Куим сотня грех

Тöн Олявка ойшöрöдз лöсьöтчис экзаменнэз кежö и талун удж вылö локтiс сёрöнжык. Сёрмис начальник, кöда сёрмöмыс понда наказывайтö мöдiккезöс. Стыд сылö вöлi медбöрын пырны контораö и перво кежис складö, Шурончик дынö, и оча син пантасис Чикиськинкöт. Сiя не öтiк месяц ни, кыдз баитiсö, вöлi решётка сайын, а, видзöт, лэдзöмась. Пантасис, сувтчис и чöлö.

— Мый сiдзи повзин, Гавриловна? — юалiс Чикиськин да вöрзьöтыштiс юр вывсис шляпасö. — Ме абу уголовник. Сiйöн и лэдзисö. Расписка сьöртi, конечно... Пуксьы-ко, шоччись, — сiя кыскис пызанок увтiсь табуретка. — Видзöт тэ, кыдз рочсялöмась: быдöс виль, быдлаöт краситöм... Да, лэдзисö недыр кежö.

Олявка пуксис, лöгöнмоз горöтчис:

— И медперво татчö локтiн, медбы чери бöж вильöтны?

— Бöжпон. Буржыксö меным öнi оз ни мыччалö. Шурончик чушнитiс, чышкис пызан вылiсь чери коскаэсö, висьталiс Олявкалö:

— Сiя эд тэнö кошшис.

— Эн дзирдав, Шура, — паджис сiйö Чикиськин. — Тэнö я, сiйö я кошши — кытшöм разница? И тэ, Гавриловна, эн лöгав. Мый кошши — адззи. А мый адззи — быдöс менам, — öдззис философствуйтны кодззыштöм гöсьыс. — Кылан, пред: эн лöгав.

— Государствоыс тэ вылö лöг, Кирилл Потапович. Сiйö бöбöтлiн.

Чикиськин лэбтiс одзись чуньсö, дзик регулировщик сера бедьсö:

— Э-э, стоп, Гавриловна! Ме — тожö государство. А точнöйжыка горöтчыны — государствоыс — этö ме. И кыным ме пöтжык, кыным вынажык да гажажык, сыным и государствоыс пöтжык да ёнжык. И эта понда менö колö только ошкыны — что пöта олi. Сiдзкö, ме эг бöбöтлы, а кыдз кужи, сiдз и ёнтi-донтi ачымöс. Перво ачым пöта, а вöлись тэнö, Гавриловна, верда. Вежöртiн я?

— Но, но, государство, верд инö менö, верд, — сё сiдз жö лöгöнмоз шуис Олявка. — Ачыт год-мöд кежас, натьтö, пöтiн ни?

— Эн сорась, Гавриловна.

— Сiя и эм, — гажтöма шуис Шурончик. — Касьтыв, Серанька, гожумтö!.. Вон садикись локтiсö, колö продуктаэз сетны. Тэ эстöн лоан, Гавриловна?

— Ме тэкöт муна, — шуис Олявка да юалiс Чикиськинлiсь: — Кöр нö судыт?

— А повесткаэзныт абу на, дак не чожа эшö... Но, прощевайтö нö, — Чикиськин вöрзьöтыштiс шляпасö да петiс öтöрись ыбöсас, а инькаэс — пытшкисяс.

Эшö январь вылас Олявка вашöтiс удж вылiсь винаюись шофёрöс и эта кузя öнi адззö быдлунся мука. То и часöт кольччö неделя бöрьян лунöдз, а складын колан запасыс абу. Колö бы вайны берся товарсö — и немöн: машинасö склад оградаас марайтöны чавканнэз. А райпотребсоюз оз сет, шуöны: «Кыдз вашöтiн шофёртö, сiдз и вайöт».

Шофёр мунтöнняс дöвгис: «Эшö ёна жалейтан менö. Но пондан корны — ог лок. Будичи ладом кеймисян, дак...»

Жалейтны жалейтö, а кеймисьны сэтшöм отирыслö Олявка эз велав, вот и летö юрсисö, да этасянь товарыс сёравно оз лок, коктöм сiя. И бухгалтерыс оз отсав: пызан бердсис оз вермы калькöтчыны, бумагаэс пытшкö вöйöма.

