КЫМÖРЫС МУНIС ГЫМАВТÖГ

(ордч.: Косинка)

Рита саймис ракаэз да чавканнэз гайзöмсянь. Сiя мöдiс уськöтны тöдвылас, мый жö сэтшöм бурсö да мичасö вöтасис узикас, мыля сэтшöм долыт да кокнит сьöлöм вылас öнi. Но вöтыс вунiс, рознитчис, дзик кизерик туман. А шондiлöн рамыник югöррес нюлöны чужöмсö, гильöтöны голясö, и нывкалö кажитчö, бытьтö сiйö малалöны мамыслöн шоныт киэс, кöдна боссьöмась йöв дукöн.

Но мыля жö талун сэтшöм гажа асылыс, мыля сiдз радуйтчö Риталöн сьöлöмыс?

Казялiс тумбочка вылiсь лöзкодь бумажка.

Телеграмма! Федясянь телеграмма. Сiйö вайисö тöн рытнас. А ойнас, видзöт, бур вöттэс кузя вунöтчиссис сiя.

Öнi нывкалöн онзыльыс öшис, бытьтö ваöн сы чужöм кузя койыштiсö.

Вот и локтiс сiя луныс, кöдö сы дырна видзчисис Рита. Только вот рака табуныс öддьöн ни шумитö. Не весь этö, сiдз и тöд, зэр лоас. Сьöд борда кай пессьö умöль погоддя одзын.

Дузгыльтчис моз нывкалöн сьöлöмыс, дугдiс токöтны сiдз радöн, но Рита макнитiс кинас: ась пö карзöны сьöд куллез асланыс юр вылö. Да кытшöм, поди, зэр, кöр öтiк кымöрок оз тыдав?

Рита чапкис шебрассö, чеччис да тэрмасьöмöн пондiс пасьтасьны. Быд нывка тöдö, что пантавны зонкаöс, кöдö любитö, абу кокнит. Сiдзкö, лöсьöтчыны колö. Буржыка лöсьöтчыны.

Сiя котрасис миссьыны, сыбöрын плитка весьтын шонтiс кöртовöй ручка да каттис сы вылö пельбокись лэдзчисьöм пилиммесö.

Сэтчö и подружкаэс саймисö. Узьны бы нылö кресення лунö дыржык, нежитчыны мымдакö, но позьö я туплясьны ольпасьын, кöр подружка мунö пантавны ассис сьöлöмшöрсö! Не шутка эд — кык год зонкасö армияись видзчисьны!

Öтiк вöзйö Риталö часы, мöдiк тшöктö пасьтавны ассис платьесö, куимöт сетö виль туфлиэз — быдöнныс пасьтöтöны бы нывкасö бытшöмика и быдыс асмознас. Рита только киэзнас öвтö — нем пö оз ков. И пасьталö платьесö ассис, голубöйсö, кöдö лöсьöтöма эшö рытсянь.

Катя, Риталöн бур подружка и городскöй морт, перво быд ладорсянь видзöтö нывкалiсь паськöмсö, сэсся тшöктö мыччавны и пиннесö, кыдз нiя весöтöмась.

— Сöстöм пиннез, — велöтö Катя, — шыннялiкö медважнöйöсь. Эшö краситöм тырппез... Эн вунöт эта йылiсь... Басöк пиннез и рöма тырппез!

Катя — модница. Сiя пасьтасьö бура, и йöктö асмознас — быднёж пиньласьö. Сылiсь сярзьöмсö позьö и не кывзыны. А шынньöлыс Риталöн и сiдз бытшöм. Кыдз серöмтчас, сiдз и гöпоккез öм дорас лоасö — серöмтуссез, — кыдз шуис нiйö Федя. И тырппес зэв рöмаöсь, дзик жельнöг цвет.

Но вот и Риталöн быдöс готов, позьö и мунны ни.

— А чышьяноктö босьтiн? — бöра юалö Катя,

— Ой, Катька! Вунöтi эд!

