КИНАТ ОН ЛÖСЬÖТ

Андрей Верепов чужис мартовскöй рытö, кöр айыс Москва дын воюйтiс немецкöт, кöр öтöрын шувка-шовка горалiс мороз. Чужис Зуйпияг хуторын, кöда красуйтчис гусь да жебыник Нямырашор дынын. И ежели бы не Дзолинь, Ыштайись бабитчись инька, не овны бы чочком светас сiя мортоклö.

Дзолинь не öддьöн кокнита вöрзьöтчылiс колхознöй уджö, а бабитчыны, чередитны чужöм кагаэзлiсь гöггез — радейтiс и ассис обходсö, кöть нять, кöть мороз, гöгравлiс часто, не кыдз öння акушеркаэз. И сэкся бимороза рытö, бытьтö сьöлöмыс кылiс, котöртiс Зуйпиягö, Микитика Алю ордö, сьöкыта новйöтчись ичмонь дынö. И бур, что Алю абу пöднасьöм и ештöм öзтыны фонарь: тыдалö, лöсьöтчöм петны чом увтö нето амбарö и сэтчö усьöма кок йывсис.

— Ен тэ, батюшко! — повзьыштiс Дзолинь, кöр порог понсис казялiс хозяйкасö да сылiсь кык годся Нинка нылоксö. — Эта нö мый лоö?

Старуха чапкис испоткаэсö, чöвтiс пасьсö и сэтöн жö, ыбöс одзас, лонтiсян печкаок бокын, отсалiс инькаыслö кагаасьны.

Пияныс чужис ловтöм, но Дзолинь эз öш: пöльыштiс кагаыслö öмокас, нырас, нюжлалiс кикоксö — и ловтöм морток саймис, небурика чирöстiс. А мамыс садясис вöлись сэк, кöр Дзолинь гывьялiс сылiсь чужöмсö шома ваöн.

Сiя жö гожумö пуксьöтiсö Алюöс трактор вылö, и Андрюшка да Нинка шоча и адззывлiсö мамнысö, сё бабныскöт олiсö.

Тысяча девятьсот сорок четвёртöй годö Алевтина Верепова, районiсь медбур трактористка, нöбöтiс фронт вылö коми отирлiсь козиннэз и, кöр мунiс пантавны жöниксö, сюрис бомбитны. Чожа эта бöрсянь, кытöнкö Польша ладорын, война биын сотчис танкист Никита Верепов. Сiдз и быдмисö соя-вона, айтöм-мамтöммес, бабныс шоныт борд увтын, кöда ны гаж понда нем эз жалейт, зато ачыс одзöв джöмдiс, эз ешты петкöтны челядьсö отирö: лоис инвалидöн.

Нылöн вöлi ыджыт постройка, уна пода, бытшöм карчйöр да сад, и эта ыжда хозяйство сьöрын коктöмсялöм бабыс эз вермы видзöтны, а чапкисьны сы дынiсь некыдз эз позь, и Нина сизимöт классас эз ни мун — лоис колхознöй курöгвердiсьöн. А кöр Андрюша пырис институтö, кöсйисис сiйö велöтны учёнöйöдз. Сэк вот и гижис воныс энö стиххесö:

Мийö пизим Зуйпиягын,

Сэтчин ёндiм оланвуж.

Кöть и олам öнi янын,

Керам öтласаö удж.

Тэ — крестьянка, ме — рабочöй.

Каждöй ассис пуктö из.

Виль олан мед керны-вочны,

Кöдлöн нимыс — коммунизм.

Сэсся Нина петiс жöник сайö, мунiс овны Виль Гублянö.

Пöрись мортлöн оланыс бедёкöн тюкйö-мунö, а томыслöн — визыв чаньöн пöльтö-гöнитö, гöнитö веськыта: туй не туй, а сё скач, сё сточма, бытьтö сы одзын и некытшöм чукыль абу. Сiйöн и ештö томыс асьсö быдлаын мыччавны, старайтчö югытжык звезда кымöрсис судзöтны. А Вереповлöн звездаыс куйлiс поэзия кымöрын. Сiя югьялiс, топ асывся мича Венера, и кыскöмöн-кыскис дынас и луннас, и ойнас, и сёйтöн, и лекция коста, и туйын, и театрын. Но сiя звездаыс вöлöма Венерася не матынжык, сiйö он судзöт, кыдз рябина роз, кузь лиснич вывсянь: поэзияö пыран одзын, жыв Цербер адiсь ыбöс дын, сулалöны кузь пиня критик да дзор поэт — ловья классик.

Сiя гижис уна, гижис быдöс йылiсь, мый пырас юрас, стиххесö лыддьöтлiс йöзыслö и ас пондасис часто, и этасянь сылö вöлi долыт. А печатайтлiсö етша. Сылö эта кадö не сiдз слава колiс, кыдз басöк паськöм да кöмкöт, магнитофон да театр, а быдöс эта лоö сэк, кöр карманын и жольöтö, и кышöтö.

Поэзия, кöда кузя мöдiс богатсявны Андрюша, бöбöтiс сiйö, дзик басöка баитiсь цыганка: кöсйис керöс, а эз сет и пес. Спасибо öтiк поэтлö — велöтiс овны:

«Колö кö тэныт деньга, дак бумагатö весь эн мавт, эн бырöт вешьян пыдöстö да нервветö, а мун вöр пöрöтны».

Гожумнас Андрюша мунiс ёрттэскöт стройка вылö. Уджалiсö суткиэзöн, мöдiсö арканавны ыджыт деньга. И шедтiсö, но не Верепов: сiйö и эстöн орддис шудыс.

Öтiк рытö, кöр студенттэс ветлiсö клубö, Андрюша кольлалiс деревенскöй нывкаöс. Вöлi сук пемыт, звездатöм кöс рыт, кытшöмöсь часто овлöны август коста. Нiя мунiсö нывкаыс огородеч бердöт и негорöн баитiсö. Вдруг стын сайсянь, льöмпу увтсяняс, чавк койыштiсö ваöн. Андрюшалöн, кöда мунiс стын бердöттяс, бокыс вамис пельпонсяняс лядьвейöдззас. Да ежели бы только вамис! Минута бöртi пондiс палитны кучиксö, и сiя котöртiс отрядас. Посöдз дын сiйö панталiс Ника:

— Но кыдз кад чулöтiм? Пыма-дзирыта?

— Сотö, Ника... Заваритiсö.

Ника эшö мöдiс тешитчыны зонкаыс вылын, да вежöртiс, что беда шогмöма...

Фельдшер висьталiс, кöр видзöтiс пельпонсö: киськалöмась пö кислотаöн, колö пö водны больницаö. И ковсис водны. А кöр петiс больницасис, тöдiс, что эта уджыс — Никалöн. Ежели не ачыс сымдасö керис, дак кинöскö медавлiс. Сэксянь Верепов пыр полiс пемытсис. Сiя кажитчис сылö кузь гыжа да горш хищникöн, кöда быд пораö вермас уськöтчыны морт вылö.

Только ештiс веськавны пельпоныс, локтiс юöр: кулöма бабыс. Дзебисö сiйö соя-вона, чулöтiсö касьтiсяннэсö и керкусö вузалiсö, сiдз кыдз Нина жöниклöн вöлi виль построй, а Андрюша Зуйпиягас, вöр коласас, бертны эз думайт.

Шуöны, что мортыслöн оланыс мунö спираль моз гöгралöмöн и кытшöмкö кадö вились петавлö важ туй вылас и дыркодь юждö сiйö, юждö сэтчöдз, кытчöдз оз чужйись кытшöмкö изö нето оз тойышт сiйö ыджытжык вын бокö. Сiдз и Вереповлöн оланыс каттисис: кыдзкö бöра кежис важинас — мортыс пондiс гижны стиххез. А шогмис эта сэк, кöр сiя пантасис том фельдшерицакöт. Тöдiс сылiсь нимсö и сэк жö, позьö шуны, сiя жö минутаö, чужисö стиххез:

Горадзуль менам,

нывка Женя,

Кошши тэнö ме

ылын и матын,

Кошши Перемын

и Тюменьын,

А тэ вöлöмыт

горт посадын...

Сэксянь бöра пондiсö киссьыны стиххес, кыдз ыбшарлöн асывся дзульзьöм. Кынымакö петiсö газетаын, и сэк сiйö корисö областнöй семинар вылö. Неделя лэбзис, кыдз öтiк лун. Шардöм сьöлöмöн и лэбалiс Верепов, да не Пегас вылын, а нiя борддэз вылын, кöдна мортыслöн быдмöны любитöмсянь: эна луннэзö миян том гижисьным и пантасис Савыркина Олякöт...

Дженыт вöлi нылöн счастьеныс и потiс, дзик бомба, потiс горöн да вынöн — öтiк торок эз кольччы сэтiсь, поснит чирöн лыйис-резсис öтмöдöрö. Да, сiдз сiя и эм: кыным вынажык заряд, сыным вынажык и взрывыс, сыным ёнажык зарядыс жугдö асьсö и матiсь ас гöгöрсö да и потö горöнжыка.

И эта зарядыс потiс сiдз, что Андрей Никитич квартираись öшын стеклоэс рез-паз чеччалiсö, и юрсис рифмаэс öшисö.