«Чикиськин, ёрдöм коска, öтiк часöн бы мöдöртiс и банöвтiс этö проблемасö, — председатель бöра бур кылöн казьтiс важ бухгалтерсö, — а эта — оз, оз!» И сэк жö пырис юрас дума: колö корны заместительöс. Мöд сельпоэс сьöртi сылöн хозяйствоыс только невна учöтжык, а райцентрсяняс вон мый ылына, сiдзкö, сылö колö овны мöддэс моз жö.

Кабинетö пыртöн, кöр сы бöрсянь сувтiс быдса лёдз — тöдса и не тöдса отир, — эшö öтпыр ошкис ассис решеннёсö.

Юасьтöг-висьтасьтöг, чуть кок бöрресö оз тальö, пырисö кык сьöд мужик.

— Олам-вылам-салам! Здрастуй, дарагой началник, — горалö пöрисьыс.

— Узбек угошшал твоя коми, — гöрдззö мöдыс, томжыкыс, и сетö гöснеччез. — Кушай киш-миш, кушай узюм — сто годов дэвка будэш....

Арсяняс этшöм «сьöдкайес», кыдз нiйö шуöны гублянса, вовлiсö Ферганасянь, и Олявкалö эта не диво, сiя сразу юалiс, мый вайисö и мымда:

— Ест урюк, ест яблок, кампот — все ест, всо харош.

Что бурö вайöны, Олявка этö тöдö — и вузасиссес, и босьтасиссес ошкöны, и тшöктiс примитны.

— Пасыба, дарагой, пасыба!

— Салам-олам, началник!

Радуйтчис Олявка: кöть косьтöм фрукттэсö вайисö, изюмсö, а то кöр ни отирыс юасьöны. Вот эшö таг бы...

Пырö старик, здоровайтчö, чöвтö пельпон вывсис — одзсис и бöрсис — оча домалöм тыра сумка да сетка, сувтö председатель одзö.

— Пуксьы, дедыс... Ог тöд, кыдз шуöны.

— Тэ менö эн пуксьöт и некыдз эн шу, а висьтав: мый понда ларёксö Зуйпиягас видзат?

— Отир понда, дед...

— Куш джаджжесö тай, погледисö вузалö. Сов абу, матег абу, рожки... Преникла Гублянö котöрт...

— Талун жö быдöс эта лоас, — календарьö гижикö кöсйис Олявка. — Спасибо, дедыс, что юöртiн.

— Ишшо россэз да коромыслаэз оз примайт, а тшöктiс керны. Вурун тожон оз босьт... Кык мешöк öксис. Пола: коргаг сёяс... А не я ачыт миянöс корин: сетö картов, вайö вурун?.. Кыным нö начальник сельпоаныт, кинöс кывзыны?

— Босьтам, дедыс, быдöс босьтам. И пимиэз вермам сетны вуруныс понда.

— Мöдыс öддьöнöв дёка вöлi, сякöйсö ваялiс, дак гусясис бöра. А эта жаг малак, лёль кодь, некытчö киэс оз сибалö, немö оз письты... Отсав-ко черöшванöс кышавны...

Кышалiс Олявка, иньдöтiс стариксö ыбöсö и пыртiс сьöрас Виль Гублянiсь Нинаöс, Андрей Никитичлiсь сойсö.

— Менö зоотехникыс тшöктiс пыравны, — шуö Нина. — Ась пö фермаыс понда сапоггез колясö. Да пластинкаэз вильöсь корöны: Кобзон, Толкунова... Эшö эта, американецыс... Дин Рид. То заявка нывкаэс гижисö... Тонька менам, ыпы, жöникöс адззöма, да лэдзчыла, мыся, кенакö дынö. Свадьба, поди, пондасö керны, а менам нем и нем абу... Терпит бы эд кык годсö да и пет вöлись, кöр велöтчиссяс, а нiя, бульчика синнэз, нем оз думайтö... Кöть бы узьлан бельёсö босьтны. Да и плащ бы колö. Видзöтлы, Оля. Да и Андрейыслö висьтав, оз я кысь адззы.

— Адззам, Нина, мый колö. А воныт Москваö мунiс.

— Командировкаö? Мый нö эз висьтась?

— Адззисис морт, кöда айыткöт öтiк частьын воюйтöма.

— Кайлö миянö, кöр локтас, — корис Нина и прощайтчис.