Рита кыскис джодж шöрас чемодан, осьтiс сiйö и сылiс местаас: медвевдöрас куйлiс голубöй косинка. Жырын шы эз ло, только кылiс, кыдз öшын увтын дзингöны мошшез — кошшöны нектар.

Рита мöдiс бöр игнавны чемодансö, сайöвтны басöк косинкасö йöз синсянь, да эз вермы вöрзьöтны, бытьтö кикоксö кинкö гезöн кöрталiс. Да мый ни дзебан, кöр быдöнныс, кин сулалiс да пукалiс матын, казялiсö чышьянсö? И, конечно, сразу тöдiсö. Сiйö эз позь не тöдны — сэтшöмыс педучилищеын вöлi öтiк, только Катялöн. Вöлi да эз ло: öшис неважын. Сэк дыркодь шумитiсö нывкаэс, споритiсö неетша, а Катя чышьяныс понда нельки горзiс. Кöть и не сэтшöм дона, да эд козин, вöлi вайöма Москваись. Сiдз и эз вермö тöдны, кытчö чышьяныс лоис. И вот адззисис. Адззисис Рита чемоданын.

Вермис я кинкö думайтны сымдасö, что Рита босьтас да суськас?

Сьöкыта, ышлолöн ловзисис Рита да полöмöн, дзик калитчöм кöрт, босьтiс косинкасö да нюжöтiс Катялö:

— На, дзимляв. Сыбöрын быдöс висьтася, кыдз петiс. Катя примитiс косинкасö, нюмыртiс паськыт тырппесö и пинь пырйöттяс шуис:

— Мый ни сэтöн висьтавны? И сiдз быдöс вежöртана... Эх, тэ! Корин бы, дак ачым сетi. — И чывкнитiс-мунiс Рита одзöт ыбöслань, чуть кок нырресö подружкаыслiсь эз таль. Сы бöрсянь юрнысö öшöтöмöн петiсö и мöддэс. Рита, дзик öшöм, гöгöртiс размöд жырсö да уськöтчис кыминь аслас кровать вылö. Öнi сiя эз берегит нöитчöмсянь не платьесö, не чочком-чочком воротничоксö, кöднö тöн рытнас сiдз бура волькöтiс уборщица Фима ордын.

Фима олiс эта жö керкуын, улiсь этажас, а точнöйжыка висьтавны, дак улiсь этажас вöлi джоджув. Олiс сiя жöниккöт, но мöйму жöникыс мунiс кытчöкö ылiсь стройка вылö, колис инькасö нёль челядьöн. Медыджыт нывсö Фима сетiс школа-интернатö, а мöддэсö быдтiс ачыс, пасьтöтiс да вердiс, кыдз кужис. Ваяс пызан вылö куш нянь да похлёбка — вот нылö и öбед. Мукöд велöтчиссес, кöдна ваявлiсö Фималö песласьны, сюйыштлiсö челядь киэзö то кöвдöм, то пряник, то конфетка, а кöр и анькытш.

Вот и тöн Фима вöлi мышкыртчöма öр весьтö, а челядь орсiсö: медучöтыс кыскасис джоджын, а ыджытжыккес идзас тылöп понiсь лэдзалiсö поллез. Лабичын ордчöн матегкöт куйлiс нянь шöрöм. Сiйö боёка то öтыс, то мöдыс кöс чуннезöн чеплялiсö ыджытжыккес да сюйисö öманыс.

Рита утюжитiс платьесö и кутчис ни ыбöс вуг бердö да казялiс, кыдз нылочка каттьö голубöй чышьянö трепичись керöм аканьöс.

— Таню, тэ кытiсь этö? — юалiс Рита чышьян вылö мыччалiкö.

Нылочка и öмсö эз ешты осьтны, кыдз сы вылö уськöтчис мамыс, буткис кулакнас лопаткаэс коласö да нетшкöвтiс кисис чышьянсö.

— Кин тэнö тшöктiс вöрöтны!? — чирзiс Фима. — Мыйлö чувьян?!

Рита кыскис ас дынас нылочкасö, кöдалiсь мамыс кöсйис пиньöвтны юрсö, да юалiс:

— Тётя Фима, кытiсь тэ сiйö адззин? Эта эд Катялöн.