Стеклоэсö сувтöтiсö вильöсь, а рифмаэс сэсся эз адззисьö.

Чожа мыйись Верепов гöтрасис — босьтiс Женяöс. И дыр олiс сiя гажöн, кöдö сетiс иньыс, уна уджалiс: уроккез бöрын велöтiс челядьсö радиотехническöй кружокын, котрасис педсовет да сельсовет тшöктöм сьöртi деревняэзöт, сьылiс хорын и нельки орсiс спектакллезын.

Мöдöдз год вылас сiйö иньдöтiсö неыджыт школаö, иньыс гортö, директорöн. Татöн Женя козьналiс сылö зонöс. И лоис Верепов тёщаа, мöса да курöга мужик, велалiс ытшкисьны, зороддэз тэчны, пес заптыны. И пыдынакодь ни вужжесö эта муö мöртiс — аслыс баня сувтöтiс, колодец гарйис, школа понда машина босьтiс да виль интернат керис. Медбур мастеррез серöтiсö-мöдöтiсö интернатсö и директорскöй керкусö, и сулалiсö нiя ордчöн, посадас медвылын местаын, дзик чачаэз, ошшасисö аснаныс да ошкисö и Вереповöс: эд сiя ны басöк понда сетiс, öтлаын мастерыскöт, быдöс ассис кужöмсö да джын отпусксö.

Лöсьöтчис эстöн дыр овны, но городö корисö уджавны. Тöдвылас усисö Перемын чулöтöм годдэз, кöр сiя котрасис театррезöт, библиотекаэзöт, гажöтчис саддэзын, стадион вылын, видзöтiс сiя кадся чудо — телевизор, и Андрей Никитич эз откажитчы.

Сы коста, кöр иньыс велöтчис курссэз вылын, Верепов пырис городскöй квартираö. И сэк сы туй вылö бöра петiс Ника. И поперегалiс, игналiс туйсö — некыдз не орддьыны. Да и мужикыт öддьöнсö эз и мöд орддьыны, сiя сэк тöдiс ни Зигмунд Фрейдлiсь философиясö: мортыслö медодз колö не сёян, не паськöм, не керку, а — морт, кöда вермис бы лöньсьöтны сылiсь потан сьöлöмсö..

Ника эз дзеб, эз суськы ассис радейтöмсö и Андрей Никитичсянь корис сiйö жö. Эта делоын нывкаыт вöлi повтöм солдат кодь, Андрей Никитич — осьтаöм кодь. Корис бы сiйö Ника сьöрас — и Андрей Никитич мунiс бы овны Соликамскö, кытöн уджалiс нывкаыс. Но Вероника Ильинична — сiдз сiйö шуисö öнi — сё эшö мöдiс югйöвтны мичажык звездаöн да югдöтны ассис мусö и отирсö и эз на лöсьöтчы лоны инькаöн.

Бур школьнöй инспектор Андрей Никитичись эз пет — этö и ачыс сiя адззис. Эз пет сiйöн, мыля öддьöнöв добрöй сьöлöма, а эта уджын колö лоны строгöйöн, принципиальнöйöн, и учитель уджын медодз колö адззыны умöльсö, мый мешайтö велöтöмлö. Этадз шуис сылö начальник.

Мöдöдз годас Верепов чапкисис инспекторсис да бöр мунiс школаö. Ась и сьöкытжык сэтчин, зато долытжык, гажажык — и бекöрыс, и паньыс ас сьöртöттяс. Сiя велöтiсь, сылöн задача — велöтны челядьсö грамотаö, пöртны нiйö бытшöм сьöлöма морттэзö.

Городын овтöн, шуöны, мортыс унажык весялö, и сы понда сэтчин заптöма быдкодь забаваыс — тиррез, пляжжез, буфеттэз, вытрезвителлез. Но Андрей Никитич эна годдэзö размöд кино видзöтiс да öтпырись ресторанö пыралiс. Кыдзкö иньыс нуöтö вöлi драмтеатрö, дак сiя ылöтчис:

— Годдэзным миян оз лöсялö сэтчин ветлыны: театрыс студенттэз понда. И пенсионеррез понда.

А былись-ту сiйö эз лэдз ветлöтны сылöн колун кодь, невежöртiсь ен — некöр. Эта еныс сiйö вашöтiс техническöй станцияö, дырöн видзлывлiс школаись физкабинетын, гортас схемаэз да книгаэз дынын, кöдна сьöртi позис керны приёмниккез, машинаэзлiсь моделлез. Гожумнас унажыксö уджавлiс, узьлiс да сёйлiс песвидзанын, кытöн сылöн сулалiс пызан да верстак. Эта ош позiсь сiя пышшывлiс только гожум шöрокнас, кöр Нина сойыслö колiс отсавны заптыны турун. А сыбöрын сiйö корисö уджавны техникумö, и сiя мунiс. И петiс виль квартираö.

Сiдз сылöн и катыльтчисö том годдэс: кöть и не öддьöн веськыта да валькыта, но некытчö эз кышасьö, некытчö эз кежалö, некытöн эз вамö да сiмö. Эз казяв, кыдз челядьыс быдмисö да пондiсö новйыны сылiсь нейлоновöй йöрнöссэсö, кöдна весь öшалiсö гардеробын, пондiсö кышавлыны сылiсь галстуккез.

Март вылас Андрей Никитичлöн вöлi нимлун, и Женя сiйö мöдiс порйöтны бура, гажöна, горöн. Корис уна гöссез, холодильниктыр заптiс яй, чери пöк да мöдiк закускаэз, керис сур. Хозяиныс пондылiс пыксьыны этаись, да иньыс вермис öмнас: эд сорок тырö!

Быдöс вöлi заптöм нимлун кежас, но эз вöв шампанскöй, а сiдзкö, эз бы вöв и гажыс быдса. И Женя мунiс Перемö. Мунiс кошшыны бур гöснеч, но адззис аслыс погибель: сюрис аварияö...

Вот сiдз — судьбасö кинат он лöсьöт и он орддьы сылiсь нальксö.

Морт олöмын унася-уна быдкодь чукыль, и öтiк оз тыдав, ны весьтын оз сотчы некытшöм би, кыдз маяк, ны одзö оз сувтöтö, кыдз ыджыт туй вылын, ылiсянь тыдалан пассэз, кöдна юöртöны опасность йылiсь.

И тэнат, Верепов, одзат уна берся опасность.

Казялан я нiйö аскадö, орддян я?

ДЗОЛИНЬ

Гублян — лажмытик, öтiксувда, быдсöн пуовöй посад. Сiя важ да сьöд, дзик зэррезöн гывьялöм говня, но гора:эстöн шумитö-тараторитö берся машина, олö говка шыа отир да ыджыт öма пода.

А петуххес! Нiя саймöтöны не только ассиныс отирсö, но и Виль Гублянсис, а сiя эд кык километр сайын.

Посад поздiсьöма мыс увтö, лунвыв покатö, кытöн нятьыс и арнас оз овлы. Сулалö эстöн кык век ни, а неважын вöлись пондiс мöдкодьсявны: ыждiс, вильмис, баситчис-краситчис, кыдз и мöдiк посаддэз, виль, кöртовöй да шифернöй крышаэзöн, ровнöй палисадниккезöн, серöтöм öшыннэзöн да воротаэзöн.

Юкталöны сiйö кык ключ-боргун, кöдна петöны öт дорас и мöдас да öтлаасьöны посад увтас — аркмöтöны Гублян юок.

Öт ключ юр вылас и мöд вылас быдмöны пожуммез — Жогор да Бакар. А мыля нiйö сiдз шуöны — некин оз тöд, сiдз кыдз нiя тожö не öтiк вексяöсь, а ниммесö, кыдз мийö тöдам, быдöнныслö сетöны учöт коста.

Может, кык вон кöркö сэтöн, ны гöгöрын, олiсö-вöлiсö да ассиныс ниммезнысö нылö козьналiсö. Шувлiсö тай деддэзным: кыдзи пö челядьтöм мужик пöрисьмас, дак виль гыр нето изын керö, аслас нимöн шуö сiйö да деревняыслö козьналö.

Пуэслöн вужжез кызöсь, вынаöсь, нiя пондöны тöдчыны чуть я не пу шöрсяняс, а му бердас торйöтчöны, вожсялöны и нюжöтчöны öтмöдöрö вит-квать чальпа — чорыт качаöсь, гöрöдаöсь, чукыляöсь.

Посад вевдöрас, ключ юррес коласын, сулалö кык метр сувда из — Иван Которковлö, медодзза колхознöй председательлö, памятник. Из вылас кералöм-рисуйтöм кöдзсян куда морт, а улын гижöма: «Тэ кöдзин и быдтiн бур олан».

