|
Читайте также: |
Эта тулысö миян деревняын тшыгьялiс не только пода, но и отирыс: кыссис куимöт военнöй год, тшыг тысяча девятьсот сорок третьöй.
Мийö сёйыштiмö ни луксö, кушмансö, шöма капустасö, кутчимö ни кöдзыс вылö кольöм картошка кыш бердö, а веж турунок сё эшö эз мыччись.
Курöггесö вöлi немöн вердны и, мед нiя эз кулö, мийö начким да вильöтiм нылiсь коскаэзнысö.
Витя вонö да Лена сойö пластокöн куйлiсö полатьын — эз вермö ветлöтны тшыгсянь. И кыдз нарошно эта кадö дугдiс высьтiсьны мöсным, а йöвсявны сё эз йöвсяв.
Мамö öдва öшшис кок йылас, но прокод уджалiс колхозын. Рыттэзнас сiя часто гуддисис стопа местаэзын — кошшис сю туссез, гарйывлiс эшö кын муись шышыбарлiсь да пырейлiсь вужжез. Тшыг оланыс, кыдз баитсьö, быдлаö велöтö.
— Вот айыт бертас, бöра пондам бура овны, — баитлiс мамö. Эта видзчисьöмыс и сетлiс сылö вынсö. Ме сёдаки ляшмаси, кöть и чужьяси быд комокö, а рыттэзнас воть эг адззы — курöг шогöт видзис.
Öтпыр, апрельскöй лунö, ме кысси огородечö. Кельдöтöм турун коласiсь чеплялi ем йыв кыза туруноккез, сыбöрын адззи тшöтшкöрок. Сiдз и сибöтчи Ерика бабö стын дынöдз.
Сэтöн миян вöлi карч яма, конечно, нач ни пустöй. Яма вылас вöлi шоныт, и ме пондi онмöссьыны, но вдруг бöбись чирöстiс петух:
— Кот-кот-кот! Кот-кот-кот!
Курöггез, кöдна кокасисö стын саяс, öдззöтiсö шумсö.
— Кыт-кыт-кытöн?! Кыт-кыт-кытöн?! — юасисö нiя повзьöм голоссэзöн.
Ме лэбтi юрöс, адзза: стын коласöт пелитчö руд кань и öмас видзö кольть.
Вот петiс каньыс, лэдзис öмсис кольтьсö и лöсьöтчис, тыдалö, сёйны.
Ме вöрзьöтчи. Каньыс казялiс менö и бöра кватитiс кольтьсö.
— Руду, Руду! — кытсöвтi ме сiйö. — Сет меным кольтёксö... сет.
Сiя нёджжöвтiс мелань вежкодь синнэзнас, вöрöтыштiс потöм пельнас и тöдiс менчим голосöс. Тöдiс сiйöн, что Руду мекöт часто чериавлiс и прокод чöскöтлiс öмсö бурдзигыллезöн да паськытъюррезöн. А тöвнас, кöр ме пыравлi Ерика бабö ордö, каньыс пыр куйлывлiс менам пидзöссэз вылын: ме сiйö любитлi, а Руду мурзьывлiс меным ассис нехитрöй песняэсö.
— Руду, тэ пöт, а ме тшыг. И эшö шогала, — шушка ме сылö и нюла кöс тырппезöс. — Вот веськала, и сэк мунам кыйсьыны. Ме сета тэныт медыджыт, медъён песканöс. Тöдан, кытшöм сiя чöскыт! Тэ нем сэтшöм чöскытсö эшö эн сёйлы! Коль меным, Руду, кольтёктö, а ачыт босьт мöдiкö. Тiян уна кольттес. Но, Руду? А то кула ме, и тэнö некин черинас оз верд.
Каньыс куньыштiс синнэсö, нявöстыштiс гусьöн и пондiс зыртчыны чукнас стынина бердö.
— Тэ колин сiйö? Меным колин, Руду?
Каньыс бöра нявöстiс да кокнита труситiс-котöртiс ме дынö.
― Лок, Руду, лок, ме любита тэнö, ― кори ме сийö, и кот чеччöвтiс пöввез вылас. Перво сiя нюкайтiс пöвсö и турунчирсö, кöдасянь кайис баг да шыр дук, сэсся несйыштiс, вöлись чурдöтiс бöжсö и сибöтiс дуга моз копыртöм спинасö менам ки увтö. Кутi ме каньсö, жмитi морос бердам и мый вын уськöтчи кольтьыс дынö.
