. Эта кузя сiйö быдöс посадыс радейтö: дзор стариккез сыкöт пантасикö шапка босьтöны, инькаэз сой туйö пуктöны, а том отир понда сiя — дзик добрöй, но строгöй мам. Овлö, мукöд мортсö и юрси паныт малалö, курыта тöритö, а некин сы вылö оз обижайтчы.

Буртанова — мортыс веськыт: мый адззö, сiйö и баитö. Эшö институтын велöтчикö нывка босьтiс сэтшöм правило: прокод правда баитны, кытшöм бы сола сiя эз вöв, и овны совесть сьöртi. Совесть — вот мортлöн закон.

Пöрисьмыштiс ни, чужöмсö везъялiсö ни поснитик чукыррез, но сьöд синнэс сё одззамоз югьялöны-дзардöны, эз на ныжмö. И киэс сё важмоз чожöсь, быдöс кужöны керны: весöтчыны, стряпайтны, öктыны тшак-ягöд, лöга ниртны нятьöсь посöдз и нежнöя, ласкова малыштны челядьлiсь юрок, лапкöтыштны спина. А вот косыс да коккес висьлöны. То и тöн ны кузя собраннё вылö эз ветлы, и талун öдва ляшмасьö. Öтöрас ой тöв летö-вотö, тыртö туйез, йöррез гöгöр столаэз чукöртö, чочком паськöмö каттьö керкуэз, пуэз, зороддэз. Эта падераыс и висьöтö Марья Львовнаöс. Лёк ойтöв кыскö кок гумасö, йирöмöн йирö коссö. Крепитчö беднöйка, оз бы сетчы шогöтыслö, а сiя некыдз оз мездiсь мортыс бердiсь. Мыйсö только эз кер: и пым пöимнас зыртiс, и висян местаэзас дзирыт кирпич пуктылiс, и гормöга трепичöн шонтiс — некытшöм лич эз лэдз.

Оз туй öнi Марья Львовналö шогавны, некыдз оз туй. Некöр, недосуг. Уна эшö сылöн кертöмыс, а етша ни кольччö овны. Видзöтан кö, и пöрисьман, рапман — пенсия вылö мунан, а пенсионерыс — идзасовöй плеть. Не, оз туй шогавны.

Сiдз и решитiс Марья Львовна — некöр гор вылын боккез пöжны, колö тэрмасьны овны. И сразу, ровно бы, долытжык лоис. А лоис кокнитжык — иньдöтчис не больницаö, а школаö.

Учительскöйын, кыдз и прокод, кошшöны картаэз да таблицаэз, сярöтöны счётыэзöн, банкаэзöн, шовкöтöны пызан да шкаф ыбöсоккезöн, орсöны шахматтэзöн.

Эз на ешты чöвтчыны Буртанова, а сы дынö сибöтчисö ни том велöтiссез.

— Марья Львовна,— кеймисьö öтiк, — отсалö меным картина бöрйыны.

— Ме талун челядьсö тöдсöта кухняись предметтэзöн, — баитö мöдiк. — Дак лöсялö я ухват дынö этшöм загадка: тöд жö, тöд, бöжыс чочком, юрыс сьöд?

— Лöсялö, öддьöн лöсялö, — шуö куимöт. — Тöд жö менчим загадкаöс, тöд: синкымыс чочком, а юрыс гöрд — кин эта?

— Ме тöда — первöй бö-ись учительница, — сералö Манькин. — А вот загадка: кутас вöрисьыс куим надоедливöй ведьмаöс, сюйыштас котёлö, ведра сов пуктас да сутки пуас. Пешлас — некытшöм кöр абу. Содтас гормöг, эшö сутки пизьöтас, но бöра нем оз пет. Содтас öмег [* öмег — курыт, яд сора турун] да эшö сутки пöжас — и бöра нем оз пет. Лöгасяс, чурс сьöвзяс котёлас да пöрöтас пуöм ведьмаэсö, а сэтiсь петас... Кин петас, а?

— Лешачихаыс...

— Баба-яга...

— Одö тöдö, дак висьтала ни, — шуö Манькин да ыш ловзисьöмöн содтö: — Инька петас, Аида Власовналöн бабыс...

Сералiсö-керисö минутаджын и лöньсисö, каждöйыс ассис дело керö. Марья Львовна медперво босьтiс журнал. Тöн физик контрольнöй сьöртi отметкаэз тэчöма. Видзöтiс нiйö классрук и радмис: бура контрольнöйсö керöмась. Медöддьöнсö радмис Коля понда, школаын, кыдз эшö мöйму быдöнныс шуисö, медбöб велöтчись понда.

Коля кыкьямысöт классас мöдiк год ни пукалö. Зонкаыс мывкыда, статя, но дышöв, оз любит гортас гижны да решайтны. Зато радейтö спорт, радейтö удж. Ветлiсö таво картов гарйыны, дак Коля сьöрö некин оз вермы уджнас вöтчыны. Ачыс чожа уджалiс да и мöдiккезöс тэрмöтiс. Марья Львовна ошкывлiс сiйö удж понда, но часто тöчитлiс умöля велöтчöм понда, стыдитлiс нятьöсьтöм паськöм понда. Уна сiя, не етшажык Коля мамся, натьтö, баитлiс бöбкулькöт сы олан йылiсь, сё бы мортö пöртiс.

— Тэ бура верман велöтчыны, Коля, — шуас Марья Львовна. — Юрыт тэнат мывкыда,

— Ог эд тöд, — шыннялö Коля. — Аида Власовна ме йылiсь унажык тöдö: бöбöв пö ме.

— Лöгувья, натьтö, кöркö öмсис петiс. Вунöтны колö сiйö.

