Гожумыс мöдö лöсявны

Талун кресення, и Олявка шоччисьö. Шоччисьö, кыдз шуис Котöрок, куш гöгöн: петкöтiс огрродечö простыня, ольсалiс баня бокö — шондi морос вылö — и жаритö кучиксö быд ладорсянь. Некинлö сiя сэссянь оз тыдав: огородечсö сайöвтöны межаэз кузя садитöм пуэз — и сiйö некин оз вöрöт, оз дзуг сылiсь шоччисьöмсö.

Медодзза луннэзас, кыдз сiя пондiс уджавны сельпоись председательöн, сiйö вашöтлiсö усявтöдз: то сельсоветö корасö, то райпотребсоюзö, то колö машинаэз адззыны, медбы вайны станцияись шифер, кöрттув, цемент, кöдна öддьöн колöны гожумнас, то тшак öктiссезöс кошшыны.

Кыдзкö локтiс письмо, кöдаын Виль Гублянiсь отир гижöны, что нылöн ларёк вузасьö ой и лун, а нянь, сов, сахар овлö не пыр. Эта письмосянь Олявка нельки радмис: öткö, содасö факттэз сы доклад понда, кöдö ковсяс керны сельсоветын, кöр сессия пондас кывзыны винаюöм йылiсь вопрос, мöдкö, лоас мог ветлыны сэтчин, кытчö сiйö öнi кыскис сьöлöмыс мед ни ёна.

Не öтiк лун, не öтiк маетнöй ой сiя видзчисис Андрей Никитичлiсь локтöмсö, да сiдз мужикыт эз и вовлы, кöть öнöдз, кыдз кывсис, олö сойыс ордын. Важын ни бы Олявка котрасис ачыс, кöбы эз вöв стыд бабыссянь. Сё думайтiс, что вот вунöтчисяс сiя позорыс, и вöлись мунас.

Öтпыр пондылiс гижны письмо, куим строчка ни гижлiс, да косявлiс; кöдковну нарошно петалiс Котöрок ордö, медбы казьмöтны сылö жöник йылiсь, кöда кошшö «богатовöй» невестасö, а может, и иньдöтлыны сы дынö, да старикыт мыйкö костöмавны пондöма. И вот тöн, суббота асылö, сiя ветлiс Виль Гублянас, öктылiс босьтасиссесö, уна баитiс вузасисьыскöт, кöда одзлань кöсйисис уджавны кыдз колö.

А сыбöрын... Сыбöрын вöлi быдса рай: сiя пантасис Андрей Никитичкöт Арашорка кывтытын, стрась мича расокын, и олiс сэтчин сёр рытöдз.

Туплясьö Олявка, и шондiыс нежитö сiйö, сiдз и окалö, нюлöмöн-нюлö сылiсь волькыт яйсö рам югöррезнас, жаритö, чорзьöтö кучиксö.

«Шуöны, дзирыт радейтöм мортыслöн овлö öтпырись, — дыша думайтö куйлiкас Олявка, — а ме ог верит... Вöлi ни тай менам сэтшöмыс да кусiс, а öнi то бöра, да эшö вынажык, эшö чöскытжык... Али сiя, одззасяыс, эз вöв сэтшöм дзирыт?.. Вöлi, вöлi!»

Сылöн лайкыта шардö сьöлöмыс, ыджыт гаж паськöтö мороссö, и быдсöн вывтырыслö сэтшöм долыт, сэтшöм кокнит, что век бы этадз куйлiс, эз и вöрöтчы бы, эз и чушыкты, ежели позис.

Нежитчö инькаыт да сё касьтылö и касьтылö тöння пантасьöмсö, виа басниэсö, Андрюшкалiсь ласков синнэсö да киэсö.

Нежитчö и неважынся зэрöн киськалöм турун, быд тылöпокыс нюжöтчö вывлань, тэрмасьö быдмыны, одзасьö мöдiккескöт, ештöтчö öктыны кызжык вын да басöкжык цвет, медбы сыбöрын сетны сылö, кин сiйö чужтiс-пестуналiс, ыджыт «дань» — и воöм кöдзыссэз, и асьсö.

