ПОВЗЬÖТЧÖНЫ

Вöлi понедельник — лöнь лун: магазинын вина абу, и мужикпöлöс, кöть и не быдöнныс кокнит сьöлöмöн, гудыртiсö ыб вылын, фермаын, сю косьтанын, и только кык морт шатласисö посадöт — сельпоись электрик, кöдö асывнас Олявка вашöтiс удж вылiсь, да Чикиськинлöн зять — бригадаись меддыш морт. Сiя не öтпыр ни сюрлiс медвытрезвительö, штраф увтö, но нем эта, тыдалö, сы бердöдз эз лок. Öтi лунö сы йылiсь баитiсö Советлöн сессия вылын и Олявкаöс тшöктiсö мырддьыны сылiсь самогон керан, да сiя эз на ешты.

Сэк жö сессия бöрйис комиссия, кöда пондас пессьыны самогон кериссескöт. И эта вöлi öддьöн бур, сiдз кыдз самогон керöм, кöр сельпо етшажык пондiс вузавны вина, бöр зорамис, и аскурнас нельки пондiсö торгуйтны. Максимовна сессия вылас висьталiс:

— Мийö öддьöн аскадö осьтiм комиссиясö. А то мый петö: уссёсö кöрталiм, а пыдöсыс осьта... Ась комиссиянас командуйтö Савыркина.

— Бöра ме? Тiйö мый этö? — и Олявка пондiс лыддьыны, кынымлаын сiя öнi «командуйтö». Но Максимовнаöс эшö некин эз вевттьывлы баснинас:

— Мыля «бöра», Гавриловна? Öтiк бур дело керин — кутчись мöдiк бердö. Да и этiя не мöдiк, а сё сiя жö делоыс, мый понда мийö пессям — джагöтны «зелёнöй гундырсö» — кыдз шуис Гаврила Лекандрович.

— Сэтчö колö мужиккезöс...

— Босьт и мужиккезöс — эта тэнат право. Шуам, Африканöс. Кöть и юыштлö жö ачыс, но аскурщиккесö терпитны оз вермы.

Неважын Чикиськинлöн зять босьтiс уна сахар, а коли öнi кодалö, сiдзкö, керис аскурсö. «Корны бы милиция и самогонсö мырддьыны, а сыбöрын судитны, — думайтö Олявка. — Но, мырддям аппаратсö, пурам кыввезнаным да колям, а сiя вильö керас...»

Талун кöсйисис локны Андрей Никитич, и Олявка видзчисис сiйö кузьлун. Но вот и шондi ни пуксис, а сiя сё абу: тыдалö, эз инмы медбöрья гублянскöй автобус вылö и кольччис Кудымкарö.

Рытыс петiс лöнь, учöтик тöлiся. Ылын-ылын, кытöнкö сьöд вöррес сайын, орсiс неюгыт, чуть тöдчана гöрдкодь би, кöдö отирыс шуö калинникöн. Эта орсöмын вöлi кытшöмкö тöдтöм вын, загадочнöй гаж да мыйкö сэтшöм, мыйсянь пондö пессьыны сьöлöм, кöр лöсьöтчан петны ылiсь и тöдтöм туйö, кöда йылiсь висьтасьöны уна бурсö и неетша умöльсö.

Олявка дыркодь видзöтiс калинниклiсь орсöмсö ограда одзас да сё смекайтiс Андрей Никитичлiсь мыччисьöмсö, но сiя эз вöв, и решитiс мунны Африкан ордö да нуöтны сiйö кошшисьны. Африкан видзöтiс кино и пестуналiс, а иньыс пукалiс сыкöт ордчöн и вышивайтчис. Конечно, не öтныслö, не мöдныслö öнi эз вöв охота янсöтчыны — этö Олявка сразу казялiс и мöдiс ни керсьыны бöр, да Африкан ачыс пондiс лöсьöтчыны:

— Сёравно кöркö ковсяс мунны, дак лучше часöт, ежели локтiн, — шуис сiя. — Эшö Венькасö босьтам...

Чикиськин зять ордö нiя локтiсö сэк, кöр хозяин важ керкусис, не олансис, петiс ыркöтчыны посöдзö. Африкан кытсöвтiс сiйö, висьталiс:

— Гöститны локтам и как раз, некö, инмим.