— Мыйкö оз тай вунöтсьы да.

— Тэ вон кытшöм чож уджавнытö, стрась удав.

— А уджыс пö эд бöбсö любитö, — сё шыннялö зонкаыс.

— Давай эн ылöтчы, Коля. Уджыс мортсö зорöтö, олансö сылiсь бурсьöтö — ачыт сiйö тöдан. Тэнö аймамыт этадз мырсьöны-велöтöны, а тэ пыксян бы. Разь абу охота тэныт грамотнöйöн лоны? Али нарошно бы аймамтö нагорнитан?

Коля шы оз сет, только сьöкыта лолалö. Марья Львовна оз на тöд, мый бы сэтшöмсö висьтавны, мый керны, медбы адззыны туёк бöб зонка сьöлöмö. Учöтик, учöтик туёк бы! А сэсся и южтыны позяс сiйö — этö бура тöдö пöрись велöтiсьыс.

— Старостаöн мöдiмö пуктыны, а тэ...

Коля видзöтiс веськыта Марья Львовна синнэзö, дивуйтчöмöн юалiс:

— Менö? Менö — старостаöн? Да тiйö мый?

— Тэнö, Коля. Тэ спортсмен, тэ медыджыт, медвына. Как раз сэтшöм, кытшöмöн командирлö колö лоны. Челядьыс тэнö кывзасö.

— Öнi эд быдлаын нывкаэз командуйтöны.

— А тэ он бы? Кытшöм нö тэ зонка, ежели он бы ло командирöн?

— Командирöн — эта мöдiк дело, — пондiс соглашайтчыны зонка...

Öнi Коля — староста. Двойкаэз шоча-шоча овлöны. А пасьтасьö — дзим-дзурк.

Кöр Марья Львовна босьтiс журнал да лöсьöтчис мунны классö, учительскöйö пырис Роман Матвеевич, мыччис бумагатор.

— Босьтö, Марья Львовна, этö выпискасö и эдö шуö, что ме эг сетлы.

— Мый сiя?

— Выговор тöн гижим тiянлö.

— Выговор? Мый понда сiйö?

— Сэтöн гижöма, лыддьöтö. Меным некöр, колö мöд школаас котöртны.

Быдöнныс ни мунiсö учительскöйись, а Буртанова сулалiс порог дорас да мöдпырся ни лыддьöтiс выпискасö. Тöння нелоктöм понда — выговор... Быдöс вывтырсö бытьтö кöдзыт ваöн гывьялiсö. Обида кутiс: первуись собраннё вылын эз вöв — и выговор. А юалiсö я нiя, мыля мортыс эз вовлы? Али охота лоис сетны — и выговор?

Некöр эз öшлы, некöр эз мыдзлы, некöр эз дзугсьыв, а эстöн вот паймис, оз тöд, мый керны. Колö урок вылö мунны, а сiя стул вылö пуксис да пукалö... Выговор... Выговор!

Пукалiс сiя, нем эз кыв не эз адззы. Пеллезас сулалiс сэтшöм гам, бытьтö öшын увтас уöтiсö-уннялiсö тысяча телеграфнöй провод. Син одзас бырьялiс-вежмасис веж вуджöр, кöда овлö дурмöтан нюрын туримолялiкö.

— Тiян урок эдö, — кылiс Марья Львовна да вöлись садясис: сы одзын сулалiс Коля. — Тiйö шогалат? Ме фельдшерöс кора.

— Оз ков, Коля... Недолыт вöлi, да чулалiс ни, — кöсичаэсö ниртiкö шуис Марья Львовна. — На нöбöт журналсö да отметит, кин эз лок.

Староста мунiс, а Буртанова размöд ньылыштiс кöдзыт ва, недырик пукалыштiс куньöм синнэзöн — этадз сiя вашöтлiс юрö кайöм дурмансö да лöньсьöтлiс чепсасян сьöлöмсö. Но сьöлöмыс сёравно нет-нет да и зубыта шардылiс и лöньсис вöлись сэк, кöр сiя пырис классö да здоровайтчис гажтöма сулалiсь челядькöт. Сразу тöдчö, что Коля ештöма висьтавны Марья Львовна висян йылiсь.

— Но, мича ныввез да удав зоннэз, пондамö висьтасьны Чацкийлiсь монолог, — гажöна пондöтiс уроксö Марья Львовна. — Может, кинкö эз ешты велöтны?

Класс вöрзьöтчис, шаркнитiсö коккез, дзуртыштiсö партаэз. Медбöрья рядын лэбис ки.

— Баит, Вася, — тшöктiс велöтiсь, и зонка чеччис. Перво сiя малыштiс кавтыксö, сэсся сы öмись петiсö кижган шыэз:

— Жхы кху жхоö...

Тридцать юр бергöтчисö сылань, тридцать öм оссисö эта адззывлытöм диво вылö: Вася Горинлöн, солистлöн, баритоныс тшыксьöма!

— Мый тэкöт, Вася? — повзьыштiс Марья Львовна да мунiс бöрись партаэз дынö. — Ме нем ог вежöрт.

— Позьö, Марья Львовна, меным? — корсис староста и сэк жö шуис: — Сiя тамильскöй кыв вылын часöт баитiс, но ме вежöртi, мый висьталiс: кылö пö зубыт, горшö висьö.

— Ох, горюшко менам! — клоп вачкис бокас Марья Львовна. — Сiдз и тöд — лым сёйис нето юкмöсiсь ва юис.

— Не лым сёйис, а асшогмöм мороженöй, кöдö шуöны йыжоль,— висьталiс Коля.