Сэтчö звонитiсö. Олявка босьтiс трубкасö, тöдiс райпотребсоюзiсь председательлiсь голоссö, шуис:

— Как раз тэ и колан меным... Дак мый, бöра важ туй выланыт петiтö?.. Кытшöм важ? А бур товарыс туйö деньга ыставны... Пассез эз локтö, шапкаэз — абу, шифер — лысiс... Он кыв? Сэк эшö висьтала: товарыс туйö районсис иньдöтöны только деньга да фактура. Тэ кыдз думайтан, эта порядок? Он тöд? Дак вот тöд: эшö сiдз керасö — райкомö муна, госконтрольö жалуйтча... Сэсся оз ло сiдз? Но, видзöтам... Менам быдöс, öнi тэнö кывза... Лун-мöд кежö машина? Спасибо сы понда, öддьöн даки колö... А шиферыс мед вöлi заптöм! Миян нёль морт керкуэз керöны, а вевттисьны немöн...

Эшö районыскöт баитiкö кабинетас пырис Катай Катя, учöтик мыгöра, но ёновöй старуха. Катялöн эмöсь ныввез и зоннэз, а сыкöт олö öтiк внучок-шестиклассник.

— Дзолинь бабтö талун бöра вöтаси да сы кузя и пыри унажыксö, — пондöтiс баитны Катя. — Умöля эд вöтаси... Олö я эшö?

— Эз тай нем кывсьы.

— Гавра гозъя мый керлöны? Поди, нучокныс гöтрасис ни?

— Олöны тай,— отвечайтö Олявка. Сылö некöр басниэсö нюжлавны и тэрмöтö Катясö: — Висьтась, кытшöм могöн пырин.

— Ковёр бы колö. Перчидскöйö. Часöт жö сетан, али очередьö сувтöтан? Яй ме сетлi... Арнас, ог кув кö, эшö лоас...

— Ковсяс видзчисьыштны.

— Видзчися, видзчися, матушка, только гиж. Мийö эд пайщиккез жö, книжка эм. — Катя пуктö пызан вылас чышьянокö каттьöм билет.

— Часöт оз ков сiя, — шуö Олявка. — Нылытлö заптан?

— Нылö — вундыштöм шöрöм, ась ачыс заптö. Менам зонка быдмö, сы понда тöжда.

— И машинасö сы понда небин?

— Кин понда нö сэсся? Ась сулалö годсö-мöдсö, а вöлись и руль сайö пуксяс. Видзöтан кö, и тэнö гортöдз али ягöдавны кыскылас... Но, ог ни манит... Гиж инö очередят. Да миянöдз петав.

— Спасибо.

— Енлö шу...

Бöра звонок. Босьтiс трубка, шыасис:

— Савыркина кывзö!.. Бур лун, Веня! Партвзнос колö? Часöт жö? — И сэтчö кутчис баитны эшö мöдiк клиент. — Алё! Алё! Кин мешайтö? Междугороднöй? Москва? Тэ я мый я, Андрюша? Но, баит, баит!

Кывзiс и жалейтöмöн гогинялiс юрнас: Андрей Никитич абу панталöма айыслiсь ёртсö: сiя мунöма Кудымкарö, Верепов дынö, и сiйö мортсö колö пантавны Олявкалö, пантавны эта жö рытö да лöсьöтны юан-сёян.

Олявка öтнас овтöн эз тöд, кытчö воштыны кадсö и мукöд лунö не öтiк часöн туплясис диван вылын да орсiс канькöт и пыр корис судьбалiсь жöник, корис семья, кöда сьöрын мöдiс ой и лун видзöтны-котрасьны. Но вот сылö оланыс сетiс жöниксö, а инькаыт юрын нет-нет да и уйыштас-чужас, дзик гожся ю вевдöрын чериок, зоравтöм дума: «Буржык я этадз-ту? Кытöн свободаö? Одзжык тай пыр керлi ас мознам, некин эз указывайт...» Но чулалас зэлыт кадыс да кыз уджыс, и Олявка бöра гажа да том, и сьöлöмыс орöтчö-кыскö Андрюша дынö...

Верепов тэрмасис, баитiс дженыта и нельки эз и юав, быдöс я бур гортас. Но не öтпыр шуис: «Пантав, уд-верд, кыдз роднöй айöс». Эта вöлi приказ, и сысянь Олявкалö лоис невна недолыт, эта бöра казьмöтiс одзза жöниккöт олöмсö, кöр сы вылö и горöтлiсö, и кулаккез сы одзын пидзравлiсö.

