ВИЛЬ ДЕНЬГАЛÖН ВАЖ ЛЫД

Дзолиньлö талун бöра эз лöсяв: Ыштайö автобусыс Кудымкарсянь эз пет, и сiя гортас локтö подöн...

Сьöкытöв жö ни сылö кузь туйесö тальны, но сiя некин вылö оз обижайтчы, некинлiсь отсöт оз кор — ассис судьбасö оланöттяс нуöтö, кыдз сылö кажитчö, сiдз жö, кыдз и Христос ассис крестсö Голгофа керöс вылö. И сё баитö: «Кыдз ен шуас». А еныс сылöн рам, оз тшöкты норасьны, а тшöктö керны быд мортлö добро, и старуха эта завет сьöртi и лöсьöтчö овны. Оз норась и сэк, кöр сiйö дойдасö кылöн али мыйöнкö орддясö. То неважын, семикнас, Олявка лöгöтiс, дак старуха только енлö юрбитiкö казьмöтiс: «Туйдöт, батюшко, бöб юра инькасö истиннöй туй кузя». Эшö öддьöнжык лöгöтiс сэк милиционер, кöда гублянскöй могильниксянь нуöтiс сiйö сельсоветö да гижис акт и повзьöтлiс судöн, а Дзолинь только и шуис: «Кер, кага, сiдз, кыдз тэныт любо». Тöдiс да надейтчис, что еныс и вичку ассис «агитаторсö» дорьясö. И сiдз и петiс: и поп ошкис, и Епимей висьталiс Дзолиньлö бур кыв:

— Адззö еныс, что тэ сылiсь святöй кывсö морт юрö сюян, и бласловитö тэнö мунны сiя туй кузя одзлань... Пукты алтарьö двадцать руб да мун енкöт.

— Тэ мый — пыксис вöлi Дзолинь. — Сымдасö он жö босьт, натте! Подикось, эшö штраф пуктасö.

— Штрафсö, союшко, ен вештас, а тэ вай кык гöрд бумажка меным. Колiс бы куимö, да ась ни.

Епимейöс он бöбöт: кöть и öтiк сина, а нёль морт туйö адззö. И ковсис сетны кыксö. Но и ась. Аслыс тожö эд дöнзьыштiс — спасибо сы понда енлö. И талун бöра дöнзяс. А сэсся камтуруныс, кöдö чуть я не пуд ни косьтiс да Перемас и Кунгурас надёжнöй отиркöт иньдöтiс, мымдакö сетас. Сiйö турунсö быдлаын босьтöны — эд сiя кампыкöс, öннямоз шуны — рак веськöтö.

«Шуас кö ен иньдöтöмсис босьтны сорок руб, то сэки лоас сто сороков да, э-э-э, — вунöтiс Дзолинь, уна я сылöн деньгаыс. — Мöдлаас десяткаэс нёля али вита? — Сiя кежис тшöтшкöртöм йыла кöзоккес дынö, чеглалiс лапьяжык лыссэз, чапкис нiйö вуджöрас да пуксис ны вылö и бöра пондiс лыддьыны деньгасö. — Медбöрын пенсияöс пуктi кык десятка. Одзжык, кыдз Епимейыс дынсянь кайи, кыкö жö. А вöлi... А вöлi, натте...»

Эз вермы тöдвылас уськöтны, мымда вöлi, да эта не беда: сылöн быд сороковöйыс йыок бердö гöрöдалöм. Медодзза сороковкасö война бöрсяняс, кöр деньгасö вежисö, и гöрöдалiс. Мöдсö годся дыржык видзчисис: налоггес ыджытöсь вöлiсö, товарыс дона, да эшö облигацияэз понда пыр колялiсö.

Шоччисис-керис, пряничок öмас аклялыштiс да и бöра кутчис одзлань кыссьыны. Медбы вöлi ыркытжык, пöрччалiс кофта киззесö да чöвтiс юр вывсис чышьяноксö — джын часок дырнасö позьö и куш юрöн олыштны, нем оз ло.

Юголь дынас вöтiс инька. Сiя вöлi волькыт чужöма, дженытик, дзик зонкалöн, юрсиа, но Дзолинь сразу казялiс, что мортытлö тридцать саяс ни и сылöн эмöсь челядь. Конечно, сiя городскöй: чочком киа, краситöм гыжа, вöснитик спортивнöй вешьянока — деревенскöйыс этшöм срамнöя оз пасьтась. И котомкаыс пельпон вылас не татiссеслöн кодь: кöшель не кöшель, зобня не зобня, а шуль пасьта сьöд ременнезiсь кыйöм-гöрдззöм коробейка.

— Кытчöдз нö, бабусь, тэрмасян? — юалiс инькаыс. — Вичкуö, небось?

— Кежала, натте, — эз суськись Дзолинь. — Пукта енлö пернапас да копейка, а сэсся, шуас кö еныс, — гортö. А тэ ягöдла, натте? Али тшакла?

— Эн тöд. Меным клубö колö.

— Ордчöн вичкуыскöт сiя. Крест увтас и эм... Артиска, натте?

— Школаын уджала. Музыкантша.

— А мый нö клубсис кошшан?

— Удж кошша.

— Кытшöм нö эшö удж?

— Кытшöмö? — инькаыс шынньöвтiс — мыччалiс чочком-чочком пиннесö, и паськыт югыт синнэс гöгöрын аркмисö поснитик чукыррез. Шынньöвтiс сысянь, что старухаыт челядь моз быдöс бы тöдö сразу, и сылö тожö охота юасьны-висьтасьны сiдз жö веськыта, деревенса моз. — Кытшöм адззисяс.

— Кöть мый разь верман-кужан?

— Унакодь кужа.

— Сiдз-ту инö — мастерича — зарни ки? Инькаыс эшö гажöнжык шынньöвтiс да пондiс баитны кыдз аслас велöтчиссезкöт жö, шутитöмöн:

— Рисуйтны, сьывны кужа. И верма сiдз орсны, что еннэт пондасö йöктыны.

— Эн баит сiдз, кага, грех эта. Еныс не морт, оз вежмась, — обидитчис моз старуха, дыркодь чöлiс и вöлись сэк, кöр колiс янсöтчыны ни, пондiс тöдсасьны буржыка — вдруг кöркö ковсяс?

— Дак кыдз нö тэнö шуöны, мастерича?

— Вероника... Вера.

— Часто татчö сибавлан? Родвужыт, тыдалö, татöн?

— Абу татöн, бабусь. Первуись локта.

— Мастерича, шуан? А ежели... енок?

— Мый, мый?

— Рисуйтны енок, мыся...

— Нiйö эг пондыв.

— А шуö: быдöс пö кужа. Кытшöм нö тэ зарни ки, он куж дак?.. Мун клубат, гажöт сэтчин чуддэсö, — Дзолинь кöритöмöн кольлалiс инькасö да иньдöтчис вичкулань сöстöма чышкöм тротуар кузя. Мунöв-керис, сувтчис да эшö öтпыр видзöтiс бöрланяс. Как раз эта коста жö сыланьö бергöтчис и удж кошшисьыс, лэбтыштiс кисö да вöрöтыштiс чуннезнас — адззисьлытöдз пö, бабусь!

Дзолинь паныт макнитiс бедьнас да рашкис-мунiс Епимей дынö, кöдакöт кöть и видчывлöны, да сё ни эд öтiк енлö юрбитöны, öтiк елейöн мавтчöны, а веськыта кö висьтавны — öтiк кисьöн кыйсьöны.

Епимей öнi вичкуас кык туйö уджалö — и староста, и сторож, и кöть служба не служба, а прокод вичкуас. Старостанас, кыдз шуö сiя, сылö ачыс Саваофыс тшöктöма лоны, а сторожавны попыс сувтöтiс: кытчöдз пö он адззы надёжнöй мортöс — ачыт пукав. А сторожжес эз пондö адззисьны: кыдзкö тулыснас вичкусис петкöтiсö касса.

Талун Епимей вöлi туримоль кодь гöрд и шыльыт басниа — дзик виа бордöн кулиггез мавтö.

— А-а, Полина Зотевнаöс еныс вайöтö!— сьылöмöн моз сiя панталiс Дзолиньöс сторожовка одзас. — Пырышт, пырышт, шоччись да висьтась, мый светас пусьö: кин шырсьö, кин вурсьö? — Пуксьöтiс табурет вылö, юкталiс кöдзыт ырöшöн, думайтiс-керис да удiс рюмка вина и вöлись юалiс: — Колö я товарыт?

— Ковсис бы, натте...

— Мымда?

— Масiссез да пернаэз — одззаыс моз жö, молитваэсö унажык сет. Подорожна да венчик — вит пара... Кыксö, натте, эта недель вылын и дзимлялас еныс... Öтыс Варпамешко миянiсь, кöда вичкусö пондылiс игнавны...

— Дак кытшöм нö эшö сылö подорожна, коммунисыслö? Кин сiйö раяс йöртас?

— А миянлö мый, Епимушко? Мийö тасинь иньдöтам, а сэтчин мый керасö, не миян дело... Ышö елей сет да еноккетö душ-мöд... Ышö кадило вай, семикнас эд öштiссьöма.