Сы туйö, медбы видзны ответ, Фима пуксис пеславтöм паськöм груда вылö и горзöмсорöн пондiс норасьны аслас умöль олан вылö. Сiя висьтасис аслас арттöм жöник йылiсь, тшыг челядь йылiсь, орöм-киссьöм паськöм йылiсь.

Рита нем эз шу паныт: не эз винит этö винерик инькасö, не эз дорйы, не эз бурöт. Кыдз тшын пыр нывка адззис лöзöтöм ныра дулльöсь мужикöс, кöда öтпöвса паськöмöн чеччалiс лым столаын да ошкис ассис начальниксö бур гöснеч понда — вина бутылка понда. Усис тöдвылас сылöн код песня:

Менö няньöн эн верд, Только йöктыны сет!..

Фима горзыштiс-керис да висьтасис одзлань:

— Нимлун медыджытыслöн... Öтнас эд сэтчин, интернатас, дзик айтöм-мамтöм... И пыстöм ем некöр эг вöрзьöтлы, а вот адззан... Дявыс, натьтö, чувйыштiс. — И бöра пондiс горöтлыны: — Да и оз ков! Оз ков меным чужöйсö!.. Мый нö синнэтö барöтiн?! Мун, мун норась, ась ульöн менö сёясö, ась ньылыштасö!

Фима сюйыштiс косинкасö Рита киö да тойлалiс ыбöс сайö.

«Мый нö эта сэтшöмыс лоö? — думайтiс öтöрас Рита. — Мыйлö сiя меным сетiс? Кинлö норасьны — директорлö?.. Мый öнi керны?»

* * *

«Мый öнi керны, мый керны? — шушкис Рита горзöмсянь вамöм подушкаас. — Думайтöны, что ме гусялi...»

А öтöрын кисьтiс, дзик ведра понiсь, крут зэр. Сiя вартiс стена кузяс, гывьялiс бусöсь öшыннэсö, миссьöтiс пу листтэз да кöтöтiс рака поззэз.

Сётаки не весь карзiс рака чукöрыс!

Рита куйлiс кровать вылас и эз тöд, мый керны. Ежели бы тöн жö висьтавны, кыдз аркмис, быдöс бы вöлi бур. Бур сы понда, Рита понда. А Катя сэк жö котöртiс бы комендант дынö, лэбтiс шум: Фима — воровка! А вашöтасö Фимасö, дак кытчö сiя мунас, кытчö челядьнас воштiсяс? Не удж, не оланiн оз ло. Öтнас бы вöлi, дак эшö позис сiдз керны... И суськыны оз позь и не суськыны тожö. А сэтчö — Федясянь телеграмма.

Сiдз Рита и водiс тöн, нем бурсö эз вермы думайтны. А Фима ордiсь вайöм чышьянсö чемоданас сюйыштiс: ашын пö мыйкö кера.

Вот и видзчисис ашынсö! Эшö буржыка делоыс гардчис. Лэбас слава: Рита гусясьö. А ежели и мамыслö кывсяс... Ой, беда, беда... И эттшöмыс самöй экзаменнэс одзын! Медбöрья экзаменнэз одзын! Эшö бы эз вöв сэтшöм забедно, ежели сiдз шогмис первöй курс вылын. А то ашыння велöтiсь — и сэтшöм клякса. Кытшöм характеристика видзчисян, Рита? Э-эх!.. Дак мый жö, примитны умöль славасö, терпитны сэтшöм позорсö? Али мунны дирекцияö и висьтавны, кыдз вöлi? Колö ветлыны, нем тшыкöтны том олансö. А то ыскöвтас счастьеыт бокöттят: и любимöй удж, и Федя, и гаж — быдöс öшас. Вöлись и каитчы, кукуйт öтнат, кыдз кöк вöр пыдöсын... Но сё жö... Ась Фима умöль морт. А челядьыс? Нiя абу виноватöсь. А кин виноват? Но кин? Ох, олан, олан! Челядьлö колö гаж да пöт олан, а кöр пыравлö сiя общежитиеыс увтiсь этажö? А Рита эд том и öтнас, сiя кöть кöр адззас аслыс уджсö, ассис местасö эта му вылын. Светыс паськыт, и бур отирыс быдлаын эм. Колö норовитны, мый лоас, сiя и ло...