— Ойнас ог потшшуйтчö да, — паныт шыасис хозяиныс и голь-голь керис поспунас да лэдзчис улö. — Локтö ашын.

— Ашын миянлö бöрана некöр, — серьёзнöя висьталiс Африкан. — Давай-ко пырам керкуас.

Керкуас вöлiсö Чикиськин зятьлöн иньыс да зоныс, нiя тэрмасисö дзебны «винзаводнысö». Пызан вылас сулалiс ыджыт стекляннöй банка, сэтöн вöлi хренiсь да помидорись керöм закуска, бокынжык сулалiс неыджыт стакан да куйлiс пуовöй пань.

— Ештiн ни? — юалiс Африкан.

— Медодзза нырсö тай пешлыштi, — шуис хозяин. — Поди, юыштан?

— Тэ вот мый, мужик, — шуис Африкан. — Бадратö мун пöрöт кырасас, а «заводтö» миян син одзö петкöт. Бытшöмика и баитчам сэтöн, мый одзлань керны: али татöн паздам, али ашын ачыт ваян...

Двенадцатöй час вылас Андрей Никитич сибöтчис Олявка керку дынö, тарскöтыштiс öшын тасö, но Олявка эз саймы. Сярöтiс горöнжыка — шы абу.

«Мунiс кытчöкö али оз лысьт осьтны?» — думайтiс сiя и явитчис:

— Оля, этö ме!

Керкуыс кыдз чöлiс, сiдз и чöлö.

Мунiс ворота одзö — сэтöн замок. Серöмтчис, думанас висьталiс: «Не пон, не кам, а керкуö пырны оз лэдз...»

Петiс улица, шöрö, öтлань дзарнитiс, мöдлань нёджжöвтiс — узьö Гублян, лунся мыдзсö вашöтö.

«А сiя кытöн узьö? Али гуляйтö кытöнкö? Ковсяс сельпоас ветлыны, абу я кытшöмкö собраннё».

Мунö жагöник, кымöррес вылö видзöтлö, оз я мöдö нiя зэрны. Озö. Не кызöсь нiя, вон и тöлiсёксö оз вермö сайöвтны.

Вдруг — ып да ып кыкись лыйисö.

Кинкö чирöк моз горöтiс, и сэк жö ыджыт ув да гав лэбтiсö поннэз, а вылiсь улица ладорсянь кылiсö кок шыэз. Бергöтчис ныланьö, адззö: паныт сылö пöльтö морток. «Ага, пышшö... Не я сiя лыйсис?» А мортокыс — киöн судзöт.

— Эй, мужичок! Ноко сулав!

Мужичокыт шваткис сылö кымöсас мыйöнкö чорытöн и уськöтчис огородеч ладорö, мöдiс кайны стын вылас, да эз ешты: öт кокöттяс кутiс сiйö Андрей Никитич, а мöдöттяс... Олявка. Сiя эз и видзöт, кин сылö отсалiс кутны пышшисьсö, кутчис сiйö мутузитны кулаккезнас.

— Оля, тэ мый керан?! — Андрей Никитич сайöвтiс мортоксö, жмитiс стын бердас. Лöгасьöм Олявка кынымиськö чувйыштiс и сылö да вöлись пондiс швыньгыны-горзыны. Сэтчö локтiс Африкан и вайöтiс мöдiк угланöс.

— Шедiс? Вот и ладно! — борскис сiя. — Часöт мыччалам, кыдз лыйлыны морттэсö!

— Кинöс лыйисö? — повзис Андрей Никитич. — Не я Олясö? — Сiя öт кинас видзис зонкасö, мöднас кутыштiс Олявкасö. — Оля, былись?

Лёкгоршöн чирöстiс Африкан дынiсь зонкаыс, и мöдыс, ыджытжыкыс, летöвтчис Верепов киись да пондiс чижьявны-гыжьявны Африкансö, но мужикыт сапырнитiс сiйö конувтас, лэдзис вешьянсö да пуксьöтiс петшöрас. Сэк жö бакöстiс и эта, петiс петшöрсис да тупыльтчис лудовка вылас. Верзьöм кодь Африкан кокнита сувтöтiс сiйö одзас и сивиöттяс видзтöн юалiс:

— Эшö пондат? Буксöны-горзöны кыкнанныс, озö баитö.