«Раз тшöктöны, ковсяс мунны городö, — сьöкыта ловзисис Олявка. — Да эд парторгыс эшö корис...» Сiя дзимлялiс одзсис бумагаэсö пызан пытшкö, видзöтiс коридорö — абу я кин сы дынö? — графин увтiсь поднос вылö тэчис узбеккезлiсь фрукттэз да петкöтiс бухгалтерияö.

— Дзирыт Узбекистан тiянлö иньдö салам да гöснеч. Сёйö пö на здоровье да сто годöдз олö!

— Чöсмасям инö, чупкöтчыштам, — шуис техничка Татя, шнур вылö газетаэз пысалiкö.

Пасьтасьтöнняс Олявка вель дыр видзöтчис шифоньерись зеркалоö да пешлiс чуньнас тырп вывсис зубыт места, кытi мöдö поллясьны. «Этö кöдковнуся кынмалöмö петö, — вежöртiс сiя да павкöтiс шульга синкымсö — сэтi тожö мыйкö зэлöтö, и адззис мöдiк неладно: пуксьö-паськöтчö чирей. — Ох, и басöк портреток лоас бöрьян лун кежас, — сералыштiс сiя ас вылас да пондiс киськавны графин понсис цветтэз. — Чöв, чирей, вот уськöта тöдвылам бабöлiсь молитвасö, дак тэ, лёкей, öтiк часöн косьман, — и сiя пондiс, дзик школьница стиххез велöттöн, мыктавны-вынтiсьны: «Чирöй Васильöй, чирöм попыльöй! Тэ эн госсяв, тэ эн тырсяв, а косьмы да усь, кыдзи сьöдтусь».

Кöр ни этö кывлiс, может, тридцать год сэксянь чулалiс, а, видзöт, сё тöдö. Может, сiйöн и олö сы юрын эта, что кöть и белиберда, а кыдз песня — сьывны охота?

«Куимись кытшöвта, куимись тшöкта... — джöмдiс сэтчö, сорасис, но сэк жö колан кыввес локтiсö асьныс:— Куимись кытшöвта, куимись тшöкта: чушкы, ош пинь, чувйы, кульчунь! Чушкы, ош пинь, чувйы, кульчунь! Чушкы, ош пинь, чувйы, кульчунь! — конецöдз лыддьöтiс да серöмтчис: — Вот бы эшö нiйö чуннесö да пиннесö — и шаманитны позяс...» Но веськöтчан атрибуттэсö некысь вöлi вайны, и инькаыт дойман местаэсö мавтiс дона духиöн, кöдö сылö нимлун коста козьнавлiсö сельповса.

Мунан одзас, кыдз важын ни велалiс, пырис бухгалтерияö, юалiс, оз я ков кытчöкö гижсьыны, висьталiс бухгалтерлö:

— Ме мунi парткомö, сэсся агитпунктö пырала и городö лэдзча; ежели öддьöн понда ковсьыны, звонитö, — и сiя висьталiс Андрей Никитичлiсь номерсö.

Венька öктöма бюро — баитны кöдзан кад йылiсь, и Олявка колис деньга да вычкöп петiс бöр. Зато агитпунктын джын öбед кадсö чулöтiс. Сэтчин луннас етша отирыс овлö, дак клубись техничка и Катай Катя кузьлун чулалöм кадсö пожналöны да йöзыслiсь нятьöсь нямöттэзнысö бергöтлöны. Мукöдпыр, кöр мыдзас лыддьöтны книга, нылö отсавлö Максимовна, клубись зав. Сiдз и талун вöлi: пуксьöмась старухаэс гор дынö, керсьöмась оча öм и туткöны-баитöны. Катя, кыдз пырис Олявка, сиг-миг ныкöт — и давай одзлань вашöтны, ассис олан пажытьсö перкйыны-треситны:

— Мужикыслö инькаыс — ольпасьын дона. Кöр шонтан сiйö, сьöлöмсö бурмöтан сылiсь — и бердас жмитас, жалейтас. А мöдiк пораö сiя не морт, и тэ — срошнöй, раб. Этö ме бура тöда: квать мужикöс дзеби.

— Сынымись жöник сайö ветлiн?

— Ветлi, ягöд, ветлi, тусёк... Пензиясö ни сетiсö, да эшö кыкöс дзеби, кык керку вузалi... Эта куимöт лоö...

— Кыдз нö тэнö сiдз босьтöны? — пырö сы басниö Максимовна.

— Чöскыт ме, öддьöн öнджа... Одзжык-то вöвлi бытьтö... Да и öнi ышö...