— Вот, вот, — гогыш керис юрнас Марья Львовна да висьталiс Васялö: — Марш часöт жö больницаö! И тэрмав веськавны — шогавны некöр.

Вася öктiс книгаэз да тетраддез, кок чунь вылас петiс классiсь. Гора, вöснитик голосок кольлалiс сiйö кыввезöн:

В той комнате незначущая встреча...

* * *

Мирыс тырöма аскоддя берсянас. Отирын мийö адззам уна бур морттэзöс, кыдз вермам пантавны эшö и неетша умöльсö. Эмöсь сэтшöм юррез, кöдна оз вермö овны кинöскö дойдытöг, кинöскö досадиттöг. Нылöн сiдз и лудö кывныс, нiя сiйö и кошшöны, медбы желлявны кинлiськö сьöлöмсö, керны сылö шог. Этö сэтшöммес йылiсь и шуöны — деманыс сiйö чувйö.

Аида Власовна как раз ны коласiсь и вöлöма. Кöр сiя тöдiс, что Буртанова весись сетöм выговор понда норасьöма профсоюз райкомö, сылöн лöгсяняс синнэс пемдiсö. «Эшö тай норасьö! — ымйöвтiс гырксö, кыдз горби, ыджыт лёк дума. — Да кыдз сiя лысьтö местком вылö да завуч вылö вувтны?! Ужо, рамта ме сiйö — шёлковöй лоас!»

Сырчикова асьсö школаас пуктiс мадыджытöн, думайтiс и веритiс, что сiя керö быдöс правильнöя. Сылöн аслас логика: морт, кöдалö дипломсö сетiс учительскöй институт, некöр оз вермы тöдны унажык мортся, кöда велöтчис пединститутын. И сыкöт, кöда сысся етшажык бырöтiс паськöмсö парта сайын, сiя баитiс кыдз ыджыт морт челядькöт.

Лун-мöд новйöтiс да зорöтiс Сырчикова ассис лёк думаэсö тымусас да вöлись мунiс районö. Кин дын сiя сэтчин вöлi, кинлiсь босьтiс советтэз, кинкöт баитчис-керсис — некин оз тöд. Только пятница асылö — кокнит лунö — Сырчикова кабинетö пырис районоись инспектор Фаина Ниловна Пышкаева. Сiя вöлi не том, не пöрись — челядя ни, но эшö нывка, мича чужöма да визыв басниа. Но мичыс сылöн, кыдз важ тöлiсьлöн, кöдзыт, а басниыс — ёгья сю кодь: мыгöрыс быдса ворох, а кöр тöлöтан, дак сöстöмыс содз етш абу.

Кытчöдз эз на лок Марья Львовна, Фаина Ниловна кыскис Буртанова пызанiсь планнэз да тетраддез, письмоэз. Сортi-костi видзöтiс нiйö, мыйкö гижыштiс блокнотö. Öтiк тетрадь коласiсь адззис гижöток, лыддьöтiс, гогышалыштiс юрнас, пуктiс гижöтоксö сумкаокас.

Локтiс Марья Львовна, казялiс аслас местаись Пышкаеваöс и быдöс вежöртiс: этö локтiсö проверитны жалоба. «Но мыля инспектор? — думыш керис сiя и овсис: — Ась кöть кин, мед только правдасö адззас... А мыйлö бы юасьтöг вöрöтны йöз письмоэсö?»

— Этö ме эд, тыдалö, юртöм петух, сэтчö коли, — горöтчис Марья Львовна да босьтiс инспекторыс одзись письмоэсö.

— Нiйö ме видзöтi, — шуис Пышкаева.

— Интереснöя гижöны? — юалiс Марья Львовна. — Велöтi кöркö нiйö. Мукöдыс дзормöны ни, натьтö, а сё советуйтчöны мекöт, сё юасьöны, кыдз да мый.

— Мыччалö меным талуння планнэз, — корис инспектор. — Ме муна тiян уроккез вылö.

— Локтö, локтö, — корис Марья Львовна кыз тетрадь мыччикö.

Директор кабинетiсь петiс Роман Матвеевич, перыта, кыввесö джендöтлöмöн, висьталiс:

— Талун рытнас квать часö чукöртчö местком. Локны старшöй классэзiсь быдöс учителлезлö.

...Месткомлöн заседаннё перво мунiс перыта, волькыта, дзик шпаргалка сьöртi нето бура чулöтöм репетиция бöрын: отир баитiсö кортöг, а эз пыксьö, кыдз вöвлi одзжык. И быдыс, кин баитiс, Марья Львовна вылö талун эз видзöт. Нiя Буртанова уджись талун унажыксö гарйисö умöль ладорсö, лыддисö сылiсь ошибкаэз. Но сэтчö падмис заседаннёыс, дугдiс отирыс баитны, и сэк пызан одзö петiс инспектор. Сiя висьтасис Буртанова уроккез йылiсь, но нач мöднёж, нежели эта вотöдз баитiс Марья Львовналö. «Вот жö морт, — досадуйтiс Буртанова. — Ыджыт замечаннёэз, шуö, абуöсь, уроккез чулалiсö пö сiдз, кыдз ковсьö методика сьöртi, а öнi мый ыштö? Не инспектор, а кык дора коса».

— Литература урок мунiс не программа сьöртi: бöрйисö стиххесö не хрестоматияись, — тэрмасис инспектор. — Али тэ, Марья Львовна, он тöд программасö?

— Тöда, — шуис Буртанова. — Хрестоматияись стиххесö нем бöрйыны, ны йылiсь сэтöн жö и гижöма. А вот мöддэс йылiсь челядьыс оз тöдö.

Аида Власовна тарскöтыштiс авторучкаöн графин кузя, тшöктiс овсьыны Марья Львовнаöс, а инспекторöс — баитны одзлань.

