|
Читайте также: |
Сiя жö арö миян аркмис нёштöм дело: куканьöс ош джагöтiс. Не колхознöйö, а ассим.
Инькаö мыйкö эз вермы — висьöтiс сiйö. Ме юкталi рытнас куканьсö да лэдзи öтöрö. Ась, мыся, öктас турунчирресö öтöрсис да вöлись йöрта. Ачым дворö мунi да и гöрдзза этадз жö кыза-вöснита.
Куканьжугыт кут да и кай гуна дорö. Сэтöн и шедас ошыслö. Асывнас вöлись адззи горт вöрокись. Кöз увтö чапкöма да уввезöн тыртöма. Кольöма сэтчö куканьсö, ачыс вöрö пырöма, айыт туй кузя. Колö висьтавны, сэтi жö и петöма.
Кывсьöма айытлö эта, локтiс миянö. Лöсьöт, шуö, пишаллетö, и след кузяс мунам. Пондылi панöвтны, но эг вермы. Ме, шуö, вайöтi сiйö, раз менам туй кузя локтöм, меным, шуö, и вештiсьны сыкöт. Сёравно пö кöркö пантасьны ковсяс сыкöт. Кык пишаль ме видзи сэк, а öнi öтiкыс абу — вузалi. Но, лöсьöтiм пишаллесö, пуляэзöн зарядитiм и мунiм. Пурттэз — боканым, пишаллез — киын, готов видзамö.
Петкöтiс ош следыс айыт визира дорö. Ордчöн и вöлöма ош позыс. Айыт, натьтö, и саймöтiс сiйö. Но, а ежели чеччас тöвнас — сэсся оз ни вод, тöвбыт пондас шатласьны. Сiйöн и ним сылö — шатун.
Узьöма этö ойсö позас и пыдöжык вöрас пырöма. Бöр мöдi бертны. Нем, мыся, сыкöт кутчыны, да сёдаки нуöтiс айыт: ежели, шуö, ме ог адззы сiйö, дак сiя кöркö адззас менö.
Ылö мийö пырим, но сэтчö зэрмис. Сылö лымыс, следдэс öшöны, а пон миян абу. Колö бы бöр бертны, а мийö сё мунам. Ыджыт круг ошыс керöма да деревняланяс бöр кежöма. Сэсся сылiсö следдэс — нем керны.
Пуксим, сёйыштiм да и гортö. Лучше пö кукань туша дынсис босьтны ошсö. А петны сё ни петас сэтчин.
Пемдiм туй вылас. Арся луныс эд мöс сюр кузя только. Шутёммез вылас петiмö, айыт и шуö: бöраным пö кинкö эм. Не я сiя кольлалö? Пишаллезнымöс лöсьöтiмö, смекайтчыны пондiм. Да мый пемытсис адззан? Туйыс öдва тöдчö.
Сiя местасянь айыт чуть я не бöрöн и петiс, сё бöрас видзöтiс. А ме одзсим смекайтi.
Но бур, вот деревняöдз локтiм, миянö пырим. Патроннэз кыским, пишаллез öшöтiм. Инькаö лунтыр тöждiсьöма да эшö умöльжык сылö лоöма. Гор вылiсь оз лэдзчы. И ваыс кайöттöм, и подаыс вердтöм. Адззö айыт, что ме лёль моз ни только вöрöтча, и мунiс ваысла. Ме петi сёдсьыны.
Только петi, кыла: вадöрас ош умöль голосöн рякöстiс. Чепöсси керкуас, кватитi пишальсö, зарядалi. Огородечас котöртi, эг лысьт улицаас петны. А тöдан эд кытöн ключыс? Огородеч бöрас тай, заборöн шочыника йöрйöм, мед пода эз пыр. Ключ весьтас локтi, кытöн ошыс горзö да му кузяс кыскасьö. Сёравно эд, мыся, мужикыт сы увтын. — Васька! — горöта. — Васька, тэ кытöн?! Йöрокас, шуö, ме. Эн пов пö, оз сiя чеччы. Вöлись кок садьö бырис и пукси ва му вылас. А вöлöма сiдз. Мунö айыт посок кузяс, тiян моз — протовар кузяс, нем оз и думайт. Локтас йöрок воротка одзас да мыйкö бергöтчас бöрланяс — кык кок йылын ош сулалö! Да ыджыт и ыджыт эд!
Шупкас ведраэсö ошыс вылö, а сiя — сап ведрасö! Айыт йöрокас, ошыс — сыбöрсянь да и разьны кутчас заборсö. Но и тово...
Кыдзкö эд пуртсö абу кольöма.
Дата добавления: 2015-11-16; просмотров: 45 | Нарушение авторских прав
| <== предыдущая страница | | | следующая страница ==> |
| Жысь Егорлöн витöт висьт | | | Кин сэтшöм Селик? Анькытш шогöт. Арча Кима баитö кöккöт. Король гымалö и чарлалö. |