Карчйöррез татöн ыджытöсь, дзик ыббез, и нельки тöла лунö ны пытшкын сотöны чаг да ёг, палитöны идзасовöй костёр вылын кукань ыжда порсь тушаэз. Карч быдтыны оз дышöтчö, сiя шогмö бура, а этасянь быд картаын уна пода, быд оградаын пон. И эшö — татiсь олiссес быдтöны таг, юöны майöла ырöш, и ны бердö оз кутчись не пöрöс, не висян. Мый бы эн шу, а Гублян — ассяма, асруа, асвужья посад, кöть и, видзöтан да, вачкисьö мыйöнкö Ошыб вылö, Сер вылö, Йöг вылö. Татöн олö уна пöрись йöз, кöда не тöдiсь дынö, не фельдшер дынö оз мун — здоровöй, ён, дзик пиня тув. Öнi и Ыштайись Дзолиньлö нем лоö татöн керны, и сiя вовлывлö Гублянас только касьтiсьны: старухаыт эстöн чужлöма, а могильникас куйлöны аймамыс. Орис ни вöлi таланьын Савыр родыс, да Олявка вот, сылöн внучка, локтiс этчö, и старуха сы ордын не öтiк ойкöв чулöтлö. Правда, не роднöй внучка, — племяшлöн ныв, но сё эд öтiк родвужись петöма.

Вот и талун, семик панытö, старухаыт сы дын кыссьö. Туйыс не матын, и сiя, кöр подöн лöсьöтчö мунны, сьöрас босьтлö только сусло да ырöшок, а тупöсь-шаньга да черинянь пöжалö Гублянын, Олявка ордын: внучаткаыслöн, спасибо енлö, и пизьыс, и виыс, и чериокыс эм — сельпоын мортыт уджалö.

Дзолиньлöн эмöсь ни годдэс, семьдесят восемь тырö таво, а коккезнас эшö бура сынö, и бедёксö просто сiдз новйöтö — а вдруг да ковсяс кытöн-нибудь? Но сё жö бöрланяс то и дело видзöтлö — оз я машина вöт? Ежели вöтас да пуксьöтас — джын часöн локтас, оз пуксьöт — джын луныс, лыддьы, чулалас. И автобус эта туй кузя ветлö, да старуха не öддьöн сы вылö надейтчö. А талун и мöдiк мог вöлi подöн мунны: деревняэзöт кытшлалiс, масiсёккез да молитваа гижöтоккез вель тума вузалiс — вичкулiсь наказ тыртiс да эшö аслас инициатива сьöртi öтласа масiсь понда гривенниккез öктiс. Этö öтласа масiсьсö мöдö вичку алтарьö сувтöтны — война вылын вийöм отирöс касьтывны.

Ылö ни мунiс, не öтiк молитва ни сьылiс, медбы ашын не сорасьлыны, кöр тöдсаэз тшöктасö виль могилаэз дын лыддьöтны, и вöлись городланьсянь мыччисис машина. Старуха ыб туёк вывсис петiс тракт вылас, енöвтчис канава дорас, кытöн быдмисö урбöж, ыбкушман да рудзöг тылöппез. Шофёр сувтчис как раз сы весьтö.

— Меным Гублянöдз бы, — корсис Дзолинь, кöр оссис кабина мöдöрсис ыбöс да петiс сэтчинiсь внучаткаыс, но старуха эз тöд сiйö. — Тiйö не мöдöрö?

— Пуксьы, баб, пуксьы! — шыасис Олявка да отсалiс пöрись мортлö кайны кабина поспу вылö, ачыс пуксис кузовö.

— Да тэ тай, Олявушка, инмöмыт! — осьта ыбöсö баитiс старуха. — Товар ваян, натте?

— Чери да мый да кайöта.

— Треска, натте?

— И окунь эм.

— Юртöм? Сiя öддьöн ни чöскыт. И яя, и госа. Котöрок сразу тöдiс Дзолиньсö сы гора да невна нюжвыв басни сьöртi, и сылiсь мидзöвтiс сьöлöмсö: «Ой-йöй, сё ни кылас увья кокора Öндрийкоыс шогöт йылiсь. А кылас, дак черöшлан бердö кутчас...» И сэтöн жö, брезент увтас пукавтöн, решитiс одзавны сiйö. Одзавны не слава понда, а — веськöтны, кыдз колö. Котöрок казялiс, кытöн поздiсьö шогöт вужыс, и ачыс кужас — не Дзолинь, не больница оз ков — кужас нетшкöвтны сiйö, кыдз ёгтурун, да пелитны стын вылö — косьмы сэтöн, зараза! А отсавны Вереповлö колö, сiя мортыс бур и эшö уна пользасö йöзыслö керас. Но, конечно, и сылö, спасительыслö, отсалас. Вот тай талун вагонка небис, а лун-мöд бöртi, шуас кö еныс да бригадир, ваяс городсис и арьявнас, кыдз шуралас вайöмыс, позяс и керкусö баситны. Адззылiс Котöрок, кытшöм басöка серöтiс Верепов школьнöй керку — дзик терем керис, и ассис сiдз жö лöсьöтчис керны — ась гублянса вöлись ойзöны да айзöны. Серöтас, краситас, öшын увтас виль йöрок сувтöтас — дивуйтчы, мир, кыдз сола пельыс öнi олö!

Эна долыт думаэзöн и локтiс Котöрок Гублянöдз, жагöника чеччис Олявка керку дын, шуис Дзолиньлö, кöда ештöма ни петны кабинасис:

— И дышыт оз пет ветлöтнытö?

— Кытчöдз еныс новйöтö, ог дышöтчы...

— Ашын гортö?

— Ог, натте, ашын автобусас дзескыт лоас, пичкасö. «Натте, натте! — дразнитiс думанас Котöрок. Сiя эз любит этö «увья кокорасö», пожалуй, не сымда чунясьöм-веськöтчöм понда, мымда нильыг «наттеыс» кузя. — Вот висьтала öтiк юöр, дак вунöтан сiйö».

И висьталiс:

— Анка-модзанкаыт пö висьö-шогалö. Эн ветлы? Оз ни пö сёй, кöс умöльтчöма.

— Кысь нö кылiн бöрана?

— Соседкасянь. Магазинын вöлi баитö: соборуйтны пö колö.

— А натте...

Нылiсь баитöмсö дзугис Олявка:

— Баб, мун шоччись. Ключыс важ местаас. А мийö Виль Гублянöдз кайлам.

Котöрок бöра Олявка дынö:

— Ой, зарни! Дак тэ эн коль менö! Могильникöдз бы кайла... Только зырок босьта. Кытчöдз кайлат, поди, сы коста гудйышта и тiянкöт жö бöр и лэдзча.

Сiя уськöтчис вöлi гортас, но шофёрыс кöсйисис сетлыны ассис зырсö, и старикыт кайис кузовас.

Дзолинь эшö сулалöв-керис улицаас, сэсся пуксис поленич бокись козла вылö и жöв керсис, дзик вунöтiс, мыйла локтiс татчö. Быдöс, мый вöлi син одзас часöт, сайöвтiс важыс, кöркöсяыс — том кадыс.

Томувьяс Дзолинь вöлi лöнь, вежöра да полiсь, дзик суткися дзелёк, — и зонка вылö эз лысьт видзöтны. А зонкаэс сы вылö видзöтлiсö, и медöддьöнсö — волостнöй писарьлöн зон, гармоньщик Ёська. Сiя, топ райскöй змей Еваöс, öтпырись вердiс нывкасö печатнöй пряникöн, и полiсь дзелёк бöбасис да пондiс кошшыны чöскытторресö ачыс. Казялiсö этö аймамыс, и, топ пышшалiсь баляжугöс, чапкисö нывнысö каламашкаа додьö да кыскисö монастырьö. Эз ло нывка Полина, или Дзолинь, а лоис монашка Ефимия.

Горзiс, кулавлытöдз горзiс Дзолинь, кöр орöтiсö чикисьсö да йöртiсö, дзик пемыт гидйö, учöтик кельяö. Горзiс не сы понда, что мырддисö сылiсь гажа рыттэсö, Гублян берег дорсö да сьöлöм поткöтан гармоння горсö, а сэтiсь, что эз доддялö розваль — назёмöсь додьын кыскисö!

Жагвыв ямис и эта зубытыс, только дыр эшö потыштлiс сьöлöмыс, кöр пондасö тиньöтны-звонитны учöтик колоколлэз: нiя казьмöтлiсö визыв гармоння да ласков орсiсь йылiсь.

Кöр вöлi пöдналöма ни Пешнигортскöй монастырь и монашкаэс олiсö Вöрья дачаын, Дзолинь бура ёртасис Анна монашкакöт (сiя вöлi Пешнигорт посадiсь Михайло купецлöн ныв Нина). Анналöн эстöн жö олiс Öксинь сой, но нiя öтамöднысö эз радейтö.

Енлöн пельöсок — Вöрья дача — сулалiс дзиб вöр шöрын, но сы бокöт кыссис непаськыта весöтöм дзуздинскöй туй, кöда кузя унажыксö ветлiсö тöвнас, кöр кынмасö нюррес да юэслöн оллес.

Керкуэс дынсянь и топ Колыч юок дорöдз кыссисö ыббез, торйöтöмöсь кыдзза-пипуа рассэзöн. Муыс вöлi бур, вильса, но гöрöмыс стрась мырья и етша — кыкдас десятина. Правда, вöлiсö эшö тороккез и Колыч саяс, но сэтчин кöдзлiсö только гусьöн и унажыксö — лён.