— Рушмöмыс кытшöм ни чöскыт! — сералö Максимовна.

— Ме рушмöм? — бергöтö сыланьö юрсö Катя, и сылöн векнитик синоккес эшö öддьöнжык векнямöны. — Ме, батя, бура ышö вöрöтча. Шуа тай: квать öнджа пöрöтi... квать юр...

— Да эшö неöтiкö пöрöтан, раз сiдз вöрöтчан, — вöтсалö Максимовна.

— Сiдз и плантуйта, — оз суськись Катя. — Сюлёпан тай корö ни: кулас, шуö, старикыт, дак ме дын лок. И муна, натьтö. А дыр я сiя олас — гор вылö ни оз вермы кайны да?

Сэтчö горöтчис Савыркина:

— И кин увтырись тэ сэтшöмыс петöмыт! Тэ кодь комиэс сэсся абу.

Катя кокнита отсалiс сылö:

— А ме абу коми, ме чуд увтыр, ош родiсь... Чужан гортам ен вöлi, дак сiя — пуовöй ош: кузь гыжа, гöрд сина, паськыт öма, — вот сэтшöм бовбан! Висьтасьлiс бабö: «Этö миян важ дед ассис баласö кольöма. Сiя ош вöлöма, деревняэс ен туйö олöма, но обидитöмась сiйö отирыс, и вöрö пышшöма. Пышшöма и миянлiсь греххезнымöс сьöрас нöбöтöма: ош гöнсö, ош лöгсö, ош гыжжесö да и ош нудасö.»

— Öння еныс не ош, тэнчит греххетö оз нöбöт, аслыт колас ны понда вештiсьны, — казьмöтiс Максимовна.

— Триста грех — öтiк ответ! Частожык йöкты — быдöс греххет усясö-киссясö!..

Пырисö тöдтöм отир, висьталiсö:

— Ми окрисполкомись, агитпункт мöдам видзöтны. Видзöтiсö, мый эм клубас, кыдз сiя мöдöтöм-баситöм, кытшöм орсаннэз эмöсь, мый позьö лыддьöтны, любуйтчисö самоварöн да чайнöй сервизöн, кöдна сулалiсö торья жырын. Максимовна быдöс висьтасис, дзик виль монь добрöй аньлö, висьтасис, мый одзлань лоас, а Катя казьмöтiс и неважын керöм туалет йылiсь. Окружнöй начальство мунiс одзлань — леспромхозö, а Олявка котöртiс гортас, медбы мыйкö лэдзчöтны городас синiсь.

Асывнас этö туйсö — гортсяняс сельпоöдз — сiя мунiс казявтöг, орсöмöн, а рытнас, кöр колiс бы лэбзьыны борд йылын, часто падмылiс, пезьдалiс, бытьтö кыскис ыджыт ноша, кöть сумкаас вексö вöвлi öтiк булочка да конфетаэз. И талун сiдз жö: и тэрмасис бы, да жагöна одзлань вешшис. А эд луншöр вöлись, джын уджыс керöма.

«Тулысыс нырыштö али годдэзö? — юасьö думанас. — А кыдз нö Катяыс сё том моз олö? Может, сiйöн и оз пöрисьмы, что пыр пöв кок йылас чеччалiс, некытшöм грехись эз пов — мый колö, сiйö и керö, кинкöт охота, сыкöт и олö? Стыдтöм, öмлöстöм мортыс прокод кык пай кватитö, сiйöн и кык жылаа. И мый эд петö: мöдкодьсялöны деревняэз, городдэз, вежсьö нылöн баныс, мöдöрыс, шаркйиссьö муыслöн вевдöрыс, а стыдтöм мортыс кытшöм одзжык вöлi, сэтшöм и öнi кольччис, сэтшöм и одзлань лоас, разь аппетитыс ыждас».

Горт дынас сибавтöн Жогор мыс вылiсь кылiс тракторлiсь неровнöй шы — этадз горалö сьöкыт удж керикö бульдозер. «Не я Жогорсö мöдöны пöрöтны? — нарошноись шуис ас пондас да петыштiс горт саяс, Котöрок керку дынö, кысянь бура тыдалö шапка юра пожумыс. — А быль тай сiйö люкалö!.. Кинлöн жö эта?»