— Код разь вöлiн? — Епимей мöртчöтiс öтка синсö старухаыс чужöмö. — Ылавлан, инька!

— Урмаыс босьтöмась, кöр милиционерыс ыждалiс.

— Эм öтiк, сета, — не öддьöн ласкова висьталiс Епимей да мунiс вичкуö. — Тэ пукышт эстöнка.

Ветлiс чожа, вайис пызандöраö каттьöм комзыль, пуктiс пызанок вылас, казьмöтiс:

— Одззасяыс понда вештiсь-ко, союшко. Деньгаыс Дзолиньлöн вöлi лöсьöтöма ни, и сiя сетiс кык десятка.

— Спасибо, Полина Зотевна!

— Енлö висьтав, Епимушко.

Быдöс, мый колiс, вöлi керöма, и басни орис. Дзолинь шытöг тэчис сумкаас вичку товарсö и порогсö вуджикö горöтчис:

— Кежала бöра кöр-нибудь... Ловья лоа дак...

— Тöда, что он орддьы. И ловьяыс кежалан, и неловьяыс сiдзи жö...

Вичку ограда саяс и казялiс Дзолинь, что сумкаыс сьöкытöв, а ковсяс мунны подöн, и каитчис, мыйлö босьтiс сымдасö сэтшöм шоныт лунас. Но, медбы эз тшыксьы туйыс, бöр эз ни берт и жагвыв петiс тракт дорö, кытöн видзчисьлöны автобус. Дзир-бар керис öтмöдöрö и туй сайсис, керку вуджöрись, казялiс öнтайся инькасö, юалiс:

— Разь ветлö автобусыс?

— Ог тöд, бабусь, — шыасис инькаыс да вуджис Дзолинь ладорö. — Ыштайöдз тасянь ылын я?

— Вит верста одзжык пуктывлiсö... Сэтчин тöдса олö али мый? Ёрток, натте?

— Ёртушка. Велöтчим тшöтш.

— Кин жö повно?

— Тэ сыланись?

— Ыштайсис и эм. Шор катытас ола.

— Тэ молодчина, бабусь, — радмис инькаыс. — Мыччав туйсö, а ме тэныт отсала сумкатö кыскыны. Лöсялö?

— Лöсьöтчам, натте. Только öддьöнсö эн трекйы, эн нöит, — не сразу сетiс сумкасö Дзолинь да велöтiс, кыдз нöбöтны. — Дак кин сiя?

— Велöтiсь, Светлана Игнатьевна.

— А-а, Пиличлöн да мый да сэтшöм нимаэс... Али Игнаттёвна, шуан? Игулöн сэки... Гöститны инö мöдан?

— Гöститны не гöститны, а юасьны да мый да. Может, овны кытчöкö талань локта, — висьталiс Вероника да вöрзьöтчис мунны.

— Городсис деревняас локтан? Чöскыт олансис?

— И городас не быдöнныслö чöскыт, — кымöртчис инькаыт. — Пышша бы... Но тiянö, эта ылынаас, ог лок.

— Жöникыт чапкис будичи...

— Ме сiйö чапка.

— Мыля инö?

— Олан эз ло — пыр юö. Муна, ась син оз адззы, пель оз кыв... Нелюбöй лоис.

— А-а, нелюбöй? Дак сэк нö мöдiкöс адззин, любöйжыкöс. Сiйöн жö и пышшан бы.

— Висьтавны кö веськыта — да. Эшö томувьям адззи, да сiя гöтрасис мöдiк вылын, и эг понды разьны семьясö. А öнi...

— Чапкис иньсö, натте?

— Кулöма иньыс. И ме бы локта сы дынö. Ветлi гортас, мöдi адззывны, да курссэз вылö иньдöтöмась.

— Татiсь кинкö?

— Кудымкарсис.

— А тэ разь не городсис?

— Соликамскись ме. А мöдi Кудымкарас керсьыны, да местаэс абу. Сёрöнжык бöра вовла.

Посадыс сулалiс нёпын, сэтчö и ловья руыс эз сюр, и сьöкыт дук, кöда лэбтiсис öтöрö чапкöм назёмсянь, викеран заводлöн помойезсянь, силоссянь да эшö öтi-мöдiсянь, кольмöтiс юр. Зато посад саяс, вылын местаас, кытöн пондöтчö чочкоммыны рудзöг, ветлö идзас дук, и руыс ыркытжык, чöскытжык. Эстöн жарыс оз нырышт, и мунсьö кокнитжыка.

Рудзöг ыбсö унакодь ни ытшкöмась пода понда. Вундöмподыс отавитöма, мукöдлаас цветитöны жабрей, катшасин, чорыт йöн да йöлайöн, кöднасянь паськалö ма кöра дук. Йöн цветлöн дукыс пондас вермавны сэтчöдз, кытчöдз оз воö сюэз.

Туй бокись видзокыс тожö ытшкöм-кокалöм. Турунсö нöбöтöмась, а ёгсö — бикыв, урбöж, ыбкушман, порськок — канава сайö чапкöмась, тракт вылас.

Шульга ыбыс — зöррез да шогдiэз. Нiя шочыникöсь да нярöсь — шычи-вычи, и седунсялöмöсь, нельки гожся кузь зэррес абу вермöмась нюжöтны нiйö, сiдзкö, бур няньсö нысянь эн видзчись: комбайныс пондас шепсö орöтны. Эшö саясжык, телевышка увтас ни, пуксьö-лэбтiсьö чавкан да рака табун. Сэтчин, тыдалö, лöсьöтöны öзим увтö му, и сiя мысыс осяэс коласын сьöд видзö, топ ош кымöс.

Нiя мунiсö жагвыв, сьöрсьöн-бöрсьöн, унажыксö шытöг. Дзарьясисö кыкнанныс: Дзолинь видзöтлiс, оз я вöт машина, а городскöй морт тöдсасис виль местаэзкöт.

Кузь покат кайикö пантасис öтiк да и мöдiк машина.

— Весь тэрмасям, бабусь, — шуис Вероника. — Сёравно автобусыс вöтас.

— Ен сiйö тöдö, вöтас я, оз я, — бобгö Дзолинь. — öнi нем вылö надейтчыны оз туй и воть оз туй некинлö веритны. Сэтшöм век локтiс. Да и сойыт и воныт вермасö бöбöтны. Ас вылат токо и надейтчы. Да ышö ен вылö будичи...

— Еныс вылö надейтчы, да ачыт эн ло осьта öма. Не сiдз я, бабусь?

— А сiдз, натте, — шуис старуха. — Бöра эд пöжö, кыдз бы эз вад. То кымöрыс кайö, — тöждiсис сiя ас пондас и ёртыс понда. — Тэ... вунöтi, кыдз шуны, узик кежö татчö локтiн?

— Узьны думайта... А шуöны менö Вера.

— Гажтöмтчасö тэтöг челядьыт.

— Нiя менам ыджытöсь ни. Медбöрьяö школаö ни ветлö.

Грива йылас, Юголь гöгöрись медвылын местаас, кысянь ойланьö и лунланьö пондöтчисö кык кырас, пантасис фургон. Сiя чулалiс нiйö да сувтчис. Вероника дзар керис пельпон вевдöрöттяс да пондiс тальны перытжыка. Дзолинь личöтыштiс чышьян гöрöдсö да рушки-рашки вöтчис туйся ёртыс сьöрö, но сэтчö кылiс:

— Баба-а! Дзолинь баб!

Старуха сувтчис, бергöтчис бöрланяс, шуис:

— Не я менö? — и сувтöтiс Вероникасö. — Норовит-ко, видзöтам, кин сiя. — И сэк жö тöдiс: — Олявка тай вöлöма — чатыра юр!

Тöдiс, кöть и Савыркина талун мöдiк паськöма: джинсовöй костюма, уна сера чышьяна, кöда увтiсь мыччисьöмась кудриоккез, лаковöй туфлиа.

Эз ни думайт Дзолинь, что внучаткаыс раммас да кöркö шыасяс пантасикö, а, видзöт, кыдз петö: нельки машина сы кузя сувтöтiс, чеччис и сiдз небыта кытсöвтiс старухатö.

И Дзолинь сэтшöм жö ласков шытöв мыччис:

— Мый, малину?

Неыджыт сумкаокись Олявка кыскис дона конфеткаэз, сибöтчис топ бабыс дынö да сетiс сылö:

— Чöскöтышт öмтö, баба... Тэ гортöдззат?

— Кысся тай. Кыдзкö ёрт лöсялiс, нопöс нöбöтö.

— Кин сiя?

— Городскöй пö, Ыштаяс локтö... А тэ товарлa, натте?

— Перемö.

— Дыр кежö мунан?

— Ог на тöд, дыр я видзасö, — и, медбы старухаыт етшажык юасис, ылöтiс сiйö: — Вот мый керам, баб: ме бергöта машинасö, и сiя тiянöс кайöтас. — Олявка, дзик том нывка, пöв кок йылас бергöтчис бабыс одзын, перыта котöртiс машина дынö, пондiс баитны шофёрыскöт. И быль, машина бöр-одз ветлöмöн, пондiс бергöтчыны, а Олявка бöра бабыв мозöн пырк локтыштiс Дзолинь дынö.