Небытик тöлок малалö Олявкалiсь юрсисö, балямош сьылö онмöсьтан сьыланкыв, и абу сылöн некытшöм садь, некытшöм охота, медбы вöрзьöтчыны: локтiс сэтшöм кад, кöр телоыс бöра корö сiйö, мый вöлi Арашорка дорын, горöтöмöн горöтö: «Вай! Вай!», и вемыс оз вермы шуны огсö, оз вермы чегны корöмыслiсь бöб вынсö, олö сы долытöн жö...

Чу, Венька семьянас локтiс Котöрок дедыс ордö, борскö-баитö, дзик бригаднöй собраннё вылын:

— Ноко висьтав, дедынь: обязательство босьтiн, что государстволö сетан тонна карч?

— А кыдз инö? — шуö дедыс. — Разь сiя меным чужöй? Государствоыс — меным, ме — сылö... Вач-вач олам, вековечнöй смычка...

— Дак а мый нö думайтан, мыля он быдты карчтö?

— Быдмас, быдмас, нучок! И кык тонна лоас!

— Еныс быдтас?

— О-о, не! Сыкöт ылö-ту он чеччöвт, Тэнат киöн, нучок, быдта. Да зэрыс отсыштас, да шондiыс вотсыштас. Сiдз эд, челядь?

— Сiдз, деда, — шуö Венькалöн медучöт зоныс. — И ме отсышта... Анькытшыт эм ни?

Рыз-рыз серöмтчис Венька, нöитыштiс зоныслiсь читкыля юроксö, висьталiс:

— Сылöн ма ни эм, сiйö кор. — И юалiс: — Тяпкаэт лэчытöсь?

— Бритва кодьöсь. Важын ни рашпильöн зыртi.

— Сэк мун кошшы матортö, а мийö пондам кучитчыны... Ох, и лунок сувтiс!

— Басöк, не вомдзавны бы... Благодать!

— Лöсявны мöдö гожумыс, дедынь! Неделька бöртi эшö бы эта кодь жö зэр — и осяэс лэбтiсисö бы, няньöн бы вöлiм. Но обязательствонымöс, кыдз ме видзöта, сё ни ог тыртö таво...

— Туруныт, видзöт, кыдз чеччöвтiс. Гуляйтас бöра косаыт.

— Вердчаныс диво чукöртчас, подаыс пöт лоас, — шуис Венька и дзур-вир осьтiс огородечас ворота да сетiс команда: — Бöрйö, стахановеццез, кытшöм любо, вон дюжина тяпка лöсьöтöм. И кытiсь сылöн сымдаыс?

«Лöсявны мöдö, — висьталiс бригадирыслiсь кыввесö Олявка. — Мöдö лöсявны...» — и долыта шынньöвтiс.

Куйлiс бы сiя этадз, натьтö, сотчытöдз, да кылiс воротаö ёркöтчöм — гораö, повтöмö — и ковсис мортытлö чеччыны, кышавны вывтас халаток.

— Гавриловна-а! Тэ кытöн?! — кылiс льöмпу сайсянь сельпоись техничкалöн голос. — Кылан, Гавриловна?!

— Кыла, кыла! — шыасис Олявка. — Мый сiдзи ряксан, пожар разь?

— Пожар и эм!

— Эн бöбöтчы!

— Кытшöм ни бöбöтча? Зуйпиягын магазин сотчöма, — юöртiс техничка. — Милициясянь звонитiсö, тэнö корöны сэтчин.

— Кыдз сотчöма?

— Ме ог тöд, кыдз, а шом лоöма, шуöны.

— Быдöс сотчöма?

— Стенаэс пö тай эмöсь жö.

— Мун, ме локта сельпоас. Да кор Кирилл Потаповичсö...

Кирилл Потапович — морт деловöй, сельпоын двадцать год ни бухгалтералö и быдöс тöдö, мый этшöм ситуацияас керны. Сы вылö и надейтчис Олявка.

Час бöртi нiя вöлiсö Зуйпиягын.

Олявка ылiсянь казялiс разьöм юра керку, кöда одзын сё эшö сулалiс колхозiсь пожарка — гöрд машина: шофёрыс, тыдалö, тожö видзчисис сельповскöйесö.

Кöть и керкуыс не сымда сотчöма, мымда лэбис шумыс, но, видзöтан да, картинаыс нёштöм: крыша весьтын жöв сулалiсö нёль пара стропилоэз — сьöдöсь, шомсялöмöсь, — да пиньласьöм сiмöм труба; тёсовöй посöдзыслöн öт бокыс резьöтöм досповна, сы ладорись öшыннэс рез-паз жугдöмöсь, и нiя, раматöммес, стеклотöммес, вöлiсö, дзик бугыльтöм синнэз. Керкуыс и быдöс сы гöгöр вамöм, самöм, незьдöм, нöитчöм, тальсьöм.