Деревняэс матын эзö вöлö, и монастырьлö крестьянаыс татöн етша отсавлiс. Быдöс уджсö — кöдзны, гöрны, вундыны, вартны, изны, ытшкисьны, заптыны пес — керисö монашкаэс. Нiя гöрдззисö чулки-испотка, кыйисö дöра — сöдзовöйö, джендöсовöйö, торковöйö, кручёнка, поньтоковöйö, керисö ной. Асьныс жö и кыйисö берся нинкöм — вотяцкöйöсь, мордовскöйöсь, рочöсь и нельки сапог кодьöсь — келаннэз.

Монастыряс овтöн Анна велалiс гöрдззыны саккез да мордаэз, кыйны пестеррез, зобняэз, куддэз, сов видзан дозоккез, лöсьöтны пожжез, корзинаэз, шöрасьны да вурсьыны. Дзолинь только дивуйтчис сы вылö, а некöр эз юась, кыдз мый керны, некöр эз отсась, кöть вель дырöн видзöтлiс сы удж вылö. Дзолинь унажыксö бергалiс вöв-мöс сьöрын, юкталiс-вердiс нiйö, веськöтiс нылiсь быдкодь висяннэз да йöвсьöтiс и пийöтiс кöта-пытша подаöс. Сiя кужöмöн, не зубыта, шедтылiс морт киись жель, кыскылiс синiсь ёг, чертитлiс-öвлiс чирöй, лöсьöтлiс чашкалöм пев, а сэсся, кöр петiс монастырьсис, отсавлiс öтiк старухалö бабитчыны.

Öтпырись, мича гожся асылö, Дзолинь да Анна доддялiсö телегаö кузь пеля Шлямырöс, саврасöй меринöс, да иньдöтчисö Верх-Иньва вичкуö, медбы сэтчинiсь настоятельница понда вайны виль еннэз да ладан. Гöснеч туйö поплö лэдзчöтiсö дуплятыр ма, быдса корзина озъягöд, чочком воронец да марьявуж туруннэз, кöднö поп любитлiс содтывны чайö.

Туй дорöт кыссис сук вöр. Лапыт кöззэз да ньыввез, сорласьöмöсь листа пуэзкöт, паськыт уввезнаныс сайöвтiсö кымöрсö, падмöтiсö шондi югöрресö и, дзик пож пыр, сысъялiсö улö, нятьöсь да гöпа туй вылö, асывся югытсö.

Шлямыр шляпкис-мунiс не öддьöн орöтчöмöн и орöттöг вартiс кузь бöжнас боккесö — вашöтлiс гуттэзöс да лöдззезöс. Телега небыта шовкöтiс кыза мавтöм колесоэзнас, ёркöтiс пу вужжез кузя, шольгис-орсiс ванас. Öтмöдöрсянь кылiс кöклöн сьылöм — нора, нюжвыв, сибдöм голоса.

А нiя пукалiсö телега шöрас ордчöн и чöлiсö.

Гажтöм, сьöлöм полö.

И руыс умöль — баг кöра, пöжсьöм, сiсьмöм лист дука.

Лог дорас ни, кытi Вöрьяшор тэрмöтö ассис сьöдкодь кöдзыт васö, Шлямыр горöн пырснитiс, сувтiс и пондiс орсны кузь пеллезнас. Дзолинь пернапасасис, зэгнитiс вожжиэзнас, но вöлыс оськöвтiс бокö, а не одзлань.

— Ен батюшко! — шушкыштiс Анна да зэвжыка жмитчис Дзолинь бердö. — Свят, свят! — сiя бутки-батки кресталiс-вартiс мороссö.

Вöлыс одзö кушымтак петiс дженыт шабура, виззя вешьяна и важ нинкöма шапкатöм морт.

— Эд полö, ен кутюэз, — шуис сiя да сыныштiс чуннезнас кузькодь тошоксö. — Öши ме, туй кошша. — И джöмдiс, бытьтö кывсö курччöвтiс, да синтырьяс пондiс видзöтны монашкаэс вылö. — Не я, öнджа...

Ойнитiс Дзолинь, кунис синнэсö и только тырппезнас, шытöг юалiс: — Ёська, тэ? Чужöмыс аслас гöрдöтiс, лоис бикыв кодь.

— Ме, Полина.

Полöмыс да дивуйтчöмыс Дзолиньлöн чулалiс, и сiя горöн ни, чорытжыка шуис:

— Ме сестра Ефимия öнi...

— Кытчöдз мунан, сестра Ефимия? — невна тешитчöмöн юалiс Ёська. — Поди, кыскан мымдакö? Кокöс дойдi, сьöкыт муннытö.

Кыдз бы эз мöд ямщичайтiсьыт чорзьöтны сьöлöмсö, а эз вермы.

— Пуксьы, пуксьы, — деревенскöй нывка моз, а не кыдз монашка, просто горöтчис Дзолинь да тойыштiс боксис Аннасö.

Ёська жагвыв кивыльтiс-кыссис телега дынöдз, кышасис-пуксис ящик дор вылас.

— Кынöмыт, натте, сималö? — юалiс Дзолинь и кыскис öн увтiсь бановöй пешорка, чöвтiс вевтсö, сувтiс кок бокас. — Сёй. Картов да нянь. Солыс абу.

Ёська ням-ням керыштiс öмнас да ныкнитiс вöлыслö. Шлямыр вöрзис, пондiс дюттясьны-мунны одзлань. Мужик косялiс нянь ярушниксö шöри и ярскис-курччöвтiс, мымда тöрис öмас.

Монашкаэс сэсся нем эз юасьö, и сёйисьыс шы эз сет. Сiя гардiс öмтырьяс, сьöкыта ньылалiс умöля курччалöм идъя-зöрья няньсö, но öтпыр эз виньдыв, öтпыр эз шоччöт пиннесö, а сё изiс и изiс паськыт аннэзнас.

Кыдзкö кывсис Дзолиньлö, что Ёська шышöн олöма — пышшалöма не öтiк год поп зонкöт, а öнi, тыдалö, локтö гортас. А поди, сё сайласьö да, сё гусьöн олö?

Петiсö Вöрья деревня дорö, и Дзолинь сувтöтiс вöвсö, висьталiс седокыслö:

— Тэныт ковсяс, натте, öн увтас...

Мужикыс бöра ням-ням керис öмнас да паськöтiс синнэсö, а ямщичайтiсь шуис:

— Пола ме. Кывсяс кö обителяс — кучикöс кульыштасö. Мужиккесö оз тшöктö...

— Дзеб сэки...

Бура дзебисö сiйö: турунокöн шебралiсö, öннас вевттисö. И чулалiсö ни деревнясö, да сэтöн, расок дорас, кресь пантасис мужик и сувтöтiс нiйö:

— Тi чалöй мöсöс эд адззылö? Талун гортö эз вовлы.

— Эгö, эгö, батюшко, — тэрмасьöмöн горöтчис Дзолинь и вöрзьöтiс вöвсö. Шлямыр жагвыв зэлöтiс гужиэсö, бытьтö тöдiс, что нiя кыйöмась не öддьöн крепыт нинiсь, оськöвтiс, и сэтчö кушык кашельтiс Ёська, Мужикыс кылiс этö и пондiс писькöтны-видзöтны телегасö. Монашка вотш вачкис Шлямырыс лядьвей кузя и горöтiс, топ заправскöй вöв вашöтлiсь:

— Ны, тувдöм шег! — и эшö öтпыр швычкис вожжи конецнас мериныс кадж кузя.

Шулай сайын ни, Вöзъясим керöс дорас, Дзолинь чеччöтiс важ соседсö, пондiс прощайтчыны. Анна колис нiйö, мунiс одзлань, и Дзолинь дрöжитан голосöн юалiс:

— Кысянь öнi?

Писарь пиян эз висьтав, кысянь локтö, мöдiк йылiсь казьмöтiс:

— Гортöдз кысся, Полина. Эм я гортö — ог тöд. Эн кывлы?

— Кывлi: быдöс ладно, слава богу.

— Пöрись кокораэс менам мый?

— Олöны, нянь сёйöны, натте. Айыт пö кучиккез керö.

— Кымöсыт эз на лöзöт? — кытшöмкö нёштöм шынньöлöн серöмтчис Ёська. — Кеймы нö, кеймы. И ме понда: ась кокö веськалас чожжык. А веськалас кö, петкöта тэнö татiсь. Кылан? — и павкöтчис кинас Дзолинь гырдззаö.

Эта павкöтчöмыс сывьялiс, дзик пым пар, сылiсь быдöс вывтырсö, бырöтiс садьсö, а сьöлöмыс сылiс и паськалiс, бытьтö горби одзын гос. Висьтав сылö Ёська: «Мунам мекöт», — и мöдыс куньöм синнэзöн уськöтчис бы сы сьöрö. Но Ёська шуис:

— Шыбыльт давай, сестра Ефимия, аслат туй кузя. И ме люга...

— Ен тэкöт, Ёська, — туйдöтiс сiйö монашка и кресталiс чужöмсö.

Енкöт я, не я мунiс писарь зон, а Дзолинь дынö, медбы петкöтны сiйö лöнь пельöсоксис гора шыа мирас, сiя годö эз вовлы.

