ТУЙСÖ БÖРЙÖ СЬÖЛÖМ 2 страница

Эта лапкöтöмыс дугдiс везгыны-нимавны нывкалiсь сьöлöмсö, лоис сэтшöм долыт, бытьтö козьналiсö сылö бур платье, кöда йылiсь часто думайтлiс Сима.

* * *

Колис бöрö, кыдз чикись пыркнитiс-лэбзис, быдса месяц, а Сима эз и думайт мунны Чукановвез ордiсь. Сiя лун-лун тöрчитiс Тасимкöт важ комбайн дын, радуйтчис, кöр кокнита сетчис уджыс, и вовлiс горзöмöдз, кöр сiя вдруг паджсьылiс, пыравлiс тупикö, и кажитчис, что виль механизаторрезлö вундан страда ковсяс пондöтны медбöрын. Сэтшöм лёк минутаэзö Тасим командуйтiс:

— Юррез не öшöтны, видзны равненнё космонавттэз вылö!

И сьöкыт минута, кыдз гора-гыма кымöр, чулавлiс, и челядь чужöммез вылын бöра орсiс гожся мич, содлiс, кыдз вились зарядитöм аккумуляторын, вын да öд.

Чапкöм комбайн вылын моторыс былись вöлöма эшö бур. Этö адззисö и челядьыс, и дядя Михей, кöда уна отсалiс томмеслö. Стрась ёна пригодитчис и школьнöй практика. Сэтчин, труд уроккез коста, челядь велалiсö лöсйисьны, стружитчыны, веськöтлыны машинаэзöн да станоккезöн, керны быдкодь деталлез.

Кокнита сетсьö уджыс, кöр тэнат киыт быдлаö сибалö. И сэки уджалiкат тэнат кужöмыс тöдчöмöн содö, кыдз квашняын суктöм нянь ловзьö-лэбтiсьö. И быд лунöн тэ етшажык ни котрасян ордчöн уджалiсь отир дынö и сё частожык тэнат басниын пантасьлö: «Ме этадз кери», «Ме ачым сiйö лöсьöтi».

Иван Лукич быд лун кежавлiс челядь дынö, ошкис нылiсь уджсö. Ошкис да радуйтчис, что механизаторрезлöн семья содö, вынсялö, что колхозö öнi локтöны сэтшöм отир, кöдна тöдöны не только сiйö, мый му вылас эм, но и сiйö, мый небоас керсьö. Юав тэ нылiсь, кытшöм звездаэз рытнас юр весьтат öшалöны — быдöс висьталасö, бытьтö звездаэс коласöт ветлöтöмась. И локтас кад, кöр нiя, Тасим да Сима кодьöммес, висьталасö Иван Лукичлö: «Давай, механик, вежсям местаэзнаным. Миян аттестаттэз эмöсь, и дипломмез лоасö — непременно лоасö, И тэныт, кыдз ачыт шуан, «дипломтö» сетiс ЦПШ — церковно-приходскöй школа.

Вот сiдз, Иван Лукич. Эта — закон, эта — олан. Сiдз прокод овлö: мыйкö важмö, пöрисьмö, мунö олöмсис, а сы туйö чужö мыйкö виль. Но важыс, кöда бура ни ештiс вужьясьны, неохотнöя сетö ассис местасö мöдiклö, падмöтö вильыслiсь туйсö. Эта — тожö закон.

Тöдiс я энö законнэсö Иван Лукич, сьöкыт висьтавны, но олiс ны сьöртi жö.

Неважын Симаöс колхознöй мастерскöйись комсомолеццез бöрйисö асланыс секретарьöн. И ашынас жö нывка локтiс Иван Лукич дынö да висьталiс:

— Меным колö трактор, Иван Лукич!

— Пес вайны мöдан? Норовит невна, нывка.

— Площадка колö керны.

— Кытшöм эшö площадка? Йöктыны я мый я лöсьöтчатö?

— Орсны. Волейболöн, баскетболöн, городоккезöн, — пондiс кöставны чуннесö Сима. — Бульдозер сет, мийö кырассö тыртамö.

— А поди эшö мяччез босьтны, баян, оркестр?

— Да, и нiя ковсясö, — серьёзнöя баитiс нывка.