Босьтi ме кольтьсö и лэдзи каньсö. Сiя чеччöвтiс стын потш вылас, мунiс сы кузя гид пельöсöдз да пырис сараяс.
Ме пуксьыштi яма дорас шоччисьны. А петух бöра кыдз горöтас:
— Кот-кот-кот!
Видзöта: Руду петкöтö мöдiк кольть! Тули козоноккезнам синнэзöс — быль я сiдз, оз я эстöн орс курöг шогöтыс? Но кот, пöв синнас петухлань дзарьялöмöн, локтiс меланьö. Вот сiя петiс миян межа вылö и чапкис кольтьсö. Ачыс пуксис да пондiс нювны кынöмсö. Чеччи ме, сибöтчи жагвыв сы дынö. Кань только дзар керис мелань и эшö боёкжыка öдззис нювсьыны. Чöвтi фуражкаöс, пуктi сэтчö кыкнан кольтьсö. Малала каньыслiсь небыт спинасö, баита сылö:
— Может, эшö ваян? Уна тiян кольттес. Вон мымда курöггезныт, а миян öтiк абу. Сыбöрын ме куим пескан тэныт сета. А охота, дак тыпыввезöн верда. Ух кытшöм чöскытöсь нiя! Эн на эд пешлы? Но, мун вай, — и ме лэбтi сiйö стын потш вылö.
Руду видзöтыштiс менам синнэзö и мунiс тöдса туй кузя.
Недыр мыйись ме бöра малалi сылiсь юроксö, а кань мурзис да зыртчис бокнас менам коккез бердö.
Кольттесö сёйим ульнас. Витя нельки кышсö кажйис.
Рытнас мамö локтiс уджалансянь и вайис пизёк да пуис повалика. Ашынас йöвсялiс Чалушканым, и мийö быдса кружкаöн юим чижйöв.
Куимöт лунас ме бöра лöсьöтчи школаö. И кöр нёджжöвтi зеркалоö, ачымöс эг тöд: паныт меным видзöтiс гöгрöса сина, паськыт кымöса да чунь пасьта чужöма тöдтöм зонка. Сы кымöс вылын нюжалöмась кык чукыр, кöдна менам эзö вöлö, — дзик кöрттулöн кырöвтöмась. Эта вöлi не ме, Тури Петя, а кинкö мöдiк. Только юрсиыс менам — вежкодь-чочком, и шпынöн сулалö.
Медодзза лунас жö, кыдз чинiс Иньва, ме котöртi вуграсьны. Эта коста песканнэс тшыгöсь и уськöтчöны гаг вылас, дзик коска вылö поннэз. Ешты только кыскавны да вугыр бердсит мездöтлыны. Пöльтiс ыркыт тöлок, и ваыс невна гыасис.
Видзöтан юас берегсяняс, и вачкисьö, бытьтö ва вылас нöитчöм кучик ольсалöмась — чукыра да кырчча.
Ю дорас нять, дзик ырöш гушша плеснитöмась. Этö тулысся ва сэтчö вайöтiс. Сы кузя ештöмась ни шляндыны-ветлöтны пичиккез да ракаэз — кошшöмась сёян. Шочыника куйлiсö керрез, ны вылын шонтiсисö мурöма бабыввез.
Меным эз вöв охота нятьöсьтны нинкöммезöс, сiйöн пондi лэдзчыны кер кузя, но кокö нильдiс, и ме берездаси ваас. Вот и чериалi...
Гортын чöвтчи, пидзралi ва паськöмöс и öшöтi сiйö йöр вылö, а ачым пасьталi айöлiсь шабур и куньыртчи горвыв сёрдö. Бур, что мамö эз лöсяв сэтчö, а то лыддьöв-керис бы ассис молитвасö.
— А тэнö лöз старик мöдö шорö нуöтны, — висьталiс меным Витька.
— Мыйлö мöдö нуöтны, Витю?
— Мыля бöбалан, сiйöн.
— Ме разь бöбала?
— Сэк эн дзебсись... Мамö кошшис, кошшис и эз адззы. Витькалö куим год вöлись лоас, нем сiя эшö оз вежöрт. А
Леналö вит ни чожа тырас, сiя умнöй нылочка.
— Ленка, былись кошшис мамö?
— Ну. Егор дедыс тшöктiс, кöда нинкöммесö вайлiс. Лöз шабура тай.
Пырис мамö, и Витька сразу висьталiс:
— Петькаыс, мам, тараканнэз кыйö... Öмель-дурак сiя. Ну эд, мам?