— Кайöтас. Но эд манитö сiйö, а то ме автобус вылö сёрма. Кылiн, баб?.. Но, ме муна жагöник, сiя вöтас менö.

Уна мöдiс юасьны-висьтасьны бабыс, да машинаыс бергöтчис ни и сувтчис сы весьтö, и старуха кытсöвтiс Вероникаöс:

— Тэ, бур мортiньöй, вылö кай, а сумкаöс коль меным. — И бöра Олявка дынö: — Кинöс нö гортолiсят колин?

— Васькишнаöс. Мамöс мöдi корлыны, да шогалö пö.

— Шогалö даки, шогалö, — лöсьöтлö басниэсö Дзолинь. — А Васькишна добрöй морт... Деньгаоктö бы пыдöжык сайöвтiн.

— Ме эд тэ моз, баб, джоджулын ог видз... Пуксьы давай, а то коляс, — Олявка кутыштiс сiйö ки пöлöт, отсалiс вуджны канава, пуксьöтiс кабинаö, шовк пöдналiс ыбöссö и макнитiс кинас — мунö пö.

Кабинаас Дзолинь чышьянасис зэвжыка: öшыннэс осьтаöсь, и вижгö тöв. Вöлись велöтöмöн шыасис шофёрлö:

— Туйыс эстöн бур, тэ, зонка, тэрмöтыштлы «вöвтö», ась нучаткаö оз сёрмы.

— Весь полан, — шуис шофёр да чöвтiс юр вывсис веж сатиновöй кепкаок, чапкис бокас, мыччис юрсö öшынас. Дзолинь вежöртiс, что сыкöт озö бы баитö, и пондiс думайтны Олявка йылiсь. «Кин родö и мунöма, не мамыс, не тятьыс сьöрья. Сiдз ни ровно бы лöгасис кöдковну, тёковка, гортсис репйис, а, видзöт, машина сетiс... Он вежöрт томмесö öнi — не кушман, не сёртни, не роч, не коми... Некытшöм карактиль абу, лöгнысö озö вермö видзны. И нем вылö оз видзöтö, нем оз зирайтö, немöн оз брезгуйтö...»

Старуха казявтöг окнитiс да сьöкыта ловзисис.

— Мый нö, бабыс, ружтан? — юалiс шофёр. — Али висьö кыткö?

— А кыдз ни тэ он оксы? — бергöтчыштiс шофёрыс ладорö Дзолинь. — Городсис тай учительша жöниксö, учёнöйöс пö, коза дзизйöтiсь вылö вежöма. А Ыштайсис Максимлöн зоныс, кержак дозыс, сьöд яранкаöс босьтöма!.. Не-е, абу сiя, одззася биыс, öння йöзыслöн! Абу! Быдöс дзугсис, быдöс вежсис-пансис... Кöрчитчис-моршитчис душаыс мортыслöн,.. пакмис, чинiс. Максим — бур места сылö раяс — öддьöн дозорнöй да брезгливöй вöлi, чужöй кружкаись брага эз ювлы. праздникö аслас пань-бекöрöн ветлывлiс! А зоныс — яранкаöс горт пытшкас пыртöм! А Савыр Гавруыт? Тöдан, кытшöм вöвлi? Кыдзи кинкö лöгöтас — синнас сiйö оз адззы, оз и шыась некöр. Вот карактиль дак карактиль! А öнi? Небзьö мортыт, лёпмö, абутöм лоö. Не ен, не — прости господи — антус сылö оз ков. И ачыс оз тöд, мый сылö колö. Сiйöн и, натте, броддьö-ветлöтö му кузяс, рака табун моз шевкйисьö. И окиянсö гудыртö, кымöрсö сорлалö... Ок!

Неетша бы эшö баитiс Дзолинь, да машина сувтiс: локтiс Ыштай.

Ю саяс машина эз вудж: брод гöгöрсис галя босьтлiсö, и ю пыдöсас аркмисö гöппез, кöднаö позьö шедны, кыдз налькö шыр.

— Давай, бабыс, прощайтчыны кутчам, — шофёрыс осьтiс старухалö ыбöссö, видзчисис, кöр мöдыт петас, мыччис сылö сумкасö да бедьсö.

— Мыйлö Олявкаыс Перемас мунö? — юалiс Дзолинь.

— Жöник дынö тай, шуöны.

Эта юöрсянь старухаыт чуть кок йывсис эз усь: йöзыс ни тöдöны, а сiя, родняыс, нем эз на кывлы. Вот тэныт и характер!

Пуктiс сумкасö кок бердас, юалiс:

— Кытшöм дынö?

— Этö сылiсь колiс юавны... Но, ме мунi, — висьталiс шофёр. Сiя пöдналiс ыбöссö, и машина лöга чушнитiс да вöрзис местасис.

— Адззан, мый керсьö! — дивуйтчис Дзолинь. — И Яргаласас ни, натте, кывсис, а гортаныс чутыр оз керö!

— Мый сэтшöмыс? — интересуйтчис Вероника.

— Да Олявкаыс, нучаткаö, жöник сайö петöма.

— Инькаэс юрсинысö летöны, а нывкаэс петöны... Сэтшöм олан, бабусь.

— Кытшöм тэныт нывка! Петалiс ни, да янсалiсö, — эз суськы старуха. — А этакöт ачым жö отсалi öтлаасьнытö, — ошшасис Дзолинь. — Может, и тэныт отсыштны?

Вероника чöлiс, кöр мунiс посок кузяс, и вöлись мöдöрас, кыдз увтас ни, шыасис:

— Кыдз жö бы тэ отсалiн?

— Ен кылöн йита, нянь-солöн. Притворнöй турунöн позьö, колö дак.

— Спасибо, бабусь. Кыдз-нибудь асьным йитсям, — откажитчис Вероника. — Ме ен кывтö да туруноккетö ог радейт, менам эм мöдiк средство, вынажык нысся.

Старуха сразу вугрыштiс энö кыввесö:

— Меным он я сетышт?

— Мыйсö?

— Сiйö сресвосö, вынасö... Серöмтчис Вероника, висьталiс:

— Ог сет, бабусь... Эта средствоыс — ме ачым. Не сiдз я, бабусь?

Сидзис эта Дзолинь юрöдз, и сiя тожö серöмтчис:

— Сiдз, натте, и эм... Ме кöркö тожö вына сресво вöлi, да рушми ни то, лёшмöм тшак лои, — и гажтöмсялiс, кымöртчис. Сiя сувтчис, лэдзис кисис сумкасö, кутiс пидзöссэзнас бедьсö и пондiс сюйны чышьян увтас лэдзчисьöм пилиммесö. — Ов да гажöтчы, кытчöдз эз быр сресвоыс... Менам то гортö, а тэнат колö школа дорись керкуас пырны.

— Спасибо, бабусь, — висьталiс Вероника и мунiс школа ладорö.

Дзолинь эшö дыркодь видзöтiс сы вылö бöрсяняс да видiс думанас сы понда, что инька кöдзытöла янсöтчис сыкöт, что сразу бокö вештiс сылiсь отсöтсö. Видчис, видчис да и лöньсьöтiс асьсö: «Мый ныкöт керан, ежели чисто пырттöмöсь. Ладно ышö — некыдз эз шу, эз нимкодяв, а то Савыркин Гавру моз дöвгис бы: «Кыш, бöбöв шешкуння, ме дынiсь!..»

Вöрзьöтчис ни местасис, да бöр сувтчис: а не нöбöтны я пö виль юöрсö Олявка аймамлö?

Может, и кежалiс бы, но сэтчö кысянькö мезмис тöвчик-вижгун, пондiс гардчыны сы гöгöр и дзугис пöрисьытлiсь туйсö.

— Пышшы, лёквир, эн путшкись бытшöм отирыс одзын! — öвтыштiс сiя бедьнас да размöд кресталiс буса-ёгья тöвчиксö, кöда сы синнэз одзын вачкисис сюра-бöжа кульпиян вылö. — Ен-батюшко, эн лэдз сiйö декуйтчыны ме вылын...

Тöвчикыс вешшис улица шöрас, öктiс чирйиссьöм турун да идзас, бордтыввез да медодзза усьöм листтэз и вылына лэбтiс нiйö деревня весьтас, кытöн чепсасисö джыджжез, и рознитiс сэтчин. Жагöника, уялöмöн, ёгыс бöр пондiс лэдзчисьны улö, и Дзолинь кватитiс сумкасö да шымырöн-шымырöн мунiс гортас, и сэтчин сiйö сразу кытшöвтiсö тшыг курöггез.