Магазин одзас, свиттялан листа тополь увтын, сулалiс кöртовöй кока пызанок, сы дын, ящик вылын, пукалiс милиционер. Сiя кывзiс продавец Фенялiсь да кодышкодь мужиклiсь видчöм. Олявка здоровайтчис, сувтiс бокöжык да пондiс кывзыны.

— Этö нiя öзтiсö, — видчис Феня. — Чапкисö сотчан папироса — и быдöс тэныт...

— Кывзы, тэ ассит сийöстö мöдiк голя вылö эн кышав, — легöтiс сьöд чуньнас мужикыс. — Мийö куритiм öтöрас, а пытшкас эгö...

— Винасö эг сет, — пыкö Феня, — вот и керисö.

— Кывзы, тэ баит ладом, а Ыксö эн пык, — вермасис сыкöт мужикыс. — Тэ миянлö сетiн öтiкö — спасибо сы понда. А чапкыны биа чигарка... Керкуэзным магазиныскöт öтiк пятачок вылын.

— Эшö тай каньгин: сет, сет!

— Кывзы, ме эг каньгы, а рочаси токо: он я, мыся, долг сетышт.

— Сёравно кинкö öзтiс, ачыс эз öзйы. Эз и эз! — одззамоз кучиксис петiс-горöтiс Феня.

— Эн чирзы, баит бытшöмика, — сувтöтiс сiйö милиционер. — Дак тэ сьöртi — кинкö öзтiс? А кин бы?

— А кинлö винасö деньгатöг эг сет.

— Тэ и весь сеталан?

Ответсö Феня туйö видзис мужикыс:

— Мыля весь? Одзöсöн. Сьöд нямöтас гижö, да эшö стопка юкталам.

Феня уськöтчис сы вылö:

— Мый тэ гыан, алкаш нёсчастнöй! Тэ вöтасин, натьтö, а висьталан!

— И сэк юыштiс тiянкöт? — юалiс милиционер.

— Вöлi дело.

Локтiс электрик, эшö ылiсянь пондiс баитны:

— Сизимись тоти: вежö, мыся, вежö, проводкасö, кытчöдз эдö на тшынасьö, дак не! — Сiя кыскис сумкасис кытшöмкö инструмент да приборрез, шуис: — Мунам, видзöтам, мый причинаыс.

Сы бöрсянь мунiсö быдöнныс, а Олявка кольччис — сытöг керасö.

Тополь увтас лоис лöнь, и эта лöньын пондiс кывны шофёрлöн, кöда гатш куйлiс стын вуджöрын, небурика пишкöм.

— Быль электрикыс баитö, — локтiс Кирилл Потапович. — Проводыс важ вöлi, ме тöда.

Электрик мыччис провод торок, висьталiс:

— Видзöтöте, кытшöм лоöма — кöс паздер, — сiя перкйыштiс чепöльнас вевдöрсö, и мыччисис медь. — И мöдiк точкаэзас, натьтö, сэтшöм жö... Вежöртан, Кирилл Потапович? Талун кык руб жалейтан, а сыбöрын, вермас лоны, кык сюрс чапкан.

— Пондам вежны, — шуис бухгалтер. — Колö вежны. Нiя быдöнныс сувтiсö пызан гöгöр, милиционер бöра пуксис ящик вылö, пондiс лöсьöтны бумага да карандаш, медбы гижны акт.

— Дак мыйсянь инö öзйöма? — юалiс мужикыс. Сыланьö бергöтчис электрик, висьталiс:

— Мыччалi тай, мыйсянь! Эн разь адззыв? Кöть и шуö милиционерыс, что не проводсянь, а ме шуа: сысянь!

Эшö кынымкö минута баитiсö-бöрйисисö да гижисö документ и лэдзисö отирсö, только милиционер эз мун, дыркодь юасис Олявкалiсь вузасись йылiсь, медбöрья ревизия йылiсь, юасис и сы йылiсь, уна я сельпоын растратаэз, овлö я ревизия дырни лишньöй товар, и медбöрын шуис:

— А эд перво öзйöма увтi, кытöн проводкаыс абу... И эстöн продавецыт вернöя баитö, только...

