|
Читайте также: |
Пантасясö Гублян дорас богатыррез. Öтыс шуö:
— Тэ мыйлö этчö локтiн? Эта местаыс миян, Иньва дорись йöзлöн.
Мöдыс шуö:
— Бöбöтчан, эта миян, Кöсва дорись йöзлöн. Споритасö-керасö, нем бердöдз оз локтö и шуасö: кин öддьöнжык шутньöвтас, сылö и лоны эстöн хозяинöн.
Иньва дорись богатырь Кудым-Ош шутньöвтас — мöдыслiсь пеллесö чанöтас. Кöсва дорись богатырь Юкся шутньöвтас — мöдыслiсь пеллесö чанöтас. И шуасö сэк: кин вылынжыка чеччöвтас, сылö и лоны хозяинöн.
Кудым-Ош чеччöвтас — кöз йылiсь голи судзöтас. Юкся чеччöвтас — кöз йылiсь голи судзöтас. И эшö шуасö: кин му кузяс нöшнас вачкас да ва пичкас — сiя и хозяин лоас.
Кудым-Ош вачкас Жогормыс кузя — керöс увтсис ключ ва чепöссяс. Юкся вачкас Бакармыс кузя — керöс увтсис ва чепöссяс.
И вöлись шуасö: эта мулöн кык хозяин, кык коми богатырь — и Кудым-Ош, и Юкся.
Пеля-богатырь
Гублян вылö лöсьöтчöмась уськöтчыны сьöд ногайез, и ойыс нiйö вöтас Велва ю дорын. Вот нiя сувтчасö сэтчö. Сувтчасö, вöв яй пуасö да вильöтöны коскаэсö.
Локтас сэтчö Пеля-богатырь, юалö:
— Тi мыйлö, ногайез, локтiт?
— Гублянiсь добро босьтны.
— Разь сiя тiян?
— Вöлi не миян, а лоас миян.
— Ме шуа: оз ло тiян!
Сы вылын сераласö ногайес, вильöтöм коска, кыдз понлö, шупкасö:
— На тыткы да виньды и эн горав!
— Дак тi сiдз, сьöд чуманнэз?! — лöгасяс Пеля. Лöгасяс да кыдз топнитас да топнитас кокнас — муыс зэгавны пондас, и Велваыс береггесис петас да вöтяс ногайесö — öтiкö оз коль.
Кöбы не Пеля-богатырь — эз бы вöв, натьтö, Гублянным, а öнi вон кытшöм басöк сулалö — дзик чача!..
Ай коза лун
Кöркö вöлöмась деревняэз — Пась да Шабур. Пондöтöмась нiйö деревняэсö кык вон и öтамöдныслö бура отсасьöмась. Да и кыдз не отсасьны, кöр öтiк увтырись? И öтiк енлö эд юрбитöмась.
Оласö сiдз сотня ли, кык сотня ли год, и вунöтас отирыс, что нiя не чужöйöсь. Нельки еннэзныс не öткодьöсь лоасö: Пасьын медыджыт еныс — öшка, нимтöм пороз, а Шабурын — ай коза. Каждöй деревня аслас скöтиналö кеймö и только сiйö и почитайтö. Пырас кö кин йöрö — радуйтчöны, вердöны медчöскыт сёянöн, ырöшöн юкталöны, сюрресö чöскыт дука мавтасöн мавтöны: ась пö сетас отирыслö еныс шоныт керку да пöт олан.
Но вот мыйиськö шабуровса лöгасясö соседдэс вылö и нылiсь еннысö, öшканысö, öтпырись ньöрöн вачкасö, да ны син одзын эд!
А пасёвса мыйöн умöльжыкöсь? Тожö колö вештiсьны!
Кутасö мöддэслiсь ай козасö, мавтасö сюрресö мöс тупöсьöн. И керасö этадз как раз ны праздник ойö — ай коза лун панытö. А праздникнас шабуровсалö колö начкывны козасö, пуны шыд, тымуссö пöжавны и быдöс этö рытнас деревня шöрас сёйны.
Но мый öнi керны, кöр пасёвса згальничайтiсö ны скöтина вылын?
Думайтасö, думайтасö да шуасö: а мый, мавтiсö пö сюрресö, а не яйсö. Сетам пö юрсö попыслö, сiя лопкас мало-дело.
Сiдз и керасö умнöй юррет: нöбöтасö попыслö, кыдз и пыр керлiсö, коза юрсö, сетасö поповскöй работниклö: босьтö пö шабуровсалiсь гöснеч.
Работник виш-виш керас да шуас попыслö:
— Бур, батюшко, да зына... А попыс:
— Почему только сына? Во имя отца, сына, и святого духа...
— Коза юрыс зына, — шуö работникыс и попыс ныр увтö сюрресö вайöтö. — На, нюкайт.
Обидитчас попыс, ёрдас шабуровсасö и сэсся оз понды лэдзны ай коза лунсö порйöтны, а тшöктас празднуйтны престольнöй праздниккез.
Лöгасясö шабуровса да бура вештiсясö эта понда пасёвсалö: кутасö нылiсь öшка-еннысö, могильникись сiсьмöм öрö доддяласö, öрас кулöм кырнышöс чапкасö да öшка лун панытас гортас иньдöтасö. А праздник панытö деревняись кулöм кырнышöс адззывны, да эшö потöм öрын, кöдöн могильникö кыскисö джагöтчöм мортöс — эта медся ни умöль тор!
Дата добавления: 2015-11-16; просмотров: 58 | Нарушение авторских прав
| <== предыдущая страница | | | следующая страница ==> |
| Кыдз Зуйпи разбойниккезöс вермис | | | КЫТЧÖДЗ АБУ СЁР |