Колiс бы нылö соровтас лöсьöтны, да дышыс петiс старухалöн: ёнася-ёна мыдзис, и чапкыштiс курöггеслö ид. Эта сюыс Дзолинь ордö, позьö шуны, ачыс пырö: öшын увтас, туй вылас, эм сэтшöм нырок, кöда быд тыра машиналiсь босьтö вот — налог — то турун, то удобреннё, то сю. А кöр мöйму вундiсö ид ыбсö, сюсö комбайннэс дынiсь ваялiсö сы öшын увтöт, и старуха ныроксис куралiс не öтiк пуд.

Медбы чожжыка вашöтны мыдзсö, Дзолинь дзурснитiс уразнöй турунiсь да македонвужись керöм настой, сюйыштiс öмас внучаткаыслiсь öнтайся гöснечсö да водiс шоччисьны.

Саймис сэк, кöр öтöрас югытыс гуасис ни. И тöдвылас усис Вероника, кöда лöсьöтчö овны городскöй велöтiськöт. И кинкö дзик чувйыштiс сьöлöмас: «Не Öндрийкосö и мöдö крюкавны? Ой, ой! А ме, бöбöв, отсавны сылö мöдi... Грекыс, грекыс!»

Кöть и сёркодь вöлi, а Дзолинь котöртiс Игнатö.

— Ига, меным гöстяыт колö. Кытöн повнока?

— Нылöкöт мунiсö порозок кошшыны.

— Во-во, сiйö и керö сiя, — ляпкис-висьталiс Дзолинь, мый кыв йылас бергалiс. — Кöдöрö чижйöвтiс? Али эн адззыв?

— Шор дорас ровно бы тай лэдзчисö, баддяинас... А мый лоис? — юалiс Игнат, но старуха сэсся эз шыась — бусйис-мунiс машина туй кузя, кытi сылö паныт кык инька вашöтiсö чочком юра сьöд куканьöс. Эшö ылiсянь старуха тöдiс Вероникасö и тэрмасьöмöн сукыльтiс-мунiс сы дынö.

— Ноко ышö баитыштам, мастерича.

— Талун сёр ни да, бабусь... Может, ашын?

— Сёрыс ашын лоас, а талун как раз, натте, — эз сетчы Дзолинь. — Тэ, Игнаттёвна, вашöт ляк сюртö, а мийö сулыштам эстöн.

— Может, туруннэтö вайин, бабусь? Сёравно ог босьт.

— Туруннэсö шондiтöг оз сеталö. Ме мöда юавны... Токо веськыта висьтав, эн бöбöт.

— А ме, бабусь, ог куж не бöбöтчыны, не пöрьясьны.

— Вот и ладно... Мый нима нö любöйыт? Вероника эз вежöрт сылiсь баснисö, серöмтчис.

— Мый, мый?

— Мыся, кытшöм нима любöйжыкыт?

— Тэныт разь öддьöн колö тöдны?

— Не Öндрийко?

— Ась лоас сiдз...

— Митит пиян? Верепов увтыр?

— Сiдз, бабусь. А сэсся мый?

— А сэсся — кляп! — лöгöн висьталiс Дзолинь. — Öндрийкоыт гöтыра, босьтiс менчим нучаткаöс... Адззылiн тай öнтай, кöда машинасö сетлiс. Сiя как раз Öндрийкоыс дынö и мунiс...

Старуха, конечно, эз тöд, кин дынö мунiс Олявка, а висьталiс сiдз сы понда, медбы öддьöнжык нагорнитны внучаткаыслiсь соперницасö.

— Ась мунö! Кыдз мунiс, сiдз и локтас... Адззисьлытöдз! — Вероника швырк мунiс старуха дынöт и сэсся дзар эз кер бöрланяс.

Дзолинь зэлöтыштiс личалöм чышьянсö, бергалыштiс аслас бедь гöгöр да бертiс гортас.

Оныс эз на пет, но сiя чöвтчис, пöрччасис да водiс кровать вылö — колö бура думайтны, кыдз дзугны эта городскöй чачалiсь планнэсö, а бура думайтсьö небыт ольпасьын, пуховöй перина вылын, кöда сiдз шонтö кос, пельпоннэз, коккез. Думайтны не би дырни, пемытын, думайтны öтнатлö аскöттят да милостливöй енкöт.

Юрöдзас, подушка увтö, сюйыштiс Евангелие да завечайтiс, кыдз и прокод керлывлiс важнöй удж одзын: «Ежели часöт оз усь тöдвылам нем, дак сэки уськöтчы, ен-батюшко, вöтö да велöт, мый керны але мыччав святöй книгасис кытшöмкö притча...»

Эта завет бöрсянь пондiс бергöтлыны юрас ассис веськöтчан-тшыкöтчан рецепттэсö. Перво-медперво колiс бы юктавны городскöйсö недотрога турунiсь ваöн, сэсся ланьтöтан туруннэз сетны, но кыдз этö керны? Не кукань эд мортыт, он кор: «Тпрути, тпрути, лок чурскы!» Бур бы нянь шöрöм вылö заговор пуктыны да кыкнаннысö вердны... Не, сiя тожö оз лöсяв. А может.... Может, смилитны? Сiдз-ту лöсялас! Да кин бердö? Игуыс бердö але Савыркин Гавраыс бердö? Нысся томжыккес татöн и абу.

Кузьой эз узь, сё кошшисис-бöрйисис, кыдз тасавны Вероникалiсь Андрей Никитич дынö туйсö, да некытшöм тас эз адззись. Онмöссис, кöр петухыс пондöтiс ассис заутреннясö, но югдандорас бöр саймис и дыр думайтiс, мый мöдiс керны эта асылö, да сiдз и чеччис, пондiс лöсьöтны ольпасьсö да подушка увтсис адззис святöй книгасö. «Кыдз инö ме, юртöм курöг, вунöтi сiйö? Ой, ой!» Чапкис ольпасьсö, лабичö пуксис, киэсö öлöдзас тэчис. «Мый нö вöтаси талун? Але нем эг? Не, мыйкö вöлi жö... А, вон мый — монастырскöй пашня... Ош ряксö: «Давай орсны пондам — мыррез шедтавны!» — и йöрас бы пырö. А йöрыс вылын — эз вермы вожмöвтны... А эшö мый нö? Эшö пикан пуны лöсьöтчис, да тасоккез, кöднöн вевдöрöттяс нырыштöны, кошшис... Во-во — тас вевдöрöт колö иньдöтны... Тас туйö веж шать босьта але веськыт идзас тылöп...»

Чеччис, кöтöтiс чуньпоннэсö да малыштiс нырöмсö, сувтiс еннэз одзö, пуктiс медодзза пернапас и шушкыштiс: «Управляй, боже, разумом моим, — тюкйыштiс кöс чуннезнас кымöсас, — и животом моим, — павкöтчис кынöм бердас, — и мощью моею, — веськыт пельпонсö кутыштiс, — и сердцем моим, — пуктiс кисö шульга пельпон одзас да мышкыртiс юрсö. — Аминь!»

Сыбöрын сайöвтiс еннэсö, кöдна вöлiсö ен джаджокас да сы гöгöр, занавескаöн (сiдз керлывлiсö бабыс да мамыс, сiдз керö и сiя), чуланiсь пыртiс куим идзас тылöп, каждöйсис орöтiс сизим вершок кузя тор, йылöн-дынöн пуктiс куимнансö горöдзö, сувтiс пидзöс вылас, öдззис шешкыны-вашкыны тылöппес весьтын: «Этö заветсö пукта ме сьöд сина мортвö, сьöд юрсиа мортвö, Вера нима инькавö. Ежели Верки вожмöвтас эна ковасiсь кöть öтiк тывöп, дак ась воас сiдз, кыдз висьтава ме, кыдз кора ме, кыдз тшöкта ме. А ме висьтава, ме кора, ме тшöкта: кыдз гор биын сотчö кыдзовöй пес да пöрö пöимö, ась сiдз жö сотчас да пöртчас пöимö Веркивöн ыджыт думаыс; кыдз вына тöв увтын рознитчö сьöд тшын, ась сiдз жö рознитчас Веркивöн ыджыт думаыс; кыдз тувысся ва жугдö кыз йы да кырöтö береггез, ась сiдз жö жугавасö да кыравасö Веркивöн ыджыт думаэс. Кыввезö менам лякасьöны сирся бура, кыввезö менам биын оз сотчö, тöв йывын оз рознитчö, ваö оз вöйö. Сизим иган, сизим пöдан, сизим осьтан. Иганнэс ме дынын, пöданнэс ме дынын, а осьтаннэс Чердынын медыджыт еныс дын...»

Бергöтлiс тылöппесö, местаэзнас вежис, да эшö öтiк завет бердö кутчис, медбы делоыс надёжнöйжыка шогмис: «Вир мытика, ор мытика... Тьпу, тьпу, не сiя инмис, не сiя!»

Пондöтiс мöдiкö:

Ыджыт мог,

Сьöвöм шог,

Вежöктöм,

Радейтöм,

Чикня и викня,

Вешка и кешка,

Кыджжа и мыджжа,

Дон и кушов,

Вöви да абу —

Вон пошов,

Вон пошов,

Быдöс вон пошов!