Посöдзын небурика дзуркнитiс ыбöс. Рита чепöссис кровать вылiсь да сувтiс öшын одзö, ыбöсланьö бöрöн. Пырасö кö нывкаэс, буржык лоас, ежели не видзöтны ны вылö, не пантасьны ны синнэзкöт. Сiдз абужык стыд.

Зэрны дугдiс, öтöрын лоис мич да гаж. Осьта öшынöт кыссьö ыркыт руок. Ыджыт зэрыс дзик томмöтöм да öддьöнжык зеленитöм пуэсö, лудовкасö. И öнi, кöр быдмассэс чапкисö вывсиныс чалöй буссö, нежитчöны да чöскыта сунасьöны шондi югöр увтын. Только чуть тöдчöмöн дрöжитыштлöны тополь листтэз да öтi-мöдiлаын усялöны незьдöм му вылас ва воттез: тёп-тёп-тёп, тёп-тёп-тёп...

Риталiсь кинкö малыштiс юрсö. Нывка бергöтчис: одзас сулалiс Фима. Сылöн синнэс гöрдöтöмась горзöмсянь, но öнi абу ни сэтшöм лöгöсь, кыдз тöн, и югьялöны, дзик стекляннöй доноккез.

— Вöлi ме комендантыс ордын, — юöртiс Фима. — Думайтi, тэ важын ни юртö вердiн, а тэ некинлö абу и висьталöмыт... Комендантыс тэ дынö ыстö вöлi: кор, шуö воровкасö татчö, ме висьтала сылö прощальнöй кыв. Репйыны колö сiйö, и кыдз колö чожажык пö. Нывкаэс, шуö, сэтшöмыскöт оз пондö овны. Сы понда, шуö, тюрьма гажтöмтчö. А ме сылö: кыдз этö, мыся, репйыны? Нёль год велöтiт, деньга видзит, а öнi репйыны? Ежели сiдз, мыся, дак менö вашöтö. Сэтчö и винитчи ме, висьтаси вöлись. Ме босьтi, меным и вештiсьны. Ачым эд сьöд кымöрсö, эттшöм грозасö, кори. Да не лёк, тыдалö, тулысся кымöрыс: эз гымав, эз вирдав, только буссö миськалiс... И нывкаэслö тожö висьталi, кыдз шогмис.

Рита жмитiс Фимасö морос бердас.

Кыдз жö сiя, ашыння велöтiсь, эз мöд надейтчыны отир вылö, кöднакöт öтлаын олö, юö-сёйö, и ветлöтö ныкöт öтiк туй кузя? Фимаöс умöль мортöн шуис, нывкаэзсянь полiс, что сiйö оз вежöртö, Федя йылiсь думайтiс, что зонкаыс осудитас сiйö, чапкас сэтшöмсö.

Не, батя, не сэтшöмöсь нiя. Отир кыдз отир — бур сьöлöмаöсь, добрöйöсь.

— Спасибо, Фима! — только и горöтчис Рита да котöртiс автобуснöй станцияö.

* * *

Ю дорись туёк кузя мунöны кык морт: голубöй платьеа нывка да быгалöм паськöма солдат.

Паныт нылö котöртöны нывкаэз. Нiя локтiсö сэтчö, ю дорас, тшöтшкöравны да öктыны цветтэз. И, конечно, охота нылö видзöтны асланыс счастливöй подружкалiсь ёртсö — Федяöс.

Видз весьтас руыс чöскыт, ма дука, кайезлöн дзульзьöмыс гора да гажа. Зэр бöрся сöстöм небоыс — голубöй чышьян. Только ылын-ылын, кытöн кымöрыс öтлаасьö вöр зеленькöт, öшалö руд кымöрок, учöтик да кокнитик, дзик шёлковöй косинка. Только сiя и уськöтö тöдвылö зэра кымöрсö, кöда неважын повзьöтлiс отирсö аслас лöг мурзьöмöн да сьöд рöмнас.