— Этö сказкаын Öмеля-дурачокыс, кага, — велöтö сiйö мамö, — а Петюыс миян умнöй.
— А мыля гор вылас кайис?
— Тэ разь, Петя, былись гор вылас? — юалiс мамö. — Мый сэтчин керан?
— Вуграси да кынми.
— Но шонтiсь, шонтiсь, — баитö мамö. — Кысь только эг кошшы, а вадöрсис ог и думайт. — Мамöлöн голосыс пыр небыт гора, дзик нора пöлян, а часöт эшö небытжык. И голубöй синнэс, натьтö, сералöны öнi. Кöр сiя эттшöм голосöн баитö, сэк сылö, ме тöда, бур юöр вайисö. Этадз сiя долыт пораö баитö.
— Мыйлö, мам, кошшин менö?
— Жысь Егор вовлiс. Корö пастучитны. Зон туйö пö понда видзны. И нянёксö, шуö, шедтас, дугдас тшыгьявны.
— И мый тэ шуин?
— Баита, мыся, аскöттяс.
— Кöр тшöктiс локны?
— Ашын Синяшорö кайны.
Неöтпырись ме вöвлi Синяшорас, гленитчö меным сэтчин, и ме висьталi мамöлö:
— Муна.
— Мун, не мукöд кодь Егорыс, оз öбидит. Только нинкöммет бырöмась, да мöдö вильöсь сетны. А сэсся, шуö, ачыс кыяс...
Жысь Егор — мыкыра, чукылькодь кока старик. Ветлöтö сiя сьöкыта да валькыта — мöссэзсянь, тыдалö, велалöма. А мый медыджыт дивоыс, дак этö сылöн чужöмыс. Не чужöм, а чалöй пасьтор. Пашкыра тош да кузь юрси коласын тöдчöны только нырыс да синнэс. Пантасяс сiя вöрын няр сьöлöма мортлö — шöри сiйö повзьöтас.
— Вексö вöрын ола, вот и нитшсялi, — баитö Егор аслас гöна чужöм йылiсь.
Ме сылiсь ог пов. Тöда, что сiя бытшöм морт и стрась радейтö челядьöс да подаöс. Эшö тятюö баитлiс сы йылiсь: кык пай пö сылö добротаыс дöнзьöма. Добрöй старик, натьтö, совсем оз куж лöгавны, оз куж видчыны.
Вот сы ордö, Шулим деревняö, и локтi ме июньскöй асылö. Локтi одз — курöггез вöлись öтöрас петöмась, а отир оз тыдалö. Но Егорлöн ворота вöлi осьта. Сiя, тыдалö, курöггезся одзжык саймö.
— Чеччитö ни? — горöтчи ме, кöр пыри керкуö да сувтчи полать увтас. Керку ыджыт, югыт и сöстöм. Комыс торйöтöм заборокöн. Öшыннэс, заборкаыс, лабиччес, джоджыс — быдöс краситöм.
Заборка сайись петiс хозяиныс, шуис:
— Чеччим, зонка. Лöсьöтча вот фермаö. — Сiя видзöтiс чикыра синоккезнас менчим шабурöс, бырöм нинкöммезöс, кöшельöс сивйысим, йи бердсим ыджыт пуртöсöс да чунь йывнас гыжйыштiс паськыт нырбордсö. — А тэ ештiн жö сёйны?
— Сёйи. Мамö горсö пемытöн лонтöма.
— А-а! Чöскыта сiя тэнö талун вердöма.
— Похлёбкаок пувлiс.
— Поваликаöн тай эшö вердöма.
— Не-е, сiйö тöн сёйи... А кыдз тэ тöдiн?
— Менам киö кокнит, кокö чож, кылö лöсьыт, а синö лöчыт... Ноко миссьыштам да сёям, вöлись фермаö мунам. Овдоть, верд-ко миянöс.
Кöд коста мийö миссим чугуннöй рукомойкаись, Овдоть, Егорлöн иньыс, пызан вылö вайöма похлёбка, яичница да черинянь.
Пуксим пызан сайö. Егор ме одзö пуктiс нянь шöрöм да вештiс яичницасö.
— Тэ похлёбкасö панялiн ни, дак этö сёй, — висьталiс сiя и пондiс крöшитны похлёбкаас чорыт нянь.
Кöть ме и неважын сёйи, а некой пору гартыштi шöрöмсö да джын яичницасö. Сэсся öвси — колö и честь тöдны — вильöтi паньöс.