Лыддьöтiс куимись, эз и сорасьлы, вöлись сувтiс кок йылас, босьтiс тылöппесö да тэрмасьöмöн, бедьтöг, петiс öтöрö, медбы ештыны тэчны энö тылöппесö Вероника туй вылö поперёк. А колö пуктыны Игнат подворотня увтö, кытi пондас петны умöлик инькажуг, и кык плаха пасьта посок доррезö — таланьö и мöд ва пöлас — посоксö эд тожö некыт оз орддьы и сёравно вожмöвтас тшыкöтöм идзасоккесö.

Öтöрас бура ни тыдалiс, и Дзолинь чапкис ассис «сресвосö» только пос одзас да пос саяс, а Игнат керку дынö мунны эз ни лысьт.

«Сёравно самасяс, воштiсьнытö некытчö...»

СЮРАПЕЛЬ

Перем панталiс Андрей Никитичöс шонытöн да гажöн: таво августыс вöлi мича и лöнь — не тöв, не зэр, не гымалöм. Но арыс сё жö казьмöтлiс ни ас йывсис ойся кокнитик пужöн, рытся кöдзытöн, кöр нельки пиджакöн Кама дорас вöвлi ыркыт. И отирыс öнi рыттэзнас етшажык бергалiсö öтöрас.

Нiйö велöтiсö асывсянь рытöдз, эз лэдзö шоччисьны и субботаö, но Андрей Никитич, кöр петас институтiсь, эшö ештывлiс уналаö. А лöньсö, кöдасянь долытсялö сьöлöм вылын, некытiсь эз адззы. И сiдз чулалiс неделя.Чулалiс жагöна, зэлыта, мыдза. Сiя неделяыс сылö кажитчис сизим сувйытöм пуöн, кöднö öтпырись, кöр эшö олiс Югольын, кыскис сы öшын увтöт трактор, и пуэс пыкöтасисö уввезнаныс быд комокö, быд неволькытiнö, но кыскан выныс вöлi ыджыт, и уввес эз вермö паджны мунöмсö, а только нёкрасисö, пиньласисö да чегласисö и бöрсяняныс колисö волькыт виззез-туёккез да сир-лыс дук.

Может, кыдзкö кыссис бы и мöд неделяыс, эз бы кут гажтöмыс, тöждiсьöмыс, кöбы эз аркмы небасöк случай.

Суббота асылö, кыдз и пыр, сiя петiс общежитиеись да тэрмасьöмöн иньдöтчис столовöйö. Аслыс гажа, и думаэз юрын гажаöсь.

Столовöй дынас пантасис цыганка да корис сигарета. Кöд коста кошшисис-кыскасис, сiйö кытшöвтiсö вит-квать цыганка.

— Дядя, и миянлö сет.

— Нате, босьтö, — сiя нюжöтiс нылö пачкасö.

Öтiк я, кыка я босьтiсö, а кöда медодз корис, кутiс Вереповлiсь кисö, паськöтiс долоньсö да пондiс ойзыны:

— Ой, и сьöкыт олан тэнат вöлöма, ой, и умöль! Но сiя чулалöма ни, а öнi... Пукты деньга — быдöс правдасö висьтала... Мый эм, мый лоас...

— Он висьтав, тётя, — горöтчис Верепов да мездöтiс кисö. — И меным немлö сiя. Умöль эта — быдöс одзлань тöдны, нёштöм сiдз овны.

— Тэнö видзчисьö сьöд сина инь. А сiйö кошшö сюрапель. Кылан, дядя?

— Сюрапель? — сувтöтiс сы вылö синнэсö Верепов. — Тэ кужан комиöн баитны?

— Кужа, дона, кужа... Пукты руб — быдöс висьтала...

Серöмтчис Андрей Никитич да пырис столовöйö и чожа вунöтiс цыганкаэсö. Но институтас бöра усисö тöдвылö нылöн басниэзныс да сiя басöк кылыс, кöдö важын ни эз кывлы гортас — сюрапель. А сюра пель — сюра ен, сiя отирлö керö умöльö: мыжйö-люкалö узян мортöс — этадз шуöны деддэз-баббез. И сылö мыйкö лоис думно, пырис сьöлöмас кытшöмкö полöм: а кыдз сэтчин Оля? — и медодзза лекция бöрас Верепов звонитiс Гублянö, сельпо контораö.

Трубкасö босьтiс Шурончик и, кöр тöдiс Вереповлiсь голоссö, горöтiс сiдз, что, натьтö, джын Губляныс кылiс:

— Гавриловна, жöникыт звонитö!

Чулалiс, кыдз кажитчис Андрей Никитичлö, не öтiк минута, а Олявка эз босьт трубкасö, и Верепов повзис: оз мöд баитны. Но вот гора, сöстöм голос, дзик ордчöн и эм, шуис:

— Кывза. Кин этö?

Андрей Никитич эз и здоровайтчы, сразу висьталiс:

— Оля, ме öддьöн кора: вовлы татчö... Кöть дженытик часок кежö... Талун жö лок! Кылан, Оля?! Ме быдöс висьталi.

— Быдöс?

— Да, Оля, — тэрмасис Андрей Никитич, — да!

— А кытчö нö локта, кытчö пыра?

— Мыля кытчö? Ме дынö, Оля. А сэсся...

— Дак висьтав инö, кытöн олан.

— Институтыс общежитиеын. Юалан физиккезöс, — жагöника ни, ятнöя баитiс Верепов. — Да ме тэнö пантала. Пуксьы медбöрья автобус вылö.

Бöра мымдакö шы эз вöв: Олявка думайтiс, мый висьтавны. Андрей Никитич эз тэрмöт, но сьöлöмыс летсис, готов вöлi чеччöвтны мороссис. — Но пондыла инö — кылiс трубкаас.

— Только часöт жö лöсьöтчы, Оля, — корис Верепов, и Олявка шуис чорыт, дзик öжын, дженытик очакыв:

— Но.

И басниыс орис. Орис сразу, кыдз эта овлö тöдтöм йöз коласын. А нiя эд, кыдз думайтiс Верепов, öтiк поз поздöны, öтiк ваöн миссьöны. Сылö охота вöлi кывны небытик, шонытик, дзик узöра вуруновöй кеписёк, кыввез, а сiя... Мыля нö сiя этадз?

Басни орис, и мужикытлöн чужис виль дума: а кытöн Оляыслö овны? Общежитиеын торья жыррес абу, гостиница йылiсь öнi нем и думайтны. Колас корсьыны важ квартираас, кытöн олiс университетын велöтчикö. Старик гозъя öддьöн бытшöм отир, радöсь баитны быдса сутки, кöр ны ордö тöдсаыс локтас. Зоныслöн, может, и семья ни эм, но местаыс нылö кыкыслö сё ни адззисяс — öнi абу тöв.

Сёйтöг — и кынöмыс оз симав — лекцияэс бöрын мунiс Мотовилихаö, адззис ассис кöркöся «дачасö», кöда тöрöтчöма Егошиха шор дорись долонёк вылö. Вит али квать год чулалiс, кыдз кежалiс татчö Андрей Никитич, а сы коста унакодь ни вежсьöма: керöмась виль забор, крышасö гöрдöн краситöмась. Керкуыс лажмалöм, и лунланись стенаыс пыдынжыка пырöма муас, а труба вылiсь басöк колпакыс усьöма. «Сiдзкö, старикыт тожö пöрисьмис, оз ни вермы... Да эм я сiя? — бытшкис сьöлöмас, кöр зашотка вуг местiсь казялiс кöстыштöм меднöй трубка. — А одзжык эстöн вöлi кöртовöй петух...»

Федя тётка — сылöн нимыс Федора, а жöникыс и соседдэс шуöны Федяöн — ворота дорас и пантасис.

— Тöдмала, тöдмала, а ог тöд, кöда тэ — Митюшка али Андрюшка.

— Андрюшка ме... Здравствуй, Федя тётка!

— Здравствуй, Андрюшка! Пыр-ко чай юны, только часöт пизьöтi. Колодецись васö босьтi.

— Этö бур... Сухаррет эмöсь?

— Не öтiк сорт эшö. А пряниккес абу. Тэ эд пряниккезöн ювлiн?

— Пряниккезöн, — шуис Андрей Никитич.— Ме часöт вая нiйö.

— Неважын виль магазин оссис, дак тэ сэтчин мун, сэтчин товарыс унажык.

Колiс бы юавны хозяиныс йылiсь, да кыдзкö оградаас небытшöм, и эз понды, ештас эшö, может, не öтiк лун ковсяс эстöн овны.

Виль магазиныс вöлi ылынжык, но мунiс сэтчин. Мунiс и дивуйтчис, что город шöрын, ордчöн уна этажа керкуэзкöт, олö пуовöй посёлок, кöдалöн революционнöй славаыс тöдса быдöс странаыслö.

«Локтас Оля — кайлам Вышка керöс вылас, музейö, ежели сiя эз на вöвлы. И заводас ветлам, Царь-пушкалiсь ыджытжык сойсö видзöтам... И сiйö колö Москваас, мöдыскöт ордчöн сувтöтны, ась тöдасö, кытшöм, мастеррез перемскöй му вылас олöмась».