— Али унажык колö? Верма содтыны. Учöтжыкыс мыкталö-сыркьялö:

— Мы-мыйлö папöс удж-уджсис вашöтiс? Мы-мыйлö Ви-Витяэслiсь аппаратсö мырддьö?

— Воно мый! — ыкöстiс Африкан. — Кылан, Гавриловна? Мийö аскур кераннэсö жугдалам, а аскурщиккес — миянöс... — И рякöстiс бöрдiссеслö ош моз. — Ноко дыв гортö, зырымбеддез! — и сеталiс сивилёнаныс. — Но, ладно инö, — рамжыка ни горöтчис сiя и мунiс прощайтчытöг.

Посад шöрас кытсöвтiс петух — некузя, лöга, тэрмасьöмöн, дзик строгöй бригадир некывзiсьлö наряд сетiс, и сэк жö шыасис мöдiк — гора голоса, валькыт песняя. Куимöтыс, натьтö, шогалiсь, а может, и курöг, пондöтiс керксöмöн, кыскыштiс голоссö и дугдiс сьывны, дзик виньдiс. И бöра горöтiс первöйыс, только эшö лöгжыка, и песня конецас нельки бобгыштiс: может, аслас кыв вылын висьталiс сэтшöмö, мый мукöдпырсяс роч кыв вылын гартыштлö коми бригадир. И вöлись сэтчö лэбтiсис, вöлись öзйис шумыс! Öтдруг кытсöвтiсö вит-квать кыныма, нылö отсалiсö сымда жö, сэсся эшö, эшö, эшö!

Андрей Никитич вунöтiс неважынся зыксö да Олявка понда повзьöмсö и чурдöм пельöн кывзiс этö ойся концертсö. Сiдз нiя оча ки кутчисьöмöн локтiсö гортаныс, пырисö, öзтiсö би. Олявка порогувтас жö жмитчис Андрей Никитич бердö и норöн-норöн öдззис горзыны.

— Оз ков, Оля, öвсьы, пожалуйста... Нiя эд не былись, просто повзьöтны мöдiсö, — кутчис лöньсьöтны Андрей Никитич. — И нем сэтшöмыс эз ло... Нем... Конечно, эта ЧП, но... Может, Оля, чапкисьны тэныт этаись... самогон войнасит? Сётаки сiя абу женскöй дело. Думайт-ко ачыт.

Эта йылiсь Олявка думайтiс бура и решитiс бура: сылö бöр керсьыны оз туй! А кыдз жö: öтiк оз понды, мöдiк оз понды, дак кин нö пондас?

— Чапкисьны меным оз туй, совесть оз лэдз... А что горзi, дак не только сы понда...

Ашынас Олявка кузьлун лöсьöтчис ветлыны сельсоветö, медбы висьтасьны ойся история йылiсь да мыччавны сэтчин, мыйöн «орсöны» мукöд челядьыс (пугачсö адззис асывнас улица шöрись — сiйöн, тыдалö, ойнас и вачкисö Верепов кымöс кузя), да сiдз и эз ешты: сельпоö локтiсö кык милиционер — участковöй инспектор да эшö кинкö.

— То сiя мортыс, кöда тэныт колö, — пырикас жö горöтчис инспектор. — Ме петала бухгалтер дынöдз, ог понды мешайтчыны.

Участковöй мунiс, а мöдыс пуксис матöжык Олявка дынö, осьтiс кучиковöй папка, босьтiс сэтчинiсь бумагаэз, вöснитик голосöн юалiс:

— Этö кин миян? Савыркина, да? Ольга Гавриловна?

— Ме Савыркина. Тiйö ме дынöдз?

Мöдыс чöлыштiс, чуньнас павкöтiс нырбордсö и юöртiс: — Менö иньдöтiс обехаэсэс. Локтiсö сигналлэз.

— Да, мийö гижлiм, — горöтчис Олявка, но мöдыс сразу жö лэбтыштiс кисö — кыдз бы панöвтiс баснисö и висьталiс:

— Эстöн тэ йылiсь юöртöны, Савыркина ёрт, — не öддьöн серьёзнöя, серöм пыр шуис мужикыс, и эз позь вежöртны, быль я сiя баитö.