— Чапкы этö юрсит, Серафима, — кымöртчис механик. — Мийö кöркö сигöн да гораньöн орслывлiм и то только тöвнас. А öнi, нывка, страда пондöтчö, колö вундöм йылiсь думайтны.

— Орсöмыс оз мешайт эталö, Иван Лукич, — эз сетчы нывка.

— Вот мый, Серафима: тракторыс öнi абу матын. Да и кин пондас татöн орснытö? Не талун ашын комбайннэсö бригадаэзö иньдöтам.

— Только мастерскöяс двенадцать комсомолец уджалöны... Сiдзкö, он сет, Иван Лукич?

— Да тэ мый, Серафима, он разь вежöрт, что оз туй? Уджавны, а не орсны татчö отирыс локтöны, — лöгасис механик. — И трактористыс ачыс оз понды неуджтö керны, не челядёк сiя.

— А ежели согласитчас?

— Но сэки пондылö, — висьталiс механик, а ачыс думайтiс: «Сiдз сiя тiянлö и керас, натьтö!» — Только не луннас! Сылö план колö тыртны — вильса керны.

— Спасибо, Иван Лукич, — шынньöвтiс Сима и уськöтчис ыбöсö. — Ми уж адззам кадсö.

Ашынас Иван Лукич локтiс одзжык, мед заправитны мотоцикл и ветлыны бульдозерист дынö, висьтавны сылö Симакöт тöння басни йылiсь, висьтавны, что челядьлöн затеяыс — пустöй и немымда оз отсав колхозлö уджын. Но кырас местын, кытöн рытнас эшö валяйтчисö киссьöм бочкаэз, орласьöм троссэз да мöдiк сэтшöм берсяыс, öнi вöлi гунадолонь кодь волькыт площадка, сулалiсö столббез да лабичоккез. Иван Лукич гыж-гыж керис юрбöрсö да пырис аслас кабинетö, мед вежöртны, мый эта лоö. Но и сэтöн сылö спокойсö эз сетö. Локтiс Тасим, вайис комсомольскöй просьба: сетны наряд токарьлö, мед сiя керис гранатаэз, городоккез, гантеллез... Иван Лукич вежöртiс, что сiя тöн не сiдз керис. Рышкыт гырк! Вашöтны колiс этö выскочкасö, Симасö, мöдпыр эз бы локтö. И висьталiс: — Ладно, гранатаэсö да городоккесö ась керö, а энiйö... гантелияэтö немись керны. Кадсö öштас токо да и станоксö ештас жугдыны.

— Да сiйö öддьöн просто, Иван Лукич, — шуис Тасим. — Ме верма керны.

— Не, не, зонка. Висьталiсö тэныт, дак кывзы. И сiя тырмас, мый тшöктi, — чорыта висьталiс Иван Лукич. — Поди, эшö ракета пондат керны, дак и сет материалсö сы вылö? Сiя эд деньга сулалö... Быдöс!

— Кынымкö копейка сулалö. Килограмм кöрт колö.

— Хм, — кашельтыштiс механик. Сiя эз тöд, кытшöм сэтшöм штука гантельыс, но решитiс сэсся не сетчыны налесть: — Копейкаыс — тожö деньга. Сытöг и рубыс не руб. И вот мый тэныт, Чуканов, шуа: висьтав Симаыслö, ась кытчöдз чапкö энö орсöммесö юрсис, и тэнö ась оз манит: чожа комиссия лоас ни, а машинаныт эд не готов?

— Да только краситны кольччис öтi-мöдiлаöт. — Ладно, ашын видзöтамö. Мун уджав. И эн вунöт, мый висьталi.

Но механиклö и сыбöрын челядьсянь эз ло спокойыс: то стенгазетаö сэтшöмö гижасö, что Иван Лукичлöн он öшас, то Сима локтас рытнас, кöр механик лöсьöтчö гортас мунны, и тшöктас кыскыны сiйö мотоциклöн соседньöй колхозö, то эшö мый-нибудь. Механик нельки оз тöд öнi, кин ны коласын начальникыс: сiя али эта учкись кодь чож нывкаыс. Кин кинöн руководитö? Механик комплектуйтiс, кыдз одзжык, экипажжесö асмознас, а Сима кытшöмкö ударнöй комсомольскöй звеноэз керöма и бöра бумага вайис: утвердитö пö, пожалуйста! Иван Лукичлö некытчö воштiсьны, гыж-гыж керас юрбöрсö да и пуктас сэтчö аслас фамиллёлiсь буква-мöд. А нывка велöтö сiйö: лöсьöтö пö, пожалуйста, гöрд флажоккез, то да сё... И петö, что Сима тожö руководитель. Нывкаыт нельки походкасö вежис, эз понды йöктöмöнмоз котрасьны, а ветлöтö важнöя, кыдз ачыс механикыс, да только чикисёккес, дзик баля бöжжез, тшыкöтöны юралiсь мортлiсь видсö.