Егор осьтiс чериняньсö, пуктiс одзам ыджыт коркатор, шуис:
— Тыпыввезöс куталi. Öддьöн госаöсь. Пешлы, эн дышöтчы.
— Киэзнат куталiн?
— Чуть я не киэзнам. Арайыс нач кöс, сакыштны оз позь, а нiя, дзик порсьпияннэз, нятяс нырьясьöны... Юктав-ко, Овдоть, миянöс.
Ырöш вöлi сук да чöскыт, бур квасноись. Ме пички-юи сымда, что лолавны немöн лоис, и чеччи пызан сайсис. «Вот бы мамö этадз вердiс, — думайтыштi ме. — Да кысь ни, öтнас уджалö да... Но, öнi ме понда отсавны, кокнитжык мамöлö лоас. А сэсся, поди, и войнаыс кончитчас, айöс гортö лэдзасö».
Егор сёйис дыр да уна — лунтыр кежö. Эшö юис ырöшсö, вöлись петiс пызан сайись, чышкис öмсö забор вылын öшалан чышкöтö. Сэсся кыскис лабич увтiсь виль нинкöммез ― пышналöмöсь ни, воннезöн — тшöктiс менö кöмасьны.
Ме кöмаси порог дорас, а сiя пасьтасис. Перво сiя пасьталiс лöз шабур, сэсся кышалiс мужиччöй запон, а медвевдöрас — брезентовöй плащ. Западня вылын сылöн вöлi заптöма ни ыджыт пестер, чер да котёлок. Этасся, сэтöн жö куйлiс вель ыджыт кöзича. — Мый, Петя, сёянтö босьтiн?
Паськöтi кöшельöс, кытöн вöлiсö кынымкö кöвдöмок лён пизись, луккез да бутылка йöв. Егор сюйыштiс сэтчö нянь чöвпан да уль картоввез.
Жысь Егор олiс только иньыскöт. Вöлi нылöн зон, да сьöкыт ранаэзсянь кулöма госпитальын. Уджалiсö кыкнанныс, тшыг нуждасö эзö тöдö. Нысянь и соседдэслöн челядьыс вöлiсö пöтöсь.
Ворота сайöдз миянöс кольлалiсö Овдоть да кузь гöна кань.
— Дак тэ, Овдоть, вайöтлы ой кежас челядьсö, — баитiс Егор. — Видзöтан кö, гажажык лоас.
— Вайöтла, вайöтла... Мунö, ен тiянкöт.
Мийö мунiмö паськыт улица шöрöт, читкыля лудовка кузя. Эта улицаыс петкöтiс миянöс деревня сайö, кайöтiс мысок вылö. Мыччисис рас. Сы сайын сулалö ферма. Сэтöн видзöны мöссэз, куканнез, порссез да баляэз.
Петiс шондi, и расыс мичамис, пондiс шыннявны. Сы вевдöрись розовöй кымöроккес чочкоммисö и лэбисö вылöжык. Гажöнжыка киссис му вылö ыбшарлöн сьылöм. И осяа ыббес, и турунсялöм туйыс, и важмöм йöрыс — быдöс пондiс шонавны и кокнитика паритны. Эта кизерик парын сьöкыта лэбалiсö дбруньгаггез да бабыввез.
Миян юр вевдöрын öтiкöн и шытöг деревнялань кыссисö ракаэз. Нiя лэбзисö лажмыта, и кылiс миянлö, кыдз шутнялiсö нылöн борддэзныс. Медкузь майöг вылын пукалiс кайварыш и видзчисис, тыдалö, кöр аслас позiсь мыччисяс дзимшыр.
Фермаын сулалiс шум: баксiс да виксiс пода, дзуртiс ворота, кылiс чирзöм да джынняннэзлöн тронöтöм.
Миянöс панталiс Титовна, фермаись хозяйка и колхознöй парторг. Сiя вöлi паськыт пельпона, ыджыт мыгöра. Чужöмыс гöгрöса, ласков, но тшыкöтö сiйö сьöд пятно, дзик боби тусь — мампас. И пукалö сiя как раз тшöка шöрас.
— Дырöв узит деда-внучека, — сералöмöн баитiс сiя. — Высьтiссис ни миян, колö лэдзны мöссэсö.
— Ачыт эд тöдан, Титовна, ме пöрись, а ёртö учöт. Öтiк кылöн шуны — челядь. Вот и мошкоритчам.