Андрей Никитич мастеровöй отирыс йылiсь прокод шоныта баитiс, сiдз кыдз сiя петöма ны увтырись жö: прадедыс вöлöма Кувинскöй заводын горновöйöн, а кöр пöднассяс заводыс, кутчас уджавны кузницаын. И дедыс видзлöма неыджыт кузница, правда, соседыскöт шöриöн — дорлöмась чер-пурт, чарла-коса да берсясö.

Джын час бöртi Верепов вайис сёянсö быдса сумка: шöмасö и шöмтöмсö, чöскытсö и курытсö, кöда коласын — мускатнöй вина.

Хозяйка лöсьöтiс сёйны, а Верепов ештiс миссьыны да пондiс видзöтны керкусö. И вежöртiс, что старухаыт кольччöма öтнас.

Керку пытшкыс сё сэтшöм жö сöстöм да гажа, ыджыт жырас сулалö сё сiя жö важ, серöтöм кока, пызаныс, но сы гöгöрись стуллэс да стена бердiсь диваныс вöлiсö вильöсь. И половиккес вильöсь — деревенскöйöсь, öддьöн мичаöсь, уна рöмаöсь, кытшöмöсь видзöны коми-пермяккез.

— Талун тай öтнат, Федя тётка? — юалiс Верепов, кöр старушка тарелкаэзöн киас петiс кухнясис и тэчис сёянсö пызан вылö.

— Öтнам, Андрюшка, кольччи, — сiя кибöрнас чышкыштiс стул вевдöрсö, тшöктiс: — Пуксьы этчö. — Ачыс лöсьöтчис пызан мöдöрас, паныт, пондiс сёйны помидор. — Старикö кык год ни абу... Нывкаэс, ачыт тöдан, асланыс семьяэзöн олöны. И зонö гöтрасис да торйöтчис — квартира сетiсö.

— Челядь ни, поди, эмöсь?

— Зоночка, нёльöт вылас... Тэ сёй, Андрюшка, — и чеччис. — Винасö вунöтi тай!

— Сiя тэныт.

Верепов сёйис и юасис. А сыбöрын Федя тётка пондiс юасьны. Сiдз нiя баитiсö вель дыр, кыдз мам да зон, кöдна шоча пантасьлöны.

Кöр чеччисö пызан сайись, Андрей Никитич юалiс:

— Квартиранттэтö он ни видз? Сё бы гажажык вöлi.

— Зонö оз тшöкты. Выходнöйезнас нiя часто татöн, а ыджыт я керкуыс? Да кöр и внучокö быдса неделя олö ме дын.

— Ны дынö колö лöсьöтчыны, тётя Федя.

— Старикö эз тшöкты. Эстöн, шуö, аймамным революция керисö, бур олан понда вирнысö кисьтiсö — некытчö пö эстiсь эн мун... И некин пöрисьыс оз мун.

— Да, священнöй му — Мотовилиха...

— Сiдз, Андрюша, — лöня горöтчис старуха да чöлöв-керис. — Спасибо, пыралiн кыдзкö...

— Ме бы корся узьны, — казьмöтiс могсö Верепов.

— Мый нö, шуин, общежитие эм?

— Инькаö ме дынö локтö, сы понда кошшися... Гöтрасьны кутчи.

— Не одзöв я, Андрюшка? Джын годыс кöть чулалiс жö, кыдз дзебин?

— Эм ни.

— Сэки ладно, гöтрась. Инькатöм мужикытлöн оланыс нёштöм... Кöр сiя локтö?

— Талун рытнас.

— Понда видзчисьны, воротасö ог пöднав. А керкуас звонитан...

Тётя Федя ордiсь Верепов петiс сизимöт часö — эз и казяв, кöр локтiс рытыс. И кытчö сiдз пондiсö лэбзьыны чассэс да уйны луннэс? Эшö неважын, Кудымкарас, некытчö вöлi воштыны кадсö, и сiя сюйлiс юрсö быдлаö, медбы только кыдзкö джендöтны лунсö, ылöтны ойсö. А öнi?

«Быдöс этö сысянь, мыйöн олан — кытшöм уджöн, кытшöм интересöн, — бергöтлö юрас Верепов трамвай видзчисикö. — Колö тöдны, кытчö тэ мунан, колö адззывны, кывны, мый тэнö видзчисьö, — сэк туйыт волькалас и лоас дженытик, гажажык. Ме öнi адзза ылö и тöда, мый сэтчин, ылынас, менö видзчисьö, вот и тэрмася, судзöта бы чожажык, мый ме понда сэтчин заптöма».

Эна думаэс сы юрын тöння диспутсянь олöны. Дыр споритiсö, мый сэтшöм «менам» и мый сэтшöм «миян», мый ыждаöсь сетны нылö местаэсö велöтiсь сьöлöмын. А мый бы сэтöн споритны, кöр и сiдз тöдчö: миян — этö быдöннымлöн, этö — тэнат, менам, сылöн, а менам — этö öтнамлöн. Мöднёж шуны, миян — быдöс, быдса, öтласа, а менам — быдöссис торок, а тороклö — и места учöтжыкö, торьяö. Но, конечно, и сiйö оз ков вунöтны, что «мияныс» пондöтчö «менамыссянь».

Которков Иванлöн «менамыс» керис Гублянын колхоз, ыждöтiс посадлiсь и районлiсь славасö. А геройес, учёнöйес? Кривощёков, Яковкин, Тонков... Вологдин,

Государственнöй премиялöн куимпöвса лауреат, аслас честнöй «менамöн» эшö вылынжыка лэбтiс-зорöтiс советскöй наука.

Локтiс трамвай, но пуксьыны вöлi некытчö, кольччис мöдiкö видзчисьны. А мöдыс эз и сувтчыв, только триньгыштiс звонокöн да гымöтiс-мунiс боки, и Андрей Никитич сэсся эз понды видзчисьны: сылö колö кежавны Библиотекаö, сэсся ветлыны баняö и гостиница буфетö пыравны — сэтчин овлö шоколад.

Верепов, кöр нiя велöтчиканыс пантасьлiсö, кыдзкö юалiс Олявкалiсь «Тэ мый босьтiн медодзза стипендия вылат?» — «Шоколад», — шуис мöдыс. — «Быдöс вылö?» — «Быдöс вылö». — «И нем эз ло?» — «Некытчö тай эз и лыйышт... И медодзза зарплатаöс шоколадöн сёя сэтчöдз, кытчöдз öмöс оз курöт». Öнi эта басниыс усис тöдвылас Андрей Никитичлö, и сiя шынньöвтiс: «Колö юавны, шогмис я сiдз сылöн».

Котрасис ныр вылас усьтöдз и нем эз босьт, и эз пывсьы. Быдлаын отир, быдлаын тэрмасьöны. Бертiс общежитиеö, вожмöвтiс порогсö да котöрöн уськöтчис вевдöрись этажö.

— Андрюша!

Тэрмасьтöнняс Верепов керис эшö кынымкö оськöв вывлань да вöлись сувтчис, бергöтчис шы вылас и неыджыт öшын дорись, кöда умöля югдöтiс пыран жырсö, казялiс Олявкаöс. Сiя сулалiс лöнь, бытьтö онзыля, и видзöтiс Андрей Никитич вылö куньсян синнэзöн, кöднаись, кыдз кажитчис мужикытлö, чеччис небытик голубöй би. Этшöм бисö Верепов первуись адззылiс Женяыс синнэзiсь, и, кыдз усьö тöдвылö, сiя биыс сидзис сы вирö да нач жарöтiс сьöлöмсö и вывтырсö, недыр кежö бырöтiс садьсö, а öнi эта биоксянь только сьöлöмыс небурика дрöгнитiс, кыдз овлö самолётöн лэбзикö, кöр сiя инмас воздушнöй гуö.

— А ме квартира кошши, — Андрей Никитич раз-мöд тальччис увлань. — Кöр локтiн?

— Важын ни, — гусьöн шуис Олявка. Басöка краситöм тырппес жмитчисö зэв, дзик лöсьöтчисö шынньöвтны нето горзыны, и бура пöльтчисö нырборддэс. — И адззин?

— Адззи. Конечно, не люкс, но олан, кыдз гортын. — Верепов лэдзчис улö. — Сэтчин лöнь, топ райын. Мунам...

Öтöрас, эта зелёнöй пельöсокын, кытчö эз на ешты сибавны виль городлöн шумыс, кытöн уна важ керкуэз, пöрись отир да öшöтчöм кынöма каннез, ветлiс руас кашкалöн дук и места-мöдлаын гöрдöтiс гырись розъя рябина, кöдö казялiкö Олявкалö тöдвылас усисö шöма пирöггез и петiс дульыс. «Арнас сёравно рябинаысла ветла...»

Нiя инмисö такси вылö, и сiя казявтöг шардöтiс-вайöтiс Егошиха кырас дорöдз, и шофёрыс кыкпöв дивитiс Андрей Никитичöс: öткö, сетiс кынымкö копейка сдача, а, мöдкö, прощайтчикас шуис сiйö нимнас да тшöктiс чöскыта чулöтны шоччисян кадсö.