* * *

Нечожа ветлöны Сималöн киэс, оз и вöрö ровно, а бункер вылын мыччисьö буква бöрсянь буква, кисточка кольö бöрсяняс ровнöй гöрд след. Вот и эм ни öтiк кыв: Комсомольскöй. Улынжык лоас мöдiк — экипаж. Комсомольскöй экипаж. Этö — Тасим да Сима.

Адззö Тасим, что нывка оз дышöтчы, а сё тэрмöтö сiйö:

— Шупытжыка, Симка, шупытжыка!

— Мый тэрмасьнытö? Ештам эшö. Жагöник мунан — чожжык локтан!

— Жагöник мунан — сёрман. Олан — скорость.

— Öтiк зонка тэрмасьöма да кырасö берездасьöма, — шыннялö Сима.

— Симка! — гажтöма, норöна горöтчис Тасим. — Тэ, некö, кешитчан!

— Ой, простит, пожалуйста! Ме... Ме не тэ йылiсь эд. Былись, Тасим, — нывка сибöтчис Тасимыс дынö и ласкова нёджжöвтiс сы вылö, кутiс сiйö киöттяс. — Ме эг мöд тэнö öбидитны.

Кöр ни тэ он простит сылö, кöдалöн синнэс сiдз нежнöя корöны тэнö? Да кытшöм синнэз — кык юкмöс! Нёджжöвтан ныö — вöян сразу.

Как раз эта минутаö комбайн дынö сибöтчисö Иван Лукич, инженер да Михей. Челядь эз кылö нылiсь локтöмсö.

— Бур лун! — шыасис Иван Лукич.

Тасим круто бергöтчис сылань, казявтöг тойыштiс кокнас краскаа банка. Иван Лукич эз ешты вешшыны бокö, и банка кыминьтчис сы пельпон вылö.

— Эх тэ, орёл, — шуис механик. — Куш ляк керис мöдöтчанöс! Виль комбинезон кышалi, а видзöт, мый лоис.

— Ме висьталi: эн костiав, мыся, ась окасьöны! — сералiс инженер. — Ас вылат пеняйт.

Тасимлöн сiдз и пыкнитiс чужöмыс, краскаыс кодь жö лоис, а Сима шуис:

— Ми эшö ог кужö окасьны.

— Öнöдз од кужö? — бытьтö дивуйтчöмöн юалiс инженер. — Кытшöм нö сэк тiйö механизаторрез! А Иван Лукич ошшасис: быдöс, шуö, кужöны... Вот греххет и вöтöны, Лукич: эн бöбöтчы одзлань.

— Эд полö, велаламö эшö, — сiдз жö спокойнöя шуис Сима. — Мыччö, пожалуйста, меным дозоксö. Ме гижышта ни.

Инженер мыччис краскасö да юалiс Иван Лукичлiсь, кöдалiсь пельпонсö весöтiс Михей:

— Но мый, видзöтамö? Давай, Чуканов, ключчез, отвёртка. И бумага босьт...

Час бöртi, кöр комиссия, дзик шогалiсьöс врач, быдöс видзöтiс да чувйис машинасö, инженер шуис:

— Позис бы и 5 сувтöтны, но колас чинтыштны.

— Мыля? — öтiк öмись горöтчисö Тасим да Сима.

— А мыля начальниксö мавтiт, — висьталiс инженер.

— И мыля окасят уджалiкас, — содтiс Иван Лукич.

— Иван Лукич, — пондiс извиняйтчыны Тасим, — не нарошно эд... Эг казяв ме.

— Мый, пятёрка колö?

— Да не... Проститö, мыся, эта понда, — корис Тасим.