— Ме йылiсь? — тожö серöм пыр юалiс Олявка. — Видзöт-ко мый!

— Час видзöтам... Керку неблiт сельпоыс понда?

— Босьтлiм.

— Вит сотня вылö?

— Вит вылö... Рядитчим вит вылö, а...

— Чуклясьны ог пондö, а честнöя баитам... Документтэс сьöртi — вит сотня видзит, а сетiт керкуыс понда куим сотня да джын. Кытчö мунiс мукöдыс?

— Кытчö? Неужто кинкö думайтö, что аслым босьтi?

— Сiдз шуöны. Да ежели бы только сiя... Кывзы вот, лыддьöта...

Гижöмась не сiдз уна, да неетша каттьöмась — правдасö и неправдасö: сельповскöй делянка вылiсь вайис пö гусьöн кык машина пес — сельпо машинаöн жö, пилитiс сельпо «Дружбаöн», гöрис и садитчис сельпоись вöлöн — и быдöс эта удж понда нем эз вешты; гусьöн вузалiс пö важ домкраттэз, циркулярнöй пила, двигатель... А нем сiя эз вузав, нем весь эз видз, разь öтiк вöв, кöда понда местком вöлi решитöма деньгасö не босьтны. Неыджыт движок, кытшöмöсь одзжык видзисö кинопередвижкаэз, вöлöма не сельполöн, и Олявка тшöктiс сетны сiйö Котöроклö да Ванько Ваньлö, кöдна мöдöны керны сэтiсь трактор. И эз на кывлы и оз тöд, мый сэтшöм домкрат да циркулярка. И сто пятьдесят руб керис добрöй дело: сы вылö небисö важ тракторнöй косилка и öнi ытшкисьöны сiйöн не только аслыныс, но и колхозыслö.

Локтiс участковöй, юалiс следовательлiсь:

— Тэнат быдöс?

— А гижас объясненнё и быдöс лоас.

Олявка эз вермы и эз любит тэрмасьны этшöм делоас, сiйöн и откажитчис часöт:

— Ме ашын гижа. И вая отделаныт.

— Но мый, и сiдз лöсялö, — согласитчис следователь. — Ме — сизимöт кабинетын... Баит, лейтенант...

— Менам дженыт басниö, — висьталiс участковöй и кыскис сумкасис ыджыткодь комзыль, паськöтiс трепичсö и жольк пуктiс Олявка одзö. — Эстöн пятьдесят четыре ключ, и нiя почти быдöс вильöсь. И, натьтö, быдöс тiян сельпоись.

— Кыдз миян сельпоись?

— Гусялöмась складсиныт.

— Ог верит. Миян нем эз öш, — пондылiс пыксьыны Олявка, но тöдвылас усис пугач, и сiя шуис: — А, пожалуй, вермас лоны, ежели то этаись морттэзлö лыйлöны, — и пуктiс пугачсö участковöй одзö да висьтасис, кыдз сiя сюрис сы киö.

Участковöй кывзiс да шыннялiс, дзик радуйтчис, и только и висьталiс:

— Гиж и эта йылiсь... Менам ним вылö. Да ветлам складаныт, видзöтам замоккез.

Мунiсö складö, видзöтiсö. И дыркодь ойзiс хозмагись вузасись, кöдалöн семнадцать виль замок вöлiсö нач ключтöмöсь.

— Нате бöрйö замоккес сьöртi и мöдпырись эд суналö, — висьталiс инспектор ключчесö сетiкö.

— Ме сэтöн абу виноват. Миян сторож эм, — ыстiсис продавец.

— Сторож!.. Луннас босьтöмась, öбед кежö складаныт нiйö пöднавлöмась... Видзöтö, мед синнэз колассиныт нырнытö эз гусялö. Да и пеллезат быдса золотöй клад — тожö вермасö гусявны...

Пеллезын клад йылiсь басни Олявкалö казьмöтiс мöдiк кладдэз йылiсь, и сiя гортас вились осьтiс веж тетрадьсö, адззис легендаэз и айыслiсь быль...

Дата добавления: 2015-11-16