А вöрьинскöй мужикыс, кöда кошшис чалушкасö, сётаки инмылöма монастыряс и висьталöма, что мукöд монашкаэс тöдчöны мужиккескöт и нельки сьöраныс нiйö кыскалöны, правда, дзебöмöн.

Матушка Магдалина, дачаись хозяйка, бура кывзiс этö, баитiс ласкова, но ассис «рам дзелёксö» дорйис и стыдитiс мужиксö: эн кö адззыв аслат синöн, дак эн нятьöсьт сöстöм отирсö да святöй обительлiсь нимсö. И тшöктiс ветлыны вичкуö юрбитны, медбы еныс босьтiс сылiсь грехсö.

Сыбöрын настоятельница мунiс песласянiнö, кытöн уджалiсö Ефимия да Анна. Пырис, чикыртiс синнэсö, лöгöн пельдöтiс кыввез:

— Кин сiя вöлi?

Пашмöм юраöсь, жаралöмöсь, вамöм запонаöсь, гырдззави пуджöм гöрд киаöсь, грешницаэс бергöтчисö ыбöслань, кöда одзын сулалiс, ровно суслон, ыджыт инькаыт.

— Ме тiянлiсь юала: кин? — ыждöтiс зыксö настоятельница.

Анналöн синнэс ыждiсö и коккес пондiсö дрöжитны. Дзолинь сувтiс сы одзö, юалiс кыдз позьö спокойнöйжыка:

— Кытöн, матушка? — и рамыник синоккезöн покорнöя видзöтiс ыждалiсь начальница öмö, но моросас быдöс пизис, ключöн бергöтiс.

— Öн увтас...

— Кин лоас? Маок да озъягöд дзеблiм. Да эшö ен, кöдö лöсьöтны иньдöтлiн.

— Еныс чöлö, а мужикыс кылöма кашляйтöм.

— Ог тöд, матушка. Вöлыс, поди, öнджа керис да, зöрöн эд вердiм.

— Но-но! — ырöстiс настоятельница. — И ен одзын сiдз шуат? — Сiя лэбтiс морос одзсис серебритöм крестоксö, нюжöтiс монашкалань.

— Некин, матушка, эз вöв, — дзирыта висьталiс

Дзолинь, пернапасасис Да окыштiс распятиесö. Шöри повзьöм Анна оськöвтiс сы бöрсянь да чупнитiс настоятельницалiсь кисö.

— Миян оланын уна быдкодь соблазныс, но миянлö оз ков видзöтны ны вылö, — велöтiс настоятельница. — Евангелиеын гижöма: «Блажен человек, который переносит искушение, потому что, быв испытан, он получит венец жизни, который обещал господь любящим его».

Матушка Магдалина петiс, а Дзолинь садьтöг пуксис лабичокö, чышкис кинас пымалöм голясö, мышкыртiс юрсö. Ыджыт шог шамыртiс сылiсь сьöлöмсö, юрсö, мороссö, пемдöтiс синнэсö: сiя, кöдö прокод ошкисö монастыряс, кöда вылö сiдз надейтчисö монашкаэс, бöбöтiс настоятельницаöс.

Казялiс Анна, кытшöм недолыт лоис модзанкаыслö, пондiс горзыны. Горзiс и Дзолинь да гусьöн, никсöмöн, каитчис:

— Ох, грехыс кытшöм! И мый ме кери?.. Простит, ен-батюшко, простит!..

Анна дугдiс горзыны, чышкис синваэсö, жöв керсис. И сэтöн сылö усисö тöдвылас притчаись кыввез: «Но эта эшö не медсьöкыт грех. Медсьöкыт грех — не веритны меным...» Сiдз шуис Христос öтiк инькалö, кöдö кутiсö чужöй мужиккöт. И Анна дугдiс дрöжитны, пуксис модзанкаыс бокö, малыштiс сылiсь юрсö, висьталiс:

— Кывзы, мый баитiс Иисус Христосыс: «Кин уна радейтiс, сылö уна проститчас». Тэ уна радейтiн, бура тöждiсин — проститас еныс... Проститас милостивöй...

Лöньсьыштiс Дзолинь, лэбтiс юрсö, малыштiс запоннас синнэсö.

— Эг, эг мöд бöбöтны... Мый лоис, ачым ог тöд.

— Этö бесыс чувйыштiс, — висьталiс Анна. — Еныс проститас, только кеймы ёнжыка. Тöдан эд, кыдз гижöма: «Иисус, восклонившись и не видя никого, кроме женщины, сказал ей: Женщина! Где твои обвинители? Никто не осудил тебя? Она отвечала: никто, господи. Иисус сказал ей: и я не осуждаю тебя...» И тэнö некин эз адззыв...

Но грехтöг, тыдалö, овны оз туй, и вельмöм монашка грешитiс эшö не öтпыр, и быдпырся сылiсь греххесö еныс босьтлывлiс ас вылас.

Вöрья дын пантасьöмсянь чулалiс кынымкö год, и монашка шоча ни касьтывлiс Ёськаöс. И вдруг панталiс монастырскöй ыб дорын, кытöн нiя Аннакöт кулисö бан.

Ёська ёнмöм и тошсялöм дзикöдз, но синнэс сё нiя жö — ыджытöсь, чожöсь, только дзик повзьöмöсь и кытшöмöськö пöттöмöсь. Час-мöд сiя олiс Дзолинькöт, но нем эз висьтась ас йывсис и сiйö эз тшöкты висьтасьны. Кöр пондiсö янсöтчыны ни, грешитiсь монашка юалiс:

— Ёська, висьтав меным: тэ разбойник али гусясись? Мыля отирыссянь сайласян?

Эз лöгась не эз шынньöвт паныт, только и шуис:

— Ме праведник, кöдö оз любитö Советтэс... Кыдз и ен кутюэсö... Мийö öткодьöсь тэкöт.

Кынымкö лун бöртi Ёська вились вовлiс монастырскöй дачаас — додьтыр вайис кытшöмкö груз, кöдö пыртлiсö настоятельница керкуö. Дзолинь сэк только кайöтiс ва да юкталiс сылiсь вöвсö, а кольлыны эз ветлы, кöть и Ёська бура корис: сы сьöрын пыр видзöтiсö не öтiк гоз син.

Дачаас размöд вовлiс и Михайло, Анналöн айыс, но сiя нылыскöт баитлiс етша — сё матушка Магдалинакöт, кöда сэк часто гöссесö привечайтлiс, шушкöтчис ныкöт.

Одзжык монашкаэс кельяэзöдз, дзик ош гуö, мирскöй суетаыс эз сибавлы, а нiя годдэзö оланыслöн зыкыс локтiс, кыдз баитöны, не только Зукайсянь и Карагайсянь, но и быдласянь.

Кывсис, что игнассясö вичкуэз, частнöй лавкаэз и монастыррез. И нылiсь быдöс хозяйствосö босьтасö пö коммунаэз да колхоззэз, читальняэз да школаэз. Матушка Магдалина сойнас ветлöтiсö, топ ньöрьялöмöсь, и етша баитлiсö обителись олiссезкöт, но, кыдз юöртлiсö ыджытжык пеляэс да лэчытжык синаэс, уна койисö ас коласаныс и етша узьлiсö ойезнас — сё мыйкö гуддисисö, бытьтö муошшез, дзебасисö да ылöтлiсö, мый эм монастыряс буржыкыс, бокö.

Кыдзкö öтiк асылö, эшö пемытöн, саймöтiсö Дзолиньöс да Аннаöс и иньдöтiсö Визяйö гробла — кулöма старуха-монашка.

Лэдзчисö, кыдз пыр, тыра додьöн, только кыскисö не сю, не ма, а коробья да корзинаэз, бура каттьöмöсь пышовöй öноккезö да кöрталöмöсь ён гезоккезöн.

— Бура сiйö берегитö, эд жугöтö, — висьталiс настоятельница. — Сэтöн свадьба козин: еннэз, бекöрпань, кушак да чышкöт.

Козин дак козин, нылö мый? Лэдзчöтiсö, сетiсö, кинлö колiс, босьтiсö гроб да бöр иньдöтчисö гортаныс.

Шондi смекайтчö кымöроккез сайсянь, видзöтö, мый керсьö му вылас. А Шлямыр рöктö-шлямыртö, обедайтны тэрмасьö. Анна, бытьтö клирос дорын, псаломмез сьылö.. Дзолинь кокалö нырнас — сунöтö сiйö. И позис бы водны телегаас да узьны, но гробыскöт ордчöн неохота жö нюжöтчыны.

Сiдз нiя и пырисö Визяй волокö да мунiсö верста-мöд. Сэтöн пантасис старик, сувтöтiс Шлямырсö, дженыта висьталiс:

— Морт доймис, мунны оз вермы.

Сiя босьтiс проводничайтiсьыслiсь вожжиэсö, вожасис гроб вылас и веськöтiс вöвсö вöрас.

«Эта разбойник!» — койыштiс Дзолинь юрö дума, и сiя, ровно чушкалiс кинкö, чеччöвтiс телега вылiсь, котöртiс вöлыс одзö, кутiс сiйö сермöтöттяс.