— Окасьöмыс понда? — мигнитiс механик инженерлö. — Ö-ö, сiдзи, вонöй, оз туй. Буди бутылка сувтöтан, дак некинлö ог висьтась. Как раз получка талун,

— Но, ладно, челядь, — висьталiс инженер. — Бура уджалöмась. Давайте керыштö, мый колö, и — шоччисьны. Мунам.

— Этö тэ кузя сё, Симка! — дузгыльтчис Тасим, кöр мунiс комиссияыс

— Юррез не öшöтны, Тасим! Кылiн: быдöс бур! — радъялiс Сима.

— А мый бурыс?

— Öткö, комбайн готов, — сярзис нывка, кисточка миссьöтiкö, — мöдкö, талун суббота, куимöткö, деньга сетасö. Первöй получка...

Сима сюйыштiс кисточкасö банкаö, вачкис оча долонь, чатыртiс нырöттяс Тасимлiсь юрсö и бöра шуис:

— Вот сiдз видзны! Мунам бухгалтерияö! — и чеччöвтiс му вылö. — А то мунас кассирыс.

Нiя чожа, кирни-верни, дзимлялiсö инструмент да иньдöтчисö правленнёö. Коридорын Сима тойыштiс векнитик ыбöсок, шагньöвтiс бухгалтерияö, а сэтöн сэтшöм горöн сералiсö, нельки ыбöсыс зэгалiс.

— Го-го-го!.. — дзик гöрдлiс, кыз кынöмсö видзикö, кытшöмкö мужик. Пельпоннэс трексисö сiдз, бытьтö сiя пукалiс зэркыта гöнитiсь вöв вылын.

— Их-хи-их... — керксiс-сералiс инька да чышкис капрон торöн синнэсö. Только усiа бухгалтер чöлiс, а аслас чужöмыс вöлi горись кыскöм шаньга кодь — югьялiс мича рöмöн, бытьтö сылö часöт сетiсö государственнöй премия.

― Но артист, но талант! — ошкис бухгалтерсö инька. — Тiянлö, Киприян Оныч, Москваын бы выступайтны, а не Лопарын шöммыны.

— Ен шуас, и сэтчинöдз ветлам, — шуис бухгалтер. Тасим висьталiс, мыйлö нiя локтiсö. Инька мутшнитiс чуннезнас, юалiс ним-фамиллё, пырис кассаö, сетiс ведомость. Челядь гижсисö, босьтiсö виль руббез. Нiя мутшöтiсö сiдз жö, кыдз кассирлöн чуннес.

Сима лöсьöтчис петны ни коридорö, кыдз Тасимöс бергöтiс бухгалтер да пондiс шушкыны сылö пель одзас:

— Тэсянь, зонö, поллитра...

Зонка эз вежöрт, быль я баитö бухгалтер али сералö. Сэк бухгалтер содтiс:

— Лукич тшöктiс, кöсйöмат пö сылö, — и ловкöя кыскис Тасим киись куим руб. — Только — ша! Некинлö!

Тасим кокыштiс юрнас: эн тöждiсь пö. Но Сима кутiс ёртсö киöттяс, юалiс:

— Мыйлö сетiн? Одзöса разь мунö?

— Да не... Корис тай...

Пырис Михей, тожö деньгала, юалiс:

— Но, богатсялiт? Бур! Часöт мунам столовöйö. Сёйыштам, сурок юыштам.

Тасим эз радейт сурсö (пешлiс ни кыдзкö), öтiк курыт, горшын кезöтö, но корис Симаöс пыравны столовöяс öтлаын дядя Михейкöт. Гöститöтны сiйö сурокöн. Отсöт понда. Но Михей эз ошкы зонкалiсь затеясö. Зонка öбидитчис сы вылö: Иван Лукич и то пö эз откажитчы.

— Иван Лукич, шуан? — сувтiс Михей. — Кöр нö ештiс? Часöт моторнöйö кольччис...

— Сiя деньга сетiс, — висьталiс Сима.

— Кинлö? Кытшöм деньга?

Тасим вежöртiс, что неладно горöтчис сiя, да и Сима вöтсалiс сэтчö жö, да сёр ни вöлi. Висьталiс быдöс, кыдз аркмис. Вот жö, кузь кыв! Эд корисö чöвны кыдз бур мортöс!