— Öткоддес и öксимö татчö, да сё тай уджаламö. Кок йывсиным усям, буди... Кöр эшö бертасö нiя, мужиккес? Кывзiт радиосö — бöра немецыс пырö...
— А порсьыс сiя прокод чужöй йöрö пырö, да сё тай вашöтöны... Кöда одзас мунас?
— Рыжкосö лэдзам, — шуис Титовна.
Телегаын куйлiсö öтамöдö сюйöм ведраэз, геззэз, сов комоккез. Ны коласö мийö тэчим котомкаэзнымöс, вевттим менам шабурöн да Егор плащöн.
— Сулав, ужо, чуть эг вунöтчы, — клопкис бокас Егор да котöрöн пырис керкуас. Чожа сiя петiс. Киас вöлi отопки, кöдö каттис мыйлöкö трепичöн и сюйыштiс котомкаас.
— Мыйлö тэ сiйö, деда?
— А кыдз жö! Ассиным хозяинсö сьöраным нуöтам, — серьёзнöя висьталiс Егор.
— Кинöс этö? — эг вежöрт ме.
— Да суседкосö.
— Сiя разь отопкиын олö?
— Олö сiя гор сайын, а отопкиыс — карета сылöн. Тöн ме пуктi гор саяс каретасö, тшöктi пуксьыны сэтчö. А талун вот кайöтам Синяшорас, виль керкуаным. Сiя одзись додяс прокод мунö.
— Вон кыдзи!
— Сiдз, зонка, сiдз. Давай тэ босьт вон этiйö шатьсö да сувт Шулим улицаас. Вöр туй кузяс иньдöтан... Эй, кин Рыжконас мунö?
— Ме, дедыс, ме, — шыасис Шурка, миян деревняись нывка.
— Дак вöрзьöтчы, мун одзас. А тэ, Титовна, отсав Петяыслö. Шурка чеччис керку бокись, дзебис кофтаас письмоэз, коккесö кыскалöмöн мунiс вöлыс дынö. Сiя вöлi недовольнöй, что эз сетö досповна лыддьöтны письмоэсö. Натьтö, бöра фотокарточка получитiс. Сылö быд лун письмоэс локтöны. То танкистсянь, то моряксянь, то лётчиксянь. И кöр юалöны сылiсь, кинсянь письмоыс, пыр öтмоз отвечайтö:
— Меддонаö бöра гижöма.
— Кытöн сiя олö?
— Город — пö-пö, улица — тра-ля-ля, керку — два нуля. Пашка, сылöн воныс, гусявлiс Шуркалiсь письмоэсö, и мийö каждöйсö лыддьöтлiм.
Вöввез вöрзисö, и Шурка сразу жö пондöтiс нора песня.
Егор осьтiс заворсö, кайис йöр вылö. Мöссэс только этö и видзчисисö: тэрмасьöмöн, пелитчöмöн уськöтчисö непаськыт заворас. Старик öт кинас видзсис майöг бердын, а мöд кинас макайтiс сы одзöт мунiсь мöссэз весьтöт — лыддис нiйö.
Мöссэс вöлiсö сьöдöсь, гöрдöсь, сераöсь, чочкомöсь, а öтiк вöлi нельки лöз. Мукöдыслöн сюррес ыджытöсь, мукöдыслöн только чунь кузяöсь. И быд мöслöн сюррес аскодяöсь: кöдалöн веськытöсь, кöдалöн пытшкас чукыльтчöмась, дзик гöр ороппез. Унажык мöссэс вöлiсö сюртöмöсь.
Медбöрын загонсис петiс гöрд пороз, паськыт кымöса и кыз мороса. Сiя локтiс ме весьтöдз, сувтчис. Дыркодь видзöтiс ме вылö, лöга ловзисис да беринь-беринь керис юрнас. Ме вешшыштi бöрлань, а Титовна дöвкис сылö:
— Тэ, Король, эн чушьяв öддьöнсö, эн повзьöтлы неполiссесö. И пороз вугралiс-мунiс мöссэс сьöрö. А ме думайтi: «Кытшöм тэ король, сюртöмыс? Коронатöм король!»
Локтiс миян дынö Егор, макнитiс шатьнас мöймуся куканнезлань да досадуйтiс:
— Öдва коккезнысö вöрöтöны.
— Не гöрны нiйöн, и йöв не высьтыны нысянь.
— Сибдасö кытчöкö, жысь, а тэ — отвечайт. Колiс гортö кольлыны.