— А öтiк велöтчись пондiс лыддьöтны стиххез, кöднö гижöма ачыс. Сы туйö, медбы дугдöтны зонкасö, Буртанова эшö ошкис. — Сэтöн инспектор кыскис сумкаоксис чышьянок да горöн весöтiс нырсö. Сэсся чышьяноксö пуктiс бöр и лэбтiс юр вевдöрас гижöток. — Быдöс ме видзчиси Буртановасянь, но этö... этö эг видзчись! Вот кывзö: «Маша, талун рытнас лок сэтчин жö. Понда видзчисьны. К». Эта лоö, что классрук класскöт оз уджав, оз падмöт вот этшöм, — Фаина Ниловна лег-лег керис гижöтокнас, — орсöмсö, а, тöдчö, потакайтö. И ежели сiдз лоас одзлань, ме авторитетнöя висьтала, что Машаыс пуксьöтас классрукыс öлöдзö пиянокöс. Эта разь не позор!.. Ме бы Марья Львовна местын, раз оз тырмы прок, мунi школасис...

Дыр баитiс-койис инспекторыс, и некин сiйö эз сувтöт, некин эз шу, что нарушайтсьö регламент. Кольмисö ни мукöдыс эта баснисянь, но сёжö видзöтiсö гöгрöсмöм, баралöм синнэзöн инспектор öмö, кöть и, натьтö, нем ни эз вежöртö — баитö начальник, а начальник ачыс тöдö, мымда колö баитны.

Марья Львовна сразу жö мöдiс висьтавны правдасö инспекторыслö, но этö керны сылöн эз тырмы мылаыс. Кытшöмкö лёк вын öтiк минутаö кöрталiс кикоксö, жилаэсö, тувдöтiс кывсö. Сэтчö жö бöра öдззисö мозжитны-висьны коскаэс, и юрас кайис жар, пыкис моросас. И енöвтчис Буртанова, шы эз сет.

Вöлись ачыс завучыс сувтiс, жагöника пондiс чапкавны кыввез:

— Фаина Ниловна висьталiс ни, кыдз уджалö Буртанова — умöля. Пыр ошкисö да ошö пöртiсö. Гордитчыны пондiс — ме не ме пö! Завучлö да директорлö указывайтö. А вермас я солдат велöтны генералöс? Вежöртны этö колö...

Эна лёк кыввес дзик чарла пиннезöн нуöтiсö Марья Львовна сьöлöм кузя. Дугдiсöжык ровно висьны коккес, но пондiс мидзöвтны сьöлöмыс — кыввес, тыдалö, не етшажык зубытсö вермöны керны. Сё терпитiс да видзчисис Марья Львовна, что вот кинкö сувтас и висьталас правдасö, но öтiк бöрсянь баитiс мöдiк, а некин сiйö эз дорйы, некин сылö эз мыччы бур кыв. «А может, былись менам быдöс умöль, а ме нем, дзик синтöм кутю, ог адззы? Может, пöрисьми ни да ылавлыны пондi?» — пырисö сы юрö нятьöсь думаоккез. И сэтчö шыасис правдаыс.

— Уськöтчисö öтiкыс вылö да вот и перкйöны, — кылiс гор дынсянь негора голос. — Гырйын ва масьтатö. Абутöмсö мортыс бердö каттятö... Ме воть ог верит — не сэтшöм Львовнаыс.

Этö баитiс Марина, кöда пырис ештöтны гор да сiдз и ендiс сэтчö.

— А тэ мыля эстöн? — дивуйтчöмöн горöтыштiс завуч. — Али он тöд ассит местатö?

— Ме-ту тöда, — сiдз жö негорöн шуис Марина, — не вöрын быдмим, не ошлö юрбитiм. А вот мукöдыс...

— Этö мый эшö! — пеллесви гöрдöтiс Аида Власовна. — Не я техничкаэс ни мöдöны указывайтны?

— Техничкаыслöн эд тожö и юр, и öм, и синнэз эмöсь. Мый синö адззö, сiйö и öмö горöтчö... Извиняйтö, — висьталiс Марина да не тэрмасьöмöн петiс ыбöс сайö.

Чеччис Манькин, шытöг петiс председательскöй пызан дынö, бергöтчис бöрöн завучлань, лэбтiс кык чунь коласö жмитöм гижöток.

— Этö меным öнтай сетiсö Аида Власовнасянь. Ыжданас сэтшöм жö, кытшöмöн мыччасис миян дона инспектор, а вежöртаснас... Но кывзö, мый сэтöн гижöма. «Манькин, висьтась, кыдз М. Л. понжуг понда лэбтiс ыджыт шум да чуть эз гыжьяв менчим синнэзöс. Долгын ог ло — мöдпырся отсала». Интересно эд петö, а?

— Манькиныс талун бöра код, — чепöссис завуч. — Ме предлагайта: не сетны сылö баитны, ась мунас узьны.

— Тшöктiн баитны, дак кывзы, — спокойнöя шуис Манькин. — Только не тэ сьöртöт талун висьтала, зато — правда.

— Тэнат правдаыт винаöн боссьöма, — сё бы паджö завуч. — Председатель, мый видзöтан? Иньдöтны сiйö татiсь колö!

— Ась баитö...

— Кывзам давайте...

— Висьтась, висьтась чожажык, — баитiсö öтмöдöрсянь.

Чöлыштiс невна Манькин, малалыштiс кушмöм юрсö да пондiс баитны: — Юыштла ме, но совестьöс эг на ю. И талун абу код... Дак вот, Буртанова лэбтiс сэк шумсö не весь. Да и не сiя лэбтiс, а завуч...