— Кинкö миянланись, — машина бöрсянь видзöтiкö шуис Андрей Никитич. — Мийö эд эг жö нем сэтшöмсö баитö? А? Мед позорöдз не локны...

— Мыля мийö: ме эг баит да, — сералö Олявка. — Öтнат и позоритчан.

Федя тёткалöн вöлi и воротаыс осьта, и ыбöсыс игнавтöм. А керкуас — гора басни: нето соседка пырис, нето зоныс локтiс.

«Но и ась, — решитiс Андрей Никитич и осьтiс керку ыбöссö да лэдзис одзас Олявкасö. И сысянь, мый нiя казялiсö керкусис, Олявка чуть гатш эз пöр: ыджыт жырас пукалiс да мыйкö лёбис Кирилл Потапович. И лёбис комиöн. Сiдзкö, Гублянсис локтiс не öтнас.

— Лöнь, топ райын, Андрюша, — серöмтчис Олявка. — Ноко видзöт гусьöника, кин мöдыс. Может, меным и пырнытö оз туй... — И сэк жö кылiс шысö мöдыслiсь: эта вöлi Аркашко, Зуйпиягись вузасисьлöн, Фенялöн, жöникыс.

Öтöрсянь пырис Федя тётка, нуöтiс нiйö кухня пырйöт сайись жырас, висьталiс:

— Пукыштö эстöн, нiя часöт мунасö.

Но сэтчö локтiс Чикиськин — кылöма сёдаки нылiсь баитöмсö.

— Ме шуа: менам зятьö локтiс, а сiя вон кин вöлöма — сельполöн зятьыс, — лэбтiсис сюльтыртны Чикиськин. — Ноко пызан сайö марш!

— Эн вöрöт, ась шоччисьöны, — сувтöтiс сiйö Федя тётка и висьталiс Андрей Никитичлö: — Эта миян сват, зонö сылiсь нывсö босьтiс... Уджавны боёк, рукодельница.

— Оз ков, сватьюшка, — Кирилл Потапович лап-лап керис хозяйкалiсь пельпонсö. — Мийö тысяча год тöдсаöсь, мийö быдöнным асланым. — Сiя кутiс киэзöттяс öтсö и мöдсö да кыскис горницаас, пуксьöтiс пызан сайö. — Давай няпыртам öтiкöн, Андрей Никитич да Ольга Гавриловна, и мийö пакмам... Сватьюшка, вай-ко кык дозок, — командуйтiс Чикиськин, и старуха вайис рюмкаэз, вилкаэз, содтiс сёян и вöлись öзтiс би, везтiс öшыннэсö веж-гöрд сера занавескаэзöн.

Юись мортыс тэрмасьö, кыдз мийö тöдам, кывнас. Пызан сайын ли, туй шöрын ли — сылöн визыв юöн, бытьтö пруд кырöтiс, пондöтчö киссьыны басни, и чивзö сiя, дзик воробей тулысся лунö, и чожсялöм киэзнас, дзик катша, шевксьö, и чивзöмын часто пантасьлö кыв-майöг, кöда бердын видзсьö йöр-басни, — ме. А Чикиськин ёна радейтiс асьсö и мексiс ёнакодь. Не етшажык сiя радейтiс и винасö да гордитчис и вексö ошшасис — кужö юны и кужö уджавны. А кöр пö кужан юöмсö да уджалöмсö — энö кык вöвсö — доддявны öтлаö, то бытшöма овсьö, кокнита лолассьö и он оз паляв.

Минута бöртi, кыдз юыштiсö, Кирилл Потапович чышкис певнас сметанаöсь тырппесö, бергöтчис Олявкалань:

— Адзза, Гавриловна, тэнат синнэзiсь вопрос: кыдз сюрис Перемö Кирилл Потапович? Висьтала: отпуск костас сiя вольнöй казак. И бöра вопрос: просто сюрны сiдз сiя абу йöй Öмель, дак мыйла? И бöра висьтала: вузасьны. Вузасьны лукöн...

— Лукöн да мый да, — содтiс Олявка.

— Может, и «да мый да», но этö сельпоись председательлö, кöть и вузасьö сылöн бухгалтер, оз ков тöдны. А машина — законнöй: вовлiс Пеpемö грузла.

Аркашколöн эм легковушка. Сiйö отсалiс сылö босьтны сельпоыс эшö сэк, кöр вöлi нiйö сьöкыт небны, и мужикыт Чикиськинлö, кыдз благодетельлö, берсясö сiйöн вайö-нöбöтö. А талун грузовöйöн локтöмась, сiдзкö, неетша вайисö, может, не öтiк тонна. И кылö Олявка: не сöстöм эстöн уджыс, не аслас огородечись Чикиськин сымдасö нöбöтiс, натьтö, а Фенякöт кинöскö тшöтшкöртiсö, донтöмика, кыдз государствоö, босьтiсö. И барышсö, конечно, курмыштiсö содзтыр.

— Видзöтлы, Кирилл Потапович!..

— Видзöтла, Гавриловна, кыдз жö! Видзöтлытöг и керкусит öнi он пет.

Хозяйка кывзiс, кывзiс да и шуис:

— Вот и кер этшöммескöт бур олансö... Ох, сват, сват!

Чикиськин быдсöн вывтырнас бергöтчис сы ладорö:

— Сватьюшка, эн тöждiсь. Колхоззэсö кин керис? Мийö! Гитлерсö кин джагöтiс? Мийö! И коммунизмтö керам — абу нем!

Сватьяыс эшö мöдiс мыйкö висьтавны, но только юрнас качыкайтыштiс да петiс горницасис — нем пö и баитны, сёравно он кывзы, сёравно он вежöртчы.

— Мийö быдöс керам, — эшö öддьöнжык öдззис горавны Чикиськин. — Сiдз эд, дона ёрт менам? — и пöрöтчис Аркашко пельпон вылö, размöд малыштiс сылiсь юрсö. — Накажитi ме тэнö талун — эг юктав. Но тöд: вештiся, бокö ог керсьы. Капут!

Этшöм коддэсö öнi Олявка терпитны оз вермы, но эстöн не гортас и öддьöнсö ыждавны эз лысьт, только öлiс:

— Сэсся эн ни ю, Кирилл Потапович, а то усян кытчöкö.

— Эн серав менчим бухгалтерскöй юрöс, — бöра адззис ассис дона кыввесö Чикиськин. — А кöть и уся, дак менö чеччöтасö. Тэнат усяс — озö.

— А менам оз и усь.

Чикиськин мургыштiс, нюмыртiс öмсö:

— Верно. Сiя и усьнытö оз куж.

— Да, эг на велав, — шуис и Верепов, — а öнi сёр ни велöтчыны...

— Ö-ö, кин эз усьлы, сiя абу ни мужик.

— Абу, абу, — отсалiс сылö Олявка. — Только вот мый, мужик: тэ, шуан, вольнöй казак, а Аркадийыслö эд уджавны колö — страда!

— Колхозыс понда сiя луннас уджалiс, а ойыс — миян.

— Кыдз этö тiян? — эз вермы чöвны и лэбтiсис видчыны Олявка. — Машинаэсö городiсь иньдöны колхозас, а колхознöйес пондасö чышкыны городскöй базаррез, да?

— Сыть, Гавриловна! Мийö — абу! — Чикиськин чеччис, босьтiс пызан вылiсь джыння бутылкасö, пиджак кармансис кыскис резиновöй пробка, тупкалiс бутылка голюксö. — Этö сьöраным босьтам, Аркашко. — И Олявкалö: — Извинит, Гавриловна, мый не тэ сьöртi горöтчисис. И — ме татöн эг вöв, тэнö эг адззыв. Капут! — Сiя резiс-вешталiс ыбöсоксис штораэз, мунiс порогувтас, норöн горöтчис: — И видöны менö, сватьюшка, и кöритöны, и некин менö, куш юрöс, оз жалейт. Кöть бы тэ бур кыв мыччыштiн.

— Кыдзкö вовлiн бöра, сват... А видöмыс да кöритöмыс йылiсь менам старикö вот мый баитлiс: видöны тэнö — овны велöтöны, кöритöны — бур мортö пöртöны... Но, сват, нöбöт менчим поклон сватьяыслö. — И велöтiс шофёрсö: — Тэ бура кабинатö пöднав, ась оз жö усь. Да гортöдззас кыскы, иньыс киэзö сет.

— Абу нем, сетам, — висьталiс Чикиськин и кокнита петiс керкусис. Сы сьöрö вöтчис Аркашко. Хозяйка кольлалiс нiйö ворота сайöдз, пöднасис да пырис мöд гöссез дын, извинитчис:

— Эн осудит, Андрюшка... И тэ, Оля. Дзугисö тiянлiсь рытсö... Чай юит?

— Юим.

— Сэк водö узьны, сёр ни.