Михей тшöктiс пырны челядьсö столовöйö, ачыс кытчöкö мунiс. Тасим босьтiс пирöжоккез да конфетаэз, пуксисö Симакöт пызан сайö. Кок чунь вылас, бордпавйöн пырис бухгалтер, уськöтчис буфетчица дынö. Тасим тэрмасьöмöн ньылалiс курччавтöм пирöгсö, мед сибöтчыны Киприян Оныч дынö да висьтавны, мый шогмис. Но öмас сюрис кытшöмкö болонь — и черöн не керавны, не только пиньöн орöтны, — зонка виньдiс, вуктöтöмöдз лоис. А бухгалтер сюйыштiс ни пиас бумагаö каттьöм бутылка да чывк петiс öтöрö. Тасим уськöтчис сьöрас. Бухгалтер сулалiс посöдз пельöсын дзик гöжöм рака и модис Иван Лукичлö да Михейлö: «Вежта, вежта... Сьöрам только абу. Вежта... Адззисьлытöдз!»

Иван Лукич корис чуньнас Тасимöс, шуис:

— На, осьтаöм, видз да сэсся эн чапкась деньганат. Донаöсь нiя, руббес, сьöкыта шедöны, — и сетiс Тасимлö куим руб.

Тасим да Сима мунiсö гортланяныс. Шагнялiсö жагвыв, чöлiсö. Сима думанас видiс Тасимöс; зонка видiс бухгалтерöс, асьсö — осьтаöмöс, кыдз шуис сiйö часöт Иван Лукич... Да, ордчöн бур йöзкöт олöны и лёк отир. И нiйö, кыдз куделись лён сюв, он зуав, он пыркöт öтiк лунöн, кытчöдз эмöсь эшö сы кодь рышкыттэс, кöдна асьныс самасьöны, топ вемтöм аррез.

Нiя мунiсö, а рытъяв шондi панталiс нiйö шынь-серöмöн, кыдз асывся жö, да и кытöнкö песня, иньвенскöй песня «Коми нылöй», дзульзис нора пöткаöн, сывьялiс отирлiсь вывтыр. Вот сiя и орис, öшис сылöн торыс, а Тасим сё сiйö кылiс: песня олiс сы пеллезын и кытöнкö дюттясис тополлез вевдöрын, маросаа руас, да гажöтiс олансö.

Том оланöй, том олöм! Мыля сiя кытшöмкö öддьöн бур и невежöртана? Али эшö эз лок сiя кадыс, кöр мортлö сетчö киас мудрöй вежöрыс?

Сiдз нiя шысеттöг, аскежö думайтöмöн сибöтчисö деревня шöрö, магазин дынöдз.

— Пыралам магазинас, — корис ёртсö Сима. — Ме неба мыйкö. — Важын ни магазинас эз вöвлы нывкаыс и, кыдз пырис, — синнэс йöрмисö быдкодь товарсяняс. Мыйыс только абу сэтöн: платьеэз, йöрнöссэз, костюммез, пызандöраэз — любöйö бöрйы. А ситеццез да шёлккез — дзик Сюзя дорись дзоридза видз. Пондыв-ко, бöрйы сэтiсь медбасöксö, кöр гöгöр свиттялö, пежьялö, орсö берся рöмнас, синбур öштöтö!

Сима ветлöтiс прилавок бердöт, нöитiс чуньпоннэзнас то öтiкö, то мöдiкö, юасис Тасимлiсь, а сiя только юрнас гогинялiс — то ли босьтны тшöктiс, то ли эз, и нывка эз тöд, мый вылö сувтчыны. Сiдз, натьтö, бы и мунiс, кöбы эз пыр сэтчö Савельевна. Нывка казялiс сiйö, тюр-тюр котöртыштiс сы дынö:

— А мийö босьтасьны мöдамö, Савельевна, да некыдз бöрйыны ог вермö.

— Но, но, — ошкис Савельевна, — Михеюшко висьталiс тай: магазинö, шуö, пырисö. Вот ме и локтi. Ноко, Тасим, уна я заробитiн?

Зонка сетiс деньгасö мамыслö, Савельевна босьтiс, но лыддьыны эз понды, а только видзöтiс и сетiс бöр.

— И тэныт сымда жö? — юалiс сiя Сималiсь.

— Конечно, öтмоз эд уджалiмö, — одзалiс висьтавны Тасим.

— Вот и бур! Сэки, давайте, öтлаын бöрьямö, — шуис Савельевна да висьталiс вузасисьлö: — Ноко, матуш, мыччав то этö, малина рöма платьесö. Ыджытö я тэныт, Сима, колö, висьтав.