Висьтасис этö Манькин, а Марья Львовналöн быдöс сiя картинаыс сiдз и паськалiс син одзас.

Аркмис эта мöймуся арö, зэра-нятя асылö. Кинкö вайöтöма школаас понпиянокöс, и челядьыс орсöтчöны сыкöт, оз тэрмасьö миссьöтны коккезнысö. Локтiс завуч, казялiс кычансö и тшöктiс Маринаöс, кöда кисьтлiс öррезö шоныт ва да отсалiс учöттэслö миссьöтны коккезнысö, чапкыны кычаноксö ограда сайö.

— Да мый сэтöн чапкыны, — висьталiс сэтчö локтöм кочегар. — Ме часöт сiйö дзимляла.

— И бура керан, — öдззöтiс сiйö завуч. — Ась оз паськöт шогöттэсö.

Чожа кочегар петкöтiс кыськö пишаль, зарядалiс сiйö. Кышалiс кычаноксö кок ныр вылас и чапкис йöр бердö. Эшö секунда — и кычанлöн чунь кузя оланок орис бы. Но сэтöн паныт кочегарлö сувтiсö кык морт: пистик ыжда нывкаок уськöтчис понпиян дын, а Марья Львовна кутiс пишальсö. А эта бöрын — учительскöйын содом. Лöзöттöдз лöгасис завуч, мыля эз пет сы моз, и леш-вош видiс нiйö, кин падмöтiс сылiсь делосö.

— Школа — абу пода карта, сiя — наукалöн храм, — чирзiс завуч, — и сякöй заразасö немлö татчö вайöтлыны!

Сiдз али не?

— Оз ков, — согласитчис Буртанова, — да оз жö позь керны сiдз, кыдз тiйö мöдiт. Да эшö челядьыс син одзын.

— Варваррезкöт баитöны варваррез моз...

— Этö кин варваррес? Челядьыс я мый я? Али поныс? Колö бы точнöйжыка баитны.

— Но и пыртлы да сюй тойöссесö пиат! — горöтiс завуч да петiкас сiдз вартiс ыбöснас, что шкаф вылiсь усис тупкалöн чучело...

Да, вöлi сэк шум-гам, вöлi сiдз. Этö быдöс адззылiс Манькин. И талун висьтасис сiдз, кыдз вöлi.

Кöркö эшö древньöй греккез, кöдна тожö любитлöмась споритны, аркмöтöмась поговорка: спорын чужö истина. А талуння спорись, кöда чулалö ни, Марья Львовна мыйкö эз адззы некытшöм истина. Неужто и öнi Аида Власовна пондас ас мознас дугасö кöстыны?

— Эм предложеннё, — пондiс баитны завуч. — Ежели Буртанова, дзик тöртöм мöс, оз лöсяв коллективкöт — ась мунö школасис. Эта сылö медкокнит наказаннё. Оз мун сiя — муна ме. Бöрйö: али ме, али сiя.

— Кытшöм позор! Кытшöм позор лоас, ежели мунас завуч! — гогинялiс юрнас Фаина Ниловна. — Этшöмыс эз на вöвлы...

— Ась мунö, — ятнöя, кöть и негорöн, шуис Манькин. — Миянлö оз колö сэтшöм генераллэс, кöдна, ровно кырнышшез, кокалöны ассиныс солдаттэзнысö. Буртанова жö морт справедливöй, велöтiсь опытнöй, воспитатель строгöй.

— Ах, вон тэ кыдзи пондiн горавны! — нюжвыла висьталiс Аида Власовна. — А вунöтiн, кыдз ме тэнö, шудтöм алкоголикöс, сайлалi, районын суськи?

— Öддьöн донöн меным сувтiс сiя сайлалöмыс: ёрттэзöс, кыдз Иуда, чуть эг вузав, — сiдз жö негорöн шуис Манькин. — Марья Львовнаöс нем понда наказывайтны. Накажитны колö сiйö, кин каттьö чераньвезöн честнöй отирöс — вот менам медбöрья кыв.

* * *

Ашынас Марья Львовна эз лок школаö: ойнас бöра пондiс поткöтны коскаэсö. Эз отсав не мазь, не пым утюг, не лекарствоэз. Ончир эз кер, кузьой маитчис, а юрсис эз и петав тöння собраннё. Стыд палитö рожасö, доймö сьöлöмыс сысянь, мыля сiйö, честнöй мортöс, нятьöсьтiсö, дзугисö сылiсь удж, дзугисö олансö. «Ме я эг старайтчы, ме я эг пукты быдöс вынöс, кужöмöс, ловöс эта уджö? И эта понда, менам бурö понда — менö жö видöны? Не только видöны, но и вашöтны мöдöны — вот кыдз! Вашöтны! Вашöтны? Нет! Мунны ме верма школасис, но вашöтны менö оз вермö. Оз, оз ло сiдз! Школатöг меным не овны. Школа — менам гаж, школа — менам шог, школа — менам олан».

Эна думаэзкöт и асыв локтiс, эна думаэзкöт и гор ештiс, энöн думаэзнас и кольлалiс зоннэсö школаö, а жöниксö — удж вылö. И ныкöт жö, эна думаэзкöт, кайис гор вылö да лöсьöтчис ланьтны.

Кинкö сяр-сяр керис ыбöсö. Хозяйка калькöтчис шоныт ольпась бердiсь — дзугис ассис долытсö — и лэдзчис улö да тшöктiс пырны локтiсьсö. Паськыта, чуть не ванйöв, оссис ыбöс, жырö уськöтчис коколя кöдзыт ру, вöлись пырис морт — Вася Горин, здоровайтчис.