— Дак нiя öзтiсö? Коддэс?

— Вот сiйö и колö тöдны миянлö... Но, ладно, следствиеыс мыччалас... Может, Феняыс плитка кодувьяс öзтылiс. Валяйтчö тай сэтöн, сотчöма.

Кор мунiс и милиционер, Кирилл Потапович лöсьöтчис сы местö и тшöктiс:

— Петкöт-ко, Феня, нянёк да консерва, а эн горзы. Быдöс лоас, кыдз шуöны, бур да ажур. А кöда оз тырмы — пожарыс сайöвтас. Сельпоыслöн öнi голяыс кыз, терпитас... И солок вай, и дозок, и бутылка, конечно. Менам горшö и кокö висьö, дак кöть лечита: горшöс винанас мавта, а кокöс — посуданас.

— Норовитiн бы, Кирилл Потапович, — пондылiс панласьны Олявка. — Эта мымда уджыс. Али вунöтiн выговорыс йылiсь да менам басни йылiсь?

— Медпервöй уджыс — юны да сёйны, — орöтiс-висьталiс Чикиськин и ки пöлöттяс нуöтiс Фенясö магазинö. Веськыт кокнас сiя былись небура чотiс, и Олявкалö лоис диво: мыйсянь инö, ежели часöн одзжык ветлiс-чеччалiс том петушок моз?

Чожа мыйись Чикиськин вайис виль портфель и быдöс, мый вöлi пытшкас, тэчис пызанок вылö. Сэтчö локтiс машинанас Аркашко, Фенялöн жöникыс, да, кöр сёйыштiсö, кольччис отсасьны. Морт сiя, видзöтан да, ровно жаговöй, а уджалiс öддьöн паока и чожа. Йöрнöсыс вамис сiдз, что лякасис яй бердас, но шоччисьны эз пуксьыв, только кынымиськö юис кöдзыт ырöш, кöдала ыстылiс сiйö гортас Чикиськин.

«А сiя? Сiя кыдз уджалö?» — думайтыштiс Олявка Андрей Никитич йылiсь и думанас пондылiс сувтöтлыны сiйö то ытшкисьны, то пес поткöтны, то мешöккез новйыны — и адззис дзик, что быдлаын мужикыт уджалö кокнита, басöка, дзик орсö — любо видзöтны. Но некыдз эз вермы, мымда бы эз мырсьы, сувтöтны сiйö классö, велöтчиссез одзö, да сетны сылö киас мел нето указка. А эшö эз вермы сувтöтны сiйö плотник местö, кöть Котöрок ошкö сылiсь и этö кужöмсö да надейтчö, что Верепов сылö отсалас вильдны кельдöтöм-быгалöм керкусö.

— Сунасян тай, Гавриловна! — чувйыштiс Олявкалö бокас öддьöнöв гажсялöм Чикиськин. — Видзöт, мед не соравны.

— А тэ мыйлö? Тэ эд он сунась, сiдзкö, и он сорась.

— Некö, тай не первуись, медбы дзугнытö, — горöтчис бухгалтер. — А тэ, Гавриловна, мыдзин, тыдалö. Примит этö лекарствосö, — печиктiс бутылка кузяс, — кыдз киöн мыдзöмтö босьтас.

— Не менам сiя лекарствоыт...

— Сэк мун гуляйтышт, — велöтiс сiйö Чикиськин. — Етша кольччö лыддисьны — öтiк нянь...

Жар вылас Олявка и былись мыдзис и сылö важын ни охота вöлi котрасьны ключок дорö, кöда тополь сайись керöсок увтас и боргис, но аслас охоталö поперёг шуис:

— Давайте быдöсöдз лыддьыштам ни. Ноко видзöтам, мый эшö кладовушкаас.

— Сэтчин потолоксяняс сё эшö виялö, нятьöсьман, — панласис Кирилл Потапович, но Олявка мунiс, и сiя сы сьöрись тожö эз кольччы.

Кладовушкаын куйлiс пизь мешöк. Сiйö казявтöг эз позь кольны, а мылякö кольччöма. Неужто Феня суськис? Эд сiя Аркашконас петкöтлiс сэтчинiсь.