Нывка чуть эз ойнит, кöр тöдiс сылiсь донсö: двадцать пять руб!

— Савельевна, — дернитiс нывка хозяйкасö, — норовитышт...

— Оз гленитчы? — юалiс Савельевна и пуктыштiс платьесö нывка морос вылö. — На ять! — и серöмтчыштiс шытöг.

— Деньгаö менам совсем етша коляс, — шушкис Сима. — А эд эшö сёйны колö, эшö...

— Тырмас, тырмас! Хозяинö талун кык додь няньсö вайис. — Савельевна бöра сiдз жö серöмтчис да юалiс Тасимлiсь: — А тэ мый небан?

— Ме? — öшис Тасим.

— Сiя тэныт мöдö кофта небны, — шуис Сима — Сiдз эд, Тасим?

— Ог откажитчы, — висьталiс Савельевна, а зоныс сiдз и нем эз шу.

Савельевна корис вузасисьлiсь эшö увдöрись паськöм, чулкиэз — этö сё Сималö, сыбöрын бöрйис мужскöй йöрнöс — сiйö Сима айлö, и тшöктiс вежтiсьны челядьсö.

Сималöн кольччисö киас куим руб, и нывка видзöтiс ны вылö гажтöма-гажтöма.

— Мунам-ко гöснеч эшö небамö, — шуис Савельевна, магазинiсь петiкö. — Да пырав талун айыт дынö, проведайт стариксö, — баитiс сiя Сималö. — Кöр ни öнi эн ветлы, а пöрисьыслö эд забедно этасянь.

Сималö и аслыс стрась охота вöлi мунны айыс дынö да и аккордеонсö колiс вайны сэтчинiсь, но видзис сiйö öтiк тор — мачехаыс. Сiя, дзик заплод, сувтiс ая-ныла коласö, торйöтiс нiйö. Беднöй старик! Мымда ни тэ вылын сералiс оланыс, мыччавлiс ассис ёся сюрресö, а тэ вот коддзыштан и сё öтмоз баитан, что мöдкодь оланыс тэныт оз и ков, что эта оланын не только овны, но и кувны гажа. Часто тай баитлiн одзжык, что тэнат родын некин грамотнöйыс абу вöвлöма да пыр мöдiн медлюбöй нывтö ассит учительшаö пöртны, мед сыбöрын, кыдз часто овлö тiян коддеслöн, ошшасьыштны отир одзын: «Ачым пемыт морт, а вот нылö — учительша!» Не эта понда я аслыт и сапоггесö эн неблы, а нылытлö и вурсян машина босьтiн, и аккордеон вылö розоритчин, кöр адззылiн, что нывка орсны сы вылын велöтчö? Не эта понда я учöтсянь сiйö быд торас велöтiн (учительшалö быдöс колö тöдны, быдöс колö кужны керны!) и öтiк гожум эн лэдз весь овны — сё колхозын уджöтiн? А öнi, поди, мöднёж ни баитан, иньытлiсь жö песнясö сьылан? «Виноват ме, тятю, тэ одзын, ой кыдз виноват! — шушкис нывка, гортас мунiкö. — Да проститан тэ менö, бытшöм сьöлöм, вежöртан менö. Ме ог вермы овны öтiк жырын сыкöт, кин öмалö менö, кин мортöн менö оз лыддьы. Тэнат иньыт счастьесö адззö только пöта оланын, бур паськöмын. Сылöн öтiк дума: лоны богатöн. И наживитны богатствосö кужöмöн: йöз горбöн, бöбöтчöмöн, кокнитика. А сэтшöмыс менчим ловöс пöдтö, косьтö менö. Эн вунöт, ая, кыдз мöйму сiя бöрйис меным жöниксö? И адззис — Ганя Проняöс, лесообъездчиклiсь зонсö. Проня — öтка зон, вежöра, мöйму аттестат получитiс. Нылöн кыксувда керку, дзик курорт вылын олöны. Не только мöс, но и вöв видзöны. Зонка рыттэзнас оз вежмась клубын нето каток вылын, сё горт гöгöрас, часто евангелие мамыслö лыддьöтö. Да, басöк зонка Проняыс, и берсяыс сылöн эм, да только душаыс не сöстöм. А тэ, фронтовик, эн лысьт, тыдалö, поперечитны иньытлö, роднитчыны, некö, Ганяыскöт лöсьöтчин. А разь вунöтчин, кыдз ачыт жö баитiн, кöр тэнö пионеррес корлiсö школьнöй праздник вылö? Тэ сэк висьталiн: «Эта школаись петiсö лётчиккез, учёнöйез, инженеррез, бур солдаттэз, кöдна Совет властьсö керисö да Гитлерöс пöдтiсö... Но татöн велöтчисö и сэтшöм отир, кöдна Гитлерыслö отсалiсö, страна понда сьöкыт минутаö фронт вылiсь пышшисö». Этö тэ баитiн Ганя йылiсь...»