— Тэ бöбöтiн, тэ...

— Эн горöт, косялан öмтö, — öлiс старик. — Матушканыт тшöктiс.

Анна мöдiс чеччыны жö, но старик кутiс сiйö воротöттяс, небурика зэгнитiс, шуис:

— Эн пиньлась! — и тэрмöтiс мöдсö: — А тэ мый видзчисян?

Старикыс вöлi лöг и страшнöй, и Дзолинь шытöг пуксис Анна бокö.

«Ежели тшöктiс матушка Магдалина, дак нем умöльыс оз ло...»

Вожжиöн вачкöмсянь Шлямыр дрöгнитiс, шымыртiс бöрсö и дзарьясьöмöн чепöссис мунны кулига ладорö, кöда сайын тыдалiс пыдын лог. Сы дорöдз старик пырис туйтöг — чашьяöт, пу йыввез кузя, жельнöг да понсэтöр кусттэзöт, бергöтiс вöвсö и сувтöтiс лягаок йылö. Сэтöн, сайöвтöм кузь турунöн, му вылас узис морт. Дзолиньлö тыдалiсö только сапога коккез.

Старик вештiс бокöжык гробсö, чöвтiс сы вылiсь öн, нöбöтiс узись мортыс дынö, ольсалiс турунас. Кокнита, дзик том морт, кыскис узянсö öн вылас, кытсалiс монашкаэсö:

— Кутö коккес дынöт, пуктам...

Нето полöм, нето стыд жмитiс Дзолиньлiсь сьöлöмсö, и сiя эз лысьт видзöтны сы чужöмö, кöдö нöбöтiсö. И только телега дынас, кöр старик лэбтiс ни мортыслiсь юрсö радз дорас, сiя дзар керис одзас да ойнитiс: доймöм мортыс вöлi Ёська. Ойнитiс и личöтiс öн пельöссö. Анна эз ешты кутны не öнсö, не коккесö мортыслiсь, и Ёська нильдiс улö.

— Китöм ракаэз, мать! — лöгасис старикыс и свистнитiс-чапкис öнсö бокö. — Видзö морт моз!

Лэбтiсö гроб бокас, водтöтiсö. Эз на ештö вöрзьöтчыны, лог саяс кылiс лыйöм. Анна перыта кресталiс чужöмсö.

— Эд вежмасьö и эд пиксö! — старик осьтiс гробсö, чапкис сэтчö öнок и кайис телега вылас, сюйыштiс Ёськасö гробас, öдззöтiс вöвсö. Мунiкас ни сiя пуктiс гроб вевтсö, вевдöрас ольсыштiс мöд öнсö.

Туй дорас сувтöтiс вöвсö, висьталiс:

— Ме кольчча, а тi тэрмасьö. Монастыряс панталасö. Вежöртiт?

Мунiсö нiя верста ли, кыкö ли, кöр панталiс нiйö Гаврила Савыркин — верзьöма вöла, пишаля.

Радмыштiс Дзолинь: роднöй племянник! Эшö мöйму челядь кодь вöлi, а öнi мужик лоöма, милицияын уджалö пö.

— Кытчö ветлiт? — юалiс Гавра.

— Визяйöдз, — висьталiс Дзолинь. — Гроб кайöтам, сестра Конкордия кулiс да... Царство небесно сылö, спокойно место.... А тэ кытчöдз, Гавру?

Савыркин эз висьтав, одзлань юасис:

— Кинöскö адззылiт туй вылас?

— Эгö, слава богу, — шуис тёткаыс да вöрзьöтiс вöвсö. — Тэрмасям, Гавру, некöр баитны... Сет поклон айöлö да мамöлö, дядя-тёткаöлö... Да берегит асьтö — лыйсьöны кытöнкö.

Монашкаэс мунiсö, а Савыркин кольччис сулавтöн. Чожа мыйись сы дынö вöрсис петiсö нёль верзьöма морт, баитiсö-керисö да пондiсö гöнитны монашкаэс сьöрö. Анна казялiс этö да мöдiс висьтавны Дзолиньлö, но повзьöмсяняс сылiсь голясö пиньöвтiс ойтöв, и сiя шыасьны эз вермы. Дзолинь и сытöг кылiс, кыдз сiйö вöтöны, но и бöрас эз видзöт, а думанас пондiс лыддьöтны Моисейлiсь заповеддез: «И возлюби господа твоего всем сердцем твоим, и всею душою твоею, и всем разумением твоим, и всею крепостию твоею...»

Верзьöма вöла морттэс шакардаöн одзалiсö монашкаэсö. Но медбöрьяыс вдруг бергöтчис бöрлань и сувтöтiс вöвсö оча ныр Шлямырыскöт. Дзолиньлöн пик мунiс сьöлöмыс, сiя и Моисейсö заповеддезнас вунöтiс, и вожжиэс кисис мезмисö.

Шлямыр öддьöн лöга, визжитöмöн, ивнитiс, шамыртiс пеллесö и векыштöм öмнас увйыштiс вöлыслö, и сiя чепöссис бокö, а хозяиныс бытшöма косьöвтiс сiйö нагайкаöн да вöтчис Гаврила сьöрö.

Сiя гожумö монастырись олiссез пыр кежö колисö дачасö да этапöн иньдöтчисö Дзуздин туй кузя Россия шöрö — строитны социализм, кыдз висьталiс монашкаэсö кольлавтöн Гаврила Савыркин, конвойлöн начальник...

Быдöс этö Дзолинь тöдвылö уськöтiс Анна йылiсь юöр, и старуха бöра — кынымöтпырся ни! — кöсйисис кайлыны монастырскöй дача местö, кытöн одззамоз гажöтöны мусö да отирсö нинпуэзлöн да тополлезлöн аллеяэз, кытöн сестра Конкордиялöн сiсьмöны грешнöй коскаэс.

Йöз муэзас Дзолинь дырсö эз ов и бертiс гортас эшö не пöрисьöн, но аймамсö эз ни адззыв. Сiсьмöм керкусö вузалiс пес вылö да неыджытö, öтiк öшынаö, босьтiс Ыштайись и мунiс овны сэтчин, Гаврила бокö: может, мыйöнкö пö кöр и отсыштасö, а кöть и озö, дак сё гажажык, ежели ордчöн олöны не чужöйöсь.

Медодзза жö годас, кыдз петiс гортö, пондiс уджавны колхозын. Ветлiс и ыб вылö, и видз вылö, и пес кералiс, но не быд лун, а шочыника, и сiйö некин эз вид, эз дойд кылöн: сiя колхозницаöн эз вöв, а уджалiс просто сiдз, бригадир тшöктöм сьöртi — колхознöй му вылын пö олан, и огородечöн пользуйтчан, и коза да баля видзан, дак отсав коллективыслö, содты сылö вынсö.

Мöд годас инькатö корасис уна челядя дöвеч, но Дзолинь сы сайö эз мун, сё надейтчис Ёська вылö, кöда, кывсис, пукалöма тюрьмаын да, кöр лэдзöмась, мунöма овны кытчöкö мöдiклаö.

Но видзчисис весь, мужикыт эз иньды некытшöм юöр. И вöлись уна кад бöртi, тысяча девятьсот сороковöй годö, Савыркин Гаврила гижис финскöй фронт вывсянь, что ны частьын вöлi Лячканов Ёська и öтiк ыджыт бой бöрын мортыт эз ло: то ли вийны сюрис, то ли пленö шедiс.

Война бöрсяняс Дзолинь ветлiс военкоматö, тшöктiс кошшыны öшöм мортсö, и дыр мыйись сылö локтiс гижöт: не кулöммес, не ранитöммес коласын, не öшöммес списокын Лячканов Иосиф Аристархович оз лыддиссьы.

Эта бöрсянь, кыдз Юголь посадын оссис вичку, Дзолинь заочнöя отпевайтiс Ёськасö и гижис торья, век кеж касьтылан, сёртокö. Сэк жö и тöдсасис Епимейкöт, кöда вичкуас вöлi нето сторожöн, нето завхозöн, а сельсоветсянь вöлi иньдöтöма счётоводöн.

И эшö öтiк буртор вöлi Дзолинь оланын — югыттор, мича ойлун, кöдö часто касьтывлö, нельки ошшасьлö йöз дырни, — фронтлö отсалöм. Сiя лунсянь, кöр округö локтiсö Ленинградiсь эвакуируйтöм отир, и война конецöдз инькаыт аслас баля вурунiсь гöрдззис носкиэз да перчаткаэз фронтовиккез понда, а тысяча девятьсот сорок третьöй годö оборона фондö сетiс тысяча руб деньга да кык коза.

Дыр эшö, натьтö, пукалiс да касьтылiс бы важсö Дзолинь, ежели бы эз вöрзьöтö сiйö.

— Эй, тэ мый нö дузгыльтчöмыт этшöм гажа лунас? — сувтiс сы одзö кодыш кодь мужик. — Али грешнöй лыэт висьöны?

— Коскаэзö даки грешнöйöсь, натте, милашко, да оз на висьö... Яндзимö вот мöдö висьлыны.

— Эта абу беда, что яндзим доймö. Вай пятёрка — часöт веськöтам сiйö.