Трактор керсяс бöрлань, содтас газсö да жагöника, берегитчöмöн, зэлöтö нырнас пусö. «Ровно тай абу код, но мый сылö колö пожумыссянь? А кыдзи быль пöрöтас Жогорнымöс? — повзьыштiс Олявка. — Мый сiя керö, кульпиян!» — и уськöтчис Котöрок ордö, но сэсся вежöртiс, что старикыт кыз лымöттяс только кыкись шагньöвтас и куимöт вылас усяс, да чепöссис бригадир дынö, кöда локтöма ни гортас да, кылö, керасьö оградаас. Ворота сайсяняс и пондiс ванзыны:

— Веня, пет чожжык öтöрас! Гублянскöй Дон-Кихот пожуммескöт воюйтö, колö сiйö öвны!

Веня петiс ворота сайö: пельпон вылас колун, шапкаыс — юр бöрас чуть öшшö. Эта коста трактор лöсьöтчис люкыштны Жогорсö, но эз инмы и лöга урчитöмöн мунiс бокöттяс, пондiс лэдзчыны керöс увтас медкрут местаöттяс, поснитик понулляинöт.

— Бöбмис, кöть мый шу — бöбмис! — барöтiс синнэсö бригадир. — И машинасö паздас, и юрсö пиньöвтас. — Сiя чапкис да кыдз вöлi öтiк свитерöн, сiдз и швапкис-котöртiс галошаа пимиэзнас паныт тракторыслö, кöда ордчöн-ордчöн, нач дорокöттяс, тарöвтчис сёйгарьян яма бокöт.

Лоис вежöртана, что рычаггес сайын пукалö винасянь кольмöм морт, и сiйö колö кыдзкö тшöктыны сувтчыны.

Котöрок йöр бöрö Венька петiс чорзьöм лямпа туй кузя, но туйыс сэсся кежис мöдöрö, и мужикыт чеччöвтiс лымас, пондiс борны огородеч бöрöттяс, медбы ештыны сюрны тракторыс одзö. Эз тöд, мыйлö, но стынiсь шедтiс кыз стынник и пондiс кайны панытмоз тракторыслö, кöд а дынöдз кольччис пятьдесят метр мымда. И вдруг казялiс, что трактористыс сунгисьöм нырнас рычаггез вылö и садьтöг узьö. «Колö саймöтны бöб кульöс! Чувйышта öшынок сорнас, может, кылас...» Керсис бокö, сувтчыштiс, медбы размöд ловзисьны моростыр, лэбтiс стынниксö и видзчисьö. «Оз эд саймы, — пизьö юрас, — а ме мый нö сулала?» Нетшкöвтчис одзлань, вöйис лымас пидзöс вевдöрöдз, усис и öмтырьяс кватитiс чорзьöм, шыдöссялöм лымсö. А тракторыс сэтöн и эм ни, сы весьтö падерöн локтö. Чеччис, талис ас гöгöрöттяс столасö, гымгис стынникнас ыбöс кузяс — стеклоыс жоль киссис пытшкас и öтöрас, но тракторист эз саймы, эз сувтöт машинасö, и Венька ештiс лэдзны и бöрись öшыноксö.

А дас метр ылына одзас вöлi Котöроклöн стын, вилёвöй, мöймуся керöм, а стын саяс, межа вылас — баня, карч яма, вирöдз; гöрöм саяс, Олявка йöрланьын,— мошвидзан керкуок да гиддэз.

«Уна чагсö керас, ежели не кутны», — решитiс Венька. Сiя мый вын чепöссис тракторыс туй кузя, чеччöвтiс прицеп вылас, лэбтiсис и паськöтчис лягуша моз кабина вевдöрас, медбы лэдзчыны бокас, но кыдзкö казялiс, что гусеницаыс вевдöрын катальыс абу, тальччыны некытчö.

Трактор увтын кажöтiс-чегласис кöс стынник, а Венька сё эз вермы осьтны кабина ыбöссö. Чу, няж мунiс Котöроклöн вирöдз. Кöртовöй зверьыт пуксьыштiс бöр вылас, пöлiньтчис бокö и, конечно, чапкис бы вывсис мортсö, да как раз сэк и оссис ыбöсыс, и Венька ашкаритчис кынöмнас сы вылö, кокшупнас адззис кабинасис джодж дорсö. Кытчöдз пырис да мый да, ниль водiсö эшö куим прясла — öнi Олявка йöрись ни, и трактор тран сувтiс карта бöрö, улица дорас, и лöньсис, дзик вачкöм кань, только радиаторись пышкайтöмöн кайис чочком пар.