ТЭКЕРКО

Тi одö тöдö тракторист Тэкеркоöс? Сэтшöм статясö да басниасö оз позь не тöдны. А может, и одö: сiя неважын миян колхозö локтiс, тöвнас вöлись, и кöть маякöн асьсö лыддьö, а газетаын сылöн портретыс эз на вöв.

Ась Тэкерко и городскöй морт, а деревенса примитiсö сiйö бура: раз пö механизатор — öддьöн колана уджалiсь. И забыль, детинаыт сiдз бергöтö-уджалö, что бöрсяняс бус да тшын только кайö. А бригадир ассис пеллесö адззö, что сылöн сэтшöм тракторист эм. Ме пö сiйö вайöтi! Орёл пö, а не механизатор. Видзöтö пö да велöтчö миянсянь, кыдз ми сыкöт коммунизмсö гымöтам-дорам!

Но, а ежели морт öддьöнöв ыксö-мексö, дак сё ни сылöн мыйкö неладно. Личалас тай машиналöн кытшöмкö гайка, и но жö сiя голльыны-гурöтны — пеллез чанöтö. Сiдзжö и горöтлiсь мортыслöн, ме думайта. Да, не эта йылiсь öнi басни.

Тэкерко уджавнытö уджалiс, да только деньга понда. Сылö öтiкö колiс: мед вежтiсö бура, а сыбöрын кöть кульзöр быдмы — сёровно. А бригадирлö и деньгаыс оз ков, мед только районын ошкисö, что медодз кöдзны петiс нето страда пондöтiс. Конечно, нянь да карч миян бригадаын бур не бур, а шогмö и бригадир не медбöрья местын колхозас. И Тэкерколöн деньга чукöртчö. А чукöртчö сiйöн, что бура шедтö и некытчö сiйö оз видз: юны-сёйны оз неб, паськöм оз босьт — быдöс готовöй. И олö детина, кыдз курорт вылын. А быдöс сысянь, что сылö бур инь сюрис (а бур иньсянь и жöникыт бур) да эшö добрöй, рамыник тесть вöлi, пенсионер Гаврилыч.

Локтас Тэкерко удж бöрсянь, тупыльтчас постеляö и только чуньнас мыччалö тестьыслö:

— Тэ кер-ко этö, пöрись... тэ кер-ко сiйö, тестюшко...

А старик и котрасьö öтмöдöрö: то вугыр зятьыслö лöсьöтö, то кеписсез вочö, öбед да ужин керö. А ежели жагöнöла бергалö, дак зятьыс понукайтыштлö, ровно жаг вöлöс тэрмöтыштлö, и часто казьмöтлö (кыдз мукöдпырся зöр понда вöлöс кöритлöны), что весись пö, старик, тэныт пенсияыс петö. Старик кывзiс-кывзiс сылiсь баснисö и сылö забедно лоис да шуис аспондас зятьсö Тэкеркоöн. А сэсся эта нимкодьыс пыркнитiс-петiс öтöрö и — мун кутав сiйö, йöрт бöр керкуас! Вот и Тэкерко лоис.

А неважын механизаторöс сылöн «тэ кер-коыс» бура и желлялiс. Кылöма тракторист, что бригадаын лоас партийно-государственнöй контрольлöн пост и сэтчö пö пырасö колхозiсь медавторитетнöй отир, А Тэкерко тöдö энö авторитетнöй морттэсö, ой кыдз тöдö! Не öтпыр ни адззылiс. Ветлан юасьтöг тракторнас винатор шедтыны — ашынас правленнёö корöны; пинялан нето гöран кокнитжыка — бöра синмö бытшкöны. Ны кузя детинаыт и стройкасö чапкис да локтiс татчö, кытöн, сы мозöн, лöньжык и авторитетнöй морттэс етшажык. Но не сiдз вöлöма: нiя, тыдалö, быдлаын эмöсь.