— Абу эд, милашко, деньгаö... Тэ ме дынöдз?

— Тэ дын — рушмöм кушманыс дын? Эн серав менчим бухгалтерскöй юрöс! Ме внучаткатö мöда корасьны.

— А-а, да тэ Чикиськин тай...

— Сiя и эм: Кирилл Потапович!

— Инькатö разь чапкин? Али кык иньöн бы олан? Чикиськин эта вылö нем эз висьтав, мöдöрö пондiс

кöстыны:

— Дак, шуан, яндзимыт висьö? Эм четушкаок менам, лок пырам да лечитам сiйö. И дело йылiсь баитыштам.

— Дело йылiсь, дак пыралам нö, — чеччис старуха, медбы судзöтны ключсö, но эшö öтпыр юалiс: — А кытшöм жö сёдаки могыт, милашко? Смилитны али тшыкöтны кинöскö?

— Тэ разь верман эшö?

— Мыля нö, милашко, ог? Менам эшö öтiк пинь эз усь, только чирйиссисö мымдакö. А оз вермы тшыкöтны сiя, кöда пиньтöм ни.

— Ме мöдiк могöн часöт.

«Мöдiкöн?» — думыш керис Дзолинь и решитiс не лэдзны керкуас и пондiс кошшыны ключсö нач мöдiклаись: малыштiс бурундук дорсö, палисадник столбок сайсö, лабич увтсö, тöждiсьöмöн горöтчис:

— Абу эд кольöм ключсö, эстöн и колас, натте, баитны. Пуксьы да висьтась инö, четушкатöг и баитам.

Чикиськин лöсьöтчис вöлi мунны, но бертiс и затшкисис-пуксис Дзолинь бокö, чышкис тырппесö, шуис:

— Висьтав внучаткаытлö: ась оз сувт менам туй вылö. Бытшöмика висьтав... Сельпосиным предыс чожа черпезьдас. Олявкаыт этö только и видзчисьö... Но преднас лоа — ме! Сылöн нырыс эшö лякöсь.

— Мыля черпезьдас? Шогалö разь? Ме верми бы отсавны.

— Сылö отсöтыс оз ков — внучаткаытлö отсав. Тшупöтав сылö: ме лоа, а не сiя! — Чикиськин сьöкыта, штакетник бердö кутчисьöмöн, лэбтiс лёльзьöм вывтырсö, не öддьöн чорыта сувтiс коккез вылас.

— Но-но, висьтала... А тэ мун, ен тэкöт! Чикиськин макнитiс кинас да сукыльтiс-мунiс посад ладорö.

Сёрöнжык быдöс этö Дзолинь висьтасис Олявкалö, а сiя шуис:

— И тэ веритiн сылö, код юрыслö, что ме предас бы пукся? Да и предыс здоров, öтiк дозiсь Чикиськиныскöт юö... Выжывитас буди, но и Чикиськинлö преднас сёравно не лоны!

«АДЗЗЫ, ИНЬКА, ЖÖНИКÖС...»

Петiс сiдз, что Котöрок кайис Виль Гублянöдз: могильник весьтöт мунтöн сунасис, а Олявка да шофёр вунöтчисö сы йылiсь. Олявкалö, конечно, не Котöрокви вöлi: сы моросын, сы юрын, сы син одзын — Андрей Никитич, а точнöйжыка шуны — Андрюшка, кöдакöт пантасис Перемын, кöдалiсь дыркодь кывзiс лайкыт стиххез радейтöм йылiсь, кöдö жмитлiс бердас, кöдатöг, кажитчис сэк, и неделя оз вермы овны.

«Мымда жö сэксянь чулалiс?» — вынсьöтчö тöдны Олявка и некыдз оз вермы лыддьыны: пеллезас, дзик долыт песня, горалö Андрюшкалöн голос, горалöны стиххез:

Пемыт ойнас онö пышшö,

Мича лунöн öшö садь,

Бытьтö виззьö менö свищень,

Бытьтö лöсйö менö шать.

Тэ эн видчы, мам, эн летсьы,

Он ни вермы керны нем:

Сёравно ме муна сэтчин,

Кытчö кыскö том сьöлöм...

«Кытчö кыскö том сьöлöм... А меным эд тридцать саяс ни, — то ли осудитiс, то ли жалейтiс асьсö Олявка, — но вот кыскö, кыскö... Мыйлö? Мый кошшö? Эд сэтшöмыс, кöда вöлi кöркö, сэсся оз ло. Да и некытшöм оз ло. Нем оз ло».

Думанас пыксис бы, эз бы мун, а сьöлöмыс бöба чепсасис, ыждалiс да тэрмöтiс.

— Мыйлö сэтчин мунам, Ольга Гавриловна? — юалiс шофёр, кöр пондiс сибöтчыны Виль Гублян дынö. Олявка этö юалöмсö эз видзчись и öшис ответнас. Гöрдöтыштiс, а медбы дзебны гöрдöтöмсö, кыскис чышьянок, пондiс весöтны синнэсö да думайтны, кыдз видзны очакыв.

— Дак кытчö сувтчам? — бöра юалiс шофёрыс.

— Магазин дынас, кытчö сэсся, — шуис Олявка.

— Мый, асьныт пондiт товарсö кыскавны?

— Кöр нiя лöсьöтчасö вайны, дак чериным сiсьмас. Вон кытшöм жара!

Машина сувтчис. Котöрок сьöласьöмöн лэдзчис кузовись, иньдöтчис могильникö. Шаг-мöд бöртi сувтчис, висьталiс:

— Гавриловна, Нинаыслö, поди, кайöтан черисö? Колö пö тожö.

— Верма и кайöтны, — шуис Олявка и, кöр колис ларёкас черисö да помидоррез, машинанас мунiс Нина керку дынö.

Öнöдз сiя видзсис повтöг, а кыдз осьтiс воротасö да тальччис вылын порог сайö, мылаыс нач бырис, бытьтö сахарöн куллез новйöтiс. Сё жö вынсьöтчис и кайис пемыт посöдзö, тарскöтыштiс ыбöс косякö и, ответсö видзчисьтöн, осьтiс ыбöссö. Но мый эта? Ыбöс саяс пемыт, только веськытланяс, кытöнкö потолок бердас, небурика югдöтö векнитик öшынок, а пытшксяняс вайöтö пöдöм, неолан дукöн. Оз я прикашайтчы? Али ыджыт думасянь юрыс дикмис?

Сiя сулалiс и видзöтiс пемытас, видзчисис, кöр велаласö синнэс. Вдруг бöрсяняс койыштiс лунся югыт и кылiсö кокшыэз. Олявка бергöтчис югыт вылас и казялiс осьтöм ыбöс, а сы весьтiсь — мортöс. Сылöн чужöмыс эз тыдав, но сразу тöдiс, этö сiя, Андрей Никитич, неыджыт мыгöра томсянь, öнi лоöма топытжык, паськытжык пельпона, а нюжавны абу ни ештöма.

— Тiйö не сэтчин пырат, — негорöн шуис Верепов. — Керку ыбöсыс татöн, а сэтчин — чомйö... Пырö, только хозяиннэс гортын абуöсь.

Голосыс лöньжык, баитö жагвыв, быд кывсö горöтчö бытшöмика, торйöтö мöддэс дынiсь.

— Эмöсь али абу — меным сёравно, — горöтчис Олявка и казялiс, что голосыс дрöжитö, дзик йöрмöм, кöрталöм. — Нинаыслö чериок вайи — морскöй ёкышшез. Да эшö öтi-мöдi.

То ли чужöмыс сьöртi, то ли шыыс сьöртi, но Верепов тöдiс локтiсьсö. Тöдiс и, мый сыкöт некöр эз вöвлы медбöрья дас годö, сылiс местаас, шай-пай лоис, дзик повзьöм велöтчись доска дынын. Сiя мыйлöкö босьтiс юр вывсис шляпасö, лöсьöтыштiс юрсисö да бöр пуктiс и пондiс кизявны йöрнöссис медвылiсь кизьсö, но мымда бы эз гуддись, а нем эз пет. Сэк Олявка чапкис кисис кулёккесö песласян машина вылö, оськöвтiс Верепов дынö, джын голосöн шуис:

— Вай-ко, Андрюша, ме...

Шытöг, кыдз кывзiсь челядёк, Верепов нюжöтiс голясö и дзебис киэсö кос саяс, бытьтö полiс, что нiя вермасö дзугны делосö, и, кöр Олявка кутiс ни кизьсö, горöтчис:

— А оз и ков, зэлытöв...

Жильк-жольк оссис ворота, и посöдзö тiр-тор кайис Нина. Сiя казялiс Савыркинаöс, шынньöв пыр здоровайтчис сыкöт, корис пырны керкуас, и мöдыс пырис, кöть и сьöлöмыс кыскис öтöрас, кытчö петiс Андрей Никитич.

— Эн повзьы кöть — тыримö нятьнас да буснас, — извиняйтчис хозяйка. — Кык лун эд вöлись гортын эг вöв, а недозорствоыс быдлаö петöма.

— Шуöны тай: инькатöм керкуыс — дзик карта, — отсалiс Савыркина.