Чикиськин казялiс мешöксö, шуис:

— Татöн тай эшö мыйкö эм?.. Эй, роботшшöй, кылан? Мешöк абу казялöмыт! — горöтiс сiя Аркашколö, и сэк жö медавтöм отсасись шыасис паныт.

— Кывнытö кыла, да сивйö не тэ кодь госа — кык мешöксö öтдруг ог вермы лэбтыны.

Этшöм пизьсö важын ни эз вайлö — этö Олявка бура тöдö, — а Фенялöн, видзöт, эм кыськö. Одззася вайöмыс, может, сё куйлö да?

Ны дынö локтiс Феня, пондiс чуклясьны-баитны:

— Аслым кольлi, да мыйкö öнöдз эг кайöт гортö не эг вузав.

— Курзяс эд, — висьталiс Олявка. — Донаыс, тыдалö?

— Сiя...

— Мыйлö нö видзан? — видчöмöн юалiс Чикиськин. — Колин, дак сёй, эн тшыкöт добросö. — И бöра горöтiс Аркашколö: — Нöбöт мешöксö гортат! Миянлö сы дорöдз дело абу, миянлö колö видзöтны тшыкöтöм товарсö. Мый пондам сыкöт керны, Гавриловна?

— Сёянсис кöдö порссезлö иньдöтам, кöдö чапкам... А книга, посуда, паськöм видзöтам давайте...

Быдöс дзоньöн кольччöмыс тöрис öтiклаö — бригаднöй амбарö. Сiйö пöдналiсö кык замок сайö, лякöтiсö пломба, ключчесö сетiсö Олявкалö и янсöтчисö: Чикиськин кольччис ужнайтны Феня ордö — сiйö корис Аркашко, — а Савыркина веськыта ыббес кузя мунiс Гублянö.

И туй вылас, и гортас, кöр лöсьöтiс сёйны да пуксис пызан сайö, сё думайтiс мешöк йылiсь. Тöдчис, что сiйö мöдiсö суськыны. А мыйлö, кин шогья? Пизьыс не сельповскöй, а кыдз сiя сэтчö, зуйпиягскöй магазинас, шедiс? Этö, натьтö, вермас висьтавны Шурончик — сэсся некин. А может, и сы син сайын керисö... Кыдз бы эз керö, а колö ветлыны Шурончик дынö да юасьны öтi-мöдi. Просто сiдз, не следствие понда... Но этаись панöвтiс мöдiк дума: а мыйлö юасьны, ежели просто сiдз? Шурончик висьталас: «Юрыт оз вись, дак чöв, а висьö, дак Феня дынö мун — сылöн эд лишньöй пизьыс». А Феня шуас сiдз жö, кыдз öнтай: аслам. Но позяс юавны: кытiсь босьтлiс, мыйлö мöдiкласис босьтлiс, кöр сельпосис ачыс пизьсö ваялö. А сiя шуас: босьтлi городiсь, сiдз кыдз дона пизьыс тiян сэки эз вöв. Вот и быдöс сказка. А мый нö эшö? Олявка абу милиционер: сыкöт баитасö, дак баитасö, а озö, дак и суд сылö абу.

Кöть кöдöрсянь видзöт, а эстöн делоыс не сöстöм. Феня бöра мыйкö соровтö, бöра гусясьö, кыдз вöвлi одзжык. И кыдзкö эд оз шед, кужö керны... И шедiс бы, натьтö, но предыс эз кутчы. Мöйму тай, кöд коста ревизор керö баланс, Олявка дырни сетiс предыслö тысяча руб — ась оз шуö пö, что растрата, то пö эшö дынам выручкаö сымда. А ревизорытлöн сiдз ни лишньöй петöма. Кытчö сiйö тысячасö воштiсö, Олявка оз тöд, но Фенялö нем эз ло, кыдз уджалiс, сiдз и уджалö да эшö премияэз босьтö.

Не, сiдз оз туй! Колö тальччыны Феняыс бöж вылö! И этö колö керны сылö, Савыркиналö.

Кытчöдз Олявкалöн вермасисö думаэс, Шурончик ачыс локтiс сы дын: стрась пö охота тöдны пожар йылiсь. Эшö ыбöс сайсянь сiя пондiс сярзьыны-торгыны:

— Кыкись ни кежалi, а тэ сё абу... Но, кыдз ни сэтчин? Быль я код мужиккес öзтöмась? Ой, ме пыр дрöжита: сiя жö кöркö кыдзи лоас — бöбман.