Сималö эшö жальжык лоис айыс, кöр нывка казялiс сылiсь мышкыра спинасö огородечись. Котöртiс сы дынö, босьтiс кисис тяпкасö:

— Шоччись, тятю, ме кучитышта,— шуис сiя. Но айыс ласкова малыштiс нылыслiсь юрсö, веськыта видзöтiс сы синнэзö, шуис:

— Гажтöмтчин, дочи? И ме гажтöмтчи. Тöн ветлi ни рытнас тэ дынö, да эг застанит, мунöмат пö собраннё вылö. Да Савельевна быдöс висьтасис, кыдз олан, бурмöтiс сьöлöмöс. Да-а... Ноко, дочи, отсав меным, лонт гороксö. Черива пуам. На спичаэсö, а песыс сэтчин.

Сима мунiс колодец дынö, кöда сайын тыдалiс кирпичнöй горок, вадзöтiс сiйö. Айыс вайис чугун да бекöр.

— Бур чери, дочи, кыйи — жерех. Вуграси югдандорас да сё тэ йылiсь думайтi. Мыся, эм кö счастьеыс сылöн, дак шедас. И адззан, кытшöмöсь кыскалi, — старик мыччалiс бекöрсис кисой кыза вундалöм звеноэз. — Дюжина кыйи, не унажык не етшажык.

Гор чалöтiс-лонтiсис, шонтiс васö, а старик чеплялiс луктурун и сё сюльтыртiс то нылыскöт, то аскöттяс.

— А кытöн нö Тосяыс да Валькаыс? — юалiс Сима. — Ме гöснеч нылö вайи.

— Городö мунiсö, вузасьны.

— Тятю, ме тэныт йöрнöс босьтi, — паськöтiс Сима козинсö.

— Ок, кытшöм бур! — ошкис старик йöрнöссö. — Эшö сэк год-мöдсö ковсяс öвны. — И вдруг шуис: — Котрась-ко, дочи, курыт торсö вай, а? Не курытсö, а чöскытö. Малина ва кодь эм сэтчин. Важын ни эз сюрлы öмам.

Часöт деньгаоксö сета...

* * *

Пöрись льöмпу увтын, кытöн вöлi неыджыт пызанок, Сима панялiс черива да кывзiс радмöм айыслiсь баитöмсö.

— Айсö да мамсö оз бöрйö челядьыс, — велöтiс сiя. — Кинöс нылö еныс иньдас, сыкöт и олöны. Но да ась: тэнат мамыт не роднöй. Вöрисьыс сiйö меным кышалiс я мый я, а öнi уж овны колö, внучаткаэсö быдтыны. А тэ айтö эн вунöт, частожык пыравлы. Меным, ачыт тöдан, сьöкыт ветлöтны, коккезö висьöны. Ранаыс, тыдалö, маитö бöра... Ноко, юыштам, дочи, невночка...

Сима пешлыштiс — чöскыт, дзик сусло, и сэтшöм жö сук — пöрöтiс рюмкасö öмас: мый лоас, сiя и ло! Курччöвтiс огурец.

— А-а, локтöма дона гöсьыс, ненагляднöйыс миян, — кылiс сiя ас бöрсис мачехалiсь вöснитик голосоксö и огурецыс сибдiс горшас. Сима тöдiс ни: раз Малань волькыта вöвдö-ольсалö, то сылöн ольсалöмыс бура жельнöгалас.

— Кылi, кылi, кыдз тi деньгасö курмыштöмась, — öдззöтчис инька. — Только уна я гортö вайин? Шёлккез тай небöмат, волькöтан сё асьтö сьöдкульыт одзын вежмасьнытö.