— Тэ одз тай, Вася, ветлöтан, — шуис Марья Львовна да вештiс зонкаыслö стул. — Пуксьы да висьтась, кытшöм могöн...

— Мыся, отсавны, поди, мыйкö колö тiянлö, ― висьталiс Вася.

— Спасибо, Вася. Менам быдöс керöма ни. Не öтнам эд ола, — шуис Марья Львовна. — А висьтав-ко тэ, мыля пасьтöг ветлöтан? Важын я горшыт висис?

Вася мышкыртiс юрсö, шушкыштiс:

— Эг узь гортын да.

— Бöра код вöлi?

— Код. Вашöтiс быдöннымöс. Менчим гуняöс косявлiс.

— Мыля?

— Деньга ме босьтi мамö дынiсь. Мамöлiсь пыр сiя бöбöтлö да юö. А мийö сэсся тшыгьялам.

Синваэз пичкисисö Марья Львовналöн. Медбы не бöрдчыны, сiя тшöктiс пукыштны зонкасö, а ачыс ветлiс мöд жырас и вайис сэтчинiсь фуфайка да сетiс Васялö.

— Новйы, миян весь куйлö.

Вася шытöг босьтiс фуфайкасö, пасьталiс да петтöнняс ни юалiс:

— Дак сетны не сетны, Марья Львовна, мамöлö деньгасö?

— Вай меным, ме ачым тiянö ветла.

* * *

Öтöрас кöдзыт, дак шоныта пасьтасис Буртанова: коссö шальöн каттис, пась пасьталiс, аскерöм пимиэз кöмалiс, чисто öмсö каттис. И соседдэс бы сiйö, этшöм тупкасö, эзö тöдö, а союз райкомись председатель тöдiс вот. Тöдiс да и сьöрас, аслас кабинетö пыртiс, шоныт гор бокö пуксьöтiс, пым чай удiс.

— Кылi: кок йывсит пö усьöмыт, — баитö Илья Мардарович. — Мöдi гортат ни пыравны, кыдз, мыся, сэтчин, оз я ков отсавны, да, адззан, ачым пичик моз поикта, лёк яй пöдтö.

— То тай кытшöм честь меным вöлöма, — серöмтчыштiс Марья Львовна. — Ачыт не ачыт, а кöть бы Пышкаевасö бöра иньдылiн. А ежели бы ачыт школааным вовлiн — кыкпöвса польза бы вöлi: и ловья олансö бы адззылiн, и лёк госыт бы вöснямис.

— Адззан эд кыдз сiя овлö, — сьöкыта ловзисис Илья Мардарович, пöрччалiс пиджак киззесö, лэбтiс кыз кынöмсö. — Вот эд öтiк учителлез велöтiсö миянöс, а кытшöм неöткодьöсь öнi лоимö.

— Сiя и бур. Быдöнным кö öткодьöсь лоам, дак мый нö сэк?

Илья Мардарович бытьтö эз и кыв этö, баитiс ассис:

— А вермин бы тэ уджавны районын, ордчöн мекöт. Но асныритан, ва паныт бы сё мунан. Вот и сибдiн деревняат. Югытсö он адззывлы. Назём, нять, не столовöй, не парикмахерскöй.

— Назёмсö эд кинлöкö колö жö войны. Да и быдöнным огö тöрö городас, — шыннялöмöн баитiс Буртанова.

— Огö, ог кужö мийö овны, — ыш ловзисис Илья Мардарович. — Эд быдöс ни öнi тырмö, дак не, — сё мыйкö нырьясям, сё етшасям.

— Велöтö инö миянöс городыс моз овны.

— Велöтан тiян коддесö! Не завучöс, не инспекторöс од кывзö. Мöдiм образцовöйöн школанытö керны, а тiйö...

— Эта мöдiк ни басниыс. Некин эталö паныт оз мун.

— А висьтав-ко, Маша, мыйлö мийö видзамö завучсö?

— Челядь баснисö, Илья, нем баитны.

— А ежели каждöйыс завучыскöт тэ моз пондас пиньгыны, сэк мый петас? Анархия петас — вот мый! Вежöрт тэ сiйö, что миянлö некин эз сет право чапкасьны руководящöй кадррезöн. Завуччес йöр дорын оз валяйтчö. И мийö пондам берегитны, дорйыны нiйö.

— А миян кодьöмыс — такоскöй? Нiйö позьö вежны-панны, нiйö позьö леш-вош видны, да? А кыдзи од пондö миянöс жалейтны, дак кинöн жö мöдат руководитны?

— Вот тэкöт и баит, — паськöтiс киэсö Илья Мардарович. — Ме шуа — чочком, а сiя — сьöд пö!

— Чочкомыс эм чочком, а сьöдыс — сьöд. Вот тiйö силöй бы чочкомсö садат, да нем тiян оз пет. Правдаыс сiя чорыт, веськыт, оз куснясь; сiйö некытшöм пинь оз курччав, сiйö некытшöм ыджыт горшö он тöрöт!

— Вылына асьтö, Маша, лэбтан, да кыдз бы эн усь сэтчинсянь. Кытшöм правда йылiсь тэ баитан?

— Правдаыс öтiк только, — Буртанова пуктiс пызан вылö стакансö. — Спасибо тэныт чайыс понда.

— Тэ вот асьтö öнi правöн лыддян, и ме — тожо. Петö — тэнат аслат правда, менам — аслам.

— Кык правдаыс му вылас абу, — негорöн, но лöгöнмоз ни шуис Марья Львовна. — Тэ думайтан, что нiя — правдаэз, а ны коласiсь öтыс кривда, только правда личинаа.