— Кин шуö, что коддэз?

— Йöзыс баитöны.

— Йöзыс висьталас: кöз вылын тури пöжсьö — тожö веритан? Электрик висьталiс, что проводкасянь öзйöм, важ вöлöма.

Шурончик эшö öддьöнжык повзис:

— Ой-йой-йой! А миян счётчикным самовар моз пизьö. Сiйö и видзчись, потас, кыдз бомба... Уна товарыс сотчöма?

— Да не сiдз уна. Керкуыс буракодь палитчöма... Тэ пуксьы, Шура, шоччись... Ремонтыс пö тысяча гöгöр сувтас.

— А кöр оз? Сё ни вачкас! Öнi сiя и эм: дорин кöрттув — руб вай. — Пуксис, юалiс: — А деньгаыс абу жö сотчöма?

— Абу. Эна луннэзö, шуö, выручкаыс нем эз вöв... Тэ вот мый висьтав, Шура: меддона пизьсö Зуйпиягыс кöр тэнчит кайöтлiс?

— Некöр эз. Оз, шуö, ков. Умöля пö босьтöны сiйö. А сылöн эм, да? Ме тай мый тэныт баита: кыйсьöны нiя, тiян бур уджалiссезныт, чужöй товарöн вузасьöны.

— Кин — нiя?

— И Фенькаыт, и Чикиськиныт, и эшö кинкö районсис.

— Тэ сiдз думайтан?

— Меным мый думайтнытö? Ась пороз думайтö, сылöн юрыс ыджыт... А тöдан, тöн рытнас концерт вöлi. Ох, и концерт! — Шурончик öмтырьяс вакöстiс. — Кöр складсяняс бертi, менö кавалер панталiс, да сыкöт сувтчимö колодецыс дынö, навес увтас. Видзöта: кытшöмкö лешман зэр увтас броддьö — паськыт брезентовкаа, беддя. Сувтiс ворота одзам, пола увтсис кыскис ведра, бедь вылас мыйкö каттьö. Ме кавалерöлö: öзтыны, мыся, мöдö! И зорок киас татшки: на-ко, мыся, шугнит... Тöда, конечно, что дьöгöдявны мöдöны, да нарошно кавалерöс повзьöтла... Но сiя, конечно, сэтчö лют: петух моз уськöтчис и давай санны, давай воззьыны, только и кылö: квотш, квотш, квотш! А лешманыт кутiс юрсö да бергалö ворота одзас, боккесö лöсьöтлö. Сэсся вежöртiс, что пышшыны колö, уськöтчис котöртны, да не туй кузяс инмис — кырасланяс, — и берездасис сэтчин онняюрöн. Ме босьтi сылiсь бедьсö да мазутöсь ведрасö и бöрсяняс ыстi: аминь, мыся, Кириллушко!

— А ме думайта: мыля талун Чикиськинным чотö и сё каджсö гыжьявлö? Дак вон мый сэтöн!

— Кувтöдз касьтывлыны пондас... И зоннэслö закажитас: эд мавтчö!

Шурончик ловзисьтöг вермывлiс баитны быдса час и сё инмывлiс колана тема вылö. И öнi Олявкалö сiя и öмсö эз сет осьтны, сё койис и койис:

— Картовтö кучитiн ни? Эн, дак кор менö, отсала. Менам киö кокнит — каб ыжда быдмас. Али таво лоас отсасисьыт? Мыйкö кылi ме, а ог тöд, быль, не быль: корасьны пö тэнö мöдöны. Эз на кежалö?

— Кысь кылiн?

— Сiя и эм, что эз тшöктö висьтасьны. Мöдан мунны?

Серöмтчис Олявка сы басни вылö, горöтчис:

— Кин эд пондас корасьны...

— Томöс кошшан? Сiя не тэ сьöртi, да? Али не сiдз тальччö, лöга горöтчö? — Шурончик эз шу нимнас мортсö, но баитiс Андрей Никитич йылiсь. — Видзöтлы, Гавриловна, кыдз бы менам туй кузя эн инмы!

— Ме эд, Шура, абу жö старуха. Тридцать пять тырис.

— Меным сорок сибалö, и некытшöм ёрдöм оз корась. А инькаыслöн, ачыт тöдан, мый кузя векыс.

— Эшö корасясö, раз тышкасьöны тэ понда.