Венька жагвыв петiс кабинаись, лэбтiсис-сувтiс свиттялан гусеница вылö, кокнита ловзисис. А сы одзын сулалiс и видзöтiс сы вылö уна йöз: этатшöмыс Гублянын эз на вöвлы, и каждöйлö охота тöдны, мыля трактор тальö йöррез.

Сэтчö жö сибöтчис Котöрок, казялiс Олявкаöс да горöн, медбы кылiсö быдöнныс, шуис:

— Гöрны разь мöдан огорейчтö, Ольга Гавриловна? Не одзöв я?

— А мый, поди, одзыс? Тэ тай, Карп Иванович, некö гöрöмыт ни да?..

Старикыт вöлись казялiс шогмöм изъянсö да вотш вачкис лядьвеяс:

— Мак-маковей! Вот вöлисьтен и ов! — и ойзöмöн мунiс вирöдз дынö.

Горöтчис и Венькоика Лена, небытика шыасис, дзик джыннян-шаркун:

— Мый нö эшö, Веня, сулалан? Шапкатö да калошиэтö мун кошшы, пригодитчасö, поди...

Бригадир дзар керис пими ныррез вылас, ниртыштiс оча кок, лэдзчис улö да веськытвыв ыбöсас турки-тарки кыскис кабинасис трактористсö, чорыт лымнас миссьöтiс сылiсь рожасö, и детинаыт садясис, чеччис, нельки частушка горöтiс:

Тэ Степан, и ме Степан,

Кыкнанным ми Степаннэз...

Мöдiс, тыдалö, эшö и йöктыштны: шовк вачкис оча долонь, паськöтiс киэсö, но тальччис бокö, дзонь лымас, и перво кок йылас, а Сэсся нёльподöн, сунки-панки уйыштiс карта бокас, бергöтчис гатш да бöра вынтöмсялiс.

— Кин сiя, кытiсь?

— Эз жö некинöс дойд? — юасьöны отирыс эта «герой» йылiсь, да некин сiйö оз тöд — не гублянскöй. Сё жö догадайтчисö, что паськöмыс сöстöм, виль спецовка, сiдзкö, — леспромхозiсь нето пээмкаись.

— Но, кытчö нö, Гавриловна, гöсьтö воштам? — юалiс Венька. — Милицияö звонитам али сытöг керсям?

Думайтыштiс Олявка, сьöкыта ловзисис да горöтчис:

— Кöть кыдз шу, Веня, а сётаки гöсь эд... Мый, поди, милицияас...

— Сэк ме вашöта тракторсö горт дынö.

— Этö кинкöт нö тэ сiдз думайтiн? — пондiс панласьны иньыс. — Может, оградаат эшö пыртан? Охота, дак кайöт гаражö!

Час бöртi, кöр Олявка замокасис да тальччис ворота сайись посöдзокö, сiйö кытсöвтiс Котöрок, кöдакöт ордчöн борис лымья туйсö öнтайся «геройыс». Сылöн код юрыс петöма ни, оз и пезьдышт.

— Баитö бы тэкöт зонкаыс, Гавриловна.

— Перво ась йöрсö керö, вöлись и баитны пондам,— орöтiс-висьталiс Олявка.

Тракторист ласкова шуис:

— Быдöс керам, тётя, оз ков видчыны. Ми жö мирнöй отир... Мир — дружба!.. Не баитны ме локтi. Юöр вайи мортсянь. Сiя жив-здоров: рожаыс — табань, мышкыс — пызанпöв... Бум-бам керö.

— Кытшöм мортсянь? Кытшöм бум-бам? — пизьö Олявка. — Тэ эн кöт аслыт, бытшöмик висьтав.

— О Санто-Лючия! Святая темнота! — дзик горзöм-сорöн шуис юöр вайись. — Неужто он вежöрт: шур-мур, Байкал-Амур. Стукйим öтлаын сыкöт, да то локтi...

— Дак кытшöм мортсянь?

— Бакан Колькасянь. Привет, Санто-Лючия! — сiя нето öвтыштiс кинас, нето военнöй моз сетiс честь да бергöтчикас шуис: — Эшö песня тшöктiс сьывны:

Гуляй, жена-зазнобушка,

И наслаждайся жизнию,

Но помни обо мне...

Олявка сiдз и сылiс местаас.

Дата добавления: 2015-11-16