— Перво дзимлялам нö пызан вывсис, — лöсьöтчис отсавны Олявка, но старуха эз лэдз:

— Эшö мый висьталан? Менам сiя и уджö кольччис — дзимлясьны да миськасьны. — Но сэсся согласитчис: — Чукöртам инö лякöсь посудасö кухняас. — Сылö, тыдалö, охота вöлi баитыштны ылiсь морткöт, öтi-мöдi юасьыштны, может, родняыс йылiсь, висьтасьны моньыс да зоныс йылiсь, ошшасьны внучокнас, но дзар керис часы вылö и бöра мöдöрö керсис: — Кадыс, кадыс! Чожа югдыны пондас, а ме сё шарбарита...

Нiя курни-верни тэчисö бекöрпаньсö пызан вылö, чапкыштiсö сы вылö газета и пондiсö ольсасьны.

Ашынас саймисö сёрöн, чеччисö дыша: керкуыс ойнас буракодь сайкалöма. И бöра Андрей Никитич жалейтiс Федя тёткаöс — öтка мортöс, кöдö одзöв колис жöникыс и кöдалö сьöкыт вожгайтчыны хозяйствонас. «Натьтö, джоджув керрес сiсьмисö, сiйöн и сайкалö», — думайтiс сiя. А кöр чеччис да осьтiс занавескасö, решитiс мöднёж: кысь лоны шонытыслö, кöр öтöрас сивко туплясьöма — му вылас куйлö кыз пуж? Да и то — вот-вот сентябрьлöн кымöсыс мыччисяс.

Колiс бы ветлыны, кыдз эшö тöн лöсьöтчисö, билеттэзла, но Андрей Никитич шуис, что кресенняö автобусын местаэс пыр эмöсь, тэрмасьны нем, и Олявка согласитчис сыкöт. Кыкнанныслö охота вöлi дыржык лоны öтлаын, оча ки, не думайтны янсöтчöм йылiсь, а ежели билетыс карманын ни, дак и неылын янсöтчан минутаыс, кöда бöрын кутö гажтöм.

Нiя уна ветлöтiсö городöт, пыралiсö кынымкö магазинö, кытшöвтiсö колхознöй рынок, кытöн Андрей Никитич небис пуховöй шаль, кöда шöрын сiдз и сералiс катшасин и медъёна гленитчис Олявкалö. И öтыс, и мöдыс радöсь: Олявка — что сiйö этадз радейтöны, дона козин козьналöны; Верепов — что бур дело керис, мортлiсь сьöлöмсö шонтiс-бурмöтiс.

И эшö мöдiк бур дело — сы йылiсь важын ни думайтiс Андрей Никитич — керисö: ветлiсö уральскöй танкисттэзлö памятник дынö, пуктiсö цветтэз. И Верепов первуись матiсянь нёджжалiс танксö. «Вон кытшöм, ая, тэнат вöлöма «кöртовöй, öтiк сюра вöлыт», кöда йылiсь письмоэзат гижöмыт!.. Адззылiс я мамö танксö? Ежели фронт вылöдз ветлiс, дак адззылiс, натьтö».

Эта бöрсянь мунiсö садö и, дзик томöсь, карусель вылö пуксьылiсö, чукыля-верöпа зеркалоэз одзын сералiсö, ыджыт круг нiйö кымöр увтöдз — сьöлöм потö! — лэбтылiс. И сэтчинсянь Олявка унажык не городсö нёджжалiс, а Кама сайсö видзöтiс, кытöн чужан муыс олö, кытöн мöдiк дуккесö вермалö öнi идзас дук, йики дук, сю дук. Вылiсянь жö казялiс, кыдз ой ладорсянь чукöртчöны кымöррез — пыкöсаöсь, лöгöсь, повзьöтчанаöсь, — и пондöтчö руавны негожумся уль тöлок.

Чеччисö «чёртыс круг» вылiсь, босьтiсö мороженöй да мунiсö музыка кывзыны — орсiс солдаттэзлöн оркестр. Пуксисö медбöрас, отирыс дынсянь торйöнмоз — сэтчин эзжык варт юр кузя барабанлöн шыыс и меднöй тарелкаэзлöн горыс пеллез эз чанöт.

— Лукö эд кертöм, Андрюш...

— Дак мый?

— Не дак мый, а мый дак, — сералöмöн шуис Олявка и дыркодь видзöтiс сы синнэзö. — Гортö колö тарöвтчыны. Олыштiм öтлаын и тырмас.

— Висьтав, пожалуйста, Оля, эн суськы: ме абу ни сэтшöм, кытшöм вöлi сэк? — пондöтiс Верепов, позьö шуны, челядьлiсь, ладтöм басни да бергöтчыштiс Олявка ладорö, кöда видзöтiс сылö паныт сöстöм, дзик кагалöн, ыджыт синнэзнас серьёзнöя, серавтöг, и Андрей Никитич моз жö серьёзнöя юалiс:

— А ме? Ме сё сэтшöм, да?

— Тэ сё дзирыт, сё пизян... Сё том вынöн олан... Тэныт гажтöм мекöт, Оля?

— Тэкöт ме счастливöй. Тэкöт ме борда. И былись — том вына...

Висьталiс сiдз и дивуйтчöв-керис: кысь сылöн лоисö этшöм кыввес, кöрсянь? Этадз, натьтö, и сэк, томувьяс, эз баитлы, кöр сылö, Андрюшася, нем эз ков — не му, не шондi.

Мортлiсь вынсö, сы душалiсь öдсö — том сiя али пöрись — меряйтöны олöм-чулöтöм годдэзöн, но сiдз керöны весь, неладно керöны: эта понда колö адззыны мöдiк мера, кöда йитсьö уджкöт, сы мечтакöт, йитсьö сыкöт, кытшöм синнэзöн сiя видзöтö паськыт мир вылö, кытшöм сьöлöмöн радейтö отирсö, мусö да быдöс сiйö, мый эм сы вылын ловьяыс и неловьяыс. Этö мерасö ме бы шуи то этшöм мича кылöн — олангаж...

Тöлокыс лоис смевжык, орсiсьжык, и вöрöтiс не только пу йыввесö, но кошшисис-бергалiс, шныра, и увтiжык, му бердöт, пыркöтiс отирлiсь паськöм, чöвталiс шляпаэз, шупкасис клён листтэзöн. Öтiкö, нач ни гöрдö, паськöтöм чуняö, чапкис Олявка öлöдзö. Олявка кутiс сiйö заокöттяс, малыштiс увтсö и вевдöрсö — листыс вöлi кöдзыт, дзик лягуша, и сiя бöра казьмöтiс, что сибалö сайкыт кад.

— Гортö колö мунны, — эшö öтпыр висьталiс Олявка. — Сiйö и видзöт — кöдздöтас. Мöйму, тöдан, мый вöлi?

— Узин бы эшö, — небурика корис Андрей Никитич. — Весь тэрмасян.

— Ашын сессия, а ме депутат... Тэ эд чожа ни бертан, — Олявка пондiс лыддьыны луннэсö листыс чуннез вылын. — Вит лунок кольччöны... — И вдруг сьылöмöн моз лыддьöтiс частушка: — Сё тай виттэз, сё тай виттэз, кöр нö кваттес лоасö? Сё янсöтчам да бурöтчам, кöр гуляйтныт пондамö?..

— Ме и шуа: кольччы...

Гöрд листоксö Олявка дзебис сумкаас, чеччис.

— Кольлав, Андрюша, вокзалöдззас. Может, талун жö гортöдз ешта локны.

— А листоксö мыйлö?

— Сiя миян баснилöн свидетель... Ме завечайтi сы вылö...

Мыктöвтiс Андрей Никитич, кыскис кармансис ключчез, öтiкö мездöтiс кольцо бердiсь да пуктiс Олявка кырымö.

— Сёрöн кö локтан Кудымкарас, дак миянын узь... Зэв гажа марш кольлалiс нiйö ылö парк сайöдз, и, кöр сiя орис, нiя джендöтiсö оськöввезнысö, пондiсö мунны жагöника и не öтмоза. Эта коста улица сайсяняс кытсöвтiс нiйö кузь кока солдат да иньдöтчис ны дынö. Олявка дзар керис сы вылö и чуть гатш эз пöр: Колька Баканов! Зэв кутчисис Андрей Никитич бердö, дзебсисис сы сайö.

— Висьталö, пожалуйста, кыдз петны Серебрянскöй улицаö? — вöснитик голосöн юалiс солдатыс, и Олявка лöньсис, пондiс видны асьсö: «Бöбöв тай ме: Колькаыс меным öнi некин, а сё пола. Да и сiя не ни солдат и не том морт...»

Не öтпыр сiдз аслыс шувлiс и мöдiс вунöтны, нимсö сэсся не касьтывлыны одззася жöникыслiсь, а вот оз пет сы моз и сё полö да пуктö асьсö виноватöйö, а мукöдпыр и жалейтö сiйö.

О, инькалöн добрöй сьöлöм! Кытшöм бур, что тэ сэтшöм, что прокод кöдзан добрöй кöдзыссэз!..

Час бöртi, кöр бура ни лажмалöм шондiсö ньылыштiс кымöр-пороз, кузь гöрд автобус кыскис Олявкаöс уна басниа да буса автовокзал дынiсь.

Дата добавления: 2015-11-16