— Кывзы, Маша, — гусьöнмоз, норöнкодь висьталiс Илья Мардарович. — Вунöтчö этö быдöс и миритчö. Мыйыс оз овлы, да чулалö тай. Тiйö кыкнанныт и правöсь, и виноватöсь. Но мый эшö тэныт оз тырмы: готовöй керкуын олан, би да пес весь сетöны тэныт. Удж абу сьöкыт, почётнöй.

Марья Львовна мымдакö чöлыштiс, сэсся кыйис киэсö морос весьтас, чикыра синнэзöн дзарнитiс Илья Мардарович синнэзö да шуис:

— Делоыс не даровöй песын и не почётнöй уджын. Да и не весь песыс дöнзьö... Правдасö да кривдасö, Илья, оз позь миритны — вот эд мый. Делоыс сыын — кыдз челядьсö велöтны, кытшöм отирö нiйö пöртны. Эта кузя мийö и споритамö.

— Значит, миритчыны он понды? — председатель петiс пызан сайись да сувтчис джодж шöрö. Тöдчис, что сiя невна öшис баснинас, оз тöд, мый öнi висьтавны, кытчö бергöтны баснисö. Марья Львовна адззис этö, но шы эз сет. Эз вöв сылöн охота пиннесö кеслыны, эз мöд сiя эстöн не дорйисьны, не винитны кинöскö — сылöн кöркöся ёртыс сёравно оз думайт отсавны Марья Львовналö.

— Кылi ме: чукöртöмыт пö ас гöгöрат томмесö, ускайтан нiйö завуч вылö, — жагöника пондöтiс Илья Мардарович виль басни. — Али тожö суськисьны пондан?

— Нiя асьныс вежöртöны, кинкöт нылö долытжык. Только некинöс ме ог ускайт — эн босьт сэтшöм грехсö ас вылат.

— Вежöрт тэ, Маша, что бунт вылö эта вачкисьö.

— Эта бöб басни. Эшö мый висьталан? — веськытжыка пуксис Марья Львовна и сувтöтiс синнэсö председатель вылö. А сiя вешшыштiс бöрлань, пыкöтасис кинас пызанпöв бердö, шуис:

— Висьтала öтiкö: дзугсин тэ, öштiн веськыт туйтö. Öтiклаын, мöдiклаын да и куимöтлаын неладносö керан. Пöрисьман, тыдалö.

— Но, бöра мöдiк да и куимöт! Мый эшö сэтшöмыс?

— Ачыт разь вунöтiн?

— Вунöтi, отсав тöдвылам уськöтны, — серöмсорöн горöтчис Буртанова.

— Тэ дорьян воррезöс. Позьö я сiйö керны велöтiсьлö?

Марья Львовна чеччис, мöдiс мыйкö горöтчыны паныт, но Илья Мардарович эз лэдз дзугны ассис баснисö. Тöдчис, что сылö часöт жö колö висьтавны мыйкö эшö, и висьтавны важнöйö, медбы этöн важнöйнас сразу чарöтны споритiсьсö.

— А кытшöм велöтiсь велöтö тышкасьны челядьсö? Разь бур воспитательлöн челядьыс шедлöны милицияö? Сэтшöмсö матö школа дынö оз ков лэдзны!..

Марья Львовналöн сайкалiс кикокыс. Сiя чеччис жагöника, оськöвтiс председательлань öтпыр, сэсся мöдпыр, гусьöн-гусьöн юалiс:

— Воррезöс, шуан, дорьян? Хулиганитны велöта? — веськöтiс коссö, сувтыштiс бокöнмоз Илья Мардарович одза, лэбтiс пельбоксис дзормöм пилим. Председатель пырис аслас пызан сайö, сувтöтiс одзас, бытьтö щит, ыджыт книга, горöтiс:

— Гиж заявленнё, кытчöдз эз вашöтö! Сiдз буржык лоас!

— Öштыны школа, öштыны олан? — сё сiдз жö гусьöн, дзодзог моз лöга пишкöмöн юалiс Буртанова да сэк жö гымыштiс-горöтiс: — Не, оз ло сiдз! Некöр оз ло!

Илья Мардарович дрöгнитiс, сувтöтiс баралöм синнэсö лöгсянь гöрдöтöм чужöма инька вылö и эз письты висьтавны сылö кывджын.

* * *

Не пыр жö непогодьыс овлö: зэрас, зэрас, да мичамас, а пурга бöрын — лöнь локтас. И кытшöм любо видзöтны зэрöн гывьялöм нето лымöн вильдöм öтöр вылö! Кытшöм долыт да гаж пырö сьöлöмö эта сöстöммöм, томмöм мусянь! Только быд сьöлöмö я?

Быдса неделя соровтiс-бергöтiс лымсö пурга. Быдса неделя висьöтiс Марья Львовнаöс. А вот мичамис, и сылö гажа лоис, кокнитжык. И нач ни бур лоис обед кадö, кöр сы дынö вовлiс союз райкомись кассир, öддьöн ласков морт. Сiйö иньдöма Илья Мардарович, сы нимсянь тшöктöма извинитчыны одззася лöг басни понда — арттöм басни понда, кöда аркмöма Пышкаева бöбöтчöм увья. Эшö иньдöма Илья Мардарович мандариннэз, а ны вевдöрö пуктöма гижöток: ежели пö ковсяс, дак сетамö путёвка.

Добрöй мортлö оз и ков уна, тыдалö, медбы веськöтны сылiсь лёк кылöн дойдöм душасö, бурмöтны сылiсь сьöлöмсö. Вот юöртiсö Марья Львовналö, что сiйö лыддьöны колана да кужись велöтiсьöн, и сiя жалейтö ни Аида Власовнаöс. Поди, кытöн и былись сорасьлiс Марья Львовнаыс, а лыддис асьсö правöн? Может, кытöнкö и не совестьыс сьöртi керис?