— А мый нö, пасьтöг разь понда овны? И не шёлковöй, а шерстянöй платье неби, — висьталiс Сима.

— Вот, вот, мöдöтчы-баситчы, чöскыта сёй, а айыт и тшыгйöн вермас овны...

— Малань, эн жö грешит, — шыасис айыс. — Тшыгйöн эшö эгö олö и ог пондö овны. Али менам учöт пенсияö?

— Вот, вот, ме и шуа: сет эшö сылö, мича шондiытлö, пенсиятö. Ёнты кöбылатö, волькöт модззес понда.

— Малань! — горöтiс старик да гымгис кулакнас пызан кузяс. А Сима синваэс сорöн шуис:

— Кыдз тэнат, пöрись мортлöн, и кылыт бергöтчö сэтшöмсö баитны! Абу тэ морт, кыдз ме видзöта... Ме муна, тятю.

Но гымнитöмыс эз отсав, а только öдззöтiс Маланьсö.

— А-а, нелюбо правдасö кывзыны?! — лэбтiсис сiя. — Мун, мун, только тэ некытчö ме дынiсь он пышшы, вердны пондан! И айтö, и менö!

— Тэнö? — вирдыштiс Сима синнэзнас. — Спекулянткасö да дышкучиксö? Некöр! Кылан: некöр!!!

* * *

Быд кресення Сималöн пондöтчылiс песласьöмсянь. Нывка учöтсянь керлiс этö уджсö, но эз радейтлы сiйö сiдз, кыдз öнi. Песласьöмыс сылö — öтiк гаж. А гаж сысянь, что öнi оз ков ниртны паськöмсö, кыдз одзжык, важ пипуовöй öрын, ниртны мыдзтöдз, кольмытöдз. Этö сьöкыт уджсö öнi керö песласян машина. Нельки пидзралö машинаыс жö. Да и сьöкыт висьтавны, кин песласьö: Симаыс али Тасим. Зонка ваялö ва, Савельевна шонтö сiйö, Сима тэчö паськöмсö машинаö — вот и быдöс. Сэсся то Тасим, то Сима кыскалöны сöстöм паськöмсö, сюйöны валёккез коласö — пидзралöны. Чулалас час, и паськöм тöвзьö ни вешалаэз вылын. И талуння кресенняыс — медбöрья июльскöй кресення — сiдз жö пондöтчис. Песласис Сима, öшлiсис, петалiс огородечö весöтчыны, и павжунöдз быдöс уджыс керсис.

Öбед бöрын Тасим айыскöт пуксьылiсö шахматтэз сайö, Сима лыддьöтiс Савельевналö басöк рассказ киргизскöй нывка Джамиля йылiсь. И кöр Тасим бöра кутчис аслас радиоприёмник бердö, а айыс лöсьöтчис шутёммез вылö — сэтчин öнi олiсö колхознöй порссез, — Сима мунiс сыкöт: кöть пö малина нето сьöдъягöд öктышта. Но сы моз эз пет. Только ештiс сiя янсöтчыны порсьвердiськöт да петны куреньö, кыдз казялiс Проняöс. Гöгрöса, ён да ыджыт мыгöра зонка вöлi виль костюма, ботинкиа, а юрсö вевттис паськыт дора фетровöй шляпа. «Ылöстöм зонкаыт, — думайтыштiс Сима. — Этадз пöжö шондiыс, а сiя кыдз старик пасьтасьöм».

Проня мыйкö гуддисис кокора дынын и эз казяв, кыдз сибöтчис сы дынö Сима. Нывкалö охота тöдны, мый татöн керö Проня. А Проня öктiс кокора дынсис кытшöмкö кольцоэз, кöдна вачкисисö ниновöй заверткалань, только вöлiсö учöтöсь да совсем гöгрöсаöсь. Öктiс, петитчис бöрлань и пондiс чапкавны нiйö кокора вылö. Сэк вöлись нывка казялiс, что кокораö вартöмась туввез, и Проня старайтчö кышавны ны вылö кольцоэсö.

— Орсан? — юалiс Сима.

Проня бергöтчис, видзöтыштiс нывка вылö, шуис:

— Культурнöя шоччися. Öддьöн бур орсан. Нерваэз лöньсьöтö.

Дата добавления: 2015-11-16