— Тэ сiйö вежöрт, Ёгорушко: куш идзас вылын кыским. Сё мöссэсö пöтжыка вердiм. Ачыт тöдан, кытшöмö йöв плансö пуктiсö. Да эшö обороннöй фондö сетiмö. Али эз ков сiйö керны?
— Кыдз инö, ежели не сетны дак? Боецлö оз туй тшыгьявны. Ачым пешлi войнасö. И японскöйсö, и германскöйсö, и гражданскöйсö. А Суворов кыдз баитлiс: солдатлöн сэк бурмö сьöлöмыс, кöр сылöн пöт кынöмыс.
— Вот сэтчö жö и локтiн ачыт, — горöтчис Титовна. — Кыдзкö мырсямö ни. Бур поскотинаас нiя чожа вочмасö.
Мöссэз мунiсö йирсьöмöн, жагöника. Жагвыв кывтiс и Егорлöн да Титовналöн басниыс. Унажыксö нiя баитiсö олан йылiсь, удж йылiсь, война йылiсь. Да öнi пыр сiдз: мыйсянь бы эз пондöтчы басни, а кончайтчö войнаöн. Эта — медкузь басни, и сы дырни прокод овлö ойзöм, ыш лолалöм, а то и синваэз.
Егор Титовнакöт не эз ойзö, не эз горзö, кöть и кыкнанныслöн таво аркмис ыджыт горе: война ньылыштiс Егорлiсь зонсö, а Титовналiсь жöниксö. Может, и сысянь оз горзö, что гореыс нылiсь быдöс синвасö ни пичкис. А то и надежда кытшöмкö видзöны.
Вуджим медодзза лог. Мöссэс дыр чурскöтчисö сэтöн, только унажыксö юисö не шорсис, а гöппессис. Вуджим бура, некин эз сибды, кöть и мöртчалiсö зыбунас пидзöсви.
Кольччис бöраным Шонытмыс — кöркöся шутём, тырöм понулляöн да поснитик пуэзöн. А одзаным сулалiс ыджыт вöр.
Эта вöлi важ вöр, сыналöм да перкйöм лёк тöввезöн. Уна пу валяйтчис му вылас и сiсьмис. Синяшорöдз тасянь дас километр ылына, но сэтчинöдз сё кыссьö бур туй — Шулим грань. Сiйö керлöмась сто год одзтi, медбы кыскавны строгановскöй заводiсь чугун.
Мöдiк лог сайын, Гавкамысын, сувтчим шоччисьны. А Корольлö, тыдалö, эз гленитчы эта, и сiя öдззис буавны-баксыны да куртны одзись коккезнас. Но сы дынö локтiс пöрись мöс, пондiс нювны сылiсь кыз голясö, и пороз бурасис. Лöньсис сiя, мышкыртiс юрсö да кунис синнэсö — сэтшöм долыт лоис сылö.
Куканнез сразу водiсö ― месталö радöсь. Мукöд мöссэс сунасисö кок йыланыс и мыдзтöг жуитiсö öммезнаныс.
Быдöнным пуксим вуджöрö, павжнайтiм да шоччöтiм сьöкытсялöм коккезнымöс. Титовна да ямщиккес, кыдз пöтiсö, пöрöтчисö небыт турунö и сэк жö ланьтiсö. Только Шурка бöра кыскис письмоэсö.
Мийö мунiм медвылын местаас, кысянь быдöс табуныс и вöввес тыдалiсö. Егор öзтiс трубка да пуксис мыр вылö, а ме пондi серöтны бедь-пеганука.
— Деда, а мыля эта местаыс шусьö Гавкамыс? — интересуйтча ме.
— Мыля сiдз шусьö? — мöдпöв юалö старик и босьтö юр вывсис вуруновöй колпаксö да пуктö ордчöн. — А морт сэтшöм вöлöма, вот сы нимöн и шуöмась. Богатырь вöлöма.
— Висьтась сы йылiсь.
— Мый, поди, висьтасьны. Лучше узьыштiн бы, мыдзин эд. ― Эг мыдз, деда.
— Эн, дак кывзы нö, чожажык кадыс кывтас. Вот кывлi ме сэтшöм висьт*...
Дата добавления: 2015-11-16; просмотров: 45 | Нарушение авторских прав
| <== предыдущая страница | | | следующая страница ==> |
| ВИДЗÖТ, КЫТI МУННЫ | | | Жысь Егорлöн медодзза висьт |