Эна вопроссэс вились, мöдпöв тшöктiсö бöрйыны юрас важ басниэсö и завучкöт, и инспекторкöт, и Илья Мардаровичкöт, тшöктiсö мöдпöв видзöтны нылiсь обвиненнёэз. «Тэ керан не педагогика сьöртi, сiдзкö — тшыкöтан челядьсö, — кыдзкö баитiс Аида Власовнаыс Марья Львовналö. — Эн я вунöт, кыдз мöйму Вася норасис, что сылiсь нылочка пурток мырддис и бöр оз сет? А тэ мый висьталiн? Стыдитiн зонкасö! Ме кылi, кыдз тэ Васялö шуин: этшöм пö здоровöй, а нывкалö сетчин. Кытшöм пö тэ солдат лоан?» «А зырымбедьсö, уль нянь киасö колö воспитывайтны? — вермасьö Буртанова. — Кысянь инö сэк боссясö повтöм отирыс, геройес, кöдна бы вермисö дорйыны ассиным мунымöс? Школаас миян куим мужик, да и нiя инькаэз кодьöсь. Дак кинсянь инö примерсö челядьыс босьтасö? Кин нылö мужскöй характерсö сетас? Тэ моз керны — пестуннэз лоасö». «Эта философия, сiя тэныт немлö. Тэ öтiкö тöд — воспитайт вежöра да мывкыда мортöс». «Вот ме и кера бы челядьсис не шаньгаэзöс, а морттэзöс...» «Кöднö милицияöттяс кыскалöны?» «Нiя мездiсисö, и нiйö нуöтлiсö кыдз свидетеллезöс. Не нiя бы, дак вир киссис!» «А кöда мамыслiсь деньгасö гусялiс — тожö нем умöльсö эз кер? И тэ, шуан, бура керин, что дорйин сiйö?» «Сiя эз гусяв, а нянь вылö босьтiс, мед челядьыс эз тшыгьялö. Вежöртны этö колö».

И мöдiк басни сiдз и гардчö юрын, некыдз оз вунöтчиссьы. «И ежели сiдз лоас, — баитiс Пышкаева, — Машаыс пуксьöтас классрукыс öлöдзö пиянокöс». «Ох, Пышкаева, Пышкаева! Пöрисьмöмат ни, а сё керан кир-вар, шлёпкан-висьталан, мый шедас. И кöдö бöрат бы чапкин, сiя одзат усьö. Былись сэтшöмыс вермис лоны, только не таво. Двадцать год ни эта гижöтокыс менам пызанын куйлö, а сiя Машаыс дзормö ни, сiя Марья Львовна ни öнi».

Илья Мардарович вот тожö уна койис. Шырöс да каньöс велöтiс ёртасьны: «Вунöтчö этö быдöс — и миритчö. Мыйыс оз овлы, да чулалö тай. Тiйö кыкнанныт и правöсь, и виноватöсь». «Правдасö да кривдасö, Илья, оз туй миритны». «Кылi ме, чукöртöмат пö ас гöгöрат томмесö, ускайтан нiйö завуч вылö». «Нiя асьныс вежöртöны, кинкöт нылö долытжык». «Вежöрт тэ, Маша, что бунт вылö эта вачкисьö». «Эта бöб басни...»

Эшö и эшö, год бöрсянь год, видзöтiс Буртанова эта завучкöт уджсö, а Аида Власовна йылiсь кыдз морт йылiсь эз вермы висьтавны шоныт кыв. Кинлö, кинлö, а школаись завучлö колö лоны не только начальникöн, но и Мортöн. Медперво — Мортöн, сiдз кыдз челядьöс велöтöм да воспитайтöм — этö святöй дело. И сiя рядын, кытчö мортсö сувтöтiс öтiк писатель — зверь да ангел коласö, — велöтiсь должен лоны матöжык ангелыс дынö.

Сьöлöмыс потö Марья Львовналöн школа понда: мый сэтчин челядьыс керöны? Оз я кинкö шогав? Кыдз Васяöс гортас видзöны? Юис лекарствоэз, лöсьöтчис-пасьтасис и петiс мича öтöрö. Медбы кокнитжык вöлi мунны, кошшис бедь, размöд шагньöвтiс беддясьöмöн и колис стын бокö — одзöв жö беддясьны сылö. Бедьыс нуöтö не оланö, а могильникö!

Уброд туйыс, сё абу южмöм падера бöрсяняс, и Марья Львовна мунiс жагвыв, серöтiс лымсö неважын пыдöсалöм пимиэзнас. Мунiс сiя, кытшöвтöма шоггезöн, висяннэзöн, но оськалiс кокнита, эз падмав. И только посад керöсас ни кайтöн бöра лыйыштiс косас, но небурика-небурика, и Буртанова нельки эз и сувтчышт.

КУЛЬГОЗЪЯ

Вöралiсь да чериалiсь мортöс лыддьöны несерьёзнöйöн и шуöны бöбöтчисьöн. А ме ныкöт, кин этадз шуö, ог вермы согласитчыны, сiдз кыдз ачым тожö невна вöрала-шырала, а баита прокод öтiк правда. Ежели од веритö — юасьö охотобществоын: сэтчин öддьöн бура тöдöны миян кодьöмсö.

Быдöс этö ме шуа сiйöн, что мöда висьтасьны öтiк быль, кöдö мöйму, двадцать первöй август ойö, кылi вöралiссез биок дорын.

Рöдитчöм,

Дата добавления: 2015-11-16