Дак вот, механизатор и шуö кыдзкö тестьыслö:

— Тэ кер-ко, пöрись, то кыдзи: корсьы контроляс. А то дзöран лун-лун гортын, весь кадсö öштан.

Старик думайтыштiс: «А дельнöйö эд висьталö зятьö!» — кутас да и мунас парткомö, висьталас сэтчин эта йылiсь. Вот сiдз Гаврилыч кыдз местнöй коммунист и лоис контроляс.

Рад старик, что эшö вермас колхозлö да государстволö служитны, Рад и Тэкерко: контрольыс сы кырымын куйлö. Охота — малав сылiсь, кыдз каньлiсь, спинасö, мед сiя мурзис-сьылiс; охота — ыжмит кырымтö, пöднав сэтчö контрольсö и бöра шедты деньга, копит «волгаок» понда. А лоас аслат «волга» — позяс и тракторсö кольны, мöдiк машина деньгасö пондас керны. А деньга — олан.

Эттшöм думаэзöн и мунiс Тэкерко тöн рытнас уджавны — гöрöм му культивируйтны, кöдзöм понда лöсьöтны.

Кöр сьöлöм вылын кокнит, сэк кокнита и уджассьö. Гургö трактор, чибуöн гöняйтö — бöрсяняс бус только кайö. Культиваторлöн пиннес кытчö павкöны, кытчö озö. И пиняэсö культиватор бердсис мездöтiс, мед чожжыка машина котрасис. Да кин тöдас, что умöля муыс небзьöтöм? Бригадир — ёрт, контроль — тесть. Кöть и локтасö видзöтны, дак и чальöн оз легнитö, кылöн оз дойдö. А может, даже районын ошкыштасö, эд неетша ойнас керис: сорок гектарся унажык лоас. Вот кыдз колö уджавнытö, вот кыдз колö овнытö!

Асывнас ыб вылын мыччисисö куим морт: Тэкерколöн сменщик, тестьыс да бригадир. «Сiдз и лоö, кыдз ме думайта», — чикнялiс радувьяс тракторист да туткыштiс нылö гудокнас: привет пö контрольлö! Но отир сы дынö эз тэрмасьö локны, ветлöтiсö доль и поперёк ыб кузя, чувйисö мусö. «Адззан, мый керöны, — думайтiс Тэкерко, — бытьтö быльнöй контроль видзöтö эд!»

Трактор эшö öтпыр гöгöртiс лекасö, да вöлись сибöтчисö сы дынö отир.

— Привет государственнöй стражлö! — висьталiс тракторист. — Мöдралi-даки талун, кык туйö уджалi!

— Гыжмалöмыт, абу жалейтöмыт тракторсö, — шыасис старик. — Да ковсяс мöдпöв керны.

— Öгö-ге-е, — рыз-рыз серöмтчис Тэкерко. — Любитан жö тэ шутитны, пöрись!

Но тестьыс бергöтчис бригадирлань да юалiс сылiсь:

— Мый, актсö татöн гижамö али гортын?

— Ачыт тöдан, Гаврилыч, — бокö видзöтiкö шуис бригадир. Тэкерколöн баралiсö синнэс и кылыс öшис. Горöтчö бы мыйкö, да некыдз оз вермы, бытьтö виньдiс, только киэзнас öвтö, дзик гуттэзöс вашöтлö. Сэсся нöитiс-ниртiс горшсö да юалiс:

— Тi мый — сералатö?

— Не смехöдз, дона зятёк, öнi, — гижикас горöтчис Гаврилыч.

— Вöтьны мöдатö?! — вöснитика чирöстiс Тэкерко.

— Не вöтьны, а кыскыны мöдамö везсис, — шуис старик,— синнэтö осьтам, мед олансö буржыка адззин. А то челезнаэс тэ бöрын уна кольöны.

Орёл-тракторист чöлiс. Öнi сiя вачкисис гöжöм рака вылö.

Дата добавления: 2015-11-16