— Мыйнö не да! Сэтчö жö кадыс, топ калитöм кöрт, оз лэдз и пуксьыны: и пессö колö заптыны, и садитчыны, и семик кежас лöсьöтчыны, а тэ не сизим киа-кока, быдлаö он паськöтчы... Тiйö товар кайöтiт?

— Вайим невна. Сiйöн и кежи татчö... На-ко дзимляв. Чери да мый да, — Олявка мыччис Ниналö кулёккесö. — Котöрок тшöктiс пыртны.

— Спасибо инö. Эн бы вай, дак черитöг и кольччи бы, — баитiс Нина. — Городас жö вöлi, да эг адззы черисö. А гортö кайи — баня лонтны пондi.

Öтöрас кылiс гудок шы, и Нина уськöтчис деньга кошшыны, но Савыркина сувтöтiс сiйö:

— Эн кошшись, некöр меным... Но, пыралö миянöдз...

Посöдзсис петiкö панталiс Андрей Никитичöс, сувтыштiс сы одзö и гусьöн, но öддьöн корöмöн-корис:

— Андрюша, вовлы жö...

И Андрей Никитич кöсйисис:

— Вовла, Оля... Тэ Гублянас олан?

— Гублянас. Сельпо сайись улицаас... Вывланьын.

— Адзза.

Кöть и Котöрок висьталiс, что Верепов шогалö, но Олявка нем сэтшöмсö эз казяв: мортыс просто мыдзöма. Сiйö ёна маитöм-кöвдалöм унавевья оланыс, курöтöм сылöн курытыс, сирсолыс. Конечно, сылiсь муссö нималö сьöкыт дума, сiя сирвезöн каттьö-зэлöтö сьöлöм гöгöрсö, кольмöтö, топ багульник дук, вемсö, вот и кусöмась мужикытлöн синнэс.

«Ась, ась кусöмöсь, — думайтö Олявка кабинаын пукавтöн. — Вились öзъясö ловья биöн, бöра лоасö сэтшöмöсь жö, кытшöмöсь вöлiсö сэк, Перемас... Эм менам моросын сэтшöм биыс, и ме öзта сiйö. Нето öзта, нето ачым чиж-важ сотча — шом лоа... А может, тшöктыны отсавны? — вдруг тöдвылас усис бабыслöн сьöласян-пöлясян уджыс, кöда понда кöркö лэбтылiсö шум школаын, кöда понда джын Губляныс шуöны сiйö бабöн да величайтöны айним сьöртi. — Оз, оз ков! Ачым, только ачым. Этаын некин меным оз вермы отсавны!»

Бабсö сiя тожö не öддьöн ошкис сы «специальность» кузя и матö дынас эз лэдз, унажыксö баитлiс сыкöт сiдз жö, кыдз и мукöд отиркöт — не пыма, не кöдзыта. Этö талун ласкова панталiс, но сэтöн мöдiк причина: сьöлöмыс небзис долыт юöрсянь, кöдö вайис Котöрок.

Да, бытшöм юöр! А эд случайнöй, дзик зэра лунö кымöррес гын пырйöт шондi воть сюрис, а инькаытлiсь олансö онняюртны вермас. Не вермас, а, кыдз сiя, надейтчö, — сё ни керас! И Андрюшалiсь быдöс олансö бергöтас, ловсö борддэз вылö лэбтас, песня сылö сетас. И дугдас сэсся берся рожаыс сiйö тшыг синнас сёйны, нятьöсь кинас одзсö и бöрсö лапкöтны, дукöсь öмнас сы одзын небаснисö дульны-лёбны. Председатель, кöр сылö юрас шедас, а шедлö часто, сiдз и котрасьö сьöрсяняс, и гортас локтö, не уджалiкö, не шоччисикö спокой оз сет.

Гублян дынас ни пантасис нылö городскöй паськöма нывка. Машинаыс мунiс перыта, и Олявка эз ешты казявны сылiсь чужöмсö, но адззылiс, что сiя джинсовöй вешьяна и ыджыт каблука кöмкöта, шульга пельпон вылас кузь кöла сумка, юрсö кöртыштöма алöй чышьянокöн. И эшö син вылас усис: сiя вöснит да веськыт, дзик увтöм шать — не морос вылас, не кадж вылас, тыдалö, яйыс абу тырмöма.

«Спортсменка, натьтö — решитiс Олявка. — Вон кытшöм кокнита мунö — кокыс му бердас оз павкав... Конечно, спортсменка. — И джöмдiс эта кыв вылын. — Спортсменка? А кытчö сiя мунö?»

Тöдчис, что эта «тётя шатьыс» не татiсь. Но кытчö сiя мунö? Кин ордö? Савыркиналöн эз вöв ыджыт догадьыс, но эстöн сiя ровно кылiс. Котöроклiсь голоссö: «Инькаок сы дынö леститчö пö, важ модзок. Видзöт, ась оз одзав тэнö: ченпиёнка пö, кöч моз котрасьö».

Котöрок, конечно, эстöн емтöг вурис-бöбöтiс, да адззö еныс — не ас пондасис тöждiс, а йöз морт понда, бур морт понда. И, видзöт, кыдз инмис бöбöтны: Олявкалöн вöрзис сьöлöмыс местасис, пондiс дюттясьны-уявны, бытьтö ва вылын чаг, и быд секундаöн пессис сё öддьöнжык, перытжыка, полöмöнжык, кытчöдз эз лэбты ыджыт, дзик пожар коста, тревога.

И сэк Савыркина тшöктiс:

— Сувтöт ноко машинатö: стариктö эд колим!

— Быгыльтас и подöн, ойöдззас эшö ылын, — пондылiс пыксьыны шофёрыс, но тöдвылас усис, тыдалö, кöртзырыс, кöдö босьтiс сылiсь Котöрок, кöда вермас ковсьыны быд минутаö, а зыррес не галяэз, туй вылас оз валяйтчö, и сувтiс, жагвыв бергöтчис и мунiс бöр могильник ворота весьтöдз, чеччöтiс Савыркинасö кабинасис.

Могильникас Олявка эз пыр — сылö нем керны сэтчин, — а мöртчöтiс синнэсö Арашорка сайö, Виль Гублянлань, кытчö тэрмасис «чемпионкаыс».

Машина размöд тутöстiс — кытсалiс стариксö — и öвсис. Шофёр петiс кабинасис, подножка вывсяняс висьталiс:

— Ог тöд, кыдз тэ, Ольга Гавриловна, а ме видзчисьны ог кутчы.

— Видзöта ноко, может, кулiс ни, — горöтчис Савыркина да вуджис ров и пырис вöрокас. Олявкалö Котöрокыс эз ков, но сiя сё жö кытсöвтiс стариксö и бöр петiс могильник рассис и грива увтсис сразу казялiс городскöйсö: сiя виззис-мунiс машинаэзöн волькöтöм туй кузя.

Сы вылö видзöттöн Олявка ниртiс оча ки, топ миссис, курччалiс тырппесö и эз тöд, мый сылö часöт керны, кöдöрö уськöтчыны. А мöдыс деревняас ни пырис, йöр дорöт небыт лудок кузя чышкö-мунö да веськыт кинас жар русö сынö. Вон и Нинаэс уличкаö кежис да эшö перытжыка öдззис визывтны коккезнас.

«Паджа сылiсь пантасьöмсö, — нетшкöвтчис грива увтас Олявка. — Сёравно паджа!»

Гортсис петiс Нина, казялiс городскöйсö да паныт иньдöтчис. Пантасисö, радöн баитöны.

«Эта нö мый? — дивуйтчö Олявка. — Поди, Андрюшаыс ордын олiс ни да? Дзик родняэз тай...»

Огородечись мыччисис нылочка, ыкöстiс:

— Тонька!

Городскöйыс макайтыштiс кинас и торйöтчис Нина дынiсь, медбы пантавны нылочкасö. И вежöртiс Савыркина, что городскöйыс — Ниналöн нылыс, сiя Перемсянь локтö. «Тьфу тэнö, стожар кок, мый кузя нюжалöма!» — эшö öтпыр дивуйтчис Олявка. Сiя пöрччалiс кофточка киззесö, павтыртiс юрбöрас чышьянсö да пуксис кырасок дорокас, кытöн важ, мöймуся турун коласöт нюжöтчöны вывлань бледыник турун заоккез.

Кымöрас гыпкис самолёт — то ли лыйис, то ли ыджыт скоростьсянь сiдз руыс потiс, — и шочыник кыдззез вылiсь карзöмöн да чавзöмöн лэбтiсисö ракаэз да чавканнэз.

Чорыта, лöга тутöстiс машина. Сылiсь горсö кылiс Нина ныввезнас, и нiя куимнанныс бергöтчисö яг ладорас и дыркодь нёджжалiсö, кыдз кажитчис Олявкалö, сiйö, но эз вермö тöдны, мый ылавлöм инька кошшö могильник мыс вывсис, эз догадайтчö, что сiйö, топ öтка листокöс вына тöв, татчö шупкис сы моросын ымьялан би, кöдалö нимыс — радейтöм, да сылöн синтöм-пельтöм сой — вежöктöм...

Дата добавления: 2015-11-16