— Ог тöд, мый нылö öддьöнжык колö — ме али вина.

— Ме бы сiдз эг вермы, — сознайтчис Олявка. — Мыла оз тырмы сэтшöммес вылö видзöтны... Менам каша пусис, лок сёй мекöт, Шура.

Шурончик мöдiс пуксьыны, но кинкö пырис оградаö, и откажитчис:

— Чу, мöдiк каша сёйись локтö. Сiя татöн, Котöрок ордын вöлi.

— Тэныт и сылö тырмас.

Кыкнанныс думайтiсö Андрей Никитич йылiсь, но локтiс Чикиськин.

— Пардон, ежели дзуги мый. Быдöнныслö бур рыт, а хозяйкалö — мед ни бурö!

— Здрасте! — шыасис Шурончик. — И адззисьлытöдз!

— Оча кутчисьлытöдз! — дулис кодыш Чикиськин. — Ыскöвт-ко перытжыка, миянлö сальдо колö петкöтны. Ыджыт басни эм.

— Не ыджыт, а кузь басни, шу, или лёбöм, — веськöтiс сiйö Шурончик. — Пукалiн бы гортат, эн кыскав пöрись... кынöмтö!

— Сыть, шуöны! — топнитiс кокнас Чикиськин да пуксис диван вылö. — Эн пиксы! Тэ менö вежöртiн? А то...

— Ва-ажын ни! — шуис Шурончик да петтöнняс содтiс: — Тэ дыр эн пукав эстöн, Гавриловнаыс гöсьöс видзчисьö.

— А ме разь не гöсь? А? — обидитчис Чикиськин. — Ноко юктав, Гавриловна.

— Ваöн али чайöн?

— Эн серав менчим бухгалтерскöй юрöс. Не öтыс, не мöдыс меным оз ков — тэ сiйö бура тöдан.

— А куимöтыс менам абу. Да и вöлi бы, дак эг уд: и сiдз ни код.

— Начальникö пуксин, да? Но и öнджа тэкöт! — öвтыштiс кинас Чикиськин. — А ме вот мый шуа: миянлö тэкöт колö бура уджавны. Бу-ра! Вежöртiн менö! Видзсьы ме бердын — и джодж бонтö шёлкись пондан керны.

— Шёлкыс умöля миськалö, умöля чышкö, — сералöмöн шуис Олявка.

— Оз эд вежöрт бытьтö... Йöх! — ружтыштiс Чикиськин. — Лок пуксьы бокам, Оля, да дело йылiсь баитам...

— Баит нö, ме кывза, — Олявка эз и вöрзьöтчы местасис, сё сулалiс этажерка бокын, запон карманнэзö киэсö сюйöмöн. — А может, ашын вöлись, правленнёас? Пожалуй, сiдз и керам, ыджыт дело кö тэнат...

Оссис ыбöс — ёркнитiс бырöм петляэс вылын, и порогсö вожмöвтiс Андрей Никитич, здоровайтчис, сувтыштiс косяк дорас.

— Ме эг мешайт? Может, дзуги баснинытö? Олявкалöн пик мунiс сьöлöмыс — сiдз видзчисьтöг пырис Верепов.

— Дзугин моз, мужик, да мый ни керан?..

— Кытшöм нö басни, Кирилл Потапович, тэнчит дзугисö? — ыждöтыштiс голоссö Олявка. — Ме тай шуи: уджыс йылiсь правленнёас баитам.

— Часöт колiс.

— Баит часöт, бура колö дак.

— Меным свидетеллес оз колö, — бöра обидитчис Чикиськин. — А кытöн нö шляпаö? — Чеччис, пондiс дзарьясьны ас гöгöрас. — Эз я бöбав Шурончикыс? Сiя чульчик кодь да... Али мый?

— Шляпатöг вöлiн... Лок кольлала. — Олявка осьтiс ыбöссö, лэдзис одзас Чикиськинсö. — Пуксьы, Андрей Никитич!

Минута бöртi, кöр Чикиськин сьöрын пöдналiс ворота, Олявка шув-пав пырис керкуас, оськöвтiс Андрей Никитич дынö, кöда видзöтiс этажерка вылiсь книгаэз, шушкыштiс:

— Ме видзчиси тэнö, Андрюша. Ох, кыдз видзчиси!..

Дата добавления: 2015-11-16